გიორგი რურუა

გიორგი რურუას გზავნილი ციხიდან: „ეს საქმე მივიყვანოთ ბოლომდე...“

113
(განახლებულია 22:57 24.06.2020)
ოპოზიცია უარს აცხადებს კენჭისყრაში მონაწილეობაზე, გიორგი რურუას პოლიტპატიმარს უწოდებს და მის გათავისუფლებას მოითხოვს

თბილისი, 24 ივნისი - Sputnik. ოპოზიციური „მთავარი არხის“ თანამესაკუთრე გიორგი რურუამ ოპოზიციას მიმართა თხოვნით, მონაწილეობა მიიღონ საკონსტიტუციო ცვლილებებთან დაკავშირებულ კენჭისყრაში.

გიორგი რურუა იარაღის მართლსაწინააღმდეგო შეძენა-შენახვისა და ტარების ბრალდებით წინასწარ პატიმრობაში იმყოფება. თუმცა ოპოზიციის ნაწილი, მათ შორის, საპარლამენტო პარტიები „ერთიანი ნაციონალური მოძრაობა“ და „ევროპული საქართველო - მოძრაობა თავისუფლებისთვის“ მას „პოლიტპატიმრად“ მიიჩნევენ და მის გათავისუფლებამდე უარს აცხადებენ პარლამენტის მუშაობაში მონაწილეობასა და საკონსტიტუციო ცვლილებებზე კენჭისყრაში მონაწილეობაზე.

„მესამე მოსმენით კენჭისყრაში მონაწილეობა აუცილებელია, მნიშვნელობის აღნიშნვას აღარ დავიწყებ. მესმის ჩემი მეგობრების პოზიციაც, მეც ასე მოვიქცეოდი მათ ადგილას. ჩემი მძევლად დატოვება ახლა მეორე ხარისხოვანია. უპრინციპობას ჩვენ ვერავინ დაგვაბრალებს. პროპორციული საარჩევნო კანონის მიღება იყო და არის საზოგადოების მთავარი მოთხოვნა, ასევე ჩვენი საერთაშორისო მეგობრების თხოვნაც. ეს საქმე მივიყვანოთ ბოლომდე“, - ნათქვამია რურუას განცხადებაში, რომელიც მის Facebook-გვერდზე გამოქვეყნდა.

ოპოზიციის განცხადებით, ისინი პოზიციას არ შეიცვლიან. როგორც „ევროპული საქართველოს“ ერთ-ერთმა ლიდერმა გიგა ბოკერიამ აღნიშნა, მისი პარტიისთვის რურუას გათავისუფლება - პრინციპის საქმეა.

„ეს არის პრინციპის საკითხი, რომ არავინ არ შეიძლება იჯდეს ციხეში, არ აქვს მნიშვნელობა ეს მე ვარ, უგულავა, ოქრუაშვილი, ხაზარაძე თუ რურუა“, - განაცხადა ბოკერიამ.

ამავე აზრის არიან „ერთიანი ნაციონალური მოძრაობის“ წევრები.

„ვიცით ჩვენ მისი დამოკიდებულება, მაგრამ ჩვენი პოზიცია არის უცვლელი-შეთანხმება უნდა შესრულდეს. ქვეყანაში არ უნდა არსებობდეს არც ერთი პოლიტიკური პატიმარი“, - განაცხადა „ნაცმოძრაობის“ წარმომადგენელმა რომან გოცირიძემ.

მმართველ პარტიაში კი დარწმუნებული არიან, რომ ოპოზიციას, რომელიც პარლამენტში წარმოდგენილია „ევროპული საქართველოს“ და „ნაციონალური მოძრაობის“ სახით, არ სურს სტაბილურობა.

„არ ვიცი, გიორგი რურუას რიტორიკა რატომ აქვს შეცვლილი, მაგრამ ფაქტია, რომ საერთაშორისო თანამეგობრობის პოზიცია ითვალისწინებს იმას, საარჩევნო სისტემაზე შეთანხმების მიღება უნდა მოხდეს. ეს არ არის მათი ინტერესი, ეს არის სტაბილურობისთვის მოწოდება ყველა პარტიის მიმართ, რომ ქვეყანა დემოკრატიული კალაპოტიდან ამოვარდნის წინაპირობა არ შექმნას“, - განაცხადა პარტიის ერთ-ერთმა ლიდერმა გია ვოლსკიმ.

ვინ არის გიორგი რურუა

გიორგი რურუა - საქართველოს ყოფილი კულტურის მინისტრის, „ერთიანი ნაციონალური მოძრაობის“ ერთ-ერთი ლიდერის, ნიკა რურუას ძმა და არაერთი ოპოზიციონერის ახლო მეგობარია.

მის შესახებ ფართო მასებისთვის თითქმის არაფერი იყო ცნობილი 2019 წლის შემოდგომამდე, ვიდრე „რუსთავი 2“-ის ყოფილი გენერალური დირექტორის, ნიკა გვარამიას მიერ გახსნილი ოპოზიციური „მთავარი არხის“ წილი არ შეიძინა. როგორც მაშინ სამთავრობო მედია წერდა, ეს გარიგება პირდაპირ უთითებდა, რომ არხი „ერთიანი ნაციონალური მოძრაობის“ პოლიტიკას გაატარებდა.

ნოემბერში რურუა დააკავეს. შსს-ს მონაცემებით, მას ჩხრეკისას აღმოაჩნდა ცეცხლსასროლი იარაღი. ოპოზიცია ამტკიცებს, რომ რურუას იარაღი ჩაუდეს, ვინაიდან მას აქვს ოფიციალურად გაფორმებული არაერთი იარაღი და არარეგისტრირებული იარაღი არაფერში სჭირდებოდა.

ამას მოჰყვა ხანგრძლივი სკანდალი წინასწარ პატიმრობაში ყოფნისას მისი დნმ-ის აღებასთან დაკავშირებით.

ამჟამად რურუას საქმეს ჯერ კიდევ იხილავს სასამართლო და მიუხედავად მრავალი შუამდგომლობისა, არ ათავისუფლებს მას, რადგან, ბრალდების აზრით, რურუა შეიძლება ქვეყნიდან გაემგზავროს ან მოწმეებზე ზეწოლა მოახდინოს. მმართველი პარტია რურუას პოლიტიკური სარჩულით დაკავებაში ბრალდებებს უსაფუძვლოს უწოდებს და აღნიშნავს, რომ არ ერევა სასამართლოს გადაწყვეტილებებსა და გამოძიების მსვლელობაში.

113
თემები:
საქართველოს პოლიტიკური ცხოვრება (98)
სამგზავრო თვითმფრინავი ცაში

რომელი ქვეყნების მოქალაქეები და რა პირობებით ჩამოვლენ საქართველოში

146
(განახლებულია 23:31 09.07.2020)
საქართველოში ჩამოსვლა ნებადართულია 18 ქვეყნის მოქალაქეებისთვის, მაგრამ ხუთი მათგანის მოქალაქეებისთვის განსაკუთრებული შეზღუდვები არ იმოქმედებს

თბილისი, 9 ივლისი – Sputnik. თითქმის ოთხთვიანი პაუზის შემდეგ საქართველო თავის საზღვრებს 18 ქვეყნის მოქალაქეებს უხსნის, თუმცა თითოეული მათგანისთვის გარკვეული რეკომენდაციები და შეზღუდვები დაწესდა.

ქვეყნების ჩამონათალი და მოგზაურთათვის ქვეყანაში ყოფნის პირობები მოყვანილია მთავრობის განკარგულებაში, რომელიც 9 ივლისს 00:00 საათიდან ამოქმედდა. ავიაბილეთების გაყიდვის პროტოკოლები ცნობილი გახდება უახლოეს დღეებში.

ხუთი ქვეყნის მოქალაქეებისთვის საქართველოს საზღვარი ყოველგვარი პირობის გარეშე იხსნება, თუმცა მხოლოდ საჰაერო გზით. ეს არის გერმანია, საფრანგეთი, ლატვია, ლიეტუვა და ესტონეთი.

ამ ქვეყნების მოქალაქეები ქვეყანაში უნდა ჩამოვიდნენ პირდაპირი ავიარეისით და შეავსონ სპეციალური ელექტრონული ანკეტა, სადაც უნდა მიუთითონ მოგზაურობის ისტორია ბოლო 14 დღის განმავლობაში, დატოვონ საკონტაქტო ტელეფონი და იმ ადგილის მისამართი, სადაც გაჩერდებიან.

ვიზიტორთა საერთო რაოდენობის - 9 მილიონის გათვალისწინებით, გასულ წელს საქართველოს ამ ხუთი ქვეყნიდან დაახლოებით 170 ათასი ადამიანი ესტუმრა: საფრანგეთიდან - 27 951, გერმანიიდან - 89 051, ლიეტუვიდან - 22 381, ლატვიიდან – 20 514 და ესტონეთიდან - 12 482.

საქართველო ამ ეტაპზე საზღვარს უხსნის კიდევ 13 ქვეყნის მოქალაქეებსა და რეზიდენტებს: ეს არის ესპანეთი, ლუქსემბურგი, ნიდერლანდები, პოლონეთი, პორტუგალია, რუმინეთი, საბერძნეთი, შვედეთი, ხორვატია, იტალია, სლოვაკეთი, ისლანდია და კვიპროსი. მაგრამ მათთვის ორკვირიანი კარანტინის გავლა სავალდებულოა, თანაც საკუთარი ხარჯით.

კორონავირუსი საქართველოში: საგანგებო მდგომარეობის შემდეგ შეზღუდვების სრული სია/9 ივლისი >>

რაც შეეხება სამშობლოში დაბრუნებულ საქართველოს მოქალაქეებს, მათთვის 14-დღიანი კარანტინის გავლა ძალაში რჩება, თუმცა ამ შემთხვევაში ხარჯებს სახელმწიფო ფარავს.

ქვეყნების ჩამონათალი, რომელთათვის საქართველო საზღვრებს ხსნის, ორ კვირაში ერთხელ გადაიხედება და განახლდება.

 

146
ვალუტის გადაცვლის პუნქტები

მდიდრები და ღარიბები რომელ პარტიას რამდენი ფული აქვს

66
(განახლებულია 22:05 09.07.2020)
საქართველოს 19 პოლიტიკური პარტიის შემოსავლების თითქმის ნახევარი მმართველ „ქართულ ოცნებაზე“ მოდის და ყველაზე მეტსაც ის ხარჯავს.

თბილისი, 9 ივლისი – Sputnik. ამ დროისათვის საქართველოში ყველაზე მდიდარი პარტია კვლავ მმართველი „ქართული ოცნება – დემოკრატიული საქართველოა“.

დაჩქარებული წესით: პარლამენტმა საარჩევნო კოდექსში ცვლილებები საბოლოოდ დაამტკიცა>>

არასამთავრობო ორგანიზაცია „საერთაშორისო გამჭვირვალობა – საქართველოს“ 2019 წლის მონაცემებით, 19 პოლიტიკურ პარტიას შორის, რომელთა შემოსავლებში ან ხარჯებში 100 ათას ლარზე მეტი თანხა აღინიშნება, „ქართული ოცნება“ ყველაზე მდიდარია – მის ანგარიშზე თითქმის 10 მლნ ლარია.

გასულ წელს 19 პარტიის ერთიანი შემოსავალი 20 739 364 ლარი იყო. ამ თანხის თითქმის ნახევარი – 9 502 653 ლარი მმართველი პარტია „ქართული ოცნების“ ანგარიშებზე შევიდა, ნათქვამია ორგანიზაციის ანგარიშში.

მაღალშემოსავლიანი პარტიების სამეულში არიან ასევე „საქართველოს პატრიოტთა ალიანსი“ – 1 676 618 ლარი და „ევროპული საქართველო“ – 1 643 099 ლარი.

ამასთან, პარტიების მიერ მიღებული საერთო შემოსავლების 59% (12 301 675 ლარი) – სახელმწიფოს დაფინანსებაა, ხოლო 41% (8 437 689 ლარი) – კერძო პირების შემოწირულობები.

ანგარიშის თანახმად, თუ მხედველობაში არ მივიღებთ „ქართულ ოცნებას“, დანარჩენი 18 პარტიის სახსრების 88% სახელმწიფო დაფინანსებაზე მოდის, ეს კი ნიშნავს, რომ ისინი, პრაქტიკულად, ბიუჯეტზე არიან დამოკიდებული.

ამ 19 პარტიიდან მხოლოდ ერთს – „ლელოს“ არ მიუღია სახელმწიფო დაფინანსება, რადგან 2019 წელს შეიქმნა და არჩევნებში მონაწილეობა ჯერ არ მიუღია.

გზა ხსნილია: რამდენი ხელმოწერა უნდა შეაგროვონ პარტიებმა არჩევნებში მონაწილეობისთვის>>

„2019 წელს 19 პარტიიდან 13-მა მთლიანობაში 8 362 581 ლარის ოდენობის შემოწირულება მიიღო 450 ფიზიკური და 26 იურიდიული პირისგან. შემოწირულებების 84% – 7 036 166 ლარი მმართველ პარტიაზე მოდიოდა“, – აღნიშნულია ანგარიშში.

ანუ „ქართულმა ოცნებამ“ 14-ჯერ მეტი თანხა მიიღო, ვიდრე „ლელომ”, რომელიც კერძო დაფინანსების მხრივ მეორე ადგილზე იმყოფება და 5-ჯერ მეტი, ვიდრე დანარჩენმა 18-მა პარტიამ ერთად.

გასული წლების ანალიზის საფუძველზე „საერთაშორისო გამჭვირვალობა – საქართველომ“ დაადგინა ფიზიკური და იურიდიული პირების მუდმივი წრე, რომლებიც „ქართულ ოცნებას“ ყველა არჩევნებზე აფინანსებენ. ყველა ამ ბიზნეს-ჯგუფს ერთი მახასიათებელი აქვს – მათი წევრების უმრავლესობა თანხას მმართველ პარტიას ერთსა და იმავე დღეს, ან 1–2 დღის განსხვავებით ურიცხავს, რაც ეჭვებს ბადებს – ხომ არ არის ეს „კოლექტიური აქცია“ ვინმეს მიერ წინასწარ ორგანიზებული.

რაც შეეხება ხარჯებს, არასამთავრობო ორგანიზაციის მონაცემებით, 2019 წელს 19-მა პარტიამ მთლიანობაში დახარჯა 20 723 057 ლარი, აქედან 43% – 8 877 711 ლარი – მმართველმა პარტიამ. 2 206 248 ლარით მეორე ადგილზეა „ევროპული საქართველო“, ხოლო მესამეზე 1 671 775 ლარით – „პატრიოტთა ალიანსი“.

პარტიებმა 2019 წელს რეკლამაზე დახარჯეს 2 352 736 ლარი, ამ თანხის 74% – 1 747 140 ლარი „ქართულ ოცნებაზე“ მოდის. მმართველმა პარტიამ რეკლამაზე სამჯერ მეტი დახარჯა, ვიდრე 18-მა პარტიამ ერთად (605 596 ლარი), ნათქვამია ანგარიშში.

„პოლიტიკური დაფინანსების მნიშვნელოვან გამოწვევას Facebook-ზე დასპონსორებული პოლიტიკური შინაარსის საინფორმაციო მასალა წარმოადგენს, რომლის დამკვეთიც არ არის საჯარო“, – აღნიშნავენ ორგანიზაციაში და დასძენენ, რომ სახელმწიფო აუდიტის სამსახური ვერ აკონტროლებს ფინანსების ხარჯვას სოციალურ ქსელებში და ეს პრობლემა გადაჭრას მოითხოვს.

როგორც არასამთავრობო ორგანიზაცია აღნიშნავს, სახელმწიფო აუდიტის მხრიდან მეტი ყურადღება უნდა დაეთმოს პარტიების ფინანსური დეკლარაციების ეფექტურ შემოწმებას, ხოლო პარტიებმა მეტი აქცენტი უნდა გააკეთონ სახსრების სხვადასხვა აქციითა და კამპანიით მოზიდვაზე.

66
თემები:
საქართველოს პოლიტიკური ცხოვრება (98)
მყიდველები ბაზარში

კორონავირუსი საქართველოში: საგანგებო მდგომარეობის შემდეგ შეზღუდვების სრული სია/10 ივლისი

86394
საქართველოში საგანგებო მდგომარეობა ერთი თვის წინ მოიხსნა, მაგრამ მთავრობამ შეზღუდვების ნაწილი ძალაში დატოვა.

თბილისი, 10 ივლისი – Sputnik. საქართველოს მთავრობა აგრძელებს კორონავირუსის პანდემიის გამო დაწესებული შეზღუდვების მოხსნას, მაგრამ ამავე დროს მთავრობა და ეპიდემიოლოგები მოუწოდებენ მოქალაქეებს გამოიჩინონ სიფრთხილე და დაიცვან ჯანდაცვის სამინისტროს რეკომენდაციები.

ქვეყნის ტერიტორიაზე მოქმედებს შემდეგი შეზღუდვები:

  • დახურულ სივრცეებში, საჯარო დაწესებულებებში, საზოგადოებრივ ტრანსპორტში, ოფისებსა და მაღაზიებში სავალდებულოა პირბადის ტარება და სოციალური დისტანციის დაცვა;
  • საზოგადოებრივ ტრანსპორტში დაუშვებელია პირბადის გარეშე ყოფნა და კონდიციონერების ჩართვა;

  • ტაქსის მძღოლისთვის სავალდებულოა პირბადის ტარება, ტაქსით ორზე მეტი მგზავრის გადაყვანა არ შეიძლება, ისიც უკანა სავარძელზე;
  • დახურულ სივრცეებში აკრძალულია კულტურული და სპორტული ღონისძიებების გამართვა;
  • კაზინოების და ტოტალიზატორების მუშაობა დაშვებულია მხოლოდ ონლაინ;
  • აკრძალულია 10-ზე მეტი ადამიანის თავშეყრა ტრადიციულ სოციალურ ღონისძიებებზე (ქორწილი, ნებისმიერი იუბილე, ქელეხი და ა.შ.);
  • უნივერსიტეტებში სასწავლო პროცესი კვლავ დისტანციურად განხორციელდება;
  • ადამიანების თავშეყრის ადგილებში აკრძალულია სპლიტ-სისტემის კონდიციონერების გამოყენება, რომლებიც ჰაერს იღებენ შენობიდან, აგრილებენ და ისევ აბრუნებენ. დაშვებულია სამრეწველო კონდიციონერების გამოყენება, რომლებიც კონდიცირება-ვენტილაციის სისტემებს მოიცავს (ჰაერი შენობაში გარედან შეაქვს).

ამ მომენტისათვის ინფიცირებულთა რაოდენობა 968 ადამიანს შეადგენს, აქედან 844 გამოჯანმრთელდა, 15 კი გარდაიცვალა. კიდევ სამი ინფიცირებული მოქალაქე სამკურნალოდ სხვა ქვეყნებიდან ჩამოიყვანეს.

საქართველო სხვა ქვეყნებისთვის კორონავირუსთან ბრძოლაში სამაგალითოა >>

15 ივნისიდან აღდგა შიდა ტურიზმი, ხოლო 1 ივლისიდან საქართველო საზღვრებს უცხოელი ტურისტებისთვის გახსნის.

უწყებათშორისი საკოორდინაციო საბჭო ოპერატიულად აფასებს სიტუაციას და შეიმუშავებს ახალ რეკომენდაციებს და შეზღუდვებს.

მთავრობის სპეციალურ ვებ-გვერდზე stopcov.ge გამოქვეყნებული ბოლო მონაცემების თანახმად, საკარანტინო სივრცეში იმყოფება 4851, სტაციონარებში მეთვალყურეობის ქვეშ კი 231 ადამიანია.

მთავრობა მოსახლეობას მოუწოდებს, ქვეყანაში კორონავირუსთან დაკავშირებით მხოლოდ და მხოლოდ გადამოწმებულ და ოფიციალურად დადასტურებულ ინფორმაციას ენდონ. ყველა ინფორმაციის მოძიება შესაძლებელია მთავრობის მიერ სპეციალურად შექმნილ ვებ-გვერდზე stopcov.ge.

„ცხელი ხაზის“ ნომრები: ცხელი ხაზი კარანტინის რეჟიმის საკითხებზე – 144. საქართველოს ჯანდაცვა – 15 05 (დღე-ღამის განმავლობაში); დაავადებათა კონტროლის ცენტრი – 116 001 (21:00-მდე სამუშაო დღეებში და 18:00-მდე დასვენების დღეებში).

ყველა მოხალისეს, რომელსაც აქვს დრო და სურვილი დაეხმაროს ხანდაზმულ ადამიანებს, ასევე მათ, ვისაც სპეციალური დახმარება ესაჭიროება, შეუძლია დარეკოს მერიის ცხელ ხაზზე (032)2722222 და წითელი ჯვრის ცხელ ხაზზე - 0800 000 018.

კორონავირუსი საქართველოში: შეზღუდვების მოხსნის ეტაპები
© Sputnik / Konstantin Ivanov.
კორონავირუსი საქართველოში: შეზღუდვების მოხსნის ეტაპები
86394
თემები:
COVID-19 საქართველოში