მომიტინგეების დაკავება პარლამენტთან. 9.11.2020

„დაუმორჩილებლობის აქციაზე“ დაკავებულთა სასამართლო საპროტესტო აქციის ფონზე მიმდინარეობს

72
(განახლებულია 22:04 10.11.2020)
პარლამენტთან გამართული „დაუმორჩილებლობის აქციის“ დროს ადმინისტრაციული წესით დაკავებული სამი პირიდან ერთ-ერთს 1000-ლარიანი ჯარიმის გადახდა დაეკისრა. კიდევ ორი დაკავებულის სასამართლო პროცესი ჯერ კიდევ გრძელდება

თბილისი, 10 ნოემბერი – Sputnik. მოძრაობა „სირცხვილიას“ წარმომადგენლები თბილისის საქალაქო სასამართლოსთან საპროტესტო აქციას მართავენ, იუწყება პირველი არხი.

ორშაბათს პარლამენტთან გამართული „დაუმორჩილებლობის აქციის“ დროს ადმინისტრაციული წესით დაკავებულ ლექსო მაჭავარიანს თბილისის საქალაქო სასამართლომ 1000-ლარიანი ჯარიმის გადახდა დააკისრა. კიდევ ორი დაკავებულის სასამართლო პროცესი აქციის ფონზე გრძელდება.

მოძრაობა „სირცხვილიას“ წარმომადგენლების განცხადებით, სამივე პირი გუშინ სამართალდამცველებმა უკანონოდ დააკავეს.

სამოქალაქო მოძრაობა „სირცხვილიამ“ მთავრობის მიერ აკრძალულ საათებში თბილისში, პარლამენტთან დაუმორჩილებლობის აქცია ჩაატარა და კორონავირუსის გავრცელების პრევენციის მიზნით დიდ ქალაქებში 22:00 საათიდან დილის 5 საათამდე გადაადგილების შეზღუდვა გააპროტესტა.

პოლიციამ ჯერ კიდევ აქციის დაწყებამდე სამი ადამიანი დააკავა, რომლებმაც აქციაზე კოცონის დასანთებად შეშა მიიტანეს. 

 „ბუნებრივია, ვაპროტესტებთ იმას, რაც ხდება ამ შენობაში და მთელ ქვეყანაში. არჩევნები ხომ წაგვართვეს, ხომ დაგვაბრმავეს, ახლა არაფრის გამო იჭერენ ადამიანებს და სცემენ პოლიციის შენობაში. გავაპროტესტებთ ბოლომდე, გავაპროტესტებთ სადაც საჭირო იქნება, ყველგან მივალთ, ყველა ელჩთან, ყველა საერთაშორისო ორგანიზაციასთან“, - განაცხადა აქციის ერთ-ერთმა მონაწილემ გიგა მაქარაშვილმა.

ხელისუფლების განცხადებით, ღამით გადაადგილების აკრძალვა საჭიროა კორონავირუსის გავრცელების სწრაფი ზრდის შესაჩერებლად. ოპოზიცია კი მიიჩნევს, რომ მთავრობის მიერ დაწესებული აკრძალვა პოლიტიკური ხასიათისაა და ამით მხოლოდ აქციის მონაწილეების მობილობა იზღუდება.

საქართველოში 31 ოქტომბერს არჩევნები გაიმართა. ცესკოს წინასწარი მონაცემებით, მმართველმა პარტია „ქართულმა ოცნებამ“ ხელისუფლებაში მესამე ვადით დარჩენა შეძლო – მან პარლამენტში 150–დან 76 ადგილი მოიპოვა.

პარლამენტში შესულმა ოპოზიციურმა პარტიებმა ერთმანეთის მიყოლებით უარი განაცხადეს მეათე მოწვევის პარლამენტის დეპუტატის მანდატზე. მათ მიაჩნიათ, რომ არჩევნების შედეგები გაყალბდა და ცესკოს თავმჯდომარის, თამარ ჟვანიას გადადგომას და ხელახალ არჩევნებს მოითხოვენ. თბილისსა და სხვა ქალაქებში საპროტესტო აქციები დაიწყო. კვირას ცესკოსთან საპროტესტო აქციის მონაწილეების წინააღმდეგ პოლიციამ წყლის ჭავლი და წიწაკის სპრეი გამოიყენა.

საქართველოს მთავრობა დამატებითი წერტილოვანი შეზღუდვების დაწესებაზე მსჯელობს >>

მმართველ პარტიაში ოპოზიციის უკმაყოფილებას დესტრუქციულად აფასებენ და მათ ქვეყანაში დესტაბილიზაციის მცდელობასა და ვითარების ხელოვნურად დაძაბვაში ადანაშაულებენ. მმართველ პარტიაში არჩევნების გაყალბებას კატეგორიულად უარყოფენ და აცხადებენ, რომ იგი თავისუფალ და სამართლიან გარემოში ჩატარდა, რაზეც საერთაშორისო სადამკვირვებლო მისიების შეფასებებიც მეტყველებს.

72
თემები:
პროტესტი საქართველოში: ოპოზიცია საპარლამენტო არჩევნების შედეგებს არ აღიარებს (94)
ზაალ უდუმაშვილი

ქართული ოპოზიციის გეგმები შეიცვალა: მზადდება ახალი დეკლარაცია

46
(განახლებულია 18:56 30.11.2020)
პარლამენტში შესული ოპოზიციური პარტიების ლიდერებს კვლავ ძველი მოთხოვნა აქვთ - ხელახალი საპარლამენტო არჩევნები

თბილისი, 30 ნოემბერი – Sputnik. ქართულმა ოპოზიციამ გეგმები შეცვალა - მეათე მოწვევის პარლამენტის სხდომის პირველ დღეს მასშტაბური საპროტესტო აქციის ნაცვლად ოპოზიციის ლიდერები მეტეხის ტაძრის ეზოში ერთობლივ დეკლარაციას მოაწერენ ხელს.

კახა კალაძე: ახალი არჩევნების ჩატარების საფუძველი არ არსებობს >>

ამის შესახებ ცნობილი გახდა ოპოზიციიც ლიდერების შეხვედრის შემდეგ, რომელიც ორშაბათს „ლელოს“ ოფისში გაიმართა. დეკლარაციას პარლამენტის ბოიკოტის შესახებ ხელს მოაწერენ პარლამენტში გასული ოპოზიციური პარტიები, აგრეთვე ისინი თავის პარტიულ სიებს გაიწვევენ.

„დღეს შევათანხმეთ საბოლოო დეტალები იმ ღონისძიების, რომელიც გაიმართება პირველი სხდომის პარალელურად. როგორც უკვე იცით, ყველა ოპოზიციური პარტია, რომელიც ითხოვს ხელახალ არჩევნებს, შეიკრიბება მეტეხის ტაძართან, სადაც ჩვენ გავაფორმებთ დეკლარაციას, ყველა ოპოზიციური პარტია მოაწერს ხელს. გარდა ამისა, ყველა დეპუტატი, რომელიც ცესკო-ს მონაცემებით პარლამენტშია შესული, მანდატის დატოვების შესახებ განცხადებას დაწერს. რა თქმა უნდა, პარალელურად ჩაიხსნება ყველა პარტიული სია. საბოლოო დეტალები გავიარეთ“, - განაცხადა „ნაციონალური მოძრაობის“ წევრმა ზაალ უდუმაშვილმა.

31 ოქტომბრის არჩევნების შედეგების მიხედვით პარლამენტში მოხვდა რვა ოპოზიციური პარტია და ბლოკი. ისინი არჩევნების შედეგებს არ ცნობენ, მიიჩნევენ, რომ მმართველმა პარტიამ „ქართულმა ოცნებამ“ არჩევნები გააყალბა და მეათე მოწვევის პარლამენტში შესვლას არ აპირებენ.

უახლოეს დღეებში ხელისუფლებასა და ოპოზიციას შორის უნდა გაიმართოს მოლაპარაკებათა მესამე რაუნდი, რომელიც საქართველოში აშშ-ის და ევროკავშირის ელჩების მიერ არის ორგანიზებული. ამ დროისათვის ცნობილია, რომ ოპოზიცია ახალ საპარლამენტო არჩევნებს მოითხოვს, ხოლო „ქართული ოცნება“ ამის კატეგორიული წინააღმდეგია და ამას ერთადერთ შეუსრულებელ მოთხოვნას უწოდებს.

„მესამე რაუნდი თავიდან ბოლომდე დამოკიდებულია ხელისუფლებაზე, თუ რამდენად რაციონალური წინადადებებით მოვლენ ისინი. როგორც ჩანს, მათ არ აქვთ ჯერჯერობით რაციონალური წინადადება. შესაბამისად, ამ ეტაპზე მესამე რაუნდის პერსპექტივა არ ჩანს. ის მაშინ გაჩნდება, როდესაც მათი მხრიდან იქნება კონკრეტული წინადადებები“, - განაცხადა „ევროპული საქართველოს“ ლიდერმა გიგი უგულავამ.

ევროკავშირის და აშშ-ის ელჩებმა პოზიციების დასაახლოებლად ოპოზიციის ლიდერებთან უკვე რამდენიმე შეხვედრა გამართეს, თუმცა ახალი რაუნდის თარიღი ჯერჯერობით უცნობია.

ცესკომ უახლოეს დროს არჩევნების მეორე ტურის არჩევნების შედეგები უნდა შეაჯამოს, შემდეგ კი 20 დღის განმავლობაში პარლამენტის პირველი სხდომა დაინიშნება. ოპოზიციის მიერ ბოიკოტის მიუხედავად, პარლამენტი, რომელშიც „ქართული ოცნება“ 90 დეპუტატით იქნება წარმოდგენილი, მუშაობის დაწყებას და კანონების მიღებას მაინც შეძლებს.

მმართველ პარტიაში ოპოზიციის მოქმედებებს დესტრუქციულს, დესტაბილიზაციისკენ მიმართულს უწოდებენ და მას ვითარების ხელოვნურად დაძაბვაში ადანაშაულებენ.

46
თემები:
პროტესტი საქართველოში: ოპოზიცია საპარლამენტო არჩევნების შედეგებს არ აღიარებს (94)
ოპოზიციის აქცია ბათუმში

დაპირისპირება აქციაზე ბათუმში: არიან დაშავებულები და დაკავებულები

27
(განახლებულია 20:50 30.11.2020)
აქციის მონაწილეებმა აქცია–პერფორმანსი მოაწყვეს – გაუშვეს ჰელიუმის ბუშტები წარწერით „მონავ, იმოქმედე!“

თბილისი, 30 ნოემბერი – Sputnik. ბათუმში, აჭარის მთავრობის სახლთან აქციის მონაწილეებსა და პოლიციელბს შორის რამდენიმე დაპირისპირება მოხდა.

აქციის მონაწილეები დილიდან აჭარის მთავრობის მეთაურთან თორნიკე რიჟვაძესთან შეხვედრას მოითხოვდნენ. რამდენიმე აქტივისტი შენობაში შესვლას შეეცადა, მაგრამ მათ პოლიციამ შეუშალა ხელი.

„არა შეზღუდვებს!“ – პარლამენტთან კარვების გაშლას შეეცადნენ>>

პროტესტის მონაწილეებმა აქცია–პერფორმანსი გამართეს. რიჟვაძის კაბინეტის ფანჯრებქვეშ ჰელიუმის ბუშტები გაუშვეს წარწერით „მონავ, იმოქმედე!“, „გამოდი, შეხვდი ხალხს“. ამით მათ აჭარის მეთაურს მოსახლეობასთან გამოსვლისა და მათი პრობლემების გაცნობისკენ მოუწოდეს.

როგორც მოძრაობა „იმოქმედეს“ ლიდერმა ბექა მექვაბიშვილმა განაცხადა, თორნიკე რიჟვაძე ფიქრობს, რომ ქართველი ხალხი არჩევნების გაყალბებას შეეგუება. მაგრამ აქციები გაგრძელდება მანამ, სანამ შედეგი არ იქნება მიღწეული. ის უნდა შეხვდეს ხალხს და უპასუხოს, რატომ მოიპარა ჩვენი ხმები, აღნიშნა მექვაბიშვილმა.

ამ პერფორმანსს მოჰყვა დაპირისპირება აქციის მონაწილეებსა და პოლიციას შორის. არეულობის დროს ორი ადამიანი ცუდად გახდა, ასევე დაზიანდა კარვები, რომლებიც აქციის მონაწილეებმა მთავრობის სახლის წინ გაშალეს.

აქციის მონაწილეებმა გზის გადაკეტვაც სცადეს.

წინასწარი ინფორმაციით, დაკავებულია რამდენიმე აქტივისტი. ოპოზიციური „მთავარი არხის“ ინფორმაციით, არიან დაშავებულები და, მათ შორის, მასმედიის წარმომადგენლები.

ბათუმში ხმაურია: საპროტესტო აქციის ფონზე ფიტნეს-ცენტრის შენობაში პოლიცია შევიდა>>

საპროტესტო უვადო აქცია ბათუმში 8 ნოემბრიდან გრძელდება. მისი მონაწილეები მოითხოვენ რიგგარეშე არჩევნების ჩატარებას, საარჩევნო ადმინისტრაციის შეცვლასა და პოლიტპატიმრების გათავისუფლებას. მთავრობის სახლის წინ კარვებია გაშლილი.

უფრო ადრე ოპოზიციის ლიდერებმა განაცხადეს, რომ რეგიონში სოციალურ–ეკონომიკური საკითხების მოგვარებას თავად აპირებენ. კვირას საპროტესტო აქციის მონაწილეებმა მთავრობის სახლთან გადასატანი სავაჭრო კიოსკი მიიტანეს და შეკრებილებს დაჰპირდნენ, რომ არ დაემორჩილებიან კორონავირუსის გავრცელების გამო დაწესებულ ახალ შეზღუდვებს და „დაუმორჩილებლობის უბანს" მოაწყობენ.

27
თემები:
პროტესტი საქართველოში: ოპოზიცია საპარლამენტო არჩევნების შედეგებს არ აღიარებს (94)
რუსული ვაქცინა  Спутник V

ევროპაში განმარტეს, რა შემთხვევაში გამოიყენებენ COVID-19-ის საწინააღმდეგო რუსულ ვაქცინას

0
ევროკომისიაში მიაჩნიათ, რომ ყველა ვაქცინა, რომელსაც ევროპის მოქალაქეებს სთავაზობენ, ევროპის წამლის სააგენტოს მიერ უნდა იყოს დამტკიცებული

თბილისი, 30 ნოემბერი - Sputnik. ევროკომისიის წარმომადგენელმა განაცხადა, რომ უნგრეთის ხელისუფლების გადაწყვეტილება, გამოიყენოს COVID-19-ის საწინააღმდეგო რუსული ვაქცინა, მთელ ევროკავშირზე არ გავრცელდება. იუწყება РИА Новости.

რუსეთის მრეწველობისა და ვაჭრობის მინისტრმა დენის მანტუროვმა 13 ნოემბერს უნგრეთის საგარეო საქმეთა მინისტრ პეტერ სიიარტოსთან რუსული ვაქცინის უნგრეთში წარმოების საკითხი განიხილა. სიიარტომ 27 ნოემბერს განაცხადა, რომ ქვეყანაში „სპუტნიკ  V“-ის მცირე პარტიების მიწოდება დეკემბერში დაიწყებოდა, უფრო მსხვილი პარტიებისა კი - იანვარში.

„ევროკომისიაში მიაჩნიათ, რომ ყველა ვაქცინა, რომელსაც ევროპის მოქალაქეებს სთავაზობენ, უმჯობესია ევროპის წამლის სააგენტოს მიერ იყოს დამტკიცებული. თუმცა სასწრაფო პროცედურის ფარგლებში, სახელმწიფოს შეუძლია საკუთარი ქვეყნის ტერიტორიაზე ვაქცინის გამოყენება და თავის მოქალაქეთა შორის მისი გავრცელება დაუშვას. მაგრამ ჩვენ ვაქცინის საკითხებში მაქსიმალური გამჭვირვალობის მომხრე ვართ“, - განაცხადა ევროკავშირის წარმომადგენელმა.

ევროკომისიაში განმარტეს, რომ სახელმწიფო თავადაა პასუხისმგებელი სასწრაფო წესით მიღებულ გადაწყვეტილებაზე.

„თუ ვაქცინის გამოყენება ნებადართულია უნგრეთის ხელისუფლების მიერ, მაშინ საუბარია მის გამოყენებაზე მხოლოდ უნგრეთის ტერიტორიაზე“, - დაასკვნა ევროკომისიის წარმომადგენელმა.

ევროპის წამლის სააგენტომ (ЕМА) 26 ნოემბერს დაადასტურა კონტაქტები „სპუტნიკ  V“-ის მწარმოებელთან და აღნიშნა, რომ რთულია წინასწარ იმის გათვლა, რამდენ ხანში იქნება დამტკიცებული ასეთი პრეპარატები. ამავდროულად სააგენტოში განაცხადეს, რომ ევროკომისიაში აგროვებენ რესურსს ამ პროცესების დასაჩქარებლად და COVID-19-ის საწინააღმდეგო ვაქცინის შესწავლისა და ნებართვის გაცემის ვადების შესამცირებლად.

ევროკომისიის წარმომადგენელმა ხაზგასმით აღნიშნა ასევე, რომ სააგენტოს ჯერ არ მიუღია განაცხადი ევროპულ ბაზარზე რუსული ვაქცინის გაყიდვის ნებართვის მიღებაზე. მანასევე დასძინა, რომ  მონაცემებს აღნიშნულ პრეპარატზე ჯერ არც ევროკომისია არ ფლობს.

0
თემები:
COVID-19-ის პანდემია მსოფლიოში