ნიკა მელია

ნიკა მელია „ნაციონალური მოძრაობის“ თავმჯდომარე ოფიციალურად გახდა

106
(განახლებულია 21:23 27.12.2020)
ნიკა მელია „ერთიანი ნაციონალური მოძრაობის“ თავმჯდომარედ დღეს გამართულ პარტიის ყრილობაზე ერთხმად აირჩიეს

თბილისი, 27 დეკემბერი ― Sputnik. საქართველოს უმსხვილესი ოპოზიციური პარტიის, „ერთიანი ნაციონალური მოძრაობის“ რიგით მეცხრე ყრილობაზე ნიკა მელია პარტიის თავმჯდომარედ აირჩიეს.

პარტიის ყრილობა ახლახან დასრულდა. ნიკა მელია თავმჯდომარის პოსტზე ერთხმად აირჩიეს. არჩევის შემდეგ მელიამ თანაპარტიელებს სიტყვით მიმართა და მათ მადლობა გადაუხადა.

„ნაციონალური მოძრაობიდან“ ბევრი წასულა და პატივი უნდა ვცეთ მათ არჩევანს, მაგრამ, ბუნებრივია, იბადება კითხვა – როგორ ხდება, რომ ბევრი მიდის, წასულან დიდებიც, წასულან ბევრნიც, ცოტაც, მაგრამ ეს მოძრაობა კი არ სუსტდება, არამედ პირიქით ძლიერდება და გაძლიერებულა, რა არის ამის მიზეზი? ამას აქვს მარტივი ახსნა, „ნაციონალური მოძრაობა“ არის ეროვნული მოძრაობის გაგრძელება, ეს არ არის პერსონების მოძრაობა, „ნაციონალური მოძრაობა“ არის ევროპული, თავისუფალი და წარმატებული საქართველოს იდეა და ამ იდეას ამიტომაც ვერცერთი ცალკე აღებული ადამიანი ვერ აზიანებს“, – განაცხადა მელიამ.

მანამდე კი თავმჯდომარის არჩევა რამდენიმე დღის განმავლობაში ელექტრონული კენჭისყრით, პარტიის Facebook-გვერდზე მიმდინარეობდა, რომელში მონაწილეობაც ნებისმიერ მოქალაქეს შეეძლო. კენჭისყრა 21 დეკემბერს დაიწყო და პარასკევს, 21:00 საათზე დასრულდა. კენჭისყრის შედეგად ნიკა მელიამ ხმათა 64.9% ხმა მიიღო, მისმა კონკურენტმა ლევან ვარშალომიძემ კი - 35.1%. ორივე კანდიდატი პარტიის პოლიტსაბჭოს მიერ იყო წარდგენილი. ელექტრონულ კენჭისყრაში 20 ათასზე მეტმა მოქალაქემ მიიღო მონაწილეობა. ეს პარტიის თავმჯდომარის არჩევის პირველი ელექტრონული კენჭისყრა იყო საქართველოს ისტორიაში.

ნიკა მელიას პარტიის თავმჯდომარედ არჩევა პარტიის დამფუძნებელმა, მიხეილ სააკაშვილმა ოფიციალურად მიულოცა.

მან ასევე ლევან ვარშალომიძეს საქართველოში დაბრუნებისა და „ნაცმოძრაობის“ რიგებში ბრძოლის გაგრძელების გამო მადლობა გადაუხადა.

„ნიკა მელიას მინდა მივულოცო გამარჯვება. ნიკა არის ჩემთვის შეუპოვრობის, გამბედაობის, თავგანწირვის სიმბოლო, რის გარეშეც არაფერი გამოვა უკვე იმიტომ, რომ ჩვენ ვართ ბრძოლის გადამწყვეტ ეტაპზე... მინდა, გითხრათ, რომ მომავალში, როგორც კი ამ უზურპატორებს  ჩამოვაშორებთ ხელისუფლებას, ყველა ძირითადი გადაწყვეტილება ქართველი ხალხის მიერ სწორედ ასე იქნება მიღებული – ელექტრონულ არჩევნებში, ღილაკზე თითის დაჭერით“, - განაცხადა სააკაშვილმა.

ნიკა მელია  2013-2014 წლებში მთაწმინდის გამგებელი იყო, 2014 წელს კი - თბილისის მერობის კანდიდატი. 2015 წლიდან არის „ერთიანი ნაციონალური მოძრაობის“ თბილისის საქალაქო ორგანიზაციის თავმჯდომარის მოადგილე და თავმჯდომარის მოვალეობის შემსრულებელი. 2016-2019 წლებში იყო საქართველოს მე-9 მოწვევის პარლამენტის წევრი პარტიული სიით, საარჩევნო ბლოკი: „ერთიანი ნაციონალური მოძრაობა“. 2019 წლის 25 ივნისს საქართველოს  პროკურატურამ მის წინააღმდეგ სისხლის სამართლის საქმე აღძრა ჯგუფური ძალადობის ორგანიზების, ხელმძღვანელობისა და მასში მონაწილეობის ბრალდებით. 2019 წლის 12 ნოემბერს  მელიას პარლამენტარის უფლებამოსილობა შეუჩერდა.
მელია 2020 წლის საპარლამენტო არჩევნებზე ბლოკმა „ერთიანი ნაციონალური მოძრაობა –  ძალა ერთობაშია“ გლდანის საარჩევნო ოლქის მაჟორიტარობის კანდიდატად წარადგინა.

პარტიის თავმჯდომარის კანდიდატურა ვაკანტური მას შემდეგ გახდა, რაც მისმა ყოფილმა თავმჯდომარემ გრიგოლ ვაშაძემ 15 დეკემბერს ყველასთვის მოულოდნელად პარტიიდან წასვლის შესახებ განცხადება გააკეთა. 

გრიგოლ ვაშაძემ ყველაზე გავლენიანი ოპოზიციური პარტია საპარლამენტო არჩევნების შემდეგ ქვეყანაში შექმნილი პოლიტიკური კრიზისის ფონზე  დატოვა. ოპოზიცია, რომელიც არჩევნების შედეგებს არ აღიარებს, პარლამენტში შესვლაზე უარს აცხადებს. 

გრიგოლ ვაშაძე პარტია „ერთიანი ნაციონალური მოძრაობის“ პოლიტსაბჭოს წევრი 2017 წელს გახდა. იგი პარტიის თავმჯდომარის პოსტს 2019 წლის 24 მარტიდან იკავებდა.

 

106
სალომე ზურაბიშვილი

ზურაბიშვილმა ევროპარლამენტს ქართველი სტუდენტებისთვის სწავლის საფასურის შემცირება სთხოვა

43
(განახლებულია 17:37 22.01.2021)
ბრიუსელში ვიზიტის ფარგლებში საქართველოს პრეზიდენტი მაღალი რანგის ევროპელ პარტნიორებთან შეხვედრებს მართავს.

თბილისი, 22 იანვარი – Sputnik. საქართველოს პრეზიდენტმა სალომე ზურაბიშვილმა ევროპარლამენტს ქართველი და ევროკავშირის ქვეყნების სტუდენტებისთვის სწავლის საფასურის გათანაბრება სთხოვა, რათა ქართველ სტუდენტებს ევროკავშირის ქვეყნებში სწავლისას ჰქონდეთ ისეთივე ტარიფებით სარგებლობის უფლება, რომლითაც ევროკავშირის წევრი ქვეყნების სტუდენტები სარგებლობენ, ნათქვამია საქართველოს სახელმწიფო მეთაურის ოფიციალურ გვერდზე გავრცელებულ განცხადებაში. 

ქართველი და ევროკავშირის ქვეყნების სტუდენტების სწავლის საფასურის გათანაბრების საკითხი იყო ერთ-ერთი მთავარი თემა, რომელსაც ზურაბიშვილი ბრიუსელში ევროპარლამენტის პრეზიდენტთან დავიდ სასოლისთან შეხვედრისას შეეხო.

სალომე ზურაბიშვილმა თხოვნით მიმართა ევროპარლამენტის პრეზიდენტს – რეკომენდაციით მიმართოს ამ გადაწყვეტილების მიმღებ შესაბამის ინსტანციებს.

შეხვედრაზე საუბარი შეეხო ასევე კოვიდის საწინააღმდეგო ვაქცინის ხელმისაწვდომობის საკითხს, რასთან დაკავშირებითაც საქართველოს პრეზიდენტმა აღნიშნა, რომ ამ კუთხით ევროკავშირს აკისრია არა მხოლოდ მორალური და სიმბოლური, არამედ პოლიტიკური პასუხისმგებლობაც. პრეზიდენტის აღნიშნული პოზიცია გაიზიარა ევროპარლამენტის პრეზიდენტმა და ხაზი გაუსვა კოვიდ–სოლიდარობის მნიშვნელობას.

სალომე ზურაბიშვილმა ევროპარლამენტის პრეზიდენტი საქართველოში მოიწვია, რაზეც დავიდ სასოლიმ განაცხადა, რომ მას სურვილი აქვს ევროპარლამენტის დეპუტატების დელეგაციასთან ერთად ესტუმროს ქვეყანას და უკეთ გაიცნოს „ევროკავშირის უახლოესი მეგობარი“.

ბრიუსელში ორდღიანი სამუშაო ვიზიტის ფარგლებში დაგეგმილია სალომე ზურაბიშვილის შეხვედრები ევროკავშირისა და ნატოს ხელმძღვანელ პირებთან. კერძოდ, პრეზიდენტი უკვე შეხვდა და შეხვდება ევროკავშირის უმაღლეს წარმომადგენელს საგარეო საქმეთა და უსაფრთხოების პოლიტიკის საკითხებში, ევროკომისიის ვიცე-პრეზიდენტს ჟოზეპ ბორელს, ევროპარლამენტის პრეზიდენტს დავიდ სასოლის, ევროკომისიის აღმასრულებელ ვიცე-პრეზიდენტს ეკონომიკურ საკითხებში ვალდის დომბროვსკის, ევროპარლამენტის საგარეო კომიტეტის თავმჯდომარეს დევიდ მაკალისტერსა და ნატოს გენერალურ მდივანს იენს სტოლტენბერგს.

ბრიუსელში საქართველოს პრეზიდენტის ვიზიტი 23 იანვარს დასრულდება.

43
თემები:
საქართველოს პრეზიდენტი
ალეკო ელისაშვილი

პარტია „მოქალაქეები“ პარლამენტში შევა: ისევ ერთი ყველას წინააღმდეგ

576
(განახლებულია 23:29 21.01.2021)
პარტიამ „მოქალაქეები“ საპარლამენტო არჩევნებზე ამომრჩეველთა ხმების 25,5 ათასი ხმა მიიღო, რაც 1,33%-ს შეადგენს

თბილისი, 21 იანვარი - Sputnik. პარტია „მოქალაქეები“ პარლამენტში შევა და მის კუთვნილ ორ სავარძელს დაიკავებს, განაცხადა პარტიის ლიდერმა ალეკო ელისაშვილმა.

პარტიამ „მოქალაქეები“ საპარლამენტო არჩევნებზე ამომრჩეველთა ხმების 25,5 ათასი ხმა მიიღო, რაც 1,33%-ს შეადგენს.

„ორი კაცის კი არა, გაცილებით მეტი დეპუტატის გასაკეთებელს გავაკეთებთ. რასაც ხალხს ვპირდებოდით, რომ ხალხის პრობლემების მთქმელები და გამხმოვანებლები ვიქნებოდით, იმას გავაკეთებთ... ყველაფერზე ვილაპარაკებთ, ხალხის რეალურ პრობლემებზე ვილაპარაკებთ, ვიბრძოლებთ, ვიჩხუბებთ იქ. არ შევდივართ გასართობად და სასეიროდ“, - განაცხადა ელისაშვილმა.

ამავე დროს ელისაშვილმა აღნიშნა, რომ ოპოზიციასთან კონსულტაციებს წყვეტს და მმართველ პარტიას „ქართული ოცნება - დემოკრატიულ საქართველოს“ მიმართავს თხოვნით, დაიწყოს დიალოგი პოლიტიკური კრიზისის გადაჭრის გზებზე.

ამასთან მმართველ პარტიაში მკაფიოდ განაცხადეს, რომ მხოლოდ ელისაშვილთან დიალოგის წარმართვას არ აპირებენ.

„ალეკო ელისაშვილს ისევე როგორც ნებისმიერ დეპუტატს, რომელიც არის არჩეული ჩვენი ქვეყნის მოსახლეობის მხრიდან, აქვს სრული არათუ უფლება, არამედ ვალდებულებაც, რომ შევიდეს პარლამენტში“, - აღნიშნა პარტიის პოლიტსაბჭოს წევრმა, ვიცე-პრემიერმა მაია ცქიტიშვილმა.

მან ასევე აღნიშნა, რომ „ქართული ოცნება“ მზად არის შეასრულოს თავისი პირობა საარჩევნო სისტემის რეფორმაზე და საარჩევნო კოდექსის რეფორმის თემაზე დიალოგი მთელს ოპოზიციურ სპექტრთან გააგრძელოს.

„ასეთ ცალკეულ ინიციატივებზე, ცალკეულ დეპუტატებთან „ქართული ოცნების" დიალოგი ალბათ, არ იქნება სწორი ფორმა. ეს არის პოლიტიკური პროცესი და დიალოგის პროცესი, რომელიც წარიმართება, მე იმედი მაქვს, რომ დანარჩენ ოპოზიციასთანაც დიალოგის მეხუთე რაუნდიც შედგება ადრე თუ გვიან“, - განაცხადა ცქიტიშვილმა.

მოლაპარაკებები

ოპოზიციამ და „ქართულმა ოცნებამ“ 31 ოქტომბერს გამართული არჩევნების დასრულებისთანავე პოლიტიკური კრიზისიდან გამოსვლის მიზნით დიალოგი წამოიწყეს.

შუამავლების როლი შეასრულეს საქართველოს საერთაშორისო პარტნიორებმა - აშშ-ის და ევროკავშირის ელჩებმა.

ოპოზიცია მოითხოვს ვადამდელ არჩევნებს, საარჩევნო კოდექსის შეცვლას, საარჩვენო ადმინისტრაციის განახლებას და პოლიტპატიმრების გათავისუფლებას.

მმართველი პარტია მზადაა აწარმოოს დიალოგი მხოლოდ საარჩევნო რეფორმაზე. გარდა ამისა, „ქართული ოცნება" ოპოზიციას სთავაზობს, შეიქმნას საპარლამენტო საგამოძიებო კომისია არჩევნების შესასწავლად და მზადაა დანიშნოს ვადამდელი არჩევნები იმ შემთხვევაში, თუ კომისია კონკრეტულ უბნებზე ხმების ხელახალი გადათვლის შედეგად 1-2%-იან ცდომილებას გამოავლენს.

ოპოზიცია არ ეთანხმება კომისიის პრინციპს და აცხადებს, რომ „ქართული ოცნების" მიერ მართულმა ადმინისტრაციებმა უკვე ჩაასწორეს უზუსტობები და გადათვლა უშედეგო იქნება. ისინი ასევე ამტკიცებენ, რომ შედეგები არ ასახავს არჩევნებზე და საარჩევნო კამპანიის დროს მომხდარ დარღვევებს, როდესაც მმართველი პარტია ადმინისტრაციულ რესურსს იყენებდა.

ამასობაში, მოლაპარაკებების შუამავლებმა აღნიშნეს, რომ ოპოზიციისა და მმართველი პარტიის პოზიციების დაახლოება დიალოგის ამოსავალი წერტილი უნდა გახდეს, ხოლო მოლაპარაკებები მოლაპარაკებების გულისთვის არ გაიმართება.

პოლიტიკური კრიზისის ფონზე, 60 ოპოზიციონერი დეპუტატიდან 51-მა უკვე დაწერა მანდატების მოხსნის შესახებ განცხადებები, რომლებსაც მმართველმა პარტიამ თებერვალში უნდა განიხილოს. ამრიგად, დიალოგისა და მოლაპარაკებების მეხუთე რაუნდისთვის დარჩენილი დრო თანდათან იწურება.

576
ფქვილი

საქართველოში ხორბლის ფქვილზე სუბსიდიის მოცულობა იზრდება

0
(განახლებულია 16:57 22.01.2021)
საქართველოში ხორბლის იმპორტის 90% რუსეთზე მოდის, რაც დაახლოებით ნახევარ მილიონ ტონა მარცვლეულს აღწევს

 

თბილისი, 22 იანვარი – Sputnik. ერთი ტომარა ხორბლის ფქვილზე სახელმწიფო სუბსიდიის მოცულობა გაიზარდა და 15 ლარი გახდა, ნათქვამია საქართველოს მთავრობის დადგენილებაში.

ადრე  50კგ–იან ტომარა პირველი ხარისხის ფქვილზე სუბსიდიის მოცულობა 10 ლარს შეადგენდა.

როგორც მთავრობის დადგენილებაშია ნათქვამი, აღნიშნული გაზრდილი სუბსიდია შეეხება პირველი ხარისხის ხორბლის ფქვილს, რომელიც 2021 წლის 1 თებერვლიდან 31 მარტამდე პერიოდში გაიყიდება. 

მწარმოებელ ქვეყნებში ხორბლის ცუდმა მოსავალმა, ეკონომიკურმა კრიზისმა და ლარის მერყევმა კურსმა იმოქმედა ფქვილის ღირებულებაზე, რამაც გააჩინა საფუძვლიანი ეჭვი, რომ ქვეყანაში პური გაძვირდებოდა. ამის თავიდან აცილების მიზნით საქართველოს ხელისუფლებამ მიიღო პირველი ხარისხის ხორბლის ფქვილის იმპორტის სუბსიდირების გადაწყვეტილება.

პროგრამა გათვლილია 4 თვეზე და ის დეკემბრიდან ამოქმედდა. წისქვილკომბინატებისთვის დაწესებულია ფიქსირებული ფასი – 53 ლარი პირველი ხარისხის ფქვილის 50 კგ-იან ტომარაზე. პროგრამა 1 მარტამდე მოქმედებს.

ხორბლის ფქვილის სუბსიდირებისთვის სახელმწიფო 10 მლნ ლარის გამოყოფას გეგმავს.

0