საქართველოს მთავრობა

პარლამენტი მთავრობის ახალი შემადგენლობის დასამტკიცებლად ემზადება

55
(განახლებულია 20:28 18.12.2020)
ყველა კითხვას პასუხი მომავალ კვირაში გაეცემა, როცა პარლამენტში მინისტრთა კაბინეტის ახალი შემადგენლობა გამოცხადდება.

თბილისი, 18 დეკემბერი — Sputnik. საქართველოს მთავრობის ახალი შემადგენლობა და სამთავრობო პროგრამა მეათე მოწვევის საკანონმდებლო ორგანოს ნდობის მოსაპოვებლად პარასკევის ბოლომდე წარედგინება.

ახალი პარლამენტის უფლებამოსილების ცნობის შემდეგ, კანონმდებლობის შესაბამისად, მთავრობა სრული შემადგენლობით გადადგა. ამჟამად ყველა მინისტრი მოვალეობის შემსრულებლად ითვლება. ახალი მინისტრთა კაბინეტის დასამტკიცებლად 76 დეპუტატის მხარდაჭერაა აუცილებელი.

კომიტეტებსა და ფრაქციებში განხილვის პროცესი მომავალი კვირიდან დაიწყება.

უკვე ცნობილია, რომ მინისტრთა კაბინეტის შემადგენლობაში მნიშვნელოვანი ცვლილებები არ იგეგმება. ერთადერთი გამონაკლისი, რომელიც უკვე ცნობილია, ისაა, რომ მთავრობაში ახალი იუსტიციის მინისტრი იქნება, რადგანაც უწყების ყოფილი ხელმძღვანელი თეა წულუკიანი დეპუტატი გახდა. 

თავად წულუკიანმა ჟურნალისტებთან განაცხადა, რომ მას თანამდებობაზე დაბრუნება შესთავაზეს, რაზეც უარი განაცხადა.

ამას გარდა, პარლამენტის პირველი ვიცე-სპიკერის გია ვოლსკის განცხადებით, იგეგმება განათლების, მეცნიერების, კულტურისა და სპორტის სამინისტროსგან კულტურის ცალკე სტრუქტურად ჩამოყალიბება. ვოლსკის აზრით, თავიდანვე იყო დაშვებული შეცდომა, როცა ორი უწყების შერწყმა მოხდა.

„მთავრობის დაკომპლექტების საკითხზე კონსულტაციები მიმდინარეობს. გარკვეული შეთანხმებები უკვე არსებობს, მაგრამ საკითხი უნდა მივიდეს ბოლომდე. ჩვენ ამ არაჯანსაღ გარემოში არ უნდა მივცეთ არაჯანსაღ ძალებს ვითარების სკანდალურად აგორების საშუალება. მნიშვნელოვან ცვლილებებს არ უნდა ველოდოთ, თუ არ ჩავთვლით იმ გეგმას, რომელიც შესაძლოა უახლოეს პერიოდში იყოს რეალიზებული – ეს არის კულტურის სამინისტროს გამოყოფა და იუტიციის მინისტრის ვაკანტური პოსტის შევსება“, – განუცხადა ჟურნალისტებს გია ვოლსკიმ.

გასულ კვირაში მმართველმა პარტია „ქართული ოცნება – დემოკრატიულმა საქართველომ“ პარლამენტს პრემიერ-მინისტრის პოსტზე გიორგი გახარიას კანდიდატურა ოფიციალურად წარუდგინა.

55
თემები:
საქართველოს პარლამენტი (293)
სალომე ზურაბიშვილი და არმენ სარქისიანი

მშვიდობა და თანამშრომლობა: რაზე ისაუბრეს საქართველოს და სომხეთის პრეზიდენტებმა

34
(განახლებულია 22:20 15.04.2021)
საქართველოსთან ურთიერთობების განმტკიცება ერთ-ერთი მნიშვნელოვანი წინაპირობაა როგორც სომხეთის, ისე რეგიონის უსაფრთხოებისა და განვითარებისთვის

თბილისი, 15 აპრილი - Sputnik. კავკასიის განვითარებისთვის მშვიდობასა და თანამშრომლობას ალტერნატივა არ გააჩნია. განაცხადა საქართველოს პრეზიდენტმა სალომე ზურაბიშვილმა სომხეთის პრეზიდენტ არმენ სარქისიანთან ერთობლივ პრესკონფერენციაზე.

სომხეთის პრეზიდენტი მეუღლესთან ერთად თბილისს ხუთშაბათს ოფიციალური ვიზიტის ფარგლებში ესტუმრა. შეხვედრის საზეიმო ცერემონია ორბელიანის სასახლეში გაიმართა. შემდეგ ორი ქვეყნის პრეზიდენტების შეხვედრა გაიმართა როგორც პირისპირ, ისე გაფართოებულ ფორმატში.

„ეს ვიზიტი ძალიან დიდი ხნის წინ იყო დაგეგმილი და, სამწუხაროდ, ვერ განხორციელდა. პანდემიამ, რეგიონში განვითარებულმა კონფლიქტმა ხელი ძალიან შეგვიშალა და ვერ შევძელით აქამდე ამ ვიზიტის ორგანიზება. ძალიან ბედნიერი ვარ, რომ დღეს მაქვს საშუალება, მიგიღოთ ორბელიანების სასახლეში“, - განაცხადა ზურაბიშვილმა.

როგორც სახელმწიფოს მეთაურმა აღნიშნა, კავკასიის ყველა ქვეყანა მძიმე გამოწვევების წინაშე აღმოჩნდა.

„თუმცა ბევრად მძიმე იყო რეგიონისთვის და ცალკეული ქვეყნისთვის ომისგან გამოწვეული მსხვერპლი. მინდა, ამ ომის დროს დაღუპულთა ოჯახებს მივუსამძიმრო, თანაგრძნობა გამოგიცხადოთ თქვენ, ბატონო პრეზიდენტო. კონფლიქტის დროს, როგორც ახლა, საქართველო მშვიდობის მხარეს იდგა და დგას, ამის ნიშნად შეთავაზებულ იქნა ჩვენი პლატფორმა შეხვედრებისთვის, დიალოგისთვის და სიტუაციის განმუხტვისთვის, ეს შეთავაზება ძალაში რჩება ნებისმიერ დროს... ნებისმიერი კონფლიქტი რეგიონში მთლიანად რეგიონს აზარალებს, ამიტომ მშვიდობა და თანამშრომლობა უალტერნატივოა კავკასიის განვითარებისთვის“, – განაცხადა სალომე ზურაბიშვილმა

მისი თქმით, შეხვედრაზე საუბარი ასევე შეეხო საქართველოსა და სომხეთს შორის ორმხრივ ურთიერთობებს - ეკონომიკური, ტურისტული და კულტურული პროექტების განმტკიცებასა და განხორციელებას.

„ვამაყობთ, რომ საქართველოს სომხური წარმოშობის მოქალაქეები სარგებლობენ ამ ქვეყანაში ყველა საშუალებით, რათა შეინარჩუნონ წინაპართა ენა და კულტურა. ამავე დროს მეტი უნდა გაკეთდეს და ძირითადად სახელმწიფოს მხრიდან, რათა სახელმწიფო ენას სრულყოფილად დაეუფლონ და მიიღონ სრულყოფილი ინტეგრაცია ქვეყნის ეკონომიკურ თუ პოლიტიკურ განვითარებაში“, - აღნიშნა ზურაბიშვილმა.

სომხეთის პრეზიდენტის თქმით, ქართველ კოლეგასთან შეხვედრაზე საკითხთა ფართო სპექტრი განიხილეს.

„თამამად შემიძლია ვთქვა, რომ საქართველოსთან ურთიერთობების განმტკიცება ერთ-ერთი მნიშვნელოვანი წინაპირობაა, როგორც ჩვენი ქვეყნის, ასევე რეგიონის უსაფრთხოებისა და განვითარებისთვის... ჩვენ წარმატებით ვთანამშრომლობთ ტრანსპორტის, ენერგეტიკის, ტურიზმის, სოფლის მეურნეობისა და მრავალ სხვა სფეროში. არის ასევე თანამშრომლობის დიდი პოტენციალი თანამედროვე ტექნოლოგიების, ხელოვნური ინტელექტის, მაღალი ტექნოლოგიების, ბიოტექნოლოგიების განვითარების, კიბერუსაფრთხოების, სურსათის უზრუნველყოფის საკითხებში. ეს თანამშრომლობა ორმხრივი და მრავალმხრივია“, – განაცხადა სარქისიანმა.

მისი თქმით, ორი ქვეყნის ინსტიტუტების თანამშრომლობით შესაძლებელია საქართველოსა და სომხეთს შორის თანამედროვე ბიზნეს-ურთიერთობების გაღრმავება.

„მზად ვარ თქვენთან ერთად ვიმუშაოთ, რომ ბიზნესურთიერთობები განვითარდეს და ჩვენი წვლილი შევიტანოთ. განსაკუთრებით მინდა, ხაზი გავუსვა ჩვენს ქვეყნებს შორის თანამშრომლობის გაღრმავების აუცილებლობას COVID-19-ის წინააღმდეგ ბრძოლაში. თანამშრომლობის ხელშესაწყობად ძალისხმევას არ ვიშურებთ“, – განაცხადა არმენ სარქისიანმა.

მისი თქმით, მიმდინარეობს მუშაობა როგორც სომხეთ-საქართველოს მთავრობათშორისი კომისიის, ასევე უწყებათაშორის დონეზე ორმხრივი თანამშრომლობის ამჟამინდელი დონის ასამაღლებლად.

„გეთანხმებით, რომ პრეზიდენტის ინსტიტუტებს შეუძლიათ, განსაკუთრებული როლი შეიტანონ ამ საქმეში“, - აღნიშნა სარქისიანმა.

დასასრულს სომხეთის პრეზიდენტმა იმედი გამოთქვა, რომ უახლოეს მომავალში სალომე ზურაბიშვილი სომხეთს ოფიციალური ვიზიტით ეწვევა.

საქართველომ და სომხეთმა დიპლომატიური ურთიერთობები 1992 წლის 17 ივლისს დაამყარეს. ქვეყნები ბევრ სფეროში თანამშრომლობენ. ყველაზე ინტენსიურია თანამშრომლობა ვაჭრობის სფეროში. ქვეყნებს შორის თავისუფალი ვაჭრობის რეჟიმი მოქმედებს, ხოლო სომხეთი საქართველოს ძირითად სავაჭრო პარტნიორთა ათეულში შედის.

34
ირაკლი კობახიძე

კობახიძე: ხელისუფლება ოპოზიციასთან კომპრომისისთვის მზადაა

35
(განახლებულია 15:32 15.04.2021)
ბოლო პერიოდში აშშ-ის კონგრესის და სახელმწიფო დეპარტამენტის არაერთი წარმომადგენელიც გამოთქვამს შეშფოთებას საქართველოში შექმნილი პოლიტიკური კრიზისისა და მმართველი და ოპოზიციური პარტიების უშედეგო მოლაპარაკებების გამო.

თბილისი, 15 აპრილი - Sputnik. მმართველი პარტია „ქართული ოცნება – დემოკრატიული საქართველო“ მზადაა ოპოზიციასთან მოლაპარაკებების პროცესში კომპრომისზე წავიდეს, განაცხადა პარტიის თავმჯდომარე ირაკლი კობახიძემ ჟურნალისტებთან. 

მარტის ბოლოს თბილისში ევროპული საბჭოს პრეზიდენტის სპეცწარმომადგენელი კრისტიან დანიელსონი მეორედ ჩამოვიდა, რომელმაც მხარეებს კომპრომისული დოკუმენტი შესთავაზა. თუმცა, მისი წინადადებები უგულებელყოფილი იქნა. კონსენსუსის მიღწევა ორ საკითხთან – პოლიტპატიმრების გათავისუფლება და ვადამდელი საპარლამენტო არჩევნების გამართვა – დაკავშირებით ვერ მოხერხდა.

„ჩვენ ვაფიქსირებთ მზადყოფნას, რომ გადაიდგას კონკრეტული ნაბიჯები, მათ შორის, კომპრომისის მიმართულებით, რაც ჩვენ არაერთხელ დავადასტურეთ და მომავალშიც მზად ვართ, გამოვავლინოთ აბსოლუტურად კონსტრუქციული მიდგომა პრინციპების დაცვით“, – განაცხადა კობახიძემ.

მისი თქმით, ამ პრინციპებს გადამწყვეტი მნიშვნელობა აქვს ნებისმიერი შეთანხმების ხელმოწერისას.

საპარლამენტო არჩევნებიდან თითქმის ექვსი თვის შემდეგ ოპოზიციის ძირითადი ნაწილი კვლავ არ აღიარებს მათ შედეგებს და ვადამდელ არჩევნებს მოითხოვს. მმართველი პარტია განიხილავს ამ საკითხს „წითელ ხაზად“, არჩევნების გაყალბების ბრალდებებს უსაფუძვლოს უწოდებს და ოპოზიციას მოლაპარაკებებზე ყურადღების სხვა საკითხებზე გამახვილებას სთავაზობს.

ოპოზიციის კიდევ ერთი პრინციპული მოთხოვნა, რომელთან დაკავშირებითაც მმართველი პარტია დათმობაზე წასვლას არ აპირებს „პოლიტპატიმრების“: ოპოზიციური პარტია „ნაცმოძრაობის“ ლიდერის ნიკა მელიასა და ოპოზიციური ტელეკომპანია „მთავარი არხის“ დამფუძნებლის გიორგი რურუას  გათავისუფლებაა.

35
თემები:
საქართველოს პოლიტიკური ცხოვრება
თეა წულუკიანი

წულუკიანი: ბესო ზანგურმა სასწრაფოდ უნდა დატოვოს თეატრი

0
(განახლებულია 11:35 16.04.2021)
მას შემდეგ, რაც ნინუცა მაყაშვილმა განაცხადა, რომ ყოფილი მეუღლე ბესო ზანგური მასზე ფიზიკურად ძალადობდა, შსს-მ გამოძიება დაიწყო.

თბილისი, 16 აპრილი – Sputnik. საქართველოს კულტურის, სპორტისა და ახალგაზრდობის მინისტრი თეა წულუკიანი მსახიობის ნინუცა მაყაშვილის და მისი ყოფილი მეუღლის, მსახიობ ბესო ზანგურის საქმესთან დაკავშირებულ ფაქტს გამოეხმაურა.

12 აპრილს გადაცემა  ტელეკომპანია Rustavi 2-ის გადაცემა „ფარულ კონვერტში“ 33 წლის მსახიობმა ნინუცა მაყაშვილმა 11 წლის წინანდელი ფაქტები გაიხსენა და განაცხადა, რომ იგი მეუღლის მხრიდან, ორსულობის პერიოდშიც კი ძალადობის მსხვერპლი იყო. აღნიშნულ ფაქტთან დაკავშირებით შსს-მ გამოძიება დაიწყო. 

ნინუცა მაყაშვილის მიერ ბესო ზანგურის შესახებ გაკეთებულ განცხადებას საზოგადოებაში მწვავე რეაქციები მოჰყვა. ნინუცა მაყაშვილი შინაგან საქმეთა სამინისტროში გამოკითხვაზე დაიბარეს. ბესო ზანგური ყოფილ მეუღლეზე ძალადობას კატეგორიულად უარყოფს.

თეა წულუკიანმა ნინუცა მაყაშვილს გამოძიებასთან თანამშრომლობისკენ მოუწოდა.

„ნინუცა მაყაშვილი, მიუხედავად იმისა, რომ მიწვეული იყო საგამოძიებო ორგანოში, ის ჯერ არ მისულა. იმედია უარს არ აცხადებს თანამშრომლობაზე. მან ეს ნაბიჯი უნდა გადადგას, ვინაიდან ეს სხვა ქალების უფლებების დაცვისთვის არის უკიდურესად მნიშვნელოვანი", – განაცხადა წულუკიანმა.

რაც შეეხება ბესო ზანგურს, მინისტრი მიიჩნევს, რომ მსახიობმა სასწრაფოდ უნდა დატოვოს რუსთაველის თეატრი, რადგან ზანგურის გასათავისუფლებლად შესაბამისი ბერკეტი მას არ გააჩნია.

კულტურის მინისტრმა კომენტარი გააკეთა რუსთაველის თეატრის სამხატვრო ხელმძღვანელ რობერტ სტურუას შესაძლო გათავისუფლებასთან დაკავშირებით. მისი თქმით, სტურუას გათავისუფლება არ იგეგმება.

„ბატონ რობერტ სტურუასთან დაკავშირებით პირდაპირ გეტყვით, რომ მისი გათავისუფლება არ იგეგმება. ეს არის ადამიანი, რომელსაც დამეთანხმებით, მხოლოდ ერთი ბადალი თუ ჰყავს, ჩვენ მას ყველამ უნდა მივცეთ შესაბამისი საშუალება, რომ იმუშაოს და იმოღვაწეოს. ეს არის მისი საქმე. კარგი იქნება, თუ შევწყვეტთ მასზე თავდასხმას“, – განაცხადა წულუკიანმა.

 

 

0