მამუკა ბახტაძე

ბახტაძე: „ეს არის იაფფასიანი სპეკულაცია"

80
(განახლებულია 16:43 26.07.2019)
პრემიერმა ოქრუაშვილის დაკავებაზე ოპოზიციის რეაქციასთან დაკავშირებით განაცხადა, რომ კანონის წინაშე ყველა თანასწორია.

თბილისი, 26 ივლისი — Sputnik. საქართველოს პრემიერ-მინისტრმა მამუკა ბახტაძემ თავდაცვის ყოფილი მინისტრის ირაკლი ოქრუაშვილის დაკავებაზე ოპოზიციონერების რეაქციას იაფფასიანი სპეკულაცია უწოდა, „რადგან გუშინ გამოქვეყნებული 20-21 ივნისის მოვლენების ამსახველი ვიდეო ყველაფერზე მეტყველებს“.

ოქრუაშვილის თანამოაზრეებმა მას პოლიტპატიმარი უწოდეს>>

ოქრუაშვილი 20-21 ივნისს პარლამენტის წინ განვითარებულ მოვლენებთან დაკავშირებით ჯგუფური ძალადობის ორგანიზების, ხელმძღვანელობის და მასში მონაწილეობის ფაქტზეა დაკავებული. არეულობისა და აქციის შემდგომი დაშლის შედეგად დაშავდა 240 ადამიანი. ბრალის დამტკიცების შემთხვევაში ოქრუაშვილს 6-დან 9 წლამდე პატიმრობა ემუქრება.

„სამწუხაროდ, ოპოზიციის უპასუხისმგებლო ნაწილი მუდმივად ცდილობს, რომ გააჩინოს კითხვის ნიშნები ყველაფრის გარშემო. არსებობს ისეთი საკითხები, რომლებიც საქართველოს თითოეული მოქალაქისთვის იყო ნათელი, ელემენტარულად, კადრებში ჩანს ეს ყველაფერი. აქედან გამომდინარე, ეს არის იაფფასიანი სპეკულაცია. მიმდინარეობს საგამოძიებო პროცესი, ამიტომ მე თავს შევიკავებ შინაარსობრივი შეფასებისგან", – განუცხადა ბახტაძემ ჟურნალისტებს.

ოქრუაშვილის დაკავებას მისმა თანამოაზრეებმა პარტიიდან „გამარჯვებული საქართველო", „ერთიანი ნაციონალური მოძრაობის" წევრებმა და მათმა პარტნიორებმა ოპოზიციონერის პოლიტიკური დევნა უწოდეს. მათი განცხადებით, ყოფილ მინისტრს კანონი არ დაურღვევია.

ირაკლი ოქრუაშვილი თავად ირაკლი ოქრუაშვილმა დაიჭირა?>>

„ფაქტი არის შემდეგი, რომ საქართველოში არსებობს სამართლიანი და ობიექტური მართლმსაჯულება და ნდობის ხარისხი არის ძალიან მაღალი ამ პროცესების მისამართით. საქართველოში, სამწუხაროდ, არიან უპასუხისმგებლო პოლიტიკოსები, რომლებიც ყველა პროცესისგან ცდილობენ დაიწერონ პოლიტიკური ქულები, მაგრამ ამავე დროს ჩვენ გვყავს ძლიერი საზოგადოება, რომელიც ობიექტურად აფასებს ყველაფერს", – განაცხადა ბახტაძემ.

მისი თქმით, „კანონის წინაშე ყველა ვართ თანაბარი. ეს არის პრინციპი, რომელსაც ეფუძნება დემოკრატიული საზოგადოება და ამ პრინციპიდან გადახვევა არ შეიძლება".

ბოლო დროს თავდაცვის ყოფილმა მინისტრმა (2004-2006), ოპოზიციური პარტია „გამარჯვებული საქართველოს" ლიდერმა ირაკლი ოქრუაშვილმა საზოგადოების ყურადღება მიიპყრო. პირველად ეს მოხდა 20-21 ივნისის საპროტესტო აქციაზე, მეორედ – როდესაც განაცხადა თავისი უფლებების შესახებ ტელეარხ „რუსთავი2"-ზე, რომელსაც ახლახან მფლობელები შეეცვალა.

რაც შეეხება არეულობებს, ჯგუფურ ძალადობრივ ქმედებებში მხოლოდ მონაწილეობისთვის ამ დროისთვის აქციის 15 მონაწილეა დაკავებული. აქედან ცხრა სასამართლო გარჩევის პერიოდში პატიმრობაშია, დანარჩენები გირაოთი არიან გათავისუფლებული.

80
თემები:
ცხელი პოლიტიკური ზაფხული: ახალი საპროტესტო ტალღა თბილისში (371)
ირაკლი სესიაშვილი

სესიაშვილი: საქართველომ სომხეთსა და აზერბაიჯანს იარაღის ტრანზიტზე უარი უთხრა

18
საქართველო კონფლიქტის მშვიდობიან მოგვარებას უჭერს მხარს და მხარეებს საომარი მოქმედებების შეწყვეტისკენ მოუწოდებს, განაცხადა საპარლამენტო კომიტეტის თავმჯდომარემ

ბილისი, 29 სექტემბერი – Sputnik. საქართველომ სომხეთსა და აზერბაიჯანს თავისი ტერიტორიის გავლით იარაღის ტრანზიტზე უარი განუცხადა და ისინი ამას გაგებით მოეკიდნენ, განაცხადა თავდაცვისა და უშიშროების კომიტეტის თავმჯდომარე ირაკლი სესიაშვილმა.

საქართველოს პარლამენტში სომხეთსა და აზერბაიჯანს ცეცხლის შეწყვეტისკენ მოუწოდეს>>

სომხეთისა და აზერბაიჯანის ხელისუფლებებმა, მთიან ყარაბაღში ვითარების გამწვავების შემდეგ, 27 სექტემბერს საომარი მდგომარეობა გამოაცხადეს. კონფლიქტის ესკალაციაში ერევანი და ბაქო ერთმანეთს ადანაშაულებენ. სომხეთის თავდაცვის სამინისტრომ განაცხადა, რომ ყარაბაღზე აზერბაიჯანმა „საჰაერო და სარაკეტო იერიში“ მიიტანა, ბაქოში კი ირწმუნებიან, რომ ცეცხლი სომეხმა სამხედროებმა გახსნეს. მესამე დღეა, რაც მთიან ყარაბაღში გააფთრებული ბრძოლები მიმდინარეობს. არის მსხვერპლი ორვე მხარეს.

„მინდა, ხაზი გავუსვა, რომ ორივე სახელმწიფო უფრთხილდება ჩვენს პოზიციებს. საუბარი იმაზე, რომ საქართველოს ტერიტორიები შეიძლება რომელიმე ქვეყანამ გამოიყენოს ტრანზიტისთვის და საკუთარი სამხედრო მიზნებისთვის, ჩვენ ამაზე მკაფიო უარი გვაქვს გაცხადებული ყველასთვის. ეს ჩვენმა მეზობლებმა იციან, ამ მიდგომას პატივისცემით ეპყრობიან და უფრთხილდებიან. ვაანალიზებთ სიტუაციას, პროცესს თვალ-ყურს ვადევნებთ და ყველანაირი სცენარისთვის მზად ვართ“, – განუცხადა სესიაშვილმა ჟურნალისტებს.

მან აღნიშნა, რომ საქართველო კონფლიქტის მშვიდობიან მოგვარებას უჭერს მხარს და მხარეებს ცეცხლის შეწყვეტისკენ მოუწოდებს.

საგარეო უწყება: საქართველო მზადაა ხელი შეუწყოს ყარაბაღში სიტუაციის დეესკალაციას>>

„საქართველოს ერთგვარი ნეიტრალური პოზიციები აქვს ამ კონფლიქტთან მიმართებით გასაგები მიზეზების გამო, რამდენადაც ჩვენ გამორჩეული კეთილმეზობლური ურთიერთობა გვაქვს როგორც აზერბაიჯანთან, ისე სომხეთთან“, – განაცხადა სესიაშვილმა.

მთიანი ყარაბაღის გამო სომხეთსა და აზერბაიჯანს შორის კონფლიქტი 1988 წლის თებერვალში დაიწყო, როდესაც მთიანი ყარაბაღის ავტონომიამ აზერბაიჯანის სსრ-დან გასვლის თაობაზე განაცხადა. 1992-1994 წლებში აზერბაიჯანმა დაკარგა კონტროლი მთიან ყარაბაღზე და მის მიმდებარე შვიდ რაიონზე.

კონფლიქტის მშვიდობიანად მოგვარებისთვის მოლაპარაკებები 1992 წლიდან მიმდინარეობს ეუთოს მინსკის ჯგუფის ფარგლებში, რომელსაც სამი თანათავმჯდომარე ჰყავს – რუსეთი, აშშ და საფრანგეთი. აზერბაიჯანი მოითხოვს ტერიტორიული მთლიანობის აღდგენას, სომხეთი კი არაღიარებული რესპუბლიკის ინტერესებს იცავს, რადგან თავად ყარაბაღი მოლაპარაკებების მხარე არ არის.

18
თემები:
მთიან ყარაბაღში ვითარება გამწვავდა – შეიარაღებული შეტაკება 2020
საპატრულო პოლიცია და მოქალაქეები

დაპირისპირება მარნეულში: „ნაცმოძრაობა" VS „ქართული ოცნება"

28
(განახლებულია 20:05 29.09.2020)
ცესკოს მტკიცებით, ის ბრალდებები, თითქოსდა საოლქო საარჩევნო კომისიამ არ შეატყობინა „ნაციონალური მოძრაობის“ მიერ დანიშნულ საუბნო საარჩევნო კომისიების წევრებს პირველი სხდომების გამართვის შესახებ, არის უსაფუძვლო

თბილისი, 29 სექტემბერი - Sputnik. მარნეულის საოლქო საარჩევნო კომისიასთან „ერთიანი ნაციონალური მოძრაობისა“ და „ქართული ოცნება - დემოკრატიული“ მხარდამჭერები ერთმანეთს სიტყვიერად და ფიზიკურად დაუპირისპირდნენ, იუწყება პირველი არხი.

გავრცელებული ინფორმაციით, სიტყვიერი შელაპარაკება მოხდა „ნაციონალური მოძრაობის“ მაჟორიტარი დეპუტატობის კანდიდატს, მოქმედ დეპუტატ აზერ სულეიმანოვსა და „ქართული ოცნების“ შტაბის უფროს ამირან გიორგაძეს შორის. ინციდენტი სამართალდამცველების ჩარევის შემდეგ მალევე განიმუხტა.

მანამდე საოლქო კომისიასთან მომხდარი კიდევ ერთი ინციდენტი ფიზიკურ დაპირისპირებაშიც გადაიზარდა. მარნეულის საოლქო კომისიის თავმჯდომარის, ანა ილურიძის განცხადებით, ადამიანთა ჯგუფი კომისიის შენობაში შეჭრას ცდილობდა და მათ მუშაობას ხელს უშლიდა, შემდეგ კი კომიასიაში დასაქმებულ პირს  ფიზიკური შეურაცხყოფა მიაყენეს.

მარნეულში ოპოზიციური პარტიის აქტივისტს ტირის თოფიდან ესროლეს>>

„ნაციონალური მოძრაობის“ წევრების მტკიცებით, საოლქო კომისიამ გუშინ პირველი სხდომები ჩაატარა და უბნების ხელმძღვანელი პირები მათგან ჩუმად აირჩია, ამიტომ, დღეს პროტესტი გამოხატეს.

აღნიშნულთან დაკავშირებით დღეს განცხადება გაავრცელა ცენტრალურმა საარჩევნო კომისიამ (ცესკო), სადაც ნათქვამია,რომ ცესკო გმობს ძალადობისა და საოლქო საარჩევნო კომისიაზე ზეწოლის მცდელობის ფაქტებს. 

ცესკოს მტკიცებით, ის ბრალდებები, თითქოსდა საოლქო საარჩევნო კომისიამ არ შეატყობინა „ნაციონალური მოძრაობის“ მიერ დანიშნულ საუბნო საარჩევნო კომისიების წევრებს პირველი სხდომების გამართვის შესახებ, არის უსაფუძვლო და სიცრუის ტირაჟირება, რადგანაც ყველა წევრთან ხორციელდებოდა მათ მიერ მითითებულ საკონტაქტო საშუალებებზე (ტელეფონის ნომრებზე) დაკავშირება.

მარნეულის საოლქო საარჩევნო კომისიის შენობას ამჟამად პოლიცია იცავს.

მომხდარ ფაქტთან დაკავშირებით გამოძიება საქართველოს სსკ-ის  126-ე, ძალადობის მუხლით დაიწყო.

28
თემები:
საქართველოს საპარლამენტო არჩევნები 2020