დავით ბაქრაძე თავისი ხელფასით გაჭივრებულებს ეხმარება

ოპოზიციონერი დეპუტატების ფული: ვინ როგორ განკარგავს დარიცხულ ხელფასს

391
(განახლებულია 22:53 30.12.2020)
საქართველოს პარლამენტმა თებერვლამდე გადადო მანდატების გაუქმების შესახებ ოპოზიციონერი დეპუტატების განცხადებების განხილვა, მანამდე კი დეპუტატებს ხელფასებს გადაუხდიან. ოპოზიცია დილემის წინაშეა - როგორ განკარგოს ანაზღაურება?

თბილისი, 30 დეკემბერი - Sputnik. ოპოზიციონერ დეპუტატებს, რომლებისთვისაც საქართველოს მეათე მოწვევის პარლამენტს ჯერ არ შეუწყვეტია უფლებამოსილება, პირველი ანაზღაურება ჩაერიცხათ.

მაგრამ რეაქცია ყველას განსხვავებული ჰქონდა. 60 დეპუტატიდან 54-მა პროტესტის ნიშნად უკვე დაწერა განცხადება დეპუტატის უფლებამოსილების მოხსნის შესახებ. ისინი უარს აცხადებენ პარლამენტში შესვლაზე, რადგან მას არალეგიტიმურად მიიჩნევენ.

ვინ და როგორ განკარგა არცთუ პატარა (ოთხი ათას ლარზე მეტი) პირველი ხელფასი.

ოპოზიციური პარტია „ევროპული საქართველოს“ ერთ-ერთმა ლიდერმა დავით ბაქრაძემ გადაწყვიტა, დეპუტატის ხელფასი ქველმოქმედებაში დაეხარჯა და სოციალურად დაუცველი მოქალაქეებისთვის საახალწლო საჩუქრები შეიძინა.

პარტიის Facebook-გვერდზე გამოქვეყნებულია ამ ერთგვარი საქველმოქმედო აქციის ამსახველი ფოტოები და ვიდეო.

როგორც ბაქრაძე განმარტავს, მანამ სანამ „ქართული ოცნება“ მას დეპუტატის ანაზღაურებას გადაუხდის, ის თანხას საქველმოქმედო მიზნით გამოიყენებს.

„ქართული ოცნება“ ჯერ არ აპირებს დააკმაყოფილოს ჩვენი განცხადებები პარლამენტიდან გამოსვლის შესახებ, ამიტომ დეკემბრის თვეში, როგორც მოქმედ დეპუტატს, დამერიცხა ხელფასი და ჩემი სურვილი და განზრახვა იყო, ისევე როგორც მთელი ოპოზიციის და ჩვენი კოლეგების, რომ ამ დარიცხული ხელფასით ჩვენი გაჭირვებული მოსახლეობისათვის მოგვეტანა პატარა სიხარული საახალწლოდ“, - აღნიშნა ბაქრაძემ.

საახალწლო საჩუქრები დავით ბაქრაძისგან დღეს მიიღეს სოციალურად დაუცველებმა ისნისა და სამგორის რაიონებში.

მისი თქმით, დღეს ადამიანები რთულ მდგომარეობაში აღმოჩნდნენ, ბევრისთვის ახალი წელი გახდა არა იმედისა და სიხარულის მომთანი, არამედ მათი მძიმე მდგომარეობის აღქმის მომენტი.

ამასთან, ოპოზიციაში ნაკლებად ამაყებიც გამოჩნდნენ. მათ ნაწილს ხელფასი არ ჩაერიცხა და პარლამენტში ამის მიზეზებს არკვევდა.

პირველი არხის ინფორმაციით, საუბარია „საქართველოს პატრიოტთა ალიანსის“ დეპუტატებზე - ავთო ენუქიძეზე, „ნაციონალური მოძრაობა - ძალა ერთობაშია“ ბლოკის წევრ ბაჩუკი ქარდავაზე და „ევროპული საქართველოს“ წარმომადგენელ ტარიელ ნაკაიძეზე.

ბაჩუკი ქარდავამ უკვე გააკეთა კომენტარი მასმედიაში გავრცელებულ ინფორმაციაზე და განაცხადა, რომ მას ხელფასის ჩარიცხვა არ მოუთხოვია.

„ხელფასი იქცა პოლიტიკური პინგპონგის იარაღად... ესეც ამ  ხელისუფლების უნიჭობის მორიგი დასტურია. პატივცემულებო, ბაჩუკი ქარდავა არ არის და არც არასოდეს იქნება არალეგიტიმური პარლამენტის წევრი. რაც შეეხება ხელფასს, მე ხელფას არ ავიღებ, მაგრამ თუ მომიწევდა და სხვა მოცემულობაში  ის ჩემს ხელთ აღმოჩნდებოდა, საგაზაფხულო მწვავე საპროტესტო  აქციებისთვის გამოვიყენებდი, აუცილებლად ამ ფულით შევიძენდი ჩემს მიერ უკვე შეკვეთილ ტექნიკურ აღჭურვილობას, მეგაფონებს და საწვიმრებს“, - დაწერა ქარდავამ სოციალურ ქსელში.

ტარიელ ნაკაიძემ დაადასტურა, რომ ხელფასს აიღებს და განმარტა, როგორ დახარჯავს მიღებულ თანხას.

„გადავწყვიტე, მიმეღო ეს ხელფასი... და გადავურიცხო ორგანიზაციას „მოძრაობა საქართველოსთვის“, რომელიც არის ძალიან მნიშვნელოვანი ჩემთვის... ვცდილობ, მაქსიმალურად დავეხმარო მათ (პარტიის აქტივისტებს). სანამ პარლამენტი არ შემიწყვეტს უფლებამოსილებას, მანამ მივიღებ ამ ხელფასს და გადავურიცხავ იმას, ვინც ცვლილებებისთვის იბრძვის“, – განაცხადა ნაკაიძემ.

ერთ-ერთი პირველი, ვინც დარიცხულ ხელფასზე რეაქცია მოახდინა, „ევროპული საქართველოს“ რიგებიდან წასული ელენე ხოშტარია იყო - მან ფული უკან დააბრუნა. ხოშტარიამ ქსელში ტრანზაქციის დამადასტურებელი ორი ფოტო გამოაქვეყნა. 

„პარლამენტმა – არ ვიმჩნევთ, რომ არ ხართო და ჩარიცხეს ხელფასი, რა მაგარი მოიფიქრეს! წამებში მიიღეს უკან“, – დაწერა ხოშტარიამ Facebook-ის თავის გვერდზე.

დეპუტატის ანაზღაურების ჩარიცხვის შესახებ სოციალურ ქსელში ნატო ჩხეიძემაც დაწერა, რომელის კენჭს იყრიდა ბლოკის „ერთიანი ნაციონალური მოძრაობა - ძალა ერთობაშია“ სიებით.

„გუშინ ჩამერიცხა საპარლამენტო ხელფასი, თანაც უკლებლივ. ერთი თეთრიც არ დაკლებია... ახლა საფიქრელი გამიჩინეს, რა ვუყო ამ  „ეშმაკისეულ თანხას”, - დაწერა ჩხეიძემ Facebook- გვერდზე.

საქართველოს პარლამენტში ჯერჯერობით არცერთი ოპოზიციონერი დეპუტატი არ შესულა.

ამჟამად დეპუტატის მანდატებზე ოფიციალურად უარი თქვეს „ერთიანი ნაციონალური მოძრაობა - ძალა ერთობაშია“ ბლოკის (36 მანდატი), „ევროპული საქართველოს“ (5 მანდატი), „სტრატეგია აღმაშენებლის“ (4 მანდატი), „ლელო საქართველოსთვის“ (4 მანდატი) და „ლეიბორისტული პარტიის“ (1 მანდატი) წარმომადგენლებმა, ასევე, „პატრიოტთა ალიანსის“ ოთხიდან სამმა წარმომადგენელმა და ზურაბ ჯაფარიძემ, რომელიც კენჭს პარტია „გირჩიდან“ იყრიდა. ამ პარტიიდან გასულ კიდევ სამ წარმომადგენელს ოფიციალურად მანდატზე უარი ჯერჯერობით არ უთქვამს. აგრეთვე, უარი მანდატებზე არ უთქვამთ პარტია „მოქალაქეებიდან“ გასულ ალეკო ელისაშვილსა და ლევან იოსელიანს.

 

391
დროშები ოცნების ოფისთან

NDI-სა და „ქართული ოცნების“ ომი დასრულდა - კვლევითმა ორგანიზაციამ მისი წარმატება აღიარა

14
(განახლებულია 20:32 25.01.2021)
ხელისუფლებისა და ამერიკული არასამთავრობო ორგანიზაციის მრავალწლიანი დავა, როგორც ჩანს, დასრულდა. გუშინ გამოქვეყნებული მონაცემებით, საქართველოს ხელისუფლებას იმდენად კარგი შედეგები აქვს, რომ ვეჭვობ, რომელიმე სახელისუფლებო პოლიტიკოსმა NDI გააკრიტიკოს.

არადა, ეს ტრადიციად იყო დამკვიდრებული ბოლო წლების საქართველოში. ახლა კი, NDI-ის კვლევის მიხედვით, მთავრობის საქმიანობას გამოკითხულთა 50% დადებითად ფასებს, 38% - ცუდად, გიორგი გახარიას გამოკითხულთა 46% დადებითად აფასებს, 17% - ცუდად.

ეროვნულ-დემოკრატიული ინსტიტუტის (NDI) დეკემბრის თვეში ჩატარებული კვლევის მიხედვით, კითხვაზე, რომელი პარტია დგას თქვენს შეხედულებებთან ყველაზე ახლოს, გამოკითხულთა 31%-ის აზრით, ასეთია „ქართული ოცნება". 5%-ის აზრით, „ერთიანი ნაციონალური მოძრაობა". რაც შეეხება სხვა პარტიებს ("პატრიოტთა ალიანსი"; "სტრატეგია აღმაშენებელი"; "გირჩი"; "ევროპული საქართველო"; "ლელო"; "ლეიბორისტული პარტია") ჯამურად გამოკითხულთა 9%-ის შეხედულებებთანაა ახლოს. ამასთან, ამავე კითხვაზე გამოკითხულთა 24%-მა პასუხისგან თავი შეიკავა, 25%-მა კი არც ერთი პარტია არ დაასახელა.

როგორც ირკვევა, ბოლო ერთ წელიწადში შემცირებულია იმ გამოკითხულთა რაოდენობა, ვინც მათ პოზიციასთან ახლოს მდგომ პარტიად ოპოზიციურ ძალას ასახელებდა. კერძოდ, NDI-ის მიერ 2020 წლის იანვარში ჩატარებული კვლევის შედეგების მიხედვით, იგივე შეკითხვაზე: რომელი პარტია დგას თქვენს შეხედულებებთან ყველაზე ახლოს, პასუხები ასე ნაწილდებოდა: მოსახლეობის 19% თვლიდა, რომ მათ შეხედულებებთან ყველაზე ახლოს მდგარი პარტია „ქართული ოცნება“ იყო, 14%-ს კითხვაზე პასუხის გაცემა არ სურდა, ხოლო მოსახლეობის 13%-ისთვის ყველაზე ახლოს მდგარი პარტია „ნაციონალურ მოძრაობა” იყო.

„ნაციონალური მოძრაობის‘‘  რეიტინგი ისტორიულ მინიმუმზეა, - ამბობს მამუკა მდინარაძე. თუმცა არც პარლამენტის ნდობაა ისტორიულ მაქსიმუმზე ამ კვლევის მიხედვით. საქმე ისაა, რომ მთავრობის ნდობის ზრდის პარალელურად პარლამენტის, როგორც ინსტიტუციის რეიტინგი მეტად შემცირებულია. მის საქმიანობას კარგად მხოლოდ გამოკითხულთა 15% მიიჩნევს, 80% კი ამბობს, რომ კარგი იქნებოდა, თუკი პარლამენტის საქმიანობაში ოპოზიცია ჩაერთვებოდა.

თუმცა ამ კვლევას ეჭვის თვალით უყურებს მთავარი ოპოზიციური არხის მთავარი წამყვანი ნიკა გვარამია: „NDI-ს სატელეფონო კვლევები არაფერს გვაჩვენებს, გარდა იმისა, როგორი შეშინებულია ხალხი უზურპატორი რეჟიმით. ყველაზე მძიმე პერიოდში - ოცნების ყველაზე მაღალი რეიტინგი - ეს რომ სტატისტიკური, ლოგიკური და პოლიტიკური აბსურდია, ამას ვინც ვერ ხვდება, სერიოზული პრობლემები აქვს, ან მკაფიო მიზანმიმართულობა“, - წერს ნიკა გვარამია ფეისბუქსტატუსში.

თუმცა „ნაციონალურ მოძრაობაში“, ალბათ სჯობს გაანალიზონ, რამ გამოიწვია მათი რეიტინგის ასეთი კატასტროფული დაცემა ანდა NDI-ს შედეგები არ აღიარონ, როგორც ამას ადრე „ქართული ოცნება“ აკეთებდა.

კიდევ ერთი საინტერესო შეფასება კვლევის შედეგებს ექსპერტმა გია ხუხაშვილმა მისცა. ის ფიქრობს, რომ მთავრობას გახარია ქაჩავს.

„ჩემის აზრით, კვლევის შედეგები კანონზომიერია. ოპოზიცია არ წარმოადგენს არანაირ პოზიტიურ დღის წესრიგს იმ პრობლემებთან დაკავშირებით... მაშინ, როდესაც მთავრობა რაღაცას მაინც ფაფხურობს ამ პრობლემებთან დაკავშირებით. კერძოდ გახარია, რომელიც "ჭაობის კაბინეტს" მთლიანად ქაჩავს. ის ობიექტურად ყველა ოპოზიციურ ლიდერზე ბევრად უფრო ადექვატურად გამოიყურება. ასევე კანონზომიერია პარლამენტის გაკოტრება, ანუ სრული უფუნქციობა და დელეგიტიმაცია“, - წერს ხუხაშვილი.

საერთო ჯამში, ეს კვლევა ბევრ რამეზეა, კორონაზე, ნატოზე, ჩვენს წარმოდგენებსა და ღირებულებებზე. ირკვევა, რომ ნატოში 80%-ს უნდა, ამასთან იმავე გამოკითხულთა 41% ვაქცინას არ გაიკეთებს...

შიშის ფაქტორი ისეთ ქვეყანაში, როგორიც საქართველოა, ყოველთვის არსებობს, მაგრამ არც ამით თავის დაიმედებაა კარგი. ავტორიტეტული ძალა, რომელიც მას ამ ეტაპზე „ქართულ ოცნებას“ დაამარცხებს, ამ კვლევებშიც არ ჩანს, ხოლო მომავალში რა იქნება, ეს ძნელი სათქმელია.

 ოპოზიციას ახლა ახალი, გაუსვრელი ძალა და დიდი ფინანსები სჭირდება, რომ თავისი სიტყვა თქვას და ეს კვლევის გარეშეც კარგად ჩანს.

 

 

 

14
პარლამენტი

რა უფლებამოსილება მიენიჭებათ ოპოზიციონერ დეპუტატებს: კომიტეტში ცვლილებებს დღეს განიხილავენ

16
(განახლებულია 09:43 26.01.2021)
რეგლამენტში ცვლილებების მიღების შემდეგ უფრაქციო დეპუტატებს  შესაძლებლობა ექნებათ  დაიკავონ საპარლამენტო თანამდებობები

თბილისი, 26 იანვარი - Sputnik. პარლამენტის რეგლამენტში დაგეგმილ ცვლილებებს, რომელიც ოპოზიციონერი დეპუტატებისთვის გარკვეული უფლებამოსილების მინიჭებას შეეხება, საპროცედურო საკითხთა და წესების კომიტეტი დღეს განიხილავს.

საქართველოს საკანონმდებლო ორგანო დაჩქარებული წესით განიხილავს რეგლამენტში დაგეგმილ ცვლილებებს, რომლითაც ოპოზიციონერ დეპუტატებს დამატებითი უფლებები მიენიჭებათ.

კანონპქროექტი, რომელიც უმრავლესობამ მოამზადა, უფრაქციო დეპუტატებს საშულებას მისცემს, საპარლამენტო ცხოვრებაში სრულფასოვნად ჩაერთონ. რეგლამენტში მომზადებულ ცვლილებებში ნათქვამია, რომ აღნიშნული გამონაკლისები მხოლოდ მეათე მოწვევის პარლამენტს შეეხება.

„უფრაქციო დეპუტატებს მიეცემათ საშუალება იმისა, რომ საპარლამენტო ცხოვრების ყველა სრულფასოვანი ბერკეტი მათ ხელშიც იყოს, მათ შორის დებატები ინტერპელაციის წესით, კომიტეტის თავმჯდომარის მოადგილეობა, პარლამენტის თავმჯდომარის მოადგილეობა და ასე შემდეგ“, – განაცხადა პარლამენტის საპროცედურო კომიტეტის თავმჯდომარე ირაკლი ქადაგიშვილმა.

ცვლილებების მიხედვით, ვიცე-სპიკერის კანდიდატის წარდგენის უფლება ექნება საპარლამენტო ოპოზიციაში შემავალ უფრაქციო პარლამენტის წევრთა ჯგუფს. ასევე, კომიტეტის თავმჯდომარის ერთი მოადგილის კანდიდატურის წარდგენის უფლება ექნება საპარლამენტო ოპოზიციაში შემავალ ფრაქციას, ან უფრაქციო პარლამენტის წევრთა არანაკლებ ოთხკაციან ჯგუფს.

ამასთან, უფრაქციო დეპუტატებს შესაძლებლობა ექნებათ, პოლიტიკურ დებატებში ჩაერთონ და მონაწილეობა მიიღონ კანონპროექტის განხილვების დროს, აგრეთვე ინტერპელაციის პროცედურის ფარგლებში.

საქართველოს პარლამენტმა თითქმის ერთი თვის მანძილზე ერთპარტიულ რეჟიმში იმუშავა, თუმცა იანვრის დასაწყისში „პატრიოტთა ალიანსის“ პარტიული სიის წევრებმა, პარტიის მხრიდან გამოცხადებული ბოიკოტის მიუხედავად, საკანონმდებლო ორგანოში შესვლა გადაწყვიტეს. ამის შემდეგ ფრიდონ ინჯიამ, გელა მიქაძემ, ავთანდილ ენუქიძემ და დავით ზილფიმიანმა ახალი პოლიტიკური ძალა „ევროპელი სოციალისტები“ დააფუძნეს.

წილოსანი: იმედი გვაქვს, რომ პარლამენტს ოპოზიციონერი დეპუტატები შეემატებიან>>

თავიანთი გადაწყვეტილების შესახებ პარლამენტში შესვლასთან დაკავშირებით პარტია „მოქალაქეების“ წარმომადგენლებმაც განაცხადეს. მათ ხმების 1,33% მიიღეს და ორი სადეპუტატო სავარძელი ერგოთ. „გირჩის“ კიდევ სამი წარმომადგენელი აცხადებს, რომ გააგრძელებს დიალოგს როგორც ხელისუფლებასთან, ისე ოპოზიციასთან, მაგრამ პარლამენტში შესვლას ჯერ არ აპირებს.

16
თემები:
საქართველოს პარლამენტი