პარლამენტის სხდომა

საქართველოს პარლამენტმა კონსტიტუცია 36-ჯერ შეცვალა - რისთვის იყო ეს საჭირო

84
(განახლებულია 23:00 29.06.2020)
გადაწყვეტილების მიღების პროცესს, რომლისთვისაც ქვეყანას ერთი წელიწადი დასჭირდა, თან ახლდა ხმაურიანი საპროტესტო აქციები, ურთიერთბრალდებები, სისხლის სამართლის საქმეები, ულტიმატუმები და მოლაპარაკებები, რომლებიც არაერთხელ აღმოჩნდა ჩაშლის საფრთხის წინაშე

ბოლოსდაბოლოს საქართველოს პარლამენტმა ქვეყნის კონსტიტუცია შეცვალა და 2020 წლის 31 ოქტომბრის არჩევნების ჩატარების ახლებური წესი განსაზღვრა.

დღემდე ქვეყნის მთავარ კანონში 150 დეპუტატიდან 73-ს ირჩევდნენ პირდაპირი კენჭისყრით და დანარჩენებს - პარტიული სიებით. ამით ოპოზიცია უკმაყოფილო იყო. პოლიტიკური კრიზისის შემდეგ მმართველი პარტია საარჩევნო სისტემის რეფორმას დასთანხმდა.

კონსტიტუცია – სახელოში დამალული ტუზი >>

კონსტიტუციონალისტი ვახტანგ ხმალაძე: „თავიდან პარლამენტი 235 დეპუტატისგან შედგებოდა, რომელთაგან 150 პროპორციული სისტემით აირჩეოდა. შემდეგ კონსტიტუციაში ცვლილებები შეიტანეს და 2008 წლიდან პარლამენტი შედგებოდა უკვე 150 დეპუტატისგან. 2018 წელს კონსტიტუციაში შეტანილ იქნა ცვლილებები, რომელთა თანახმად, პარლამენტის 150-ვე წევრი პროპორციული სისტემით აირჩევა, მაგრამ ეს ნორმა ძალაში შევა 2024 წლიდან. ახლანდელი ცვლილებები შუაში აღმოჩნდა - ისინი შეეხება 2020 წლის არჩევნებს“.

ქართული თავსატეხი

მიღებული ცვლილებები გავრცელდება 2020 წლის 31 ოქტომბრის არჩევნებზე და 2024 წლამდე ჩასატარებელ ყველა რიგგარეშე არჩევნებზე.

შესწორებების შედეგად არჩევნებზე პარტიებისთვის გამსვლელი ბარიერი იქნება 1%. ეს ნიშნავს, რომ ქართული პარტიების უმრავლესობა, რომელთა ლიდერები ქართულ მასმედიაში პერიოდულად გაიელვებენ ხოლმე, მოხვდებიან პარლამენტში ისე, რომ მათ უმეტესობას რეგისტრაციისთვის ხელმოწერების წარდგენაც არ დასჭირდება.

2020 წელს მაჟორიტარული ოლქები დარჩება, თუმცა 73-ის ნაცვლად - 30. გაიმარჯვებს კანდიდატი, რომელიც ამომრჩეველთა ხმების ნახევარზე მეტს მიიღებს.

მოფიქრებულია ძალიან რთული მექანიზმი, რომლის წყალობითაც მაჟორიტარულ ოლქებში გამარჯვება მთლიანობაში უპირატესობას არ იძლევა. პარლამენტში წარმომადგენლობა ახლა მთლიანად დამოკიდებული იქნება მხოლოდ პროპორციული არჩევნების შედეგებზე და არა ოლქებში გამარჯვებულების რაოდენობის დაჯამებაზე, როგორც ეს ადრე იყო.

ვისთვის არის ხელსაყრელი ცვლილებები

ექსპერტი ვახტანგ ძაბირაძე ფიქრობს, რომ შესწორებების მიღებით მოგებული დარჩება ოპოზიცია.

„საქართველოს ხელისუფლებისთვის ხელსაყრელი იყო მაჟორიტარული ოლქების რაოდენობა, რადგან მას ყველა ბერკეტი ჰქონდა რაიონებში გამარჯვების მოსაპოვებლად. სწორედ ამიტომ ჩავარდა შესწორებები 2020 წლიდან პროპორციულ სისტემაზე გადასვლის შესახებ“, - განუცხადა ძაბირაძემ Sputnik-საქართველოს.

მისი აზრით, ცვლილებები მმართველ პარტიას არჩევნებზე პრობლემებს შეუქმნის და შესაძლოა მან ვერ მიიღოს უმრავლესობა პარლამენტში, თუმცა პირველ ადგილზე მაინც გავა.

„მაჟორიტარულ არჩევნებში ალბათ მმართველი პარტია გაიმარჯვებს, პროპორციულში კი უფრო გაუჭირდება, პარტიებს შორის პირველ ადგილზე გავა, მაგრამ პარლამენტში უმრავლესობას ალბათ ვერ მიიღებს“, - განაცხადა ძაბირაძემ.

ყველა კმაყოფილია

შესწორებების მიღებით ახლა ხელისუფლებაც კმაყოფილია და ოპოზიციაც, თუმცა მმართველ პარტია „ქართულ ოცნებაში“ არ დავიწყებიათ შენიშვნების გამოთქმა „ევროპული საქართველოს“ და „ნაციონალური მოძრაობის“ მისამართით, რომლებსაც არჩევნებზე მთავარ ოპონენტებად მიიჩნევენ. ამ პარტიებს ბოიკოტის გამო საკონსტიტუციო ცვლილებების კენჭისყრაში მონაწილეობა არ მიუღიათ.

„ვფიქრობ, დღევანდელი კენჭისყრა იყო ის ზღვარი, რომლის ერთ მხარეს დარჩნენ „ევროპული საქართველო“ და „ნაციონალური მოძრაობა“, მეორეზე კი აღმოჩნდა პროსახელისუფლებო ძალა და ახალი ოპოზიცია, რომელმაც დაპირება შეასრულა და შესწორებებს მხარი დაუჭირა. ახლა საზოგადოება გაიგებს, ვინაა ის ძალა, რომელსაც პასუხისმგებლობის აღება შეუძლია“, - განაცხადა საქართველოს პარლამენტის თავმჯდომარე არჩილ თალაკვაძემ.

ოპოზიცია კი კმაყოფილებას არ მალავდა.

„ძალიან კარგი დღეა და „ევროპული საქართველო" ძალიან კმაყოფილია კონსტიტუციაში საარჩევნო სისტემის ცვლილებების ასახვით. მე მგონი, რომ მთლიანად ოპოზიციური სპექტრიც კმაყოფილია. ისეთ მდგომარეობაში იყო ივანიშვილის გუნდი, რომ რის წინააღმდეგაც იყვნენ, იმას მისცეს ხმა და ახლა ზეიმობენ საკუთარ თავზე გამარჯვებას. კარგი იქნება არქივიდან იმ კადრების ამოღება, სადაც ქართული ოცნების ლიდერები ერთხმად ამტკიცებენ, რომ საარჩევნო სისტემის შეცვლის „საკითხი დახურულია". ეს აჩვენებს საზოგადოებისა და საქართველოს მეგობრების ძალას, რომ ასეთ კომიკურ მდგომარეობაში არიან ახლა", - განაცხადა ბოკერიამ.

ფრაქცია „ერთიანი ნაციონალური მოძრაობის" თავმჯდომარე რომან გოცირიძემ საკონსტიტუციო შესწორებებზე საუბრისას ჟურნალისტებს განუცხადა, რომ „ქართულმა ოცნებამ" საერთაშორისო ზეწოლას ვერ გაუძლო.

„ვერ გაუძლო „ქართულმა ოცნებამ" და ბიძინა ივანიშვილმა საერთაშორისო და შიდა ზეწოლას. ის განცხადებები, რომელიც მოდიოდა დასავლეთიდან, მათ შორის, პირადი სანქციების დაწესების სახით ბიძინა ივანიშვილისადმი, ფაქტობრივად, აღმოჩნდა გადამწყვეტი ამ გადაწყვეტილების მიღებაში. ძალიან კარგი რამ მოხდა. მადლობა უნდა ვუთხრათ იმ თავისუფალ დეპუტატებს და სხვა ოპოზიციურ პარტიებს, რომლებმაც უზრუნველყვეს საკონსტიტუციო ცვლილებების გატანა", - განაცხადა გოცირიძემ.

მომავალი ქაოსშია

პოლიტოლოგი რამაზ საყვარელიძე ფიქრობს, რომ არჩევნების ახალი სისტემა შექმნის მრავალპარტიულ პარლამენტს და ეს გამოიწვევს ერთგვარ, მაგრამ აუცილებელ ქაოსს მის მუშაობაში.

„თუმცა პარლამენტი ქმედუნარიანი იქნება, რამდენადაც გადამწყვეტი უმრავლესობა „ოცნებას" დარჩება. ოპოზიცია იყვირებს, მაგრამ არ ექნება იმდენი ხმა, რომ გადაწყვეტილებაზე გავლენა მოახდინოს", - განაცხადა საყვარელიძემ.

პოლიტოლოგი ვახტანგ მაისაია კი მიიჩნევს, რომ საპარლამენტო არჩევნების შემდეგ საკანონმდებლო ორგანოში „კადრების დიდი მოძრაობაა" მოსალოდნელი. ამ კუთხით მისი არგუმენტია ის, რომ ქართულ პოლიტიკაში ბევრია „ერთდღიანი პარტია".

„ამას იმით ვხსნი, რომ ბევრი მცირე პოლიტიკური პარტია გარკვეული ინტერესების გასატარებლად გარკვეული დროით იქმნება, რის შემდეგაც ისინი იხურებიან. ამიტომ შეიძლება ვივარაუდოთ, რომ ახალ პარლამენტში დიდი მოძრაობა იქნება", - განაცხადა მაისაიამ.

თუმცა ექსპერტების ნაწინასწარმეტყველებ „სასარგებლო ქაოსამდე“ ჯერ ოთხი თვეა. ოპოზიციასა და ხელისუფლებას მოუწევს საარჩევნო კოდექსზე მუშაობა, შემდეგ კი ერთმანეთისთვის კონკურენციის გაწევა წინასაარჩევნო კამპანიის დროს.

ამასთან, როგორც გამოკითხვები ცხადყოფს, რიგით მოქალაქეებს ნაკლებად აღელვებთ არჩევნების სისტემა და პოლიტიკოსების დავა. უფრო აქტუალურია კითხვა, წავლენ თუ არა ისინი არჩევნებზე. ბოლო პერიოდში არჩევნებში მონაწილეთა რაოდენობა წლიდან წლამდე მცირდება.

84
თემები:
საქართველოს პოლიტიკური ცხოვრება (250)
„ქართული ოცნების“ მთავარი ოფისი

პირველად ივანიშვილის გარეშე: „ქართული ოცნება“ ყრილობისთვის ემზადება

19
ყრილობის 400 დელეგატი აირჩევს პარტიის ახალ თავმჯდომარეს - მის ამჟამინდელ აღმსასრულებელ მდივან ირაკლი კობახიძეს

თბილისი, 15 იანვარი - Sputnik. ქვეყნის მმართველი პარტია „ქართული ოცნება - დემოკრატიული საქართველო" შაბათს გამართავს თავის პირველ ყრილობას, რომელსაც არ დაესწრება მისი დამფუძნებელი და სულის ჩამდგმელი, ქართველი მილიარდერი ბიძინა ივანიშვილი.

ივანიშვილმა მოულოდნელად გამოაცხადა გასულ კვირას, რომ ტოვებს პოლიტიკას, პარტიის ხელმძღვანელის პოსტსა და საჯარო ცხოვრებას და აღარ ჩაერევა „ქართული ოცნების“ საქმეებში და მის ლიდერებს კონსულტაციებს აღარ გაუწევს.

ყრილობის 400 დელეგატი აირჩევს პარტიის ახალ თავმჯდომარეს - მის ამჟამინდელ აღმსასრულებელ მდივან ირაკლი კობახიძეს, აგრეთვე პოლიტსაბჭოს 21 წევრს. პოლიტსაბჭოს შემადგენლობას პარტია მალავს ყრილობამდე, თუმცა ცნობილი გახდა, რომ მმართველი პარტიის გენერალური მდივანი კვლავ თბილისის მერი კახა კალაძე იქნება.

„დავიცავ შეთანხმებებს და პრინციპს, რომ დეტალებზე წინასწარ არ ვსაუბრობთ. ხვალ გაიგებთ ამის შესახებ ყველაფერს. განსაკუთრებული სიურპრიზები არ იქნება. წინასწარ გარკვეული ინფორმაციები ვრცელდება ხოლმე, დასახელებული გვარებიდან შეიძლება ზოგი მართალი იყოს და ზოგი არა. ხვალ ამის შესახებ პირდაპირ ეთერში გაიგებთ“, - განაცხადა პარტიის ერთ-ერთმა ლიდერმა მამუკა მდინარაძემ.

„ქართული ოცნება" ივანიშვილმა 2011 წლის დეკემბერში დააფუძნა. ივანიშვილი პარტიას ხელმძღვანელობდა ორჯერ - 2015 წლამდე და 2018 წლის ივნისის შემდეგ. დღეს პარტიის პოლიტსაბჭოში 12 ადამიანია - კახა კალაძე, ირაკლი კობახიძე, ირაკლი ღარიბაშვილი, დიმიტრი სამხარაძე, გია ვოლსკი, არჩილ თალაკვაძე, მამუკა მდინარაძე, დავით საგანელიძე, მაია ცქიტიშვილი, სოზარ სუბარი, ილია ნაკაშიძე და ირაკლი ტრიპოლსკი.

19
ევროპის საბჭოს საპარლამენტო ასამბლეის სხდომათა დარბაზი

PACE უკმაყოფილოა ოპოზიციის მიერ საქართველოს პარლამენტის მუშაობის ბოიკოტირებით

24
პარლამენტი - დებატებისა და პოლიტიკური ცხოვრების ადგილია და ამიტომ ასამბლეა საპარლამენტო ბოიკოტების წინააღმდეგია, ნათქვამია ევროსაბჭოს საპარლამენტო ასამბლეის მოხსენებაში.

თბილისი, 15 იანვარი - Sputnik. ოპოზიციური პარტიები უნდა შევიდნენ პარლამენტში და უარი თქვან ბოიკოტზე, ნათქვამია ევროპის საბჭოს საპარლამენტო ასამბლეის (PACE) მონიტორინგის კომიტეტის დასკვნაში.

საპარლამენტო არჩევნები საქართველოში 31 ოქტომბერს ჩატარდა. ოპოზიციური პარტიების უმრავლესობამ არჩევნების შედეგები არ ცნო და საკანონმდებლო ორგანოს მუშაობას ბოიკოტი გამოუცხადა. 60 ოპოზიციონერი დეპუტატიდან პარლამენტში შევიდა მხოლოდ 4 ადამიანი. ისინი პარლამენტში მოხვედრილ არცერთ ძალას არ წარმოადგენენ, მათ ახალი პარტია შექმნეს.

ევროპის საბჭოს საპარლამენტო ასამბლეამ გამოაქვეყნა ყოველწლიური მოხსენება რამდნეიმე ქვეყანაში არსებული ვითარების შესახებ. ქვეყნების ჩამონათვალში საქართველოც მოხვდა.

„სამწუხაროდ, ოპოზიციურმა პარტიებმა, რომლებმაც არჩევნები გაყალბებულად გამოაცხადეს, თქვეს, რომ ბოიკოტს უცხადებენ მეორე ტურსა და ახალ პარლამენტს. ეს განსაკუთრებით სამწუხაროა იმის გათვალისწინებით, რომ ამ არჩევნების შედეგებმა ოპოზიციურ პარტიებს მიანიჭა ძლიერი პოზიციები საპარლამენტო ზედამხედველობის განხორციელებისთვის. პარლამენტი - დებატებისა და პოლიტიკური ცხოვრების ადგილია და ამიტომ ასამბლეა საპარლამენტო ბოიკოტების წინააღმდეგია“, - ნათქვამია მოხსენებაში.

აქვე აღნიშნულია, რომ მართალია, არჩევნები კონკურენტული იყო, კონკურენციის პირობები არათანაბარი იყო „ადმინისტრაციული რესურსის გამოყენებისა და სახელმწიფოსა და მმართველ პარტიას შორის საზღვრების წაშლის გამო“.

ევროპის საბჭოს საპარლამენტო ასამბლეის კომიტეტი მიიჩნევს, რომ ყველა ბრალდება არჩევნების არამართლზომიერად ჩატარებაში, რაც სერიოზულ შეშფოთებას იწვევს, სრულად უნდა იქნეს გამოძიებული და დამნაშავეები უნდა დაისაჯონ.

ანგარიშში მითითებულია, რომ მიუხედავად გასული წლის მარტში მთავრობასა და ოპოზიციას შორის საარჩევნო სისტემის ცვლილების შესახებ მიღწეული შეთანხმებისა, პოლიტიკური კლიმატი საქართველოში პოლარიზებული და სადავოა.

24
გველეთის ჩანჩქერი

დღის ასტროპროგნოზი ზოდიაქოს ნიშნებისთვის: 16 იანვარი

0
(განახლებულია 11:36 15.01.2021)
გთავაზობთ ყოველდღიურ ასტროლოგიურ პროგნოზს ზოდიაქოს თითოეული ნიშნისთვის. გაიგეთ ჩვენი ჰოროსკოპიდან, რას გიმზადებენ ვარსკვლავები და რას გირჩევენ ასტროლოგები

დღეს 2021 წლის 16 იანვარია, შაბათი. მზარდი მთვარე თევზების ნიშანშია. ამ დღეს პლანეტა სატურნი მფარველობს.

დღეს ცხოვრების სხვადასხვა სფეროში მთავარი გახდება ისეთი თვისებები, როგორიცაა კონკრეტულობა და პრაგმატიზმი. როდესაც ხელს მოჰკიდებთ ნებისმიერ საქმეს, დაფიქრდით, გჭირდებათ თუ არა ის და რას მიიღებთ ამისგან. სწორედ ასე ირგვლივ მყოფი ადამიანებიც ნებისმიერ საკითხში თავიანთ ინტერესებზე დაფიქრდებიან. რამის გაკეთება მხოლოდ ალტრუიზმის გამო ძალზე რთული იქნება. ამიტომ, თუ რამის გაკეთებას გადაწყვეტთ, საკუთარი აზრი მკაფიოდ უნდა ჩამოაყალიბოთ: რა უნდა გაკეთდეს, რატომ და ვის რა სარგებელს მოუტანს ეს.

2021 წლის მთავარი მიმოხილვა: როგორი იქნება ხარის წელიწადი აღმოსავლური ჰოროსკოპის მიხედვით>>

ვერძი: დღეს ძალებისგან გამოფიტვა გემუქრებათ – სულ უბრალო საქმის გაკეთებაც კი გაგიჭირდებათ. ამიტომ სამომავლოდ გადადეთ ყველაფერი, რისი გადადებაც შესაძლებელია. თუ საქმე თქვენს აქტიურ ჩარევას მოითხოვს, ამ შემთხვევაში არაა გამორიცხული, რომ ყველაფერში ქაოსი შეიტანოთ. ამის ბრალი იქნება არა მხოლოდ ფიზიკური მდგომარეობა, არამედ პესიმისტური სულიერი განწყობაც. ექსპერტები ამბობენ, რომ საკმარისი იქნება, თავს შეუძახოთ და მელანქოლიური მდგომარეობიდან გამოხვიდეთ, რომ ეს დღე საკმაოდ კარგ შესაძლებლობებს გააჩენს.

კურო: კაშკაშა ემოციებით სავსე დღე გელოდებათ. მდიდარი წარმოსახვის წყალობით შემოქმედებით საქმიანობაში თავის გამოჩენა შეგიძლიათ. თუმცა მთავარი მაინც დღეს გრძნობათა სპონტანურობა იქნება – ვნებათა მთელი „ქარტეხილი“. ამის საბაბი ნებისმიერ რამ შეიძლება გახდეს – ღიმილი, პაემანზე დაპატიჟება, საკუთარი ფანტაზიები, რამე მინიშნება... თქვენი დღე ცისარტყელის ყველა ფერით აივსება და ყველაფერი იმ განცდების წყალობით, რომლებიც თქვენს გულს ააძგერებს.

ტყუპი: დღეს რაღაც საკითხში გამარჯვება გელოდებათ. ეს შეიძლება იყოს პროექტის წარმატებით დასრულება, გამარჯვება სიყვარულში, ან ვინმესთვის კამათის მოგება. ვარსკვლავები გირჩევენ, გამოიყენოთ ეს იმისთვის, რომ არა მხოლოდ განამტკიცოთ მიღწეული პოზიციები, არამედ წინაც გადადგათ ნაბიჯი და კონკურენტები უკან მოიტოვოთ. ეს დღე იდეალურია იმისთვის, რომ დაისახოთ ამბიციური გეგმები, მიაღწიოთ სასურველს და კარიერის საკითხებს მიხედოთ.

კირჩხიბი: დღეს ვარსკვლავები კარგ შესაძლებლობებს მოგცემენ და შანსები რომ ხელიდან არ გაუშვათ, სწრაფად ფიქრი და მოქმედებებია საჭირო. დიდი ალბათობით, საჭირო იქნება მოქნილი და არასტანდარტული მოქმედება. ამისთვის კი ყველა თვისება გაქვთ: კომუნიკაბელურობა, სწრაფი რეაქცია და ავანტიურული სული. ეს ყველაფერი დაგეხმარებათ, რომ გარშემომყოფების სიმპათია მოიპოვოთ და ნებისმიერი მოვლენა თქვენ სასარგებლოდ შემოაბრუნოთ, ანუ გაქვთ შანსი, „მინუსი“ „პლუსად“ აქციოთ.

ლომი: ესაა დღე, როდესაც რეალობად შეგიძლიათ აქციოთ ყველაზე გრანდიოზული გეგმებიც კი. ვარსკვლავები დიდ წარმატებებს გპირდებიან ამბიციურ წამოწყებებში. თუ რამე გლობალურ პროექტს წამოიწყებთ ცხოვრების ნებისმიერ სფეროში, სამუშაო იქნება ეს, ბიზნესი, სიყვარული თუ სხვა, არ ინანებთ: გეგმები დროთა განმავლობაში განხორციელდება, ხოლო შედეგი ყველა მოლოდინს გადააჭარბებს. სწორედ ამიტომ არ ღირს „დაწვრილმანება“ და დროის უაზრო და ყოველდღიურ საზრუნავზე დახარჯვა – არ შეუშინდეთ ოცნებებს და იმოქმედეთ – წინ ახალი ჰორიზონტები გელოდებათ.

ქალწული: დღეს რაღაც საკითხში არჩვენის წინაშე დადგომა მოგიწევთ. შესაძლოა, ეს საკითხი მნიშვნელოვნად არც მოგეჩვენოთ, მაგრამ ვარსკვლავები გაფრთხილებენ: ამ გადაწყვეტილებაზე შემდგომ ბევრი რამ იქნება დამოკიდებული. სწორედ ამიტომ გადაწყვეტილების მიღებისას არ აჰყვეთ ემოციებს, სხვების რჩევებს, „მკითხაობას“. საკითხზე კარგად დაფიქრდით, პასუხისმგებლობით მოეკიდეთ მას და ეს თქვენი არჩევანი შემდეგ სანანებელი არ გაგიხდებათ.

სასწორი: დღეს უკომპრომისოდ ხართ განწყობილი – ან ყველაფერი, ან არაფერი. მიზანს მკაფიოდ დაინახავთ და მისკენ მიმავალ გზაზე მომთხოვნი იქნებით როგორც გარშემომყოფების, ისე საკუთარი თავისადმი. გასაკვირი არ იქნება, თუ უკმაყოფილო იქნებით და გააკრიტიკებთ ირგვლივ მყოფებს. თქვენ ფიქრობთ, რომ გინდათ, საქმე კარგად წავიდეს, გარშემომყოფები კი ფიქრობენ, რომ მათ ექსპლუატაციას ეწევით და მათზე მბრძანებლობთ. სხვათა შორის, ამგვარი დამოკიდებულების წყალობით ბევრი რამის მიღწევა შეგიძლიათ, მაგრამ არა ადამიანებთან ურთიერთობებში.

მორიელი: დღეს „დამოუკიდებლობის“ დღე გაქვთ. ირგვლივ მყოფთა მოსაზრებები ყველაზე ნაკლებად აგაღელვებთ – დარწმუნებული ხართ საკუთარ სიმართლეში და ყველაფერში, რასაც აკეთებთ. ასეთი განწყობა, ერთი მხრივ, დაგეხმარებათ ბიზნესში და გადაწყვეტილებების მიღებაში, თუმცა, მეორე მხრივ, ეს ჩხუბის მიზეზიც შეიძლება გახდეს. სხვათა შორის, თუ ვინმეს თქვენთან თანამშრომლობის სურვილი გაუჩნდება, არაა საჭირო კამათი, საკმარისი იქნება რჩევის კითხვა – თქვენ ბრძენი მრჩევლის როლს სიამოვნებით შეასრულებთ, გაუზიარებთ მას საკუთარ გამოცდილებას, მხარს დაუჭერთ და დაეხმარებით.

მშვილდოსანი: თქვენი ენერგიულობა დღეს მხოლოდ შესაშური იქნება: აქტიურობა, შრომისუნარიანობა, თავდაჯერებულობა. არაა გასაკვირი, თუ ასეთი შემართებითა და მოზღვავებული ძალებით ყველაზე რთულ და მწვავე საკითხებს შეეჭიდებით, იქნება ეს ძველი, თაროზე შემოდებული საქმეები თუ ახალი პროექტი. ვარსკვლავები წინასწარმეტყველებენ, რომ რასაც არ უნდა მოჰკიდოთ ხელი, ყველაფერი გამოგივათ. მთავარია, ეცადოთ და არ გააღიზიანოთ გარშემომყოფები თქვენი „რკინისებრი“ თავდაჯერებულობით.

თხის რქა: დღეს მოულოდნელი სირთულეები გელოდებათ, თუმცა კარგი ამბავი ისაა, რომ უამრავი ძალა და ენერგია გექნებათ მათთან საბრძოლველად. ვარსკვლავები და პლანეტები დაგეხმარებიან, რომ აღიჭურვოთ ნებისყოფით, კომუნიკაბელურობით, სხვების დარწმუნების უნარით, რომელთა წყალობითაც ნებისმიერი სიტუაციის თქვენთვის სასარგებლოდ შემობრუნება შეგიძლიათ. ყოველი ვითარების უკან ხომ, როგორც წესი, კონკრეტული ადამიანები დგანან, ხოლო ადამიანებთან შეთანხმებას აუცილებლად შეძლებთ.

მერწყული: დღეს თქვენთვის მშრალი ფაქტებისა და ციფრების დღეა, ხოლო ყველაფერი, რისი დასაბუთებაც ლოგიკურად არის საჭირო, გართულდება. სწორედ ამიტომ ვარსკვლავები გირჩევენ, ენდოთ ისეთ არასაიმედო რამეს, როგორიც ინტუიციაა. სამაგიეროდ, გათვლები და ფაქტების ანალიზი იოლად გამოგივათ. მიუძღვენით დღე ზუსტ მეცნიერებებს, დაგეგმვასა და ფინანსებს – არ ინანებთ. ბევრი რამ შეგიძლიათ, მაგალითად, გადასახადების მოწესრიგება, ბიუჯეტის გათვლა და გენიალური გეგმის შედგენა, თუ როგორ „გახდეთ მილიონერი“.

თევზები: დღეს რისკავთ, რომ თქვენი თავდაჯერებულობა ამპარტავნებაში გადაიზარდოს. სხვა რა შეიძლება ეწოდოს იმას, რომ შეგიძლიათ, უარი უთხრათ ირგვლივ მყოფებს დახმარებაზე, უარყოთ მათი რჩევები და ეს იმით გაამართლოთ, რომ თქვენ უფრო კარგად იცით ყველაფერი. ექსპერტები გაფრთხილებენ, რომ თუნდაც 100 პროცენტით იყოთ რამეში დარწმუნებული, ეს არ ნიშნავს, რომ 100 პროცენტით მართალი ხართ. ყველაზე დიდი შეცდომა ის იქნება, იფიქროთ, რომ შეცდომას არ დაუშვებთ. წარმატებებს დღეს მხოლოდ ამის გათვალისწინებით მიაღწევთ.

0