ნიკა მელია

ნიკა მელიას იმუნიტეტი მოუხსნეს: რას აპირებს პროკურატურა

64
(განახლებულია 20:43 16.02.2021)
საქართველოს პარლამენტმა ოპოზიციური პარტია „ერთიანი ნაციონალური მოძრაობის“ თავმჯდომარის ნიკა მელიასთვის სადეპუტატო იმუნიტეტის მოხსნას მხარი დაუჭირა.

თბილისი, 16 თებერვალი – Sputnik. საქართველოს პროკურატურა ნიკა მელიასთვის აღკვეთის ღონისძიებად პატიმრობის გამოყენებასთან დაკავშირებით საქალაქო სასამართლოს დღესვე მიმართავს, განაცხადა პროკურორმა ამირან გულუაშვილმა.

საქართველოს პარლამენტმა ოპოზიციური პარტია „ერთიანი ნაციონალური მოძრაობის“ თავმჯდომარის ნიკა მელიასთვის სადეპუტატო იმუნიტეტის მოხსნას მხარი ცოტა ხნის წინ დაუჭირა. 

პროკურორის თქმით, პარლამენტმა გაიზიარა ის სამართლებრივი არგუმენტაცია, რაც გააჩნდა ბრალდების მხარეს ამ კონკრეტულ საკითხთან დაკავშირებით. ხოლო საკანონმდებლო ორგანოს დადგენილებით კიდევ ერთხელ დადასტურდა ის ფაქტი, რომ სასამართლო გადაწყვეტილებისა და კანონის მოთხოვნების შესრულება სავალდებულოა ყველა ადამიანისთვის, მიუხედავად იმისა, რა თანამდებობა უკავია მას ან რა პოლიტიკური კუთვნილებისაა.

„საპარლამენტო იმუნიტეტი არ წარმოადგენს ინდულგენციას არც ერთი ადამიანისთვის სისხლის სამართლებრივი პასუხისმგებლობის თავიდან არიდების მიზნით“, – განაცხადა პროკურორმა. 

რაც შეეხება შემდგომ პროცედურებს, გულუაშვილის თქმით, მოქმედი კანონმდებლობის თანახმად, გათვალისწინებულია სასამართლოსთვის შუამდგომლობით მიმართვა, რისი უფლებამოსილებაც გააჩნია ბრალდების მხარეს.

იოსელიანი: ნიკა მელიას მხრიდან გირაოს არგადახდა არის პოლიტიკური პროტესტი>>

„ბრალდების მხარე დღესვე უზრუნველყოფს შესაბამისი შუამდგომლობის წარდგენას თბილისის საქალაქო სასამართლოში. ვინაიდან საკითხი ეხება აღკვეთის ღონისძიების გამოყენებას, სასამართლომ შეძლებისდაგვარად მოკლე ვადაში უნდა ჩანიშნოს სხდომა, სადაც მოხდება მხარეთა არგუმენტების მოსმენა“, – განაცხადა ამირან გულუაშვილმა.

2 თებერვალს გენერალურმა პროკურორმა ირაკლი შოთაძემ ნიკა მელიას მიმართ გამოყენებული აღკვეთის ღონისძიების – გირაოს პატიმრობით შეცვლის თაობაზე სასამართლოსთვის მიმართვასთან დაკავშირებით პარლამენტს თანხმობის მისაღებად მიმართა. ასეთი გადაწყვეტილება პროკურატურამ მას შემდეგ მიიღო, რაც მელიამ უარი თქვა გირაოს გადახდაზე, რომელიც სასამართლომ აღკვეთის ღონისძიების სახით დააკისრა. 

ნიკა მელიასთვის სადეპუტატო იმუნიტეტის მოხსნას 88 დეპუტატმა დაუჭირა მხარი, 2 კი წინააღმდეგი იყო.

საკითხის პლენარულ სხდომაზე გასვლამდე მელიასთვის იმუნიტეტის შეჩერებას მხარი პარლამენტის საპროცედურო საკითხთა და წესების და იურიდიულ საკითხთა კომიტეტებმა დაუჭირეს.

პარლამენტის კომიტეტებმა ნიკა მელიასთვის იმუნიტეტის შეჩერებას მხარი დაუჭირეს>>

საქართველოში აღკვეთის ღონისძიების შეცვლის შესახებ გადაწყვეტილებას სასამართლო ბრალდების მხარის შუამდგომლობის საფუძველზე იღებს. მაგრამ ამ შემთხვევაში მელიასთვის პატიმრობის შეფარდების შესახებ შუამდგომლობით სასამართლოს მიმართვამდე პროკურატურამ პარლამენტის ნებართვა უნდა მიიღოს.

ეს უკვე მეორე შემთხვევაა, როდესაც საკანონმდებლო ორგანომ მსგავს გადაწყვეტილება მიიღო ერთსა და იმავე საქმეზე – 2019 წლის 20 ივნისის ღამეს „ჯგუფური ძალადობის ხელმძღვანელობა და მასში მონაწილეობა“.

პირველად პარლამენტმა მელიას სადეპუტატო ხელშეუხებლობა 2019 წლის ივნისში მოუხსნა – პროკურატურის შუამდგომლობის საფუძველზე, ივლისში კი მელიას დეპუტატის მანდატი ვადაზე ადრე შეუჩერეს.

2019 წლის 27 ივნისს გამართულ სხდომაზე თბილისის საქალაქო სასამართლომ არ დააკმაყოფილა პროკურატურის შუამდგომლობა მელიას სასჯელაღსრულების დაწესებულებაში მოთავსების შესახებ და აღკვეთის ღონისძიების სახით 30 ათასი ლარის ოდენობით გირაოს გადახდა და ელექტრონული სამაჯურის ტარება დააკისრა. მას ასევე საჯაროდ გამოსვლა აეკრძალა. მაშინ ის ამ წესებს დაემორჩილა, მათ შორის, გირაოს თანხაც გადაიხადა.

მელია გასული წლის ოქტომბერში აქტიურად მონაწილეობდა წინასაარჩევნო კამპანიაში, 2020 წლის ნოემბერში კი, საპარლამენტო არჩევნების შემდეგ მან ერთ-ერთ მიტინგზე საჯაროდ მოიხსნა ელექტრონული სამაჯური და გადააგდო. ამის შემდეგ მას სამაჯურის ტარების ვალდებულება მოუხსნეს და გირაოს თანხა – 40 ათასი ლარი თავიდან დააკისრეს.

64
თემები:
საქართველოს პოლიტიკური ცხოვრება (308)
მსვიდობის ხიდი

საქართველოში ცნობილი ფიგურანტების მონაწილეობით ფარული აუდიოჩანაწერების სკანდალი აგორდა

5
საქართველოს სახალხო დამცველმა უკვე დაგმო აუდიოჩანაწერების გამოქვეყნება და უკანონო მოპოვება და აღნიშნა, რომ საზოგადოება დიდი ხანია ითხოვს მსგავსი ფაქტების დროულ და ობიექტურ გამოძიებას, მაგრამ უშედეგოდ.

თბილისი, 6 მარტი – Sputnik. საქართველოში ცნობილ პირთა მონაწილეობით ფარული აუდიოჩანაწერების გამო აგორდა ახალი სკანდალი, რომელმაც პოლიტიკოსების აღშფოთება გამოიწვია.

ოპოზიციურმა ტელეარხმა ТV Pirveli-მ შაბათს დილით გამოუშვა შემაჯამებელი გადაცემის ანონსი, სადაც საუბარია სკანდალური აუდიოჩანაწერების გამოქვეყნებაზე. ჩანაწერში ფიგურირებენ პრემიერ-მინისტრი ირაკლი ღარიბაშვილი, მართველი პარტია „ქართული ოცნების“ დამფუძნებლის, ბიძინა ივანიშვილის ვაჟი ბერა და სახელმწიფო დაცვის სპეცსამსახურის უფროსი ანზორ ჩუბინიძე. ტელეკომპანიის მონაცემებით, აუდიოჩანაწერებში საუბარია იმ პირთა მიმართ ფიზიკურ ანგარიშსწორებაზე, რომლებიც ბერა ივანიშვილის სოციალურ ქსელებში არასასურველი „კომენტატორები“ არიან.

აუდიოჩანაწერში ხმების ავთენტურობა უკვე დაადასტურა მმართველი პარტიის ერთ-ერთმა ლიდერმა გია ვოლსკიმ, მაგრამ, მისი თქმით, ჩანაწერი ჯერ კიდევ 2011 წელს არის გაკეთებული.

„აუდიოჩანაწერი 2011 წელს არის გაკეთებული, რაღაც ფრაგმენტებია ამოღებული და შეკოწიწებული“, - განაცხადა ვოლსკიმ.

ამავე დროს მან აღნიშნა, რომ ტელეკომპანია მიზანმიმართულად ავრცელებს ტყუილებს.

„სამწუხაროა, რომ ამ „ფეიკ“ ინფორმაციას საზოგადოებაში ავრცელებენ, რათა ახალგაზრდები დაარწმუნონ, თითქოს მათ პერიოდში არც ქუჩაში ხოცავდნენ ხალხს, არც აწამებდნენ, რომ იქნება მეტი ახალგაზრდა მოიზიდონ იმ უაზრო აქციებზე“, – განაცხადა გია ვოლსკიმ.

მმართველი პარტიის სხვა ლიდერი, სოზარ სუბარი ტელეარხის მიერ სიუჟეტის გამოქვეყნების აკრძალვის წინადადებით გამოვიდა.

„სასამართლოს პირდაპირ შეუძლია, გამოსცეს ამკრძალავი ნორმა, რომელიც აკრძალავს ამ სიუჟეტის ეთერში გასვლას, მაგრამ ვიდრე საქმე სასამართლომდე მივა, კარგი იქნება, სახალხო დამცველმა გამოთქვას თავისი პოზიცია და შეაფასოს, რა ჰქვია ასეთი უკანონო ჩანაწერების გამოქვეყნებას“, – განაცხადა სოზარ სუბარმა.

საქართველოს სახალხო დამცველმა ნინო ლომჯარიამ დაგმო აუდიოჩანაწერების გამოქვეყნება და მოპოვება და აღნიშნა, რომ საზოგადოება დიდი ხანია ითხოვს მსგავსი ფაქტების დროულ და ობიექტურ გამოძიებას, მაგრამ უშედეგოდ.

ამასთან სახალხო დამცველმა აღნიშნა, რომ მხოლოდ საგამოძიებო ორგანოების მიერ ჩატარებული გამოძიებისა და ჩანაწერების ავთენტურობის დადასტურების შემდეგ შესაძლებელია საუბარი იმაზე, შეიცავს თუ არა ეს ჩანაწერები დანაშაულის ნიშნებს.

აუდიოჩანაწერების გამოქვეყნება ოპოზიციაშიც დაგმეს.

„ფარული ჩანაწერების ფორმით პოლიტიკის წარმოება ვერ იქნება წინგადადგმული ნაბიჯი ამ ფაზაში, რომელშიც ჩვენ ყველანი ვიმყოფებით. ჩვენ გვჭირდება ახალი მორალური სტანდარტი პოლიტიკაში და „ლელო“ ყოველთვის, რაც დავფუძნდით, ვემხრობით და ვნერგავთ ახალ ეთიკურ სტანდარტს ქართულ პოლიტიკაში“, – განაცხადა „ლელოს“ წარმომადგენელმა გრიგოლ გეგელიამ.

აუდიოჩანაწერების გამოქვეყნებას მავნებელს უწოდებს ასევე „ევროპული საქართველოს“ ლიდერი გიგა ბოკერია.

„პირადად მე და „ევროპულ საქართველოს“ გვაქვს იგივე პოზიცია და ძალიან საზიანოდ მიგვაჩნია ზოგადად იმ ტიპის ფარული ჩანაწერების გამოქვეყნება, რომელთა კანონიერების წყაროც ცნობილი არ არის“, - განაცხადა ბოკერიამ.

პოლიტიკური სპექტრის მხრიდან უარყოფითი შეფასებების მიუხედავად, ტელეკომპანია სიუჟეტის მოხსნას ჯერ არ აპირებს, ის ეთერში შაბათს საღამოს გავა.

 

5
ოპოზიციის კარვები პარლამენტის წინ

„არ იმუშავა“: ოპოზიციის ნაწილი კონსტიტუციის ფუნდამენტურ შეცვლას მოითხოვს

90
(განახლებულია 21:34 05.03.2021)
საქართველოს კონსტიტუციაში შესწორებათა უმრავლესობა 2004-2012 წლებში შევიდა, სალომე ზურაბიშვილი ინაუგურაციის შემდეგ კი ქვეყანაში განახლებული კონსტიტუცია ამოქმედდა

თბილისი, 5 მარტი - Sputnik. ქართული ოპოზიციის ნაწილი კონსტიტუციაში ცვლილებების შეტანის ინიციატივით გამოდის, რადგან მიიჩნევს, რომ დღევანდელი კონსტიტუცია ძირითად გამოწვევებს ვერ პასუხობს.

როგორც ოპოზიციის წარმომადგენლები აცხადებენ, საქართველოს კონსტიტუციის წინა ვერსია დღევანდელზე უკეთესი იყო. ქვეყნის უმაღლეს კანონში ცვლილებების შეტანასთან დაკავშირებით პოლიტიკურმა პარტიებმა დღეს მემორანდუმს მოაწერეს ხელი, რასაც არასამთავრობო ორგანიზაციებიც უჭერენ მხარს. 

„ჩვენ გვჭირდება ფუნდამენტური საკონსტიტუციო ცვლილებები, ბევრი ადამიანის, საქართველოს მოქალაქეების ჩართულობით, რომ შევქმნათ ისეთი ინსტიტუციები, რომლებსაც ნდობა ექნება ხალხის მხრიდან“, — განაცხადა პარტია „სტრატეგია აღმაშენებელის“ ლიდერმა,  გიორგი ვაშაძემ.

ქვეყნის ძირითად კანონში ცვლილებების შეტანას ეთანხმება პარტია „ლელო საქართველოსთვის" თავმჯდომარე მამუკა ხაზარაძეც. მას მიაჩნია, რომ კონსტიტუციის ახალმა მოდელმა „ვერ იმუშავა“ და დარწმუნებულია, რომ ვიდრე პოლიტიკურ ელიტებს ექნებათ შესაძლებლობა, საკუთარ ინტერესებს მოარგონ კონსტიტუცია, მანამ ქვეყანა სწორ გზით ვერ განვითარდება.

ამასთან მან ხაზი გაუსვა, რომ ოპოზიცია გაერთიანდა „ამ უმნიშვნელოვანესი საკითხის გარშემო და ეს მისასალმებელია“, თუმცა ერთიან პლატფორმაზე საუბარი ნაადრევია.

საქართველოს პირველ კონსტიტუციაზე მუშაობა 1918 წლის 26 მაისს „საქართველოს დამოუკიდებლობის აქტის“ მიღების შემდეგ დაიწყო და სამ წელს გაგრძელდა. მუშაობის პროცესში გათვალისწინებული იყო იმ პერიოდის მოწინავე დემოკრატიული ქვეყნების გამოცდილება. 1921 წლის დოკუმენტი ქართული პოლიტიკური ცნობიერების მიღწევად მიიჩნევა.
საქართველოს კონსტიტუციაში შესწორებათა უმრავლესობა შევიდა 2004-2012 წლებში, მიხეილ სააკაშვილის პრეზიდენტობისას, მათ შორის პრეზიდენტის უფლებამოსილების შემცირების და პარლამენტის როლის გაძლიერების კუთხით.

2018 წლის 16 დეკემბრიდან კი ქვეყანაში განახლებული კონსტიტუცია ამოქმედდა, რომლის თანახმად საქართველო გადავიდა საპარლამენტო მოდელზე, ხოლო პრეზიდენტი შეზღუდული უფლებამოსილების მქონე სიმბოლურ ფიგურად იქცა.

 

 

90
თემები:
საქართველოს პოლიტიკური ცხოვრება (308)
საპატრულო პოლიცია

ვანში მამაკაცმა პოლიციელს ცეცხლი გაუხსნა

0
გამოძიებით დადგინდა, რომ არაფხიზელ მდგომარეობაში მყოფი ბრალდებული სანადირო თოფიდან თავის მოკვლას აპირებდა, შემდეგ კი ადგილზე მისული პოლიციის მისამართით სროლა დაიწყო

თბილისი, 6 მარტი - Sputnik. ვანში დააკავეს მამაკაცი, რომელიც პოლიციელს თავს დაესხა, ინფორმაციას შინაგან საქმეთა სამინისტრო ავრცელებს.

უწყების ცნობით, მიმდინარე წლის 5 მარტს ვანის რაიონის სამმართველოში შეტყობინება შევიდა, რომ არაფხიზელ მდგომარეობაში მყოფი მამაკაცი თავის მოკვლას აპირებდა. პოლიციამ მიღებული შეტყობინების შემდეგ შემთხვევის ადგილას გამოცხადდა. ადგილზე მყოფმა მამაკაცმა, რომელიც თავის მოკვლას სანადირო თოფით აპირებდა, ცეცხლი სამართალდამცველების მიმართულებით გახსნა, რა დროსაც ვანის რაიონული სამმართველოს თანამშრომელი დაიჭრა.

დაჭრილი პოლიციელი სასწრაფო სამედიცინო დახმარების ბრიგადამ საავადმყოფოში გადაიყვანა, სადაც ექიმებმა მას შესაბამისი დახმარება აღმოუჩინეს. უწყების ინფორმაციით, დაჭრილი პოლიციელის სიცოცხლეს საფრთხე არ ემუქრება.

რაც შეეხება ბრალდებულს, ის სამართალდამცველებმა შემთხვევის ადგილზე დააკავეს. ასევე ამოღებულია დანაშაულის ჩადენის იარაღი.

სამსახურებრივ საქმიანობასთან დაკავშირებით პოლიციელზე თავდასხმის ფაქტზე გამოძიება საქართველოს სსკ-ის 353-ე პრიმა მუხლის მე-2 ნაწილით მიმდინარეობს. 1980 წელს დაბადებულ ბრალდებულს 7-დან 11 წლამდე პატიმრობა ემუქრება.

 

 

0