პარლამენტის შენობა

მოლაპარაკებების მეხუთე რაუნდი: ოპოზიციისა და მმართველი გუნდის მოლოდინები

143
(განახლებულია 22:06 08.01.2021)
საქართველოს ოპოზიციური ძალები მმართველი პარტიისგან ვადამდელი საპარლამენტო არჩევნების გამართვას მოითხოვენ

თბილისი, 8 იანვარი – Sputnik. ოპოზიციასა და ხელისუფლებას შორის მოლაპარაკებების მეხუთე რაუნდის თარიღი ჯერჯერობით უცნობია, აცხადებენ ოპოზიციური პარტიების წარმომადგენლები.

საქართველოს პარლამენტმა თითქმის ერთი თვის მანძილზე ერთპარტიულ რეჟიმში იმუშავა, თუმცა, იანვრის დასაწყისში ოპოზიციური პარტია „საქართველოს პატრიოტთა ალიანსის“ წევრებმა პარლამენტში შესვლაზე მზადყოფნა გამოთქვეს. დეპუტატებმა ფრიდონ ინჯიამ, გელა მიქაძემ და დავით ზილფიმიანმა უფლებამოსილების ცნობის შემდეგ პარტია დატოვეს, ისინი ახალი პოლიტიკური ძალის შექმნას გეგმავენ. 

ახალი პოლიტიკური ძალის სახელწოდება იქნება „ევროპული სოციალისტები“. მომავალ შაბათს პარტიის პირველი სხდომაა დაგეგმილი, რომელზეც წარმოდგენილი იქნება მთელი გუნდი.

რაც შეეხება სხვა პარტიებს, რომლებმაც არჩევნებში ბარიერის გადალახვა შეძლეს, კვლავ ბოიკოტის რეჟიმში რჩებიან. ამ დროის მანძილზე დასავლელი დიპლომატები ოთხი რაუნდის განმავლობაში ცდილობდნენ  ოპოზიციური პარტიების პარლამენტში შესვლაზე, ხელისუფლების კი – გარკვეულ დათმობებზე წასვლაზე დათანხმებას. თუმცა, უშედეგოდ.

„ველოდებით, რომ მოლაპარაკებების მეხუთე რაუნდი  იანვრის ბოლომდე გაიმართება. ჩვენ „ქართული ოცნებიდან“ პასუხს, კონკრეტულ ნაბიჯებს ველოდებით. ხელისუფლებას  ჯერჯერობით მზადყოფნა არ გამოუხატავს, მაგრამ ჩვენ იმედი გვაქვს, რომ შექმნილი რთული ვითარებიდან გამომდინარე, ხელისუფლება აქტიურად წამოვა მოლაპარაკებებზე“, – განაცხადა პარტია „სტრატეგია აღმაშენებლის“ წარმომადგენელმა სერგო ჩიხლაძემ.

პარტია „ვროპული საქართველოს“ წარმომადგენელმა ლევან თარხნიშვილმა აღნიშნა, რომ ოპოზიციის ყველა მოთხოვნა ძალაში რჩება.

 „მთავარი მოთხოვნა – ვადამდელი არჩევნებია, რამდენადაც ჩვენ ვთვლით, რომ ეს სიტუაციიდან გამოსვლის ერთადერთი გზაა... მეორე – ვადამდელი არჩევნები ხარისხობრივად ახალ გარემოში უნდა ჩატარდეს. მესამე – არჩევნები ახალმა საარჩევნო ადმინისტრაციამ უნდა ჩაატაროს. ასევე, ჩვენ ვაგრძელებთ პოლიტპატიმრების გათავისუფლების მოთხოვნას“, – განაცხადა თარხნიშვილმა.

პარტია „ერთიანი ნაციონალური მოძრაობის“ წევრი ხატია დეკანოიძე მიიჩნევს, რომ მმართველი პარტია „ქართული ოცნება – დემოკრატიული საქართველო“ კომპრომისზე უნდა წავიდეს. 

 „ქართულ ოცნებას“ დიდი პასუხისმგებლობა, მათ შორის, მანევრირების დიდი სივრცე აქვს. თუმცა, სამწუხაროდ, ჩვენ მისგან კონკრეტული წინადადებები არ მოგვისმენია. რაუნდი რაუნდისთვის არ უნდა ჩატარდეს, იგი იმისთვის უნდა გაიმართოს, რომ ქვეყანა პოლიტიკური კრიზისიდან გამოვიდეს“, – განაცხადა დეკანოიძემ.

თავის მხრივ, მმართველი პარტია „ქართული ოცნების“ წარმომადგენლები აღნიშნავენ, რომ მოლაპარაკებები გრძელდება და კონსენსუსის მიღწევა „ჯანსაღ ოპოზიციურ პარტიებთან“ რეალურია.

 „რეალურია იმ ჯანსაღ ოპოზიციურ ძალებთან შეთანხმების მიღწევა, რომლებმაც უარი განაცხადეს ანტიდასავლურ კამპანიასა და დესტრუქციულ სცენარზე“, – განაცხადა პარლამენტის საგარეო საქმეთა  კომიტეტის თავმჯდომარე ნიკოლოზ სამხარაძემ.

საქართველოს საპარლამენტო ოპოზიცია ამტკიცებს, რომ „ქართულმა ოცნებამ“ 2020 წლის 31 წლის საპარლამენტო არჩევნები ამომრჩეველზე ზეწოლისა და კენჭისყრის შედეგების გაყალბების გზით მოიგო. სწორედ ამას უკავშირდება მათი პროტესტი და ოპოზიციური პარტიების დიდი ნაწილის უარი სადეპუტატო მანდატებზე. ამასთან, საერთაშორისო დამკვირვებლებმა განაცხადეს, რომ არჩევნები თავისუფალ და დემოკრატიულ გარემოში, სერიოზული დარღვევების გარეშე ჩატარდა.

143
არჩილ თალაკვაძე

„პარლამენტი ისეთი უნდა იყოს, როგორიც ის ხალხმა აირჩია“ - თალაკვაძე

37
(განახლებულია 19:34 25.01.2021)
საპარლამენტო უმრავლესობა იმედს არ კარგავს, რომ ოპოზიცია გონს მოეგება და ის 51 დეპუტატი, რომელმაც უფლებამოსილების დათმობის შესახებ განცხადება დაწერა, გადაიფიქრებს და მანდატებს არ დათმობს

თბილისი, 25 იანვარი - Sputnik. საპროცედურო საკითხთა კომიტეტის, შემდეგ კი ბიუროს მიერ ოპოზიციონერი დეპუტატებისთვის უფლებამოსილების შეწყვეტის საკითხის განხილვის ვადა იწურება. ამის შესახებ საქართველოს პარლამენტის სპიკერმა არჩილ თალაკვაძემ განაცხადა.

პარლამენტი ოპოზიციონერი დეპუტატებისთვის მანდატების ჩამორთმევის პროცედურას იწყებს >>

პარლამენტის თავმჯდომარემ აღნიშნა, რომ მმართველ პარტია „ქართულ ოცნებას“ სურს, პარლამენტი დაკომპლექტებული იყოს და იმუშაოს იმ სახით, როგორითაც ის ხალხმა აირჩია - ოპოზიციასთან ერთად.

„ჩვენ მხარს ვუჭერდით პოლიტიკური დიალოგის პროცესს და დღესაც ბოლომდე გამოვიყენებთ იმ შესაძლებლობას, რაც რეგლამენტით აქვს პარლამენტს მიცემული, რათა მაქსიმალურად ამოვწუროთ ვადები, როდესაც ჯერ კიდევ არის შესაძლებელი, ოპოზიციამ საკუთარ გადაწყვეტილებას გადახედოს და საქართველოს პარლამენტი მხოლოდ ამის შემდეგ, უკვე საგაზაფხულო სესიის დასაწყისში, როგორც ეს არაერთხელ აღვნიშნეთ, იმსჯელებს უფლებამოსილების შეწყვეტა-არშეწყვეტასთან დაკავშირებით“, – განაცხადა არჩილ თალაკვაძემ.

უფლებამოსილების შეწყვეტის შესახებ ოპოზიციის განცხადებებს 27 და 28 იანვარს საპროცედურო საკითხთა კომიტეტი განიხილავს. შემდეგ, რეგლამენტის თანახმად, საკითხს ბიუროს სხდომაზე გაიტანენ, 2 თებერვალს კი საგაზაფხულო სესიის პირველ სხდომაზე კენჭს უყრიან.

უფლებამოსილების დათმობას 51 ოპოზიციონერი დეპუტატი აპირებს. მათ საკანონმდებლო ორგანოს შესაბამისი განცხადებით გასული წლის ბოლოს მიმართეს.

ესენი არიან „ერთიანი ნაციონალური მოძრაობა - ძალა ერთობაშია“ ბლოკის (36 მანდატი), „ევროპული საქართველოს“ (5 მანდატი), „სტრატეგია აღმაშენებლის“ (4 მანდატი), „ლელო საქართველოსთვის“ (4 მანდატი) და „ლეიბორისტული პარტიის“ (1 მანდატი) წარმომადგენლები, ასევე, ზურაბ ჯაფარიძე, რომელიც კენჭს იყრიდა პარტია „გირჩიდან“.

პარლამენტში დეპუტატების უფლებამოსილების შესაწყვეტად საჭიროა 76 დეპუტატის მხარდაჭერა.

37
მამუკა მდინარაძე

„ყველაფერი ოპოზიციისთვის": მმართველ გუნდს პარლამენტის რეგლამენტში ცვლილებები შეაქვს

45
(განახლებულია 18:38 25.01.2021)
რეგლამენტში ცვლილებების მიღების შემდეგ უფრაქციო დეპუტატებს  შესაძლებლობა ექნებათ  დაიკავონ საპარლამენტო თანამდებობები

თბილისი, 25 იანვარი – Sputnik. მმართველი პარტია „ქართული ოცნების“ გუნდი ცდილობს ოპოზიციურ პარტიებს საპარლამენტო საქმიანობაში სრულფასოვანი მონაწილეობისთვის მაქსიმალური შესაძლებლობა მისცეს, ამისკენაა მიმართული რეგლამენტში ინიცირებული ცვლილებები, განაცხადა მმართველი პარტიის აღმასრულებელმა მდივანმა, საპარლამენტო უმრავლესობის ლიდერმა მამუკა მდინარაძემ დღეს გამართულ ბრიფინგზე. 

„ამ კვირაში რეგლამენტში ცვლილებები შევა და პარლამენტის წევრებს, რომლებიც ოპოზიციას წარმოადგენენ, შეუძლიათ ჯგუფში გაერთიანდნენ და ვიცე–სპიკერისა და კომიტეტების თავმჯდომარეების მოადგილეთა თანამდებობებზე საკუთარი კანდიდატურები წამოაყენონ“, – განაცხადა მდინარაძემ.

ამასთან, როგორც მან აღნიშნა, ოპოზიციურ პარტიებს, რომლებიც ვერ ქმნიან ფრაქციებს, ასევე შეუძლიათ აქტიური მონაწილეობა მიიღონ საპარლამენტო დებატებში – მათთვის დრო  15 წუთამდე გაიზრდება.

 „ევროპელ სოციალისტებს“ ამასთან დაკავშირებით რაღაც წინადადებები ჰქონდათ. პარლამენტის სპიკერთან და ჩემთან გამართულ შეხვედრაზე ალეკო ელისაშვილმა (პარტია „მოქალაქეების“ ლდერი) უკმაყოფილება გამოთქვა და ჩვენ გადავწყვიტეთ ოპოზიციონერი დეპუტატებისთვის გამოსვლის დრო 15 წუთამდე გაგვეზარდა“, – განაცხადა მდინარაძემ.

რაც შეეხება ოპოზიციის იმ წარმომადგენლებისთვის, რომლებიც სადეპუტატო მანდატებზე უარს აცხადებენ უფლებამოსილების  ვადაზე ადრე შეჩერებას, მდინარაძის განმარტებით, აღნიშნულ საკითხზე კენჭისყრა პარლამენტის საგაზაფხულო სესიის პირველ სხდომაზე მოხდება, რომელი 2 თებერვალს გაიმართება.

პარლამენტი დაჩქარებული წესით განიხილავს რეგლამენტში ცვლილებებს, რომლითაც ოპოზიციონერ დეპუტატებს დამატებითი უფლებები ეძლევათ.

ცვლილებების პროექტის ინიცირება დღეს გამართულ ბიუროს სხდომაზე მოხდა.

პარლამენტი ოპოზიციონერი დეპუტატებისთვის მანდატების ჩამორთმევის პროცედურას იწყებს>>>

სადეპუტატო უფლებამოსილება 51 დეპუტატს შეუწყდება, რომლებმაც გასული წლის ბოლოს საკანონმდებლო ორგანოს შესაბამისი განცხადებით მიმართეს. კერძოდ: ბლოკ „ერთიანი ნაციონალური მოძრაობა – ძალა ერთობაშიას“ (36 მანდატი), „ევროპული საქართველოს (5), „სტრატეგია აღმაშენებლის“ (4), „ლელო საქართველოსთვის (4), „საქართველოს ლეიბორისტული პარტიის“ (1) წარმომადგენლებს, ასევე ზურაბ ჯაფარიძეს, რომელმაც კენჭი იყარა პარტიიდან „გირჩი“.

საპროცედურო საკითხთა კომიტეტის სხდომაზე განხილვის შემდეგ,  საკითხი  საგაზაფხულო სესიის პირველი პლენარული სხდომის დღის წესრიგში შევა.  ოპოზიციონერი დეპუტატებისთვის სადეპუტატო უფლებამოსილების შეწყვეტისთვის 76 დეპუტატის მხარდაჭერა იქნებ  საჭირო.

45
თემები:
საქართველოს პარლამენტი
საქართველოს ზამთრის პეიზაჟები

დღის ასტროპროგნოზი ზოდიაქოს ნიშნებისთვის: 26 იანვარი

0
(განახლებულია 11:58 25.01.2021)
გთავაზობთ ყოველდღიურ ასტროლოგიურ პროგნოზს ზოდიაქოს თითოეული ნიშნისთვის. გაიგეთ ჩვენი ჰოროსკოპიდან, რას გიმზადებენ ვარსკვლავები და რას გირჩევენ ასტროლოგები

დღეს 2021 წლის 26 იანვარია, სამშაბათი. მზარდი მთვარე კირჩხიბის ნიშანშია. ამ დღეს პლანეტა მარსი მფარველობს.

დღევანდელი დღე ადამიანებისგან მეტ კონკრეტულობას მოითხოვს. ნებისმიერი გაურკვევლობა გაღიზიანებას გამოიწვევს. გამძაფრდება რეაქციები მიმდინარე მოვლენებზე, რაც, შესაძლოა, კონფლიქტების საფუძველი გახდეს. ამავე დროს დღეს ძალიან იოლი იქნება ღრმად მიმალულ გრძნობებზე საუბარი, ადამიანისთვის პირდაპირ თქმა, თუ რას ფიქრობთ მასზე. თუმცა, ამ შემთხვევაში სჯობს, ფარგლებს არ გასცდეთ და უკმეხად არაფერი წამოგცდეთ – ამას ურთიერთობებში ბზარის შეტანა შეუძლია.

2021 წლის ჰოროსკოპი ზოდიაქოს ნიშნებისთვის>>

ვერძი: დღეს თქვენთვის საქმეების მოწესრიგების დღეა. თუნდაც ეს გაწერილი არ გქონდეთ, დიდი ალბათობით, ამის აუცილებლობას შექმნილი ვითარება მოითხოვს. მოწესრიგება შეიძლება დასჭირდეს თქვენს სამუშაო ადგილს, ან საქმეებსა და გეგმებს. არ არის გამორიცხული, რომ მოწესრიგების პროცესში დავიწყებული რამ აღმოაჩინოთ, რომელიც დღემდე აქტუალური და თან – საკმაოდ ფასეული.

კურო: დღეს გარშემომყოფებთან და მათ შორის, ახლობელ ადამიანებთან დისონანსში იქნებით. შესაძლოა, მოგეჩვენოთ, რომ თქვენ ირგვლივ ადამიანები ძალიან სერიოზული განწყობით დაიარებიან, ისინი კი, თავის მხრივ, უკმაყოფილო იქნებიან თქვენი უზრუნველობით. სერიოზულ კამათს ეს, დიდი ალბათობით, არ გამოიწვევს, თუმცა იმისთვის, რომ ირგვლივ მყოფებთან ურთიერთობებში ბზარი არ გაჩნდეს, ხშირად მოირგეთ „სერიოზული და ჭკვიანი“ ადამიანის სახე, თუნდაც ეს ძალზე სასაცილოდ გეჩვენებოდეთ.

ტყუპი: დღეს მზად ხართ, რომ მტკიცე და შეიძლება რადიკალური ზომებიც გადადგათ და ეს განსაკუთრებით ფინანსების სფეროს ეხება. იმის ნაცვლად, რომ ასჯერ გაზომოთ და ერთხელ გაჭრათ, ასჯერ გაჭრის განწყობაზე იქნებით. ერთი მხრივ, არის საფრთხე, რომ ფული ქარს გაატანოთ; მეორე მხრივ კი ეს საბრძოლო განწყობა ბიძგს მოგცემთ, გადადგათ ის ფინანსური ნაბიჯები, რომლებიც უკვე მომწიფებულია და დიდი ხანია, გადაწყვეტას მოითხოვს.

კირჩხიბი: დღეს კირჩხიბები კრიტიკოსების სახით მოგვევლინებით. ამასთან, თქვენი კრიტიკა ყველა ნაკლებად იქნება მიმართული საკუთარი თავისადმი, კრიტიკის ობიექტები დიდწილად გარშემომყოფები იქნებიან. თქვენი შენიშვნები ადამიანებს შეცდომების გამსოწორებას აიძულებს, თუმცა ყველაფერი მარტივადაც არ იქნება. თქვენი ბრძნული რჩევები, შესაძლოა, ყურს მიღმა გატარდეს, ხოლო კრიტიკა კი წყენის წყარო გახდეს. თქვენი გადასაწყვეტია – ღირს თუ არა კრიტიკაზე დროისა და ძალების  დახარჯვა, თან, როდესაც შედეგის იმედი ნაკლებადაა.

ლომი: დღეს დიდი ალბათობაა, რომ ირგვლივ მყოფი ადამიანები შეეცადონ, თავიანთი წილი პასუხისმგებლობა თქვენ მხრებზე გადმოიტანონ. ისინი იგრძნობენ, რომ დამყოლ ხასიათზე ხართ და ამის გამოყენებას ურცხვად შეეცდებიან. ამის გამოსწორება შეგიძლიათ, თუ მკაცრად დაიცავთ თქვენს პოზიციებს და აღკვეთ ამგვარ მცდელობებს. სხვაგვარად მოგიწევთ სხვისი საქმეების გაკეთება და საკუთარის გადადება.

ქალწული: მთელი დღე გარედან აკვიატებული ზეწოლა შეიძლება იგრძნოთ. შესაძლოა, ეს დროის დეფიციტი იყოს, ან ვითარება მოითხოვდეს თქვენგან სწრაფ მოქმედებებს, ასევე გარშემომყოფები გამუდმებით მოგმართავდნენ თხოვნით. ნებისმიერ შემთხვევაში, ამ ზეწოლისგან გათავისუფლება გაგიჭირდებათ, ამიტომ, სჯობს, შეეგუოთ ასეთ მდგომარეობას. ყველაფერს აჯობებს, განმარტოვდეთ, თუ ამის შესაძლებლობა გაქვთ და სიმშვიდეში მიხედოთ თქვენს საქმეებს.

სასწორი: დღეს იშვიათი შანსი გაქვთ, რომ რომელიმე საქმეში დიდი ნაბიჯი გადადგათ წინ. მთავარია, საჭირო მომენტი დროულად დაინახოთ, ხელიდან არ გაუშვათ და მტკიცედ, მკაფიოდ იმოქმედოთ. აქტიური და შეუპოვარი მოქმედებების წყალობით გამარჯვების დიდი შესაძლებლობა გაქვთ. გამოიყენეთ ეს დღე ახალი სიმაღლეების დასაპყრობად და კონკურენტების უკან ჩამოსატოვებლად.

მორიელი: დღეს სამართლიანობის გრძნობა გამძაფრდება თქვენში. მზად ხართ, ვინმე ან რამე საკუთარი მკერდით დაიცვათ, თუ ჩათვლით, რომ მას ჩაგრავენ და ავიწროებენ. რას იზამთ, ხანდახან ცუდი არაა სამართლიანობისთვის ბრძოლა და მოძალადისთვის ადგილის მიჩენა. თუმცა დღეს უსამართლობა შეიძლება იქაც „დაინახოთ“, სადაც ამის ნატამალიც კი არაა. ასე რომ, მეტი დაკვირვება გმართებთ, რომ განგაშის ზარი ტყუილუბრალოდ არ შემოჰკრათ.

მშვილდოსანი: დღეს, შესაძლოა, მთელი დღე ჭეშმარიტების ფუჭ ძებნაში დაკარგოთ, თან დარწმუნებული იყოთ, რომ ის „სადღაც აქვეა“. ეს ძებნა ნებისმიერ საკითხს შეიძლება უკავშირდებოდეს – ურთიერთობებს, მუშაობას, პირად ცხოვრებას. თუმცა, რაც არ უნდა მოგეჩვენოთ, რომ სამართლიანობა „ჰა და ჰა, გაიმარჯვებს“, იცოდეთ, რომ ეს მხოლოდ მოჩვენებაა. შეიძლება გაკვირვებულმა აღმოაჩინოთ, რომ „სუფთა სახის“ ჭეშმარიტება თითქმის უსარგებლო რამაა და თქვენ გარდა ის არავის სჭირდება.

თხის რქა: ასტროლოგები დღეს მხოლოდ პირდაპირი გზებით სიარულს გირჩევენ. საკუთარ თამაშის წამოწყების მცდელობას, ან, უფრო უარესი – რამის დამალვას ან დამახინჯებას, სავალალო შედეგები შეიძლება მოჰყვეს. თუ საჭირო შედეგის მიღება გსურთ, ღიად, პირდაპირ და პატიოსნად უნდა იმოქმედოთ. გარშემომყოფებიც სწორედ ამ თვისებებს დააფასებენ თქვენში. მაგრამ ერთიცაა – გულწრფელობასაც თავის საზღვრები აქვს და დაიცავის ეს ფარგლები.

მერწყული: დღეს საჭირო შედეგების მისაღწევად იმის ლაპარაკი მოგიწევთ, რასაც თქვენგან ელოდებიან და არა იმის, რასაც სინამდვილეში ფიქრობთ. ხანდახან შეიძლება გაჩუმებაც უპრიანი იყოს. რას იზამთ, გულწრფელობა ზოგჯერ უადგილოა ხოლმე და მით უმეტეს – მნიშვნელოვან საუბრებში, მოლაპარაკებებში. დღეს თუ სათქმელს პირდაპირ იტყვით, შეიძლება ავნოთ საქმესაც და საკუთარ თავსაც. თუ გაჩუმდებით, მომგებიან პოზიციაში აღმოჩნდებით.

თევზები: დღეს საქმიანობაში მტკიცედ და საბრძოლოდ ხართ განწყობილი. რატომ უნდა იწვალოთ კვანძის გახსნაზე, როცა მისი ნაჯახით გადაჭრა შეიძლება? ყველაზე საინტერესო ისაა, რომ ზოგიერთ საკითხში რადიკალური ზომები სწორედაც რომ ყველაზე მომგებიანი შეიძლება აღმოჩნდეს. მაგრამ ისეთ საქმეებს, რომლებიც დროსა და დელიკატურ დამოკიდებულებას საჭიროებს, სჯობს, სათოფეზეც არ გაეკაროთ. ან წინასწარ შეეგუოთ, რომ ისინი, ასეთ შემთხვევაში, სრული კრახისთვისაა განწირული.

0