აქცია ზუგდიდში

ოპოზიციის გარეშე და პროტესტის ფონზე: როგორ ჩაიარა საოლქო კომისიების დასკვნითმა სხდომებმა

53
კომისიის წევრებმა „ნაციონალური მოძრაობიდან“ და „ევროპული საქართველოდან“ შემაჯამებელ ოქმებს ხელი არ მოაწერეს და პროტესტის ნიშნად ყველა სხდომა დატოვეს

თბილისი, 11 ნოემბერი - Sputnik. საოლქო კომისიებს მთელ საქართველოში საპარლამენტო არჩევნების შემაჯამებელი ოქმების შედგენა ხმაურიანი აქციების, შეტაკებებისა და პოლიციასთან დაპირისპირების ფონზე მოუწიათ, ოპოზიციური პარტიების წარმომადგენლებმა კი სხდომები დატოვეს.

ოპოზიცია საპარლამენტო არჩევნებს გაყალბებულად მიიჩნევს და ოქმებში შეუსაბამობებზე მიუთითებს. მათი განცხადებით, საჩივრები, რომლებიც დარღვევებთან დაკავშირებით სასამართლოში იქნა წარდგენილი, სათანადოდ არ განიხილება ან საერთოდ განუხილველად რჩება.

პოზიციის კიდევ ერთხელ დასაფიქსირებლად სხვადასხვა ოპოზიციური პარტიის ლიდერები და აქტივისტები საოლქო საარჩევნო კომისიების შენობებთან იკრიბებიან და დათვლის პროცესს ხმაურით, ყვირილით, შენობაში შეჭრისა და სხდომების ჩაშლის მცდელობით აპროტესტებენ.

თელავის მოვლენები

ახმეტა-თელავი-ყვარელი-ლაგოდეხის საარჩევნო ოლქის საპარლამენტო არჩევნების პირველი ტურის საბოლოო შედეგები თელავის რაიონის მე-17 საარჩევნო კომისიის სხდომაზე დამტკიცდა.

შემაჯამებელ ოქმს გაყალბებული უწოდეს და ხელი არ მოაწერეს კომისიის წევრებმა „ნაციონალური მოძრაობიდან“ და „ევროპული საქართველოდან“. პროტესტის ნიშნად მათ სხდომა დატოვეს.

ოქმის ობიექტურობა ეჭვქვეშ დააყენა პარტია „პატრიოტთა ალიანსის“ წარმომადგენელმაც, მაგრამ ხელი მაინც მოაწერა.

კომისიის თავმჯდომარის სიტყვებით, ოქმები შედგენილია ყველა წესის დაცვით, გაყალბება კი არ მომხდარა. დასკვნითი ოქმის თანახმად, ოლქში მაჟორიტარული და პროპორციული სიითაც ხმათა უმრავლესობა „ქართულმა ოცნებამ“ მიიღო.

პროტესტი ზუგდიდში

ბევრ ხალხს მოუყარა თავი ოპოზიციამ ზუგდიდში, საოლქო კომისიასთან, სადაც პოლიციასთან დაპირისპირებაც მოხდა. აქციის მონაწილეებმა შენობაში ხის საანგარიშოს შეტანა და საოლქო კომისიის თავმჯდომარისთვის მისი გადაცემა სცადეს. პოლიციამ მათ ამის გაკეთების საშუალება არ მისცა, საბოლოოდ კი საანგარიშო ხეზე ჩამოკიდეს.

ეს საოლქო სხდომაც ოპოზიციის წარმომადგენლების მონაწილეობის გარეშე ჩატარდა.

Зугдиди - акция протеста оппозиции у здания окружной избирательной комиссии 11 ноября 2020 года
© Sputnik / STRINGER
ოპოზიციის აქცია ზუგდიდის საოლქო კომისიასთან

„64 საჩივარი იყო რეგისტრირებული კენჭისყრის დღეს და მომდევნო დღეებში, აქედან 48 განუხილველი დარჩა, სულ ორი სხდომა ჩატარდა, 11 განვიხილეთ, აქედან ერთი დაკმაყოფილდა სრულად, ორი ნაწილობრივ, რვა არ დაკმაყოფილდა“, - განაცხადა ზუგდიდის საოლქო კომისიის თავმჯდომარე მირანდა მესხმა პირველი არხის ეთერში.

მისი სიტყვებით, დასკვნით ოქმებში არანაირი შეცდომა არ არის.

„რაც შეეხება საპროტესტო აქციას, ეს მათი უფლებაა, გამოხატონ თავიანთი ნება. საუბნო საარჩევნო კომისიების შემადგენლობა აწერს ხელს ყველა უბანზე, არავის არანაირი პრეტენზია არ გააჩნია შემაჯამებელ ოქმებთან, ხმის დათვლის პროცედურებთან დაკავშირებით. რაც განვიხილეთ ეს საჩივრები იყო კენჭისყრის პროცედურულ დარღვევებთან დაკავშირებით, რამაც არ იქონია გავლენა შედეგებზე“, - აღნიშნა მესხმა.

ვითარება გორისა და კასპის საოლქო კომისიებთან

გორისა და კასპის მე-15 საოლქო კომისიის შემაჯამებელი ოქმის თანახმად, გაიმარჯვა „ქართული ოცნების“ მაჟორიტარობის კანდიდატმა გიორგი ხოჯევანიშვილმა.

კომისიის წევრებს დოკუმენტის მომზადება დაძაბულ გარემოში მოუწიათ - საპროტესტო აქციებისა და შედეგების გაყალბების ბრალდებების ფონზე. ისევე, როგორც სხვა ოლქებში, კომისიის წევრებმა „ნაციონალური მოძრაობიდან“ და „ევროპული საქართველოდან“ კვლავ არ მოაწერეს ხელი ოქმს და პროტესტის ნიშნად დატოვეს სხდომა.

„მათი განსხვავებული აზრი სხდომის ოქმში აისახება. კენჭისყრის დღეს, ოპოზიციის წარმომადგენლებთან ერთად დავდიოდით უბნებზე და რამდენიმე უბანზე ვესწრებოდით ხმების დათვლას. თუ ვინმეს პრეტენზიები ჰქონდა, ადგილზევე შეეძლოთ ეს ეთქვათ. საჩივრებზე იყო რეაგირება, ორი უბანი თავიდან გადაითვალა, თუმცა რა მონაცემებიც ასახული იყო, იგივე დადგა და კანონდარღვევას იქ ადგილი არ ჰქონია“, - განაცხადა კომისიის თავმჯდომარემ მალხაზ მირუაშვილმა პირველი არხის ეთერში.

სხვა რეგიონები

ასეთივე პროტესტი ოპოზიციის წარმომადგენლებმა პრაქტიკულად ყველა საოლქო კომისიასთან მოაწყვეს და ყველგან კომისიის წევრებმა „ნაციონალური მოძრაობიდან“ და „ევროპული საქართველოდან“ დატოვეს სხდომები პროტესტის ნიშნად და ხელი არ მოაწერეს დასკვნით ოქმებს. როგორც ამ კომისიების თავმჯდომარეებმა განაცხადეს, მიუხედავად ასეთი პროტესტისა, დოკუმენტი, რომელიც კომისიის წევრების უმრავლესობის მიერაა ხელმოწერილი, უკვე იურიდიულ აქტს წარმოადგენს.

მოვლენებს არც დაკავების გარეშე ჩაუვლია. სამგორის საოლქო კომისიასთან პოლიციამ „ნაციონალური მოძრაობის“ პოლიტსაბჭოს წევრი ბესო გაზდელიანი დააკავა. იგი ცდილობდა სტიკერის მიკვრას „ქართული ოცნების“ დამფუძნებლის, ბიძინა ივანიშვილის გამოსახულებით საოლქო კომისიის შენობასთან, რისთვისაც გაფრთხილება დაიმსახურა. შედეგად ის პოლიციის მოთხოვნის დაუმორჩილებლობისათვის დააკავეს.

მეორე ტური თბილისის რვავე ოლქში და ზოგიერთ რეგიონში ჩატარდება. რეგიონებში მეორე ადგილზე გავიდნენ „ერთიანი ნაციონალური მოძრაობის“ კანდიდატები, თბილისში კი - ოპოზიციის ერთიანი კანდიდატები და პარტია „მოქალაქის“ ლიდერი ალეკო ელისაშვილი.

ოპოზიცია არ აღიარებს საპარლამენტო არჩევნების შედეგებს, რომელთა თანახმად, „ქართულმა ოცნებამ“ 48,22% აიღო, და უარს აცხადებს პარლამენტში შესვლაზე. ისინი შედეგების გაბათილებას და ახალი, რიგგარეშე არჩევნების ჩატარებას ითხოვენ.

მმართველ პარტიაში არჩევნების გაყალბებას კატეგორიულად უარყოფენ და აცხადებენ, რომ იგი თავისუფალ და სამართლიან გარემოში ჩატარდა, რაზეც საერთაშორისო სადამკვირვებლო მისიების შეფასებებიც მეტყველებს.

53
თემები:
პროტესტი საქართველოში: ოპოზიცია საპარლამენტო არჩევნების შედეგებს არ აღიარებს (84)
ოპოზიციის აქცია. 14.11.2020

იქნება თუ არა აქციები? ოპოზიცია ყველა სცენარისთვის მზად იქნება

43
ქართული ოპოზიცია უკვე სამი კვირის განმავლობაში საპროტესტო აქციებს მართავს და ხელახალ საპარლამენტო არჩევნებს მოითხოვს

თბილისი, 24 ნოემბერი – Sputnik. ქართული ოპოზიცია ემზადება საპროტესტო აქციებისთვის, მაგრამ უშვებს, რომ ისინი გაუქმდება, თუ ხელისუფლებასთან მოლაპარაკებების მესამე რაუნდის დროს კონსენსუსის მიღწევა მოხერხდება. ასეთი შედეგით დასრულდა დღეს ორსაათიანი შეხვედრა, რომელიც ქართული ოპოზიციის ლიდერებმა გამართეს.

ოპოზიციამ ხელისუფლების კრიტიკას მკვეთრად უპასუხა >>

ოპოზიციური პარტიები არ აღიარებენ 31 ოქტომბრის საპარლამენტო არჩევნების შედეგებს და ამტკიცებენ, რომ ისინი გაყალბებულია. პარლამენტში გასული რვავე პარტია სადეპუტატო მანდატებზე უარს აცხადებს. საკითხის გადასაჭრელად აშშ-ის საელჩომ და ევროკავშირის წარმომადგენლობამ მათსა და მმართველი პარტია „ქართული ოცნება - დემოკრატიულ საქართველოს“ შორის მოლაპარაკებების ორგანიზება მოახერხეს. ამ ეტაპზე უკვე ორი შეხვედრა გაიმართა.

„ოპოზიცია ვართ მუდმივად კონსულტაციების რეჟიმში, ველოდებით მესამე რაუნდს. „ოცნებას“ აქამდე, არათუ ერთი ნაბიჯიც კი არ გადაუდგამს კრიზისის განტვირთვისთვის, არამედ ყოველი მათი ნაბიჯი, დაწყებული ცესკო-ს ოქმების შეჯამების არგანხილვით, ვითომ მეორე ტურის ჩატარებით, სადაც ხალხი არ მივიდა, უფრო და უფრო აღრმავებს კრიზისს“, – განაცხადა  „ევროპული საქართველოს“ წევრმა, ელენე ხოშტარიამ.

დღეისათვის მოლაპარაკებებზე ოპოზიცია აყენებს მხოლოდ ერთ მოთხოვნას - ეს არის ხელახალი არჩევნები. მმართველ პარტიაში კი აცხადებენ, რომ ეს არარეალური მოთხოვნაა.

„ქართული ოცნება“ საპარლამენტო არჩევნების ხელახლა ჩატარებას არ აპირებს >>

„მზად ვართ ნებისმიერი საკითხის განსახილველად, გარდა იმ მოცემულობის, რომლის თანახმადაც ყველა მხარემ პატივი უნდა სცეს მოქალაქეთა არჩევანს“, - განაცხადა მმართველი პარტიის წარმომადგენელმა გიგი მიქანაძემ.

ამასთან მან ხაზგასმით აღნიშნა, რომ მმართველი პარტია მზად არის განიხილოს ოპოზიციის სხვა წინადადებები.

ახალი აქციები

ოპოზიცია მოლაპარაკებების ჩავარდნას არ გამორიცხავს და აანონსებს საპროტესტო აქციას იმ დღეს, როდესაც ახალი მოწვევის პარლამენტი შეიკრიბება.

„გაგრძელდება აქციები, იქნება შეხვედრები სხვადასხვა ჯგუფებთან, საკანონმდებლო ორგანოს შეკრების დღეს, თუ არაფერი შეიცვლება, მოლაპარაკება წარმატებულად თუ არ დასრულდება, იქნება დიდი შეხლა-შემოხლა, ამაში ეჭვი არ მეპარება, რადგან ბევრი ადამიანი გამოვა გარეთ“, – განაცხადა პარტია „მოქალაქეების“ წარმომადგენელმა ლევან იოსელიანმა.

ამასთან, მესამე რაუნდის თარიღი ჯერჯერობით უცნობია.

„ჯერჯერობით ახალი არაფერია. მოლაპარაკებები გრძელდება, ჩვენ ჯერ კიდევ ვცდილობთ ვიპოვოთ გზა და გამოსავალი, რათა წინ წავიწიოთ. ეს მნიშვნელოვანი დისკუსიაა. ჯერ არ ვიცით, როდის იქნება მოლაპარაკებების მესამე რაუნდი, ეს გარკვეული არ არის, და ჩვენ ამაზე ვმუშაობთ“, - განაცხადა საქართველოში ევროკავშირის ელჩმა კარლ ჰარცელმა.

არჩევნების შედეგები

საპარლამენტო არჩევნების ოფიციალური შედეგებით, პარლამენტში ცხრა პარტია მოხვდა: „ქართული ოცნება – დემოკრატიული საქართველო“, „ერთიანი ნაციონალური მოძრაობა – ძალა ერთობაშია“, „ევროპული საქართველო – მოძრაობა თავისუფლებისთვის“, „ლელო საქართველოსთვის“, „სტრატეგია აღმაშენებელი“, „საქართველოს პატრიოტთა ალიანსი“, „გირჩი“, „ალეკო ელისაშვილი – მოქალაქეები“ და „საქართველოს ლეიბორისტული პარტია“.

თავისუფალი, თუმცა არა სრულყოფილი: საერთაშორისო ორგანიზაციებმა არჩევნები შეაფასეს >>

წინასწარი გათვლებით, „ქართულმა ოცნებამ“ პარლამენტში უმრავლესობა მოიპოვა. შესაბამისად, ის შეძლებს ყველა კანონის მიღებას და მთავრობის ჩამოყალიბებას ოპოზიციის მონაწილეობის გარეშე. ერთადერთი საკითხი, რომელიც ოპოზიციის თანხმობას მოითხოვს - ეს არის საქართველოს კონსტიტუციაში ცვლილებების შეტანა.

43
თემები:
პროტესტი საქართველოში: ოპოზიცია საპარლამენტო არჩევნების შედეგებს არ აღიარებს (84)
საპროტესტო აქცია

ოპოზიციამ ხელისუფლების კრიტიკას მკვეთრად უპასუხა

36
(განახლებულია 20:09 24.11.2020)
სამ კვირაზე მეტია ოპოზიცია საპროტესტო აქციებს მართავს და ხელისუფლებას საპარლამენტო არჩევნების გაყალბებაში ადანაშაულებს.

თბილისი, 24 ნოემბერი – Sputnik. საქართველოს ოპოზიციურმა პარტიებმა ხელისუფლება კორონავირუსის თემის პოლიტიკური მიზნებისთვის გამოყენებაში დაადანაშაულეს და მას ინფექციის გავრცელებასთან ბრძოლის მეთოდების ძებნისკენ მოუწოდეს.

ამირან გამყრელიძე: ინფიცირების შედარებით მცირე მაჩვენებელმა არ უნდა დაგვამშვიდოს>>

საქართველოში 1–24 ნოემბრის პერიოდში კორონავირუსით ინფიცირებულთა რიცხვი 70 ათასზე მეტით გაიზარდა და თითქმის 112 ათასს მიაღწია. საქართველოს ვიცე-პრემიერმა მაია ცქიტიშვილმა განაცხადა, რომ ასეთი მკვეთრი ზრდის მიზეზი ოპოზიციის მასობრივი საპროტესტო აქციები გახდა, რომელიც საპარლამენტო არჩევნების ხელმეორედ ჩატარებას მოითხოვს.

„ქართული ოცნება" მუდმივად კოვიდის სიტუაციას იყენებს პარტიული პოლიტიკური მიზნებისთვის... ეს ის თემა არ არის, სადაც ასეთ გადაბრალებაზე უნდა ვისაუბროთ... ასე არც კოვიდი გვარდება, არც პოლიტიკური კრიზისი განიმუხტება“, – განაცხადა პარტია „ევროპული საქართველოს“ წარმომადგენელმა ელენე ხოშტარიამ.

ბრალდებებს დაუსაბუთებელს უწოდებს „ერთიანი ნაციონალური მოძრაობის“ წარმომადგენელი ზაალ უდუმაშვილი.

„ახლა ცდილობენ, რომ ისრები გადაიტანონ ოპოზიციისკენ. სულ ტყუილად, იმიტომ რომ ეს აქციები, ჯერ ერთი, იმართებოდა ღია სივრცეებში და, მეორე, რაც არ უნდა ისაუბრონ ოპოზიციის ბრალეულობაზე, არავის არ სჯერა ამის, იმიტომ რომ მენეჯმენტი არ აქვთ დალაგებული და არ იციან, როგორ მართონ ეს პანდემია და იმიტომ მივიღეთ ეს მძიმე შედეგი“, – განაცხადა უდუმაშვილმა.

პარტია „ტრიბუნის“ ლიდერი დავით ჭიჭინაძე მიიჩნევს, რომ პრობლემა არა საპროტესტო აქციებში, არამედ მთავრობის მუშაობასა და ჯანდაცვის სისტემაშია.

მისი აზრით, სისტემა არ მუშაობს. როგორ შეიძლება, იზრდებოდეს ინფიცირებულთა რაოდენობა და შემდეგ ერთბაშად ათასით დაიკლოს?! ისინი ან ვერ ატარებენ ტესტებს, ან კორონავირუსმა უქმე დღეები გამოაცხადა, აღნიშნა ჭიჭინაძემ.

საქართველოში კორონავირუსის მეორე ტალღა მძვინვარებს, რომლის პიკი ნოემბრის ბოლოს – დეკემბრის დასაწყისშია მოსალოდნელი. ყოველდღიურად 3–4 ათასი ახალი შემთხვევა ფიქსირდება. ინფიცირებულების რაოდენობა 112 ათასს მიუახლოვდა, ხოლო გარდაცვალებულების რიცხვი 1 ათასს გადასცდა.

ქვეყანაში რიგი შეზღუდვები მოქმედებს, როგორიცაა, მაგალითად, პირბადის ტარების აუცილებლობა როგორც დახურულ, ისე ღია სივრცეში, დიდ ქალაქებში სწავლა დისტანციურად მიმდინარეობს, ღამით აკრძალულია გადაადგილება და ა.შ.

კორონავირუსის პირველი შემთხვევა საქართველოში 26 თებერვალს გამოვლინდა.

36
თემები:
COVID-19 საქართველოში
ვალუტის გადამცვლელი პუნქტი

ლარის კურსი 25 ნოემბერს

0
(განახლებულია 08:13 25.11.2020)
წინა ნიშნულთან შედარებით ქართული ეროვნული ვალუტის კურსი აშშ დოლარის მიმართ 0,012 ლარით გაუფასურდა.

თბილისი, 25 ნოემბერი – Sputnik. საქართველოს ეროვნულმა ბანკმა ლარის კურსი აშშ დოლარის მიმართ 3,3193GEL/$1 ნიშნულზე დაადგინა.

წინა ნიშნულთან შედარებით ქართული ეროვნული ვალუტის კურსი აშშ დოლარის მიმართ 0,012 ლარით გაუფასურდა. 

ლარის კურსი 25 ნოემბერს
0
თემები:
ლარის კურსი დღეს