ბიძინა ივანიშვილი

რატომ აპირებს შემოდგომიდან ბიძინა ივანიშვილი გააქტიურებას

417
(განახლებულია 17:37 23.07.2019)
რამდენად შეძლებს „ქართული ოცნება“ პროპორციული სისტემის შემოღებას?..

ბიძინა ივანიშვილი ბათუმიდან საზოგადოებას დაჰპირდა, შემოდგომიდან „ქართული ოცნება“ სერიოზულად გააქტიურდება და რეგიონებში ხალხს მოუსმენსო. მოსასმენი კი მართლაც ბევრია. რეალურად, ერთი წლით ადრე საარჩევნო კამპანიას ყველა პოლიტიკური ძალა იწყებს, ვისაც რაიმე შედეგის ჩვენება სურს 2020 წლისათვის.

პოლიტიკური პარტიებისთვის კი სიტუაცია ნაწილობრივ უიმედოა და ნაწილობრივ – იმედისმომცემი. გვჯერა თუ არა, ყველა სოციოლოგიური კვლევა გარკვეულწილად ასახავს რეალობას და გვაჩვენებს, რომ საქართველოში ყველა პოლიტიკური ძალის მიმართ მოსახლეობის დიდი ნაწილი ფრუსტრირებულია და უიმედოდ არის განწყობილი. ამაზე მეტყველებს მმართველი პარტიის 26 პროცენტი და „ნაციონალური მოძრაობის“ 22 პროცენტი. თუმცა თუ მესამე პოლიტიკური ძალის – „ევროპელი დემოკრატების“ 7 პროცენტსაც დავამატებთ, გამოდის, რომ სააკაშვილის დანატოვარი პარტიები დღეს მოსახლეობაში მეტი მხარდაჭერით სარგებლობენ, ვიდრე მმართველი პოლიტიკური ძალა, რაც მისი ლიდერისთვის, ბუნებრივია, დამაფიქრებელია. ფაქტია, რომ თუ დღეისათვის არსებული 3-პროცენტიანი ბარიერი და მაჟორიტარული სისტემა შენარჩუნდა, „ქართული ოცნება“ ისევ შეძლებს უმრავლესობის მოპოვებას. ყველა სხვა შემთხვევაში მას კოალიციის შეკვრა მოუწევს რომელიმე ოპოზიციურ ძალასთან.

ამ ფონზე სრულიადაც არაა უცნაური ბიძინა ივანიშვილის განცხადება იმის შესახებ, რომ ის მიესალმება ბიზნესმენ მამუკა ხაზარაძის შემოსვლას პოლიტიკაში. თუ ამ გაერთიანებაში ასე მრავლად იქნებიან წარმოდგენილი „ქართული ოცნების“ ყოფილი მაღალჩინოსნები – გიორგი კვირიკაშვილი, დიმიტრი ქუმსიშვილი და გიორგი ალავიძე, ბუნებრივია, ის „ქართული ოცნებისთვის“ უფრო სანდო და სტაბილური პარტნიორი შეიძლება გახდეს, ვიდრე „ნაციონალური მოძრაობა“ და მისი სატელიტები არიან.

ექსპერტი რამაზ საყვარელიძე თვლის, რომ დღეს ყველაზე მეტად პროპორციული საარჩევნო სისტემის შემოღება და პოლიტიკური ველის დაწმენდა სწორედ მმართველ პოლიტიკურ ძალას აძლევს ხელს.

მეორე საკითხია ის, რომ სექტემბრიდან, გარდა რეგიონებში გასვლისა და ხალხთან შეხვედრისა, „ქართულ ოცნებაში“ შიდა საკადრო წმენდაა დაგეგმილი. ჟურნალისტ ელისო კილაძის თქმით, მან იცის „ოცნების“ პირველი ათი არაპოპულარული სახე, ვისგანაც ბიძინა ივანიშვილი აპირებს პარტიის გაწმენდას.

სწორედ ელისო კილაძე წერს, რომ შემოდგომიდან დაგეგმილია დიდი პარტიული და სამთავრობო საკადრო ცვლილებები. თუმცა უფრო დეტალურად დღეს ამაზე საუბარი, ბუნებრივია, ნაადრევი იქნებოდა.

სექტემბრიდან განახლდება ასევე დისკუსიები პროპორციული საარჩევნო სისტემის შემოღებაზე. მართალია, პარლამენტში შესაბამისი ინიციატივა უკვე დარეგისტრირებულია, მაგრამ მის მიღებას საკონსტიტუციო ცვლილებები და 113 ხმა სჭირდება. „ევროპელმა დემოკრატებმა“ უკვე განაცხადეს, რომ ისინი საკონსტიტუციო ცვლილებებს ხმას მისცემენ, მაგრამ საკითხავია, რას იზამენ მაჟორიტარები, რომლებიც ამ ცვლილებებს დიდად არ მიესალმებიან, აგრეთვე „პატრიოტები“, რომელთაც ასევე წაართმევენ ხმებს უფრო პატარა პარტიები და „ნაციონალური მოძრაობა“, რომელსაც რეალურად ყველაზე მეტად აზარალებს ნულოვანი ბარიერი.

მართალია, „შენების მოძრაობის“ ლიდერი დავით უსუფაშვილი ამბობს, რომ არჩევნებამდე ერთ წელზე უფრო მეტ დროში პროგნოზების კეთება უმადური საქმეა, მაგრამ შემოდგომაზე მომავალი პარლამენტის კონტურები ძალიან ნათლად უნდა გამოჩნდეს. ასევე შემოდგომის მიწურულს გაირკვევა, რეალურია თუ არა, რომ 2020 წელს საქართველომ არჩევნები სრულად პროპორციული სისტემით ჩაატაროს.

417
შსს–ს შენობა

შსს–ს საგანგებო განცხადება საპარლამენტო არჩევნებთან დაკავშირებით

15
(განახლებულია 14:10 30.10.2020)
შსს-მ არჩევნების მშვიდ და თავისუფალ გარემოში ჩატარების უზრუნველსაყოფად  პოლიციის მობილური ჯგუფები შექმნა, რომლებიც სამართალდარღვევებზე მყისიერ რეაგირებას მოახდენენ

თბილისი, 30 ოქტომბერი – Sputnik. საპარლამენტო არჩევნებთან დაკავშირებით, რომელიც ხვალ, 31 ოქტომბერს გაიმართება, შინაგან საქმეთა სამინისტრო სპეციალურ განცხადებას ავრცელებს.

უწყების ინფორმაციით, არჩევნების თავისუფალ და მშვიდ გარემოში ჩატარების მიზნით, საზოგადოებრივი უსაფრთხოებისა და წესრიგის დასაცავად, რეგიონებში, მთელი ქვეყნის მასშტაბით, შეიქმნა პოლიციის მობილური ჯგუფები, რომლებიც სამართალდარღვევებზე მყისიერ რეაგირებას მოახდენენ და დაიცავენ წესრიგს.

სამინისტროს ინფორმაციით, პოლიციის უფლებამოსილებასთან დაკავშირებულ საკითხებზე ინფორმაციის მიღებისა და მიწოდებისთვის სხვადასხვა ორგანიზაციისთვის საკონტაქტოდ განსაზღვრულია შსს–ს შესაბამისი დეპარტამენტი. კერძოდ:

  • „საერთაშორისო სადამკვირვებლო მისიებისთვის – შინაგან საქმეთა სამინისტროს საერთაშორისო ურთიერთობების დეპარტამენტი.
  • სახალხო დამცველის აპარატის წარმომადგენლებისთვის – შინაგან საქმეთა სამინისტროს ადამიანის უფლებათა დაცვისა და გამოძიების ხარისხის მონიტორინგის დეპარტამენტი.
  • ადგილობრივი სადამკვირვებლო მისიების და არასამთავრობო ორგანიზაციების წარმომადგენლებისთვის – შინაგან საქმეთა სამინისტროს იურიდიული და ადამიანის უფლებათა დაცვისა და გამოძიების ხარისხის მონიტორინგის დეპარტამენტი.
„საკონტაქტო პირების შესახებ ინფორმაცია უკვე მიეწოდათ შესაბამის საერთაშორისო ორგანიზაციებს, სახალხო დამცველის აპარატს, საერთაშორისო და ადგილობრივ სადამკვირვებლო მისიებსა და არასამთავრობო ორგანიზაციებს“, – ნათქვამია შსს-ს განცხადებაში.

არჩევნების დღეს შსს საზოგადოებას პერიოდულად მიაწვდის ინფორმაციას არჩევნების მიმდინარეობისას გამოვლენილი მართლწესრიგის შესაძლო დარღვევის და შესაბამისი რეაგირების შესახებ.

საპარლამენტო არჩევნები შაბათს, 31 ოქტომბერს გაიმართება და მასში მონაწილეობას მიიღებს 48 პარტია და ორი ბლოკი.

15
თემები:
საქართველოს საპარლამენტო არჩევნები 2020
ცესკო

არჩევნების დღეს ცესკოში ბრიფინგები ყოველ სამ საათში გაიმართება

6
(განახლებულია 13:32 30.10.2020)
ყველა დაინტერესებულ პირს საარჩევნო პროცესთან დაკავშირებით ინფორმაციის მიღება შეეძლება როგორც ტელეფონით, ისე ინტერნეტის საშუალებით.

თბილისი, 30 ოქტომბერი –Sputnik.  საქართველოს ცენტრალური საარჩევნო კომისია ამომრჩევლების და ყველა დაინტერესებული მხარის დროულად ინფორმირების მიზნით,  31 ოქტომბრის  08:30 საათიდან რამდენიმე საათში ერთხელ საინფორმაციო ბრიფინგებს გამართავს. 

როგორც უწყების განცხადებაში ნათქვამი, 31 ოქტომბრის 07:00 საათიდან 24 საათიან რეჟიმში იმუშავებს როგორც კომისიის სატელეფონო/საინფორმაციო ცენტრი (2 51 00 51), ისე ონლაინ–ჩატი. შესაბამისად ყველა დაინტერესებულ პირს შეეძლება პასუხის მიღება არჩევნებთან დაკავშირებული სხვადასხვა საკითხის შესახებ.

საინფორმაციო ბრიფინგები გაიმართება 08:30, 10:30, 12:30, 15:30, 17:30 და 20:30 საათზე. ასევე აღნიშნულია, რომ აუცილებლობის შემთხვევაში, განრიგი დაკორექტირდება.

31 ოქტომბრის არჩევნებისთვის მთელი ქვეყნის მასშტაბით 3 852 სააღჩევნო უბანი გაიხსნება. რაც შეეხება საკარანტინე სივრცესა და სამედიცინო დაწესებულებებში მყოფ ამომრჩეველს, მათთვის ცალკე შექმნილია 127 სპეციალური საარჩევნო უბანი. ასეთ საარჩევნო უბნებზე კენჭისყრას და შედეგების დათვლას ცალკე სპეციალური ჯგუფი განახორციელებს.

6
თემები:
საქართველოს საპარლამენტო არჩევნები 2020
არჩევნები საქართველოში

ინსტრუქცია: როგორ მივიღოთ კენჭისყრაში მონაწილეობა და ჯანმრთელობას არ ვავნოთ

0
(განახლებულია 14:58 30.10.2020)
საქართველოში საპარლამენტო არჩევნები კორონავირუსის პანდემიის პირობებში ჩატარდება და ამიტომ ეპიდემიოლოგების მიერ შემუშავებული უსაფრთხოების ყველა წესის დაცვა აუცილებელია

Sputnik–საქართველო გთავაზობთ სრულ ინსტრუქციას, თუ როგორ უნდა მიიღოთ კენჭისყრაში მონაწილეობა ისე, რომ ჯანმრთელობა არ დაიზიანოთ.

საარჩევნო უბანზე ამომრჩეველი მხოლოდ პირბადით მოხვდება. გამონაკლისია ის ადამიანები, რომლებსაც ექნებათ ექიმის ცნობა იმის თაობაზე, რომ პირბადის ტარება არ შეუძლიათ.

შემდეგ ამომრჩეველი გადის შემდეგ პროცედურებს:

  • გადის მარკირების შემოწმებას
  • პირადობის მოწმობის წარდგენის დროს იხსნის პირბადეს და უბნის კართან მდგომ კომისიის წევრს აჩვენებს თავის სახეს
  • იკეთებს პირბადეს
  • იტარებს ხელების დეზინფექციას
  • რეგისტრატორს აწვდის პასპორტს ან პირადობის მოწმობას და პირბადის ჩამოწევით აჩვენებს სახეს
  • იკეთებს პირბადეს და გადის მარკირების პროცედურას
  • იღებს კალამს და ხელს აწერს სარეგისტრაციო ჟურნალში
  • იღებს ბიულეტენს
  • ხმას აძლევს კაბინაში
  • ბიულეტენს დებს კონვერტში და აგდებს ყუთში
  • ათავსებს კალამს სპეციალურ კონტეინერში
  • იტარებს ხელების დეზინფექციას
  • ტოვებს საარჩევნო უბანს

უსაფრთხოების ზომები უბანზე

  • ყველა შენობაში, სადაც არჩევნები გაიმართება, ერთი დღით ადრე დეზინფექცია ჩატარდება
  • შესასვლელში განთავსდება დეზობარიერი
  • კომისიის ყველა წევრი, პარტიების წარმომადგენლები, დამკვირვებლები და მასმედიის წარმომადგენლები, სანამ შენობაში მოხვდებიან, გაივლიან თერმოსკრინინგს
  • ხელმეორე შემოწმებისას 37 და ზემოთ ტემპერატურის შემთხვევაში ადამიანს შენობაში არ დაუშვებენ
  • კომისიის წევრები იქნებიან პირბადეებში, დამცავ ფარებსა და ერთჯერად ხელთათმანებში.
0
თემები:
საქართველოს საპარლამენტო არჩევნები 2020