ზურაბ ჯაფარიძე

ახალი სკანდალი ქართულ ოპოზიციაში: გაწყვეტს თუ არა „ნაცმოძრაობა“ შეთანხმებას

97
(განახლებულია 23:10 25.09.2020)
პარტიის ერთ-ერთმა ლიდერმა „გირჩის“ ლიდერისგან ბოდიშის მოხდა მოითხოვა და აღნიშნა, რომ ახლა „ნაცმოძრაობა“ ჯაფარიძის გადაწყვეტილებას ელოდება

თბილისი, 25 სექტემბერი - Sputnik. „ერთიანმა ნაციონალურმა მოძრაობამ“ კვლავ ეჭვქვეშ დააყენა ოპოზიციური ერთობა თბილისის მაჟორიტარულ ოლქებში - ამჯერად პარტიას არ მოეწონა „გირჩის“ ლიდერის, ზურაბ ჯაფარიძის გამონათქვამები.

საიდუმლო გამხელილია: სააკაშვილის და „ევროპელების“ კონფლიქტი კულუარებს გასცდა>>

მას შემდეგ, რაც „ნაცმოძრაობამ“, რომელიც არჩევნებში მონაწილეობს „ძალა ერთობაშია“ ბლოკის შემადგენლობაში, განაცხადა, რომ პრემიერ-მინისტრობის პოსტზე ექსპრეზიდენტ მიხეილ სააკაშვილის კანდიდატურას წამოაყენებდა, ზურაბ ჯაფარიძემ ეს გადაწყვეტილება გააკრიტიკა. სხვა პარტიების უკმაყოფილო ლიდერებისგან განსხვავებით, ის ოპოზიციის ერთიანი კანდიდატია დიდუბის ოლქში და „ნაცმოძრაობა“ მას მხარდაჭერას შეჰპირდა.

 

„ჩვენთვის არის ძალიან სამწუხარო, რომ ზოგიერთმა ოპოზიციურმა პარტიამ გადაწყვიტა, ორი ფრონტი გახსნას და ძალიან ხშირად თავს ესხმის „ერთიან ნაციონალურ მოძრაობასა“ და მის ლიდერებს. მაგრამ ჩვენ არ ვპასუხობთ თავდასხმებს მიხეილ სააკაშვილზე, ჩვენი პარტიის სხვა ლიდერებზე და გვინდა ვთქვათ, რომ არსებობს წითელი ხაზი და ეს წითელი ხაზი არის, რა თქმა უნდა, ჩვენი პარტიის ასობით ათასი მხარდამჭერი... ვერ დავხუჭავთ ამაზე თვალს, ზურაბ ჯაფარიძის გამონათქვამებზე, რომ მას არ აინტერესებს, რას ფიქრობენ ჩვენი მხარდამჭერები“, – განაცხადა სალომე სამადაშვილმა.

მან „გირჩის“ ლიდერისგან ბოდიშის მოხდა მოითხოვა და აღნიშნა, რომ ახლა „ნაცმოძრაობა“ ჯაფარიძის გადაწყვეტილება ელოდება.

თუმცა ჯაფარიძემ ნათლად მიანიშნა, რომ ბოდიშის მოხდას არ აპირებს.

„სალომე სამადაშვილმა საკითხი ისე დააყენა, თითქოს მე სიმართლის საუბარს თავი უნდა დავანებო, თუ მე მინდა „ნაციონალური მოძრაობის“ მხარდამჭერების ხმები მივიღო. ჩემთვის სიმართლე უფრო მნიშვნელოვანია, ვიდრე ნებისმიერი პარტიის ხმები, ამ პოზიციაზე ვარ დღესაც და არაფერზე ბოდიშს არ ვიხდი, რადგან ბოდიში არაფერზე მაქვს მოსახდელი. თუ რაიმე შეიძლება შეფასდეს, როგორც თავდასხმა, ეს მიხეილ სააკაშვილის მიმართვის ტონია, სადაც ის ჩვენ და სხვა ოპოზიციურ პარტიებს მოიხსენიებს, როგორც პარტიუკებსა და პოლიტიკანებს. მე მსგავსი შეურაცხმყოფელი ტერმინი არ გამომიყენებია“, – განაცხადა ზურაბ ჯაფარიძემ.

ვინ გახდება პრემიერი? ახალმა კვლევამ პარტიების გამარჯვების შანსები შეაფასა>>

თუ „ნაციონალური მოძრაობა“ ჯაფარიძის წინააღმდეგ თავის კანდიდატს წამოაყენებს, ეს გახდება პირველი ნაბიჯი ოპოზიციური ერთობის წინააღმდეგ. ახლა პარტიას უკვე ჰყავს თავისი კანდიდატი ისნის ოლქში, სადაც ყველა დანარჩენი ოპოზიციური პარტია „სტრატეგია აღმაშენებლის“ ლიდერ გიორგი ვაშაძეს უჭერს მხარს. ამასთან, ყველა ოპოზიციური პარტია ამ მომენტისთვის განაგრძობს თბილისის ორ ოლქში - სამგორსა და გლდანში - „ნაცმოძრაობის“ წევრების მხარდაჭერას.

97
თემები:
საქართველოს საპარლამენტო არჩევნები 2020 (257)
დაპირისპირება მარნეულში

ISFED: სარჩევნო გარემოს მთავარ გამოწვევად ზეწოლისა და მუქარის ფაქტები რჩება

9
(განახლებულია 14:22 22.10.2020)
ანგარიშის მიხედვით, საარჩევნო კამპანიაში საარჩევნო კომისიის წევრების, სასულიერო პირებისა და საჯარო მოხელეების ჩართულობის შემთხვევებიც გამოვლინდა, რასაც კანონი კრძალავს

თბილისი, 21 ოქტომბერი - Sputnik. არასამთავრობო ორგანიზაციამ „სამართლიანი არჩევნებისა და დემოკრატიის საერთაშორისო საზოგადოება“ (ISFED) წინასაარჩევნო მონიტორინგის შესახებ მეხუთე შუალედური ანგარიში გამოაქვეყნა.

გრძელვადიანი სადამკვირვებლო მისიის ფარგლებში ISFED წინასაარჩევნო პროცესის მონიტორინგს ახორციელებს როგორც თბილისში, ისე რეგიონებში. საპარლამენტო არჩევნების მეხუთე შუალედური ანგარიში ფარავს 29 სექტემბრიდან 21 ოქტომბრის ჩათვლით პერიოდში გამოვლენილ დარღვევებს.

როგორც ანგარიშშია აღნიშნული, წინასაარჩევნო კამპანიის გააქტიურების პერიოდში დარღვევების რაოდენობა მნიშვნელოვნად გაიზარდა. კერძოდ, საანგარიშო პერიოდში გამოვლინდა:

  • სავარაუდოდ, პოლიტიკური ნიშნით ფიზიკური ძალადობის 9 ფაქტი;
  • სავარაუდოდ, პოლიტიკური ნიშნით განხორციელებული ზეწოლა/მუქარის 37 ფაქტი;
  • მედიაზე ზეწოლის 2 ფაქტი;
  • დამკვირვებლის საქმიანობისთვის ხელის შეშლის 1 ფაქტი;
  • ამომრჩეველთა სავარაუდო მოსყიდვის 10 ფაქტი;
  • სავარაუდოდ, პოლიტიკური ნიშნით სამსახურიდან გათავისუფლების 3 ფაქტი;
  • ადმინისტრაციული რესურსის სავარაუდო გამოყენების 18 ფაქტი;
  • არაუფლებამისილი პირების საარჩევნო კამპანიაში მონაწილეობის 16 ფაქტი;
  • კამპანიაში რელიგიური ორგანიზაციების მონაწილეობის 3 ფაქტი;
  • მასშტაბური საქველმოქმედო პროექტების 2 ფაქტი;
  • სააგიტაციო მასალების დაზიანების შემთხვევები მთელ საქართველოში.

ორგანიზაციის შეფასებით, საარჩევნო გარემოს მთავარ გამოწვევად რჩება ამომრჩევლებზე, აქტივისტებსა და ოპოზიციონერ პოლიტიკოსებზე განხორციელებული ზეწოლის, მუქარისა და ხელის შეშლის ფაქტები.

როგორც ანგარიშშია აღნიშნული, ასევე გამოვლინდა საარჩევნო კამპანიაში საარჩევნო კომისიის წევრების, სასულიერო პირებისა და საჯარო მოხელეების ჩართულობის შემთხვევებიც, რაც კანონით აკრძალულია. ჩართულობა გამოიხატებოდა მმართველი პარტიის სასარგებლოდ როგორც წინასაარჩევნო შეხვედრებზე დასწრებაში, ისე სოციალურ ქსელში „ქართული ოცნების“ სარეკლამო ვიდეოების გავრცელებაში.

ISFED შეშფოთებას გამოთქვამს ასევე სკოლის პერსონალის, დირექტორებისა და მასწავლებლების პოლიტიკურ კამპანიაში ჩართვისა და ზეწოლის ბერკეტად სამსახურის შენარჩუნების გამოყენებას.

„სამართლიანი არჩევნები“ ცენტრალურ და ადგილობრივ ხელისუფლებას მიმართავს რეკომენდაციებით, რომ  არ დაუშვას მედიაზე და ჟურნალისტებზე ზეწოლა და დროულად გამოიძიოს მათზე განხორციელებული ზეწოლის შემთხვევები. ასევე დროულად და ეფექტურად გამოიძოს პოლიტიკური პარტიების აქტივისტებისა და მხარდამჭერების მიმართ განხორციელებული ზეწოლისა და მუქარის, ასევე პოლიტიკური პარტიების კამპანიისთვის ხელის შეშლის ფაქტები. საჯარო მოხელეებმა და სკოლებისა და საბავშვო ბაღების თანამშრომლებმა სამუშაო საათებში თავი უნდა შეიკავონ პოლიტიკური პარტიებისა და კანდიდატების წინასაარჩევნო ღონისძიებებსა და აგიტაციაში მონაწილეობისაგან, აღნიშნავენ ორგანიზაციაში.

ამასთან, ორგანიზაცია რეკომენდაციებით მიმართავს პოლიტიკურ პარტიებსაც,   თავი შეიკავონ და არ დაუშვან ფიზიკური ძალადობა, არ გამოიყენონ ამომრჩევლებთან ურთიერთობის იმგვარი ფორმა, რაც შეიცავს ამომრჩევლის მოსყიდვის ნიშნებს, ასევე არ დაუშვან წინასაარჩევნო კამპანიაში მათ სასარგებლოდ არაუფლებამოსილი პირების ჩართვა.

საქართველოში საპარლამენტო არჩევნები 31 ოქტომბერს არის დანიშნული. პარალელურად ამავე დღეს აჭარის უმაღლესი საბჭოს და რამდენიმე მუნიციპალიტეტში მერებისა და საკრებულოს დეპუტატების არჩევნები ჩატარდება. 

9
თემები:
საქართველოს საპარლამენტო არჩევნები 2020 (257)
სპეცოპრაცია ზუგდიდში

„კრიმინალური ანარქია“ ოპოზიციონერები ზუგდიდში მძევლების აყვანაზე

65
(განახლებულია 13:14 22.10.2020)
მმართველ პარტიაში, თავის მხრივ, ოპოზიციის წარმომადგენელთა განცხადებებს პოლიტიკური მაროდიორობა უწოდეს.

თბილისი, 21 ოქტომბერი – Sputnik. კრიმინალური ანარქია და სრული უკანონობა – ასე შეაფასეს ქართველმა ოპოზიციონერმა პოლიტიკოსებმა ქვეყანაში არსებული ვითარება ზუგდიდში მძევლების აყვანის ფონზე.

სპეცოპერაცია ზუგდიდში: კობახიძემ მედიასაშუალებები გააკრიტიკა >>

ავტომატითა და ხელყუმბარით შეიარაღებულმა მამაკაცმა ოთხშაბათს ზუგდიდის ცენტრში, „საქართველოს ბანკის“ ერთ-ერთ ფილიალში მძევლები აიყვანა. დამნაშავე ნახევარ მილიონ დოლარსა და ვერტმფრენს ითხოვდა.

„დღევანდელი სიტუაცია საქართველოში, ბუნებრივია, ხელს უწყობს ასეთ სავალალო ფაქტებს. იმედი მაქვს, ისინი ტრაგიკულად არ დასრულდება. თუ ასე გაგრძელდება, ასეთი ფაქტი, რასაკვირველია, მეტი იქნება. ბუნებრივია, რომ გასაჭირი ადამიანებს უცნაური ქმედებებისკენ უბიძგებს, მაგრამ მომხდარს გამართლება არ აქვს“, – აღნიშნა პარტია „ერთიანი საქართველო - დემოკრატიული მოძრაობის“ ლიდერმა ნინო ბურჯანაძემ.

როგორც პოლიტიკოსმა დასძინა, მას იმედი აქვს, რომ სპეცოპერაცია უმტკივნეულოდ დასრულდება და მძევლების ნათესავებსა და ახლობლებს მხარდაჭერა გამოუცხადა.

„ქალაქის ცენტრში, ყველაზე ხალხმრავალ ადგილზე, სადაც ყველაზე მეტი სამთავრობო უწყებაა, სადაც ძალოვანი სტრუქტურები არიან, შესაძლებელი გახდა ყაჩაღობა ისე, რომ პოლიცია მოსახლეობის დასაცავად ვერაფერს აკეთებს. ეს კრიმინალური ანარქიის მთავარი პრობლემაა“, – განუცხადა ჟურნალისტებს „ერთიანი ნაციონალური მოძრაობის“ წევრმა ნუგზარ წიკლაურმა.

პარტია „ლელოს“ ერთ-ერთი ლიდერის ბადრი ჯაფარიძის სიტყვებით, უპირველეს ყოვლისა, ახლა საჭიროა მძევლების უსაფრთხოებაზე ფიქრი. მან განაცხადა ასევე, რომ ქვეყანაში სრული უკანონობა სუფევს, როდესაც მთავრობასთან კავშირები დამნაშავეებს სასჯელის თავიდან აცილებაში ეხმარება. ანალოგიური აზრისაა პარლამენტის ექს-სპიკერი, ჯაფარიძის თანაპარტიელი დავით უსუფაშვილი.

„მთავარი პრიორიტეტია – მძევლები გათავისუფლდნენ უვნებლები შენობიდან. ასევე პრიორიტეტულია დამნაშავის დაკავება, რათა მან პასუხი აგოს კანონის წინაშე. მაგრამ მთლიანობაში პრობლემა ისაა, რომ ქვეყანაში საკმაოდ სახიფათო კრიმინალური ვითარებაა. ასე ხდება ყოველთვის, როდესაც დამნაშავეები ხედავენ, რომ პროკურორები და პოლიციელები და სხვა თანამდებობის პირები პოლიტპატიმრების დევნით არიან დაკავებული“, – განაცხადა უსუფაშვილმა.

თავის მხრივ, მმართველ პარტიაში პოლიტიკური მაროდიორობა უწოდეს ოპოზიციის წარმომადგენელთა განცხადებებს ზუგდიდში ბანკის ფილიალში მძევლების აყვანასთან დაკავშირებით.

ოპოზიციური პარტია „ევროპული საქართველოს“ ლიდერი გიგი უგულავა შემთხვევის ადგილზე მივიდა და მძევლების ჩანაცვლება შესთავაზა. გარდა ამისა, ზოგიერთმა ოპოზიციონერმა ხელისუფლება ქვეყანაში კრიმინალური სიტუაციის გაუარესებაში დაადანაშაულა.

„სამწუხარო და შემაშფოთებელია, რომ კონკრეტულმა უპასუხისმგებლო პოლიტიკოსებმა სცადეს ასეთი ვითარებაც კი საკუთარი პოლიტიკური ქულების დასაწერად გამოეყენებინათ. ეს არის პოლიტიკური მაროდიორობა, რასაც ჩვენ მათგან, სამწუხაროდ, დიდი ხანია მიჩვეულები ვართ“, – განაცხადა „ქართული ოცნების“ საარჩევნო შტაბის ხელმძღვანელმა და პარტიის აღმასრულებელმა მდივანმა ირაკლი კობახიძემ.

„მძევლების დახოცვას დავიწყებ 2 საათის შემდეგ“ – თავდამსხმელის ულტიმატუმი >>

მან საგანგაშო და გამაოგნებელი უწოდა ასევე მასმედიის მოქმედებას, „როდესაც მედიასაშუალების წარმომადგენელი პირდაპირ ეთერში აწარმოებს მოლაპარაკებებს ამ ტიპის დანაშაულის ჩამდენ პირთან“.

65
თემები:
ზუგდიდში შეიარაღებულმა პირმა მძევლები აიყვანა
კახა კალაძე და ანუკი არეშიძე

ანუკი არეშიძის ახალგაზრდა მშობლები - დიზაინერი რომანტიულ ფოტოს აქვეყნებს

0
(განახლებულია 13:40 22.10.2020)
ცნობილ დიზაინერს ახალგაზრდა მშობლები ჰყავს. ნახეთ როგორ გამოიყურებიან ანუკი არეშიძის დედ-მამა კახეთის სახლის ფონზე

ცნობილი დიზაინერი სოციალურ ქსელში აქტიურობას არ წყვეტს. მისი კონტენტი საინტერესო და შემოქმედებითი თემატიკითაა შევსებული. ცოტა ხნის წინ დიზაინერმა „ინსტაგრამის“ „სთორიში“ მშობლების რომანტიული ფოტო გამოაქვეყნა.

ცნობილ დიზაინერს ანუკი არეშიძეს ახალგაზრდა მშობლები ჰყავს. მისი დედა ნინო ჭუმბურიძეა, მამა - ბადრი არეშიძე. ანუკის საზოგადოებისთვის ცნობილი ძმაც ჰყავს. გიორგი არეშიძე წლების წინ თბილისის ახალგაზრდულ საქმეთა სამსახურს ხელმძღვანელობდა, დედა კი ცნობილი ექიმი-ენდოკრინოლოგია.

View this post on Instagram

Mom,Dad and My Son Disneyland August ,2018

A post shared by Anouki Areshidze (@anoukigoldvibes) on

აჭარაში კორონავირუსის გავრცელების პერიოდში ანუკი არეშიძის დედის ირგვლივ ხმაური ატყდა. ამბობდნენ, რომ მედპერსონალის შეხვედრის დროს ანუკი არეშიძის დედა ერთ-ერთ სასტუმროში იმყოფებოდა, თუმცა კორონავირუსის დაფიქსირებისა და სასტუმროს ჩაკეტვის შემდეგ ის სასტუმროდან გამოიყვანეს. ეს ჭორი ჭორადვე დარჩა. ანუკიმ კი მედიასთან საუბარში არაერთხელ აღნიშნა, რომ მისი მშობლების სიყვარული მისი ცხოვრების ყველაზე დიდი მაგალითია.

View this post on Instagram

Grandchild and Grandfather ,Italy 2017

A post shared by Anouki Areshidze (@anoukigoldvibes) on

მიუხედავად იმისა, რომ ანუკი არეშიძის მშობლები მედიასთან კომუნიკაციას თავს არიდებენ, ანუკი მათ სურათებს ხშირად აქვეყნებს. პანდემიამდე სხვადასხვა ქვეყანაში ბადრი და ნინო სიძესთან და ქალიშვილთან ერთად ხშირად მოგზაურობდნენ. ახალგაზრდა ბაბუას განსაკუთრებული ურთიერთობა ლევან კალაძესთან, კახისა და ანუკის უფროს ვაჟთან ჩამოუყალიბდა.

უახლესი სურათი ანუკიმ აგარაკიდან გამოაქვეყნა. ყველასათვის ცნობილია, რომ დიზაინერის მამას ძალიან უყვარს მიწაზე მუშაობა. ყველას ახსოვს ცნობილი დიზაინერის პოსტი, სადაც წერდა, რომ მამამისმა ბანანი მოიყვანა. ანუკი არეშიძე მამის ჰობის დაეუფლა და სოფელში ჩასვლისთანავე მისი სოციალური ქსელი ფერმერობის ამსახველი ფოტოებით აჭრელდა. „მამაჩემმა ბანანის მოსავალი მიიღო. მოსავალი შეიძლება დიდი სიტყვაა ამ პაწაწინა არსებებისთვის, მაგრამ ეს თბილისში მოხდა და თან ასეთი რაოდენობა დიდი შრომის ფონზე. 8 წელია ამ უგემრიელეს ხეს უვლის“, – წერდა ანუკი „ფეისბუქის“ პირად გვერდზე.

0
თემები:
სელებრითების ცხოვრება