ირაკლი ღარიბაშვილი

ირაკლი ღარიბაშვილი მთავრობის მეთაურის პოსტზე: პოლიტიკური სპექტრის შეფასებები

57
(განახლებულია 18:46 19.02.2021)
პრემიერ-მინისტრის თანამდებობიდან გადადგომის შემდეგ ყველა მინისტრი მოვალეობის შემსრულებელია. „ქართულმა ოცნებამ“ პრემიერ-მინისტრის პოსტზე ირაკლი ღარიბაშვილი წარადგინა.

თბილისი, 19 თებერვალი – Sputnik. იმედი გვქონდა, რომ „ქართული ოცნება” პრემიერის თანამდებობაზე ისეთ კანდიდატურას შემოგვთავაზებდა, რომელიც პოლიტიკურ პროცესებს მოლაპარაკებების რეჟიმში გადაიყვანდა, თუმცა, არსებულ რეალობაში ეს ნაკლებად სავარაუდოა, განაცხადა პარლამენტის ვიცე-სპიკერმა, პარტია „მოქალაქეების“ წევრმა ლევან იოსელიანმა. 

გუშინ ყველასთვის მოულოდნელად გიორგი გახარიამ პრემიერ-მინისტრის პოსტის დატოვების შესახებ განცხადება გააკეთა, რის მიზეზადაც ოპოზიციური პარტია „ერთიანი ნაციონალური მოძრაობის“ თავმჯდომარის ნიკა მელიას დაპატიმრებასთან დაკავშირებით მმართველ გუნდთან აზრთა სხვადასხვაობა დაასახელა. 

მმართველმა პარტია „ქართული ოცნება – დემოკრატიულმა საქართველომ“ გახარიას პოსტიდან გადადგომიდან რამდენიმე საათში პრემიერობის კანდიდატად თავდაცვის მინისტრის ირაკლი ღარიბაშვილის კანდიდატურა დაასახელა.

„ღარიბაშვილის პერსონიდან გამომდინარე, მისი დამოკიდებულება ოპოზიციის მიმართ ყველასთვის ცნობილია, რაც აისახება მის ქმედებებსა და განცხადებებში. ჩვენი აზრით, პრემიერის რანგში ღარიბაშვილის ხილვა ქვეყანაში სიტუაციას კიდევ უფრო გაამწვავებს“, – განაცხადა იოსელიანმა.

მმართველი პარტიის მიერ პრემიერ-მინისტრის თანამდებობაზე ირაკლი ღარიბაშვილის კანდიდატურის წარდგენასთან დაკავშირებით კომენტარი გააკეთა ოპოზიციური პარტია „სტრატეგია აღმაშენებლის“ ლიდერმა გიორგი ვაშაძემაც.

მისი თქმით, თუ ირაკლი ღარიბაშვილი დაპირისპირების გზას აირჩევს და იქნება ვიწრო პოლიტიკური ჯგუფის დავალებების შემსრულებელი, მისი პრემიერობის ხანა, შესაძლოა, საწყის სტადიაზევე დასრულდეს. 

„ირაკლი ღარიბაშვილს, ისევე, როგორც „ქართული ოცნების" ნებისმიერ ლიდერს აქვს არჩევანი – დაპირისპირება თუ შეთანხმება და თანამშრომლობა. ჩვენ ხელისუფლებასთან მოლაპარაკებებისთვის მზად ვართ. ყველა დაიღალა ამ დაპირისპირების ფონით. თუ მეორე მხარე იქნება აგრესიული და შეეცდება ისევ შტურმით დააკავონ პოლიტიკური ოპონენტები, ამაზე მკაცრ პასუხს მიიღებენ ჩვენგან, საზოგადოებისგან და ჩვენი დასავლელი პარტნიორებისგანაც“, – აღნიშნა ვაშაძემ.

მმართველი გუნდი არ ეთანხმება ოპონენტების მოსაზრებას და აცხადებს, რომ ირაკლი ღარიბაშვილი ღირსეული კანდიდატია, რომელიც ქვეყანას შექმნილი კრიზისიდან გამოიყვანს.

„ირაკლი ღარიბაშვილი პარტიის ერთ-ერთი დამფუძნებელი და გუნდის გამორჩეული ლიდერია, შესაბამისად, ჩვენგან იმსახურებს აბსოლუტურ მხარდაჭერას. მას ქვეყნის მართვის გამოცდილება აქვს და, არ მგონია, მისი მხრიდან მეტ სიხისტეს ჰქონდეს ადგილი, ვიდრე გახარიას ან სხვა ლიდერების შემთხვევაში იქნებოდა“, – განაცხადა საპარლამენტო უმრავლესობის წევრმა შალვა პაპუაშვილმა. 

მმართველ გუნდში მთავრობის ახალ შემადგენლობასთან დაკავშირებით კონსულტაციები უკვე დაწყებულია და პარლამენტი ახალ მინისტრთა კაბინეტს უახლოეს პლენარულ სხდომაზე ნდობას გამოუცხადებს. 

პრემიერისა და მინისტრთა კაბინეტის შემადგენლობას წარადგენს პარტია, რომელმაც არჩევნებზე ყველაზე მეტი ხმა მიიღო, ანუ „ქართული ოცნება“. თუ პრემიერის კანდიდატურა ორჯერ ვერ მოაგროვებს 76 ხმას, პრეზიდენტს პარლამენტის დათხოვნისა და ახალი არჩევნების დანიშვნის უფლება აქვს.

საქართველოს კონსტიტუციის თანახმად, პრემიერ-მინისტრს უფლებამოსილება გადადგომისთანავე უწყდება, ხოლო მთავრობა ახალი პრემიერის დანიშვნამდე მოვალეობების შემსრულებელი იქნება. მთავრობის მეთაურის მოვალეობებს პირველი ვიცე-პრემიერი შეასრულებს.

პარლამენტს ორი კვირა აქვს, რომ ნდობა გამოუცხადოს ახალ პრემიერსა და მის მიერ წარდგენილ მთავრობის ახალ შემადგენლობას. თუმცა, როგორც უმრავლესობაში აცხადებენ, მთავრობის ახალი შემადგენლობისთვის ნდობის გამოცხადება უმოკლეს პერიოდში მოხდება.

ირაკლი ღარიბაშვილი საქართველოს პრემიერ-მინისტრი, პარლამენტის მხრიდან დამტკიცების შემთხვევაში, მეორედ გახდება. ეს თანამდებობა მას 2013 წლის 20 ნოემბრიდან 2015 წლის 23 დეკემბრამდე ეკავა.

როგორი იქნება ღარიბაშვილის მიერ წარდგენილი ახალი მინისტრთა კაბინეტი, ჯერჯერობით უცნობია.

57
თემები:
მთავრობის ახალი შემადგენლობა: ვინ ჩაიბარებს მინისტრის პორტფელს
ელენე ხოშტარია

საქართველოში ახალი პოლიტიკური მოძრაობა გაჩნდა

69
(განახლებულია 20:28 08.03.2021)
ახალი თაობის პოლიტიკოსმა საზოგადოებისადმი ვიდეომიმართვაში მის მიერ დაფუძნებული მოძრაობის მიზნებზე ისაუბრა.

თბილისი, 8 მარტი – Sputnik. ოპოზიციის ერთ-ერთმა ლიდერმა ელენე ხოშტარიამ ახალი პოლიტიკური მოძრაობა „დროა“ ჩამოაყალიბა.

გუშინ ელენე ხოშტარიამ YouTube-ზე ვიდეომიმართვა გაავრცელა, რომელშიც ისაუბრა ახალი მოძრაობის ძირითად მიზნებზე – უსამართლობისა და კორუფციის წინააღმდეგ ბრძოლა. ახალი მოძრაობის პრეზენტაცია მარტის ბოლოს იგეგმება. 

„დროა, ვაჩვენოთ ხელისუფლებას, რომ ჩვენ ვხედავთ ყველაფერს, რაც ხდება და ამას არ შევეგუებით. მე ვამხელ კორუმპირებულ ჩინოვნიკებს, მოძალადეებს, გამყალბებლებს, ქურდებს, კლანის წევრებს, ნეპოტიზმს... მე ვამხელ ყველანაირ უსამართლობას და არ შევეგუები მას. თქვენ შეგიძლიათ დაიცვათ თქვენი უფლებები, უსამართლობისგან დაიცვათ თქვენი ოჯახი, თქვენი სოფლის, ქალაქის, რაიონის მოსახლეობა. თქვენ არ იქნებით მარტო, ჩვენ უსამართლობასთან მებრძოლ არც ერთ ადამიანს არ დავტოვებთ მარტო“, – ნათქვამია ვიდეომიმართვაში.

2020 წლის დეკემბრის ბოლოს ხოშტარიამ ოპოზიციური პარტიის „ევროპული საქართველო – მოძრაობა თავისუფლებისთვის“ რიგები დატოვა. სწორედ მაშინ გახდა ცნობილი ახალი პოლიტიკური პლატფორმის შექმნის შესახებ.

რით არის ცნობილი ელენე ხოშტარია?

40 წლის ელენე ხოშტარია ქართულ პოლიტიკაში ახალი თაობის ერთ-ერთი აქტიური წარმომადგენელია. იგი მოსკოვის საერთაშორისო ურთიერთობების სახელმწიფო ინსტიტუტის კურსდამთავრებულია. 2019 წლის ზაფხულში ერთ-ერთი პირველი იყო, რომელმაც მოითხოვა პარლამენტის დარბაზიდან რუსი დეპუტატის სერგეი გავრილოვის გაძევება. 

იგი სხდომებზე ჩნდებოდა სასტვენით და მაისურით წარწერით „სირცხვილია“ – პოლიტიკოსი ამ ფორმით გამოხატავდა პროტესტს „ქართული ოცნების“ მხრიდან პრემიერის პოსტზე გიორგი გახარიას წარდგენასთან დაკავშირებით.

ელენე ხოშტარია 2016-2020 წლებში იყო საქართველოს მეცხრე მოწვევის პარლამენტის წევრი პარტიული სიით საარჩევნო ბლოკიდან „ერთიანი ნაციონალური მოძრაობა“. 2017 წელს თბილისის მერობის კანდიდატი იყო „ევროპული საქართველოდან“, ასევე იყო ამავე პარტიის და გაერთიანებული ოპოზიციის კანდიდატი 2020 წლის საპარლამენტო არჩევნებში ვაკის მაჟორიტარულ ოლქში.

69
თემები:
საქართველოს პოლიტიკური ცხოვრება
ევროპის მოედანი

„ძლიერი ქალები, ძლიერი საქართველო“: ქალების მხარდასაჭერად ევროკავშირი კამპანიას იწყებს

33
(განახლებულია 19:09 08.03.2021)
როგორც განცხადებაშია აღნიშნული, ევროკავშირი მხარს უჭერს საქართველოში ქალებისთვის თანასწორუფლებიანი, ინკლუზიური და უსაფრთხო გარემოს შექმნას და ასევე ქალთა მიმართ ძალადობის შეწყვეტის ღონისძიებებს.

თბილისი, 8 მარტი – Sputnik. ქალთა საერთაშორისო დღეს, 8 მარტს ევროკავშირი საქართველოში ახალ საინფორმაციო კამპანიას – „ძლიერი ქალები – ძლიერი საქართველო“ იწყებს.

საინფორმაციო კამპანია, რომელიც სოციალურ მედიაში დაიწყო, მთელი თვის განმავლობაში გაგრძელდება.

ევროკავშირის წარმომადგენლობის განმარტებით, კამპანიის მიზანი იმ უმნიშვნელოვანესი როლის წარმოჩენაა, რომელსაც ქალები ასრულებენ როგორც საქართველოში, ისე მთელ მსოფლიოში – უფრო თანასწორი მომავლის შესაქმენლად. 

„მომავალი რამდენიმე კვირის განმავლობაში იმ ლიდერი ქალების შესახებ მოგიყვებით, რომლებმაც მნიშვნელოვანი წვლილი შეიტანეს თავიანთი თემებისა და ქვეყნის განვითარებაში“, – აღნიშნულია ევროკავშირის წარმომადგენლობის განცხადებაში.

როგორც საქართველოში ევროკავშირის ელჩმა კარლ ჰარცელმა განაცხადა, საქართველო წინ მიიწევს გენდერული თანასწორობისკენ და დროა ის ბარიერები ამოიფხვრას, რომელიც ხელს უშლის ქალებს, სრულყოფილი წვლილი შეიტანონ საქართველოს გაძლიერებაში.

„საქართველოში ქალების წვლილი ძალზე მნიშვნელოვანია, თუმცა, ქალების ნახევარზე ნაკლებია დასაქმებული სახლს გარეთ. არ უნდა დაგვავიწყდეს, რომ ბევრი ქალი დაუცველია დისკრიმინაციისაგან, ან, უარესი, გენდერული ნიშნით ძალადობისგან, რაც ყოვლად დაუშვებელია“, – აღნიშნულია ჰარცელის განცხადებაში.

ელჩის განცხადებით, ქვეყანა მხოლოდ მაშინ იქნება ძლიერი, როდესაც ყველას მიეცემა თანაბარი შესაძლებლობა, მაქსიმალურად გამოიყენოს საკუთარი პოტენციალი.

8 მარტი ქალთა საერთაშორისო დღედ გაერომ 1975 წელს აღიარა. ქალთა დღეს მსოფლიოს მრავალ ქვეყანაში აღნიშნავენ.

33
თემები:
საქართველო - ევროკავშირის ურთიერთობები
ადამიანის ფსიქოლოგია

ზოდიაქოს ნიშნები და მათი „შინაგანი დემონები“

0
(განახლებულია 13:07 08.03.2021)
თითოეულ ადამიანს აქვს ხასიათის ბნელი მხარეები, რომლებსაც „შინაგანი დემონები“ ეწოდება. ასტროლოგებმა ზოდიაქოს თითოეული ნიშნისთვის დამახასიათებელი ბნელი მხარეები გამოყვეს

ძლიერ ადამიანებს შესწევთ უნარი, რომ ამ „შინაგან დემონებს“ ებრძოლონ და ბრძნული რჩევები გაითვალისწინონ. რას ამბობენ ექსპერტები ზოდიაქოს ნიშნების შინაგან ბნელ მხარეებზე და რას ურჩევენ მათ ამის დასაძლევად – შეიტყვეთ ჩვენი ჰოროსკოპიდან.

ზოდიაქოს ნიშნები და მათი მავნე ჩვევები>>

ვერძი

ვერძების მთავარი დემონი – ეს ზედმეტობა და გადაჭარბების სიყვარულია. თქვენ არ იცით საზღვარი არც მუშაობაში, არც დასვენებაში, ცხოვრებით ტკბობასა და გართობაში, ოღონდ არა ერთდროულად, არამედ ცხოვრების სხვადასხვა ეტაპზე. უბრალოდ, არ შეგიძლიათ შეჩერება, როცა ეს აუცილებელია. მეორე მხრივ, სწრაფვა, რომ ყველაფერი ერთად და ერთდროულად ჩაიგდოთ ხელში, თქვენთვის საოცარი მოტივაციის როლს ასრულებს.

კურო

კუროებს ძალიან გეშინიათ მარტო დარჩენის. გეშინიათ, რომ ერთ დღეს ყველა ზურგს გაქცევთ. ამის გამო ხშირად მეგობრობთ პირველ შემხვედრთან იმის ნაცვლად, რომ საუკეთესო ადამიანები იპოვოთ. ადამიანების ასეთი განურჩევლობა ხანდახან განგაშის გრძნობასთან ბრძოლაში გეხმარებათ, მაგრამ ეს არცთუ ხშირად ხდება.

ტყუპი

ტყუპის მთავარი დემონი – ეს თავისუფლებისმოყვარეობაა. ვერ იტანთ, როდესაც რაღაცაზე მიგითითებენ, გმართავენ ან გზღუდავენ. ეს დემონი თქვენგან მტკიცე მოქმედებებს მოითხოვს. ხშირად უარყოფთ იმ ადამიანებს, ვინც თქვენზე ზრუნავენ.

ზოდიაქოს ნიშნების კომპლექსები>>

კირჩხიბი

გიყვართ ჭორაობა და ხმების გავრცელება და ამაში საკუთარ თავსაც კი არასდროს გამოუტყდებით. თქვენთან ძალიან ფრთხილად უნდა იყვნენ ადამიანები. მეორე მხრივ, თუ ვინმე ძვირფასია თქვენთვის, მათ შესახებ არასდროს არავის არაფერს არ მოუყვებით.

ლომი

ლომები „ჩაციკლული“ ხართ იმაზე, რომ ყოველთვის ყველაზე უკეთესი იყოთ. ეს სასარგებლო სწრაფვაა, მაგრამ ხშირად ძალიან შორს „შეტოპავთ“ ხოკმე. ასეთ შემთხვევაბში ყველაფერი გავიწყდებათ და მხოლოდ სამუშაოზე, ბიზნესზე, წარმატებასა და ფულზე ხართ გადართული.

ქალწული

თქვენი მთავარი დემონი პერფექციონიზმია, რომელიც გაკეთებულ სამუშაოში, ადამიანებში, ნივთებბში მუდამ რაღაც ნაკლს ეძებს. გიყვართ, როდესაც ყველაფერი წინასწარ შედგენილი გრაფიკის მიხედვით ხდება. ამ შინაგანი „მეს“ გამო ხშირად გიცრუვდებათ იმედები.

ასტრორეიტინგი: ზოდიაქოს ყველაზე ზარმაცი ნიშნები – ტოპ-ხუთეული>>

სასწორი

ერთი განსაკუთრებულად აქტიური დემონი გყავთ, რომელსაც ჰქვია „არაუშავს, კარგი“. ამას ხშირად ეუბნებით საკუთარ თავს, როცა რაღაც ცუდი ხდება, ირგვლივ ბევრი სირთულე და პრობლემაა. აზროვნებთ ოპტიმისტურად, რაც კარგია, მაგრამ ხშირად აგებთ იმის გამო, რომ არ აღიარებთ პრობლემის არსებობას, რომელიც დაუყოვნებლივ გადაწყვეტას საჭიროებს.

მორიელი

თქვენი მთავარი დემონი შურისმაძიებლობაა. ბევრი ამბობს, რომ ეჭვიანები ხართ, მაგრამ ეჭვიანობა ხშირად ნორმის ფარგლებს არ სცდება, რასაც ვერ ვიტყვით თქვენს გულღძოობასა და ბოღმის გულში ჩადებაზე. ხანდახან საკუთარ თავსაც აშინებთ, იმდენად კარგად გახსოვთ ადრინდელი წყენა.

მშვილდოსანი

თქვენი შინაგანი დემონი მანიპულაციებისადმი მიდრეკილებაა. შეგიძლიათ და გიყვართ ურთიერთობების სხვადასხვა დონეზე ადამიანებით მანიპულირება და ამას ისეთი უდიდესი ოსტატობით აკეთებთ, რომ ვერავინ ხვდება.

ზოდიაქოს ნიშნები სიმთვრალეში>>

თხის რქა

თქენი დემონი უნდობლობაა. ამის გამო სწრაფად ვერ პოულობთ სიყვარულს, მეგობრებს. გეშინიათ, რომ მოგატყუებენ ან გიღალატებენ. აფასებთ საკუთარ დროსა და ძალებს, მაგრამ ხშირად ამის გამო მარტოობით ზღვევთ.

მერწყული

თქვენში ეჭვიანი დემონი ზის, რომელიც თავისუფლებას არ აძლევს იმ ადამიანებს, რომლებსაც უყვარხართ. „შეშლილი“ ხართ კონტროლზე. გჭირდებათ, რომ ყოველდღე და ყოველ წუთს დარწმუნებული იყოთ, რომ ვინც თქვენ გარშემოა, სხვა არავინ ჰყავთ ისეთი, რომლებსაც თქვენნაირად ეპყრობიან. თქვენ გამონაკლისი შემთხვევა უნდა იყოთ.

თევზები

თქვენი მთავარი მტერი და შინაგანი დემონი – ეს სიზარმაცეა. შეგიძლიათ მასთან გამკლავება, მაგრამ ამას ყოველთვის არ აკეთებთ. სიზარმაცე ხშირად გძლევთ და ამის გამო არღვევთ დანაპირებს. შედეგად, ირგვლივ მყოფების თვალში არასაიმედონი მოსჩანხართ.

ზოდიაქოს ნიშნების კრიმინალური „ქრონიკა">>

0