„ქართული ოცნების წინასაარჩევნო კამპანიის დაწყება

საპარლამენტო არჩევნები 2020: კვირის შედეგები

392
(განახლებულია 09:02 26.07.2020)
ამ კვირაში პარტიებმა მაჟორიტარი დეპუტატობის კანდიდატები განსაზღვრეს. კვირას არ ჩაუვლია სკანდალების გარეშეც

თბილისი, 25 ივლისი – Sputnik. ბოლო კვირა პოლიტიკური მოვლენებით მდიდარი აღმოჩნდა. შეიძლება ითქვას, რომ საპარლამენტო არჩევნებისთვის მზადება აქტიურ ფაზაში გადავიდა.

საპარლამენტო არჩევნები 31 ოქტომბერს ჩატარდება. ქვეყნის მოსახლეობა 150 დეპუტატს აირჩევს – 120–ს პარტიული სიებით და 30–ს – კენჭისყრით მაჟორიტარულ ოლქებში.

თემურ აბაზოვის ამბიციები და სკანდალი: „ქართული ოცნება“ საარჩევნო სიას ადგენს>>

პარტიებისთვის გამსვლელი ბარიერია 1%. ხმის მიცემის უფლება აქვს საქართველოს 3 550 054 მოქალაქეს – როგორც ქვეყნის შიგნით, ისე მის საზღვრებს გარეთ.

კვირის მთავარი მოვლენა

გასული კვირის მთავარი წინასაარჩევნო მოვლენა გახდა მმართველი პარტია „ქართული ოცნება – დემოკრატიული საქართველოს“ მხრიდან მაჟორიტარი დეპუტატობის კანდიდატების წარდგენა. წარდგენა თბილისის გარეუბანში, ბუნებაში, ქვეყნის ყველა მნიშვნელოვანი ლიდერის თანდასწრებით გაიმართა.

პარტიამ 30–ვე დეპუტატი ერთბაშად წარადგინა. კანდიდატების სიაში ახალი სახეები არ აღმოჩნდა, თუმცა, ჩამონათვალში მოხვდნენ ყოფილი მინისტრები, რომლებიც ბოლო დროს პოლიტიკას ჩამოშორდნენ, ბიზნესმენები და რეგიონების ხელმძღვანელები.

ექსპერტების შეფასებით, კანდიდატების განსაკუთრებით ძლიერი შემადგენლობა მმართველმა პარტიამ თბილისში წარმოადგინა, სადაც 30–ზე მეტი ოპოზიციური პარტია შეთანხმებულად ერთიან კანდიდატს წარმოადგენს.

ახლა „ქართული ოცნება" პარტიულ სიას ამზადებს, რომელიც უკვე გახდა განხილვის საბაბი მარნეულის ყოფილი მერის თემურ აბაზოვის სკანდალური განცხადების გამო.

„ქართული ოცნება“ წინასაარჩევნო კამპანიას იწყებს: გეგმები და პერსპექტივები>>

კვირის მთავარი სკანდალი

ბოლო კვირაში კვლავ აქტუალური გახდა დაპირისპირება ოპოზიციის შიგნით. ამჯერად საქართველოს ექს–პრეზიდენტის ყოფილი თანამოაზრეები დაუპირისპირდნენ ერთმანეთს – „ერთიანი ნაციონალური მოძრაობა“ და „ევროპული საქართველო – მოძრაობა თავისუფლებისთვის“.

მიზეზი მაჟორიტარობის კანდიდატები გახდა რეგიონებში. „ნაცმოძრაობამ“ მკვეთრი რეაგირება მოახდინა გავრცელებულ ხმებზე, რომ ზუგდიდში კანდიდატად შეიძლება „ევროპელების“ ლიდერი გიგი უგულავა წარადგინონ. ამის პასუხად „ევროპულმა საქართველომ“ პარტიის წარმომადგენლებს მოუწოდა, გააერთიანონ ოპოზიციური ძალები და მთელი ყურადღება საკუთარ თავზე არ გადაიტანონ.

გვერდით არ გამდგარან სხვა ოპოზიციური პარტიებიც. „გირჩმა“ და „ახალმა საქართველომ“ განაცხადეს, რომ მზად არიან, უარი თქვან მაჟორიტარ კანდიდატებზე რეგიონებში, რათა ერთიანობას არ შეუშალონ ხელი.

კვირის მთავარი სასამართლო

გასულ კვირას არჩევნებთან დაკავშირებული სასამართლოს გარეშე არ ჩაუვლია.

საქართველოს უძველესმა „რესპუბლიკურმა პარტიამ“ ცესკოს გადაწყვეტილება გაასაჩივრა, რომელმაც პარტიას დაგვიანებული მიმართვის გამო რეგისტრაციაზე უარი განუცხადა.

სამნიძე: სასამართლომ რესპუბლიკური პარტიის სარჩელი ცესკოს წინააღმდეგ დააკმაყოფილა>>

თბილისის საქალაქო სასამართლომ ცესკოს გადაწყვეტილება არამართლზომიერად ცნო და „რესპუბლიკელებმა“ რეგისტრაციის გავლის უფლება მიიღეს.

კვირის ინტრიგა

გასული კვირის მთავარი ინტრიგა ოპოზიციური პარტიების მხრიდან პარტიული სიების შედგენა გახდა.

ერთბაშად სამმა ოპოზიციურმა ძალამ ამ კვირაში განაცხადა, რომ განსაზღვრეს პირველი ნომრები. „ევროპული საქართველოს“ პირველი ნომერი დავით ბაქრაძე გახდება, „ლელო საქართველოსთვის“ – მამუკა ხაზარაძე, ხოლო „ლეიბორისტული პარტიის“ – შალვა ნათელაშვილი.

გავრცელებულმა ხმებმა მომავალი ბლოკის „ძალა ერთობაშია“ პირველი ნომრის შესახებ ქართული პოლიტიკა „ააფეთქა“. ჭორების მიხედვით, ბლოკს სათავეში საოპერო მომღერალი პაატა ბურჭულაძე ჩაუდგება, რომელიც ამ დღეებში საქართველოში ჩამოვა.

თავად ბლოკში ამ ჭორებს არ ადასტურებენ. თუმცა, როგორც „ნაცმოძრაობაში“ განაცხადეს, რომელიც ამ ბლოკის ლიდერია, ამ სიაში ბურჭულაძე, დიდი ალბათობით, იქნება, თუმცა ეს ჯერ კონსულტაციების საკითხია.

პაატა ბურჭულაძე კვლავ პოლიტიკაში მიდის? - ოპერის მომღერალი საქართველოში ბრუნდება>>

საარჩევნო საქმეები

ამასთან, ცესკო განაგრძობს საპარლამენტო არჩევნებში მონაწილეობისთვის პარტიების რეგისტრაციას.

საარჩევნო კომისია ჯერჯერობით არასაპარლამენტო პარტიების განაცხადებს განიხილავს. არჩევნებში მონაწილეობის სურვილი 68 პოლიტიკურმა ძალამ გამოთქვა.

შაბათისთვის რეგისტრაცია გაიარა უკვე 26–მა პარტიამ. 11–მა უარი მიიღო.

დარეგისტრირებული პარტიები:

  • „სამართლიანობის აღდგენის კავშირი ხმა ერისა: უფალია ჩვენი სიმართლე“       
  • „სოციალური სამართლიანობისთვის“
  • „საქართველო“
  • „საქართველოს ერთობისა და განვითარების პარტია“
  • „ახალი პოლიტიკური ცენტრი - გირჩი“
  • „საქართველოს ძალოვან ვეტერანთა და პატრიოტთა პოლიტიკური მოძრაობა“ 
  • „ქრისტიან-დემოკრატიული მოძრაობა“
  • „ახალი ქრისტიან-დემოკრატები“
  • „ევროპელი დემოკრატები“
  • „მოძრაობა თავისუფალი საქართველოსთვის“
  • „პოლიტიკური პლატფორმა - ახალი საქართველო“
  • „ლელო საქართველოსთვის“
  • „ერთიანი საქართველო - დემოკრატიული მოძრაობა“
  • „თავისუფლება - ზვიად გამსახურდიას გზა“
  • „სახელმწიფო ხალხისთვის“
  • „თავისუფალი დემოკრატები“
  • „ეროვნულ-დემოკრატიული პარტია“
  • „საქართველოს ლეიბორისტული პარტია“
  • „თავისუფალი საქართველო“
  • „ქრისტიან-კონსერვატიული პარტია“
  • „საქართველოს რესპუბლიკური პარტია“
  • „გამარჯვებული საქართველო“
  • „მწვანეთა პარტია“
  • „ქართული დასი“
  • „კანონი და სამართლიანობა“
  • „რეფორმატორები“
392
თემები:
საქართველოს პოლიტიკური ცხოვრება (167)
სალომე ზურაბიშვილი

„ადამიანების სიცოცხლე სასწორზე დევს“ - პრეზიდენტმა პოლიტიკურ პარტიებსა და მედიას მიმართა

24
ამ დროისთვის შემთხვევის ადგილზე მობილიზებული არიან სამართალდამცველები მიმდინარეობს დამნაშავის გაუვნებელყოფის ოპერაცია.

თბილისი, 21 ოქტომბერი - Sputnik. საქართველოს პრეზიდენტმა სალომე ზურაბიშვილმა ზუგდიდში განვითარებულ მოვლენებთან დაკავშირებით განცხადება გაავრცელა.

დღეს ზუგდიდში, ზვიად გამსახურდიას გამზირზე მდებარე „საქართველოს ბანკის“ ფილიალზე თავდასხმა მოხდა. გავრცელებული ინფორმაციით, შეიარაღებულ პირს მძევლად ოცამდე – ბანკის თანამშრომლები და კლიენტები ჰყავს აყვანილი. რამდენიმე მძევალი თავდამსხმელმა უკვე გაათავისუფლა.

„მივმართავ პოლიტიკურ პარტიებს, იმ დროს, როცა ადამიანების სიცოცხლე სასწორზე დევს და სამართალდამცავები, ამ ურთულესი მდგომარეობის მსხვერპლის გარეშე განმუხტვას ცდილობენ, ნებისმიერი დამატებითი დაძაბულობის ხელოვნურად შექმნა დაუშვებელია, ართულებს სამართალდამცავების ამოცანას და საფრთხეს უქმნის მძევლების მშვიდობიან გათავისუფლებას“, - აღნიშნულია განცხადებაში.

სალომე ზურაბიშვილი მიმართავს მედიასაშუალებებსაც და მოუწოდებს, გაითვალისწინონ სამართალდამცავი ორგანოების თხოვნა და ინფორმაცია საზოგადოებას მიაწოდონ ისე, რომ არ შეაფერხონ ოპერატიული მოქმედებები.

დღეს საქართველოს შინაგან საქმეთა სამინისტრომაც მიმართა  მედიასაშუალებებსა და მობილურ ოპერატორებს და, მძევლების და სამართალდამცველთა უსაფრთხოების დაცვის მიზნით, ასევე, საპოლიციო ღონისძიების ეფექტიანად წარმართვისთვის, კატეგორიულად მოითხოვა,  დაუყოვნებლივ გათიშულიყო/შეზღუდულიყო  ადგილიდან ლაივსიგნალი.

გავრცელებული ინფორმაციით, თავდამსხმელი 500 ათას დოლარს და შენობიდან უსაფრთხოდ გასვლას ითხოვს.

შემთხვევის ადგილზე მობილიზებულია საპატრულო პოლიციისა და სპეციალური დანიშნულების რაზმები. სპეცოპერაცია ზუგდიდის ცენტრში ამ დრომდე გრძელდება. პოლიციამ მიმდებარე ტერიტორიიდან ადამიანების ევაკუაცია განახორციელა.

შსს-მ განცხადება გაავრცელა და აღნიშნა, რომ მომხდარ ფაქტზე გამოძიება სისხლის სამართლის კოდექსის 179-ე, 236-ე და 144-ე მუხლებით დაიწყო.

 

24
თემები:
ზუგდიდში შეიარაღებულმა პირმა 19 ადამიანი მძევლად აიყვანა
მთავარი პროკურატურა

საქართველო–აზერბაიჯანის საზღვრის დემარკაციის საქმე: პროკურატურამ ლაშა დარსალია გამოკითხა

35
(განახლებულია 21:08 21.10.2020)
საქართველოს დავით-გარეჯის სამონასტრო კომპლექსის სადავო ტერიტორიის საკითხის თავის სასარგებლოდ გადაჭრის რეალური შანსი გაუჩნდა, ფიქრობს ლაშა დარსალია.

თბილისი, 21 ოქტომბერი – Sputnik. მასალები, რომლებიც აზერბაიჯანულ მხარეს გადაეცა, უნდა განიხილოს საქართველო-აზერბაიჯანის სახელმწიფო საზღვრის სადელიმიტაციო კომისიამ. განხილვა აჩვენებს, რამდენად დამაჯერებელია საქართველოს არგუმენტები, განუცხადა ჟურნალისტებს საგარეო საქმეთა მინისტრის მოადგილემ ლაშა დარსალიამ.

დარსალიას თქმით, ბოლო დროს ნაპოვნი მასალები მიუთითებს, სად შეიძლება გადიოდეს 1938 წლის ხაზი. ეს მასალები შეიძლება ქართულმა მხარემ არგუმენტად გამოიყენოს.

„მასალები არის ღირებული, რასაც ამბობს ძალიან ბევრი ექსპერტი. ეს მასალები, რაც აზერბაიჯანულ მხარეს გადაეცა, უნდა განიხილოს სადემარკაციო კომისიამ. კომისიის განხილვებზე გამოჩნდება, რამდენად მყარია ეს არგუმენტები. ჩვენი პოზიციით, ეს არგუმენტები ძალიან მყარია“, – განაცხადა ლაშა დარსალიამ.

ოთხშაბათს დარსალია საქართველოს პროკურატურაში გამოიკითხა. მისი სიტყვებით, ინფორმაცია, რომელიც მან გამოძიებას მიაწოდა, ეხებოდა სადელიმიტაციო-სადემარკაციო კომისიის მუშაობას 2019 წლიდან დღემდე, როდესაც ის კომისიას ხელმძღვანელობდა.

რაც შეეხება კარტოგრაფების საქმეზე ბრალდებულების პოზიციას, რომ 2006-2007 წლებში კომისიას არ უხელმძღვანელია 1:200 000 მასშტაბის რუკით, ვინაიდან ის ხარვეზიანი იყო, დარსალიამ აღნიშნა, რომ კომისიას ეს საკითხი არ განუხილავს, რადგან ქართულ მხარეს ეს დოკუმენტები არ წარუდგენია.

დარსალიას თქმით, საერთაშორისო ექსპერტებმა დავით-გარეჯის სამონასტრო კომპლექსთან დაკავშირებული რუკებისა და დოკუმენტების შესწავლის შემდეგ დაასკვნეს, რომ 1:200 000 მასშტაბის რუკა ადასტურებს საქართველოს პრეტენზიებს დავით-გარეჯის სადავო ტერიტორიაზე.

საზღვრის უკანონო დემარკაციის საქმე

საქართველოს პროკურატურამ საქართველო–აზერბაიჯანის საზღვრის დელიმიტაციის პროცესში უცხო სახელმწიფოსთვის საქართველოს ტერიტორიის ნაწილის გადაცემის საქმეზე საქართველო–აზერბაიჯანის დელიმიტაცია-დემარკაციის კომისიის ორი ყოფილი წევრი – საქართველოს საგარეო საქმეთა სამინისტროს თანამშრომელი ივერი მელაშვილი და შსს-ს თანამშრომელი ნატალია ილიჩოვა დააკავა. უწყების ცნობით, აღნიშნული კომისიის მიერ საქართველო–აზერბაიჯანის სახელმწიფო საზღვრის გარკვეული მონაკვეთები არამართლზომიერად, ჩვენი ქვეყნის ტერიტორიული ინტერესების საზიანოდ შეთანხმდა.

გამოძიების ცნობით, მათ 1937–1938 წლების რუკის არსებობა დამალეს და წარმოადგინეს სხვა რუკები, რის გამოც საქართველომ კინაღამ დაკარგა თავისი ტერიტორიის 3,5 ათასი ჰექტარი.

35
თემები:
ვნებათაღელვა დავით–გარეჯის ირგვლივ
დოლარები

თავდასხმა ბანკზე ზუგდიდში: მძევლის განცხადებით, თავდამსხმელს თანხა გადაეცა

39
ტელეკომპანია „რუსთავი2“-ის ინფორმაციით, თავდამსხმელი სამ მძევალთან ერთად, სავარაუდოდ, იმ ადგილისკენ გაემართა, სადაც ვერტმფრენი დაეშვა, მანამდე კი თავდამსხმელმა სამის გარდა ყველა მძევალი გამოუშვა.

თბილისი, 21 ოქტომბერი - Sputnik. ზუგდიდში „საქართველოს ბანკის“ ფილიალში მძევლად აყვანილმა ერთ-ერთმა პირმა გაავრცელა ინფორმაცია, რომ თავდამსხმელს პოლიციამ თანხა გადასცა და სამის გარდა ყველა მძევალი თავისუფალია.

ეს პირი სწორედ ის მძევალია, რომელიც თავდამსხმელის მითითებით ტელეკომპანია „მთავარ არხს“ დაუკავშირდა და თავდამსხმელის მოთხოვნები პირდაპირ ეთერში გაახმოვანა. 

როგორც ცნობილია, თავდამსხმელი ნახევარმილიონ დოლარს და ვერტმფრენს მოითხოვდა.

ტელეკომპანია „რუსთავი2“-ის ინფორმაციით, თავდამსხმელი სამ მძევალთან ერთად, სავარაუდოდ, იმ ადგილისკენ გაემართა, სადაც ვერტმფრენი დაეშვა, მანამდე კი თავდამსხმელმა სამის გარდა ყველა მძევალი გამოუშვა. სავარაუდოდ, სწორედ დარჩენილ სამ მძევალთან ერთად დატოვა ბოროტმოქმედმა ბანკის შენობა და სავარაუდოდ, ვერტმფრენისკენ გაემართა.

ზუგდიდში უცნობ შეიარაღებულ პირს „საქართველოს ბანკის“ ფილიალში მძევლები ჰყავდა აყვანილი. იგი ხელისუფლებისგან ნახევარ მილიონ დოლარსა და ვერტმფრენს ითხოვდა. მოთხოვნების შეუსრულებლობის შემთხვევაში დამნაშავე მძევლების დახოცვით იმუქრებოდა.

შემთხვევის ადგილზე მობილიზებული იყო საპატრულო პოლიციისა და სპეციალური დანიშნულების რაზმები. სპეცოპერაცია ზუგდიდის ცენტრში ცოტა ხნის წინ დასრულდა. პოლიციამ მიმდებარე ტერიტორიიდან ადამიანების ევაკუაცია განახორციელა.

შსს-მ განცხადება გაავრცელა და აღნიშნა, რომ მომხდარ ფაქტზე გამოძიება სისხლის სამართლის კოდექსის 179-ე, 236-ე და 144-ე მუხლებით დაიწყო. უწყების ცნობით, ბანკში შეიარაღებული პირის შეჭრის შესახებ შეტყობინება შინაგან საქმეთა სამინისტროში დაახლოებით 14:21 საათზე შევიდა. პოლიციის თანამშრომლებმა მყისიერი რეაგირების რეჟიმში შემოსაზღვრეს შემთხვევის ადგილის მიმდებარე ტერიტორია და დაიწყო დამნაშავის გაუვნებელყოფის ოპერაცია.

39
თემები:
ზუგდიდში შეიარაღებულმა პირმა 19 ადამიანი მძევლად აიყვანა