არჩილ თალაკვაძე

პარლამენტში არჩევნების საკითხი დიპლომატიურ კორპუსთან შეხვედრაზე განიხილეს

81
საქართველოს პარლამენტში კვირას გაიმართება რიგგარეშე სხდომა, სადაც კონსტიტუციაში შესატან ცვლილებებს განიხილავენ

თბილისი, 18 ივნისი - Sputnik. საქართველოს პარლამენტის თავმჯდომარე არჩილ თალაკვაძე საქართველოში აკრედიტებულ ელჩებს შეხვდა - შეხვედრაზე COVID-19-თან დაკავშირებული სიტუაციის ფონზე მომავალი საპარლამენტო არჩევნების უსაფრთხოების საკითხი განიხილეს.

საქართველოს პარლამენტი მთავრობასთან ერთად მუშაობს საზოგადოებრივ ჯანდაცვაზე ორიენტირებულ წესებზე, რომლებსაც პოლიტიკურ პარტიებთან და სამოქალაქო საზოგადოებასთან კონსულტაციების შემდეგ 2020 წლის საპარლამენტო არჩევნების დროს ვირუსის გავრცელების აღსაკვეთად და მოქალაქეთა უსაფრთხოების უზრუნველსაყოფად დანერგავენ.

პირბადის გარეშე ხმის მიცემა არ შეილება!
პირბადის გარეშე ხმის მიცემა არ შეილება!

თალაკვაძის თქმით, დიპლომატიური კორპუსის წარმომადგენლებმა არჩევნებთან დაკავშირებულ საკითხებზე თავიანთი შეხედულებები გაუზიარეს.

„ვგეგმავთ, რომ კონსულტაციები გავმართოთ ასევე მხარეებთან, მათ შორის პოლიტიკურ პარტიებთან და საბოლოოდ მივიღოთ ისეთი გადაწყვეტილება, რომელიც ერთი მხრივ, დაიცავს ჩვენს მოქალაქეებს კოვიდინფექციის გავრცელებისგან არჩევნების დროს და ასევე, რასაკვირველია, უზრუნველყოფს მათი საარჩევნო უფლებების სრულ რეალიზებას“, - განაცხადა არჩილ თალაკვაძემ.

როგორც შეხვედრის შემდეგ განაცხადა საქართველოში გერმანიის ელჩმა ჰუბერტ ქნირშმა, პოლიტიკურ პარტიებს შორის შეთანხმებული საკონსტიტუციო ცვლილებების პროექტი იქნება მიღებული და მის განხილვაში მონაწილეობას ყველა პოლიტიკური ძალა მიიღებს.

„ხვალიდან საქართველოს პარლამენტი საკონსტიტუციო ცვლილებების განხილვას დაიწყებს. ეს ცვლილებები იყო შემუშავებული, როგორც საქართველოს პოლიტიკურ პარტიებს შორის შეთანხმება, რომელიც 8 მარტს იყო ხელმოწერილი. ეს არის ძალიან მნიშვნელოვანი პროცესი, იმედს გამოვთქვამ, რომ მონაწილეობას მიიღებს ყველა პოლიტიკური პარტია და ეს ცვლილებები მიღებული იქნება, როგორც შეთანხმებული იყო“, – განაცხადა ელჩმა.

დიპლომატებმა აღნიშნა, რომ საკონსტიტუციო ცვლილებები მნიშვნელოვანია როგორც საქართველოს მოსახლეობისთვის, ისე საერთაშორისო პარტნიორებისთვის, სადამკვირვებლო მისეიბისა და დემოკრატიული ინსტიტუტებისთვის.

საქართველოს პარლამენტი კვირას გამართავს რიგგარეშე სხდომას, სადაც კონსტიტუციაში შესატან ცვლილებებს განიხილავს.

საკონსტიტუციო ცვლილებები, რომლებიც 2020 წლის საპარლამენტო არჩევნების შეცვლას გულისხმობს, საჯარო განხილვის შემდეგ განსახილველად პარლამენტში შევიდა.

კანონპროექტის თანახმად, 2020 წლის შერეული სისტემით ჩატარდება. პარლამენტის 150-დან 120 ადგილი პარტიებს შორის განაწილდება, რომელთათვის გამსვლელი ბარიერი – მხოლოდ 1%-ს შეადგენს. საარჩევნოდ შექმნილმა ბლოკმა კი პარლამენტში მოსახვედრად მინიმუმ იმდენი პროცენტი უნდა მიიღოს, რამდენი პოლიტიკური სუბიექტიც შედის ამ ბლოკში. ამას გარდა, ხმების დათვლის დროს იმოქმედებს ე.წ. 40%-იანი შეზღუდვა – ყველა მაჟორიტარულ ოლქში გამარჯვების შემთხვევაშიც კი პარტია ან ბლოკი იმაზე მხოლოდ ერთი მეოთხედით მეტი მანდატის მიღებას შეძლებს, ვიდრე მათ პროპორციული არჩევნების შედეგების მიხედვით ერგებათ.

არჩევნები პანდემიის დროს: შეძლებს თუ არა კენჭისყრაში მონაწილეობას სიცხიანი ამომრჩეველი >>

წარმოდგენილ ვარიანტში 30 მაჟორიტარული ოლქია, თბილისში - 8, დანარჩენ ათ რეგიონში - 22.

პარასკევს, 19 ივნისს, კონსტიტუციაში ცვლილებების შეტანის შესახებ პროექტს იურიდიული კომიტეტის სხდომაზე განიხილავენ.

 

81
თემები:
საქართველოს საპარლამენტო არჩევნები 2020 (32)
საქართველოს პარლამენტი

საქართველოს პოლიტიკურ ცხოვრებაში ქალთა ხანა იწყება

33
(განახლებულია 13:55 15.07.2020)
მიუხედავად იმისა, რომ პრეზიდენტიც ქალბატონი გვყავს და უზენაესი სასამართლოს თავმჯდომარეც, მსოფლიო სტატისტიკის ფონზე ითვლება, რომ საქართველოში ქალთა პოლიტიკური მონაწილეობის დონე საკმაოდ დაბალია.

ჰოდა, ჯერ კიდევ მერვე მოწვევის პარლამენტის მიერ ინიცირებული კანონი, მეცხრე მოწვევისამ მიიღო და მეათე მოწვევის ქალებს გაუმართლათ.

თუ პარტიულ საარჩევნო სიაში ყოველი მეოთხე სავალდებულოდ ქალი უნდა იყოს, პარტია, რომელიც ყოველ მესამედ ქალს ჩაწერს სიაში, დამატებით დაფინანსებას მიიღებს. საქართველოში კი ჭკვიანი და განათლებული ქალების დეფიციტი ნამდვილად არაა. რამდენიმე პარტიის ლიდერი საერთოდ ქალია და მომავალი მოწვევის პარლამენტში 37-40 ქალბატონი იქნება.

დავიწყოთ მმართველი პარტიით:

ქვოტირება ნამდვილად არ სჭირდება და დიდი ხანია, გადაწყვეტილია თეა წულუკიანის პოლიტიკურ ბრძოლაში ჩაბმა. სხვადასხვა ვერსიებით ის საბურთალოს ან ნაძალადევის მაჟორიტარობის კანდიდატი იქნება. ყველა შემთხვევაში მომავალ პარლამენტში თეა წულუკიანს ყველა ხედავს... მაღალი ალბათობით, საარჩევნო კამპანიაში ჩაერთვებიან მაია ცქიტიშვილი და ეკატერინე ტიკარაძე. ასევე მყარად დგას კობახიძის გუნდის წევრი სოფო კილაძე, რომელსაც ცოტა ქმრის აქტიურობამ კი შეუშალა ხელი, მაგრამ იმ გუნდის წევრია, ვისაც ახლა პარლამენტის მართვის სადავეები აქვს. სხვათა შორის, ირაკლი კობახიძის საარჩევნო შტაბის უფროსად დანიშვნამ ბევრს მოატეხა ფრთები, განსაკუთრებით კი კახი კალაძეს, რომლის მზარდი ამბიციების დაკმაყოფილება 2020-ის პარლამენტში სათუოა.

მოქმედი ქალი დეპუტატებიდან, მომავალ პარლამენტში ყოფნა თითქმის ყველას სურს, რეალური შანსი კი ფატი ხალვაშსა და გუგული მაღრაძეს აქვს. ასევე საუბარია მაღრაძის ქალიშვილზე, რომელიც ათასწლეულის გამოწვევის დიდ პროგრამას მართავს. თუ მაგდა მაღრაძე პარლამენტში წავა, ის, სავარაუდოდ, განათლების კომიტეტს ჩაიბარებს.

სხვადასხვა დროს გავრცელდა ხმები ჟურნალისტ ეკა ბერიძისა და სადაზღვევო საქმის სპეციალისტ ნინო კობახიძის სიაში ყოფნის შესახებ, თუმცა ჯერ რაიმის დაზუსტებით თქმა ძნელია. ასევე პარლამენტისკენ ეპატიჟებიან ფერმერ ნინო ზამბახიძეს, მაგრამ რამდენად გადაწყვეტს თავად საკანონმდებლო საქმიანობას, მეორე საკითხია. ყველა შემთხვევაში ქართული ოცნებიდან მინიმუმ 10-12 ქალი გამსვლელ სიაში მოხვდება, 37-დან 40-მდე კი 150 კაციან შემადგენლობაში.

მთლად ქალებს მიჰყავთ პოლიტიკა „პატრიოტთა ალიანსში“, რომელიც, ექსპერტების თქმითა და ხელისუფლების ხელშეწყობით მომავალ პარლამენტში უკეთ იქნება წარმოდგენილი.

საკმაოდ ბევრი ქალი ჰყავთ „ლელოშიც“, რომელთაგან ანი ნაცვლიშვილი უეჭველად გახდება მომავალი პარლამენტის წევრი.

დეპუტატობისათვის ლამის მარტოხელა მგლის სტატუსით იბრძოლებენ: ნინო ბურჯანაძე, თაკო ჩარკვიანი, ეკა ბესელია, ნატო ჩხეიძე.

მოკლედ, საქართველოს პოლიტიკურ ცხოვრებაში ქალთა ხანა იწყება და ცნობილ ქალებს კიდევ ორი თვე რჩებათ სააქტიუროდ... ასე რომ, საქართველოს ქალებო, ახლა თქვენი დროა.

33
ქუთაისი

რატომ აღარ მოსწონთ მერებსა და მოადგილეებს თანამდებობები? ვინ შეელია სავარძელს

51
(განახლებულია 13:47 15.07.2020)
საპარლამენტო არჩევნების წინ ადგილობრივ თვითმმართველობებში საკადრო ცვლილებებია - ჩინოვნიკები თანამდებობებს ტოვებენ

თბილისი, 15 ივლისი — Sputnik. ქუთაისის მერის ერთ-ერთმა მოადგილე ნინო თვალთვაძემ ყველასთვის მოულოდნელად თანამდებობის დატოვების გადაწყვეტილება მიიღო.

თვალთვაძის გადადგომა ბოლო თვეებში ჩინოვნიკების მიერ თანამდებობის დატოვების რიგით მეექვსე შემთხვევაა. მარტსა და აპრილში საკუთარი სურვილით თანამდებობიდან გადადგომის შესახებ განცხადებები დაწერეს კასპის, თერჯოლის, ონის, ქუთაისისა და ხარაგაულის მუნიციპალიტეტების მერებმა.

„ვტოვებ მერის მოადგილის თანამდებობას. ამიტომაც, სადაც არ უნდა ვიყო, ყოველთვის ვიქნები ქუთაისის სამსახურში. მხოლოდ მცირედით შევძელი ქუთაისისთვის ჩემი წილი ვალის დაბრუნება. ამ 2 წლისა და 7 თვის მანძილზე იყო რთული დღეებიც და დიდი სიხარულიც, იყო წარმატებაც და წარუმატებლობაც. უბრალოდ, ძალიან დიდი მადლობა ყველას", - დაწერა თვალთვაძემ საკუთარ Facebook-გვერდზე.

ამ დროისთვის უცნობია თვალთვაძის გადადგომის მიზეზი და მისი სამომავლო გეგმები. მან ქუთაისის მერის მოადგილის თანამდებობა 2017 წლის მაისში დაიკავა.

ორი დღით ადრე თანამდებობის დატოვების შესახებ განცხადება დაწერა ხარაგაულის მუნიციპალიტეტის მერმა ნიკოლოზ თოფურიძემ, რომელმაც განაცხადა, რომ რჩება მმართველი პარტია „ქართული ოცნების" გუნდში.

გარდა ამისა, ბოლო პერიოდში მასმედიაში გავრცელდა ინფორმაცია ბათუმის მერის, ლაშა კომახიძის თანამდებობიდან გადადგომის შესახებ. თუმცა, ბათუმის მერიაში აღნიშნულ ინფორმაციას არ ადასტურებენ.

ადრე, მერების გადადგომის ტალღასთან დაკავშირებით კომენტარი გააკეთა არასამთავრობო ორგანიზაცია „სამართლიანი არჩევნებისა და დემოკრატიის საერთაშორისო საზოგადოებამ" (ISFED), რომელმაც განაცხადა, რომ მოკლე პერიოდში არჩეული ჩინოვნიკების თანამდებობებიდან გადადგომა იწვევს ეჭვს და შეიძლება იგი „არაჯანსაღი პროცესის" შედეგი იყოს.

არასამთავრობო ორგანიზაციამ ყოფილ ჩინოვნიკებს მოუწოდა საზოგადოებას საჯაროდ და ნათლად განუმარტონ გადადგომის მიზეზები.

51
თემები:
საქართველოს პოლიტიკური ცხოვრება
ტოკიო

ფუკუშიმის შედეგი: პლუტონიუმის ნაწილაკები მთელს იაპონიაშია აღმოჩენილი

0
(განახლებულია 15:33 15.07.2020)
ფუკუშიმას ატომურ ელექტროსადგურზე მომხდარი აფეთქებიდან ცხრა წლის შემდეგ რეაქტორების მასალა მიკროსკოპულ რადიოაქტიულ ნაწილაკებად დაიშალა, ქარმა კი ის მთელი ქვეყნის მასშტაბით მიმოფანტა. 

თბილისი, 15 ივლისი — Sputnik. ფუკუშიმა-1-ის ატომური ელექტროსადგურის  ბირთვული საწვავის შემადგენლობაში შემავალი პლუტონიუმის ნაწილაკები, სადაც 2011 წელს კატასტროფა მოხდა, დღემდე გარემოში რჩება, ასკვნიან ექვსი ქვეყნის მეცნიერები, რომელთა კვლევის შედეგები ჟურნალ Science of the Total Environment-ში არის  გამოქვეყნებული.

ეკოლოგებმა და ქიმიკოსებმა ადრევე აღნიშნეს, რომ მასალა, რომელიც ავარიის შემდეგ ატმოსფეროში, ნიადაგსა და ზღვის წყალში მოხვდა, პლუტონიუმის კვალს შეიცავდა, მაგრამ მისი ფიზიკური, ქიმიური და იზოტოპური ფორმები უცნობი რჩებოდა.

ახლა კი იაპონელი, ფინელი, ფრანგი, შვეიცარიელი, ინგლისელი და ამერიკელი მეცნიერების მიერ ჩატარებული ახალი კვლევის შედეგებმა ცხადყო, რომ პლუტონიუმის ოქსიდების ნანოზომის ჩანართები ცეზიუმით მდიდარ მიკრონაწილაკებს (CsMP) შეიცავს.

ბირთვული საწვავი რეაქტორის შიგნით წვის შემდეგ  სტრუქტურულ ბეტონთან ურთიერთქმედებაში შევიდა. აფეთქების დროს მასალა მიკროსკოპულ რადიოაქტიურ ნაწილაკებად დაიშალა, რომელიც ქარმა მთელ იაპონიაში მიმოფანტა.

აღმოჩნდა, რომ CsMP ძალიან რადიოაქტიურია და ძირითადად ბეტონის სილიციუმის შუშისა და რადიოაქტიური ცეზიუმისგან (სწრაფად აქროლადი დაშლის პროდუქტი) შედგება. ისინი რეაქტორებში საწვავის წვის დროს წარმოიქმნება.

მეცნიერებმა მიკრონაწილაკების ქიმიური შემადგენლობა მოწინავე ანალიტიკური მეთოდების კომბინაციის გამოყენებით შეისწავლეს.

„შედეგები დამაჯერებლად ცხადყოფს, რომ ნანოზომის არაერთგვაროვნება, ჰეტეროგენობა, რომელიც ნორმალური ბირთვული საწვავისთვისაა დამახასიათებელი, საწვავის ნარჩენებში კვლავ არსებობს, რომელიც დაზიანებული რეაქტორების შიგნით რჩება“, — აღნიშნა კვლევის ხელმძღვანელმა, იაპონიის კიუსიუს უნივერსიტეტის დოქტორმა სატოში უცუნომიამ.

მეცნიერის თქმით, ამ ინფორმაციით შესაძლებელია დაზიანებული რეაქტორის დნობის ხარისხის დადგენა, რაც ენერგეტიკოსებს საშუალებას მისცემს, დროულად გაიყვანონ ისინი ექსპლუატაციიდან და სწორად მიუდგნენ ნარჩენებს.

მკვლევარები აპირებენ, განაგრძონ CsMP-ის მიკრონაწილაკების შესწავლა, რათა უკეთ გაიგონ მათი გრძელვადიანი ქცევა და გარემოზე გავლენა.

შეგახსენებთ: 2011 წლის 11 მარტის დამანგრეველი მიწისძვრისა და ცუნამის შედეგად, იაპონიის ჩრდილო-აღმოსავლეთით მდებარე ატომურ ელექტროსადგურ „ფუკუშიმა-1–ზე“  აფეთქებების სერია დაფიქსირდა, რაც გაგრილების სისტემის დაზიანებამ გამოიწვია. მთავრობამ მოსახლეობა ატომური ელექტროსადგურის ირგვლივ 20 კილომეტრიანი ზონიდან გაიყვანა და, ჩერნობილის მსგავსად, საშიშროების მაქსიმალური დონე გამოაცხადა. მოგვიანებით გავრცელდა ინფორმაცია, რომ ფუკუშიმას პრეფექტურის დაბინძურებულ ნიადაგს 30 წლის განმავლობაში გაანადგურებდნენ.

0
თემები:
მსოფლიო დღეს