PACE: საქართველოში ამომრჩეველთა სიებს ენდობიან

47
(განახლებულია 19:11 18.01.2021)
PACE საქართველოს 2020 წლის საპარლამენტო არჩევნების შესახებ თავის ანგარიშში განსაკუთრებით აღნიშნავს სახელმწიფო სერვისების განვითარების სააგენტოს კვალიფიციურ მუშაობას, რომელიც ამომრჩეველთა მონაცემების ბაზას პერმანენტულად აზუსტებდა.

თბილისი, 18 იანვარი – Sputnik. ევროპის საბჭოს საპარალამენტო ასამბლეამ (PACE) საქართველოში გამართულ საპარლამენტო არჩევნებთან დაკავშირებით ანგარიში გამოაქვეყნა, რომელშიც აღნიშნულია, რომ ამომრჩეველთა სიების სიზუსტისადმი ნდობა მაღალი იყო.

დოკუმენტში პოზიტიურად არის შეფასებული საქართველოს იუსტიციის სამინისტროს სახელმწიფო სერვისების განვითარების სააგენტოს მიერ ამომრჩეველთა სიების გაუმჯობესების კუთხით ჩატარებული მუშაობა.

კერძოდ, PACE აღნიშნავს, რომ ამომრჩევლის რეგისტრაციის პროცესი უწყვეტი და ცენტრალიზებულია, ხოლო სახელმწიფო სერვისების განვითარების სააგენტო პროაქტიურად უკავშირდებოდა იმ პირებს, რომელთა სარეგისტრაციო ჩანაწერები რამე სახის შეცდომას ან შეუსაბამობას შეიცავდა, რათა შემდეგ ეს მოქალაქეები ამომრჩევლთა სიაში ჩაერთოთ.

ანგარიშში ასევე აღნიშნულია, რომ ამომრჩევლებს თავიანთი სარეგისტრაციო მონაცემების გადამოწმებისა და შესწორების საშუალება ჰქონდათ.

„ევროსაბჭოს ასამბლეის მხრიდან ეს შეფასება იუსტიციის სამინისტროს მიერ სახელმწიფო სერვისების განვითარების სააგენტოს მონაცემთა ბაზების დახვეწის მიზნით გატარებული სამუშაოების შედეგია“, – ნათქვამია სააგენტოს განცხადებაში.

კობახიძე: ჩვენს სითამამეს სიმართლე, ოპოზიციის თავშეკავებას კი სიყალბე უდევს საფუძვლად>>

სააგენტომ ამომრჩეველთა სიების სრულყოფაზე მუშაობა 2013 წელს დაიწყო და ეს პროცესი დღემდე გრძელდება. შედეგად გამოვლინდა და სიიდან ამოღებული იქნა 10,5 ათასამდე გარდაცვლილი. ასევე იდენტიფიცირებული და გაუქმებული იყო 7,7 ათასზე მეტი პირის მონაცემები, რომლებიც მეორდებოდა ან გაყალბებული დოკუმენტებით იყო სიაში შეყვანილი.

საპარლამენტო არჩევნების სიებში აღრიცხული იყო 3 200 063 მოქალაქე ბიომეტრიული ფოტოთი.

47
თემები:
საქართველოს საპარლამენტო არჩევნები 2020 (608)
ცესკო

ცესკო: ახალმა პარტიებმა ადგილობრივი არჩევნებისთვის რეგისტრაცია 14 ივლისამდე უნდა გაიარონ

30
(განახლებულია 09:16 13.06.2021)
ადგილობრივი არჩევნები საქართველოში ოქტომბერში ჩატარდება. საქართველოს მოქალაქეები აირჩევენ მუნიციპალიტეტების მერებსა და ადგილობრივი საკრებულოების წევრებს.

თბილისი, 13 ივნისი – Sputnik. იმ პარტიებმა, რომლებსაც 2020 წლის საპარლამენტო არჩევნებში მონაწილეობა არ მიუღიათ, ადგილობრივ არჩევნებში მონაწილეობის მისაღებად ცესკოში რეგისტრაცია 14 ივლისამდე უნდა გაიარონ, ნათქვამია ცესკოს ვებგვერდზე.

ადგილობრივი არჩევნები საქართველოში მიმდინარე წლის ოქტომბერში ჩატარდება. ქალაქებისა და რაიონების მოსახლეობა აირჩევს მუნიციპალიტეტების მერებსა და ადგილობრივი საკრებულოების წევრებს.

ცესკო შეახსენებს პარტიებს, რომ თუ ბოლო საპარლამენტო არჩევნებზე მათ რეგისტრაცია არ გაუვლიათ ან პარლამენტში არ ჰყავთ საკუთარი წარმომადგენელი, ადგილობრივ არჩევნებში მონაწილეობის მისაღებად განცხადებით უნდა მიმართონ ცენტრალური საარჩევნო კომისიის (ცესკოს) თავმჯდომარეს 14 ივლისამდე.

დანარჩენ პარტიებს განცხადებები შეაქვთ არჩევნების დღემდე არაუგვიანეს 57-ე დღისა.

რაც შეეხება ახალ პარტიებს, ისინი ვალდებული არიან პარტიის მხარდამჭერთა სიის ნიმუშის მიღებიდან 60 დღის ვადაში, მაგრამ არაუგვიანეს 1 აგვისტოსი, ცესკოს წარუდგინონ მუნიციპალიტეტის წარმომადგენლობითი ორგანოს - საკრებულოს არჩევნებში პარტიის მონაწილეობის მხარდამჭერი არანაკლებ 25 ათასი ამომრჩევლის სია. ასევე ამონაწერი რეესტრიდან პარტიის რეგისტრაციაზე.

30
ცესკოს შენობა

ცესკომ არჩევნების ელექტრონული მოდელი გატესტა: პარტიები კმაყოფილი არიან

39
(განახლებულია 23:22 12.06.2021)
ელექტრონული არჩევნების დასანერგად საქართველოს პარლამენტმა შეიმუშავა ცვლილებები საარჩევნო კოდექსში და ახლა დეპუტატებმა მათ კენჭი უნდა უყარონ.

თბილისი, 12 ივნისი – Sputnik. ცენტრალურ საარჩევნო კომისიაში ახალი ელექტრონული მოდელით იმიტირებული არჩევნები ჩატარდა, რომელიც ოპოზიციურმა პარტიებმა და დამკვირვებლებმა დადებითად შეაფასეს.

ელექტრონული არჩევნების სისტემა - კენჭისყრის ახალი სისტემაა, რომელმაც უნდა უზრუნველყოს სამართლიანი არჩევნების ჩატარება და გაყალბების თავიდან აცილება.

აღნიშნული მოდელი გულისხმობს საარჩევნო უბნებზე ამომრჩეველთა ელექტრონულ რეგისტრაციას, ხოლო თავად ბიულეტენები იქნება აღჭურვილი სპეციალური შტრიხკოდებით, რომელთა გაყალბებაც შეუძლებელია.

გარდა ამისა, ხმების დათვლა კამერების წინ მოხდება, ხოლო დათვლის დროს ბიულეტენების სკანირება მოხდება.

აღნიშნული საპილოტო მოდელი მნიშვნელოვანია იმისათვის, რომ საარჩევნო კოდექსში შესატან ცვლილებებზე შექმნილი სამუშაო ჯგუფის ფარგლებში განხილულ იქნას ყველა შესაძლო რისკი, რათა საბოლოო გადაწყვეტილება მივიღოთ, განაცხადა ცესკოს მოადგილე გიორგი შარაბიძემ.

ოპოზიცია კმაყოფილია

ოპოზიციური პარტიების ლიდერები არჩევნების ახალი მოდელით კმაყოფილი დარჩნენ.

„ამ ტექნოლოგიების გამოყენებით მინიმუმამდეა დაყვანილი გაყალბების შანსი, ეს ინოვაცია მოვიფიქრეთ გაყალბების პრევენციისთვის, რომელიც აქ ხდება. 90-95%- ით შემცირებულია გაყალბების შემთხვევები ამ ტექნოლოგიებით“, - განაცხადა პარტია „სტრატეგია აღმაშენებლის“ ლიდერმა გიორგი ვაშაძემ.

ხოლო „ლელო საქართველოსთვის წარმომადგენელმა საბა ბუაძემ აღნიშნა, რომ ახლა საჭიროა ამ ტექნოლოგიების დროული დანერგვა.

„კრიტიკულად მნიშვნელოვანია, რომ ეს პროცესი წარიმართოს დროულად და სიახლეები დანერგილი იყოს იმგვარად, რომ თვითმმართველობის არჩევნებზე უკვე მთელი საქართველოს მასშტაბით იყოს გამოყენებული“, - განაცხადა ბუაძემ.

ადგილობრივი არჩევნები საქართველოში მიმდინარე წლის ოქტომბერში ჩატარდება. ქალაქებისა და რაიონების მოსახლეობა აირჩევს მუნიციპალიტეტების მერებსა და ადგილობრივი საკრებულოების წევრებს.

ელექტრონული არჩევნების დასანერგად საქართველოს პარლამენტმა საარჩევნო კოდექსში შესატანი ცვლილებები შეიმუშავა და ახლა დეპუტატებმა მათ კენჭი უნდა უყარონ.

39
წყალდიდობის შედეგები თბილისში. 2015 წლის 13-14 ივნისი

თბილისში ექვსი წლის წინ მომხდარი ტრაგედია გაიხსენეს

0
სვანიძის ქუჩაზე დაღუპულთა მემორიალთან დილიდან მივიდნენ პოლიტიკოსები, მეხანძრე-მაშველები, დაღუპულთა ახლობლები და რიგითი თბილისელები.

თბილისი, 13 ივნისი - Sputnik. თბილისში 2015 წლის 13 ივნისს მომხდარი საშინელი ტრაგედია ექვსი წლის შემდეგ კიდევ ერთხელ გაიხსენეს.

დღეს დილიდან ისეთივე ნაცრისფერი ღრუბლები იყო თბილისის თავზე, როგორც იმ ავბედით დღეს.

2015 წლის 13 ივნისს წყნეთი-ბეთანიის დამაკავშირებელ გზაზე ჩამოწოლილი მეწყერის შედეგად ადიდებულმა მდინარე ვერემ დატბორა საცხოვრებელი სახლები, ზოოპარკი, „მზიურის" პარკი, თამაზ ელიზბარაშვილის ძაღლების კერძო თავშესაფარი, რომლის ყველა ბინადარი დაიღუპა. ასევე მოშალა ქალაქის ინფრასტრუქტურა. სტიქიამ 21 ადამიანის სიცოცხლე იმსხვერპლა, ორი ადამიანი კი ამ დრომდე დაკარგულად ითვლება. დაიღუპა დაახლოებით 300 ცხოველი. 200 ოჯახი უსახლკაროდ დარჩა.

გადარჩენილ ცხოველებს მთელი ქალაქის მასშტაბით ეძებდნენ. ბევრის დაძინება გახდა საჭირო. 17 ივნისს ერთ-ერთი გაქცეული ვეფხის თავდასხმას შემთხვევითი გამვლელი შეეწირა.

სვანიძის ქუჩაზე დაღუპულთა მემორიალთან დღეს დილიდან მივიდნენ პოლიტიკოსები, მეხანძრე-მაშველები, დაღუპულთა ახლობლები და რიგითი თბილისელები.

პირველები მემორიალთან მივიდნენ მაშველები, რომლებმაც იმ ღამეს თავისი თანამშრომელი დაკარგეს. 37 წლის ზურაბ მუზაშვილი 13 ივნისის მოვლენების დროს ერთ-ერთი პირველი იყო იმ მაშველთაგან, ვინც სტიქიის ეპიცენტრში გამოცხადდა. სამაშველო ოპერაციის მსვლელობისას მან 6 ადამიანის სიცოცხლის გადარჩენა შეძლო, თვითონ კი წყლიდან გამოსვლა ვეღარ მოახერხა. თბილისის ერთ-ერთი ქუჩა ახლა მის სახელს ატარებს.

საქართველოს პრემიერ-მინისტრ ირაკლი ღარიბაშვილის თქმით, 13 ივნისი დიდი ტრაგედიაა, რომელმაც ბევრი ადამიანი შეიწირა, მეორეს მხრივ კი ამ სიტუაციამ მთელი საზოგადოება გააერთიანა.

„ეს დღე ყველას კარგად გვახსოვს. ეს არის დიდი ტრაგედია ჩვენი ქვეყნის, ჩვენი მოსახლეობისთვის. ამ დღეს, 13 ივნისს შეეწირა ჩვენი არაერთი მოქალაქე. დღეს გამოვხატავთ მათი ხსოვნის წინაშე პატივისცემას, პატივს მივაგებთ. მინდა, მათ ოჯახებს კიდევ ერთხელ ​მივუსამძიმრო ეს დიდი ტრაგედია. მეორე მხრივ, კარგად გახსოვთ, რომ ამ ტრაგედიამ გააერთიანა მთელი ჩვენი საზოგადოება, ხალხი, ერი, ჩვენი ახალგაზრდობა. არნახული, წარმოუდგენელი სოლიდარობა გამოხატეს მაშინ ჩვენმა ახალგაზრდებმა“, - განაცხადა ღარიბაშვილმა.

დაღუპულთა ხსოვნას პატივი მიაგო ასევე თბილისის მერმა კახა კალაძემ.

„13 ივნისი საქართველოს უახლეს ისტორიაში ერთ-ერთი უმძიმესი დღეა. ეს არის დღე, რომელიც ჩვენს დედაქალაქს ყოველთვის ემახსოვრება. სამწუხაროა, რომ დავკარგეთ ბევრი ადამიანი და კიდევ ერთხელ მინდა მივუსამძიმრო ამ ადამიანების ოჯახებს, ახლობლებს“, - განაცხადა კალაძემ.

ტრაგედიიდან მეორე დღეს ქალაქის ცენტრი გაივსო მოგლეჯილი ხეებით და ტალახით. ქუჩების გაწმენდის სურვილი ათი ათასმა მოხალისემ გამოთქვა, რომლებსაც „ბოტების თაობა“ შეარქვეს.

0