გიორგი მარგველაშვილი

საქართველოს ექს-პრეზიდენტი „მინსკის დიალოგში" მიიღებს მონაწილეობას

86
(განახლებულია 17:33 30.09.2019)
მინსკში დაგეგმილ კონფერენციას, სავარაუდოდ, დაესწრებიან კანონმდებლები რუსეთიდან, ასევე პოლიტიკოსები აშშ-დან და ევროპიდან.

თბილისი, 30 სექტემბერი — Sputnik. საქართველოს ყოფილი პრეზიდენტი გიორგი მარგველაშვილი კონფერენცია „მინსკის დიალოგის" მუშაობაში მიიღებს მონაწილეობას, იუწყება „Sputnik–ბელარუსი".

ფორუმი „მინსკის დიალოგი", რომელიც ევროპული უშიშროების თემას ეძღვნება, ბელარუსის დედაქალაქში 7-8 ოქტომბერს გაიმართება. გასული წლიდან კონფერენციის დონე მაღალია – მასში პრეზიდენტი ალექსანდრ ლუკაშენკო მონაწილეობდა.

„ვიტყვი, რომ ჩვენ ყველა მაღალი თანამდებობის პირი გვყავს მოწვეული, მათ შორის, ბელარუსის რესპუბლიკის პრეზიდენტი ალექსანდრ ლუკაშენკო, რომელსაც, ჩვენი ინფორმაციით, ჩვენი კონფერენცია დღის წესრიგში აქვს გაწერილი", – ციტირებს სააგენტო კონფერენციის ერთ-ერთი ორგანიზატორის დენის მელიანცოვის სიტყვებს.

ამასთან, კონფერენციის ორგანიზატორებმა აღნიშნეს, რომ არასდროს არ არის ცნობილი, „რამ შეიძლება ამ დონის ადამიანების ყურადღების გადატანა შეძლოს".

„თუ წინა წელს მონაწილეობდნენ ყოფილი პრეზიდენტები და ხელმძღვანელები ან საერთაშორისო ორგანიზაციების უფროსების მოადგილეები, ახლა მონაწილეობას მიიღებენ საქართველოს ყოფილი პრეზიდენტი გიორგი მარგველაშვილი და ხორვატიის ყოფილი პრეზიდენტი სტეპან მესიჩი", – დასძინა მან.

გარდა ამისა, მინსკს ეწვევა აშშ-ის არმიის ევროპული ჯარების ყოფილი მეთაური ბენ ჰოჯესი, ელოდებიან მაღალი რანგის სტუმრებს რუსეთიდან: სენატორ ალექსეი პუშკოვს და დეპუტატ ვიაჩესლავ ნიკონოვს.

კონფერენციაში მონაწილეობას მიიღებენ რიგი ქვეყნების საგარეო საქმეთა სამინისტროების პირველი პირები. მოსალოდნელია კეტრინ ეშტონის, ევროპული დიპლომატიის ყოფილი ხელმძღვანელის მონაწილეობაც.

86
თემები:
საქართველოს საგარეო პოლიტიკა (207)
არჩევნები

გახარია: საქართველო მზად არის მიიღოს დამკვირვებლების უპრეცედენტო რაოდენობა არჩევნებზე

48
(განახლებულია 20:06 27.05.2020)
პრემიერის თქმით, არჩევნების ჩატარებას ხელს ვერაფერი შეუშლის, გარდა კორონავირუსის გლობალური აფეთქებისა

თბილისი,28 მაისი - Sputnik. საქართველო მზად არის უზრუნველყოს დამკვირვებლების დიდი რაოდენობა შემოდგომაზე დაგეგმილ საპარლამენტო არჩევნებზე, კორონავირუსის გავრცელების რისკების მიუხედავად, განაცხადა პრემიერ-მინისტრმა გიორგი გახარიამ პარლამენტში სიტყვით გამოსვლისას.

„მერწმუნეთ, რომ წელს საქართველოში საპარლამენტო არჩევნებზე იქნება ყველაზე მეტი დამკვირვებელი. უბრალოდ, დარწმუნებული ვარ ამაში და ამისთვის ჩვენც გავაკეთებთ მაქსიმუმს“, - განაცხადა გახარიამ.

პრემიერის თქმით, ყველაფერს, რაც პანდემიის პირობებში იქნება საჭირო - ეპიდემიოლოგიური ტესტები, სოციალური დისტანციის დაცვა, ტრანსპორტირება და სხვა - ხელისუფლება უზრუნველყოფს.

საპარლამენტო არჩევნები საქართველოში 31 ოქტომბერს გაიმართება. ქვეყანაში ოფიციალური წინასაარჩევნო კამპანია იწყება აგვისტოს ბოლოს - არჩევნებამდე 60 დღით ადრე. 150 დეპუტატს ირჩევენ პარლამენტი შერეული სისტემის მიხედვით: ნაწილს პარტიული სიებით, ნაწილს -მაჟორიტარულ ერთმანდატიან ოლქებში გამარჯვების შედეგად.

ივნისის ბოლოს - ივლისის დასაწყისში, საქართველოში, სავარაუდოდ, მიიღებენ საკონსტიტუციო ცვლილებებს, რომლებმაც ზუსტად უნდა განსაზღვრონ დეპუტატთა რაოდენობა ერთმანდატიან ოლქებში - 73 თუ 30.

48
თემები:
საქართველოს პრემიერ–მინისტრი
გიორგი გახარია

გახარიამ პარლამენტს ანგარიში წარუდგინა

50
(განახლებულია 19:50 27.05.2020)
ორი თვე საგანგებო მდგომარეობის რეჟიმში, მთავრობის ანტიკრიზისული გეგმა, მოსახლეობის დახმარება და მომავლის პერსპექტივები - საქართველოს პრემიერ-მინისტრმა გიორგი გახარიამ პარლამენტს ანგარიში წარუდგინა

საქართველო წლის დასაწყისიდან კორონავირუსის პანდემიის პირობებში ცხოვრობს. COVID-19-ის პირველი შემთხვევა ქვეყანაში 26 თებერვალს გამოვლინდა. დღევანდელი მონაცემებით, ქვეყანაში ინფიცირებულთა რაოდენობამ 735-ს მიაღწია, რომელთაგან 557 გამოჯანმრთელდა, 12 კი გარდაიცვალა. დაავადების პიკი აპრილის ბოლოს დაფიქსირდა.

გახარია: საქართველო ინფექციის გავრცელების ახალი ტალღისთვის მზად უნდა იყოს >>

საგანგებო მდგომარეობის რეჟიმი საქართველოში 21 მარტიდან 23 მაისამდე მოქმედებდა, თუმცა ზოგიერთი შეზღუდვა 15 ივლისამდე გაგრძელდება.

რატომ გამოცხადდა საგანგებო მდგომარეობა?

საქართველოს ხელისუფლება იძულებული იყო მკაცრი შეზღუდვები დაეწესებინა, რათა არ დაეშვა მოქალაქეთა მასობრივი დაინფიცირება, აღნიშნა პრემიერმა.

„დღეს საქართველოში 297 სტაციონარია 17 514 საწოლით, თუ არ ჩავთვლით სპეციალური დანიშნულების სტაციონარებს, რჩება დაახლოებით 10 ათასი საწოლი, ამასთან აქედან 2 290 საწოლი არის ინტენსიური თერაპიის, აქედან ხელოვნური სუნთქვის აპარატით - 1 749 საწოლი. გარდა ამისა, ჩვენ ქვეყანაში გვყავს 448 რეანიმატოლოგი, რომელთაც ერთდროულად შეუძლიათ მოემსახურონ მხოლოდ 1 200 პაციენტს, ინფექციონისტი საქართველოში 256-ია, რომელთაც დღეში 853 პაციენტის მომსახურება შეუძლიათ“, - აღნიშნა გახარიამ.

პრემიერის თქმით, ოთხ თვეში ჯანდაცვის სისტემა სერიოზულად გაიზარდა.

„თუ შევადარებთ, რა მდგომარეობაში იყო ჯანდაცვის სისტემა იანვარში, როდესაც ეპიდემიის პირველი რისკები გამოჩნდა, და რა მდგომარეობაშია დღეს - ეს ცა და დედამიწაა. დღეს ჩვენ შეგვიძლია ვთქვათ, რომ ჯანდაცვის სისტემას შეუძლია რამდენიმე ასეული ინფიცირებულის მართვა“, - განაცხადა გახარიამ.

საგანგებო მდგომარეობის შედეგები და მოსახლეობის დახმარება

პრემიერ-მინისტრის სიტყვებით, კორონავირუსმა ქვეყანას სერიოზული ზიანი მიაყენა.

„ეს არ არის კრიზისი საქართველოში, ეს არ არის კრიზისი რეგიონში, ესაა გლობალური კრიზისი და ის არ დასრულებულა... არავინ იცის, როდის დასრულდება“, - განაცხადა გახარიამ.

ამავდროულად პრემიერმა აღნიშნა, რომ მოსახლეობის დახმარება პირდაპირაა დამოკიდებული ეკონომიკაზე და ქვეყნის ბიუჯეტზე.

„საქართველო ვერ გამოყოფს დამატებით სახსრებს დახმარებისთვის, თუ ის არ იქნება დაბალანსებული და ეს დაბალანსებული ბიუჯეტი არ იქნება შეთანხმებული ჩვენს საერთაშორისო პარტნიორებთან, დონორებთან და საერთაშორისო სავალუტო ფონდთან. შემიძლია ვთქვა, რომ ყოველ ოჯახს უნდა გამოვუყოთ 10-10 ათასი ლარი, მაგრამ დახმარებას უნდა ჰქონდეს არგუმენტაცია. შესაბამისად, ჩვენ გამოვაცხადეთ დახმარების შესახებ მას შემდეგ, რაც ყველაფერი დავთვალეთ, გავიაზრეთ და ვიცოდით, საით მივდიოდით“, - განაცხადა გახარიამ.

ამასთან მან აღნიშნა, რომ დახმარება მინიმალურია, მაგრამ ხელისუფლება ორიენტირებული უნდა იყოს მომავალზე.

„ეს არის ჩვენი სოციალური დახმარება მოქალაქეებისთვის და სავსებით გააზრებულად არის განაწილებული ექვს თვეზე. მესმის, რომ ეს არასაკმარისია, მაგრამ ესაა მინიმუმი, რათა მათ ჰქონდეთ დახმარება ყოველდღიურ ცხოვრებაში“, - განაცხადა გახარიამ.

ყველაფერი კონტროლს ექვემდებარება

პრემიერ-მინისტრის თქმით, დღესდღეობით კორონავირუსი ქვეყანაში მთლიანად კონტროლდება.

„დღეს ოფიციალურად შეგვიძლია განვაცხადოთ, რომ ახალი ქეისები (დაავადების შემთხვევები, - რედ.) ფიქსირდება საქართველოს მთავრობის მიერ კონტროლირებად ზონებში - ესაა საკარანტინო ზონები, ცნობილი კლასტერები, შესაბამისად, შეიძლება ითქვას, რომ ეპიდემიის გავრცელება და მისი სისწრაფე მთლიანად კონტროლდება“, - აღნიშნა გახარიამ.

პრემიერმა აქვე დასძინა, რომ საქართველოში სიკვდილიანობის მაჩვენებელი ევროპაში ყველაზე დაბალია - 0,3% 100 ათას ადამიანზე.

„ქვეყანაში ინფექციის განვითარების მიხედვით 143-ე ადგილზე ვართ. ეს სიამაყის საფუძველი არ არის და არც მხოლოდ მთავრობის დამსახურებაა, არამედ ბიზნესისა და საზოგადოებისა, პირველ რიგში. მაგრამ ეს გვაძლევს შესაძლებლობას, ვაკონტროლოთ პანდემია და თანდათანობით გავხსნათ ეკონომიკა“, - აღნიშნა გახარიამ.

როგორც პრემიერმა აღნიშნა, კრიზისი - ეს არის შანსი თითოეულისთვის საქართველოში.

„დარწმუნებული ვარ, რომ სახელმწიფო, მოქალაქეები, ბიზნესი, კომპანიები შეძლებენ ამ კრიზისის, როგორც შესაძლებლობის გამოყენებას. სინამდვილეში ჩვენ შეგვიძლია გამოვიყენოთ მენეჯმენტის სწრაფი და პროაქტიური ნაბიჯები, რომლებიც გადავდგით“, - აღნიშნა გახარიამ. 

მისი თქმით, საქართველომ ზაფხულში უნდა გააძლიეროს მედიცინის სფერო, გააფართოოს ლაბორატორიების ქსელი, გააძლიეროს სამშენებლო და ფინანსური სექტორი.

50
თემები:
საქართველოს პრემიერ–მინისტრი
დამნაშავე ხელბორკილებით

ათასობით მოტყუებული: სექტა „სსრკ-ს მოქალაქეები“ დააკავეს

0
(განახლებულია 11:05 28.05.2020)
იმის შესახებ, რომ თაღლითების მსხვერპლი გახდნენ, მოქალაქეებმა მხოლოდ მაშინღა იეჭვეს, როცა კომუნალური დავალიანების გამო სახლებში ელექტროენერგია გაუთიშეს და წყალი გადაუკეტეს

თბილისი, 28 მაისი — Sputnik. ჩრდილოეთ ოსეთში პოლიციელებმა დააკავეს სექტა „სსრკ–ს მოქალაქეების“ წევრები, რომლებიც მოტყუებით იზიდავდნენ ადეპტებს საკუთარ რიგებში.

გავრცელებული ინფორმაციით, თაღლითები მოქალაქეებს  ჰპირდებოდნენ, რომ მას შემდეგ, რაც „საბჭოთა კავშირის“ წევრები გახდებოდნენ, კომუნალური თუ საშემოსავლო გადასახადებისგან გათავისუფლდებოდნენ. 

ამ გზით მათ დაახლოებით ათასამდე ყალბი პირადობის მოწმობა გაყიდეს, რომლებსაც არანაირი იურიდიული ძალა არ გააჩნია.

ირკვევა, რომ გარდა გადასახადებისგან გათავისუფლებისა, თაღლითები მიმნდობ მოქალაქეებს ხელფასებზე დანამატების გაცემასა და 1991 წელს გახსნილი ანაბრების კომპენსაციასაც ჰპირდებოდნენ, რისთვისაც მათ სექტისთვის ბაჟის გადახდას აიძულებდნენ.

რაღა თქმა უნდა, „სსრკ–ს მოქალაქეები“ არანაირი გადასახადებისგან არავის გაუთავისუფლებია. პირიქით, სექტის ადეპტებს ვალები დაედოთ. იმის შესახებ, რომ თაღლითების მსხვერპლი გახდნენ, მათ მხოლოდ მაშინღა იეჭვეს, როცა კომუნალური გადასახადების გადაუხდელობის გამო სახლებში ელექტროენერგია გაუთიშეს და წყალი გადაუკეტეს.

პოლიციის თანამშრომლებმა სექტის ოფისში საბჭოთა ნიმუშის სხვადასხვა სახის ბლანკები და დიდი რაოდენობით ფული აღმოაჩინეს. დამნაშავეებს ექვს წლამდე პატიმრობა ემუქრება.

 

0
თემები:
მსოფლიო დღეს