საგარეო საქმეთა სამინისტრო

საქართველოს ქუვეითში, ვატიკანსა და უკრაინაში ახალი ელჩები ჰყავს

45
(განახლებულია 15:59 11.09.2019)
საქართველოს საგარეო საქმეთა სამინისტროს ინფორმაციით, სამივე ელჩს დიპლომატიური საქმიანობის მრავალწლიანი გამოცდილება აქვს.

თბილისი, 11 სექტემბერი — Sputnik. საქართველოს მთავრობამ უკრაინაში, ქუვეითსა და ვატიკანში ახალი ელჩები დანიშნა, იუწყება საზოგადოებრივი მაუწყებლის პირველი არხი.

უკრაინაში საქართველოს ახალი ელჩი გახდა თეიმურაზ შარაშენიძე, ქუვეითში – კონსტანტინე ჟღენტი, ხოლო ვატიკანში – ქეთევან ბაგრატიონ-მუხრანბატონი.

უკრაინა – თეიმურაზ შარაშენიძე

თეიმურაზ შარაშენიძე საქართველოს დიპლომატიურ უწყებაში 1996 წლიდან სხვადასხვა პოზიციაზე საქმიანობდა. 2004-2008 წლებში იყო ბულგარეთში საქართველოს ელჩი. 2011-2018 წლებში – აზერბაიჯანში საქართველოს ელჩი. სხვადასხვა წლებში თურქეთსა და ბულგარეთში ქვეყნის გენერალური კონსული იყო.

შარაშენიძე ასევე არის საქართველოს საგარეო საქმეთა სამინისტროს ლევან მიქელაძის სახელობის დიპლომატიური სასწავლო და კვლევითი ინსტიტუტის მკვლევარი. მას მინიჭებული აქვს საგანგებო და სრულუფლებიანი ელჩის დიპლომატიური რანგი.

შარაშენიძემ ელჩის თანამდებობაზე გელა დუმბაძე შეცვალა.

საქართველომ და უკრაინამ დიპლომატიური ურთიერთობები 1992 წლის 22 ივლისს დაამყარეს.

ქუვეითი – კონსტანტინე ჟღენტი

რაც შეეხება ქუვეითში საქართველოს ახალ ელჩს კონსტანტინე ჟღენტს, იგი 2013-2018 წლებში იყო საქართველოს ელჩი უზბეკეთში. ჟღენტი ქვეყნის საგარეო უწყებაში მრავალი წლის განმავლობაში საქმიანობს და ამ დროის განმავლობაში სხვადასხვა დიპლომატიური თანამდებობები ეკავა.

სხვადასხვა დროს იყო საგარეო საქმეთა სამინისტროს პოლიტიკური დეპარტამენტის, ასევე ევროპისა და აშშ-ის ქვეყნების დეპარტამენტის დირექტორი. 2004-2005 წლებში ავსტრიასა და უნგრეთში საქართველოს საგანგებო და სრულუფლებიანი ელჩის თანამდებობა ეკავა, 1997-2000 წლებში კი იტალიაში საქართველოს ელჩი იყო.

2018 წლიდან დღემდე კონსტანტინე ჟღენტი არის საქართველოს საგარეო საქმეთა სამინისტროს ლევან მიქელაძის სახელობის დიპლომატიური და კვლევითი ინსტიტუტის მკვლევარი.

ჟღენტმა თანამდებობაზე როლანდ ბერიძე შეცვალა.

საქართველოსა და ქუვეითს შორის დიპლომატიური ურთიერთობები 1992 წლის 3 სექტემბერს დამყარდა.

ვატიკანი – ქეთევან ბაგრატიონ-მუხრანბატონი

ქეთევან ბაგრატიონ-მუხრანბატონს ვატიკანში საქართველოს ელჩის თანამდებობა 2004-2014 წლებშიც ეკავა. 1991-2004 წლებში რომში იყო იტალიურ-ქართული ასოციაცია „წმინდა გიორგის ფარის“ პრეზიდენტი.

2009 წელს მას საგანგებო და სრულუფლებიანი ელჩის დიპლომატიური რანგი მიენიჭა. ამავე წელს ანჰალტების საგვარეულოს „ალბრეხტის დათვის“ დიდი ჯვრით დააჯილდოვეს.

ქეთევან ბაგრატიონ-მუხრანბატონი ასევე დაჯილდოებულია ანტონ I ბაგრატიონის სახელობის ოქროს მედლით, მალტის სუვერენული სამხედრო ორდენისა და წმინდა საყდრის პიუს IX-ის ორდენის დიდი ჯვრებით.

1995 წელს ქეთევან ბაგრატიონ-მუხრანბატონს საქართველოს საპატიო მოქალაქეობა მიენიჭა.

ბაგრატიონ-მუხრანბატონმა პოსტზე თეა ჩხაიძე შეცვალა.

საქართველოსა და ვატიკანს შორის დიპლომატიური ურთიერთობები 1992 წლის 5 მაისს დამყარდა.

45
თემები:
საქართველოს საგარეო პოლიტიკა (238)
თბილისი

ახალი კანონის პროექტი „მეწარმეთა შესახებ“ ბიზნეს-ასოციაციაში შეაფასეს

72
(განახლებულია 19:00 14.08.2020)
საქართველოს ბიზნეს-ასოციაციაში „მეწარმეთა შესახებ“ ახალი კანონპროექტის ინიცირებას მიესალმებიან და მას საინვესტიციო გარემოს გაუმჯობესების კუთხით მნიშვნელოვან წინ გადადგმულ ნაბიჯად მიიჩნევენ.

თბილისი, 14 აგვისტო – Sputnik. „მეწარმეთა შესახებ“ ახალი კანონის პროექტი, რომელიც საქართველოს იუსტიციის სამინისტრომ შეიმუშავა, ახალ სივრცეს გაუხსნის ქართული და ევროპული ბიზნეს-ოპერატორების თანამშრომლობას, მიაჩნიათ საქართველოს ბიზნეს-ასოციაციაში.

საქართველოს იუსტიციის სამინისტრომ დაასრულა მუშაობა ახალ კანონპროექტზე „მეწარმეთა შესახებ“, რომელსაც, მინისტრ თეა წულუკიანის განცხადებით, არა მხოლოდ დარგობრივი უწყებები, ეკონომიკისა და ფინანსთა სამინისტროები, არამედ ბიზნესმენებიც მრავალი წელია ელოდნენ.

„მნიშვნელოვანია, რომ ახალი პროექტის შესაბამისობა ევროკავშირის კანონმდებლობასთან მნიშვნელოვნად შეუწყობს ხელს და პრაქტიკულად ახალ სივრცეს გაუხსნის ქართული და ევროპული ბიზნეს-ოპერატორების თანამშრომლობას. მათ შორის, გამარტივდება ერთობლივი საწარმოების შექმნის პროცესი და გაიზრდება საქართველოში ახალი ინვესტიციებისა და ტექნოლოგიების მოზიდვის შესაძლებლობა“, – ნათქვამია ბიზნეს-ასოციაციის განცხადებაში.

ასოციაციაში მიიჩნევენ, რომ დღეს მოქმედი სამეწარმეო საქმიანობის მარეგულირებელი ძირითადი კანონი მოძველებულია და წლების განმავლობაში განხორციელებული უსისტემო ცვლილებების გამო ის შეუსაბამოა დღეს არსებულ რეალობასთან და გამოწვევებთან.

ორგანიზაციაში ფიქრობენ, რომ ახალი პროექტი ასევე ხელს შეუწყობს სამეწარმეო საქმიანობის ორგანიზაციული ფორმების უფრო მეტად დახვეწას, სამეწარმეო საქმიანობით დაინტერესებული პირებისთვის განჭვრეტადი გარემოს შექმნასა და შესაბამის ადმინისტრაციულ თუ სასამართლო ორგანოებში ერთიანი პრაქტიკის განვითარებას.

„საქართველოს იუსტიციის სამინისტროს ორგანიზებით მიმდინარე სამუშაო პროცესის შედეგად... დღეს ჩვენ უკვე შეგვიძლია ვისაუბროთ ახალი კანონის პროექტზე, რომელიც დიდწილად თანხვედრაშია როგორც ევროკავშირის შესაბამის კანონმდებლობასთან, ასევე პასუხობს თანამედროვე სტანდარტებსა და ჩვენი ქვეყნის თავისებურებების გათვალისწინებით არსებულ გამოწვევებს“, – აღნიშნულია განცხადებაში.

საქართველოს ბიზნეს-ასოციაცია გამოხატავს მზადყოფნას, რომ ანალოგიურად, როგორც სხვა შემთხვევებში, აქტიურად ჩაერთოს საპარლამენტო განხილვების პროცესში და გაუზიაროს საკუთარი მოსაზრებები საქართველოს საკანონმდებლო ხელისუფლების წარმომადგენლებს.

რა დახმარებით ისარგებლა ქართულმა ბიზნესმა: ეკონომიკის მინისტრის ანგარიში>>

ახალმა კანონმა „მეწარმეთა შესახებ“, პარლამენტის მიერ მიღების შემთხვევაში, მომავალი წლიდან 1994 წელს მიღებული დოკუმენტი უნდა ჩაანაცვლოს, რომელიც, თეა წულუკიანის განცხადებით, მიუხედავად 2008 წელს განხორციელებული ცვლილებებისა, საერთოდ არ პასუხობს თანამედროვეობას, ბიზნეს-წრეების ინტერესებსა და გამჭვირვალობის პრინციპებს, რომელიც თავისუფალი მეწარმეობისთვის აუცილებელია.

72
თემები:
საქართველოს ეკონომიკა
მიხეილ სააკაშვილი

ახალი არასამთავრობო ორგანიზაცია, ანუ შევებრძოლოთ ეპიდემიას, რომელსაც „ნაცმოძრაობა“ ჰქვია

95
(განახლებულია 17:32 14.08.2020)
არჩევნებამდე ორ-ნახევარი თვით ადრე საქართველოში გამოჩნდა ახალი არასამთავრობო ორგანიზაცია პოლიტიკური მიზნებით.

თბილისი, 14 აგვისტო – Sputnik. საქართველოში დაარსდა ახალი არასამთავრობო ორგანიზაცია, რომლის მთავარი მიზანია ყოფილი მმართველი პარტია „ერთიანი ნაციონალური მოძრაობის“ წინააღმდეგ ბრძოლა.

რა აღელვებს ქართველ ხალხს და ვისი სჯერა არჩევნების წინ - გამოკითხვა>>

ორგანიზაციას ეწოდება „დავასრულოთ“ და ის დააფუძნეს ია მეტრეველმა – სააკაშვილის მმართველობის დროს პოლიციელის მიერ მოკლული ბუტა რობაქიძის დედამ, თბილისის საკრებულოს დეპუტატმა სოსო მანჯავიძემ და სურსათის ეროვნული სააგენტოს თანამშრომელმა გიორგი იაკობაშვილმა.

„ჩვენს მეგობრებთან ერთად გადავწყვიტეთ, დაგვეფუძნებინა არასამთავრობო ორგანიზაცია „დავასრულოთ“. ეს განაპირობა იმ ყოვლად აუტანელმა სიტუაციამ, რომელიც შეიქმნა ქვეყანაში. კერძოდ, ჩამოყალიბდა ქვეყანაში დანაშაულებრივი ტრიადა „ნაციონალური მოძრაობის“, მათი მხარდამჭერი „ენჯეოების“ და გამხმოვანებელი მედიასაშუალებების სახით, რომლებმაც ქვეყანაში ისტერია შექმნეს“, – განაცხადა ბრიფინგზე სოსო მანჯავიძემ.

მან ასევე აღნიშნა, რომ არც „ნაციონალური მოძრაობა“, არც მისი არასამთავრობო ორგანიზაციები და მედიასაშუალებები არ წარმოადგენენ საქართველოს მოსახლეობის ინტერესებს და ქვეყანაში მტკივნეულ ატმოსფეროს ქმნიან.

„ჩვენი ამონაცაა – ამ ვითარებას წინააღმდეგობა გავუწიოთ და მოვახდინოთ ამ მიმართულებით საზოგადოების კონსოლიდაცია. ყველა მეთოდით, რაც კანონმდებლობით გათვალისწინებულია, შევეცდებით შევცვალოთ და დავასრულოთ ეს მდგომარეობა საქართველოში“, – აღნიშნა მანჯავიძემ.

გიორგი იაკობაშვილის განცხადებით, მათ „თავი შესწირეს იმ ეპიდემიასთან და პანდემიასთან ბრძოლას „ნაციონალური მოძრაობის" სახით, რომელმაც უფრო დააზიანა ქვეყანა, ვიდრე COVID-19-მა“.

ია მეტრეველმა კი განაცხადა, რომ საქართველს ისეთი მტერი არ ჰყოლია, როგორიც „ნაციონალური მოძრაობაა“. მისი თქმით, „ერთხელ და სამუდამოდ უნდა დასრულდეს, უნდა აიკრძალოს ეს კრიმინალი".

საქართველოში საპარლამენტო არჩევნები 31 ოქტომბერსაა დანიშნული. სხვადასხვა გამოკითხვის მიხედვით, პარლამენტში მოხვედრისა და ხმების საკმარისი რაოდენობით მიღების შანსი აქვთ როგორც მმართველ „ქართულ ოცნებას“, ისე „ერთიან ნაციონალურ მოძრაობას“.

95
თემები:
საქართველოს პოლიტიკური ცხოვრება
თელასი

რატომ ყიდის საპარტნიორო ფონდი „თელასის“ აქციებს

0
აუქციონი გამოცხადებულია კონკურენტულ პირობებში და არის მოლოდინები, რომ აქციები მომგებიან ფასად გაიყიდება, მიაჩნიათ ფონდში

თბილისი, 14 აგვისტო - Sputnik. თბილისის ელექტროგამანაწილებელი კომპანია „თელასის“ აქციების გაყიდვით მიღებულ სახსრებს „საქართველოს საპატრნიორო ფონდი“ ახალი საინვესტიციო პროექტების დაფინანსებას მოახმარს, განუცხადეს Sputnik-საქართველოს ფონდის პრეს-სამსახურში.

ამ კვირაში ცნობილი გახდა, რომ „საპატრნიორო ფონდმა“ ელექტროგამანაწილებელ კომპანია „თელასში“ თავისი აქციების 24,5%-ის გაყიდვა გადაწყვიტა. აუქციონი 9 სექტემბერს დაინიშნა. საჯარო აუქციონის საწყისი ფასი შეადგენს 10,5 მლნ აშშ დოლარის ექვივალენტს ლარში.

„აქციების გაყიდვის, ან რომელიმე პროექტის დაფინანსების შესახებ გადაწყვეტილებას ფონდი არ იღებს. ამას მთავრობა წყვეტს. ამიტომ „თელასის“ აქციების გაყიდვის შესახებ გადაწყვეტილება მიღებულია მთავრობის დადგენილების მიხედვით. მიღებული თანხა ახალი პროექტების დაფინანსებას მოხმარდება“, - განაცხადა ფონდის წარმომადგენელმა.

პრესსამსახურში აღნიშნეს, რომ აუქციონი გამოცხადებულია კონკურენტული პირობებით და არსებობს მოლოდინი, რომ აქციები მომგებიან ფასად გაიყიდება და კარგი მფლობელის ხელში მოხვდება.

აქციების გაყიდვით მიღებული მოგება ფონდის ანგარიშზე ჩაირიცხება, შემდეგ კი ხელისუფლება გადაწყვეტს, რომელ პროექტებს დაუჭერს მხარს და დააფინანსებს.

ფონდში აღნიშნეს, რომ „თელასში“ კუთვნილი აქციების რაოდენობის გათვალისწინებით კომპანიის ხელმძღვანელობის რომელიმე გადაწყვეტილებებზე ზეგავლენის მოხდენა შეუძლებელი იყო.

საპარტნიორო ფონდი ახორციელებს რამდენიმე სახელმწიფო კომპანიის მმართველობას, მათ შორის არის საქართველოს რკინიგზა, ნავთობისა და გაზის კორპორაცია, საქართველოს სახელმწიფო ელექტროსისტემა და „თელასი“.

„ეს კომპანიები „საპარტნიორო ფონდის“ მფლობელობაში იმიტომ იყო, რომ დაფინანსების ერთ-ერთი წყარო იყო მათგან მიღებული დივიდენდები. ახლა კი არანაირ დივიდენდებს ფონდი არ იღებს. მნიშვნელოვანია მსგავსი პროექტებიდან გასვლა და გათავისუფლებული სახსრების ინვესტირება ახალ პროექტებში“, - განაცხადეს ფონდის პრესსამსახურში.

„საპარტნიორო ფონდი" სახელმწიფო საინვესტიციო ფონდია, რომელიც 2011 წელს დაარსდა. მისი მთავარი დანიშნულება საინვესტიციო პროექტების განვითარების საწყის ეტაპზე თანამონაწილეობის გზით (კაპიტალში თანაინვესტირება, სუბორდინირებული სესხი და ა.შ.) საქართველოში ინვესტიციების წახალისებაა. ამჟამად მთავრობა მისი რეფორმირების საკითხს განიხილავს.

ინვესტორების ძიებაში: საქართველოს საპარტნიორო ფონდმა ჩინეთში მემორანდუმი გააფორმა >>

ფონდის მიზანია თანამშრომლობის განვითარება საჯარო და კერძო სექტორებს შორის საინვესტიციო პროექტების განსახორციელებლად, სამუშაო ადგილების შესაქმნელად, უცხოური ინვესტიციების მოსაზიდად და ქვეყნის ეკონომიკის გასავითარებლად. ფონდი ოთხ სექტორში ფუნქციონირებს – ენერგეტიკის, სოფლის მეურნეობის, წარმოებისა და უძრავი ქონების. საპარტნიორო ფონდის ფინანსური თანამონაწილეობა პროექტის ჯამური კაპიტალის 49%-ით და პროექტის ჯამური ღირებულების 25%-ით შემოიფარგლება. დანარჩენ კაპიტალს სტრატეგიული ინვესტორი უზრუნველყოფს.

 

0
თემები:
საქართველოს ეკონომიკა