პატრიოტთა ალიანსის აქცია

„ყოველი ახალი დღე ახალი პროვოკაცით იწყება“ - „პატრიოტთა ალიანსი“ სკანდალის ცენტრშია

561
(განახლებულია 16:12 30.08.2020)
პარტიის ლიდერმა ირმა ინაშვილმა საზოგადოებისა და მედიის მხრიდან კრიტიკას უპასუხა და აჭარაში წინასაარჩევნო პლაკატს პროვოკაცია უწოდა

თბილისი, 30 აგვისტო — Sputnik. საქართველოში საპარლამენტო არჩევნებამდე ორი თვით ადრე ახალი სკანდალი აგორდა - ამჯერად აჭარაში „პატრიოტთა ალიანსის“ მიერ გამოკრული ბანერის ირგვლივ.

მედიაში და სოციალურ ქსელებში გამოჩნდა „პატრიოტთა ალიანსის“ ბანერის ფოტოები, სადაც საქართველოს რუკაზე აჭარის ავტონომიური რესპუბლიკა მონიშნულია წითელი ფერით, სამხრეთ ოსეთსა და აფხაზეთთან ერთად. ქართული კანონმდებლობით, ამ ორ რეგიონს ოფიციალურად აქვს მინიჭებული „ოკუპირებული ტერიტორიების“ სტატუსი - აგვისტოს ომის და რუსეთის მიერ მათი დამოუკიდებლობის აღიარების შემდეგ.

ერთ-ერთი პლაკატი განათავსეს გონიოში, დაახლოებით რვა კილომეტრში თურქეთის საზღვართან, რომელსაც ალიანსი საქართველოს ტერიტორიების ექსპანსიას აბრალებს. პლაკატზე წარწერაა: „დაიცავი აჭარა! დაიცავი შენი წილი საქართველო!“

ქართველმა პოლიტიკოსებმა, მათ შორის საპარლამენტო უმრავლესობის ლიდერმა მამუკა მდინარაძემ ამ ნაბიჯს „ანტიქართული“ უწოდეს. მდინარაძემ თავის Facebook-გვერდზე ისიც კი დაწერა, რომ „სიმართლე გითხრათ, თავიდან „ფეიკი" მეგონა“.

ირმა ინაშვილმა განაცხადა, რომ პლაკატების დიზაინი არ ემთხვევა პარტიის ჩანაფიქრს და პროვოკაციაზე ალაპარაკდა.

„ყოველი ახალი დღე ახალი პროვოკაციით იწყება. დღეს აქტუალური ბათუმის ბანერის თემა გახდა. ეს ბანერი სრულიად განსხვავებული სახით მივიღეთ პოლიტსაბჭოზე. ბანერზე აქცენტირებული იყო აჭარა, მაგრამ არა წითელ ფერში, არამედ როგორც ყურადღების მიპყრობის ცენტრი, წარწერით - sos!.. მართალია, წითელი ფერიც იხილებოდა, შავიც და ყავისფერიც და კიდევ ბევრი სხვა ვარიანტი...“, - დაწერა Facebook-ზე ინაშვილმა.

მისი თქმით, აჭარა განსაკუთრებულ ყურადღებას იმიტომ იმსახურებს, რომ მიმდინარეობს მისი ეკონომიკური და იდეოლოგიური ექსპანსია თურქეთის მიერ, რის შესახებ არაერთხელ განაცხადეს „ალიანსში“.

„არ გამოვრიცხავ შიდა და გარე პროვოკაციას. ბანერიც სხვა ფერებში დაბეჭდეს, შეუთანხმებელ ადგილზე დაკიდეს, მერე თვითონვე მოხსნეს. ამით იაფფასიანი პიარი გაიკეთეს, ჩვენ კი ეს ყველაფერი ტელევიზიებიდან გავიგეთ!“, - განაცხადა ინაშვილმა.

გარდა ამისა, ინაშვილი აცხადებს, რომ საქართველოს ყოფილმა პრეზიდენტმა მიხეილ სააკაშვილმა და „ევროპული საქართველოს“ ლიდერმა გიგა ბოკერიამ პარტიაში მიუგზავნეს მოსყიდული ადამიანები, რომლებსაც შიდაპარტიული ინფორმაცია უნდა გაეგოთ. ინაშვილი ამტკიცებს, რომ ამისათვის მათ 50 ათასიდან 1 მილიონ ლარამდე თანხას გადაუხდიან.

561
თემები:
საქართველოს პოლიტიკური ცხოვრება (153)
ეუთოს დროშა

საქართველოში არჩევნებზე ეუთოს 350 დამკვირვებელი ჩამოვა

26
(განახლებულია 20:07 26.09.2020)
დამკვირვებლები დააკვირდებიან არჩევნების ყველა ასპექტს - დაწყებული კანდიდატების და პარტიების რეგისტრაციით, დამთავრებული არჩევნების და წინასაარჩევნო კამპანიის გაშუქებით

თბილისი, 26 სექტემბერი – Sputnik. საქართველოში კენჭისყრისა და ხმების დათვლის პროცესის დაკვირვებისთვის ეუთოს დემოკრატიული ინსტიტუტებისა და ადამიანის უფლებების ოფისიდან (OSCE/ODIHR) 350 დამკვირვებელი ჩამოვა, ნათქვამია ორგანიზაციის ვებგვერდზე.

„ოდირის“ სადამკვირვებლო მისიის ანგარიში საქართველოს საპარლამენტო არჩევნების შეფასებაში წამყვანი იქნება. ქვეყნის საერთაშორისო პარტნიორებმა უკვე განაცხადეს, რომ არჩევნები იქნება აღიარებული მისიის ანგარიშის საფუძველზე, თუ ის არ გამოავლენს სერიოზულ დარღვევებს არჩევნების და ხმების დათვლის პროცესში.

ეუთოს მონაცემებით, დემოკრატიული ინსტიტუტებისა და ადამიანის უფლებების ოფისი თავის დამკვირვებლებს ორ ეტაპად გამოგზავნის. პირველი ჯგუფი, რომელშიც 27 დამკვირვებელი და 13 ექსპერტი შევა, ქვეყანაში უკვე 30 სექტემბერს ჩამოვა. ისინი საქართველოში არჩევნების შედეგების გამოცხადებამდე დარჩებიან, ხოლო კიდევ 350 დამკვირვებელი უშუალოდ არჩევნების დღისთვის ჩამოვა.

„მისია შეაფასებს არჩევნების შესაბამისობას ეუთოს და სხვა საერთაშორისო პარტნიორების წინაშე აღებულ ვალდებულებებთან, ასევე დემოკრატიული არჩევნების საერთაშორისო სტანდარტების და ადგილობრივი კანონმდებლობის მიმართ“, - აღნიშნულია განცხადებაში.

„დამკვირვებლები დააკვირდებიან არჩევნების ყველა ასპექტს - კანდიდატების და პარტიების რეგისტრაციას, წინასაარჩევნო კამპანიას, საარჩევნო ადმინისტრაციის მუშაობას, საკანონმდებლო ნორმების შესრულებას, საარჩევნო დავების გადაწყვეტას და არჩევნების და წინასაარჩევნო კამპანიის გაშუქებას მედიაში“, - აღნიშნულია განცხადებაში.

კენჭისყრის დღეს მისია შეაფასებს ყველა პროცედურას, დაწყებული საარჩევნო უბნების გახსნით, დამთავრებული შედეგების შეჯამებით. დამკვირვებლები წინასწარ შედეგებს შეაჯამებენ კენჭისყრის მეორე დღეს, ხოლო საბოლოო დასკვნა არჩევნებიდან ორ თვეში გამოქვეყნდება.

საპარლამენტო არჩევნები საქართველოში 31 ოქტომბერს გაიმართება. ამ არჩევნებზე ხმის მიცემის უფლება აქვს 3 501 931 საქართველოს მოქალაქეს როგორც ქვეყნის შიგნით, ისე მის ფარგლებს გარეთ.

26
თემები:
საქართველოს საპარლამენტო არჩევნები 2020
შალვა ნათელაშვილი

შალვა ნათელაშვილი პრემიერ-მინისტრობას აპირებს

31
(განახლებულია 18:10 26.09.2020)
ნათელაშვილი პრემიერ-მინისტრობის რიგით მეოთხე კანდიდატი გახდა. პოლიტიკოსმა პირობა დადო, რომ საქართველოში აღარ იქნება მშიერი, ღარიბი და ქვეყნიდან გაქცევის მსურველი ადამიანები

თბილისი, 26 სექტემბერი — Sputnik. „საქართველოს ლეიბორისტული პარტიის“ ლიდერმა შალვა ნათელაშვილმა საკუთარი თავი პრემიერ-მინისტრობის კანდიდატად დაასახელა.

„საქართველოს ლეიბორისტული პარტია“ - ერთ-ერთი უძველესი პარტიაა ქვეყანაში, ხოლო ნათელაშვილი მისი უცვლელი ლიდერია. ბოლო დროს პარტია შევიდა კოალიციაში სხვა ოპოზიციურ ძალებთან, რომლებიც პარლამენტში უმრავლესობის შექმნას გეგმავენ.

„მე მზად ვარ, დავიკავო საქართველოს პრემიერ-მინისტრის პოსტი, თუ იქნება ხალხის ნება, მხარდაჭერა და ღმერთის ნება. რის შემდეგადაც მეორე დღეს ჩვენ გავიღვიძებთ სრულიად სხვა საქართველოში, სადაც არ იქნება მშიერი, გაჭირვებული, ღატაკი, უიმედო, უმუშევარი და ქვეყნიდან გაქცევის მსურველი, დაჩაგრული, უსამართლობაში მცხოვრები, რეპრესირებული ადამიანები“, - განაცხადა ნათელაშვილმა და აღნიშნა, რომ ის ასევე თავისი პარტიის პარტიულ სიას ჩაუდგება სათავეში.

ვაშაძე: არ შეიძლება, ფორსმაჟორის დროს იჩაგრებოდეს მცირე და საშუალო ბიზნესი >>

ამგვარად, არჩევნებამდე ერთი თვით ადრე ნათელაშვილი პრემიერ-მინისტრობის რიგით მეოთხე კანდიდატი გახდა.

უკვე ცნობილია პრემიერობის სხვა კანდიდატებიც - მთავრობის მოქმედი მეთაური გიორგი გახარია (მმართველი პარტია „ქართული ოცნება - დემოკრატიული საქართველო“), საქართველოს ექს-პრეზიდენტი მიხეილ სააკაშვილი („ძალა ერთობაშია“) და იუსტიციის მინისტრის ყოფილი მოადგილე გიორგი ვაშაძე (პარტია „სტრატეგია აღმაშენებელი“).

კონსტიტუციაში გაწერილი პროცედურების თანახმად, პრემიერ-მინისტრს წარადგენს ის პარტია, რომელიც არჩევნებზე ყველაზე მეტ ხმას მოიპოვებს. თუ კანდიდატი ვერ მიიღებს საკმარისი რაოდენობის ხმებს, განმეორებითი საპარლამენტო არჩევნები ინიშნება. განმეორებითი არჩევნების თავიდან აცილება შესაძლებელია, თუ ორი კვირის განმავლობაში მხარდაჭერას მოიპოვებს ის კანდიდატი, რომელსაც დეპუტატების ერთი მესამედი წარადგენს.

31
თემები:
საქართველოს საპარლამენტო არჩევნები 2020
პრემია „ლიტერა“

ლიტერატურული პრემია „ლიტერას“ გამარჯვებულთა ვინაობა ცნობილია

0
(განახლებულია 21:06 26.09.2020)
ლიტერატურულმა პრემიის გამარჯვებულები ექვს ნომინაციაში გამოვლინდა. გამარჯვებულებს პრიზებთან ერთად ფულადი ჯილდო გადაეცათ.

თბილისი, 26 სექტემბერი — Sputnik. მწერალთა სახლის და კულტურის სამინისტროს ერთობლივი ლიტერატურული პრემია „ლიტერას“ დაჯილდოების რიგით მეხუთე ცერემონია გაიმართა, პრემიის გამარჯვებულები ექვს ნომინაციაში გამოვლინდნენ, ნათქვამია განათლების, მეცნიერების, კულტურისა და სპორტის სამინისტროს Facebook-გვერდზე.

126 საკონკურსო განაცხადიდან მოკლე სიაში 38 წიგნი მოხვდა, „ლიტერა 2020-ის“ გამარჯვებულები გახდნენ:

წლის საუკეთესო წიგნის დიზაინი:

თინათინ ჩხიკვიშვილი, ჯანა ამირეჯიბის წიგნისთვის „მე - ნამდვილი კოკოშა“, გამომცემლობა „არტანუჯი“;

წლის საუკეთესო დებიუტი:

ნინი ელიაშვილი - „წერტილის შემდეგ“, გამომცემლობა „ინტელექტი“;

საუკეთესო დოკუმენტური პროზა:

გიორგი მაისურაძე - „სხვა ენა“, გამომცემლობა „ინდიგო“;

წლის საუკეთესო პოეტური კრებული:

შოთა იათაშვილი - „XXI საუკუნის დასაწყისის პოეტი“, გამომცემლობა „ინტელექტი“;

წლის საუკეთესო პროზაული კრებული:

ეკა ქევანიშვილი - „არაფერი დედაჩემის შესახებ“, გამომცემლობა „წიგნები ბათუმში“;

წლის საუკეთესო რომანი:

ირაკლი სამსონაძე - „ქელეხი - ქორწილი“, გამომცემლობა „ინტელექტი“.

„ლიტერა“ წელს 2019 წელს გამოცემულ ლიტერატურულ ნაწარმოებებს აფასებდა. კონკურსის შედეგებს აფასებდა მწერალთა სახლის მიერ შერჩეული კონფიდენციალური ჟიური, რომელიც 5 წევრისგან შედგებოდა. გამარჯვებულს გამოავლინეს ფარული კენჭისყრით. ლიტერატურული პრემიის საპრიზო ფონდი 30 000 ლარია. თითოეულ ნომინაციაში გამარჯვებულს 5 000 ლარი გადაეცა.

ლიტერატურული პრემია „ლიტერა“ 2016 წელს განათლების, მეცნიერების, კულტურისა და სპორტის სამინისტრომ და მწერალთა სახლმა დააარსეს. მას შემდეგ ის ყოველ წელს იმართება. სხვადასხვა წელს „ლიტერას“ გამარჯვებული გახდნენ მწერლები და პოეტები: ბესიკ ხარანაული, ვახტანგ ჯავახაძე, ნაირა გელაშვილი, ზვიად რატიანი, ზურაბ ქარუმიძე, ნანა ექვთიმიშვილი, არჩილ ქიქოძე და სხვები.

პროექტის მიზანია თანამედროვე ქართული ლიტერატურის განვითარება და ახალგაზრდა ავტორების წახალისება.

კორონავირუსის პანდემიის გამო დაჯილდოების ცერემონიას მხოლოდ ფინალისტები და მონაწილე გამომცემლები ესწრებოდნენ.

 

 

0
თემები:
საქართველო და კულტურა