იაგო ხვიჩია

რა შემთხვევაში ექნება არჩევნების მეორე ტურის გამართვას აზრი? „გირჩის" შეთავაზება

67
(განახლებულია 20:31 05.11.2020)
„პოლიტიკური ცენტრი – გირჩი“ ერთ-ერთია იმ ცხრა პოლიტიკური სუბიექტიდან, რომელიც მეათე მოწვევის პარლამენტში მოხვდა.

თბილისი, 5 ნოემბერი – Sputnik. ვადამდელი არჩევნების ჩატარება ერთ-ერთი მძიმე ნაბიჯია, რომელიც შეიძლება ხელისუფლებამ იძულებით გადადგას, განაცხადა პარტია „ახალი პოლიტიკური ცენტრი – გირჩის“ ერთ-ერთმა ლიდერმა იაგო ხვიჩიამ.

მისი განმარტებით, საქართველოში 31 ოქტომბერს გამართულ საპარლამენტო არჩევნებს ლეგიტიმაცია არ გააჩნია და ხელისუფლებამ რიგგარეშე, ვადამდელი არჩევნების ჩატარებაზე უნდა იზრუნოს. 

„ჩვენ გვქონდა არჩევნები, რომელმაც პოლიტიკური ტემპერატურა ვერ დაწია. მთლიანი პოლიტიკური სპექტრი შეთანხმდა იმაზე, რომ არჩევნები გაყალბდა და პარლამენტში ცხრა პარტიიდან არც ერთი არ შედის. ადამიანების მოლოდინი იყო, რომ იქნებოდა ხელჩართული პოლიტიკური ბრძოლა პოლიტიკურ პარტიებს შორის, რომლის ბედი აუცილებლად მეორე ტურში გადაწყდებოდა. „ქართულმა ოცნებამ“ კი მისთვის ყველაზე უარესი არჩევნები ჩაატარა“, – განაცხადა ხვიჩიამ.

მისი თქმით, 8 ნოემბრს დაგეგმილ აქციაზე ოპოზიციის ძირითადი მოთხოვნა ვადამდელი არჩევნების ჩატარებაა. შექმნილი ვითარებიდან გამოსავალი რთული და გრძელვადიანი პროცესია, თუმცა, პროცესი უნდა დაიწყოს არჩევნების შედეგების იმგვარად ჩასწორებით, რომ მეორე ტურში გადაწყდეს – ვინ დარჩება და ვინ წავა ხელისუფლებიდან, დასძინა მან.

„ყველას ვთავაზობთ გამოსავალს: ისე ჩავასწოროთ შედეგები, რომ მეორე ტურის გამართვას ჰქონდეს აზრი. თუ მეორე ტურს ჩავატარებთ წესიერად, „ქართული ოცნების“ უპირატესობა ვერ იქნება ისეთი, რომ მან ერთპიროვნული მმართველობა მიიღოს“, – განაცხადა იაგო ხვიჩიამ.

„პოლიტიკური ცენტრი – გირჩი“ ერთ-ერთია იმ ცხრა პოლიტიკური სუბიექტიდან, რომელიც მეათე მოწვევის პარლამენტში მოხვდა. მან ამომრჩეველთა ხმების 2,89% მიიღო (პროპორციული სიით). 

საქართველოში საპარლამენტო არჩევნები 31 ოქტომბერს გაიმართა, რომლის შედეგებსაც ოპოზიცია არ აღიარებს და მის არალეგიტიმურად ცნობას მოითხოვს. ყველა ოპოზიციურმა პარტიამ და ბლოკმა, რომლებიც წინასწარი შედეგების მიხედვით პარლამენტში მოხვდნენ, უკვე მოაწერა ხელი მემორანდუმს, რომლის მიხედვით მათ უარი თქვეს მანდატებზე და 17 საარჩევნო ოლქში არჩევნების მეორე ტურში მონაწილეობაზე.

ოპოზიცია 8 ნოემბერს პარლამენტის შენობის წინ საყოველთაო საპროტესტო აქციის გამართვას აანონსებს, მანამდე კი თბილისსა და რეგიონებში საოლქო საარჩევნო კომისიის შენობებთან საპროტესტო აქციებს მართავს.

გუშინ განსაკუთრებით ხმაურიანი საპროტესტო აქციები თბილისსა და ბათუმში გაიმართა – ოპოზიცია საოლქო კომისიების სხდომებზე საჩივრების განხილვის პროცესზე დასწრებას მოითხოვდა.

ცესკოს მონაცემებით, მმართველმა პარტია „ქართულმა ოცნებამ“ ამომრჩეველთა ხმების 48,23% მიიღო და 13 მაჟორიტარულ ოლქში არჩევნების მოგების შედეგად მას პარლამენტში უმრავლესობა ეყოლება.

მმართველ პარტიაში ოპოზიციის ქმედებებს დესტრუქციულს, დესტაბილიზაციისკენ მიმართულს უწოდებენ და აცხადებენ, რომ არჩევნები იყო სამართლიანი და თავისუფალი, რასაც საერთაშორისო სადამკვირვებლო მისიებიც ადასტურებენ.

67
თემები:
პოლიტიკური კრიზისი საქართველოში: შეფასებები და პროგნოზები (36)
ბადრი ჯაფარიძე

ბადრი ჯაფარიძე: მიტინგები და მანიფესტაციები აღარ გაიმართება

54
პარლამენტის პირველი სხდომის დღეს, რომელიც შეზღუდვების დაწესების შემდეგ გაიმართება, ოპოზიცია მასშტაბური საპროტესტო აქციის გამართვას გეგმავდა

თბილისი, 26 ნოემბერი – Sputnik. დაწესებული შეზღუდვების გათვალისწინებით ოპოზიცია გადახედავს გეგმებს საპროტესტო აქციების გამართვის შესახებ, განუცხადა ჟურნალისტებს პარტია „ლელოს“ ლიდერმა ბადრი ჯაფარიძემ.

მთავრობის გადაწყვეტილებით, საქართველოში 28 ნოემბრიდან მუშაობას წყვეტს საზოგადოებრივი ტრანსპორტი და იკეტება ბაზრების ნაწილი. ოპოზიცია კი პარლამენტის პირველი სხდომის დღეს, რომელიც შეზღუდვების დაწესების შემდეგ გაიმართება, მასშტაბური საპროტესტო აქციის გამართვას გეგმავდა.

„ოპოზიციის გეგმებს მანიფესტაციების და მიტინგის თვალსაზრისით, რა თქმა უნდა, უნდა გავითვალისწინოთ ეს ურთულესი მდგომარეობა და ამიტომ ჩვენი თანამოქალაქეების ისედაც საფრთხისშემცველ გარემოს კიდევ დამატებითი ფაქტორები არ უნდა დავუმატოთ. ამიტომ აისახება ოპოზიციის გეგმებში, რაც შეეხება მანიფესტაციებს და მიტინგებს, ისინი, დიდი ალბათობით, აღარ გაიმართება. მაგრამ სხვა გეგმებში ცვლილებები არ იგულისხმება, თუ ბოიკოტს გულისხმობთ”, - განაცხადა ჯაფარიძემ.

პრემიერ-მინისტრმა გიორგი გახარიამ განაცხადა, რომ ქვეყანაში გამოხატვის თავისუფლება არ იზღუდება და პარტიებს შეუძლიათ ჩაატარონ საპროტესტო აქციები, მაგრამ უსაფრთხოების ზომების გათვალისწინებით.

პარლამენტის პირველი სხდომა არჩევნების საბოლოო შედეგების შეჯამებიდან 10 დღის ვადაში უნდა გაიმართოს. რვავე ოპოზიციური პარტია, რომლებმაც საარჩევნო ბარიერი გადალახეს, არჩევნების შედეგებს არ აღიარებს და პარლამენტის მუშაობაში მონაწილეობის მიღებას არ აპირებს.

54
თემები:
პროტესტი საქართველოში: ოპოზიცია საპარლამენტო არჩევნების შედეგებს არ აღიარებს
ოპოზიციის აქციის მონაწილეები - 14.11.2020

პარტიების დაფინანსება: ვინ რამდენს მიიღებს 2021 წელს

38
საპარლამენტო არჩევნების შედეგების მიხედვით, დაფინანსების უფლება 14-მა პარტიამ მოიპოვა, მაგრამ ოთხ მათგანს ჯერჯერობით ცესკოსთვის არ მიუმართავთ

თბილისი, 26 ნოემბერი — Sputnik. მმართველი პარტია „ქართული ოცნება - დემოკრატიული საქართველო“ 2021 წელს სახელმწიფო ბიუჯეტიდან 5,1 მილიონ ლარზე მეტ დაფინანსებას მიიღებს, ამას პარლამენტის პროპორციული არჩევნების წინასწარი შედეგები მოწმობს.

შემდეგი მოდის ყოფილი მმართველი პარტია „ერთიანი ნაციონალური მოძრაობა“. მას დაახლოებით 2,3 მილიონი ლარი ერგება.

რაც შეეხება დანარჩენ პარტიებს, რომლებიც „ერთიანი ნაციონალური მოძრაობა - ძალა ერთობაშიას“ საარჩევნო ბლოკის შემადგენლობაში შედიან, თანხა შემდეგნაირად გადანაწილდება:

„მოძრაობა სახელმწიფო ხალხისთვის“ – 240 ათასი ლარი

„პროგრესი და თავისუფლება" - 12 ათასი ლარი,

„საქართველოს რესპუბლიკური პარტია" - 204 ათასი ლარი,

„ევროპელი დემოკრატები" - 360 ათასი ლარი.

დაფინანსების მოცულობით მესამე ადგილზეა ოპოზიციური პარტია „ევროპული საქართველო“, რომელმაც 1,1 მილიონი ლარი შეიძლება მიიღოს. მეოთხე ადგილზე მოხვდა „საქართველოს პატრიოტთა ალიანსი“ – 1 მილიონ ლარზე მეტი.

პარტიების დაფინანსება რეგულირდება კანონით „საქართველოს მოქალაქეთა პოლიტიკური გაერთიანებების შესახებ“ და დამოკიდებულია მიღებული ხმების რაოდენობაზე, ქალთა რიცხვზე პროპორციულ სიებში და ასევე მანდატების საბოლოო რაოდენობაზე.

რაც შეეხება დანარჩენ პარტიებს, რომლებმაც საარჩევნო ბარიერი გადალახეს, დაფინანსება შემდეგნაირად განაწილდება:

„გიორგი ვაშაძე - სტრატეგია აღმაშენებელი" - 939 925 ლარი,

„კანონი და სამართალი" - 104 436 ლარი,

„ლელო" - 803 560 ლარი,

„გირჩი" - 777 990 ლარი,

„ალეკო ელისაშვილი - მოქალაქეები" - 497 406 ლარი,

„საქართველოს ლეიბორისტული პარტია" - 289 710 ლარი.

ამ დროისათვის საქართველოს ცენტრალურ საარჩევნო კომისიას საბიუჯეტო დაფინანსების მიღების მიზნით უკვე ათმა პოლიტიკურმა პარტიამ მიმართა. მათ შორის არიან ის პარტიებიც, რომლებიც პარლამენტში შესვლაზე უარს აცხადებენ და ბოიკოტის რეჟიმში არიან.

დაფინანსების მიღებაზე შესაბამისი წერილით თანხმობა განაცხადეს: ბლოკში „ერთიანი ნაციონალური მოძრაობა – ძალა ერთობაშია“ გაერთიანებულმა პარტიებმა: „ერთიანი ნაციონალური მოძრაობა“, „მოძრაობა სახელმწიფო ხალხისთვის“, „პროგრესი და თავისუფლება“, „საქართველოს რესპუბლიკური პარტია“ და „ევროპელი დემოკრატები“.

ასევე, დაფინანსების მიღების თაობაზე ცესკო-ში შესაბამისი თანხმობა წარადგინა ბლოკ „გიორგი ვაშაძე – სტრატეგია აღმაშენებელში“ გაერთიანებულმა ორმა პოლიტიკურმა პარტიამ: „გიორგი ვაშაძე – სტრატეგია აღმაშენებელი“ და „კანონი და სამართალი“. შესაბამისი თანხმობის წერილი დაფინანსების მიღებაზე საარჩევნო ადმინისტრაციაში წარადგინეს „ევროპულმა საქართველომ“ და „პატრიოტთა ალიანსმა“.

დაფინანსების მისაღებად ცენტრალურ საარჩევნო კომისიაში თანხმობის წერილის წარდგენის ვადა პოლიტიკურ პარტიებს სწორედ 25 ნოემბრამდე ჰქონდათ, თუმცა კანონის თანახმად ცესკო ვალდებულია, ის პარტიები, რომლებსაც თანხმობა ჯერ არ განუცხადებიათ, წერილობით გააფრთხილოს, რის შემდეგაც პარტიებს კიდევ სამი დღე მიეცემათ, რათა საარჩევნო ადმინისტრაციაში შესაბამისი თანხმობა წარადგინონ დაფინანსების მიღების თაობაზე.

2020 წლის საპარლამენტო არჩევნების შედეგებიდან გამომდინარე, დაფინანსების მიღების უფლება 14-მა პარტიამ მოიპოვა. ამ მომენტისათვის, ცესკო-სთვის დაფინანსების მისაღებად არ მიუმართავს „ლეიბორისტულ პარტიას“, „მოქალაქეებს“, „გირჩსა“ და „ლელოს“.

38
თემები:
საქართველოს პოლიტიკური ცხოვრება
ფიტნეს-დარბაზი

პანდემიის პირობებში ფიზიკური აქტივობის აუცილებელი მინიმუმი: ჯანმომ რეკომენდაციები შეცვალა

0
(განახლებულია 00:09 27.11.2020)
როგორც ორგანიზაციაში ამტკიცებენ, მსოფლიოს მოსახლეობა უფრო აქტიური რომ ყოფილიყო, ყოველწლიურად პლანეტაზე 5 მილიონი სიკვდილით ნაკლები დაფიქსირდებოდა

თბილისი, 27 ნოემბერი — Sputnik. ჯანდაცვის მსოფლიო ორგანიზაციამ (ჯანმო) კორონავირუსის პანდემიის გათვალისწინებით ფიზიკური აქტივობის ნორმების მიხედვით რეკომენდაციები შეცვალა, იუწყება РИА Новости.

ჯანმოს ახალი რეკომენდაციების მიხედვით, ზრდასრული ადამიანებისთვის, მათ შორის ქრონიკული დაავადებების მქონე ადამიანებისთვის კვირის განმავლობაში რეკომენდებულია სულ მცირე 150-300 წუთით საშუალო ინტენსივობის აქტიურობა. ბავშვებისა და მოზარდებისთვის კი დღეში საშუალო ან მაღალი ინტენსივობის ვარჯიშები 60 წუთის განმავლობაში.

ხანდაზმულ ადამიანებს (65 და მეტი წლის ასაკის) ეძლევა რეკომენდაცია გამოიყენონ აქტივობების ისეთი ტიპები, რომლებიც ხელს უწყობენ წონასწორობისა და კოორდინაციის გაუმჯობესებას, ასევე კუნთების გამაგრებას.

„რეგულარულ ფიზიკური აქტივობას გადამწყვეტი მნიშვნელობა აქვს პროფილაქტიკისთვის და გულ-სისხლ-ძარღვთა დაავადებათა, მეორე ტიპის დიაბეტის და კიბოს მკურნალობის ხელშეწყობისას, ასევე დეპრესიის და შფოთვის სიმპტომების შემცირების, კოგნიტიური უნარების დაქვეითების შენელების, მეხსიერების გაუმჯობესების და ტვინის ჯანმრთელობის გაძლიერებისათვის“, - აღნიშნავს ჯანმო.

როგორც ჯანმოს გენერალურმა დირექტორმა ტედროს ადანომ გებრეიესუსმა განაცხადა, ფიზიკურ აქტივობას ჯანმრთელობისა და კეთილდღეობისთვის გადამწყვეტი მნიშვნელობა გააჩნია - ეს ცხოვრების გახანგრძლივებას და ხარისხის გაუმჯობესებას უწყობს ხელს.

„ყველა მოძრაობა მნიშვნელოვანია, განსაკუთრებით ახლა, როდესაც COVID-19-ის პანდემიასთან დაკავშირებული შეზღუდვების პირობებში ვცხოვრობთ. ყველამ ყოველდღე უნდა ვიმოძრაოთ, უსაფრთხოდ და შემოქმედებითად“, - ციტირებს მის სიტყვებს ჯანმო.

ორგანიზაციაში აღნიშნეს, რომ სხვადასხვა ფიზიკური აქტივობა სასარგებლოა და შეიძლება შესრულდეს როგორც სამუშაოს, სპორტისა და დასვენებისა ან გადაადგილების (სიარული, ველოსიპედით გადაადგილება) ნაწილი, ისე ცეკვების, თამაშების ან ყოველდღიური საშინაო საქმეების დროს, მაგალითად მუშაობა ბაღში და დალაგება.

0
თემები:
COVID-19-ის პანდემია მსოფლიოში