საქართველოს და დიდი ბრიტანეთის დროშები

საქართველოში დიდი ბრიტანეთის ელჩმა ზალკალიანს რწმუნებათა სიგელების ასლები გადასცა

123
ბრიტანელმა დიპლომატმა გამოხატა მზადყოფნა, ახალ პოსტზე მუშაობისას მაქსიმალურად შეუწყოს ხელი ქართულ-ბრიტანული ურთიერთობების შემდგომ გაღრმავებას.

თბილისი, 31 აგვისტო – Sputnik. საქართველოს საგარეო საქმეთა მინისტრმა დავით ზალკალიანმა გაცნობითი შეხვედრა გამართა საქართველოში გაერთიანებული სამეფოს ახლადდანიშნულ ელჩთან მარკ კლეიტონთან, რომელმაც მას რწმუნებათა სიგელების ასლები გადასცა, იუწყება საგარეო საქმეთა სამინისტროს პრესსამსახური.

ზალკალიანმა ბრიტანელ დიპლომატს საქართველოში დიპლომატიური მისიის დაწყება მიულოცა და მომავალ საქმიანობაში წარმატება უსურვა.

შეხვედრაზე მხარეებმა ხაზი გაუსვეს „უორდროპის სტრატეგიული დიალოგის“ მნიშვნელობას, რომელიც მოიცავს პოლიტიკურ, თავდაცვით და უსაფრთხოების ასპექტებს, ასევე სავაჭრო-ეკონომიკური და საერთაშორისო ურთიერთობების ფართო სპექტრს.

მინისტრმა აღნიშნა დიდი ბრიტანეთის განსაკუთრებული მხარდაჭერა საქართველოს მიმართ COVID-19-ის პანდემიის პერიოდში. ზალკალიანმა ასევე აღნიშნა, რომ პოსტპანდემიურ პერიოდში ეკონომიკური ურთიერთობები და ხალხთა შორის კავშირები უფრო მეტად გააქტიურდა.

ბრიტანელმა დიპლომატმა თავის მხრივ გამოხატა მზადყოფნა, ახალ პოსტზე მუშაობისას მაქსიმალურად შეუწყოს ხელი ქართულ-ბრიტანული ურთიერთობების შემდგომ გაღრმავებას. ახლადდანიშნული ელჩი მიესალმება იმ ეფექტურ ნაბიჯებს, რომლებიც საქართველოს მთავრობის მიერ კორონავირუსთან ბრძოლაში გადაიდგა.

დიდი ბრიტანეთის ელჩმა ჯასტინ მაკენზი სმიტმა თავისი დიპლომატიური მისია მიმდინარე წლის ივლისში დაასრულა. მაკენზიმ დიდი ბრიტანეთის ელჩის თანამდებობა საქართველოში 2016 წლის აგვისტოში დაიკავა.

საქართველომ და დიდმა ბრიტანეთმა დიპლომატიური ურთიერთობები 1992 წლის 27 აპრილს დაამყარეს. მხარეები რეგულარულად მართავენ პოლიტიკურ კონსულტაციებს, ასევე თანამშრომლობენ თავდაცვის, ვაჭრობის, განათლებისა და კულტურის სფეროებში.

123
თემები:
საქართველოს საგარეო პოლიტიკა (247)
ეუთოს დროშა

საქართველოში არჩევნებზე ეუთოს 350 დამკვირვებელი ჩამოვა

19
(განახლებულია 20:07 26.09.2020)
დამკვირვებლები დააკვირდებიან არჩევნების ყველა ასპექტს - დაწყებული კანდიდატების და პარტიების რეგისტრაციით, დამთავრებული არჩევნების და წინასაარჩევნო კამპანიის გაშუქებით

თბილისი, 26 სექტემბერი – Sputnik. საქართველოში კენჭისყრისა და ხმების დათვლის პროცესის დაკვირვებისთვის ეუთოს დემოკრატიული ინსტიტუტებისა და ადამიანის უფლებების ოფისიდან (OSCE/ODIHR) 350 დამკვირვებელი ჩამოვა, ნათქვამია ორგანიზაციის ვებგვერდზე.

„ოდირის“ სადამკვირვებლო მისიის ანგარიში საქართველოს საპარლამენტო არჩევნების შეფასებაში წამყვანი იქნება. ქვეყნის საერთაშორისო პარტნიორებმა უკვე განაცხადეს, რომ არჩევნები იქნება აღიარებული მისიის ანგარიშის საფუძველზე, თუ ის არ გამოავლენს სერიოზულ დარღვევებს არჩევნების და ხმების დათვლის პროცესში.

ეუთოს მონაცემებით, დემოკრატიული ინსტიტუტებისა და ადამიანის უფლებების ოფისი თავის დამკვირვებლებს ორ ეტაპად გამოგზავნის. პირველი ჯგუფი, რომელშიც 27 დამკვირვებელი და 13 ექსპერტი შევა, ქვეყანაში უკვე 30 სექტემბერს ჩამოვა. ისინი საქართველოში არჩევნების შედეგების გამოცხადებამდე დარჩებიან, ხოლო კიდევ 350 დამკვირვებელი უშუალოდ არჩევნების დღისთვის ჩამოვა.

„მისია შეაფასებს არჩევნების შესაბამისობას ეუთოს და სხვა საერთაშორისო პარტნიორების წინაშე აღებულ ვალდებულებებთან, ასევე დემოკრატიული არჩევნების საერთაშორისო სტანდარტების და ადგილობრივი კანონმდებლობის მიმართ“, - აღნიშნულია განცხადებაში.

„დამკვირვებლები დააკვირდებიან არჩევნების ყველა ასპექტს - კანდიდატების და პარტიების რეგისტრაციას, წინასაარჩევნო კამპანიას, საარჩევნო ადმინისტრაციის მუშაობას, საკანონმდებლო ნორმების შესრულებას, საარჩევნო დავების გადაწყვეტას და არჩევნების და წინასაარჩევნო კამპანიის გაშუქებას მედიაში“, - აღნიშნულია განცხადებაში.

კენჭისყრის დღეს მისია შეაფასებს ყველა პროცედურას, დაწყებული საარჩევნო უბნების გახსნით, დამთავრებული შედეგების შეჯამებით. დამკვირვებლები წინასწარ შედეგებს შეაჯამებენ კენჭისყრის მეორე დღეს, ხოლო საბოლოო დასკვნა არჩევნებიდან ორ თვეში გამოქვეყნდება.

საპარლამენტო არჩევნები საქართველოში 31 ოქტომბერს გაიმართება. ამ არჩევნებზე ხმის მიცემის უფლება აქვს 3 501 931 საქართველოს მოქალაქეს როგორც ქვეყნის შიგნით, ისე მის ფარგლებს გარეთ.

19
თემები:
საქართველოს საპარლამენტო არჩევნები 2020
შალვა ნათელაშვილი

შალვა ნათელაშვილი პრემიერ-მინისტრობას აპირებს

30
(განახლებულია 18:10 26.09.2020)
ნათელაშვილი პრემიერ-მინისტრობის რიგით მეოთხე კანდიდატი გახდა. პოლიტიკოსმა პირობა დადო, რომ საქართველოში აღარ იქნება მშიერი, ღარიბი და ქვეყნიდან გაქცევის მსურველი ადამიანები

თბილისი, 26 სექტემბერი — Sputnik. „საქართველოს ლეიბორისტული პარტიის“ ლიდერმა შალვა ნათელაშვილმა საკუთარი თავი პრემიერ-მინისტრობის კანდიდატად დაასახელა.

„საქართველოს ლეიბორისტული პარტია“ - ერთ-ერთი უძველესი პარტიაა ქვეყანაში, ხოლო ნათელაშვილი მისი უცვლელი ლიდერია. ბოლო დროს პარტია შევიდა კოალიციაში სხვა ოპოზიციურ ძალებთან, რომლებიც პარლამენტში უმრავლესობის შექმნას გეგმავენ.

„მე მზად ვარ, დავიკავო საქართველოს პრემიერ-მინისტრის პოსტი, თუ იქნება ხალხის ნება, მხარდაჭერა და ღმერთის ნება. რის შემდეგადაც მეორე დღეს ჩვენ გავიღვიძებთ სრულიად სხვა საქართველოში, სადაც არ იქნება მშიერი, გაჭირვებული, ღატაკი, უიმედო, უმუშევარი და ქვეყნიდან გაქცევის მსურველი, დაჩაგრული, უსამართლობაში მცხოვრები, რეპრესირებული ადამიანები“, - განაცხადა ნათელაშვილმა და აღნიშნა, რომ ის ასევე თავისი პარტიის პარტიულ სიას ჩაუდგება სათავეში.

ვაშაძე: არ შეიძლება, ფორსმაჟორის დროს იჩაგრებოდეს მცირე და საშუალო ბიზნესი >>

ამგვარად, არჩევნებამდე ერთი თვით ადრე ნათელაშვილი პრემიერ-მინისტრობის რიგით მეოთხე კანდიდატი გახდა.

უკვე ცნობილია პრემიერობის სხვა კანდიდატებიც - მთავრობის მოქმედი მეთაური გიორგი გახარია (მმართველი პარტია „ქართული ოცნება - დემოკრატიული საქართველო“), საქართველოს ექს-პრეზიდენტი მიხეილ სააკაშვილი („ძალა ერთობაშია“) და იუსტიციის მინისტრის ყოფილი მოადგილე გიორგი ვაშაძე (პარტია „სტრატეგია აღმაშენებელი“).

კონსტიტუციაში გაწერილი პროცედურების თანახმად, პრემიერ-მინისტრს წარადგენს ის პარტია, რომელიც არჩევნებზე ყველაზე მეტ ხმას მოიპოვებს. თუ კანდიდატი ვერ მიიღებს საკმარისი რაოდენობის ხმებს, განმეორებითი საპარლამენტო არჩევნები ინიშნება. განმეორებითი არჩევნების თავიდან აცილება შესაძლებელია, თუ ორი კვირის განმავლობაში მხარდაჭერას მოიპოვებს ის კანდიდატი, რომელსაც დეპუტატების ერთი მესამედი წარადგენს.

30
თემები:
საქართველოს საპარლამენტო არჩევნები 2020
ადამიანები პირბადეებით

როდის მოხვდება საქართველო ნარინჯისფერ ან წითელ ზონაში: თამარ გაბუნიას განმარტება

0
(განახლებულია 20:21 26.09.2020)
ჯანდაცვის მინისტრის მოადგილის, თამარ გაბუნიას განცხადებით, საქართველოს სტატუსი რომ შეიცვალოს, ძალიან ბევრი ახალი შემთხვევა უნდა დაფიქსირდეს ინციდენტობის კუთხით

თბილისი, 26 სექტემბერი – Sputnik. საქართველო კორონავირუსის გავრცელების კუთხით კვლავ მწვანე ზონაში რჩება და ქვეყნისთვის ნარინჯისფერი და წითელი ზონა დაიწყება მას შემდეგ, თუ შემთხვევების რაოდენობა დღეში 500-დან 700-მდე გახდება, განაცხადა ჯანდაცვის მინისტრის მოადგილემ, თამარ გაბუნიამ.

მან ასევე იმედი გამოთქვა, რომ ქვეყანა ამ ნიშნულამდე არასდროს არ მივა.

დღეს საქართველოში კორონავირუსის 296 ახალი შემთხვევა გამოვლინდა, გამოჯანმრთელდა 60 პაციენტი. დღესვე კორონავირუსით გარდაიცვალა 28-ე პაციენტი.

მისი განმარტებით, საქართველო გლობალურ შკალაზე კვლავაც დაბალი რისკის ქვეყანაა.

„რაც შეეხება ქვეყნის სტატუსს, გლობალური მაჩვენებლის თანახმად, დღეს ინციდენტობის (ანუ ახალი შემთხვევების) საშუალო მაჩვენებელი 100 ათას მოსახლეზე არის დაახლოებით 19. ითვლება, რომ ამ ნიშნულის ქვემოთ ქვეყნები არის დაბალი რისკის მატარებელი და ამის ზემოთ არის მაღალი რისკის მატარებელი. საქართველოს ორი კვირის ჯამური ინციდენტობის მაჩვენებელი 5,5 ერთეულია, რაც კვლავაც ქვედა ზღვარია გლობალურ შკალაზე და პირობითად ფასდება როგორც მუქი მწვანე ზონა (10-ზე ნაკლები 100 000 მოსახლეზე)“, - განაცხადა გაბუნიამ.

მინისტრის მოადგილის განმარტებით, საქართველოს სტატუსი რომ შეიცვალოს, ძალიან ბევრი ახალი შემთხვევა უნდა დაფიქსირდეს ინციდენტობის კუთხით, რომ ქვეყანა გადაცდეს გლობალურ საშუალოს.

მისივე განცხადებით, კორონავირუსის ახალი შემთხვევების რაოდენობა კვლავ მაღალია ბათუმში, თუმცა აჭარიდან სხვა რეგიონებში ინფექციის ფართო გავრცელების სურათი არ შეინიშნება.

საქართველოს მასშტაბით ახალი კორონავირუსის დადასტურებულ შემთხვევათა რაოდენობამ 4960-ს მიაღწია. ამ დროისათვის სულ გამოჯანმრთელდა 1819 ადამიანი, კარანტინის რეჟიმში იმყოფება 5584, სტაციონარებში ექიმების დაკვირვების ქვეშ 836 პაციენტია, ხოლო კოვიდ–სასტუმროებში 781 ადამიანი იმყოფება.

საქართველოში კორონავირუსის პირველი შემთხვევა 26 თებერვალს დაფიქსირდა.

0
თემები:
COVID-19 საქართველოში