თბილისი, 1 ოქტომბერი – Sputnik. პოლიტიკურ პარტიებს საარჩევნო სიების წარდგენის ბოლო ვადა დღეს, 18:00 საათზე ეწურება, ნათქვამია ცენტრალური საარჩევნო კომისიის (ცესკო) ვებ-გვერდზე.
საარჩევნო სუბიექტები, რომლებიც ამ დრომდე არ წარადგენენ პარტიულ სიას, ავტომატურად მოიხსნებიან საარჩევნო მარათონიდან.
2020 წლის საპარლამენტო არჩევნებში მონაწილეობისთვის სულ 59 სუბიექტია რეგისტრირებული – 57 პარტია და 2 ბლოკი. ამ ეტაპზე უცნობია, რამდენმა მათგანმა წარადგინა ცესკოში პარტიული სია.
საპარლამენტო არჩევნები საქართველოში 31 ოქტომბერს ახალი საარჩევნო სისტემით ჩატარდება: ქვეყნის მოსახლეობა 150 დეპუტატს აირჩევს. აქედან 120-ს პარტიული სიებით და 30-ს – მაჟორიტარულ ერთმანდატიან ოლქებში.
პარტიებისთვის გამსვლელი ბარიერია 1%, ბლოკებისთვის – მინიმუმ იმდენი პროცენტი, რამდენი საარჩევნო სუბიექტიც შედის ბლოკში. ამას გარდა ამოქმედდა გენდერული კვოტები, რომლის მიხედვით, საარჩევნო სიაში ყოველი მეოთხე განსხვავებული სქესის უნდა იყოს. ხმის უფლება არჩევნებზე საქართველოს 3 501 931 მოქალაქეს აქვს როგორც ქვეყანაში, ისე საზღვარგარეთ.