სალომე ზურაბიშვილი

როდის შეიწყალებს პრეზიდენტი დეკანოზ გიორგი მამალაძეს

110
(განახლებულია 15:03 02.11.2019)
დეკანოზ გიორგი მამალაძის შეწყალების შუამდგომლობით საპატრიარქომ პრეზიდენტ სალომე ზურაბიშვილს წმინდა სინოდის სხდომის შემდეგ მიმართა

თბილისი, 2 ნოემბერი — Sputnik. ე.წ. ციანიდის საქმეზე მსჯავრდებულ დეკანოზ გიორგი მამალაძეს პრეზიდენტი სალომე ზურაბიშვილი, სავარაუდოდ, გიორგობაზე, 23 ნოემბერს შეიწყალებს, იუწყება ტელეკომპანია Imedi.

დეკანოზი 2017 წლის 10 თებერვალს თბილისის აეროპორტში დააკავეს, საიდანაც ის გერმანიაში უნდა გაფრენილიყო. მაშინ გერმანიაში მკურნალობდა საქართველოს კათოლიკოს-პატრიარქი ილია მეორე. გამოძიების მონაცემებით, მამალაძის ბარგში ნატრიუმის ციანიდი აღმოაჩინეს, ხოლო ბინაში – კუსტარულად დამზადებული ცეცხლსასროლი იარაღი და ექვსი ტყვია.

საქართველოს საპატრიარქომ ქვეყნის პრეზიდენტს მამალაძის შეწყალების თხოვნით უკვე მიმართა. მამალაძე გასამართლებულია სრულიად საქართველოს კათოლიკოს-პატრიარქის მდივან-რეფერენტის შორენა თეთრუაშვილი მკვლელობის მცდელობისთვის.

გავრცელებული ინფორმაციით, პრეზიდენტი თანახმაა დააკმაყოფილოს სინოდის შუამდგომლობა და ერთ-ერთ ვარიანტად 23 ნოემბერს განიხილავს. 

წმინდა სინოდის რიგგარეშე სხდომა 31 ოქტომბერს გაიმართა. სხვა საკითხების გარდა, სინოდზე განიხილეს მამალაძის საკითხი და შემდეგი გადაწყვიტეს: „დეკანოზ გიორგი მამალაძეს, რომელსაც შეჩერებული აქვს მღვდელმსახურება, გაეწიოს შუამდგომლობა საქართველოს პრეზიდენტთან შეწყალების თაობაზე, მისი ოჯახის რთული მდგომარეობისა და  არაერთგზის თხოვნის გათვალისწინებით“.

მეუფე: ეს იყო პატრიარქის მოწყალების ქმედება, მან თქვა, რომ მამალაძე საკმარისად იტანჯა >>

აღსანიშნავია, რომ მამალაძე სასჯელს 2 წელზე მეტი იხდის და მისი ჯანმრთელობის მდგომარეობა საკმაოდ მძიმეა.

თბილისის საქალაქო სასამართლომ 2017 წლის სექტემბერში გიორგი მამალაძეს ცხრა წლით თავისუფლების აღკვეთა შეუფარდა. 2018 წლის თებერვალში სააპელაციო სასამართლომ განაჩენი ძალაში დატოვა. 2018 წლის აგვისტოში უზენაესმა სასამართლომ მამალაძის ადვოკატის სარჩელის განხილვაზე უარი განაცხადა და ამით პირველი ინსტანციების სასამართლოების გადაწყვეტილება ასევე ძალაში დატოვა.

მსჯავრდებულთა შეწყალება პრეზიდენტის ექსკლუზიური უფლებაა. მსჯავრდებულთა საქმეებს ჯერ შეწყალების სახელმწიფო კომისია განიხილავს, საბოლოო გადაწყვეტილებას კი პრეზიდენტი იღებს. ამ ეტაპზე შეწყალების სახელმწიფო კომისიის საქმიანობა შეჩერებულია. 

 

110
თემები:
სკანდალი საპატრიარქოში – „ციანიდის საქმე" (21)