დავით ზალკალიანი

ზალკალიანი: ჩვენ არ გაგვაჩნია არანაირი პრეტენზია აზერბაიჯანის მიმართ

63
დავით ზალკალიანი დარწმუნებულია, რომ ახალი გარემოებების პირობებშიც კი აზერბაიჯანელ კოლეგებთან იქნება მიღწეული ისეთი შეთანხმება, რომელიც ორივე მხარის ინტერესებს დააკმაყოფილებს

თბილისი, 7 ოქტომბერი – Sputnik. საქართველოს არ გააჩნია პრეტენზიები აზერბაიჯანისა და მისი პოლიტიკური ხელმძღვანელობის მიმართ დელიმიტაცია–დემარკაციის ქართული კომისიის მუშაობაში გამოვლენილი სკანდალური დეტალების გამო, განაცხადა საქართველოს საგარეო საქმეთა მინისტრმა დავით ზალკალიანმა.

ვინ არის პირი, რომელმაც პროკურატურას საქართველო–აზერბაიჯანის საზღვრის რუკა გადასცა >>

საქართველოს პროკურატურამ ოთხშაბათს განაცხადა კომისიის ორი ექსპერტის დაკავების შესახებ, რომლებმაც, გამოძიების ვერსიით, დამალეს რუკის ორიგინალი, რომლის მიხედვით ქართულ-აზერბაიჯანული საზღვრის შეთანხმება უნდა მომხდარიყო, და უფრო გვიანი რედაქცია გამოიყენეს. პროკურატურის მონაცემებით, ამის გამო 2007 წლამდე შეთანხმებული 16-დან 13 მონაკვეთი შეთანხმდა საქართველოს ინტერესების საწინააღმდეგოდ და ქვეყანამ 3,5 ათასი ჰექტარი ტერიტორია დაკარგა.

„აზერბაიჯანი იყო არის და რჩება საქართველოს სტრატეგიულ მოკავშირედ და მეგობრულ ქვეყნად. ვერც გამოძიების დაწყების ფაქტი და ვერც ახლადაღმოჩენილ გარემოებებზე დაყრდნობით აზერბაიჯანულ მხარესთან მოლაპარაკებების გაგრძელება და სამართლიანი გადაწყვეტილების ძიების პროცესი... ვერ დააზიანებს ჩვენს ორმხრივ, ისტორიულად ძალიან მყარ, მეგობრულ ურთიერთობებს. ვინაიდან, ჩვენ არანაირი პრეტენზია აზერბაიჯანის სახელმწიფოსთან და მისი პოლიტიკური ხელმძღვანელობის მიმართ არ გაგვაჩნია“, - განაცხადა ზალკალიანმა.

მისი თქმით, აზერბაიჯანული მხარე საქმის ახალ გარემოებებს უკვე გაეცნო.

„მოლაპარაკებების დროს აზერბაიჯანელ კოლეგებს გავუზიარეთ ახლადაღმოჩენილი გარემოებები, ახალი კარტოგრაფიული მასალები, რუკები, საექსპერტო დასკვნები. ეს არ უნდა იყოს აღქმული ისე, რომ მათ მიმართ რაიმე პრეტენზია გვაქვს. მათი მხრიდან ამას აბსოლუტურად ნორმალური გაგება ჰქონდა“, - განაცხადა ზალკალიანმა.

მან გამოთქვა რწმენა იმისა, რომ კომისიის ფარგლებში საკითხის ძალიან საქმიანი და საგნობრივი განხილვა მოხდება.

ამასთან ზალკალიანმა კიდევ ერთხელ განაცხადა, რომ საქმის ახალი გარემოებები ორი ქვეყნის ურთიერთობებს არ დააზიანებს.

„ყოველგვარი სპეკულაციები, რომ თითქოს, ეს საქართველო-აზერბაიჯანის ურთიერთობებს დააზიანებს ან ბმა ჩვენს სამეზობლოში დღეს მიმდინარე კონფრონტაციასთან აბსოლუტურად გაუმართლებელია. მინდა საზოგადოებას შევახსენო, რომ ჩვენი შეხვედრა იყო იმ დღეებში, როდესაც კონფლიქტი დაწყებულიც კი არ იყო. ამიტომ ის, რასაც ოპონენტების მხრიდან ვისმენთ, არის პოლიტიკური მანიპულაციები და ანტისახელმწიფოებრივი დამოკიდებულება“, - განაცხადა მინისტრმა.

საგარეო პოლიტიკური უწყების ხელმძღვანელმა განაცხადა, რომ საქართველო თანმიმდევრულად და ბოლომდე დაიცავს თავის ინტერესებს და აზერბაიჯანულ კოლეგებთან მიაღწევს ისეთ შეთანხმებას, რომელიც „ორივე მხარისთვის იქნება მისაღები“.

 

63
თემები:
ვნებათაღელვა დავით–გარეჯის ირგვლივ (63)
არჩევნები საქართველოში

NDI-მ საქართველოში საარჩევნო კამპანიის ხარვეზებზე მიუთითა

32
აშშ-ის ეროვნული დემოკრატიული ინსტიტუტმა (NDI) გაანალიზა საქართველოში საარჩევნო კამპანია და პროცესის ნორმალიზების მიზნით რეკომენდაციები გასცა

თბილისი, 20 ოქტომბერი – Sputnik. აშშ-ის ეროვნული დემოკრატიული ინსტიტუტმა (NDI) გამოაქვეყნა წინასაარჩევნო ბიულეტენი, რომელშიც საუბარია საარჩევნო კამპანიების აქტივობაზე, მედიის მუშაობაზე, გენდერულ თანასწორობაზე, დეზინფორმაციაზე სოციალურ ქსელებში და მასთან ბრძოლაზე,, ასევე მოყვანილია რამდენიმე რეკომენდაცია.

საპარლამენტო არჩევნები საქართველოში 31 ოქტომბერს გაიმართება. არჩევნები შერეული სისტემით გაიმართება - 120 დეპუტატი აირჩევა პარტიული სიით, 30 - ერთმანდატიან ოლქებში.

ბიულეტენი მოიცავს პერიოდს 20 აგვისტოდან 20 ოქტომბრამდე. ორგანიზაციის მონაცემებით, დოკუმენტი ეფუძნება რვა საერთაშორისო ექსპერტისგან შემდგარი ჯგუფის ანალიზს. ექსპერტები საქართველოში მყოფი ასისტენტების დახმარებით აკვირდებიან ქართული საარჩევნო ადმინისტრაციის მუშაობას, საარჩევნო კამპანიებს, გენდერულ თანასწორობას პოლიტიკაში და ნაკლებად წარმოდგენილი ჯგუფების ჩართულობას, მედიასა და დეზინფორმაციას, ასევე აკვირდებიან საარჩევნო პროცესს.

დოკუმენტის თანახმად, „საქართველოს მედია გარემო რეგიონში ერთ-ერთი ყველაზე თავისუფალი და მრავალფეროვანი, თუმცა მეტად პოლარიზებულია, რაც, შესაძლოა, მოქალაქეთა მიერ ინფორმირებული საარჩევნო გადაწყვეტილების მიღებაზე ახდენდეს გავლენას“.

მასში ასევე ნათქვამია, რომ NDI-ს მიერ 2019 წლის დეკემბერში ჩატარებული საზოგადოებრივი აზრის გამოკითხვის შედეგებით, რესპონდენტთა 69%-მა განაცხადა, რომ ახალ ამბებს ძირითადად ტელევიზიით იგებენ. იმავე გამოკითხვით, მხოლოდ 32% მიიჩნევს, რომ ქართული ტელეარხები მოვლენებს მიუკერძოებლად აშუქებენ.

„ჟურნალისტების საქმიანობაში ჩარევის შესახებ ბოლოდროინდელი ცნობები შეშფოთებას იწვევს. მათ შორისაა ისეთი ინციდენტები, როგორიცაა: საპროტესტო აქცია, რომლის გამოც პანკისში რადიო სადგური იძულებული გახდა დროებით შეეწყვიტა მაუწყებლობა; ბოლნისში ჟურნალისტის სიცოცხლის ხელყოფის მუქარა; ორი ძალადობრივი დაპირისპირება მარნეულში, რომლის დროსაც რეპორტიორები და გადამღები ჯგუფის წევრები დაშავდნენ“, - ნათქვამია განცხადებაში.

NDI -ის ბიულეტენში ასევე ნათქვამია, რომ ბოლო რამდენიმე კვირის განმავლობაში მედიაში პოლიტიკური პარტიების მონაწილეობით ეროვნულ და ადგილობრივ დებატები და გადაცემები მოეწყო. თუმცა, მედიის ბევრი წარმომადგენელი აცხადებს, რომ დებატებში „ქართული ოცნების“ მონაწილეობის უზრუნველყოფა რთული იყო. მიუხედავად იმისა, რომ „ქართულმა ოცნებამ“ „საზოგადოებრივ მაუწყებელზე“ 15 ოქტომბერს გამართულ დებატებში მონაწილეობა მიიღო, როგორც ეროვნული, ასევე რეგიონული მედია საშუალებების უმეტესობა - განსაკუთრებით კი ისინი, რომლებიც ოპოზიციურად ან ხელისუფლების მიმართ კრიტიკულად განწყობილად მიიჩნევა, აცხადებს, რომ მმართველი პარტია თავიდან არიდებდა ან სრულიად უგულებელყოფდა მათ.

NDI-თან საუბარში სხვადასხვა პარტიამ საქართველოს კომუნიკაციების ეროვნული კომისიის მიმართ უნდობლობა გამოთქვეს.

დოკუმენტში აღნიშნულია, რომ საქართველოში სოციალური ქსელები ინფორმაციის მნიშვნელოვან წყაროდ იქცა, რაც, თავის მხრივ, ონლაინ-მანიპულაციებისთვის მოწყვლადობას ზრდის.

„მიუხედავად იმისა, რომ Facebook-მა, რომელიც ქვეყანაში ყველაზე პოპულარული სოციალური ქსელია, ახლახან დეზინფორმაციის გამავრცელებელი მასშტაბური შიდა ქსელები გააუქმა, მაინც მოქმედებს სხვა გარე და შიდა ზემოქმედების სქემები. სამართლიანი არჩევნების და დემოკრატიის საერთაშორისო საზოგადოების (ISFED) ანგარიშის მიხედვით, Facebook-ს საზაფხულო საარჩევნო კამპანიის ჩასატარებლად 17 პოლიტიკური პარტია და 117 მაჟორიტარობის კანდიდატი იყენებდა. კანდიდატები იყენებენ Facebook-ს ამომრჩევლებთან პირდაპირი ურთიერთობისთვის, წინასაარჩევნო პროგრამების შესახებ ინფორმაციის გასავრცელებლად, ტელევიზიაში გაშუქებული ონლაინ-დისკუსიებისა და თავიანთი გამოსვლების ან ამომრჩევლებთან შეხვედრების ფოტოების გასაზიარებლად“, - ნათქვამია განცხადებაში.

იმავე ანგარიშის მიხედვით, ქსელში დისკრედიტირებულია როგორც მმართველი, ისე სამი ოპოზიციური პარტია. გამონაკლისია „პატრიოტთა ალიანსი“, რომელიც ამ ანონიმური გვერდების მიზანს არ წარმოადგენს.

დოკუმენტში ასევე ნათქვამია, რომ არსებული საკანონმდებლო მექანიზმების მიუხედავად, ეთნიკური და რელიგიური უმცირესობების, შშმ პირთა და ლგბტ-თემის წევრთა პოლიტიკური წარმომადგენლობა კვლავ მცირე რჩება.

დოკუმენტის თანახმად, ეთნიკური უმცირესობები (მოსახლეობის დაახლოებით 13%) საარჩევნო კამპანიაში არასაკმარისადაა წარმოდგენილი. გამონაკლისს წარმოადგენს ეთნიკური უმცირესობებით მჭიდროდ დასახლებული ორი მუნიციპალიტეტი: მარნეული-გარდაბანი და ახალქალაქი-ნინოწმინდა.

დოკუმენტში რეკომენდაციებიცაა მოყვანილი:

  • საქართველოს კომუნიკაციების ეროვნულმა კომისიამ ცენტრალურ საარჩევნო კომისიასთან ერთად უნდა გადადგას დამატებითი ნაბიჯები შესაბამისი წესების გამოსაქვეყნებლად და მედიისა და პოლიტიკური პარტიების მხრიდან მათი დაცვის უზრუნველსაყოფად;
  • ყველა ამომრჩევლებისთვის დაბალანსებული და სარწმუნო ინფორმაციის ხელმისაწვდომობის უზრუნველსაყოფად, პოლიტიკურმა პარტიებმა და კანდიდატებმა უნდა მიიღონ მონაწილეობა ყველა დებატებსა და პოლიტიკურ პროგრამებში, რათა საზოგადოებას თავისი შეხედულებები და გეგმები გააცნონ;
  • მედიასა და ჟურნალისტებს უნდა ჰქონდეთ შესაძლებლობა შეასრულონ თავისი ლეგიტიმური ფუნქციები და განახორციელონ თავიანთი უფლებები ჟურნალისტური ეთიკის შესაბამისად - ყოველგვარი ჩარევის გარეშე. შესაბამისმა ორგანოებმა დროულად უნდა გამოიძიონ ინციდენტები და დამნაშავეების ადექვატური სანქციონირება უზრუნველყონ;
  • პოლიტიკურმა პარტიებმა უნდა დანერგონ შიდა მექანიზმები კამპანიის დარჩენილ პერიოდში ქალი კანდიდატების მხარდასაჭერად;
  • კამპანიის დარჩენილ დღეებში პარტიებმა უნდა წარმოადგინონ კონკრეტული ხერხები და დეტალები ნაკლებად წარმოდგენილი ჯგუფებისათვის მნიშვნელოვანი საკითხების გადასაჭრელად;
  • პოლიტიკურმა პარტიებმა და კანდიდატებმა უნდა შეიკავონ თავი ისეთი თემების განხილვისგან (როგორიცაა მთიან ყარაბაღში კონფლიქტის ესკალაცია), რომლებსაც საზოგადოებაში უთანხმოებისა და განხეთქილების რისკი მოაქვს. ამის ნაცვლად მათ ყურადღება უნდა გაამახვილონ კამპანიაზე, რომელიც ორიენტირებულია მოქალაქეთა პრიორიტეტებზე, და უფრო მკაფიოდ ისაუბრონ ეთნიკური უმცირესობების საჭიროებებზე;
  • პოლიტიკურმა პარტიებმა უნდა ხელი მოაწერონ მრავალპარტიულ მემორანდუმს, რომელიც კამპანიების დროს ჰომოფობიურ გამონათქვამებს აკრძალავს.
32
თემები:
საქართველოს საპარლამენტო არჩევნები 2020
კორონავირუსის პანდემია. კონტროლი თბილისის მეტროში

რას სთავაზობენ არასამთავრობო ორგანიზაციები საქართველოს მთავრობას არჩევნების წინ

38
მნიშვნელოვანია საქართველოს მთავრობამ მიიღოს მაქსიმალურად გამჭვირვალე გადაწყვეტილებები კრიზისის დაძლევის კუთხით და მოსახლეობას კონკრეტული ინფორმაცია მიაწოდოს, სთავაზობენ არასამთავრობო ორგანიზაციები

თბილისი, 20 ოქტომბერი - Sputnik. თორმეტმა არასამთავრობო ორგანიზაციამ გამოაქვეყნა ერთობლივი განცხადება საქართველოში რთულ ეპიდემიოლოგიურ ვითარებასთან და მოახლოებულ საპარლამენტო არჩევნებთან დაკავშირებით.

მიმართვაში ნათქვამია, რომ ეპიდსიტუაციის გაუარესების პირობებში საარჩევნო უბნებზე მისული ამომრჩევლების რაოდენობა მოსალოდნელზე გაცილებით ნაკლები შეიძლება იყოს.

„წინასაარჩევნო პერიოდში და არჩევნების დღეს თავს ვერ ავარიდებთ ხალხმრავალ შეკრებებს. მიუხედავად იმისა, რომ მრავალჯერ გამოცხადდა რეკომენდაციები ვირუსისგან თავის დაცვასთან დაკავშირებით, სამწუხაროა, რომ ბევრი ადამიანი არც პირბადის ტარების და არც დისტანციის დაცვის წესებს  არ იცავს, რაც, ცხადია, მნიშვნელოვანი რისკის შემცველია“, - აღნიშნავენ ორგანიზაციები.

პოლიტიკური პარტიები აგრძელებენ აგიტაციას, თუმცა ზოგიერთმა მათგანმა არსებითი ცვლილებები შეიტანა და, ზოგიერთ შემთხვევაში, შეზღუდა წინასაარჩევნო აქტივობა, რათა თავიდან აირიდონ კორონავირუსის გავრცელება. შეიცვალა ე.წ. კარდაკარი, ასევე ზოგიერთი პოლიტიკური სუბიექტი ხალხმრავალი შეკრებებისგან თავს იკავებს.

„მსგავსი ეპიდემიოლოგიური ვითარება შესაძლებელია გავლენას ახდენდეს ამომრჩეველზეც, რომელიც, თავის მხრივ, თავს არიდებს წინასაარჩევნო შეკრებებში მონაწილეობას. ეპიდემიოლოგიური ვითარების გაუარესების პირობებში შესაძლებელია, მნიშვნელოვნად შემცირდეს არჩევნებზე მისულ ამომრჩეველთა რაოდენობა. ეს განსაკუთრებით მაღალი რისკის ჯგუფებში მყოფ მოქალაქეებს ეხება“, - ნათქვამია განცხადებაში.

არასამთავრობო ორგანიზაციების წარმომადგენლები აღნიშნავენ, რომ ამ მომენტისთვის კორონავირუსი უკვე რამდენიმე პარტიის ლიდერს დაუდგინდა. რაც წინასაარჩევნო პერიოდსა და კენჭისყრის დღეს მათ აქტივობაზე აისახება.

ისინი ასევე აღნიშნავენ, რომ არჩევნების დღეს დამკვირვებელ ორგანიზაციებს ძალიან გაუჭირდებათ საკარანტინე ზონებში და თვითიზოლაციაში მყოფი ათასობით ადამიანის კენჭისყრის პროცესის დაკვირვება.

„სამწუხაროა, რომ მოსახლეობის ნაწილს „კოვიდ-19”-ის არსებობის არ სჯერა ან არასერიოზულად უყურებს ამ საკითხს, შესაბამისად,  მოსალოდნელია მათ მიერ ვირუსის გავრცელების პრევენციისთვის საჭირო რეკომენდაციების უგულებელყოფა. ამ გამოწვევების გათვალისწინებით, მნიშვნელოვანია, საქართველოს მთავრობამ მაქსიმალურად გამჭვირვალე გადაწყვეტილებები მიიღოს „კოვიდ კრიზისის” დაძლევასთან დაკავშირებით და, რაც მთავარია, კონკრეტული ინფორმაცია მიაწოდოს მოსახლეობას, სიტუაციის განვითარების სხვადასხვა სცენარის პირობებში რა გადაწყვეტილების მიღებას აპირებს“, - ნათქვამია განცხადებაში.

არასამთავრობო ორგანიზაციების წარმომადგენლები სთავაზობენ უწყებათაშორისი საკოორდინაციო საბჭოს ფორმატის გაფართოებას. მათი თვალსაზრისით, მასში უნდა შევიდნენ არჩევნებთან დაკავშირებული ყველა შესაბამისი სუბიექტები, პოლიტიკური პარტიების, არასამთავრობო სექტორის და სახალხო დამცველის ჩათვლით.

„უნდა შემუშავდეს კოვიდ ინფექციის მართვის გეგმა მისი სხვადასხვა ტემპით გავრცელების სცენარების გათვალისწინებით. მნიშვნელოვანია, განისაზღვროს „კოვიდ ინფიცირებულთა” ის კრიტიკული რაოდენობა და ეპიდიმიის გავრცელების ტემპი და სიმძიმე, რომელიც  ქვეყნის მთელ ტერიტორიაზე საგანგებო მდგომარეობის გამოცხადებას, არჩევნების გადადებას და შეზღუდვების დაწესების აუცილებლობას განაპირობებს“, - ნათქვამია დოკუმენტში.

და ბოლოს, ხელმომწერები მიიჩნევენ, რომ საზოგადოებრივ ჯანმრთელობასა და ქვეყნის დემოკრატიულ განვითარებას შორის არჩევანის გაკეთება - ინტერესების დაბალანსების არასწორი გზაა.

დოკუმენტს ხელს აწერენ: „საერთაშორისო გამჭვირვალობა-საქართველო“  (TIG), „საქართველოს დემოკრატიული ინიციატივა“  (GDI), „სამართლიანი არჩევნებისა და დემოკრატიის საერთაშორისო საზოგადოება“ (ISFED), „ღია საზოგადოების ფონდი“ (OSGF), „საფარი“, „საზოგადოება და ბანკები“, „მედიის განვითარების ფონდი“ (MDF), „ადამიანის უფლებათა ცენტრი“  (HRIDC), „კვლევითი ჟურნალისტიკისა და ეკონომიკური ანალიზის ცენტრი“, „ინფორმაციის თავისუფლების განვითარების ინსტიტუტი“ (IDFI), „საქართველოს გაეროს ასოციაცია“, „ადამიანის უფლებების სწავლებისა და მონიტორინგის ცენტრი“ (EMC.)

38
თემები:
საქართველოს საპარლამენტო არჩევნები 2020
ტესტირება

COVID-19 საქართველოში: რამდენი შემთხვევა გამოვლინდა ბოლო დღე-ღამეში

23
ამ დროისათვის სულ გამოჯანმრთელდა 9003 ადამიანი, გარდაიცვალა – 172, კარანტინის რეჟიმში იმყოფება 4462, სტაციონარებში ექიმების დაკვირვების ქვეშ 3071 პაციენტია, ხოლო კოვიდ–სასტუმროებში 1772 ადამიანი იმყოფება.

თბილისი, 21 ოქტომბერი – Sputnik. საქართველოში ახალი კორონავირუსით დაავადებულთა რაოდენობა ბოლო დღე-ღამეში 1351-ით გაიზარდა და საერთო რიცხვმა 21208-ს მიაღწია, აღნიშნულია საქართველოს მთავრობის სპეციალურ ვებ-გვერდზე stopcov.ge.

ამ დროისათვის სულ გამოჯანმრთელდა 9003 ადამიანი, გარდაიცვალა – 172, კარანტინის რეჟიმში იმყოფება 4462, სტაციონარებში ექიმების დაკვირვების ქვეშ 3071 პაციენტია, ხოლო კოვიდ–სასტუმროებში 1772 ადამიანი იმყოფება.

ასევე კორონავირუსის დიაგნოზით უცხოეთიდან სამშობლოში გადმოყვანილია საქართველოს 41 მოქალაქე, მათ შორის 38 – სამხედრო მოსამსახურე.

საქართველოში კორონავირუსის პირველი შემთხვევა 26 თებერვალს დაფიქსირდა.

23
თემები:
COVID-19 საქართველოში