პარლამენტის სხდომა

შეზღუდვები საგანგებო მდგომარეობის შემდეგ: პარლამენტში ცხარე კამათი გაიმართა

108
(განახლებულია 15:07 22.05.2020)
ოპოზიცია უკვე ამზადებს სარჩელს საკონსტიტუციო სასამართლოში და მისი დაკმაყოფილების შემდეგ მთავრობისთვის იმპიჩმენტის გამოცხადებას გეგმავს.

თბილისი, 22 მაისი — Sputnik. ცხარე კამათის და მწვავე შეკითხვების ფონზე გაიმართა „საზოგადოებრივი ჯანმრთელობის დაცვის შესახებ“ კანონში ცვლილებების განხილვა პირველი მოსმენით - ცვლილებები მთავრობას უფლებას აძლევს საგანგებო მდგომარეობის გამოცხადების გარეშე პანდემიის პერიოდში ერთპიროვნულად შემოიღოს შეზღუდვები.

კორონავირუსის გავრცელების საფრთხის გამო 21 მარტს დაწესებული საგანგებო მდგომარეობის მოქმედების ვადა 22 მაისს იწურება. მთავრობაში უკვე განაცხადეს, რომ საგანგებო მდგომარეობა აღარ გაგრძელდება, თუმცა მოქმედი შეზღუდვების ნაწილი შენარჩუნდება.

ცვლილებები მთავრობას უფლებას აძლევს საჯარო უწყებების საქმიანობის საკითხების რეგულირების იმ წესებით, რომლებიც განსხვავდება მოქმედი კანონმდებლობისგან, აგრეთვე მოქალაქეების გადაადგილების უფლების, საკუთრების უფლების, შრომითი, პროფესიული და ეკონომიკური საქმიანობის უფლებების, აგრეთვე ხალხის შეკრების უფლების რეგულირების სოციალური და სხვა ღონისძიებების ჩასატარებლად, რაც მოქალაქეთა ჯანმრთელობის დაცვისთვის არის აუცილებელი.

როგორც პროექტის ინიციატორმა, ჯანდაცვის კომიტეტის თავმჯდომარემ დიმიტრი ხუნდაძემ განაცხადა, ამ ცვლილებების შედეგად მთავრობას პანდემიის გავრცელების საფრთხის რეგულირების შესაძლებლობა ექნება.

ასეთ ფორმულირებას კატეგორიულად არ ეთანხმება ოპოზიცია, რომელიც საკონსტიტუციო სასამართლოში სარჩელს ამზადებს და მისი დაკმაყოფილების შემდეგ მთავრობის იმპიჩმენტის გამოცხადებას აპირებს.

ოპოზიციის მთავარი პრეტენზია

საპარლამენტო ოპოზიცია შეზღუდვების დაწესების წინააღმდეგი არ არის, მაგრამ შეზღუდვების დაწესების საკითხზე მთავრობის ერთპიროვნულ გადაწყვეტილებას ეწინააღმდეგება.

„დაარქვით „ჯანდაცვის სპეციალური ზომები“. სხვა სახელი დაარქვით და პარლამენტის როლი დატოვეთ. თუ დასახურია რამე, თქვენი აზრით, თქვენს ხელშია მაინც და რატომ ამბობთ თქვენს ფუნქციაზე უარს?!“ - მიმართა უმრავლესობას პარტია „ევროპული საქართველოს“ წევრმა გიგა ბოკერიამ.

მას ეთანხმებიან ოპოზიციის სხვა წევრებიც, რომლებიც მთავრობის იმპიჩმენტს აანონსებენ.

„ამ კანონს თუ მიიღებენ, ეპიდემიის არსებობის შემთხვევაში საგანგებო მდგომარეობა აღარასდროს გამოცხადდება. კონსტიტუციით კი პანდემიის დროს საგანგებო მდგომარეობის გამოცხადება ვალდებულებაა. საგანგებოს არგამოცხადება და უფლებების ამგვარად შეზღუდვა კი, კონსტიტუციის დარღვევის გამო, იმპიჩმენტის საფუძველია. ხვალიდან უკვე იარსებებს პრემიერის, მთავრობასთან ერთად, იმპიჩმენტის გამოცხადების საფუძველი,“ - განაცხადა ფრაქცია „ნაციონალური მოძრაობის“ თავმჯდომარემ რომან გოცირიძემ.

კანონპროექტში საფრთხე მმართველი პარტიის ყოფილმა წევრებმაც დაინახეს.

„სამწუხაროდ, საპარლამენტო რესპუბლიკაში „ქართული ოცნება“ აპირებს შეზღუდოს პარლამენტის უფლებამოსილება და წინასაარჩევნო პერიოდში საგანგებო მდგომარეობის გამოცხადების მთლიანი უფლებამოსილების გადაცემას მთავრობისთვის აპირებს. ჩვენი მოვალეობაა ვაკონტროლოთ მთავრობა და არა უკონტროლოდ გადავცეთ მას უფლებამოსილებები“, - განაცხადა ფრაქცია „დამოუკიდებელი დეპუტატების“ თავმჯდომარემ მარიამ ჯაშმა.

კანონპროექტით უკმაყოფილოა ასევე „საქართველოს პატრიოტთა ალიანსი“.

„ეს არის ხელისუფლების უზურპაციის მცდელობა. პარლამენტში დღეს წარმოდგენილი ცვლილებები ანტიკონსტიტუციურია, ეწინააღმდეგება ყველაზე მთავარ კანონს – კონსტიტუციას. გაუგებარია, აუხსნელია, პარლამენტის წევრს რატომ უნდა დაებადოს, მოუვიდეს თავში ასეთი აზრი, რომ მისი მთავარი ფუნქცია გადასცეს მთავრობას, საგანგებო მდგომარეობის გამოცხადების პრეროგატივა კონსტიტუციით აქვს გარანტირებული პარლამენტს“, - განაცხადა პარტიის ლიდერმა ირმა ინაშვილმა.

ხელისუფლების არგუმენტები

ოპოზიციის კრიტიკის შემდეგ ხელისუფლებამ ნაწილობრივ უკან დაიხია.

„თქვენ არ გაწყობთ საპარლამენტო კონტროლის არარსებობა, მაგრამ ეს ჯერ მხოლოდ პირველი მოსმენაა, და ეს განხილვის თემა გახდება“, - განაცხადა პარლამენტის თავმჯდომარემ არჩილ თალაკვაძემ.

მმართველი პარტიის დეპუტატმა ირაკლი კობახიძემ აღნიშნა, რომ კანონში უკვე გაწერილია კონსტიტუციის გათვალისწინების პრინციპი.

„ეს კანონი იმოქმედებს მხოლოდ პანდემიის დროს, და პანდემია მუდმივად არ გაგრძელდება“, - განაცხადა კობახიძემ.

გარდა ამისა, კობახიძემ კოლეგებს შესთავაზა ჩაიწეროს, რომ ის შემზღუდავი ღონისძიებები, რაც აღნიშნული კანონპროექტით დგინდება, იყოს დროებითი და გარდამავალ დებულებაში მისი ვადა 15 ივლისამდე ჩაიწეროს.

„იმ დროისათვის ცვლილებები კონსტიტუციაში მიღებული იქნება და სიტუაცია ქვეყანაში უკვე გაირკვევა“, - განაცხადა კობახიძემ.

იურიდიული კომიტეტის თავმჯდომარე ანრი ოხანაშვილიც დარწმუნებულია, რომ ცვლილებები კანონიერია და კონსტიტუციის შესაბამისია.

„სწორედ ჩვენი რეკომენდაციით ჩაიწერა, რომ ეს არის დროებითი ღონისძიება. რეალურად ეს არის დროებითი და საგანგებო მდგომარეობის გაუქმების შემდეგ ეს საკარანტინო ღონისძიებები დროებით უნდა გატარდეს. დრო არის პირობადადებული და ამ შემთხვევაში არ შეიძლება ეს განუსაზღვრელი ვადით მოქმედებდეს, ის თუ რომელ დროზეა მიბმული, ეს დაკავშირებულია პანდემიასთან და ეპიდემიასთან“, - განაცხადა ოხანაშვილმა.

ამასთან მან აღნიშნა, რომ საგანგებო მდგომარეობასა და საკარანტინო ზომებს შორის მთავარი განსხვავებაა ის, რომ იზღუდება მხოლოდ გარკვეული უფლებები და ისიც დროებით, საჭიროების მიხედვით.

„მთავრობამ ამ კანონიდან გამომდინარე ყველა კონკრეტულ შემთხვევაზე უნდა იმსჯელოს, რათა თანაზომიერად ჩაერიოს პირთა უფლებებში და მხოლოდ დროებით“, - განაცხადა ოხანაშვილმა.

უმრავლესობის არგუმენტები დეპუტატებისთვის უფრო მნიშვნელოვანი აღმოჩნდა და სკანდალური ცვლილებები პირველი მოსმენით 80 ხმით მიიღეს.

108
საქართველოსა და სომხეთის დროშები

საქართველოს საგარეო უწყებამ სომხეთს პირველი რესპუბლიკის დღე მიულოცა

50
(განახლებულია 18:32 28.05.2020)
სომხეთი დღეს რესპუბლიკის დღესთან დაკავშირებით მილოცვებს მთელი მსოფლიოდან იღებს და ამ მილოცვებს საქართველოც უერთდება.

თბილისი, 28 მაისი — Sputnik. საქართველოს საგარეო საქმეთა სამინისტრო სომეხ ხალხს პირველი დემოკრატიული რეპუბლიკის დაარსების 102-ე წლისთავს ულოცავს.

„გულწრფელად ვულოცავთ სომხეთის მთელ მოსახლეობას 1918 წელს პირველი დემოკრატიული რესპუბლიკის დაარსების წლისთავს. ამ ძალზე მნიშვნელოვან დღეს საქართველო უსურვებს კეთილდღეობასა და წარმატებას ჩვენს კარგ მეზობელ ქვეყანას“, – ნათქვამია საქართველოს საგარეო საქმეთა სამინისტროს მისალოც გზავნილში, რომელიც Twitter-შია გამოქვეყნებული.

სომხეთში 28 მაისს სარდარაპატის ბრძოლის დღეც აღინიშნება.

წელს სარდარაპატის ბრძოლის დღე ხალხმრავლობის გარეშე აღინიშნება. კორონავირუსის საფრთხის გამო პოლიციამ სარდარაპატი გადაკეტა როგორც ავტომობლების, ისე ადამიანებისთვის. ტრადიციულ ზეიმში მონაწილეობა მხოლოდ ოფიციალურმა პირებმა მიიღეს.

50
საქართველოსა და აზერბაიჯანის დროშები

თბილისის ტელეანძა აზერბაიჯანის დროშის ფერებში განათდება

41
(განახლებულია 17:59 28.05.2020)
აზერბაიჯანი დღეს დემოკრატიული რესპუბლიკის შექმნის 102-ე წლისთავს აღნიშნავს, რომლის შესახებ დეკლარაციასაც 1918 წლის 28 მაისს თბილისში მოეწერა ხელი.

თბილისი, 28 მაისი — Sputnik. აზერბაიჯანის დემოკრატიული რესპუბლიკის შექმნის 102-ე წლისთავთან დაკავშირებით თბილისის ტელეანძა დღეს, საღამოს აზერბაიჯანის დროშის ფერებით განათდება.

როგორც „პირველი არხი“ იუწყება, აზერბაიჯანის ელჩმა საქართველოში დურსუნ ჰასანოვმა, საელჩოს თანამშრომლებმა, კომპანია „სოკარ ენერჯი ჯორჯიას“ (SOCAR Energy Georgia) გენერალურმა დირექტორმა მაჰირ მამედოვმა, აზერბაიჯანელ ბიზნესმენთა კავშირის (AZEBI) წევრებმა და სხვა პირებმა ჰეიდარ ალიევის სახელობის პარკში ეროვნული ლიდერის ბიუსტი მოინახულეს და ყვავილებით შეამკეს.

ისინი ასევე ეწვივნენ თბილისის ბოტანიკურ ბაღში აზერბაიჯანელ საზოგადო მოღვაწეთა პანთეონს და ყვავილებით შეამკეს აზერბაიჯანის დემოკრატიული რესპუბლიკის დამფუძნებლების ფატალი ხან ხოსკისა და ჰასან ბეი აგაევის საფლავები.

რესპუბლიკის დღისადმი მიძღვნილი ღონისძიებების ფარგლებში აზერბაიჯანის საელჩოს შენობის წინ დამონტაჟებულ სპეციალურ ელექტრონულ დაფაზე აზერბაიჯანისადმი მიძღვნილი ვიდეორგოლი წარმოადგინეს. ამას გარდა, დღის განმავლობაში ეკრანზე გავა 15-წუთიანი ვიდეორგოლი ქვეყნის განვითარების ისტორიის შესახებ.

აზერბაიჯანი დემოკრატიული რესპუბლიკის ეროვნულმა საბჭომ ქვეყნის დამოუკიდებლობა 1918 წლის 28 მაისს გამოაცხადა.

ეს იყო პირველი სეკულარული დემოკრატიული რესპუბლიკა მუსულმანურ აღმოსავლეთში.

დეკლარაციას დამოუკიდებლობის შესახებ თბილისში მოეწერა ხელი.

41
დაკეტილი მაღაზიები აბანოთუბანში

კორონავირუსი საქართველოში: საგანგებო მდგომარეობის შემდეგ შეზღუდვების სრული სია/29 მაისი

78679
23 მაისიდან საქართველოში საგანგებო მდგომარეობა აღარ მოქმედებს, მაგრამ მთავრობამ შეზღუდვების ნაწილი ძალაში დატოვა.

თბილისი, 29 მაისი – Sputnik. საგანგებო მდგომარეობის რეჟიმის მოხსნის შემდეგ, კორონავირუსით ინფიცირებულთა რაოდენობის ზრდის თავიდან აცილების მიზნით, საქართველოს მთავრობამ შეზღუდვების და აკრძალვების ნაწილი ძალაში დატოვა. ეს შესაძლებელი გახდა პარლამენტის მიერ დამტკიცებული ცვლილებებით კანონში „საზოგადოებრივი ჯანმრთელობის შესახებ“. ახლა მთავრობას მიენიჭა უფლება შემოიღოს შეზღუდვები საგანგებო მდგომარეობის რეჟიმის მოხსნის შემდეგ.

ცვლილებები 15 ივლისამდე იმოქმედებს.

მოქმედი ძირითადი შეზღუდვების ჩამონათვალი:

  • რესტორნები, სასტუმროები, ტანსაცმლისა და ფეხსაცმლის მაღაზიები, სავაჭრო მოლები, სპორტდარბაზები ივნისის დასაწყისიდან ეტაპობრივად გაიხსნება;

  • რესტორნებს აქვთ მხოლოდ კერძების მიწოდების სერვისით მუშაობის უფლება, აგრეთვე ფეხსაცმლისა და ტანსაცმლის მაღაზიებს შეუძლიათ ონლაინ ვაჭრობა;
  • ტაქსის მძღოლისთვის სავალდებულოა პირბადის ტარება, ტაქსით ორზე მეტი მგზავრის გადაყვანა არ შეიძლება, ისიც უკანა სავარძელზე
  • აკრძალულია კულტურული და სპორტული ღონისძიებების გამართვა;
  • კაზინოების და ტოტალიზატორების მუშაობა დაშვებულია მხოლოდ ონლაინ;

მთავრობა საქართველოს ყველა მოქალაქეს მოქმედი რეკომენდაციების დაცვისკენ მოუწოდებს.

ტრანსპორტი

  • აკრძალულია საერთაშორისო სამგზავრო სახმელეთო და საზღვაო მიმოსვლა;
  • აკრძალულია პირდაპირი საერთაშორისო რეგულარული ავიარეისები, ჩარტერულის გარდა, რომელიც ინიშნება მხოლოდ საქართველოს მოქალაქეთა დაბრუნების მიზნით;
  • აკრძალულია სარკინიგზო ტრანსპორტით მგზავრთა გადაყვანა;
  • აკრძალულია საქალაქთაშორისო და მუნიციპალიტეტების ტერიტორიაზე მგზავრთა გადაყვანა სამარშრუტო ტაქსებითა და ავტობუსებით;
  • აკრძალულია საზოგადოებრივი ტრანსპორტით, მათ შორის, მეტროპოლიტენითა და საბაგიროთი გადაადგილება.

საზოგადოებრივი ცხოვრება

  • აკრძალულია 10-ზე მეტი ადამიანის თავშეყრა ტრადიციულ სოციალურ ღონისძიებებზე (ქორწილი, ნებისმიერი იუბილე, ქელეხი და ა.შ.);
  • ყველა სახის ტრენინგი, კონფერენცია და სემინარი უნდა ჩატარდეს დისტანციურად;
  • სკოლებსა და უნივერსიტეტებში სასწავლო პროცესი კვლავ დისტანციურად განხორციელდება;
  • დასაშვებია უნივერსიტეტში პრაქტიკული/ლაბორატორიული სამუშაოებისა და გამოცდების ჩატარება არადისტანციურად, მაგრამ რეკომენდაციების შესაბამისად;
  • კულტურული ღონისძიებები მხოლოდ დისტანციური ფორმით ჩატარდება;
  • აკრძალულია მასობრივი სპორტული ღონისძიებების, შეკრებების და შეჯიბრებების ჩატარება;

ეკონომიკური საქმიანობა

  • აკრძალულია რესტორნებში, ბარებში, კაფეებსა და სასადილოებში მომხმარებლის ადგილზე კვების მომსახურება;
  • აკრძალულია ფეხსაცმლისა და ტანსაცმლის მაღაზიების მუშაობა;
  • აკრძალულია სავაჭრო ცენტრების და ბაზრობების მუშაობა, აგრარული ბაზრობების გარდა;
  • აკრძალულია სპორტული, კულტურული და გასართობი ღონისძიებების ორგანიზება და გამართვა;
  • აკრძალულია ვალუტის გადამცვლელი პუნქტების მუშაობა;
  • აკრძალულია სპორტულ-გამაჯანსაღებელი აქტივობები და პროცედურები.

ამ მომენტისათვის ინფიცირებულთა რაოდენობა 738 ადამიანს შეადგენს, აქედან 573 გამოჯანმრთელდა, 12 კი გარდაიცვალა. კიდევ სამი ინფიცირებული მოქალაქე სამკურნალოდ სხვა ქვეყნებიდან ჩამოიყვანეს. ეპიდემიოლოგები მიიჩნევენ, რომ ჯერჯერობით აუცილებელია სოციალური დისტანციის უზრუნველყოფა და მოქალაქეთა მობილობის შეზღუდვა.

კორონავირუსით ინფიცირების ახალი შემთხვევების უმრავლესობა შიდა გადაცემას უკავშირდება.

საქართველო სხვა ქვეყნებისთვის კორონავირუსთან ბრძოლაში სამაგალითოა >>

უწყებათშორისი საკოორდინაციო საბჭო ოპერატიულად აფასებს სიტუაციას და შეიმუშავებს ახალ რეკომენდაციებს და შეზღუდვებს.

მთავრობის სპეციალურ ვებ-გვერდზე stopcov.ge გამოქვეყნებული ბოლო მონაცემების თანახმად, საკარანტინო სივრცეში იმყოფება 3076, სტაციონარებში მეთვალყურეობის ქვეშ კი 250 ადამიანია.

მთავრობა მოსახლეობას მოუწოდებს, ქვეყანაში კორონავირუსთან დაკავშირებით მხოლოდ და მხოლოდ გადამოწმებულ და ოფიციალურად დადასტურებულ ინფორმაციას ენდონ. ყველა ინფორმაციის მოძიება შესაძლებელია მთავრობის მიერ სპეციალურად შექმნილ ვებ-გვერდზე StopCoV.ge.

„ცხელი ხაზის“ ნომრები: ცხელი ხაზი კარანტინის რეჟიმის საკითხებზე – 144. საქართველოს ჯანდაცვა – 15 05 (დღე-ღამის განმავლობაში); დაავადებათა კონტროლის ცენტრი – 116 001 (21:00-მდე სამუშაო დღეებში და 18:00-მდე დასვენების დღეებში).

ყველა მოხალისეს, რომელსაც აქვს დრო და სურვილი დაეხმაროს ხანდაზმულ ადამიანებს, ასევე მათ, ვისაც სპეციალური დახმარება ესაჭიროება, შეუძლია დარეკოს მერიის ცხელ ხაზზე (032)2722222 და წითელი ჯვრის ცხელ ხაზზე - 0800 000 018.

კორონავირუსი საქართველოში: შეზღუდვების მოხსნის ეტაპები
© Sputnik / Konstantin Ivanov.
კორონავირუსი საქართველოში: შეზღუდვების მოხსნის ეტაპები
78679
თემები:
COVID-19 საქართველოში