სალომე ზურაბიშვილი

ზურაბიშვილი: საჭიროა ნამდვილი კონსტრუქციული დიალოგი ხელისუფლებასა და ოპოზიციას შორის

116
(განახლებულია 13:56 19.02.2021)
ლეგიტიმურად გამოცხადებული არჩევნების შედეგების ეჭვქვეშ დაყენება, დაუმორჩილებლობის ყველა ფორმის გამოყენება მიზნად ისახავს ქვეყნის დასუსტებასა და დესტაბილიზაციას, განაცხადა პრეზიდენტმა.

თბილისი, 19 თებერვალი – Sputnik. საქართველოს პრეზიდენტმა სალომე ზურაბიშვილმა გამოთქვა იმედი, რომ საქართველოს მომავალი მთავრობა ახალ პრემიერთან ერთად შეძლებს ქვეყანაში მიმდინარე მძიმე პოლიტიკური პროცესების შეჩერებას, ნათქვამია სახელმწიფოს მეთაურის ოფიციალურ ვებ-გვერდზე.

ხუთშაბათს გიორგი გახარიამ პოლიტიკური კრიზისის ფონზე მოულოდნელად პრემიერ-მინისტრის თანამდებობა დატოვა, ხოლო გადადგომის მიზეზად განმარტა, რომ „ერთიანი ნაციონალური მოძრაობის“ თავმჯდომარის ნიკა მელიას საქმესთან დაკავშირებით „ქართული ოცნების“ გუნდთან შეთანხმებას ვერ მიაღწია. მოქმედი კანონმდებლობის შესაბამისად, გადადგა მთავრობის მთლიანი შემადგენლობაც.

რამდენიმე საათში მმართველმა პარტიამ „ქართული ოცნება - დემოკრატიულმა საქართველომ“ პრემიერის ვაკანტურ პოსტზე თავდაცვის მინისტრის მოვალეობის შემსრულებელი ირაკლი ღარიბაშვილი წამოაყენა.

„ვიმედოვნებ, პრემიერ-მინისტრობის კანდიდატი და მომავალი მთავრობა შეძლებს ამ მძიმე პროცესების შეჩერებას და არ დაუშვებს, რომ ვინმემ საკუთარი პოლიტიკური ამბიციები ქვეყნის ინტერესებზე მაღლა დააყენოს და საფრთხე შეუქმნას ქვეყნის იმ ინსტიტუტებს, რომლებიც დემოკრატიული და სამართლებრივი სახელმწიფოს საყრდენია“, – განაცხადა ზურაბიშვილმა.

პრეზიდენტმა აღნიშნა, რომ ქვეყანაში შექმნილ პოლიტიკურ კრიზისსა და ოპოზიციის მიერ 2020 წლის 31 ოქტომბრის საპარლამენტო არჩევნების შედეგების მიუღებლობას შეიძლება მოჰყვეს „უმძიმესი შედეგები“, დემოკრატიული ინსტიტუტების მიმართ საზოგადოებაში ნდობის დაკარგვა.

მისი თქმით, არჩევნების შედეგების პატივისცემა და წაგების აღიარება დემოკრატიის ქვაკუთხედს წარმოადგენს. ამ დემოკრატიულ პრინციპებზე უარის თქმა ხელს აძლევს მხოლოდ იმ შიდა და გარე ძალებს, რომლებიც თავის პოლიტიკურ ამბიციებს ქვეყნის ინტერესებზე მაღლა აყენებენ და რეგიონში საქართველოს სტაბილურობასა და დემოკრატიულობას საფრთხედ აღიქვამენ.

გარდა ამისა, ზურაბიშვილის შეფასებით, ქვეყანაში დღითი დღე იზრდება პოლარიზება, დაძაბულობა და დაპირისპირება.

„ლეგიტიმურად ცნობილი არჩევნების შედეგების კითხვის ნიშნის ქვეშ დაყენება, დაუმორჩილებლობის ყველა ფორმის გამოყენება, საზოგადოებრივ-სოციალური პროტესტის წაქეზება მიზნად ისახავს ქვეყნის დასუსტებასა და დესტაბილიზაციას“, – განაცხადა ზურაბიშვილმა.

ზურაბიშვილმა განაცხადა, რომ პარასკევს შეხვედრა გამართა დიპლომატიური კორპუსის წარმომადგენლებთან, რომლებთანაც დეტალურად განიხილა მიმდინარე სიტუაცია.

„მიმაჩნია, რომ საჭიროა სიტუაციის დაუყოვნებლივ დეესკალაცია და დაძაბულობის განმუხტვა, რომელსაც პირველ რიგში სჭირდება ნამდვილი კონსტრუქციული დიალოგი, რათა ამ პროცესებმა არ დააზიანოს ქვეყნის სტაბილურობა და საერთაშორისო იმიჯი“, – განაცხადა პრეზიდენტმა.

ამასთან სახელმწიფო მეთაურმა აღნიშნა, რომ თავისი გამოცდილებიდან გამომდინარე, მზად არის მხარი დაუჭიროს ნებისმიერი ფორმის დიალოგს, მაგრამ დარწმუნებულია, რომ „დათმობის პოლიტიკა მხოლოდ მაშინ ამართლებს, თუ ორივე მხარე კონსტრუქციული დიალოგისთვის მზადაა და არა როცა დათმობა აღქმულია სისუსტედ, ან, უფრო მეტიც, როდესაც ეს შეიძლება ვინმემ საკუთარ გამარჯვებად წარმოაჩინოს“.

პრეზიდენტის თქმით, კონსტრუქციული დიალოგი არ ითვალისწინებს წინაპირობების წაყენებას და პროცესების რადიკალიზაციას, ხოლო „ქვეყნის დაწყნარებით და განვითარებით ყველა გამარჯვებული დარჩება“.

 

116
გაერთიანებული ოპოზიციის საპროტესტო აქცია. 26.02.2021

ოპოზიცია პარლამენტთან მშვიდობიან პროტესტს აანონსებს

63
ყველაფერი დაიწყება დილით მჯდომარე პროტესტით პარლამენტთან, დღისით კი ოპოზიციის წარმომადგენლები შენობის პიკეტირებას აანონსებენ

თბილისი, 27 თებერვალი – Sputnik. 2 მარტს საქართველოს პარლამენტის შენობის პიკეტირების მიზანს არ წარმოადგენს ძალადობის პროვოკაცია, განაცხადა ყველაზე მსხვილი ოპოზიციური პარტია „ერთიანი ნაციონალური მოძრაობის“ ერთ-ერთმა ლიდერმა, თინა ბოკუჩავამ.

ოპოზიციამ დააანონსა პარლამენტის შენობის პიკეტირება სამშაბათს, პლენარული სხდომის დღეს, რამაც ექსპერტებში სიტუაციის კიდევ უფრო მეტი დაძაბულობის პროვოცირების შიში გამოიწვია.

„აქცია მიზნად არ ისახავს ე.წ. დეპუტატების გადაადგილების თავისუფლების შეზღუდვას საფეხმავლო ნაწილზე. ისინი იძულებული გახდებიან, ჩვენი მშვიდობიანი პროტესტის ფონზე, გადმოსხდნენ საკუთარი ძვირად ღირებული მანქანებიდან, რადგან საავტომობილო გზაზე ვაპირებთ, გამოვხატოთ ჩვენი პროტესტი მშვიდობიანი გზით“, - განაცხადა ბოკუჩავამ.

მან აღნიშნა, რომ პიკეტის მიზანია აიძულონ დეპუტატებს ხალხის ხმა გაიგონონ.

გარდა ამისა, აქციაზე კიდევ ერთხელ გაჟღერდება ოპოზიციის მოთხოვნები: ვადამდელი არჩევნები და პოლიტპატიმართა გათავისუფლება.

ხოლო პარტია „ლელოს“ წარმომადგენელმა თაზო დათუნაშვილმა დააზუსტა, რომ პარლამენტთან ასევე იქნება მჯდომარე პროტესტი, რომელიც 09:00 საათზე დაიწყება.

საქართველოში პოლიტიკური კრიზისი „ერთიანი ნაციონალური მოძრაობის“ ლიდერის ნიკა მელიას დაპატიმრების შემდეგ გამწვავდა. ოპოზიცია გავიდა ქუჩებში და ორი კვირის განმავლობაში საპროტესტო აქციების გამართვას გეგმავს, რომლებიც, ლიდერების თქმით, მხოლოდ იმ შემთხვევაში გადაიდება, თუ მმართველ პარტიასთან „ქართული ოცნება - დემოკრატიული საქართველო“ მოლაპარაკების პროცესი განახლდება.

 

 

63
ოპოზიციის აქცია. 26/02/2021

რუსთაველის გამზირზე გზის გადაკეტვას კიდევ ერთი ოპოზიციური პარტია ემიჯნება

82
(განახლებულია 14:59 28.02.2021)
ოპოზიცია გეგმავს პარლამენტისა და მთავრობის კანცელარიის პიკეტირებას, ასევე აქციებს შსს-სთან და თბილისის საქალაქო სასამართლოსთან.

თბილისი, 27 თებერვალი - Sputnik. ოპოზიციური პარტია „სტრატეგია აღმაშენებელი“ რუსთაველის გამზირზე გზის სავალი ნაწილის კარვებით გადაკეტვის იდეას არ ეთანხმება და მიიჩნევს, რომ დისკომფორტი არა მოქალაქეებს, არამედ ხელისუფლებას უნდა შეექმნას.

ოპოზიცია ხელისუფლებას მოთხოვნების დასაკმაყოფილებლად ორკვირიან ვადას აძლევს >>

პარასკევს ახალგაზრდულმა ორგანიზაციამ „მოძრაობა საქართველოსთვის“ ხელისუფლებას მათი მოთხოვნების დასაკმაყოფილებლად ორკვირიანი ვადა მისცა, წინააღმდეგ შემთხვევაში აქტივისტები რუსთაველის გამზირის გადაკეტვას გეგმავენ. აქციის ორგანიზატორები ვადამდელ საპარლამენტო არჩევნებს, პოლიტიკური დევნის შეჩერებას, პოლიტპატიმრების გათავისუფლებასა და ცენტრალური საარჩევნო კომისიის ხელახალ დაკომპლექტებას ითხოვენ.

როგორც „სტრატეგია აღმაშენებლის" პოლიტიკური საბჭოს წევრმა, პაატა მანჯგალაძემ განაცხადა, არაძალადობრივი წინააღმდეგობის მთავარი იდეა არის ის, რომ ოპოზიციამ ხმა მიაწვდინოს და დისკომფორტი შეუქმნას ხელისუფლებას და არა ხალხს.

„ჩვენ მოძრაობის ლიდერებს დაველაპარაკებით და ჩვენს არგუმენტებს ვეტყვით. თუმცა, ჩვენ, „სტრატეგია აღმაშენებელი" არ ვემხრობით მოქალაქეებისთვის დისკომფორტის შექმნას. მათ შორის არც კარვების გადმოტანას სავალ ნაწილზე", - განაცხადა მანჯგალაძემ.

პარასკევს დედაქალაქში ოპოზიციურმა პარტიებმა ფართომასშტაბიანი საპროტესტო აქცია გამართეს, რომელსაც საქართველოს სხვადასხვა რეგიონიდან მათი მხარდამჭერებიც შეუერთდნენ. ოპოზიციამ ორი კვირის განმავლობაში თბილისში საპროტესტო აქციებისა და პიკეტების მოწყობა დააანონსა.

ოპოზიციურ პარტიაში მიაჩნიათ, რომ მიუხედავად დაანონსებული აქციების, ხელისუფლების მხრიდან დათმობების შემთხვევაში, აქციების განრიგი შესაძლოა შეიცვალოს.

„თუ ხელისუფლება წამოვა გარკვეულ დათმობებზე, თუ პოლიტპატიმრები გათავისუფლდება, თუ დავინახავთ, რომ ხელისუფლება ცდილობს სიტუაციის განმუხტვას, რა თქმა უნდა, შეიძლება, შევიდეს ცვლილებები ამ აქციების განრიგში, ეს არ არის რაღაც ქვაში გამოკვეთილი, ჩვენ ვართ საკმაოდ მოქნილები და საკმაოდ კონსტრუქციულად განწყობილები“, – განაცხადა ჩიხლაძემ.

რუსთაველის გამზირის გადაკეტვას გაემიჯნა პოლიტიკური გაერთიანება „ლელო საქართველოსთვისაც“. პარტიის ლიდერის, მამუკა ხაზარაძის განცხადებით, ისინი კატეგორიულად ემიჯნებიან ყველა იმ ქმედებას, რომელმაც შეიძლება ქვეყნის პარალიზება გამოიწვიოს.

რაც შეეხება დანარჩენ ოპოზიციურ სპექტრს, იმ შემთვევაში, თუ ხელსიუფლება არ შეასრულებს პროტესტის მონაწილეთა მოთხოვნებს, ქმედებები იქნება რაც შეიძლება მკაცრი, თუმცა კონსტიტუციისა და სამართლის ჩარჩოებში. ამის შესახებ „ლეიბორისტული პარტიის“ პოლიტიკურმა მდივანმა გიორგი გუგავამ განაცხადა.

პარლამენტის შენობასთან ამ დროისათვის 11 კარავია გაშლილი.

 

82
საქართველოში ფეხბურთის ჩემპიონატი. თბილისის „დინამო“ - „სამგურალი“

საქართველოში ფეხბურთის ჩემპიონატი დაიწყო

0
2021 წლის სეზონის საქართველოს ჩემპიონატის ეროვნულ ლიგაში მონაწილეობს 10 კლუბი, ტურნირი ორ წრეში გაიმართება

თბილისი, 28 თებერვალი – Sputnik. საქართველოს ფეხბურთის 33-ე ჩემპიონატი თბილისის „დინამოს“ და „სამგურალის“ დაპირისპირებით დაიწყო.

გახსნის მატჩში თბილისის „დინამოელებმა“, რომლებიც ქვეყნის მოქმედი ჩემპიონები არიან, ეროვნულ ლიგაში ახალბედა წყალტუბოელებს ვერ აჯობეს. შეხვედრა ფრედ 1:1 დასრულდა.

„სამგურალი“ სერგო კუხიანიძის ზუსტი დარტყმის შემდეგ 30-ე წუთზე დაწინაურდა. „დინამოელებმა“ ანგარიშის გათანაბრება მხოლოდ მეორე ტაიმის შუაში შეძლეს. ლუკა გაგნიძის ჩაწოდებით თაური დარტყმა გიორგი გაბედავამ შეასრულა.

პირველი სათამაშო დღის მეორე მატჩში საქართველოს ვიცე-ჩემპიონმა ბათუმის „დინამომ“ მინიმალური ანგარიშით მოუგო ქუთაისის „ტორპედოს“ (1:0). შეხვედრის ერთადერთი გოლი გრიგოლ ჩაბრაძემ გაიტანა.

პირველ ტურში ასევე გაიმართება მატჩები: „თელავი“ – „სამტრედია“, „დილა“ (გორი) – „შუქურა“ (ქობულეთი), „ლოკომოტივი“ (თბილისი) – „საბურთალო“ (თბილისი).

2021 წლის სეზონის საქართველოს ჩემპიონატის ეროვნულ ლიგაში მონაწილეობს 10 კლუბი, ტურნირი გაიმართება ორ წრეში, მეტოქეები ერთმანეთს შინ და გასვლაზე თითიჯერ დაუპირისპირდებიან.

0