დავით ბაქრაძე

მემორანდუმი გაფორმებულია - ქართული ოპოზიცია კონკრეტულ ნაბიჯებზე შეთანხმდა

200
(განახლებულია 20:14 24.08.2020)
26 ოპოზიციური პარტიის წარმომადგენლებმა ხელი მოაწერეს მემორანდუმს ამომრჩეველთა ხმების დაცვის შესახებ და კონკრეტულ წინასაარჩევნო ნაბიჯებზე შეთანხმდნენ

თბილისი, 24 აგვისტო - Sputnik. 26 ოპოზიციური პარტიის წარმომადგენლებმა ხელი მოაწერეს მემორანდუმს ამომრჩეველთა ხმების დაცვის შესახებ და კონკრეტულ წინასაარჩევნო ნაბიჯებზე შეთანხმდნენ.

ხელმოწერილ დოკუმენტს შეუერთდა ასევე „თავისუფალი საქართველოს“ ლიდერი კახა კუკავა, რომელიც შეხვედრას ვერ დაესწრო.

„ევროპული საქართველოს“ ერთ-ერთი ლიდერის, დავით ბაქრაძის სიტყვებით, შეთანხმებამ უნდა უზრუნველყოს თავისუფალი და სამართლიანი არჩევნების ჩატარება.

„ეს არის შეთანხმება ამომრჩეველთა ხმების დაცვის შესახებ და ყველა ხელმომწერი პარტია იღებს ვალდებულებას, რომ ისინი დაიცავენ ამომრჩევლის ხმას, ერთმანეთის ხმებს და არ მისცემენ შესაძლებლობას ხელისუფლებას, არჩევნები გააყალბოს. ეს არის უმნიშვნელოვანესი პოლიტიკური განაცხადი. განაცხადი, რომელიც ერთი მხრივ აჩვენებს ოპოზიციის ერთიანობას ამ ბრძოლაში და მეორეც, არის დიდი წინ გადადგმული ნაბიჯი, რათა ჩატარდეს სამართლიანი არჩევნები, დავიცვათ თითოეული ხმა და არავის მიეცეს გაყალბების შესაძლებლობა“, - განუცხადა ბაქრაძემ ჟურნალისტებს.

ერთიანი შტაბი ამომრჩევლებისთვის იბრძოლებს

ბაქრაძის თქმით, დღეს მხარეებმა მიიღეს რამდენიმე გადაწყვეტილება, მათ შორის, ერთიანი შტაბის შექმნისა და საერთო სამოქმედო მექანიზმის შემუშავების შესახებ.

„შეიქმნება ამომრჩევლის ხმების დაცვის საერთო შტაბი, შტაბის ხელმძღვანელი იქნება პაატა დავითაია. შტაბში იქნება წარმოდგენილი ყველა ოპოზიციური პარტია, რომელიც მონაწილეობს ამ პროცესში და ეს იქნება ის სტრუქტურა, რომელიც შეიმუშავებს და ხელმძღვანელობას გაუწევს ყველა იმ ზომას, რომელიც თავიდან აგვარიდებს არჩევნების გაყალბებას და დაიცავს ამომრჩევლის ხმებს“, - აღნიშნა ბაქრაძემ.

მისი სიტყვებით, შტაბი წარმოადგენს კონკრეტული ღონისძიებების ნუსხას, რა უნდა გაკეთდეს ამომრჩევლის ხმების დასაცავად. მათ შორის იქნება ორი კონკრეტული ნაბიჯი. ერთი არის პარტიებს შორის საერთო მონაცემთა ბაზის შექმნა, სადაც არჩევნების დღეს აისახება ყველა დარღვევა, მეორე - საერთო, სამოქმედო, საკოორდინაციო მექანიზმი, თუ როგორ რეაგირებას მოახდენენ პარტიები ამ ბაზაში ასახულ დარღვევებზე. ამ და სხვა ნაბიჯებს შტაბი საზოგადოებას ახლო მომავალში წარუდგენს.

„ჩვენი სტრუქტურა, ოპოზიციური პარტიებიც და შტაბიც ძალიან მჭიდრო კოორდინაციაში იმუშავებენ არასამთავრობო სექტორთან, ჩვენს უცხოელ მეგობრებთან, დიპლომატიურ კორპუსთან, რათა ყველამ ერთად, საერთო ძალისხმევით დავიცვათ თითოეული ამომრჩევლის ხმა, არ დავუშვათ ამ ქვეყანაში არჩევნების გაყალბების შესაძლებლობა“, – განაცხადა დავით ბაქრაძემ.

რევოლუცია არ იქნება

„დემოკრატიული მოძრაობის“ ლიდერის, ნინო ბურჯანაძის თქმით, დღევანდელი შეკრება ქვეყანას აარიდებს არეულობასა და რევოლუციას არჩევნების შემდეგ.

მისი სიტყვებით, საქართველოს პოლიტიკურ ცხოვრებაში არ ყოფილა მსგავსი მოვლენა, როდესაც ყველა პოლიტიკური ორგანიზაცია გაერთიანდა.

„ნამდვილად ისტორიული დღეა საქართველოს პოლიტიკურ ცხოვრებაში, ეს არ არის გადაჭარბებული შეფასება. მსგავსი მოვლენა, როდესაც აბსოლუტურად ყველა მიმართულების პოლიტიკური ორგანიზაცია დავსხედით და გადავწყვიტეთ, რომ არავის მივცეთ უფლება 2020 წლის არჩევნების გაყალბების და მანიპულირების, პრაქტიკულად, ქვეყნის პოლიტიკურ ცხოვრებაში არ მომხდარა“, – განაცხადა ბურჯანაძემ.

მისი თქმით, ეს არის სიგნალი ხელისუფლებისათვის, რათა მან ვერ გაბედოს არჩევნების გაყალბება.

„აქ ვეღარ მოხერხდება ის, რაც 2016 წელს შეძლო ბიძინა ივანიშვილმა“, - აღნიშნა მან.

საზოგადოება სტაბილურობას ირჩევს

პარლამენტის პირველი ვიცესპიკერი გია ვოლსკი კი, თავის მხრივ, ფიქრობს, რომ საქართველოში ოპოზიციურ პარტიებს დღეს აერთიანებს ნგრევისა და არეულობისკენ სწრაფვა და „ქართულ ოცნებას“ არ სჭირდება კოალიციაში ასეთი პოლიტიკური სუბიექტები.

„33 პარტიიდან ყველა არ არის პარტია, რამდენიმე პარტიაა და დანარჩენი პოლიტიკური ინდმეწარმე, ასე პირობითად რომ ვთქვათ. რაოდენობით ბევრი ჩანან, ხალხის ყურადღების მიპყრობა სურთ და გარდა ამისა, გამაერთიანებელი რაც აქვთ, ეს არის დესტრუქციის, არეულობის მცდელობა და ამას თავის განცხადებებშიც ადასტურებენ“, – აცხადებს გია ვოლსკი.

ვიცესპიკერი დარწმუნებულია, რომ საზოგადოება ვითარებას საღად შეაფასებს და სტაბილურობის სასარგებლოდ სწორ გადაწყვეტილებას მიიღებს.

200
თემები:
საქართველოს პოლიტიკური ცხოვრება (153)
საქართველოს საგარეო საქმეთა სამინისტრო

საგარეო უწყება: საქართველო მზადაა ხელი შეუწყოს ყარაბაღში სიტუაციის დეესკალაციას

52
(განახლებულია 09:21 28.09.2020)
საქართველო მოუწოდებს ეუთოს მინსკის ჯგუფის თანათავმჯდომარეებსა და საერთაშორისო მონაწილეებს მთელი ძალისხმევა მიმართონ კონფლიქტის ესკალაციის შეწყვეტისკენ

თბილისი, 27 სექტემბერი  — Sputnik. საქართველო შეშფოთებით აკვირდება აზერბაიჯანსა და სომხეთს შორის მორიგ სამხედრო ესკალაციას, რომელსაც, გავრცელებული ინფორმაციით, უკვე მოჰყვა მსხვერპლი და ინფრასტრუქტურის დაზიანება, ნათქვამია საქართველოს საგარეო საქმეთა სამინისტროს განცხადებაში.

სიტუაცია მთიან ყარაბაღში 27 სექტემბრის დილას მკვეთრად გამწვავდა - სომხეთი და აზერბაიჯანი ერთმანეთს აგრესიაში ადანაშაულებენ. აზერბაიჯანის თავდაცვის სამინისტრო ამტკიცებს, რომ ცეცხლი სომხურმა მხარემ გახსნა, ხოლო აზერბაიჯანის ძალებმა კონტრშეტევითი ოპერაცია დაიწყეს. სომხეთის თავდაცვის სამინისტროში აცხადებენ, რომ აზერბაიჯანმა ყარაბაღზე „საჰაერო და სარაკეტო იერიში მიიტანა“.

„იმედი გვაქვს, რომ მოხერხდება მხარეებს შორის ცეცხლის შეწყვეტის შესახებ შეთანხმების მიღწევა, მოლაპარაკებების რეჟიმში გადასვლა და თავიდან აცილება ფართომასშტაბიანი სამხედრო მოქმედებების, რაც მკვეთრად ნეგატიურად იმოქმედებს მთელი რეგიონის უსაფრთხოებაზე“, - ნათქვამია საგარეო საქმეთა სამინისტროში.

საქართველო მოუწოდებს ეუთოს მინსკის ჯგუფის თანათავმჯდომარეებსა და საერთაშორისო მონაწილეებს მთელი ძალისხმევა მიმართონ აზერბაიჯანსა და სომხეთს შორის ესკალაციის შეწყვეტის და კონსტრუქციული დიალოგის განახლების უზრუნველყოფისთვის.

სომხეთისა და აზერბაიჯანის საზღვარზე სიტუაციის გამწვავებას საქართველოს პრეზიდენტი სალომე ზურაბიშვილიც გამოეხმაურა.

„ძალიან შეშფოთებული ვარ სომხეთსა და აზერბაიჯანს შორის საბრძოლო მოქმედებების განახლებით. მოვუწოდებთ მშვიდობისკენ. სტაბილურობა და მშვიდობა ჩვენს რეგიონში საერთო პირობაა“, – წერს ზურაბიშვილი Twitter-ში.

კონფლიქტის მხარეები მოწინააღმდეგის დანაკარგებზე საუბრობენ. ასე, სომხეთში ჩამოგდებულ ვერტმფრენებსა და აფეთქებულ ტანკებზე საუბრობენ, ხოლო აზერბაიჯანში - განადგურებულ საზენიტო კომპლექსებზე.

რუსეთის საგარეო საქმეთა სამინისტრომ სომხეთსა და აზერბაიჯანს მოუწოდა დაუყოვნებლივ შეწყვიტონ ცეცხლი და სიტუაციის სტაბილიზაციის მიზნით მოლაპარაკებები დაიწყონ.

მთიან ყარაბაღში სიტუაცია გამწვავდა: მხარეები ერთმანეთს ადანაშაულებენ >>

მთიანი ყარაბაღის გამო სომხეთსა და აზერბაიჯანს შორის კონფლიქტი 1988 წლის თებერვალში დაიწყო, როდესაც მთიანი ყარაბაღის ავტონომიამ აზერბაიჯანის სსრ–დან გასვლის თაობაზე განაცხადა. 1992-1994 წლებში აზერბაიჯანმა დაკარგა კონტროლი მთიან ყარაბაღზე და მის მიმდებარე შვიდ რაიონზე. კონფლიქტის მშვიდობიანად მოგვარების მოლაპარაკებები 1992 წლიდან მიმდინარეობს ეუთოს მინსკის ჯგუფის ფარგლებში, რომელსაც სამი თანათავმჯდომარე ჰყავს - რუსეთი, აშშ და საფრანგეთი. აზერბაიჯანი მოითხოვს საკუთარი ტერიტორიული მთლიანობის შენარჩუნებას, სომხეთი არაღიარებული რესპუბლიკის ინტერესებს იცავს, რადგან თავად ყარაბაღი მოლაპარაკებების მხარე არ არის.

52
თემები:
მთიან ყარაბაღში ვითარება გამწვავდა – შეიარაღებული შეტაკება 2020
სომხეთის შეიარაღებული ძალების არტილერია მთიანი ყარაბაღის პოზიციებზე

საქართველოს პარლამენტში სომხეთსა და აზერბაიჯანს ცეცხლის შეწყვეტისკენ მოუწოდეს

126
(განახლებულია 14:42 27.09.2020)
მთიან ყარაბაღში კონფლიქტის ესკალაცია საშიშროებას მთელი რეგიონის უსაფრთხოებას უქმნის, მიიჩნევს საქართველოს პარლამენტის თავდაცვისა და უშიშროების კომიტეტის თავმჯდომარე

თბილისი, 27 სექტემბერი  — Sputnik. საქართველო ყურადღებით აკვირდება სიტუაციას მთიან ყარაბაღში და იმედს იტოვებს, რომ მიმდინარე სიტუაცია დარეგულირდება, განაცხადა საქართველოს პარლამენტის თავმჯდომარე არჩილ თალაკვაძემ.

მთიან ყარაბაღში 27 სექტემბრის დილას სიტუაცია მკვეთრად გამწვავდა - სომხეთი და აზერბაიჯანი ერთმანეთს აგრესიაში ადანაშაულებენ. ბაქო და ერევანი ერთმანეთს სიტუაციის გამწვავებაში ადანაშაულებენ. აზერბაიჯანის თავდაცვის სამინისტრო ამტკიცებს, რომ ცეცხლი სომხურმა მხარემ გახსნა, ხოლო აზერბაიჯანის ძალებმა კონტრშეტევითი ოპერაცია დაიწყეს. სომხეთის თავდაცვის სამინისტროში აცხადებენ, რომ აზერბაიჯანმა ყარაბაღზე „საჰაერო და სარაკეტო იერიში მიიტანა“.

„მოგეხსენებათ, რომ ჩვენი რეგიონი არის გამოწვევებით სავსე. სამწუხაროდ, რუსეთის პოლიტიკა საუკუნეების განმავლობაში რჩება დესტრუქციული და რეგიონში არაერთი მიმდინარე კონფლიქტი არსებობს. რაც შეეხება ამ კონკრეტულ შემთხვევას, რა თქმა უნდა აქ ჩვენი, საქართველოს, როგორც აზერბაიჯანის და სომხეთის მიმართ მეგობრული ერისა და ქვეყნის ამოცანა და სურვილია, რომ სტაბილურობა, უსაფრთხოება და მშვიდობა მაქსიმალურად იყოს დაცული. ამიტომ, რა თქმა უნდა ყურადღებით ვადევნებთ თვალს ამ პროცესს და იმედი გვაქვს, რომ ეს ესკალაციები დარეგულირდება და რეგიონში იქნება მშვიდი და უსაფრთხო გარემო“, – განუცხადა ჟურნალისტებს თალაკვაძემ.

საქართველოს პარლამენტის თავდაცვისა და უშიშროების კომიტეტის თავმჯდომარე ირაკლი სესიაშვილმა განაცხადა, რომ საქართველო ყოველთვის იდგა მშვიდობისა და სტაბილურობის მხარეს და საერთაშორისო საზოგადოებასთან ერთად მოწინაღმდეგე მხარეებს ცეცხლის შეწყვეტისკენ მოუწოდებს.

„ჩვენი რეგიონის უსაფრთხოებისა და ჩვენი ქვეყნის უსაფრთხოების გარემოსთვის ძალიან სახიფათოა კონფლიქტი ჩვენს რეგიონში, ყარაბაღში განვითარებული მოვლენები ჩვენი და საერთაშორისო საზოგადოების შეშფოთებას იწვევს. ცხადია, ჩვენ ყოველთვის ვიყავით მშვიდობის, სტაბილურობის მხარეს და ამ შემთხვევაშიც საერთაშორისო საზოგადოებასთან ერთად, დაპირისპირებულ მხარეებს მოვუწოდებთ, რომ ცეცხლი შეწყვიტონ, მეტი დრო და ენერგია დაუთმონ მშვიდობიან დიალოგს. ცხადია, ჩვენი შესაბამისი სამსახურები ზოგადად პროცესს დააკვირდებიან, მოვლენებს გაანალიზებენ და თუ საჭირო იქნება ჩვენი თანადგომა მშვიდობისთვის და უსაფრთხოებისთვის, ცხადია, ამისთვის მზად ვიქნებით“, – განუცხადა ჟურნალისტებს სესიაშვილმა.

კონფლიქტის მხარეები მოწინააღმდეგის დანაკარგებზე საუბრობენ. ასე, სომხეთში ჩამოგდებულ ვერტმფრენებსა და აფეთქებულ ტანკებზე საუბრობენ, ხოლო აზერბაიჯანში - განადგურებულ საზენიტო კომპლექსებზე.

რუსეთის საგარეო საქმეთა სამინისტრომ სომხეთსა და აზერბაიჯანს მოუწოდა დაუყოვნებლივ შეწყვიტონ ცეცხლი და სიტუაციის სტაბილიზაციის მიზნით მოლაპარაკებები დაიწყონ.

მთიანი ყარაბაღის გამო სომხეთსა და აზერბაიჯანს შორის კონფლიქტი 1988 წლის თებერვალში დაიწყო, როდესაც მთიანი ყარაბაღის ავტონომიამ აზერბაიჯანის სსრ–დან გასვლის თაობაზე განაცხადა. 1992-1994 წლებში აზერბაიჯანმა დაკარგა კონტროლი მთიან ყარაბაღზე და მის მიმდებარე შვიდ რაიონზე. კონფლიქტის მშვიდობიანად მოგვარების მოლაპარაკებები 1992 წლიდან მიმდინარეობს ეუთოს მინსკის ჯგუფის ფარგლებში, რომელსაც სამი თანათავმჯდომარე ჰყავს - რუსეთი, აშშ და საფრანგეთი. აზერბაიჯანი მოითხოვს საკუთარი ტერიტორიული მთლიანობის შენარჩუნებას, სომხეთი არაღიარებული რესპუბლიკის ინტერესებს იცავს, რადგან თავად ყარაბაღი მოლაპარაკებების მხარე არ არის.

126
თემები:
მთიან ყარაბაღში სიტუაცია გამწვავდა
ილია მეორე

საქართველოს პარტიარქი უკრაინაში მომხდარ ტრაგედიასთან დაკავშირებით მწუხარებას გამოთქვამს

0
(განახლებულია 11:38 28.09.2020)
„ვილოცებთ მათი უკვდავი სულებისთვის“ – წერს პატრიარქი უკრაინის პრეზიდენტისა და კიევის მეტროპოლიტისადმი გაგზავნილ სამძიმრის წერილებში

თბილისი, 28 სექტემბერი  — Sputnik.  საქართველოს კათოლიკოს–პატრიარქმა ილია მეორემ  ხარკოვის ოლქში მომხდარ ავიაკატასტროფასთან დაკავშირებით უკრაინის პრეზიდენტ ვლადიმირ ზელენსკის სამძიმრის წერილი გაუგზავნა

26 სექტემბრის საღამოს სამხედრო-სატრანსპორტო თვითმფრინავი Ан-26 ხარკოვის ოლქში ქალაქ ჩუგუევთან ახლოს იმ დროს ჩამოვარდა, როდესაც სასწავლო ფრენას ახორციელებდა. ბორტზე იმყოფებოდა 27 ადამიანი - ეკიპაჟის 7 წევრი და 20 კურსანტი. 25 ადამიანი ადგილზე დაიღუპა, ორმა კურსანტმა თვითმფრინავიდან გადმოსვლა მოახერხა, თუმცა, ერთ-ერთი მათგანი საავადმყოფოში გარდაიცვალა.

„ჩვენ ვლოცულობთ მათი უკვდავი სულებისათვის, რათა უფალმან სავანესა მართალთასა დააწესოს ისინი. გთხოვთ, ჩვენი სამძიმარი და თანადგომა გადასცეთ გარდაცვლილთა ოჯახის წევრებსა და ახლობლებს, მთელ უკრაინელ ხალხს. დაშავებულთ კი ვუსურვებთ, ღვთის წყალობით, მალე გამოჯანმრთელებას", - ნათქვამია ილია მეორის წერილში, რომელსაც საქართველოს საპატრიარქო ავრცელებს.

საპატრიარქოს განცხადებით, მსგავსი წერილი გაეგზავნა კიევისა და სრულიად უკრაინის მიტროპოლიტს, მის უნეტარესობა ონოფრეს.

0
თემები:
საქართველოს საპატრიარქო