საპატრულო პოლიცია

საქართველოში არასრულწლოვან ეჭვმიტანილებთან ახლებურად იმუშავებენ

116
(განახლებულია 20:41 26.12.2019)
სხვადასხვა სამინისტროს წარმომადგენლები, ფსიქოლოგები და ექსპერტები მივიდნენ კონსენსუსამდე იმის თაობაზე, თუ როგორ გამოასწორონ მართლმსაჯულების სისტემა.

თბილისი, 26 დეკემბერი — Sputnik. საქართველოს შსს-ში 1 აპრილიდან ახალი უწყება – არასრულწლოვანთა სამმართველო ამუშავდება, რომელიც თბილისის მასშტაბით იმუშავებს, განაცხადა ქვეყნის მთავრობის ადმინისტრაციის ხელმძღვანელმა ნათია მეზვრიშვილმა.

შეთანხმებას ამის შესახებ მიაღწიეს უწყებათაშორისი კომისიის შეხვედრის დროს. დისკუსიაში, რომელსაც მეზვრიშვილი ხელმძღვანელობდა, მონაწილეობდნენ ფსიქოლოგები, ექსპერტები, ბავშვთა უფლებების საკითხებზე მომუშავე არასამთავრობო ორგანიზაციები და სახალხო დამცველის წარმომადგენლები.

სახელმწიფო ინსპექტორმა მოზარდის გარდაცვალებამდე მოვლენების სურათი აღადგინა>>

თემა განსაკუთრებით აქტუალური გახდა თბილისში 15 წლის მოზარდის ლუკა სირაძის დაღუპვის შემდეგ. ლუკა 17 დეკემბერს გარდაიცვალა რამდენიმე დღით ადრე მეცხრე სართულიდან გადმოვარდნის დროს მიღებული ტრავმების შედეგად. ძირითადი ვერსიაა თვითმკვლელობა, თუმცა საპატრიარქო უბედურ შემთხვევას არ გამორიცხავს.

ამ საქმეზე დაკავებულია პოლიციის უფროსი გამომძიებელი მარიანა ჩოლოიანი. მას ბრალად ედება სირაძისთვის ჩვენების მიცემის იძულება, რაც უკავშირდება მოზარდის ყოფილ სკოლაში ღამით შესვლასა და კედლებზე სხვადასხვა წარწერის გაკეთებას. ოპოზიციამ მომხდარში ხელისუფლება დაადანაშაულა. მათი თქმით, საჭიროა მართლმსაჯულების მთელი სისტემის შეცვლა.

„შინაგან საქმეთა სამინისტროს თბილისის მასშტაბით 2020 წლის 1 აპრილიდან ექნება არასრულწლოვანთა სამმართველო, სადაც იმუშავებენ სპეციალიზებული გამომძიებლები, ამ მიმართულებით მენეჯმენტსაც გავლილი ექნება შესაბამისი გადამზადება", – განაცხადა მეზვრიშვილმა.

მარიანა ჩოლოიანს პატიმრობა შეეფარდა>>

მისი თქმით, იყო ზოგიერთი ინფრასტრუქტურული პრობლემა, მაგრამ ისინი უკვე მოგვარდა. გარდა ამისა, გადაწყდა, რომ სამმართველო აღიჭურვოს ვიდეოკამერებით, რათა მათ დააფიქსირონ მთელი პროცესი – არასრულწლოვანის იქ შესვლიდან გამოსვლამდე.

მოგვიანებით შსს წარმოადგენს გეგმას, თუ როგორ შეიქმნას ბავშვებზე ორიენტირებული გარემო რეგიონებში.

ასევე შეიქმნება სახელმძღვანელო გამომძიებლებისთვის, თუ როგორ იმუშაონ არასრულწლოვნებთან გამოძიების პროცესში. მეზვრიშვილმა აღნიშნა, რომ საუბარია როგორც არასრულწლოვან მოწმეებზე, ისე ბრალდებულ და დაზარალებულ არასრულწლოვნებზე.

უწყებათაშორისი კომისიის შეხვედრაზე ასევე გადაწყდა, რომ ჯანდაცვის სამინისტრო შეიმუშავებს სოციალური მუშაკების რაოდენობის გაზრდის კონკრეტულ გეგმას, განათლების სამინისტრო მთავრობის ადმინისტრაციასთან ერთად შექმნის ფსიქოლოგების ბაზას, ხოლო იუსტიციის სამინისტრო შეიმუშავებს კანონპროექტს ადვოკატების სავალდებულო დასწრების შესახებ იმ შემთხვევაშიც კი, თუ საუბარია არასრულწლოვნის, როგორც მოწმის გამოკითხვაზე.

116
ალეკო ელისაშვილი

სახელმწიფო დაფინანსებაზე უარს ორი ქართული პარტია აცხადებს

46
ორ ოპოზიციურ პარტიაში აცხადებენ, რომ სახელმწიფო დაფინანსების მოთხოვნა არჩევნების შედეგების აღიარებას ნიშნავს, ბოიკოტი ვრცელდება არამარტო შედეგებზე, არამედ არ შედეგების მიხედვით გამოანგარიშებულ დაფინანსებაზეც

თბილისი, 28 ნოემბერი – Sputnik. ოპოზიციური პოლიტიკური პარტიები - „მოქალაქეები“ და „გირჩი“ სახელმწიფო დაფინანსებაზე უარს აცხადებენ.

ცოტა ხნის წინ ცნობილი გახდა, რომ „ლეიბორისტული პარტია" ბიუჯეტიდან დაფინანსების მიღებაზე დათანხმდა, მანამდე ამის შესახებ პარტია „ლელომ“ განაცხადა.

31 ოქტომბრის შედეგების მიხედვით, პარტია „გირჩს" ბიუჯეტიდან ერგება 777 990 ლარი, ხოლო „ალეკო ელისაშვილი - მოქალაქეებს" - 497 406 ლარი.

„თუ იმ შედეგებს არ ცნობ, რაც ცესკომ დაწერა, თუ იმ რაოდენობის ხმებს არ ცნობ, რაც ცესკოს მიერაა გამოცხადებული, ამ ფორმულით დაანგარიშებულ თანხას რატომ ცნობ და რატომ იღებ - ეს არის გაუგებარი, ჩვენთვის, ჩვენი პარტიისთვის გაუგებარია. ბოიკოტი ჩვენთვის იმასაც გულისხმობს, რომ ცესკოს შედეგების მიხედვით დაანგარიშებული თანხა არ უნდა აიღო, არა მარტო პარლამენტში არ უნდა შეხვიდე“, - განაცხადა პარტია „მოქალაქეების“ ლიდერმა ალეკო ელისაშვილმა. 

რაც შეეხება „გირჩს“, ის წინასაარჩევნო კამპანიის დროს აცხადებდა, რომ დაფინანსებას ელექტრომობილ „ტესლას“ გათამაშებაზე დახარჯავდა, რაც ამჟამინდელი შედეგებით შეუძლებელია.

„ამ ფულით არჩევნებზე ნამყოფი ადამიანებს შორის "ტესლას" ავტომანქანების გათამაშებას ვგეგმავდით. ამ აქტით დემონსტრაციულად ვაპროტესტებდით პოლიტიკის დაფინანსების ჩვენთვის მიუღებელ წესს. ჩვენ მიგვაჩნია, რომ დღეს, ბიუჯეტის ფულით, "ტესლას" გათამაშებაც არ შეიძლება. ეს წინააღმდეგობაში მოდის რეალური ბოიკოტის იდეასთან. სრულიად გაუგებარია, არჩევნების შედეგების არ აღიარების და საპარლამენტო ბოიკოტის პირობებში, რატომ ვცნობთ არჩევნების შედეგებს მხოლოდ იმ ნაწილში, რაც საბიუჯეტო დაფინანსების მიღებას ეხება. ბოდიშს ვუხდით პროექტში მონაწილე ადამიანებს დანაპირების შეუსრულებლობისათვის და გპირდებით, რომ აუცილებლად მოვა დრო, როცა "ტესლას" ნაცვლად, ყველას მეტ თავისუფლებას გადმოგცემთ“, -ნათქვამია პარტიის განცხადებაში

აღსანიშნავია, რომ 2020 წლის საპარლამენტო არჩევნების შედეგებიდან გამომდინარე, დაფინანსების მიღების უფლება 14-მა პარტიამ მოიპოვა, რადგან ეს უფლება მოქმედი კანონმდებლობით ენიჭება იმ პარტიებს, რომლებმაც არჩევნებზე 1%-იანი ბარიერი გადალახეს.

არჩევნების შედეგების მიხედვით პარლამენტში შესულმა 9 პარტიამ, მათ შორის მმართველმა პარტიამ „ქართულმა ოცნებამ“ ცესკოს დაფინანსების მოთხოვნის მიზნით უკვე მიმართა. 

ოპოზიციური პარტიები 31 ოქტომბრის საპარლამენტო არცევნების შედეგებს გაყალბებულს უწოდებენ და ხელახალ არჩევნებს მოითხოვენ. ოპოზიციასა და მმართველ პარტიას შორის მოლაპარაკებები მიმდინარეობს, რომლებიც უცხოელი დიპლომატიური მისიების ინიციატივით იმართება.

 

46
თემები:
პროტესტი საქართველოში: ოპოზიცია საპარლამენტო არჩევნების შედეგებს არ აღიარებს
ოპოზიციის აქცია 14.11. 2020

ოპოზიციამ ახალი მოწვევის პარლამენტის ბოიკოტი კიდევ ერთხელ დაადასტურა

55
(განახლებულია 17:46 28.11.2020)
ოპოზიციის მიერ ბოიკოტის მიუხედავად, პარლამენტი, რომელშიც უმრავლესობით „ქართული ოცნების“ დეპუტატები იქნებიან წარმოდგენილი, მუშაობის დაწყებას და კანონების მიღებას მაინც შეძლებს

თბილისი, 28 ნოემბერი – Sputnik. საკანონმდებლო ორგანოში გასული ოპოზიციური პარტიები მისი სხდომის პირველ დღეს ხელს მოაწერენ ოფიციალურ განცხადებას პარლამენტის ბოიკოტის შეს ხებ და თავის საპარტიო სიებს გაიწვევენ, განაცხადა პარტიის „ევროპული საქართველო - მოძრაობა თავისუფლებისთვის“ ლიდერმა დავით ბაქრაძემ.

საქართველოს პარლამენტში 31 ოქტომბრის არჩევნების შედეგად გავიდა რვა ოპოზიციურო პარტია და ბლოკი. ისინი არ აღიარებენ არჩევნების შედეგებს, მიიჩნევენ, რომ მმართველმა პარტია „ქართულმა ოცნებამ“ არჩევნები გააყალბა, და განაცხადეს, რომ მეათე მოწვევის პარლამენტში შესვლას არ აპირებენ.

„პარლამენტში ვინც შევიდა, ის დეპუტატები ხელს მოაწერენ, რომ უარს ამბობენ შესვლაზე, პარტიები ჩახსნიან რეგისტრაციას, რომ პარტიების ჩანაცვლება არ მოხდება და მესამე - ყველა მოაწერს ხელს, რომ ვითხოვთ ახალ არჩევნებს და ოპოზიცია ამაში არის ერთიანი", - განაცხადა ბაქრაძემ „ლეიბორისტული პარტიის“ ოფისში გამართული ოპოზიციის შეხვედრის შემდეგ.

ამასთან მან აღნიშნა, რომ ყველა დოკუმენტის ხელმოწერა არჩევნების საბოლოო შედეგების შეჯამებისა და ახალი მოწვევის პარლამენტის პირველი სხდომის გამოცხადების შემდეგ მოხდება.

ოპოზიციაში ხაზგასმით აღნიშნეს, რომ პარლამენტის პირველი სხდომის დღეს დაანონსებული ფართომასშტაბიანი საპროტესტო აქცია აღარ გაიმართება.

„ჩვენ განვიხილავთ პროტესტის სხვადასხვა ფორმებს, სავარაუდოდ ის სიმბოლური იქნება“, - განაცხადა „ერთიანი ნაციონალური მოძრაობის“ წარმომადგენელმა, თინა ბოკუჩავამ.

ამასთან, მმართველ პარტიაში ოპოზიციის ბოიკოტის არ სჯერათ. „ქართული ოცნების“ აღმასრულებელმა მდივანმა ირაკლი კობახიძემ ერთ-ერთი ინტერვიუს დროს გამოთქვა იმედი, რომ ოპოზიციური პარტიების ნაწილი მაინც შევა პარლამენტში.

უახლოეს დღეებში უნდა გაიმართოს ხელისუფლებასა და ოპოზიციას შორის მოლაპარაკებების მესამე რაუნდი, რომელიც საქართველოში აშშ-ის და ევროკავშირის ელჩების ორგანიზებით იმართება. ამ მომენტისთვის მოლაპარაკებების შედეგად ცნობილია, რომ ოპოზიცია ახალ საპარლამენტო არჩევნებს მოითხოვს, „ქართული ოცნება“ ამის კატეგორიული წინააღმდეგია და ამას ერთადერთ შეუსრულებელ მოთხოვნას უწოდებს.

ევროკავშირის და აშშ-ის ელჩებმა პოზიციების დასაახლოებლად ოპოზიციის ლიდერებთან უკვე რამდენიმე შეხვედრა გამართეს, თუმცა ახალი რაუნდის თარიღი ჯერჯერობით უცნობია.

ცესკომ უახლოეს დროს არჩევნების მეორე ტურის არჩევნების შედეგები უნდა შეაჯამოს, შემდეგ კი 20 დღის განმავლობაში პარლამენტის პირველი სხდომა დაინიშნება. ოპოზიციის მიერ ბოიკოტის მიუხედავად, პარლამენტი, რომელშიც „ქართული ოცნება“ 90 დეპუტატით იქნება წარმოდგენილი, მუშაობის დაწყებას და კანონების მიღებას მაინც შეძლებს.

55
თემები:
პროტესტი საქართველოში: ოპოზიცია საპარლამენტო არჩევნების შედეგებს არ აღიარებს
მდგომარეობა მსოფლიოში კორონავირუსთან დაკავშირებით

მსოფლიოში COVID-19-ით ინფიცირების ახალი შემთხვევების და გარდაცვალების რეკორდი დაფიქსირდა

0
კორონავირუსის მეორე ტალღამ ქვეყნებს გაცილებით დიდი ძალით გადაუარა, ვიდრე პირველმა, და ინფიცირებულთა რაოდენობა გამუდმებით იზრდება

თბილისი, 28 ნოემბერი – Sputnik. მსოფლიოში კორონავირუსით ინფიცირების ახალი შემთხვევების რაოდენობა ბოლო 24 საათში 747 082-ით გაიზარდა, რაც პანდემიის დაწყებიდან რეკორდული მაჩვენებელია, ნათქვამია ჯანდაცვის მსოფლიო ორგანიზაციის ვებგვერდზე მოყვანილ მონაცემებში.

ერთ დღე-ღამეში გარდაიცვალა 13 296 ადამიანი, რაც ასევე რეკორდული რიცხვია.

COVID-19-ის ყველაზე მეტი შემთხვევა დაფიქსირდა ჩრდილოეთ და სამხრეთ ამერიკაში (405 ათასზე მეტი) და ევროპაში (236 ათასზე მეტი).

მსოფლიოში კორონავირუსით ინფიცირების 61,2 მილიონზე მეტი შემთხვევა დაფიქსირდა, გარდაიცვალა 1,4 მილიონზე მეტი ადამიანი.

ჯანდაცვის მსოფლიო ორგანიზაციამ 11 მარტს ახალი კორონავირუსის აფეთქებას პანდემია უწოდა.

0
თემები:
COVID-19-ის პანდემია მსოფლიოში