საპარლამენტო არჩევნები

ბოიკოტი, კრიზისი და არჩევნები: როგორი იქნება საპარლამენტო არჩევნების მეორე ტური

134
(განახლებულია 21:04 20.11.2020)
საქართველოს საპარლამენტო არჩევნების მეორე ტური ოპოზიციური პარტიების პროტესტის შედეგად წარმოქმნილი პოლიტიკური კრიზისის ფონზე გაიმართება

მეორე ტურის ჩატარება აუცილებელი გახდა, ვინაიდან თავის ოლქში ვერცერთმა კანდიდატმა ვერ მიიღო ხმების ნახევარზე მეტი 31 ოქტომბრის არჩევნებზე.

ოპოზიციამ ბოიკოტი გამოაცხადა - უარი თქვა დეპუტატის მანდატებზე და მეორე ტურში მონაწილეობაზე. თუმცა მათი კანდიდატები მაინც იქნებიან მითითებული ბიულეტენებში. კანონმდებლობის თანახმად, პირველ ორ ადგილზე გასული კანდიდატები მეორე ტურში ავტომატურად გადადიან.

ოპოზიციის იგნორი

თავდაპირველად ოპოზიცია მეორე ტურზე მისული ამომრჩევლებისთვის „სირცხვილის დერეფნების“ მოწყობას გეგმავდა. მაგრამ მოგვიანებით მათ უარი თქვეს ამ იდეაზე და კენჭისყრის დღეს „წერტილოვანი პროტესტები“ დააანონსეს.

თუმცა დღეს, თანამოაზრეებთან კონსულტაციების შემდეგ, ოპოზიციამ გადაწყვიტა, არაფერი მოიმოქმედოს.

„ნებისმიერი სახის აქცია, რაც არ უნდა გაგვემართა ჩვენ, გარკვეულ მნიშვნელობას და დატვირთვას მისცემდა მეორე ტურებს. ჩვენ გადავწყვიტეთ, რომ ვინაიდან ეს არის სრული ფარსი, რაც ხვალ უნდა ჩატარდეს ქვეყანაში, ჩვენ არ ვაღიარებთ არც პირველი ტურის შედეგებს და არ ვმონაწილეობთ მეორე ტურში, ამიტომ გადავწყვიტეთ, რომ არ მივცეთ ზედმეტი პოლიტიკური დატვირთვა მეორე ტურებს და გავაუქმეთ ყველა აქცია, რომელზეც ადრე ვმსჯელობდით“, – განაცხადა ზაალ უდუმაშვილმა.

„ევროპული საქართველოს“ ერთ-ერთმა ლიდერმა გიგი უგულავამ კოლეგის პოზიცია დაადასტურა.

„მეორე ტური არის თავიდან ბოლომდე ფიქცია, რათა „გაიპრავოს“ 31 ოქტომბერს ჩადენილი ძალადობა და გაყალბება, ამიტომ საზოგადოების ყველაზე სწორი რეაქცია, ისევე როგორც მთელი ოპოზიციური სპექტრის, არის იგნორი“, - განაცხადა უგულავამ.

საქართველოს შსს-მ უკვე გაავრცელა განცხადება, რომელშიც ხაზგასმულია, რომ არჩევნების დღეს ქვეყანაში გაძლიერდება უსაფრთხოების ზომები, ყველა უკანონო მოქმედება კი მკაცრად და დაუყოვნებლივ დაისჯება.

კანდიდატები

17-ვე ოლქში მეორე ტურში მონაწილებას მიიღებენ მმართველი პარტიის წარმომადგენლები, რომლებიც 16 ოლქში პირველ ადგილებზე გავიდნენ, გარდა თბილისის გლდანის ოლქისა.

მეორე ტური თბილისის რვავე ოლქში ჩატარდება, სადაც ოპოზიცია არჩევნების წინ შეთანხმდა ერთიანი კანდიდატების წარდგენაზე. სიურპრიზი გახდა მეორე ტურში პარტია „მოქალაქეების“ ლიდერის, ალეკო ელისაშვილის გასვლა, რომელიც იმ მომენტში გაერთიანებულ ოპოზიციაში არ მონაწილეობდა.

ოლქი   პარტია „ქართული ოცნება - დემოკრატიული საქართველოს“ კანდიდატი ოპოზიციის კანდიდატი
მთაწმინდა-კრწანისი ბექა ოდიშარია  შალვა შავგულიძე - „ევროპული საქართველო“
ვაკე ნოდარ ტურძელაძე ელენე ხოშტარია - „ევროპული საქართველო“
საბურთალო დავით სერგეენკო ალეკო ელისაშვილი - „მოქალაქეები“
ისანი   კახა კახიშვილი ხატია დეკანოიძე - „ერთიანი ნაციონალური მოძრაობა“
სამგორი   სოზარ სუბარი ლევან ხაბეიშვილი - „ერთიანი ნაციონალური მოძრაობა“
დიდუბე-ჩუღურეთი გიორგი ვოლსკი ზურაბ ჯაფარიძე - „გირჩი“
ნაძალადევი   მიხეილ ყაველაშვილი შალვა ნათელაშვილი - „ლეიბორისტული პარტია“
გლდანი   ლევან კობიაშვილი  ნიკა მელია - „ერთიანი ნაციონალური მოძრაობა“

 

მეორე ტური ჩატარდება ასევე ზოგ რეგიონში, სადაც ერთმანეთს „ქართული ოცნებისა“ და „ერთიანი ნაციონალური მოძრაობის“ კანდიდატები დაუპირისპირდებიან

ოლქი   პარტია „ქართული ოცნება - დემოკრატიული საქართველოს“ კანდიდატი

„ერთიანი ნაციონალური მოძრაობის“ კანდიდატი

თელავი, ახმეტა, ყვარელი და ლაგოდეხი ირაკლი ქადაგიშვილი გიორგი ბოტკოველი
მცხეთა, დუშეთი, თიანეთი და ყაზბეგი შალვა კერესელიძე ცეზარ ჩოჩელი
რუსთავი, გარდაბანი ნინო ლაცაბიძე დავით კირკიტაძე
ხაშური, ქარელი ზაალ დუგლაძე ნატო ჩხეიძე
ზესტაფონი, ტყიბული, თერჯოლა, ბაღდათი ბეჟან წაქაძე კახა გეწაძე
ქუთაისი    ზაზა ლომინაძე გრიგოლ ვაშაძე
ზუგდიდი    ირაკლი ჩიქოვანი  მალხაზ ჯალაღონია
ბათუმი    რესან კონცელიძე  ლევან ვარშალომიძე
ხელვაჩაური, ქედა, შუახევი, ხულო  ანზორ ბოლქვაძე  მიშა ბოლქვაძე

 

რამდენიმე ციფრი 

საარჩევნო უბნები 17 ოლქის მცხოვრებთათვის დილის 08:00 საათზე გაიხსნება და 20:00 საათამდე იმუშავებს.

მეორე ტურში მონაწილეობის უფლება აქვს 1 999 324 ამომრჩეველს, რომელსაც არჩევანი 1923 უბანსა და საკარანტინო ზონაში მდებარე 80 სპეცუბანზე შეუძლია გააკეთოს.

კორონავირუსით ინფიცირებული მოქალაქეები, რომლებიც მკურნალობენ კლინიკებში, იმყოფებიან საკარანტინო ზონებსა და თვითიზოლაციაში, სპეცუბნებზე მისცემენ ხმას.

მოქალაქეები, რომელთაც ჯანმრთელობის მდგომარეობის გამო სახლიდან გასვლა არ შეუძლიათ, გადასატანი ყუთით ისარგებლებენ.

პირველი ტურისგან განსხვავებით, მეორე ტურს არ დააკვირდებიან ოპოზიციური პატიების წარმომადგენლები. ოპოზიციამ პროტესტის ნიშნად თავიანთი დამკვირვებლები გაიწვია.

ამის მიუხედავად, კენჭისყრის პროცესს დააკვირდება პარტიების 9 521 წარმომადგენელი, 47 345 ადგილობრივი და 920 საერთაშორისო დამკვირვებელი.

პროცესს გააშუქებს მასმედიის 65 964 წარმომადგენელი.

კორონავირუსის პანდემია

კორონავირუსის პანდემიის გამო შექმნილი სიტუაციის გათვალისწინებით, არჩევნები უპრეცედენტოდ მკაცრი სანიტარული ზომების დაცვით გაიმართება. ამომრჩეველი უბნებზე გამოცხადდება ნიღბებით, საარჩევნო კომისიების წევრები და მასმედიის წარმომადგენლები კი უბნებზე მოხვედრამდე თერმოსკრინინგს გაივლიან, მთელი დღის განმავლობაში ისინი ხელთათმანებით, ნიღბებითა და დამცავი ფარებით იქნებიან აღჭურვილი.

ამასთან კენჭისყრის პროცესი იქნება პირდაპირი, არავითარი დისტანციური ხმის მიცემა ან წინასწარ გახსნილი უბნები.

კენჭისყრის პროცედურა

კენჭისყრამდე ყველა ამომრჩეველი, გარდა კორონავირუსით ინფიცირებულებისა, ასევე კარანტინის ზონებსა და თვითიზოლაციაში მყოფი მოქალაქეებისა, მარკირების პროცედურას გაივლის.

მარკირება საქართველოში სავალდებულოა ბოლო 10 წლის განმავლობაში.

უბანზე შესვლამდე ყველა ამომრჩეველს ამოწმებენ იმის დასადგენად, აქვს თუ არა მას გავლილი მარკირება, რათა მოქალაქემ ხმის ხელმეორედ მიცემა ვერ შეძლოს.

არჩევნებზე მოქმედებს ამომრჩეველთა ფოტოსურათიანი სიები, რომელთაც ცესკოს სამოქალაქო რეესტრის სამსახური აწვდის.

მიუხედავად იმისა, რომ კენჭისყრის პროცესში ამომრჩევლები ნიღბებით მონაწილეობენ, ყველა ამომრჩეველი ვალდებულია, ორჯერ მოიხსნას ნიღაბი - უბანზე შესვლისას საბუთების შემოწმების მომენტში და ბიულეტენის აღებისას.

ბიულეტენის აღების შემდეგ ამომრჩეველი შედის კაბინაში და ირჩევს სასურველ კანდიდატს. რის შემდეგაც მიდის ურნასთან, ათავსებს ბიულეტენს კონვერტში და აგდებს ყუთში.

აგიტაცია და დუმილის დღე

აგიტაცია აკრძალულია მხოლოდ არჩევნების დღეს - 21 ოქტომბრის 00:00 საათიდან 20:00 საათამდე. ამ დროს აკრძალულია ნებისმიერი პოლიტიკური რეკლამა ან მოწოდება ამომრჩევლისადმი, ხმა მისცენ ამა თუ იმ პარტიას.

ამასთან, პარტიებს დუმილის დროს არ ეკრძალებათ, თავიანთ მხარდამჭერებს აქტიურობისაკენ მოუწოდონ.

უსაფრთხოებას არჩევნებზე დაიცავს საქართველოს შსს. თუმცა პოლიციას უფლება არ ექნება, იმორიგეოს უშუალოდ უბნის ტერიტორიაზე ან მის გვერდით.

იქ მოხვედრას პოლიცია მხოლოდ რეალური საფრთხის წარმოქმნისას გამოძახების შემთხვევაში შეძლებს, რომლის აღმოფხვრის შემდეგაც ის ვალდებული იქნება, დატოვოს ტერიტორია.

გარდა ამისა, უბნებიდან 100 მეტრის რადიუსში აკრძალულია ნებისმიერი პარტიების აგიტატორების ყოფნა.

ხმების დათვლა

ხმების დათვლა საარჩევნო უბნებზე დაიწყება უბნების დახურვისთანავე - 20:00 საათზე.

პროცედურა შემდეგნაირია - კომისიის წევრები ხსნიან დალუქულ საარჩევნო ყუთს და იწყებენ ხმების დათვლას.

დათვლის შედეგად ივსება ოქმი, რომელიც საოლქო კომისიაში იგზავნება და შემოწმების შემდეგ იტვირთება ცენტრალური საარჩევნო კომისიის ვებგვერდზე.

არჩევნების შედეგები

გამარჯვებისთვის ორიდან ერთმა კანდიდატმა უნდა აიღოს ხმათა 50%-ზე მეტი.

წინა საპარლამენტო არჩევნებისგან განსხვავებით, ამჯერად მეორე ტურში გამარჯვება არ მოქმედებს იმ დეპუტატთა რაოდენობაზე, რომლებიც პარლამენტში პარტიული სიით შედიან.

ხმების დათვლის ახალი სისტემით, დეპუტატების საბოლოო რაოდენობა ერთი პარტიიდან განისაზღვრება პროპორციულ არჩევნებზე მიღებული ადგილების რაოდენობით, ეს მონაცემები კი საარჩევნო კომისიამ უკვე დათვალა.

ახალი სისტემის გათვალისწინებით, მმართველ პარტიას, მეორე ტურის შედეგებისგან დამოუკიდებლად, მიღებული აქვს 76 ადგილი პარლამენტში და საპარლამენტო უმრავლესობას აყალიბებს.

134
ღარიბაშვილი და ალიევი

რაზე ისაუბრეს ღარიბაშვილმა და ალიევმა ბაქოში

30
(განახლებულია 22:48 05.05.2021)
საქართველოს მთავრობის მეთაურმა აზერბაიჯანის პრეზიდენტს თბილი მიღებისთვის მადლობა გადაუხადა და თბილისში მოიწვია.

თბილისი, 5 მაისი — Sputnik. საქართველო–აზერბაიჯანის საზღვრის დემარკაციისა და დელიმიტაციის კომისია მუშაობას მალე განაახლებს, განაცხადა ჟურნალისტებთან საქართველოს პრემიერ-მინისტრმა ირაკლი ღარიბაშვილმა ბაქოში ოფიციალური ვიზიტის დასრულების შემდეგ. 

ერთდღიანი ვიზიტის ფარგლებში ღარიბაშვილმა შეხვედრები გამართა აზერბაიჯანის პრეზიდენტ ილჰამ ალიევთან, აზერბაიჯანელ კოლეგა ალი ასადოვთან და აზერბაიჯანის მილიმეჯლისის თავმჯდომარესთან საჰიბა გაფაროვასთან.

„ჩვენ ნაყოფიერი თანამშრომლობის მრავაწლიანი ისტორია გვაქვს. ჩვენ მოტივირებული ვართ, რომ უფრო მეტი პროექტი განვახორციელოთ ერთობლივად. შეხვედრაზე ასევე განვიხილეთ რეგიონში არსებული სიტუაცია, მათ შორის, უსაფრთხოების საკითხებიც. შევეხეთ პრაქტიკულად ყველა საკითხს, რომელიც ორ ქვეყანას შორის არსებობს, მათ შორის, განვიხილეთ დავით–გარეჯის საკითხიც და შევთანხმდით, რომ დიალოგი გაგრძელდება, დაჩქარდება და ძალიან მალე გადაწყდება ისე, როგორც ჩვენ ძმობას, მეგობრობას შეეფერება. ძალიან მალე კომისიები გააგრძელებენ მუშაობას და უფრო კონკრეტულად მოგვიანებით გახდება ცნობილი“, – განაცხადა ღარიბაშვილმა.

ღარიბაშვილის განმარტებით, აზერბაიჯანის პრემიერთან და სპიკერთან შეხვედრისას განიხილეს ეკონომიკური საკითხებიც. გადაწყდა, რომ მხარეები ინვესტიციების კუთხით მუშაობას გაააქტიურებენ, რაც ორივე ქვეყნისთვის პოსტპანდემიურ პერიოდში განსაკუთრებით მნიშვნელოვანია. 

შეხვედრის დასასრულს პრემიერმა აზერბაიჯანის პრეზიდენტს და მთავრობის სრულ შემადგენლობას თბილი მიღებისთვის მადლობა გადაუხადა. ღარიბაშვილმა ალიევისგან დაპირება მიიღო, რომ იგი თბილისს ეწვევა.

საქართველოსა და აზერბაიჯანს 440 კილომეტრის სიგრძის საერთო სახელმწიფო საზღვარი აქვთ, რომლის მესამედი ჯერჯერობით არ არის დელიმიტირებული. ერთ-ერთ სადავო მონაკვეთზე მდებარეობს მეექვსე საუკუნის დავით-გარეჯის სამონასტრო კომპლექსი, რომლის ნაწილზეც პრეტენზიას აზერბაიჯანული მხარე აცხადებს.

აზერბაიჯანი საქართველოს სტრატეგიული სავაჭრო პარტნიორია. 2021 წლის იანვარი–მარტში ქვეყნებს შორის ტვირთბრუნვამ დაახლოებით 250,3 მლნ აშშ დოლარი შეადგინა.

საქართველო და აზერბაიჯანი სტრატეგიული პარტნიორები არიან და აქტიურად თანამშრომლობენ როგორც ორმხრივ ფორმატში, ისე საერთაშორისო მნიშვნელობის პროექტების ფარგლებში – ბაქო-თბილისი-ყარსის სარკინიგზო მაგისტრალი, ბაქო-თბილისი-ჯეიჰანის ნავთობსადენი, სამხრეთის გაზის დერეფანი და ა.შ.

30
კარლ ჰარცელი

რა საკითხები განიხილეს კარლ ჰარცელმა და კახა კუჭავამ

36
(განახლებულია 22:44 05.05.2021)
საქართველოს პარლამენტში „მაისის არდადეგების“ შემდეგ ამნისტიის შესახებ კანონპროექტის ორი ვარიანტი დარეგისტრირდება – ერთი უმრავლესობის, მეორე ოპოზიციის მიერ მომზადებული.

თბილისი, 5 მაისი — Sputnik. პოლიტიკური კრიზისიდან გამოსვლის თაობაზე შეთანხმების მნიშვნელობა და მხარეების მიერ მისი შესრულების საკითხები განიხილა საქართველოში ევროკავშირის ელჩმა კარლ ჰარცელმა პარლამენტის ახლადარჩეულ სპიკერთან კახა კუჭავასთან გამართულ შეხვედრაზე. 

დოკუმენტს „საქართველოს წინსვლის გზა“, რომელიც ევროპული საბჭოს პრეზიდენტმა შარლ მიშელმა მმართველ პარტია „ქართულ ოცნებასა“ და ოპოზიციას შორის კომპრომისული შეთანხმების სახით წარმოადგინა, მოლაპარაკებების მონაწილეთა უმრავლესობამ 19 აპრილს მოაწერა ხელი.

კარლ ჰარცელის განცხადებით, ძალზე მნიშვნელოვანია პარლამენტში ამნისტიის შესახებ კანონპროექტების განხილვა, რომელიც ოპოზიციამ და მმართველმა პარტიამ ცალ-ცალკე წარადგინეს. ამასთან მან თავი შეიკავა კანონპროექტის ორივე ვარიანტის შეფასებისგან.

„რამდენადაც ჩვენთვის ცნობილია, ამ მომენტში პარლამენტში წარდგენილია ორი კანონპროექტი. პირველ ყოვლისა, მინდა აღვნიშნო, რომ პარლამენტში ამ საკითხთან (ამნისტიის შესახებ კანონი) დაკავშირებით დაწყებული დებატების გაგრძელებას გადამწყვეტი მნიშვნელობა აქვს“, – განაცხადა ჰარცელმა.

რაც შეეხება ევროკავშირის მხრიდან „ნაციონალური მოძრაობის“ ლიდერის ნიკა მელიასთვის 40 ათასი ლარის გირაოს გადახდას, დიპლომატის თქმით, ეს საკითხი განხილვის სტადიაზეა.

„ეს საკითხი ახლა იხილება. ვნახოთ, როგორ გაგრძელდება საკითხის განხილვა უახლოეს დღეებში“, – განაცხადა ჰარცელმა.

ოპოზიციის ლიდერი ნიკა მელია 2021 წლის 23 თებერვალს დააკავეს. 17 თებერვალს თბილისის საქალაქო სასამართლომ მას 2019 წლის 20–21 ივნისის საქმესთან დაკავშირებით დაუსწრებლად შეუფარდა პატიმრობა. ეს მას შემდეგ მოხდა, რაც მელიამ უარი განაცხადა გირაოს გადახდაზე, რომელიც მას აღკვეთის ალტერნატიულ ღონისძიებად შეეფარდა. მანამდე, პროკურატურის მოთხოვნით, პარლამენტმა მელიას სადეპუტატო იმუნიტეტი მოუხსნა, თუმცა ის კვლავ არის პარლამენტის წევრი. 

მიუხედავად გათავისუფლებაზე გარანტიისა, „ნაცმოძრაობა“ შეთანხმებაზე ხელმოწერასა და პარლამენტში შესვლაზე უარს აცხადებს იმ დრომდე, ვიდრე მელია არ დატოვებს საპატიმროს. 2019 წლის 20-21 ივნისის „გავრილოვის ღამედ“ წოდებული პროტესტის შემდეგ აღძრული საქმეების ფიგურანტების ამნისტია ევროკავშირის შუამავლობით მხარეების მიერ ხელმოწერილი შეთანხმების ერთ-ერთი პუნქტია.

საქართველოს პარლამენტში „მაისის არდადეგების“ შემდეგ ამნისტიის შესახებ კანონპროექტის ორი ვარიანტი დარეგისტრირდება – ერთი უმრავლესობის, მეორე ოპოზიციის მიერ მომზადებული.

მმართველი პარტიისა და ოპოზიციის მიერ მომზადებული დოკუმენტების ვერსიები განსხვავდება ერთმანეთისგან – მხარეებს თავად ამნისტიის პროცესთან დაკავშირებით განსხვავებული ხედვა აქვთ. ხელისუფლების სურვილია, რომ ამნისტია საქმის ყველა ფიგურანტს შეეხოს, მათ შორის პოლიციელებსაც და იმ შესაძლო პირებსაც, რომლებიც შეიძლება გამოძიებამ მოგვიანებით გამოავლინოს.

ოპოზიცია, პირველ რიგში, ჯგუფური ძალადობის ორგანიზებასა და მასში მონაწილეობისთვის ბრალდებულთა და გასამართლებულთა ამნისტიისა და მათთვის ნასამართლობის მოხსნის წინადადებით გამოდის. ასეთ ბრალდებულთა შორის, რიგითი აქტივისტების გარდა, არის „ერთიანი ნაციონალური მოძრაობის“ თავმჯდომარე ნიკა მელია, რომელიც ამჟამად პატიმრობაშია.

გარდა ამისა, ოპოზიცია 20–21 ივნისის ღამეს სამსახურებრივი უფლებამოსილების გადამეტებაში ამჟამად ბრალდებული პოლიციელების ამნისტიაზეც თანახმაა, მაგრამ ამავდროულად იმ პირთა პასუხისმგებლობისგან გათავისუფლების წინააღმდეგია, რომლებსაც პოლიტიკური თანამდებობები ეკავათ და მონაწილეობდნენ ბრძანებების გაცემაში.

36
ბათუმი

დღის ასტროპროგნოზი ზოდიაქოს ნიშნებისთვის: 6 მაისი

0
(განახლებულია 11:34 05.05.2021)
გთავაზობთ ყოველდღიურ ასტროლოგიურ პროგნოზს ზოდიაქოს თითოეული ნიშნისთვის. გაიგეთ ჩვენი ჰოროსკოპიდან, რას გვიმზადებენ ვარსკვლავები და რას გვირჩევენ ასტროლოგები

დღეს 2021 წლის 6 მაისია, ხუთშაბათი. კლებადი მთვარე თევზების ნიშანშია. ამ დღეს პლანეტა იუპიტერი მფარველობს.

ასტროლოგები გვირჩევენ, რომ დღეს ისე, როგორც არასდროს, გვახსოვდეს დიპლომატიურობისა და ტოლერანტობის შესახებ. სამწუხაროდ, ნებისმიერ გაუფრთხილებელ სიტყვას ძალზე მწვავე რეაქციის გამოწვევა შეუძლია. გაძლიერდება ისეთი თვისებები, როგორიცაა სწრაფვა სამართლიანობის, დამოუკიდებლობისკენ და მოიმატებს „ფეთქებადობა“ და მოუთმენლობა. თუ კონფლიქტები არ გსურთ, მაშინ პატივი ეცით გარშემომყოფების გრძნობებს. სხვის უტაქტობას კი, ეცადეთ, რომ იუმორით უპასუხოთ.

ზოდიაქოს ნიშნები, რომლებთანაც „ეშმაკიც კი ფეხს მოიტეხს">>

ვერძი: დღეს დიდი ალბათობაა იმისა, რომ გარშემომყოფებმა თავიანთი საქმეებითაც კი თქვენ დაგტვირთონ და რაღაც საკითხებში საერთოდ ბოლო რიგებში გადაგწიონ. ისინი იგრძნობენ თქვენს დათრგუნულობასა და დამყოლობას და ამით უსირცხვილოდ სარგებლობას შეეცდებიან. ამ მდგომარეობის შეცვლა შეგიძლიათ, თუ კატეგორიულად დაიცავთ თქვენს პოზიციას და აღკვეთთ მსგავს მცდელობებს, წინააღმდეგ შემთხვევაში მთელი დღე სხვისი საქმეების კეთებას მოუნდებით.

კურო: მთელი დღე, შესაძლოა, რაღაც ზეწოლა იგრძნოთ გარედან. ეს შეიძლება იყოს დროის დეფიციტი, ან გარემოებებმა და გარშემომყოფების მოთხოვნებმა გაიძულოთ სწრაფად მოქმედება. ნებისმიერ შემთხვევაში ზეწოლისგან გათავისუფლებას, დიდი ალბათობით, ვერ შეძლებთ, ამიტომ ამასთან შეგუება მოგიწევთ. ყველაზე უკეთესი გამოსავალია განმარტოება და საკუთარი საქმეების მშვიდად კეთება, თუ, რა თქმა უნდა, ამის შესაძლებლობა გექნებათ.

ტყუპი: დღეს იშვიათი შესაძლებლობა მოგეცემათ, რომ რამე საქმეში წინ გაიჭრათ. მთავარია, რომ საჭირო მომენტი ხელიდან არ გაუშვათ – როცა ამის დრო დადგება, მტკიცედ იმოქმედოთ. აქტიური და შემტევი ქმედებების წყალობით დიდი ნაბიჯის გადადგმას შეძლებთ წინ. გამოიყენეთ ეს დღე იმისთვის, რომ „ჩაუსაფრდეთ“ საჭირო დროს და ახალი სიმაღლეები დაიპყრათ, კონკურენტები კი უკან ჩამოიტოვოთ.

კირჩხიბი: დღეს თქვენში სამართლიანობის გრძნობა განსაკუთრებულად გამძაფრდება. მზად ხართ, „მკერდით გადაეფაროთ“ საკუთარ თუ სხვის ინტერესებს, თუ ჩათვლით, რომ ვიღაც ამ ინტერესებს ავიწროებს. რას იზამთ, ხანდახან გვიწევს ინტერესების „არაკულტურულად“ დაცვა და მოშურნეებისა და მეტოქეების „ადგილზე მოსმა“. მაგრამ არის ერთი „მაგრამ“ – დღეს უფლებების დარღვევა შეიძლება იქაც კი მოგეჩვენოთ, სადაც ამას ადგილი ნამდვილად არა აქვს, ან მას მხოლოდ მიკროსკოპით თუ დაინახავთ.

ლომი: რისკავთ, რომ მთელი დღე შეიძლება ჭეშმარიტების ძიებაში გაატაროთ და ამავე დროს დარწმუნებული იყოთ, რომ ის სადღაც გვერდითაა. ამ სიმართლის ძებნა შეიძლება ეხებოდეს ყველაფერს – ურთიერთობებს გარშემომყოფებთან, სამუშაოს, პირად ცხოვრებას. თუმცა, რაც უნდა მოგეჩვენოთ, რომ სამართლიანობის გამარჯვების წუთი მოახლოვდა, ეს მხოლოდ თქვენი იმედი იქნება. შესაძლოა, გაკვირვებულმა აღმოაჩინოთ, რომ „წმინდა წყლის ჭეშმარიტება“ თითქმის უსარგებლო რამაა და ის არავის სჭირდება.

ქალწული: დღეს ვარსკვლავები მხოლოდ პირდაპირი გზით სიარულს გირჩევენ. საკუთარი თამაშის მცდელობა და მით უმეტეს, რამის დამალვა და დამახინჯება სავალალოდ შეიძლება დასრულდეს. ასე რომ, თუ საჭირო შედეგის მიღება გსურთ, ღიად უნდა იმოქმედოთ. გარშემომყოფებიც დააფასებენ თქვენს პატიოსნებასა და პირდაპირობას, თუმცა ურთიერთობებში ზედმეტიც არ უნდა მოგივიდეთ – გულწრფელობასა და პირდაპირობასაც აქვს თავისი საზღვრები.

სასწორი: საჭირო შედეგის მისაღწევად რაღაც საკითხებში შეიძლება მოგიწიოთ იმის თქმა, რასაც თქვენგან ელოდებიან და არა იმის, რასაც სინამდვილეში ფიქრობთ; ან, შესაძლოა, საჭირო მომენტში თქვენს ეჭვებზე გაჩუმდეთ კიდეც. რას იზამთ, გულწრფელობა ყოველთვის არ „ჭრის“, ის ხანდახან უადგილოა და განსაკუთრებით, მნიშვნელოვანი საუბრების დროს. ხვალ თუ სათქმელს პირდაპირ იტყვით, ამით შეიძლება საქმესაც ავნოთ და საკუთარ თავსაც. თუ კომენტარებისგან თავს შეიკავებთ, უფრო მოგებული დარჩებით.

მორიელი: დღეს მტკიცედ და საბრძოლველად ხართ განწყობილი. რა საჭიროა კვანძის გახსნა, თუ მისი გადაჭრა შეიძლება? საინტერესო ისაა, რომ რაღაც საკითხებში ასეთი რადიკალიზმი შეიძლება დაგეხმაროთ კიდეც, მაგრამ ყველაფერს ასეთი მეთოდით ვერ გადაწყვეტთ. აქედან გამომდინარე, ისეთ საკითხებს, რომლებიც დროსა და დელიკატურ დამოკიდებულებას საჭიროებს, სჯობს, დღეს სათოფეზეც არ გაეკაროთ, ან წინასწარ მოემზადოთ მათი ჩავარდნისთვის.

მშვილდოსანი: დღეს არეულ–დარეული საქმეების მოგვარება მოგიწევთ, თუნდაც ამას თქვენი გეგმები არ ითვალისწინებდეს. შესაძლოა, ეს „არეული საქმე“ თქვენი სამუშაო მაგიდა იყოს, ან საკუთარი საქმეებისა და გეგმების თანამიმდევრულად დაწყობა დაგჭირდეთ. სიზარმაცეს უნდა მოერიოთ, რადგან ამ პროცესის დროს გაქვთ შანსი, რომ იპოვოთ რაღაც მივიწყებული, რომელიც დღემდე აქტუალურია და საკმაოდ ღირებული რამაა.

თხის რქა: დღეს გარშემომყოფებთან და მათ შორის, საკმაოდ ახლობელ ადამიანებთანაც კი დისონანსში იქნებით. შეიძლება მოგეჩვენოთ, რომ ირგვლივ მყოფები ძალიან მნიშვნელოვანი პერსონის ნიღაბს ირგებენ, ხოლო გარშემომყოფები უკმაყოფილო არიან თქვენი უზრუნველობით. კონფლიქტები არ გელოდებათ, მაგრამ ურთიერთობებში ბზარი რომ არ გაჩნდეს, სჯობს, ხშირად მოირგოთ სერიოზული და ჭკვიანური სახის ნიღაბი. ამან შეიძლება კარგად გაგართოთ კიდეც.

მერწყული: საქმიანობაში მზად ხართ მტკიცე და ხანდახან რადიკალური ზომები მიიღოთ, განსაკუთრებით ეს ფინანსების სფეროს ეხება. იმის ნაცვლად, რომ ასჯერ გაზომოთ და ერთხელ გადაჭრათ, ასჯერვე გადაჭრა შეგიძლიათ. ერთი მხრივ, არის საშიშროება, რომ ფული ქარს გაატანოთ, მეორე მხრივ კი საბრძოლო განწყობა დაგეხმარებათ, გადადგათ ის ფინანსური ნაბიჯები, რომელთა გადაჭრის აუცილებლობა დიდი ხანია მომწიფდა.

თევზები: დღეს თქვენში დიდმა კრიტიკოსმა შეიძლება გაიღვიძოს. ამასთან კრიტიკულობა არა საკუთარი თავის, არამედ სხვების მიმართ იქნება მიმართული. შეიძლება მოგეჩვენოთ, რომ თქვენი შენიშვნების გამო გარშემომყოფები დაირცხვენენ და შეცდომებს გამოასწორებენ, სინამდვილეში კი ეს სულაც არ იქნება ასე. თქვენი ბრძნული რჩევები წყალს გაჰყვება, ხოლო კრიტიკა კი წყენის საფუძველი შეიძლება გახდეს. თქვენი გადასაწყვეტია, ღირს თუ არა კრიტიკაზე ნერვებისა და ძალების დახარჯვა თან იმ დროს, როცა საჭირო შედეგის იმედი არ არის.

0