დავით ზალკალიანი

საგარეო უწყება: ჟენევის მოლაპარაკებები უნდა გამოცოცხლდეს

66
(განახლებულია 16:12 04.09.2019)
საქართველოს საგარეო საქმეთა მინისტრობის კანდიდატმა პარლამენტში რუსეთთან ურთიერთობების მოგვარების გეგმებზე ისაუბრა.

თბილისი, 4 სექტემბერი — Sputnik. საქართველოს საგარეო საქმეთა სამინისტრო მუშაობს ჟენევის მოლაპარაკებების გააქტიურებასა და დონის ამაღლებაზე, რომელიც რუსეთთან პოლიტიკური დისკუსიების ერთადერთი ფორმატია, განაცხადა მინისტრობის კანდიდატმა დავით ზალკალიანმა.

გამოცხადდა საქართველოს ახალი მთავრობის დამტკიცების თარიღი>>

საქართველომ რუსეთთან დიპლომატიური ურთიერთობები 2008 წლის აგვისტოს ომის შემდეგ მოსკოვის მიერ აფხაზეთისა და ცხინვალის რეგიონის დამოუკიდებლობის აღიარების საპასუხოდ გაწყვიტა. ამ დროისათვის ქვეყნებს შორის დიალოგი ჟენევის საერთაშორისო დისკუსიებისა და დიპლომატების – საქართველოს პრემიერის სპეციალური წარმომადგენლის ზურაბ აბაშიძისა და რუსეთის საგარეო საქმეთა მინისტრის მოადგილის გრიგორი კარასინის რეგულარული შეხვედრების ფარგლებში მიმდინარეობს.

„ჟენევის მოლაპარაკებები – ეს გახლავთ ერთადერთი საერთაშორისო ფორმატი დღეს არსებულ ფორმატებს შორის, სადაც რუსეთის ფედერაციასთან ჩვენ ვსაუბრობთ ყველა ძირითადი მოთამაშის, აქტორის თანდასწრებით. შესაძლოა, ამ მიმართულებით არ იყოს დიდი გარღვევები, მაგრამ ეს არის დღეს არსებული ერთადერთი საერთაშორისო ფორმატი. ჩვენი ერთ-ერთი მთავარი პრიორიტეტი იქნება – ჟენევის ფორმატის აქტუალიზაცია და გამოცოცხლება მოვახდინოთ, იმისათვის, რომ იქ არსებულ საკითხებზე პროგრესის მიღწევის კუთხით წინ წავიწიოთ", – განაცხადა ზალკალიანმა პარლამენტის სამი კომიტეტის გაერთიანებულ სხდომაზე.

მისი თქმით, ეს საკითხი საგარეო უწყების ერთ-ერთი პრიორიტეტული საკითხია.

ამჟამად ზალკალიანი, ისევე, როგორც მთავრობის სხვა წევრები, მოვალეობის შემსრულებელია, რადგან გადადგა მთავრობის მეთაური მამუკა ბახტაძე. მიმდინარე კვირის მანძილზე მთავრობის წევრები დეპუტატების წინაშე გამოვლენ და მათ კითხვებს უპასუხებენ. კვირას მათთვის ნდობის გამოხატვის პროცედურა გაიმართება.

ზალკალიანი საგარეო საქმეთა მინისტრი 2018 წელს გახდა.

საპარლამენტო კომიტეტები ოთხშაბათს ასევე მოუსმენენ მინისტრის მოვალეობის შემსრულებლებს: განათლების, მეცნიერების, კულტურისა და სპორტის - მიხეილ ბატიაშვილს, ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის - ეკატერინე ტიკარაძეს. ისინი იმავე თანამდებობებზე არიან წარდგენილი, რაც აქამდე ეკავათ.

პრემიერ-მინისტრის პოსტზე წარდგენილია გიორგი გახარია – ამჟამად შინაგან საქმეთა მინისტრის მოვალეობის შემსრულებელი. მისი თქმით, მთავრობაში რამდენიმე ცვლილება მოხდება: შინაგან საქმეთა მინისტრის თანამდებობაზე წარდგენილია ვახტანგ გომელაური, რომელიც სახელმწიფო უსაფრთხოების სამსახურს ხელმძღვანელობს, ხოლო თავდაცვის მინისტრის პოსტზე ლევან იზორიას ირაკლი ღარიბაშვილი შეცვლის.

ირაკლი ღარიბაშვილი თავდაცვის, გომელაური კი შინაგან საქმეთა სამინისტროს უხელმძღვანელებს>>

ნდობის ვოტუმის გამოხატვისთვის მთავრობას უბრალო უმცირესობა – 76 ხმა სჭირდება, რასაც „ქართული ოცნება" იოლად გაუმკლავდება.

66
თემები:
ქართულ–რუსული ურთიერთობები (178)
ცესკო

ცესკომ საპარლამენტო არჩევნებისთვის პირველი დამკვირვებლები დაარეგისტრირა

36
(განახლებულია 00:14 19.09.2020)
ამ დროისათვის საერთაშორისო დამკვირვებლის სტატუსით რეგისტრაცია ცესკოში ექვსმა ორგანიზაციამ გაიარა.

თბილისი, 19 სექტემბერი - Sputnik. ცენტრალურმა საარჩევნო კომისიამ 18 სექტემბრისთვის დაარეგისტრირა ექვსი საერთაშორისო და 49 ადგილობრივი ორგანიზაცია, რომლებიც არჩევნების მსვლელობას დააკვირდებიან, ნათქვამი ცესკოს ვებგვერდზე გამოქვეყნებულ მასალებში.

საქართველოში 31 ოქტომბერს საპარლამენტო არჩევნები გაიმართება. პარალელურად ამ დღეს ჩატარდება არჩევნები აჭარის უმაღლეს საბჭოში და რამდენიმე მუნიციპალიტეტში მერების და საკრებულოს დეპუტატების არჩევნები.

ამ ეტაპზე სადამკვირვებლო ორგანიზაციებს მხოლოდ განაცხადები შეაქვთ. ორგანიზაციების და დამკვირვებლების ზუსტი რაოდენობა ცნობილი არჩევნებამდე ერთი კვირით გახდება.

ადრე საქართველოს ხელისუფლებაში აცხადებდნენ, რომ კორონავირუსის პანდემიის და ჩაკეტილი საზღვრების მიუხედავად, ქვეყანაში საერთაშორისო დამკვირვებლების უპრეცედენტო რაოდენობა ჩამოვა.

ამ დროისათვის საერთაშორისო დამკვირვებლის სტატუსით რეგისტრაცია გაიარეს: „ადამიანის უფლებათა საერთაშორისო საზოგადოება" (ISHR), „საერთაშორისო რესპუბლიკური ინსტიტუტი" (IRI), „საერთაშორისო საქმეთა ეროვნულ-დემოკრატიული ინსტიტუტი" (NDI), „საარჩევნო სისტემების საერთაშორისო ფონდი" (IFES), „ინიციატივა დიალოგისა და დემოკრატიისთვის" (SILBA) და „ამერიკის შეერთებული შტატების საელჩო საქართველოში".

ვის სურს პარლამენტში მოხვედრა: ცესკომ პარტიების საბოლოო სია გამოაქვეყნა >>

დამკვირვებლები დააკვირდებიან საარჩევნო უბნების მომზადების პროცესს, ბიულეტენების ბეჭდვას, კენჭისყრასა და ხმების დათვლას. არჩევნების დასრულების შემდეგ ისინი გამოაქვეყნებენ თავიანთ დასკვნებს არჩევნებზე მომხდარ დარღვევებთან დაკავშირებით.

36
თემები:
საქართველოს საპარლამენტო არჩევნები 2020
წინასაარჩევნო ბანერი

არჩევნები 2020: „მემარცხენე ალიანსი“ „პატრიოტთა ალიანსს" შეუერთდა

88
2016 წლის საპარლამენტო არჩევნებზე საქართველოს პატრიოტთა ალიანსმა ხმების ზუსტად 5% მიიღო და გახდა მესამე საპარლამენტო პარტია

თბილისი, 18 სექტემბერი - Sputnik. პოლიტიკურმა გაერთიანება "მემარცხენე ალიანსმა" არჩევნებიდან საკუთარი კანდიდატურა მოხსნა და „საქართველოს პატრიოტთა ალიანსს" შეუერთდა. ამის  შესახებ განცხადება „მემარცხენე ალიანსის" ლიდერებმა დღეს გამართულ ბრიფინგზე გააკეთეს.

როგორც „მემარცხენე ალიანსის" ერთ-ერთმა ლიდერმა, კახა ძაგანიამ განაცხადა, მართალია, ისინი დამოუკიდებლად დარეგისტრირდნენ ცენტრალურ საარჩევნო კომისიაში, თუმცა მოგვიანებით გადაწყვიტეს, დამოუკიდებლად აღარ მიეღოთ   არჩევნებში მონაწილეობა.

„მას შემდეგ, როდესაც დავრწმუნდით, რომ საქართველოს ტერიტორიული აღდგენის მხოლოდ ერთადერთი საშუალება აქვს „პატრიოტთა ალიანსს", როდესაც დავრწმუნდით, რომ ეკონომიკური მძიმე მდგომარეობის გამოსწორების მხოლოდ ერთადერთი საშუალება და პროგრამა გააჩნია „პატრიოტთა ალიანსს", პოლიტიკური გაერთიანება "მემარცხენე ალიანსი" დამოუკიდებლად აღარ მიიღებს მონაწილეობას არჩევნებში. ვხსნით ჩვენს კანდიდატურას და ვუერთდებით "პატრიოტთა ალიანსს“, - განაცხადა ძაგანიამ.

თავის მხრივ, „პატრიოტთა ალიანსის“ გენერალურმა მდივანმა ირმა ინაშვილმა აღნიშნა, რომ „მემარცხენე ალიანსის" ლიდერებს პოლიტიკაში დიდი გამოცდილება აქვთ და საარჩევნო ოლქებში ისინი მაჟორიტარ დეპუტატებად იქნებიან წარმოდგენილნი.

„ეს არის მებრძოლი ხალხი, პატიოსანი ხალხი, გამოცდილი პოლიტიკაში, რომლებსაც გავლილი აქვთ ურთულესი გზა და აქვთ ძალზე დიდი გამოცდილება და ჩვენ, რა თქმა უნდა, ვართ მოხარული, რომ გავძლიერდით, შემოგვიერთდა "მემარცხენე ალიანსი“, - განაცხადა ინაშვილმა.

2016 წლის საპარლამენტო არჩევნებზე საქართველოს პატრიოტთა ალიანსმა ხმების ზუსტად 5% მიიღო და გახდა მესამე საპარლამენტო პარტია - „ქართული ოცნებისა“ და „ერთიანი ნაციონალური მოძრაობის“ შემდეგ. 

საქართველოში საპარლამენტო არჩევნები 31 ოქტომბერს არის დანიშნული. ქვეყნის მოქალაქეები 150 დეპუტატს აირჩევენ: 120-ს პარტიული სიებით, ხოლო 30-ს ერთმანდატიან საარჩევნო ოლქებში კენჭისყრის შედეგებით. პარტიებისთვის გამსვლელი ბარიერი 1%-ს შეადგენს. ხმის მიცემის უფლება აქვს საქართველოს 3 501 931 მოქალაქეს როგორც ქვეყანაში, ისე მის საზღვრებს გარეთ.

 

 

88
თემები:
საქართველოს საპარლამენტო არჩევნები 2020
ტესტირება კორონავირუსზე

COVID-19 საქართველოში: რამდენი შემთხვევა გამოვლინდა ბოლო დღე-ღამეში

0
(განახლებულია 10:27 19.09.2020)
ამ დროისათვის სულ გამოჯანმრთელდა 1481 ადამიანი. გარდაიცვალა – 19, კარანტინის რეჟიმში იმყოფება 5014, ხოლო სტაციონარებში ექიმების დაკვირვების ქვეშ 836 პაციენტია.

თბილისი, 19 სექტემბერი — Sputnik. საქართველოში ახალი კორონავირუსით დაავადებულთა რაოდენობა ბოლო დღე-ღამეში 187-ით გაიზარდა და 3306-ს მიაღწია, გამოჯანმრთელებულთა რაოდენობას 46 ადამიანი შეემატა, აღნიშნულია საქართველოს მთავრობის სპეციალურ ვებ-გვერდზე stopcov.ge.

ამ დროისათვის სულ გამოჯანმრთელდა 1481 ადამიანი. გარდაიცვალა – 19, კარანტინის რეჟიმში იმყოფება 5014, ხოლო სტაციონარებში ექიმების დაკვირვების ქვეშ 836 პაციენტია.

ასევე კორონავირუსის დიაგნოზით უცხოეთიდან სამშობლოში გადმოყვანილია საქართველოს 41 მოქალაქე, მათ შორის 38 – სამხედრო მოსამსახურე.

საქართველოში კორონავირუსის პირველი შემთხვევა 26 თებერვალს დაფიქსირდა.

0
თემები:
COVID-19 საქართველოში