ლევან ვასაძე

რაზე შეთანხმდნენ ბიძინა ივანიშვილი და ლევან ვასაძე

265
(განახლებულია 20:30 12.11.2019)
გეგმავს თუ არა მილიონერი „რაინდი“ ლევან ვასაძე 2020 წლის საპარლამენტო არჩევნებში მონაწილეობის მიღებას?

ფილმი „და ჩვენ ვიცეკვეთ" ახალი პოლიტიკური პროცესების ინსპირატორი ხდება. პოლიტიკურ სარბიელზე კიდევ ერთხელ და ახლა უკვე სერიოზული პოლიტიკური განცხადებებით გამოჩნდა ქართველი მილიონერი ლევან ვასაძე, რომელიც საზოგადოების ინერტულობისა და ხელისუფლების ინდიფერენტულობის გამო გაბრაზებულია.

მართალია, დიპლომატიისა არა ეცხო რა, მაგრამ მან ორი მნიშვნელოვანი გზავნილი გააჟღერა. რაინდი ვასაძე შეძრულია იმით, რომ ფილმის პრეზენტაციის გასაპროტესტებლად ქართველთა დიდი ნაწილი ვერ იხილა. მეორეს მხრივ კი მან ბიძინა ივანიშვილს შეახსენა, ხომ გახსოვს, ჩემთან სახლში რომ მოხვედი და რაღაც მთხოვეო... ამასთან, მეორე დღესვე განმარტა ჟურნალისტებთან, ნაწილ-ნაწილ რომ ამკუწოთ, მაინც არ ვიტყვი, რაზე ვისაუბრეთ მე და ივანიშვილმაო.

ხმები რაინდისა და „ქართული ოცნების“ თავმჯდომარის შეხვედრის შესახებ ჯერ კიდევ მარტიდან ვრცელდებოდა. როგორც ირკვევა, მათ შორის მიმოსვლას ინტენსიური ხასიათი ჰქონია და, როგორც მასმედია ამტკიცებს, ვასაძის პოლიტიკაში მოსვლა პრაქტიკულად გადაწყვეტილია.

რატომ ახლა, რა ფორმით და რა შანსები აქვს ლევან ვასაძეს ქართულ პოლიტიკაში?

სინამდვილეში ეს საკმაოდ კარგი გათვლაა, რადგან ვასაძე ქართულ პოლიტიკაში მაინც ახალი სახეა, რომლის მიმართაც ნაკლები პრეტენზიები არსებობს. მასთან ასოცირდებიან დიმიტრი ლორთქიფანიძე და სანდრო ბრეგაძე, რომელთაც, ბევრი თუ მცირე, მაგრამ მყარი ელექტორატი ჰყავთ, და თუ სათანადო დაფინანსებაც ექნებათ, ნულოვანი ბარიერის შემთხვევაში ერთი ფრაქციის თუ არა, რამდენიმე ადამიანის გაყვანას მაინც შეძლებენ პარლამენტში.

მასმედიაში გამოჟონილი ინფორმაციით, რომ არა 20 ივნისის მოვლენები, ბიძინა ივანიშვილი ვადამდელი არჩევნებისათვის ემზადებოდა და ლევან ვასაძეს უნდა მოეთხოვა სწორედ გაზაფხულზე ვადამდელი არჩევნების დანიშვნა.

როგორც ჩანს, ხელისუფლებამ ეს სცენარი შეცვალა და, ყველა გათვლით, დიდი ალბათობით, არჩევნები დროულად ჩატარდება, თუ რაიმე განსაკუთრებული არ მოხდა. დღეს გაირკვევა, აპირებს თუ არა ხელისუფლება რეალურად პროპორციულ სისტემაზე გადასვლას.

პარლამენტში ვასაძე საკმაოდ მოხერხებული პარტნიორი უნდა გამხდარიყო „ქართული ოცნებისთვის“. თუმცა რეალურად ის ხმებს არა „ნაციონალურ მოძრაობას“, არამედ „პატრიოტებს“ წაართმევს, რადგან სწორედ მისი ელექტორატის ინტერესებს ახმოვანებს.

მიუხედავად იმისა, რომ ქართულ საზოგადოებასა და მრევლში დიდია ჩოხის პატივისმცემელთა და წარსულზე მონანულთა ოდენობა, გარეთ 21-ე საუკუნეა. ადამიანები მთვარესა და მარსზე მოგზაურობაზე ფიქრობენ და ამ ფონზე ადამიანების მუდმივად იმით დაშანტაჟება, რომ ქართველობას გვართმევენ, უკვე არასერიოზულია.

არასერიოზულია საშუალო დონის მხატვრული ფილმის გარშემო ატეხილი აჟიოტაჟიც, რომლითაც მხოლოდ ფილმის პოპულარიზაცია და მის მიმართ ინტერესის ზრდა ხდება. სინამდვილეში ამ ბოლო რამდენიმე კვირის განმავლობაში საეკლესიო პირების მხრიდან რაც სექსის შესახებ გვესმის საუბარი, ასეთი აქტიური ცხოვრება თვით ჰოლივუდის ვარსკვლავებსაც შეშურდებოდათ...

პრაგმატული ამომრჩეველი იკითხავს, როგორ აპირებს ესა თუ ის პოლიტიკური ძალა ფასების ზრდის შეჩერებას, მოშიმშილე ბავშვების პრობლემების მოგვარებას, მცოცავი ოკუპაციისა და ეროვნული ვალუტის გაუფასურების შეჩერებას...

იმედია, 2020-ში სწორედ ასეთი პრაგმატული ამომრჩეველი იქნება უმრავლესობაში. სხვა შემთხვევაში დეპუტატ კახა ოქრიაშვილის წინასწარმეტყველება რეალობად იქცევა და ქვეყანა მუდმივი პოლიტიკური დაპირისპირების არენად იქცევა.

265
პრემიერ-მინისტრი და მთავრობის წევრები

შეიცვლება თუ არა საქართველოს მთავრობა არჩევნებამდე?

17
(განახლებულია 20:01 26.05.2020)
ცნობილია, რომ უღელტეხილზე ცხენებს არ ცვლიან. შესაბამისად, ხმები გიორგი გახარიას ოპოზიციაში წასვლისა და მთავრობის ცვლილების თაობაზე არათუ გადაჭარბებული, არამედ არარეალისტურიც უნდა იყოს.

თუმცა, მოდით, მივყვეთ თანმიმდევრობით, რამ გამოიწვია ვრცელი საუბრები სამთავრობო ცვლილებების შესახებ.

მედიაში გავრცელებული ინფორმაცია ასე გამოიყურება: პრემიერის პოსტზე გახარიას ლილუაშვილი შეცვლის, სუსის უფროსი ანზორ ჩუბინიძე ხდება, ხოლო სახელმწიფო დაცვის სპეციალურ სამსახურს გრიგოლ ლილუაშვილის დეიდაშვილი და მისი ამჟამინდელი მოადგილე გიგა ნიკოლაიშვილი დაიკავებსო.

ინფორმაციის პირველწყარო უცნობია, თუმცა ამ ხმებს აქტიურად ავრცელებს „მთავარი არხი“ს დამფუძნებელი ნიკა გვარამია.

ბუნებრივია, სამთავრობო ცვლილებების თემა ყოველთვის აქტუალური და მნიშვნელოვანია, მაგრამ ამ შემთხვევაში ვერსიების აგორებას ხელი სახელმწიფო მინისტრ ქეთი ციხელაშვილის ელჩად მივლინებამ შეუწყო.

თუ ვინმეს ავსტრიის ელჩობა სახმინისტრობაზე ნაკლები თანამდებობა ჰგონია, ეს მისი პრობლემაა, მაგრამ

ციხელაშვილი ამ პოსტზე ბევრად უფრო ეფექტური იქნება, ვიდრე აფხაზეთისა და სამაჩაბლოს დაბრუნების კუთხით. ამიტომ მას ეს ცვლილება, სავარაუდოდ, სულაც არ ეწყინებოდა.

ისევე, როგორც სახელისუფლებო გუნდი, როგორც ჩანს, წინასწარ ცდილობს იმ ადამიანების დასაქმება- დაფუძნებას, ვინც მომავალ საპარლამენტო გუნდში ვეღარ მოხვდება.

ასე მაგალითად, ტექნიკურ უნივერსიტეტში მიავლინეს დეპუტატი კარლო კოპალიანი. ჩვენი ინფორმაციით, მოლაპარაკებები სხვა პარლამენტარებთანაც დაწყებულია და საარჩევნო დღისათვის ყველა მათგანს ექნება გარკვეული მონახაზი, სად გააგრძელებს საქმიანობას.

მთავრობის შეცვლაზე გავრცელებული ხმები ოპოზიციის ფანტაზია ჰგონია პოლიტოლოგ რამაზ საყვარელიძეს.

ის ამბობს, რომ ეს სურვილები და ვნებები ოპოზიციას გაზაფხულსა და შემოდგომაზე უმძაფრდება.

„გახარიას 20 ივნისის შემდეგ ვერაფერი დააკლეს და, მით უმეტეს, ეხლა, როცა მისი სახელი კრიზისულ სიტუაციაში კარგ მენეჯერობას დაუკავშირდა", - ამბობს საყვარელიძე.

დაანონსებული ცვლილებებით გაკვირვებულია ექსპერტი ხათუნა ლაგაზიძე. მისი თქმით, გახარიას ფაქტორი დღეს დიდია, დიდია მის მიმართ ნდობა და ამ ფაქტორის გარეშე მმართველმა გუნდმა არჩევნები შესაძლოა, წააგოს კიდეც.

ხელისუფლებაში ცვლილებებს არათუ გამორიცხავს, არამედ ელოდება კიდეც ექსპერტი ვახტანგ ძაბირაძე, მაგრამ - არჩევნების შემდეგ. ის თვლის, რომ საარჩევნოდ რაიმე დრამატული ცვლილებები მოსალოდნელი არაა და რეალური სიახლეები სწორედ არჩევნების შემდეგ მოხდება.

ზოგადად კი ცნობილი ამბავია, რომ პოლიტიკოსისთვის ყველანაირი ხმაურიანი ინფორმაცია სასარგებლოა, გარდა ნეკროლოგისა. საქართველოს მთავრობას და კონკრეტულად გახარიას, დღეს გაცილებით სერიოზული ბრძოლები ელოდება წინ სიღარიბის, შიმშილისა და გაჭირვების სახით, რომ აღარაფერი ვთქვათ კორონავირუსზე. სწორედ ამ გამოწვევებზე პასუხი იქნება 2020-ის არჩევნების შედეგების განმაპირობებელი ფაქტორი. თუმცა ბუნებრივია, პოლიტიკაში არც ქვედა დინებებისა და შიდაომების ფაქტორების გამორიცხვა შეიძლება.

17
ელისაბედ მეორე

ყველაზე თბილი სურვილები: დედოფალი და პრეზიდენტები დამოუკიდებლობის დღეს გვილოცავენ

39
(განახლებულია 20:56 26.05.2020)
სხვადასხვა სახელმწიფოს მეთაურები საქართველოს ძლიერ და უსაფრთხო მომავალს, ქართველ ხალხს კი მშვიდობას და კეთილდღეობას უსურვებენ.

თბილისი, 26 მაისი — Sputnik. საქართველოს პრეზიდენტს და ქართველ ხალხს საქართველოს დამოუკიდებლობის დღე დიდი ბრიტანეთის დედოფალმა ელისაბედ მეორემ ერთ-ერთმა პირველმა მიულოცა.

დედოფლის მილოცვა საქართველოში დიდი ბრიტანეთის საელჩომ Twitter-ის გვერდზე გამოაქვეყნა. 

„დიდი სიხარულით გილოცავთ ეროვნულ დღესასწაულს. საუკეთესო სურვილებით თქვენ და საქართველოს მოსახლეობას”, – ნათქვამია დედოფლის მილოცვაში.

ბელარუსის პრეზიდენტმა ალექსანდრ ლუკაშენკომ საქართველოს პრეზიდენტს სალომე ზურაბიშვილს ჯანმრთელობა, ბედნიერება, საპასუხისმგებლო სახელმწიფო საქმიანობის განხორციელებაში წარმატებები, ქართველ ხალხს კი მშვიდობა და კეთილდღეობა უსურვა

ლუკაშენკომ აღნიშნა, რომ საქართველოსა და ბელარუსს შორის ორმხრივი ურთიერთობები უმაღლეს დონეზე დგას, რომელიც ინტენსიურად ვითარდება და საკმაოდ მდგრადია.

„ჩვენს ქვეყნებს შორის არსებული აქტიური კონტაქტები უმნიშვნელოვანესი ფაქტორია თანამშრომლობის გაფართოებისა და ერთობლივი პროექტების მრავალი მიმართულებით განხორციელებისთვის“, – ნათქვამია პრეზიდენტის წერილში.

ბედნიერება და კეთილდღეობა უსურვა სალომე ზურაბიშვილსა და ქართველ ხალხს საფრანგეთის პრეზიდენტმა ემანუელ მაკრონმა. მისი წერილი საქართველოში საფრანგეთის საელჩომ გაავრცელა.

„ქალბატონო პრეზიდენტო, საქართველოს ეროვნულ დღესასწაულთან დაკავშირებით თქვენ და ქართველ ხალხს ბერდნიერებასა და კეთილდღეობას გისურვებთ. ჯანდაცვის კრიზისი, რომელშიც ჩვენ ვიმყოფებით, ზეგავლენას მოახდენს ეკონომიკურ და სოციალურ ვითარებაზე, რაც ყველა სახელმწიფოსთვის უდიდეს გამოწვევას წარმოადგენს. როგორც 7 მაისს ჩვენი სატელეფონო საუბრისას მოგახსენეთ, ორ ქვეყანას შორის თანამშრომლობა ხელს შეუწყობს ამ გამოწვევაზე რეაგირებას და თქვენ შეგიძლიათ საფრანგეთის მხარდაჭერის იმედი გქონდეთ“, – აღნიშნა მაკრონმა.

უსაფრთხო მომავალი და კეთილდღეობა უსურვა ქართველ ხალხს აშშ-ის პრეზიდენტმა დონალდ ტრამპმა.

მან მისალოცი წერილი საქართველოს პრემიერ-მინისტრს გიორგი გახარიას გამოუგზავნა, რომელშიც ხაზგასმით აღნიშნულია საერთო ღირებულებებსა და ინტერესებზე დაფუძნებული აშშ-სა და საქართველოს შორის მრავალწლიანი სანდო პარტნიორობა. 

„ველი თქვენთან თანამშრომლობას, რათა დავეხმაროთ საქართველოს დემოკრატიული ინსტიტუტების კონსოლიდაციასა და პოლიტიკური პლურალიზმის განმტკიცებაში, კანონის უზენაესობის გაძლიერებაში, რომლის საყრდენს წარმოადგენს დამოუკიდებელი სასამართლო. ასევე ეკონომიკის დივერსიფიკაციაში. გულითადად ვულოცავ ქართველებს, ვუსურვებ კეთილდღეობას, ნაყოფიერ და უსაფრთხო მომავალს“, – ნათქვამია წერილში.

საქართველოს ეროვნულ დღესასწაულს ულოცავენ პოლიტიკოსები, დიპლომატები, ასევე სხვადასხვა ქვეყნის პირველი პირები.

საქართველო დღეს დამოუკიდებლობის დღეს აღნიშნავს. 1918 წლის 26 მაისს საქართველოს პირველმა დემოკრატიულმა რესპუბლიკამ ნოე ჟორდანიას ხელმძღვანელობით ქვეყნის დამოუკიდებლობა გამოაცხადა. პირველმა დამოუკიდებელმა რესპუბლიკამ სულ ორ-ნახევარი წელი იარსება.

დამოუკიდებლობის აღდგენა 1991 წელს მოხერხდა. რესპუბლიკის უზენაესმა საბჭომ საყოველთაო რეფერენდუმის შედეგების საფუძველზე 9 აპრილს შესაბამისი აქტი მიიღო.

39
„უკვდავი პოლკი ონლაინ“

„უკვდავი პოლკი ონლაინ“: მასშტაბური აქციის ტრანსლაცია დასასრულს უახლოვდება

0
(განახლებულია 20:57 26.05.2020)
აქციასთან დაკავშირებული ნებისმიერი საკითხის დაზუსტება შეიძლება ცხელ ხაზზე - 8 - 800 - 20 - 1945 – 0, რომლითაც პროექტის განმავლობაში 80 ათასამდე ადამიანმა ისარგებლა.

თბილისი, 26 მაისი - Sputnik. მასშტაბური პროექტის - „უკვდავი პოლკი ონლაინ“ - ტრანსლაცია დასასრულს უახლოვდება. ვირტუალურ მსვლელობაში 2 მილიონზე მეტმა გმირმა მიიღო მონაწილეობა. აქცია კვირის ბოლომდე დასრულდება.

„უკვდავი პოლკის“ ორგანიზატორები საგამოძიებო კომიტეტს ჰაკერების მონაცემებს გადასცემენ >>

მოსალოდნელია, რომ სულ ონლაინ-მსვლელობისას ნაჩვენები იქნება 2,7 მლნ ფოტო და ჩანაწერი ომის მონაწილეთა შესახებ.

აღსანიშნავია, რომ ონლაინ-მსვლელობის ტრანსლაციას „რუსეთის უკვდავი პოლკის“ ვებგვერდზე www.polkrf.ru, საერთაშორისო უკვდავი პოლკის ვებგვერდზე www.polk.press, ასევე სხვადასხვა სოციალურ ქსელში შეუერთდა 23 მილიონი ადამიანი. პროექტის საინფორმაციო პარტნიორია საინფორმაციო სააგენტო „რუსეთი დღეს“.

მოდერატორებმა გააანალიზეს პროექტში წარმოდგენილი ყველა განაცხადი, რომელთა ნაწილი დასამუშავებლად ადრესანტებს დაუბრუნდა. ამ მომენტისთვის განმეორებითი მოდერაციისთვის შეიძლება 190 ათასზე მეტი ანკეტა გამოიგზავნოს.

„დარჩენილი განაცხადების უმრავლესობა უნდა დაემუშავებინათ ნათესავებს, - აღნიშნავს რუსეთის უკვდავი პოლკის ცენტრალური შტაბის თანათავმჯდომარე ელენა ცუნაევა. - რამდენიმე დღეში მოდერაციას დავასრულებთ - დარჩენილია 1000 განაცხადზე ნაკლები“.

Мужчина смотрит онлайн-трансляцию акции Бессмертный полк
© photo: Sputnik / Alexey Sukhorukov
„უკვდავი პოლკი ონლაინ“ - მამაკაცი ტრანსლაციას აკვირდება

აქციის შესახებ ნებისმიერი საკითხის დაზუსტება შესაძლებელია ცხელი ხაზით - 8 - 800 - 20 - 1945 – 0, რომლითაც პროექტის განმავლობაში 80 ათასამდე ადამიანმა ისარგებლა.

ამასთან, „უკვდავი პოლკი ონლაინ“ პროექტის ყველა მონაწილეს ეგზავნება შეტყობინება, თუ როდის გამოჩნდება მათი გმირი ონლაინ-მსვლელობაში.

თუ ვინმე ვერ მოასწრებს და მითითებულ დროს მსვლელობას ვერ შეუერთდება, ვებგვერდზე www.polkrf.ru შესაძლებელია საჭირო თარიღსა და საათთან დაბრუნება თავიანთი ვეტერანების წითელ მოედანზე სანახავად.

მსვლელობაში მონაწილე გმირების ნახვა შესაძლებელი იქნება მაისის ბოლომდე, ვიდრე ტრანსლაცია დასრულდება. უკვდავი პოლკის ტრადიციული მსვლელობა რუსეთის ყველა რეგიონში, ქუჩებსა და მოედნებზე აუცილებლად შედგება, როდესაც ეპიდემიოლოგიური ვითარება ამის შესაძლებლობას შექმნის.

0