ბიძინა ივანიშვილი

ივანიშვილი: „მე ვგმობ ყველანაირ ძალადობას, ნუ აყვებით პროვოკაციებს...“

98
(განახლებულია 21:36 08.10.2020)
ბიძინა ივანიშვილის თქმით, ბოლო დროინდელი გამოკითხვების მიხედვით, მმართველი პარტია ყველა რეიტინგის უდავო ლიდერია. მისი თქმით, „ოცნების“ საპროგნოზო მაჩვენებელი 63%-ს აჭარბებს.

თბილისი, 8 ოქტომბერი — Sputnik. ბიძინა ივანიშვილმა, პოლიტიკური გაერთიანება „ქართული ოცნება  - დემოკრატიული საქართველოს“ თავმჯდომარემ განცხადება გაავრცელა.

ბოლო დროს გახშირდა შეტაკებები მმართველი პარტია „ქართული ოცნების“ და ოპოზიციის მხარდამჭერებს შორის. თავიდან ვნებათაღელვა უყო მარნეულის ოლქში, შემდეგ კი ზუგდიდში. იყო შეხლა-შემოხლა თბილისშიც. ორივე მხარე ერთმანეთს პროვოკაციებში ადანაშაულებს.

„მე ვგმობ ყველანაირ ძალადობას, რაც ზიანს აყენებს წინასაარჩევნო პროცესს და დემოკრატიის ხარისხს ქვეყანაში“, - განაცხადა ივანიშვილმა.

მისი თქმით, რადიკალური ოპოზიციური ჯგუფების მხრიდან გახშირდა პროვოკაციები, რასაც წამოეგნენ „ქართული ოცნების“ მხარდამჭერებიც. არის საფრთხე, რომ არჩევნების მოახლოებასთან ერთად, ასეთი ხასიათის ძალადობრივი დაპირისპირებები უფრო გახშირდეს.

„როდესაც კონფლიქტი ხდება, ძნელია იმის გარჩევა, ვინ არის ინიციატორი და ვინ - პროვოკაციის მსხვერპლი. ეს განსაკუთრებით ძნელია ჩვენი დასავლელი პარტნიორებისთვის, ვინც არჩევნებს აკვირდება და ვისი შეფასებებიც საარჩევნო პროცესის თაობაზე  ქვეყნისთვის უკიდურესად მნიშვნელოვანია“, - განაცხადა ივანიშვილმა.

მან თავშეკავებისკენ მოუწოდა ყველას, განსაკუთრებით კი „ქართული ოცნების" მხარდამჭერებს.

„ნუ აყვებით პროვოკაციებს, ნუ მივცემთ რადიკალურ ჯგუფებს იმის საშუალებას, რომ დააზიანონ საარჩევნო გარემო და ქვეყნის საერთაშორისო რეპუტაცია“, - განაცხადა ივანიშვილმა.

მისი თქმით, ძალადობა ყოფილი მმართველი პარტია „ერთიანი ნაციონალური მოძრაობის“ ხელწერაა, ხოლო „ქართული ოცნება“ ყოველთვის ემიჯნებოდა ძალადობას.

მან ასევე აღნიშნა, რომ ბოლო დროინდელი გამოკითხვების მიხედვით, მმართველი პარტია ყველა რეიტინგის უდავო ლიდერია. მისი თქმით, „ოცნების“ საპროგნოზო მაჩვენებელი 63%-ს აჭარბებს.

„უდავო ფაქტია, რომ ჩვენ ამჟამად ძალზე მყარი პოზიციები გვაქვს. „ქართული ოცნება" დამაჯერებლად იმარჯვებს ამ არჩევნებში. ყველა კვლევა ადასტურებს, რომ ქართული საზოგადოების უპრეცედენტო მხარდაჭერის ფონზე, ჩვენი საპროგნოზო მაჩვენებელი 54-დან 60%-მდე მერყეობს და რიგ შემთხვევებში, 63%-საც კი აჭარბებს“, - განაცხადა ივანიშვილმა.

ამასთან დაკავშირებით, მან მხარდამჭერებს მოუწოდა არა დამატებითი ხმების მობილიზაციისკენ, არამედ სიმშვიდისკენ.

„ყველაფერი უნდა გავაკეთოთ იმისათვის, რომ არჩევნები მშვიდ და სამართლიან გარემოში ჩატარდეს და მის შედეგებში ეჭვის შეტანა ვერავინ შეძლოს. ამიტომ, კიდევ ერთხელ მინდა მოვუწოდო საზოგადოებას, განსაკუთრებით "ქართული ოცნების" მხარდამჭერებს, ნუ ავყვებით პროვოკაციებს, გამოვიჩინოთ მაქსიმალური თავშეკავება, მოვთოკოთ ემოციები, რომ  მშვიდად მივიდეთ არჩევნებამდე და მშვიდად გავაგრძელოთ ცხოვრება საქართველოს წარმატებისთვის“, - დაასკვნა ივანიშვილმა.

საქართველოში საპარლამენტო არჩევნები 31 ოქტომბერს გაიმართება. წინასწარი შედეგები უკვე 1 ნოემბერს დილით გახდება ცნობილი. ოპოზიციამ უკვე განაცხადა, რომ შედეგების ფალსიფიცირების შემთხვევაში თავის ხმებს ბოლომდე დაიცავს. გარდა ამისა, არჩევნების პროცესს და ხმების დათვლას ყურადღებით დააკვირდებიან საერთაშორისო დამკვირვებლები. მათ დასკვნაზე იქნება დამოკიდებული, აღიარებს თუ არა საერთაშორისო საზოგადოება საქართველოში გამართულ არჩევნებს.

98
თემები:
საქართველოს საპარლამენტო არჩევნები 2020 (275)
ცესკო

არჩევნებამდე ერთ კვირაზე ნაკლები რჩება - რა წესები უნდა დაიცვათ უბანზე

16
კორონავირუსის პანდემიის გამო კაბინა მთლიანად დახურული არ იქნება, ხოლო კალამი, რომლითაც ამომრჩეველმა ბიულეტენი შეავსო, მან უბანზე სპეციალურ ყუთში უნდა გადააგდოს

თბილისი, 25 ოქტომბერი – Sputnik. ცენტრალურმა საარჩევნო კომისიამ (ცესკო) გააცნო მედიას ის წესები, რომლებიც არჩევნების დღეს ამომრჩევლებმა უბნებზე უნდა დაიცვან.

ცესკოს თავმჯდომარე თამარ ჟვანიას თქმით, საარჩევნო უბანზე შესვლისას ამომრჩეველს პირბადე უნდა ეკეთოს.

„ვისაც პირბადე არ ექნება, მას ადგილზე მისცემენ. ამის შემდეგ ის დეზობარიერს გაივლის... ამის შემდეგ ამომრჩეველი რიგის მომწესრიგებელთან მიდის, აჩვენებს პირადობის მოწმობას და პირბადეს იხსნის, რადგან მისი იდენტიფიცირება მოხდეს. პირბადის გაკეთების შემდეგ, მარკირება მოწმდება და ამის შემდეგ ხელზე დეზინფექცია უტარდება, მიდის მაგიდასთან“, – განაცხადა ჟვანიამ.

ამის შემდეგ ამომრჩეველი კვლავ მოიხსნის პირბადეს და აიღებს ინდივიდუალურ კალამს, რომლითაც ხელს მოაწერს. იღებს მისთვის განკუთვნილ ბიულეტენს და ამის შემდეგ შედის კაბინაში.

კორონავირუსის პანდემიის გამო კაბინა მთლიანად დახურული არ იქნება.

ცესკო: გადასატანი საარჩევნო ყუთის მიტანა 900-მდე ამომრჩეველმა მოითხოვა >>

„როდესაც ამომრჩეველი დააფიქსირებს საკუთარ არჩევანს, კალამს სპეციალურ ურნაში აგდებს და ამის შემდეგ ხდება ბიულეტენის ყუთში ჩაგდება. ამის შემდეგ ამომრჩეველი დატოვებს საარჩევნო უბანს“, - განაცხადა ჟვანიამ.

საპარლამენტო არჩევნები საქართველოში 31 ოქტომბერს გაიმართება. არჩევნებში მონაწილეობას იღებს 48 პარტია და 2 ბლოკი. ამომრჩევლებს მოუწევთ 150 დეპუტატის არჩევა – 120 აირჩევა პროპორციული სისტემით, ხოლო 30 – მაჟორიტარულით.

საქართველოში არჩევნები პანდემიის პირობებში პირველად ტარდება.

 

 

16
თემები:
საქართველოს საპარლამენტო არჩევნები 2020 (275)
თეა წულუკიანი

თეა წულუკიანი იუსტიციის მინისტრის პოსტზე დაბრუნებას არ აპირებს

58
დადგა დრო დაინიშნოს ახალი მინისტრი, რომელიც არსებულ ფუნდამენტზე უკეთეს შენობას ააგებს, განაცხადა წულუკიანმა

თბილისი, 25 ოქტომბერი - Sputnik. იუსტიციის ყოფილი მინისტრი თეა წულუკიანი არჩევნების შემდეგ ძველ თანამდებობაზე დაბრუნებას არ აპირებს.

წულუკიანის თქმით, აქტიურად ვრცელდება ხმები მის დაბრუნებაზე, თუმცა თვითონ მსგავს არაფერს არ გეგმავს.

„ამაზე გვქონდა გუნდის შიგნით მსჯელობა და ეს, რა თქმა უნდა, ასე არ იგეგმება, იმიტომ რომ მე ბევრჯერ მითქვამს, რომ 8 წელი საკმარისია და ვფიქრობ, რომ ის, რაც შეიძლება ერთმა ადამიანმა, ერთმა გუნდმა და ერთმა სამინისტრომ 8 წლის განმავლობაში ერთგულად აკეთოს, ეს ვაკეთეთ. ახლა დროა, რომ დაინიშნოს ახალი მინისტრი, რომელიც ამ ფუნდამენტზე უკვე კიდევ უკეთეს შენობას ააგებს, რომელსაც იუსტიციის სისტემა ჰქვია“, - აღნიშნა წულუკიანმა ტელეკომპანია „იმედის“ ეთერში.

იუსტიციის ყოფილი მინისტრმა თეა წულუკიანმა თანამდებობა საარჩევნო კამპანიაში მონაწილეობის გამო დატოვა. წულუკიანი მთავრობაში ყველაზე გამოცდილი მინისტრია. ის მაშინდელი პრემიერის, ბიძინა ივანიშვილის მიერ ჩამოყალიბებულ მინისტრთა კაბინეტში 2012 წელს მოხვდა და თანამდებობაზე დარჩა ყველა სხვა მინისტრზე დიდ ხანს. მან იმუშავა ხუთი პრემიერ-მინისტრის დროს - ბიძინა ივანიშვილის, გიორგი ღარიბაშვილის, გიორგი კვირიკაშვილის, მამუკა ბახტაძის და გიორგი გახარიას დროს.

საქართველოში საპარლამენტო არჩევნები 31 ოქტომბერს გაიმართება. ამ დროისათვის არჩევნებში მონაწილეობის მისაღებად დარეგისტრირებულია 48 პარტია და ორი ბლოკი.

58
თემები:
საქართველოს პოლიტიკური ცხოვრება