გიორგი რურუა

რურუას საქმე - საჯილდაო ქვა ქართულ პოლიტიკაში

245
(განახლებულია 20:19 22.06.2020)
„მთავარი არხის“ ერთ-ერთი მფლობელის სასამართლო პროცესი გრძელდება - სასამართლომ ამჯერადაც არ დააკმაყოფილა დაცვის შუამდგომლობა ბრალდებულის გირაოს სანაცვლოდ გათავისუფლების შესახებ

თბილისი, 22 ივნისი - Sputnik. „მთავარი არხის“ ერთ-ერთი დამფუძნებლის საქმეზე სასამართლო პროცესი, რომელიც უკვე ერთი თვეა გრძელდება, ორშაბათს ბრალდებულის განცხადებით დაიწყო.

„მივესალმები გუშინდელ მოვლენებს პარლამენტში და იმედი მაქვს, რომ 8 მარტის შეთანხმება ბოლომდე შესრულდება. ეს ჩვენი საზოგადოებისთვის, ჩვენი მომავლისთვის ძალიან მნიშვნელოვანი საკითხია და მახარებს, რომ გადადგმულია ნაბიჯი წინ“, - ასეთი პოლიტიკური განცხადება გააკეთა გიორგი რურუამ, ადამიანმა, რომელიც ქართულ პოლიტიკაში მმართველ პარტიასა და ოპოზიციას შორის  მთავარ - არჩევნების საკითხში საჯილდაო ქვად და განხეთქილების ვაშლად იქცა.

მრავალთვიანი მიტინგების, ხელისუფლებასა და ოპოზიციას შორის წარუმატებელი მოლაპარაკებების შემდეგ, დიპლომატიური კორპუსის შუამდგომლობით, 8 მარტს მხარეები შეთანხმდნენ საკონსტიტუციო ცვლილებების მიღებაზე და 2020 წლის საპარლამენტო არჩევნების ახალი სისტემით ჩატარებაზე. თუმცა ოპოზიციას აინტერესებს არა მხოლოდ საკონსტიტუციო ცვლილებები და დამდეგი არჩევნები, არამედ გიორგი რურუას გათავისუფლება, რომელსაც ოპოზიცია ერთხმად მოიხსენიებს პოლიტიკურ პატიმრად.

კვირას საქართველოს პარლამენტმა პირველი მოსმენით დაამტკიცა საკონსტიტუციო ცვლილებები, რომლებიც საპარლამენტო არჩევნების ახალი სისტემით ჩატარებას ითვალისწინებს. 150 ადგილიდან 120 გადანაწილდება იმ პარტიებს შორის,  რომლებიც 1%-იან ბარიერს გადალახავენ. დანარჩენი 30 დეპუტატი კი - მაჟორიტარული წესით ერთმანდატიან ოლქებში აირჩევა. შესწორებებს მხარი დაუჭირა 136-მა დეპუტატმა, წინააღმდეგი იყო ხუთი.

8 მარტის შეთანხმება პრაქტიკულად შესრულებულია, რომ არა ერთი „მაგრამ“... ოპოზიცია მათ მიერ დასახელებული სამი „პოლიტიკური პატიმრიდან“ ბოლო - გიორგი რურუას გათავისუფლებას ითხოვს.

გიორგი რურუას ბრალი ედება ცეცხლსასროლი იარაღის უკანონო შეძენა-შენახვასა და ტარებაში. თავად ბრალს არ აღიარებს და აცხადებს, რომ იარაღი ჩაუდეს.

თავის უდანაშაულობაზე რურუამ დღესაც ისაუბრა. მისი მტკიცებით, ჯიბეში მხოლოდ საფულე და გასაღები ედო, არავითარი იარაღი არ ჰქონია.

დღევანდელ სასამართლო სხდომაზე დაცვამ ოთხი მოწმე წარადგინა. ყველა მათგანი პოლიციელია, რომლებიც რურუას დაკავების ოპერაციაში მონაწილეობდნენ.

ბრალდებულმა მოწმეებს რამდენიმე კითხვა დაუსვა, რომელთაგან ერთ-ერთი იყო - საიდან მიიღეს პოლიციელებმა ინფორმაცია მისი გადაადგილების შესახებ და უწევთ თუ არა მათ იარაღის ჩადება და სამხილების გაყალბება.

როგორც რურუამ აღნიშნა, მისი დაკავების დღეს პოლიციელებმა ჭიჭინაძის ქუჩაზე, მისი მანქანის შორიახლოს მოითათბირეს, როგორ ემოქმედათ და მან ეს ყველაფერი დაინახა.

დღევანდელი სხდომის შემდეგ, მიუხედავად დაცვის შუამდგომლობისა, რურუას აღკვეთის ღონისძიება არ შეცვლილა. პროკურორი მიიჩნევს, რომ ბრალდებულმა შეიძლება ახალი დანაშაული ჩაიდინოს ან მართლმსაჯულებას დაემალოს, ამიტომ საპატიმროში უნდა დარჩეს.

ბრალდებულის ადვოკატი დიმიტრი საძაგლიშვილი კი დანებებას არ გეგმავს და თავისი დაცვის ქვეშ მყოფი პირის თავდებით გათავისუფლების თაობაზე შუამდგომლობას ამზადებს.

ამასთან, გიორგი რურუას გათავისუფლებას ითხოვს არა მხოლოდ ოპოზიცია, არამედ ევროპარლამენტარები, აშშ-ის სენატორები და არასამთავრობო ორგანიზაციების წარმომადგენლები.

მაგრამ არც ხელისუფლება აპირებს პოზიციების დათმობას და აცხადებს, რომ „სასამართლომ თავად უნდა მიიღოს გადაწყვეტილება ზეწოლისა და ჩარევის გარეშე“.

დღევანდელი სასამართლო სხდომის შესახებ „ევროპული საქართველოს“ ლიდერმა დავით ბაქრაძემ ისაუბრა. მისი თქმით, რურუას თუ არ გაათავისუფლებენ, მმართველი პარტია მეორე და მესამე მოსმენით საკანონმდებლო ცვლილებების განხილვისას „ევროპული საქართველოს“ მხარდაჭერას ვერ მიიღებს და ოპოზიციის ხმების გარეშე დარჩება.

245
თემები:
საქართველოს პოლიტიკური ცხოვრება (99)
პარლამენტის სხდომა

სუს–ი: საქართველოში ტერორისტული საფრთხეები მინიმუმამდეა დაყვანილი

33
(განახლებულია 22:37 10.07.2020)
პარლამენტის კომიტეტების გაერთიანებული სხდომა, რომელზეც ალექსანდრე ხოჯევანიზე ანგარიშით წარდგა, დახურულ ფორმატში გაიმართა

თბილისი, 10 ივლისი  — Sputnik.  საქართველოს სახეელმწიფო უსაფრთხოების სამსახურისა (სუს–ი) და სხვა შესაბამისი უწყებების კოორდინირებული მუშაობის შედეგად, ქვეყანაში ტერორიზმიდან მომდინარე  საფრთხეები მინიმუმამდეა დაყვანილი, განაცხადა  სამსახურის უფროსის მოადგილე ალექსანდრე ხოჯევანიშვილმა პარლამენტში. 

ხუთშაბათს ხოჯევანიშვილმა პარლამენტის თავდაცვისა და უშიშროების, იურიდიულ საკითხთა და ადამიანის უფლებათა დაცვისა და სამოქალაქო ინტეგრაციის კომიტეტების გაერთიანებულ სხდომაზე საქართველოს სახელმწიფო უსაფრთხოების სამსახურის 2019 წლის საქმიანობის შესახებ ანგარიში წარადგინა.

სხდომა მედიისთვის დახურული იყო.

 „ახლო აღმოსავლეთში მიმდინარე საომარ მოქმედებებში საქართველოს მოქალაქეების გამგზავრების ფაქტები არ გამოვლენილა. აღსანიშნავია, რომ წინა წლებში გატარებულმა ზომებმა, მათ შორის, ტერორიზმის მომხრეების დაკავებებმა მნიშვნელოვანი როლი ითამაშეს ქვეყანაში დღეს არსებულ კონტროლირებად გარემოზე“, – განაცხადა ხოჯევანიშვილმა.

კორუფციასთან ბრძოლა

გასულ წელს სახელმწიფო უსაფრთხოების სამსახურის ანტიკორუფციულმა სამსახურმა 91 სისხლის სამართლის საქმის გამოძიება დაიწყო. პასუხისგებაში მიეცა 135 ადამიანი, მათ შორის ქრთამის, თაღლითობის, სამსახურებრივი გულგრილობის, უკანონო სამეწარმეო საქმიანობისთვის და ა.შ. გატარებული ღონისძიებების შედეგად რამდენიმე საჯარო მოხელე დააკავეს. 

კორუფციასთან ბრძოლა საქართველოს ერთ–ერთი მიღწევაა. საქართველოში დასჯადია როგორც ქრთამის აღება, ისე ქრთამის მიცემა. ამასთან, ქრთამის აღება ექვსიდან 15 წლამდე, ქრთამის მიცემა კი სამიდან რვა წლამდე ვადით თავისუფლების აღკვეთას ითვალისწინებს.

აქტუალური საკითხები
ალექსანდრე ხოჯევანიშვილმა თავის გამოსვლაში, ასევე, ისაუბრა ჰიბრიდულ ომზე, რომელიც კვლავ დიდ გამოწვევად რჩება, კონტრდაზვერვით საქმიანობაზე,  სახელმწიფო უსაფრთხოების სამსახურის საერთაშორისო თანამშრომლობაზე, ეკონომიკურ უსაფრთხოებზე; საქართველოს წინააღმდეგ განხორციელებულ კიბერშეტევებზე და კიბერსადაზვერვო ოპერაციებზე. 

გარდა ამისა, ხოჯევანიშვილი 2019 წლის 20–21 ივნისის მოვლენებსაც შეეხო, როდესაც თბილისის ცენტრში ანტისამთავრობო აქცია პოლიციასთან შეტაკებაში გადაიზარდა. აქციის დაშლისას 240 ადამიანი დაშავდა, მათ შორის 80 პოლიციელი.

მისი თქმით, აღნიშნული მოვლენები ძალიან მტკივნეულად აისახა ქვეყნის უსაფრთხოებაზე.

„სამართალდამცველებისადმი დაუმორჩილებლობა და უკონტროლო ვითარება ასევე აღნიშნულის მიღების ნორმად დამკვიდრების მცდელობები, მნიშვნელოვან გამოწვევებს ქმნის სახელმწიფოებრიობისათვის“, – განაცხადა ხოჯევანიშვილმა.

როგორც მან დასძინა, მსგავსი აქტივობები, შესაძლოა, მყისიერად იყოს გამოყენებული უცხო ქვეყნის სპეცსამსახურების მიერ, უფრო მწვავე, შეუქცევადი პროცესების გააქტიურებისათვის.

33
თემები:
საქართველოს პარლამენტი
საქართველოს და ფინეთის დროშები

რომელი ქართველი მოხვდება ფინეთში რა განსაკუთრებულ პირობებს აწესებს ქვეყანა

60
(განახლებულია 21:31 10.07.2020)
საქართველოს მოქალაქეების ფინეთში ჩასვლის „წონადი“ მიზეზი მხოლოდ საქმიანი ვიზიტი ან განსაკუთრებული მიზანი შეიძლება იყოს.

თბილისი, 10 ივლისი – Sputnik. ფინეთი საქართველოსა და კიდევ 10 უსაფრთხო ქვეყნის მოქალაქეებისთვის საზღვრებს ნაწილობრივ 13 ივლისიდან გახსნის, აღნიშნულია ქვეყნის საგარეო საქმეთა სამინისტროს ვებ-გვერდზე. 

„13 ივლისიდან ალჟირის, ავსტრალიის, ახალი ზელანდიის, იაპონიის, რუანდის, სამხრეთ კორეის, საქართველოს, ტაილანდის, ტუნისის, ურუგვაისა და ჩინეთის მოქალაქეებს შეუძლიათ ფინეთს ეწვიონ საქმიანი ვიზიტით ან სხვა მნიშვნელოვანი მიზნით“, – ნათქვამია განცხადებაში.

ამავე დროს, ფინეთის საგარეო საქმეთა სამინისტრო თავის მოქალაქეებს მოუწოდებს, არ გაემგზავრონ ამ ქვეყნებში განსაკუთრებული საჭიროების გარეშე.

ჯანდაცვისა და სოციალური განვითარების ნაციონალური ინსტიტუტის (THL) მონაცემებით, ფინეთში ბოლო დღე-ღამეში კორონავირუსის 164 ახალი შემთხვევა გამოვლინდა. სულ ქვეყანაში ინფიცირების 2 769 შემთხვევაა დადასტურებული, გარდაცვლილია 42 ადამიანი.

გასულ კვირაში ვროკავშირმა საქართველო ევროკავშირის არაწევრი 15 ქვეყნის სიაში შეიყვანა, რომელთა მოქალაქეებისთვისაც ევროკავშირის წევრ ქვეყნებს საზღვრების გახსნის რეკომენდაცია მისცა.

საქართველოს გარდა, ევროკავშირის სიაში მოხვდნენ: კანადა, ავსტრალია, მაროკო, იაპონია, სამხრეთ კორეა, ალჟირი, მონტენეგრო, რუანდა, ახალი ზელანდია, ტუნისი, სერბეთი, ტაილანდი, ურუგვაი და ჩინეთი. ამავდროულად, ჩინეთზე ვრცელდება პირობა, რომ მანაც უნდა გახსნას საზღვრები ევროკავშირის მოქალაქეებისთვის.

საქართველოს მოქალაქეებისთვის საზღვრების გახსნის შესახებ უკვე განაცხადეს ნიდერლანდებმა, გერმანიამ, საფრანგეთმა, უნგრეთმა და ევროკავშირის სხვა ქვეყნებმა.

თითქმის ოთხთვიანი პაუზის შემდეგ საქართველომ საზღვრები 18 ქვეყნისთვის გახსნა, თუმცა, თითოეული მათგანისთვის დაწესებულია გარკვეული რეკომენდაციები და შეზღუდვები. 

აღნიშნული წესები და პირობები დეტალურადაა გაწერილი მთავრობის განკარგულებაში, რომელიც ძალაში შევიდა 9 ივლისს, 24:00 საათიდან. ავიაბილეთების გაყიდვის პროტოკოლი უახლოეს მომავალში გამოქვეყნდება.

ხუთი ქვეყნის მოქალაქეებისთვის საქართველოს საზღვრები უპირობოდ იხსნება, მაგრამ მხოლოდ პირდაპირი საჰაერო გზით. ეს ქვეყნებია: გერმანია, საფრანგეთი, ლატვია, ლიეტუვა და ესტონეთი.

საქართველოში გამომგზავრებამდე მათ უნდა შეავსონ სპეციალური ელექტრონული ფორმა, რომელშიც მიუთითებენ მოგზაურობის ისტორიას ბოლო 14 დღის განმავლობაში, საქართველოში გაჩერების ადგილს და საკონტაქტო მონაცემებს.

საქართველო ამ ეტაპზე ქვეყანაში შემოსვლის ნებართვას აძლევს რეზიდენტებს კიდევ 13 ქვეყნიდან – ესპანეთიდან, ლუქსემბურგიდან, ნიდერლანდებიდან, პოლონეთიდან, პორტუგალიიდან, რუმინეთიდან, საბერძნეთიდან, შვედეთიდან, ხორვატიიდან, იტალიიდან, სლოვაკეთიდან, ისლანდიიდან და კვიპროსიდან. თუმცა, მათთვის სავალდებულო იქნება ორკვირიანი კარანტინი, თანაც საკუთარი ხარჯით.

რაც შეეხება სამშობლოში დაბრუნების მსურველ საქართველოს მოქალაქეებს, მათთვის 14-დღიანი კარანტინი კვლავ სავალდებულოა, ამ შემთხვევაში ხარჯს სახელმწიფო ანაზღაურებს.

იმ ქვეყნების სია, რომელთა მოქალაქეებსაც საქართველო საზღვრებს უხსნის, გადაიხედება და განახლდება ორ კვირაში ერთხელ.

 

60
თემები:
საქართველოს საგარეო პოლიტიკა
პროკურატურის შენობა

მოკლული ფეხბურთელის ოჯახი ყველა დამნაშავის დასჯას ითხოვს

0
(განახლებულია 22:53 10.07.2020)
პროკურატურის ცნობით, 19 წლის ფეხბურთელის გარდაცვალების მიზეზი ასფიქსია გახდა - ახალგაზრდა წყალში დაიხრჩო

თბილისი, 10 ივლისი - Sputnik. გიორგი შაქარაშვილი მოკლეს, შემდეგ კი მდინარე არაგვში გადააგდეს - ეს ცალსახად დადასტურებულია ექსპერტიზის დასკვნით, განაცხადა დაღუპული ფეხბურთელის ბიძამ, მირიან ნიკოლაძემ პარასკევს გამართულ სპეციალურ ბრიფინგზე. 

19 წლის ფეხბურთელი გიორგი შაქარაშვილი 22 ივნისს, ოთხდღიანი ძებნის შემდეგ  მდინარე არაგვში გარდაცვლილი იპოვეს. იგი  მეგობრის წვეულების შემდეგ დაიკარგა, სადაც სტუმრებს შორის მასობრივი კონფლიქტი მოხდა. საქმემ   საზოგადოებაში თავიდანვე რეზონანსი გამოიწვია – მომხდარ ფაქტთან მაღალჩინოსნების მეგობრების შესაძლო კავშირის შესახებ გავრცელებული ხმების გამო.

 „საქართველოსპროკურატურამ უკვე გამოაქვეყნა ექსპერტიზის დასკვნა, ამ დასკვნას ოჯახი დიდიხანია ველოდით,  ეს იყო ერთ-ერთი გარდამტეხი ეტაპი გამოძიებაში. სწორედ ამ ექსპერტიზის დასკვნის საფუძველზე უნდა დაგვედასტურებინა ჩვენი პოზიცია, რამდენად რეალური იყო ოჯახის ვერსია გიორგის განზრახ მკვლელობასთან დაკავშირებით“, – განაცხადა მირიან ნიკოლაძემ.

მისი თქმით, გიორგის სიცოცხლეშივე მიაყენეს დაახლოებით 12 ფიზიკური დაზიანება, რაც ადასტურებს იმას, რომ მის მიმართ გამოიყენეს ფიზიკური ძალადობა, შემდეგ კი მდინარეში გადააგდეს. 

 „გამორიცხულია, რომ ეს დაზიანებები, რომელიც ექსპერტიზის დასკვნაშია აღნიშნული, მიადგეს ადამიანს თუნდაც იმ ფერდობზე დაგორებით, თუნდაც სირბილის, წაქცევის დროს, ეს არის წარმოუდგენელი. დაზიანებები მიყენებულია სახის არეში, ტანზე, ხელების მიდამოებში და ყველგან“, – განაცხადა მირიან ნიკოლაძემ. 

მისი თქმით, დღეიდან ოჯახს კატეგორიული პოზიცია ექნება - ყველა დამნაშავე უნდა მიეცეს სისხლის სამართლის პასუხისგებაში დამამძიმებელ გარემოებაში განზრახ მკვლელობისთვის.

 „პროკურატურის მიერ შემოთავაზებული კვალიფიკაცია, სისხლის სამართლის საქმის სწორი კვალიფიკაციაა.  თუმცა, ჩვენ ვითხოვთ კონკრეტული დამნაშავეების დასჯას  სისხლის სამართლის კოდექსის 109-ე მუხლით. შესაბამისად ველოდებით, როდის იქნება კონკრეტული ბრალდებები წარდგენილი გამოძიების ფარგლებში და როდის დაისჯებიან დამნაშავეები გიორგის განზრახ მკვლელობის გამო“, – განაცხადა ნიკოლაძემ.

საქართველოს პროკურატურამ 19 წლის ფეხბურთელის, გიორგი შაქარაშვილის გარდაცვალების საქმე გადააკვალიფიცირა – „დამამძიმებელ გარემოებებში ჯგუფურად განხორციელებული განზრახ მკვლელობა“.

საქმის დეტალები

პროკურატურის განცხადებით, 19 წლის ახალგაზრდის გარდაცვალების უშუალო მიზეზი გახდა ასფიქსია წყალში დახრჩობის შედეგად.

ამასთან, შაქარაშვილის სხეულზე ექსპერტიზის დროს აღმოჩნდა მრავლობითი ტრავმები, მიყენებული მკვრივი-ბლაგვი საგნის მოქმედებით, სიცოცხლისდროინდელი  დაზიანებები თავის არესა და სხეულზე. 

პროკურატურის განცხადებით, საქმეზე შინაგან საქმეთა სამინისტროში ინტენსიური გამოძიება გრძელდება. მიღებული ექსპერტიზის დასკვნიდან გამომდინარე, მაქსიმალურად სწრაფად და ეფექტიანად ჩასატარებელია მთელი რიგი საგამოძიებო და საპროცესო მოქმედებები, მათ შორის, შესაბამისი საექსპერტო კვლევით დასადგენია დასკვნაში აღნიშნულ დაზიანებათა წარმოშობის მექანიზმები და სხვა მნიშვნელოვანი გარემოებები. ამავდროულად, მისაღებია ბიოლოგიური, ქიმიური, ტრასოლოგიური, საინფორმაციო-ტექნოლოგიური და სხვა პირთა სასამართლო-სამედიცინო ექსპერტიზის დასკვნები.

უწყვეტ რეჟიმში მიმდინარეობს მოწმეთა გამოკითხვები და უკვე მოპოვებული ინფორმაციის ანალიზი.

საქმის სირთულიდან გამომდინარე, საქართველოს პროკურატურა კიდევ ერთხელ მოუწოდებს ყველას, თავი შეიკავონ გადაუმოწმებელი ინფორმაციის გავრცელებისგან.

გამოძიების ვერსიით, 18 ივნისს თბილისის ფეხბურთის კლუბ „საბურთალოს“ აკადემიის აღსაზრდელი 19 წლის გიორგი შაქარაშვილი მეგობართან ერთად იმყოფებოდა მცხეთაში, მეგობრის დაბადების დღის წვეულებაზე, სადაც მოხდა ჩხუბი. მოგვიანებით საქმის გარჩევა გაგრძელდა თბილისისკენ მომავალ ავტომაგისტრალზე, სადაც კონფლიქტის მონაწილეთა ერთმა ნაწილმა თბილისიდან „დამხმარე ძალა“ გამოიძახა. 

მოწმეთა მტკიცებით, გიორგიმ ჩხუბის ადგილი დატოვა და მდინარისკენ გაიქცა, რის შემდეგაც მისი კვალი იკარგება. რამდენიმე დღეში იგი გარდაცვლილი იპოვეს.

საქმეზე 17 პირი ძალადობისა და თავისუფლების მართლსაწინააღმდეგო აღკვეთის ბრალდებითაა დაკავებული. წინასასამართლო მოსმენა  31 ივლისს გაიმართება.

გამოძიება ფეხბურთელის გარდაცვალების საქმეზე მიმდინარეობდა სისხლის სამართლის კოდექსის სამი მუხლით: ჯგუფური ძალადობის ორგანიზება, ჯგუფურ ძალადობაში მონაწილეობა, თავისუფლების უკანონო აღკვეთა, ორი ან მეტი პირის მიმართ ჯგუფური ძალადობა. აღნიშნულ მუხლებს უკვე დაემატა 109-ე მუხლი - განზრახ ჯგუფური მკვლელობა დამამძიმებელ გარემოებაში.

0