თბილისი, 8 ნოემბერი – Sputnik. საქართველოს პრეზიდენტმა სალომე ზურაბიშვილმა აშშ-ის ახლად არჩეულ პრეზიდენტ ჯო ბაიდენსა და ახლად არჩეულ ვიცე-პრეზიდენტ კამალა ჰარისს არჩევნებში გამარჯვება მიულოცა, ამის შესახებ ზურაბიშვილი Twitter-ის ოფიციალურ გვერდზე წერს.
My congratulations @JoeBiden! #Georgia, the #Caucasus region, and the world need a free, strong and democratic America.
— Salome Zourabichvili (@Zourabichvili_S) November 7, 2020
I look forward to working with you to make the cooperation and the bonds between our two nations stronger and deeper. 🇬🇪🤝🇺🇸
„საქართველოს, კავკასიის რეგიონსა და მსოფლიოს სჭირდება თავისუფალი, ძლიერი და დემოკრატიული ამერიკა. მოუთმენლად ველოდები თქვენთან მუშაობას, რათა ჩვენი ორი ქვეყნის თანამშრომლობა და კავშირები კიდევ უფრო გავამყაროთ და გავაღრმავოთ“, – წერს სალომე ზურაბიშვილი.
ამასთან, სალომე ზურაბიშვილი პერსონალურად ულოცავს ახლად არჩეულ ვიცე-პრეზიდენტ კამალა ჰარისს, როგორც აშშ-ის ისტორიაში პირველ ვიცე-პრეზიდენტ ქალს და მას წარმატებებს უსურვებს.
ჯო ბაიდენს გამარჯვება ასევე საქართველოს პრემიერ-მინისტრმა გიორგი გახარიამ მიულოცა.
აშშ-ის პრეზიდენტის არჩევნები 3 ნოემბერს გაიმართა. ოფიციალური გამარჯვებული ჯერ არ გამოცხადებულა, მაგრამ დემოკრატების კანდიდატს ამომრჩეველთა კოლეგიის საკმარისზე გაცილებით მეტი - 290 ხმა აქვს, როდესაც გამარჯვებისთვის საჭიროა 270 ხმა. მოქმედ პრეზიდენტ დონალდ ტრამპს აქვს 214 ხმა.
ჯო ბაიდენს გამარჯვება მსოფლიოს ბევრმა ლიდერმა უკვე მიულოცა.
ტრამპმა ჯერ კიდევ 4 ნოემბრის ღამეს თავი გამარჯვებულად გამოაცხადა, ხოლო დემოკრატები „არჩევნების მოპარვის“ მცდელობაში დაადანაშაულა. გარდა ამისა, მან რამდენჯერმე მოითხოვა ხმების დათვლის შეჩერება, რადგან არჩევნების მეორე დღეს ფოსტით მიღებულ ბიულეტენებს უკანონოს უწოდებს.
ტრამპის შტაბი რამდენიმე შტატში ხმების გადათვლასაც მოითხოვს. მათ ფოსტით მიღებული ხმების კანონიერებასთან დაკავშირებით სასამართლოში რამდენიმე სარჩელი აქვთ შეტანილი.
