ქართული ოცნების ოფისი

„ქართულმა ოცნებამ“ პოლიტიკური პარტიების ქცევის კოდექსს ხელი მოაწერა

78
(განახლებულია 19:15 14.09.2020)
ცესკო მოუწოდებს ყველა პოლიტიკურ პარტიას და პოლიტიკურ გაერთიანებას, შეუერთდეს აღნიშნულ კოდექსს და აიღოს პასუხისმგებლობა მის შესრულებაზე.

თბილისი, 14 სექტემბერი — Sputnik. პოლიტიკური გაერთიანება „ქართული ოცნება – დემოკრატიული საქართველო“ უერთდება პოლიტიკური პარტიების ქცევის კოდექსს, განაცხადა საქართველოს პარლამენტის ვიცე-სპიკერმა მამუკა მდინარაძემ დღეს გამართულ ბრიფინგზე. 

აღნიშნულ დოკუმენტს ხელი უკვე მოაწერა პარტიის აღმასრულებელმა მდივანმა და საარჩევნო შტაბის ხელმძღვანელმა ირაკლი კობახიძემ.

საქართველოს ცენტრალურმა საარჩევნო კომისიამ (ცესკო) საპარლამენტო არჩევნების წინ შეიმუშავა პოლიტიკური პარტიების ქცევის კოდექსი – ეს არის ნებაყოფლობითი ეთიკის ნორმები, რომელთა მიზანია დემოკრატიული ღირებულებებისა და ძირითადი თავისუფლებების დაცვა.

მდინარაძის თქმით, ქცევის კოდექსი ეხება ფეიკ-ნიუსების გავრცელების პრევენციას, გამჭვირვალე წინასაარჩევნო გარემოს, არჩევნების უმაღლესი სტანდარტით ჩატარების გარანტიებს და არჩევნებთან დაკავშირებულ სხვა მნიშვნელოვან თემებს.

„ჩვენ ჩართული ვიყავით დოკუმენტის შემუშავებაში და გვქონდა რამდენიმე შენიშვნაც. შენიშვნები შეეხებოდა პოლიტიკური სუბიექტების მხრიდან ცილისწამებისა და დანაშაულის დაბრალების თაობაზე ყალბი ინფორმაციის გავრცელებაზე უარის თქმას და მასზე რეაგირებას. ასევე ამომრჩევლის კონტროლის, მათი აგიტაციის მიზნით საარჩევნო უბანთან შეყოვნებას და შემოხაზული ბიულეტენის ფოტოგადაღების ან ხმის მიცემის კაბინიდან კონვერტში განთავსების გარეშე გამოტანის გამორიცხვას“, – განაცხადა მდინარაძემ.

მისი თქმით, ოპოზიციის წარმომადგენლები თავიდან უარს აცხადებდნენ აღნიშნულ დოკუმენტზე ხელმოწერაზე, თუმცა დასავლელი პარტნიორების სამკვირიანი მუშაობის შედეგად მათთან შედგა შეთანხმება და, შესაბამისად, დოკუმენტზე მათი ხელმოწერაც დაფიქსირდება. 

პოლიტიკური პარტიების ქცევის კოდექსი

საქართველოს საარჩევნო კომისიის მიერ შემუშავებული ქცევის კოდექსი მოწინავე საერთაშორისო გამოცდილებას ემყარება, რომელიც საყოველთაოდ მიღებულ საერთაშორისო სტანდარტებს შეესაბამება.

დოკუმენტი ეფუძნება საყოველთაოდ აღიარებულ საარჩევნო ეთიკის პრინციპებს და მოიცავს სამართლიანი და ღირსეული კონკურენციის შესახებ ნორმებს, ამომრჩეველთა და მონაწილე პარტიათა უფლებების აღიარებას და პატივისცემას. 

კოდექსის მიხედვით, რომელიც ოთხი თავისგან შედგება, პარტიები აღიარებენ კანონის უზენაესობას, იმოქმედებენ მხოლოდ და მხოლოდ საქართველოს კონსტიტუციის თანახმად, პატივს სცემენ ყველა პოლიტიკურ პარტიას, კანდიდატსა და ამომრჩეველთა უფლებებს, არ გამოიყენებენ სიძულვილის, ქსენოფობიის ან მუქარის ენას, ყველაფერს გააკეთებენ მშვიდი საარჩევნო გარემოს უზრუნველსაყოფად.

არჩევნებში მონაწილე საარჩევნო სუბიექტებმა უარი უნდა თქვან პირად შეურაცხყოფაზე, პროვოკაციებზე, კონკურენტების წინასაარჩევნო კამპანიაში და მათ აგიტაციაში ჩარევაზე, ასევე ცრუ ინფორმაციის განზრახ გამოყენებაზე ოპონენტების დისკრედიტაციის მიზნით. ასევე საარჩევნო პროცესში სარგებლის მიღების მიზნით მათ არ უნდა გამოიყენონ ადმინისტრაციული რესურსი.

ცესკო მოუწოდებს ყველა პოლიტიკურ პარტიას და პოლიტიკურ გაერთიანებას, შეუერთდეს აღნიშნულ კოდექსს და აიღოს პასუხისმგებლობა მის შესრულებაზე.

საქართველოში საპარლამენტო არჩევნები 31 ოქტომბერს არის დანიშნული. საქართველოს მოქალაქეები 150 დეპუტატს აირჩევენ: 120-ს პარტიული სიებით, ხოლო 30-ს ერთმანდატიან საარჩევნო ოლქებში კენჭისყრის შედეგებით. პარტიებისთვის გამსვლელი ბარიერი 1%-ს შეადგენს. არჩევნებში მონაწილეობის მისაღებად ცესკოში რეგისტრაცია 66-მა პარტიამ გაიარა. ხმის მიცემის უფლება აქვს საქართველოს 3 501 931 მოქალაქეს როგორც ქვეყანაში, ისე მის საზღვრებს გარეთ.

78
თემები:
საქართველოს საპარლამენტო არჩევნები 2020 (136)
ცესკო

ცესკომ საპარლამენტო არჩევნებისთვის პირველი დამკვირვებლები დაარეგისტრირა

53
(განახლებულია 00:14 19.09.2020)
ამ დროისათვის საერთაშორისო დამკვირვებლის სტატუსით რეგისტრაცია ცესკოში ექვსმა ორგანიზაციამ გაიარა.

თბილისი, 19 სექტემბერი - Sputnik. ცენტრალურმა საარჩევნო კომისიამ 18 სექტემბრისთვის დაარეგისტრირა ექვსი საერთაშორისო და 49 ადგილობრივი ორგანიზაცია, რომლებიც არჩევნების მსვლელობას დააკვირდებიან, ნათქვამი ცესკოს ვებგვერდზე გამოქვეყნებულ მასალებში.

საქართველოში 31 ოქტომბერს საპარლამენტო არჩევნები გაიმართება. პარალელურად ამ დღეს ჩატარდება არჩევნები აჭარის უმაღლეს საბჭოში და რამდენიმე მუნიციპალიტეტში მერების და საკრებულოს დეპუტატების არჩევნები.

ამ ეტაპზე სადამკვირვებლო ორგანიზაციებს მხოლოდ განაცხადები შეაქვთ. ორგანიზაციების და დამკვირვებლების ზუსტი რაოდენობა ცნობილი არჩევნებამდე ერთი კვირით გახდება.

ადრე საქართველოს ხელისუფლებაში აცხადებდნენ, რომ კორონავირუსის პანდემიის და ჩაკეტილი საზღვრების მიუხედავად, ქვეყანაში საერთაშორისო დამკვირვებლების უპრეცედენტო რაოდენობა ჩამოვა.

ამ დროისათვის საერთაშორისო დამკვირვებლის სტატუსით რეგისტრაცია გაიარეს: „ადამიანის უფლებათა საერთაშორისო საზოგადოება" (ISHR), „საერთაშორისო რესპუბლიკური ინსტიტუტი" (IRI), „საერთაშორისო საქმეთა ეროვნულ-დემოკრატიული ინსტიტუტი" (NDI), „საარჩევნო სისტემების საერთაშორისო ფონდი" (IFES), „ინიციატივა დიალოგისა და დემოკრატიისთვის" (SILBA) და „ამერიკის შეერთებული შტატების საელჩო საქართველოში".

ვის სურს პარლამენტში მოხვედრა: ცესკომ პარტიების საბოლოო სია გამოაქვეყნა >>

დამკვირვებლები დააკვირდებიან საარჩევნო უბნების მომზადების პროცესს, ბიულეტენების ბეჭდვას, კენჭისყრასა და ხმების დათვლას. არჩევნების დასრულების შემდეგ ისინი გამოაქვეყნებენ თავიანთ დასკვნებს არჩევნებზე მომხდარ დარღვევებთან დაკავშირებით.

53
თემები:
საქართველოს საპარლამენტო არჩევნები 2020 (136)
წინასაარჩევნო ბანერი

არჩევნები 2020: „მემარცხენე ალიანსი“ „პატრიოტთა ალიანსს" შეუერთდა

139
2016 წლის საპარლამენტო არჩევნებზე საქართველოს პატრიოტთა ალიანსმა ხმების ზუსტად 5% მიიღო და გახდა მესამე საპარლამენტო პარტია

თბილისი, 18 სექტემბერი - Sputnik. პოლიტიკურმა გაერთიანება "მემარცხენე ალიანსმა" არჩევნებიდან საკუთარი კანდიდატურა მოხსნა და „საქართველოს პატრიოტთა ალიანსს" შეუერთდა. ამის  შესახებ განცხადება „მემარცხენე ალიანსის" ლიდერებმა დღეს გამართულ ბრიფინგზე გააკეთეს.

როგორც „მემარცხენე ალიანსის" ერთ-ერთმა ლიდერმა, კახა ძაგანიამ განაცხადა, მართალია, ისინი დამოუკიდებლად დარეგისტრირდნენ ცენტრალურ საარჩევნო კომისიაში, თუმცა მოგვიანებით გადაწყვიტეს, დამოუკიდებლად აღარ მიეღოთ   არჩევნებში მონაწილეობა.

„მას შემდეგ, როდესაც დავრწმუნდით, რომ საქართველოს ტერიტორიული აღდგენის მხოლოდ ერთადერთი საშუალება აქვს „პატრიოტთა ალიანსს", როდესაც დავრწმუნდით, რომ ეკონომიკური მძიმე მდგომარეობის გამოსწორების მხოლოდ ერთადერთი საშუალება და პროგრამა გააჩნია „პატრიოტთა ალიანსს", პოლიტიკური გაერთიანება "მემარცხენე ალიანსი" დამოუკიდებლად აღარ მიიღებს მონაწილეობას არჩევნებში. ვხსნით ჩვენს კანდიდატურას და ვუერთდებით "პატრიოტთა ალიანსს“, - განაცხადა ძაგანიამ.

თავის მხრივ, „პატრიოტთა ალიანსის“ გენერალურმა მდივანმა ირმა ინაშვილმა აღნიშნა, რომ „მემარცხენე ალიანსის" ლიდერებს პოლიტიკაში დიდი გამოცდილება აქვთ და საარჩევნო ოლქებში ისინი მაჟორიტარ დეპუტატებად იქნებიან წარმოდგენილნი.

„ეს არის მებრძოლი ხალხი, პატიოსანი ხალხი, გამოცდილი პოლიტიკაში, რომლებსაც გავლილი აქვთ ურთულესი გზა და აქვთ ძალზე დიდი გამოცდილება და ჩვენ, რა თქმა უნდა, ვართ მოხარული, რომ გავძლიერდით, შემოგვიერთდა "მემარცხენე ალიანსი“, - განაცხადა ინაშვილმა.

2016 წლის საპარლამენტო არჩევნებზე საქართველოს პატრიოტთა ალიანსმა ხმების ზუსტად 5% მიიღო და გახდა მესამე საპარლამენტო პარტია - „ქართული ოცნებისა“ და „ერთიანი ნაციონალური მოძრაობის“ შემდეგ. 

საქართველოში საპარლამენტო არჩევნები 31 ოქტომბერს არის დანიშნული. ქვეყნის მოქალაქეები 150 დეპუტატს აირჩევენ: 120-ს პარტიული სიებით, ხოლო 30-ს ერთმანდატიან საარჩევნო ოლქებში კენჭისყრის შედეგებით. პარტიებისთვის გამსვლელი ბარიერი 1%-ს შეადგენს. ხმის მიცემის უფლება აქვს საქართველოს 3 501 931 მოქალაქეს როგორც ქვეყანაში, ისე მის საზღვრებს გარეთ.

 

 

139
თემები:
საქართველოს საპარლამენტო არჩევნები 2020 (136)
ქალაქი ზუგდიდი

ზუგდიდში თანამედროვე ხელოვნების ფესტივალი იხსნება

0
(განახლებულია 15:43 19.09.2020)
ფესტივალის მიზნად ისახავს რეგიონებში თანამედროვე ქართული ხელოვნების განვითარებას და კულტურული ცხოვრების გააქტიურებას

თბილისი, 19 სექტემბერი - Sputnik. ცნობილი ქართველი პოეტები, მწერლები, რეჟისორები და მუსიკოსები მიიღებენ მონაწილეობას თანამედროვე ხელოვნების ფესტივალში F5, რომელიც შაბათს, 19 სექტემბერს ზუგდიდში იხსნება.

ფესტივალი ორდღიანია და ბოტანიკურ ბაღში გაიმართება. ღონისძიება, რომელიც ტრადიციულად მოიცავს ლიტერატურულ და მუსიკალურ პროგრამებს, ზუგდიდში უკვე მესამედ იმართება. მისი ორგანიზატორებია ორი ახალგაზრდა ქართველი პოეტი, ნიკა ლაშხია და გიორგი შონია. ფესტივალის მხარდამჭერია განათლების, მეცნიერების, კულტურისა და სპორტის სამინისტრო და მწერალთა სახლი.

ფესტივალი მიზნად ისახავს თანამედროვე ქართული ხელოვნების პოპულარიზაციას და რეგიონების კულტურულ ცხოვრებაში ჩაბმას.

წელს ფესტივალზე პირველად გაიმართება დოკუმენტური კინოს სექცია, რომელსაც ეროვნული კინოცენტრი წარადგენს. ფესტივალის ლიტერატურულ ნაწილში წელს მონაწილეობას მიიღებენ ისეთი ლიტერატორები, როგორიცაა ზურაბ ქარუმიძე, თამთა მელაშვილი, დათო ბარბაქაძე, შაკო ბაკურაძე, ცოტნე ცხვედიანი, ქეთი ქანთარია და სხვ.

ფესტივალის მონაწილეები შეეხებიან ისეთ თემებს, როგორიცაა ქალის ხმა ქართულ ლიტერატურაში, ქართული თარგმანის დღევანდელი პრობლემატიკა, ქალაქები და წმინდანები.

მუსიკალურ პროგრამაში წარდგება ჯგუფი „წერილი“ და ქანთრი-მუსიკოსი შოთა ადამაშვილი. ფესტივალზე დასწრება თავისუფალია.

0
თემები:
საქართველო და კულტურა