ჟენევა

საქართველო ჟენევაში რუსეთთან რთულ მოლაპარაკებებს ელოდება

124
საქართველო და რუსეთი 2-3 ივლისს ჟენევის მოლაპარაკებაზე ორ ქვეყანას შორის დაგროვილ პრობლემებს განიხილავენ

თბილისი, 2 ივლისი - Sputnik. ჟენევის საერთაშორისო მოლაპარაკებაზე განხილვის ერთ-ერთი თემა იქნება საქართველოში ბოლო დროს განვითარებული მოვლენები, რომლებმაც რუსეთთან ურთიერთობა კიდევ უფრო გაართულა.

კარასინი: რუსეთი მზად იყო, საქართველოსთვის ვიზები გაეუქმებინა >>

რუსეთის პრეზიდენტმა ვლადიმერ პუტინმა საქართველოსთან პირდაპირი ავიარეისები 8 ივლისიდან აკრძალა, ტურისტულ ოპერატორებს კი ურჩია, არ მიეყიდათ ტურისტებისთვის საქართველოს საგზურები. ეს გადაწყვეტილება მოჰყვა საქართველოში სახელმწიფო დუმის დეპუტატ სერგეი გავრილოვის ვიზიტით გამოწვეულ აჟიოტაჟს და ანტირუსულ საპროტესტო ტალღას.

„ჟენევაში რუსულ-ქართული ურთიერთობების ყველა მწვავე საკითხი განიხილება. საერთო ფონის გამო, რომელიც არის შექმნილი, კიდევ უფრო გართულებულია მოლაპარაკებები და ამ საკითხებზეც იქნება მსჯელობა“, – განუცხადა პირველ არხს საქართველოს საგარეო საქმეთა მინისტრის მოადგილე ლაშა დარსალიამ ჟენევის მოლაპარაკებების 48-ე რაუნდის დაწყებამდე.

სამშაბათს ჩატარდება მოლაპარაკების მონაწილეთა და თანათავმჯდომარეთა ტექნიკური შეხვედრა, ოთხშაბათს კი - მოლაპარაკების 48-ე რაუნდის ძირითადი ნაწილი. მოლაპარაკებაში მონაწილეობენ საქართველო, რუსეთი, აშშ, აფხაზეთისა და ცხინვალის რეგიონის დე ფაქტო ხელისუფლების წარმომადგენლები. თანათავმჯდომარეები არიან ევროკავშირის, გაეროსა და ეუთოს წარმომადგენლები.

„მოგეხსენებათ, მოლაპარაკებების მთავარი თემა არის ექვსპუნქტიანი შეთანხმების შესრულების საკითხი (2008 წლის 12 აგვისტოს ცეცხლის შეწყვეტის შესახებ შეთანხმება - რედ.), ასევე ის ჰუმანიტარული ვითარება, რომელიც გვაქვს ადგილზე. შესაბამისად, ეს იქნება ძირითადი საკითხები, რასაც საქართველოს დელეგაცია დააყენებს“, – აღნიშნა ლაშა დარსალიამ.

ჟენევის საერთაშორისო მოლაპარაკებები საქართველოსა და რუსეთს შორის პოლიტიკური დიალოგის ერთადერთი ფორმატია, რომელიც ცეცხლის შეწყვეტის შესახებ შეთანხმების საფუძველზე მიმდინარეობს.

სააპელაციო სასამართლომ ნიკა მელიასთვის გირაოს შეფარდების გადაწყვეტილება ძალაში დატოვა >>

დიპლომატიური ურთიერთობები საქართველოსა და რუსეთს შორის თბილისის გადაწყვეტილებით 2008 წლის აგვისტოს ომის შემდეგ მოსკოვის მიერ აფხაზეთისა და ცხინვალის რეგიონის დამოუკიდებლობის აღიარების საპასუხოდ შეწყდა. რუსეთსა და საქართველოს შორის კონტაქტები ხორციელდება მხოლოდ ჟენევის დისკუსიებისა და ზურაბ აბაშიძისა და გრიგორი კარასინის პრაღაში რეგულარული შეხვედრების ფარგლებში.

როგორც კარასინმა განაცხადა, რუსეთი იბრძოლებს საქართველოსთან აქტიური ურთიერთობებისთვის და ხაზი გაუსვა, რომ რუსული მხარე ქართული მხარისგან ქვეყანაში ვითარების ნორმალიზებასა და რუსოფობიური კამპანიის შეწყვეტას ელოდება.

საპროტესტო ტალღა აგორდა რუსეთის სათათბიროს დეპუტატ სერგეი გავრილოვის ვიზიტის და მართლმადიდებლობის საპარლამენტთაშორისო ასამბლეის ფარგლებში სპიკერის სავარძლიდან მისი გამოსვლის საპასუხოდ. ოპოზიციამ ხელისუფლებას სამშობლოს ღალატში დასდო ბრალი.

პროტესტის ფონზე გადადგა პარლამენტის თავმჯდომარე ირაკლი კობახიძე, რომელმაც თავის თავზე აიღო პასუხისმგებლობა „პროტოკოლის შეცდომაზე“ - ამით ახსნა ხელსუფლებამ პარლამენტის თავმჯდომარის სავარძელში გავრილოვის გამოჩენა, რომელსაც ადრე აფხაზეთისა და ცხინვალის რეგიონის დამოუკიდებლობის მხარდამჭერი განცხადებები აქვს გაკეთებული.

მომიტინგეების სხვა მოთხოვნებიც შესრულდა - გაათავისუფლეს არეულობის დროს დაკავებული პრაქტიკულად ყველა პირი, პოლიციის მიერ ძალის გადამეტების ფაქტებზე გამოძიება დაიწყო და მიღებულია 2020 წლის საპარლამენტო არჩევნების პროპორციული სისტემით ჩატარების გადაწყვეტილება.

დღეისათვის მომიტინგეები, რომლებიც პარლამენტის წინ ყოველდღე 19:00 საათზე იკრიბებიან, მოითხოვენ შს მინისტრ გიორგი გახარიას გადადგომას, როგორც 21 ივნისის ღამეს აქციის დაშლის დროს პოლიციის ქმედებისთვის პასუხისმგებელი პირის.

124
თემები:
ქართულ–რუსული ურთიერთობები (169)
ბელარუსის საელჩო საქართველოში

პირველად ისტორიაში: ბელარუსელები პრეზიდენტს საქართველოში ირჩევენ

113
(განახლებულია 14:37 09.08.2020)
საქართველოში მყოფ ბელარუსის მოქალაქეებს პირველად აქვს შესაძლებლობა, აქედან მიიღონ მონაწილეობა თავისი ქვეყნის საპრეზიდენტო არჩევნებში

 

თბილისი, 9 აგვისტო — Sputnik. ბელარუსის მოქალაქეებს პირველად ეძლევათ შესაძლებლობა, საქართველოს ტერიტორიაზე მიიღონ მონაწილეობა საპრეზიდენტო არჩევნებში, განუცხადეს „Sputnik საქართველოს“ ჩვენს ქვეყანაში ბელარუსის საელჩოს წარმომადგენელმა. 

საარჩევნო უბანი განთავსებულია საელჩოს შენობაში მისამართზე: კრწანისის ქუჩა №18. ხმის მიცემა დილის რვა საათზე დაიწყო და საღამოს 20:00 საათამდე გასტანს.

„ჩვენი საელჩო საქართველოში 2016 წლიდან ფუნქციონირებს. ასე რომ არჩევნებს აქ პირველად ვატარებთ“, — განმარტეს საელჩოში.

ბელარუსის საგანგებო და სრულუფლებიანი ელჩის მრჩეველმა კირილ გრიგორიევმა აღნიშნა, რომ ამომრჩეველთა სიები კიდევ ერთხელ დაზუსტდა, ვინაიდან საქართველოში მყოფმა ბელარუსის მოქალაქეებმა თავად მიმართეს საელჩოს თხოვნით, შეეყვანათ სიაში, რათა ხმის მიცემის შესაძლებლობა ჰქონოდათ.

საარჩევნო ბიულეტენში პრეზიდენტობის ხუთი კანდიდატია შეყვანილი: ალექსანდრ ლუკაშენკო (მოქმედი პრეზიდენტი), სვეტლანა ტიხანოვსკაია, ანდრეი დმიტრიევი, სერგეი ჩერეჩნი და ანა კანოპაცკაია. გარდა ამისა, ბიულეტენში არის გრაფა „ყველას წინააღმდეგ“.

როგორც ცნობილია, ბელარუსის პრეზიდენტი 5 წლის ვადით ირჩევა. შესაბამისად, მომდევნო არჩევნები უკვე 2025 წელს უნდა გაიმართოს.

113
თემები:
მსოფლიო დღეს
არჩევნები ბელარუსში

ბელარუსში საპრეზიდენტო არჩევნები ტარდება

228
საქართველოში ბელარუსის მოქალაქეები საკუთარი პოზიციის დაფიქსირებას ქვეყნის საელჩოს შენობაში შეძლებენ.

თბილისი, 9 აგვისტო — Sputnik. ბელარუსში საპარლამენტო არჩევნები ტარდება, იუწყება „Sputnik ბელარუსი“.

9 აგვისტოს ძირითადი კენჭისყრა მიმდინარეობს. ამასთან, 4 აგვისტოდან მოქალაქეებს შეეძლოთ ხმა ვადაზე ადრე მიეცათ. ცესკოს ბოლო მონაცემებით (07.08.2020), ამომრჩევლის აქტივობამ 32,24% შეადგინა.

9 აგვისტოს საარჩევნო უბნები 08:00 საათიდან გაიხსნა და 20:00 საათზე დაიხურება, რის შემდეგაც ხმების დათვლის პროცესი დაიწყება. 

საარჩევნო კამპანიის პერიოდში 5767 საარჩევნო უბანი შეიქმნა, მათგან 44 უცხოეთში, რომლებიც 36 ქვეყანაში ბელარუსის საელჩოებსა და გენერალურ საკონსულოებში მუშაობენ.

არჩევნების სავარაუდო შედეგები 10 აგვისტოს დილით გახდება ცნობილი.

არჩევნებში ხუთი კანდიდატი მონაწილეობს: ალექსანდრ ლუკაშენკო – მოქმედი პრეზიდენტი, კენჭს იყრის მეექვსედ, ასევე ანა კანოპაცკაია, ანდრეი დმიტრიევი, სერგეი ჩერეჩენი, სვეტლანა ტიხანოვსკაია.

საქართველოში ბელარუსის მოქალაქეები საკუთარი პოზიციის დაფიქსირებას ქვეყნის საელჩოს შენობაში შეძლებენ.

228
შალვა ახალციხელის ტაძარი ახალციხეში

ახალციხეში ახლად აშენებულ საკათედრო ტაძარში პირველი ღვთისმსახურება აღევლინა

0
საზეიმო ღვთისმსახურებას ესწრებოდნენ საქართველოს პრემიერ–მინისტრი გიორგი გახარია, პარლამენტის თავმჯდომარე არჩილ თალაკვაძე და მთავრობის წევრები

თბილისი, 9 აგვისტო - Sputnik. ახალციხის ახლად აშენებულ შალვა ახალციხელის საკათედრო ტაძარში საზეიმო ლიტურგია აღევლინა.

შალვა ახალციხელი ქართული ჯარის მფარველია. შალვა და ივანე ახალციხელები გმირი ძმები არიან, რომლებმაც მე–13 საუკუნის დასაწყისში ჯალალედინის მრავალრიცხოვანი ჯარის წინააღმდეგ ბრძოლებში გაითქვეს სახელი. ივანე ახალციხელი გარნისის კლდეებში ბრძოლისას გარდაიცვალა, ხოლო შალვა ტყვედ ჩაიგდეს. მას მუსლიმობის სანაცვლოდ თავისუფლება შესთავაზეს, თუმცა შალვა ახალციხელმა თავის რწმენას არ უღალატა და ის საშინლად აწამეს და მოკლეს.

საზეიმო ღვთისმსახურებას ესწრებოდნენ საქართველოს პრემიერ–მინისტრი გიორგი გახარია, პარლამენტის თავმჯდომარე არჩილ თალაკვაძე და მთავრობის წევრები. ღვთისმსახურება ახალციხისა და ტაო–კლარჯეთის მიტროპოლიტმა თეოდორემ მღვდელმთავრებთან ერთად აღავლინა.

მეუფემ დალოცა ყველა მოქალაქე, ვინც ტაძრის შეჩერებული მშენებლობის დასრულებაში წვლილი შეიტანა.

გახარიამ აღნიშნა, რომ შალვა ახალციხელის ტაძრის გახსნა დიდი ზეიმია არა მხოლოდ ახალციხისა და სამცხე–ჯავახეთის რეგიონისთვის, არამედ მთელი საქართველოსთვის.

„ჩემთვის და ხელისუფლების თითოეული წარმომადგენლისთვის, ვინც დღეს აქ ვართ, უდიდესი პატივია იყოს აქ, თქვენთან და ჩვენს სამღვდელოებასთან ერთად. ახალციხეში შალვა ახალციხელის საკათედრო ტაძრის ამოქმედება, რა თქმა უნდა, არის დიდი ზეიმი არა მარტო ახალციხელებისთვის, არამედ დიდი ზეიმია მთლიანად საქართველოსთვის. განსაკუთრებით მაშინ, როდესაც გვახსენდება, რომ ეს ის წმინდანია, რომელიც მფარველობს ჩვენს ჯარს“, – განაცხადა პრემიერმა.

მთავრობის მეთაურმა მშვიდობა და წინსვლა უსურვა ახალციხელებს და ისურვა, რომ საქართველოში მეტი ამგვარი ტაძარი აშენდეს.

შალვა ახალციხელის საკათედრო ტაძრის მშენებლობა 2009 წელს დაიწყო.

0