გაერთიანებული ოპოზიცია - შალვა ნათელაშვილი და გიგი უგულავა

რა შეცვალა განვლილმა არჩევნებმა ქართულ პოლიტიკურ სპექტრში და რისთვის ემზადება ოპოზიცია

183
(განახლებულია 16:58 21.12.2020)
საქართველოში საპარლამენტო არჩევნებმა, ასე თუ ისე, ჩაიარა. პარლამენტიც შეიკრიბა და ხუთშაბათს მთავრობის ძველ შემადგენლობას ისევ გამოუცხადებს ნდობას.

ეს არც არის გასაკვირი. ცნობილი გამოთქმისა არ იყოს, „ფონზე გასვლისას ცხენებს არ ცვლიან“ და მმართველ ძალას, რა თქმა უნდა, სუსხიანი და კოვიდიანი ზამთრის წინ უკვე გამოცდილ და შეკრულ გუნდთან ერთად ურჩევნია როგორც სოციალურ-ეკონომიკურ კრიზისთან, ასევე კორონასთან გამკლავება. სწორედ მათ კარგ მენეჯმენტზეა დამოკიდებული დღეს სტაბილურობის შენარჩუნება.

როგორც ცნობილია, მთავრობის გუნდში ერთი ცვლილება განხორციელდება – იუსტიციის მინისტრად გამოცდილი იურისტი და დიპლომატი გოჩა ლორთქიფანიძეა წარდგენილი. თუმცა ეს ცვლილებაც დროებითია. მასმედიაში გავრცელებული ინფორმაციით, როცა ის გაზაფხულზე ჰააგის სასამართლოს მოსამართლედ შეუდგება მუშაობას, მას გამოცდილი დეპუტატი და ასევე კარგი იურისტი გიორგი კახიანი შეცვლის. ის „ქართული ოცნების“ სიის მეშვიდე ნომერი და საპროცედურო საკითხთა კომიტეტის ყოფილი თავმჯდომარეა.

ქართული მასმედია პარტია „ქართული ოცნების“ ყრილობის მოწვევაზეც საუბრობს, რომელზეც ბიძინა ივანიშვილი პარტიის თავმჯდომარეობას კახი კალაძეს ან ირაკლი კობახიძეს დაუთმობს და სრულიად წავა პოლიტიკიდან. მაგრამ სანამ ან ერთი, ან მეორე მოვლენა ოფიციალურად არ გამოცხადდება და დადასტურდება, ყველაფერი მაინც სპეკულაციებია.

პარლამენტის უფლებამოსილება კი ცნობილია, მაგრამ საინტერესო პროცესები მიმდინარეობს ოპოზიციაშიც. პარლამენტში შესვლა-არშესვლაზე დაწყებულმა ჭიდილმა ოპოზიცია გახლიჩა და ახლა მივიღეთ 10 მანდატზე უარის ჯერჯერობით არმთქმელი და განცხადებადაწერილი 50 დეპუტატი. შესაბამისად, გაიყო და გაიხლიჩა მათი ხმებიც.

რევოლუციაზე საუბარი დროდადრო კი გაკრთება ხოლმე იმ ადამიანების მხრიდან, რომლებიც ფიქრობენ, რომ ხელისუფლებამ არჩევნები გააყალბა, თუმცა აქვე აღსანიშნავია, რომ რაიმე დამაჯერებელი მტკიცებულება ჯერჯერობით არც ქართულ და არც საერთაშორისო საზოგადოებას არ უნახავს და იქნებ სწორედ ამიტომაც ხალხი რატომღაც მაინცდამაინც ვერ აღშფოთდა იმ არაორგანიზებულობის გამო, რომელიც თან ახლდა საარჩევნო პროცესს.

ამ ფონზე ოპოზიციის რადიკალური ფრთა ისევ ამტკიცებს, რომ გაზაფხულზე ხალხის ქუჩაში გამოსვლა და მშვიდობიანი რევოლუცია გარდაუვალია. თუმცა რეალურად პოლიტიკური პროცესისთვის, რა თქმა უნდა, ჯობს, რომ ისინი არა რევოლუციის, არამედ ადგილობრივი არჩევნებისთვის მოემზადონ სათანადოდ, დამკვირვებლებით, ტექნიკით და ა.შ.

ისეთი პირი უჩანს, რომ სწორედ ადგილობრივი თვითმმართველობის არჩევნების წინ რეალურად ჩამოყალიბდება ე.წ. მესამე ძალა, ანუ, ერთი მხრივ, „ქართული ოცნება“, მეორე მხრივ – ე.წ. რადიკალური ოპოზიცია, რომელიც საბოლოოდ, ალბათ, სააკაშვილისა და მისი მომხრეების გვერდით ჩამოყალიბდება და ე.წ. „მესამე გზა“, რომლის სათავეში „ლელო“, გიორგი მარგველაშვილი, ბოკერიას „ევროპელი დემოკრატები“ მოჩანან. დადასტურდა, რომ ისინი აქტიური კონსულტაციების რეჟიმში გადავიდნენ და, შესაძლოა, პარტიების შერწყმაზე თუ არა, ერთ ბლოკში შესვლაზე მიიღონ გადაწყვეტილება.

საპარლამენტო არჩევნებმა ნათლად აჩვენა ქართველ პოლიტიკოსებს, რომ მათი წონა ცალ-ცალკე არც ისე დიდია და დროა დათმონ გაბერილი ამბიციები და ცივილიზებული თანამშრომლობის ფორმებზე იფიქრონ. საამისო დრო კი ქვეყანას სწორედ ახლა აქვს.

 

რედაქცია შეაძლოა არ ეთანხმებოდეს ავტორის მოსაზრებას

183
სალომე ზურაბიშვილი

საქართველოს პრეზიდენტი მომავალ კვირაში ბრიუსელს ეწვევა

16
ვიზიტის ფარგლებში პრეზიდენტს ევროკავშირისა და ნატოს ხელმძღვანელობასთან მაღალი დონის შეხვედრები აქვს დაგეგმილი

თბილისი, 15 იანვარი — Sputnik. საქართველოს პრეზიდენტი სალომე ზურაბიშვილი 20 იანვარს სამუშაო ვიზიტით ბრიუსელს ეწვევა, ნათქვამია სახელმწიფოს მეთაურის ადმინისტრაციის განცხადებაში.

ადმინისტრაციის მონაცემებით, ვიზიტის ფარგლებში პრეზიდენტს ევროკავშირისა და ნატოს ხელმძღვანელობასთან მაღალი დონის შეხვედრები აქვს დაგეგმილი.

საქართველომ უკვე განაცხადა, რომ 2024 წელს ევროკავშირის წევრობის მიღების მიზნით განაცხადის შეტანას გეგმავს, და პრეზიდენტის ვიზიტის პროგრამის დიდი ნაწილი ევროკავშირისა და ევროკომისიის წარმომადგენლებთან შეხვედრებს დაეთმობა.

საქართველოს პრეზიდენტი ევროპის საბჭოს პრეზიდენტ შარლ მიშელს და ევროკომისიისა და ევროპარლამენტის წარმომადგენლებს შეხვდება.

აგრეთვე დაგეგმილია ზურაბიშვილის შეხვედრა ნატოს გენერალურ მდივანთან, იენს სტოლტენბერგთან.

16
გიორგი გახარია

„მკაცრად ვიმოქმედებთ“ გახარია რელიგიურ ნიადაგზე მომხდარ კონფლიქტს შეეხო

77
(განახლებულია 17:29 15.01.2021)
ადამიანები, რომლებიც მსგავსი კონფლიქტების პროვოცირებას ეწევიან, კანონის მთელი სიმკაცრით დაისჯებიან, ხაზგასმით განაცხადა მთავრობის მეთაურმა.

თბილისი, 15 იანვარი – Sputnik. საქართველოს პრემიერ-მინისტრმა გიორგი გახარიამ სოფელ ბუკნარში განვითარებულ მოვლენებზე ისაუბრა. როგორც ცნობილია, უკვე რამდენიმე დღეა, სოფელში რელიგიურ ნიადაგზე წარმოქმნილი სკანდალი არ ცხრება.

კონფლიქტი ბუკნარში იმის გამო დაიწყო, რომ ადგილობრივმა მუსლიმებმა ტრადიციული პარასკევის ლოცვის წასაკითხად კერძო სახლში სამლოცველოს მოწყობა გადაწყვიტეს. ამის გამო სოფელში გავრცელდა ხმა, რომ ბუკნარში აპირებენ მეჩეთის აშენებას, რამაც ადგილობრივ მართლმადიდებელთა უკმაყოფილება გამოიწვია. ორი დღის წინ პირველი დაპირისპირებისა და ჩხუბის შემდეგ სამი ადამიანი, მათ შორის ორი მოზარდი მუსლიმთა სათვისტომოდან, საავადმყოფოში გადაიყვანეს იმის გამო, რომ მათ ქვები დაუშინეს. პოლიციამ ერთ-ერთი დამნაშავე დააკავა.

„არავის მივცემთ შესაძლებლობას, რომ უკანონო ქმედებებით რაიმე სახის პროვოცირება გაუწიონ რელიგიურ ნიადაგზე ჩვენს მოქალაქეებს შორის დაპირისპირებას. შინაგან საქმეთა სამინისტროს უკვე აქვს დავალება იმასთან დაკავშირებით, რომ იქ, სადაც იქნება მცდელობა იმისთვის, რომ რელიგიურ ნიადაგზე ხელი შეეწყოს ან პროვოცირება მოხდეს ჩვენს მოსახლეობას შორის დაპირისპირებას, სახელმწიფო და შინაგან საქმეთა სამინისტრო იმოქმედებს უმკაცრესად“, – განაცხადა პრემიერმა.

გახარიამ აღნიშნა ასევე, რომ საქართველოს ტერიტორიაზე რელიგიური მრავალფეროვნება – ჩვენი ქვეყნის დიდი ისტორიის ნაწილია.

ბოლო დღეებში მასმედიაში გავრცელებული კადრებიდან ჩანს, რომ სოფელში მყოფი პოლიციის თანამშრომლები ცდილობენ რამდენიმე ათეული ადგილობრივი მცხოვრების შეკავებას, რომლებიც იმუქრებიან იმ პირთა მიმართ ფიზიკური ანგარიშსწორებით, ვინც სოფლის ერთ-ერთ საცხოვრებელ სახლში სამლოცველოს მოწყობას ცდილობს. ვითარება იმის გამო გართულდა, რომ პირველი ჩხუბის შემდეგ მუსლიმთა სათვისტომოს მხარდასაჭერად ბუკნარში მეზობელი აჭარის რეგიონიდან რამდენიმე ათეული ადამიანი ჩავიდა.

საუბარია ისლამის მიმდევარ ეთნიკურ ქართველებზე – ისინი აჭარის მოსახლეობის დაახლოებით 20%-ს შეადგენენ. მაღალმთიანი აჭარიდან ოჯახები სტიქიური უბედურებებისა და სხვა არახელსაყრელი საცხოვრებელი პირობების გამო ხშირად გურიისა და სხვა რეგიონების სოფლებში სახლდებიან.

ადგილზე უფლებადამცველები და არასამთავრობო ორგანიზაციების წარმომადგენლებიც მუშაობენ, რათა დაპირისპირებულ მხარეებს შორის კონფლიქტი აღმოფხვრან.

77
ეკატერინე ტიკარაძე

ტიკარაძე: აუცილებლად ავიცრები და არ ვისარგებლებ არანაირი პრიორიტეტით

0
საქართველოში კორონავირუსის საწინააღმდეგო ვაქცინაციის გეგმის მომზადებასა და მის შესყიდვაზე სპეციალურად შექმნილი უწყებათშორისი კომისია მუშაობს

თბილისი, 15 იანვარი - Sputnik. საქართველოს ჯანდაცვის მინისტრი ეკატერინე ტიკარაძე კორონავირუსზე აუცილებლად აიცრება, ამის შესახებ მან ტელეკომპანია „რუსთავი 2“-ის ეთერში განაცხადა.

ჯანდაცვის მინისტრის განმარტებით, ქვეყანაში გარანტირებულად ხარისხიანი ვაქცინა შემოვა, ამის გარანტიებს კი COVAX-პლატფორმა იძლევა.

„რა თქმა უნდა, ავიცრები იმ კატეგორიაში, რომელშიც ვაქცინაციის საჭიროება მექნება და არ ვისარგებლებ პრიორიტეტით… ზუსტად ვიცი, რა ხარისხის ვაქცინაცია იქნება ქვეყანაში და ვაქცინას აუცილებლად გავიკეთებ“, - განაცხადა ეკატერინე ტიკარაძემ.

ტიკარაძის თქმით, საუბარია Pfizer-ის ვაქცინაზე, რომლის დოზირებაც ორეტაპიანია. მან ასევე აღნიშნა, რომ გარანტირებულად ხარისხიანი ვაქცინა შემოვა, ამის გარანტიებს კი COVAX-პლატფორმაზე გასაგზავნად დღეს უკვე გამზადდა წერილი ყველა იმ შესრულებული სამუშაოების შესახებ, რომელიც საქართველოში ვაქცინაციის მომზადების პერიოდისთვის განხორციელდა.

„მზადდება გარკვეული დოკუმენტაცია როგორც საკანონმდებლო, ასევე საინფორმაციო მიმართულებით. გეგმაზომიერად მივყვებით ყველა იმ პროცესს, რომელიც საჭიროა შეუფერხებელი და უსაფრთხო ვაქცინაციისთვის“, - განაცხადა ჯანდაცვის მინისტრმა.

მინისტრმა ასევე აღნიშნა, რომ ქვეყანაში ვაქცინების შესანახად დამატებითი მაცივრების შეძენის საჭიროება არ არის.

საქართველოს პირველ ეტაპზე COVID-19-ის საწინააღმდეგო ვაქცინის იმ რაოდენობით შეძენის უფლება აქვს, რომელიც მოსახლეობის 20%-სთვის იქნება საკმარისი. ქვეყანამ 1 400 ათასი დოზა ვაქცინის შესაძენად პირველი შენატანი — 4 მლნ დოლარი უკვე განახორციელა. აღნიშნული რაოდენობა 700 ათას ადამიანზეა გათვლილი.

პრემიერი: ვაქცინასთან დაკავშირებით ბევრი აბსურდული ჭორი ვრცელდება >>

საქართველოში კორონავირუსის საწინააღმდეგო ვაქცინაციის გეგმის მომზადებასა და მის შესყიდვაზე სპეციალურად შექმნილი უწყებათშორისი კომისია მუშაობს, რომელიც ასევე უზრუნველყოფს კოვიდ-ვაქცინაციის დასაწყებად საჭირო ტექნიკურ სამუშაოებს.

0