რკინიგზა

პროექტი ბაქო-თბილისი-ყარსი საქართველოს გარეშე ჩავარდება

217
(განახლებულია 09:17 13.05.2019)
საქართველო თურქეთში რუსეთის ტვირთების ტრანზიტის წინააღმდეგ არ უნდა წავიდეს, მიიჩნევს ექსპერტი

თბილისი, 13 მაისი — Sputnik. პროექტ ბაქო-თბილისი-ყარსის ფარგლებში ტვირთების გადაზიდვების განვითარების შესახებ მემორანდუმი, რომელსაც ხელი რუსეთის, თურქეთისა და აზერბაიჯანის სარკინიგზო კომპანიების ხელმძღვანელებმა მოაწერეს, აღნიშნულმა კომპანიებმა საქართველოსთან უნდა შეათანხმონ, განაცხადა „Sputnik საქართველოსთან" საქართველოს საგარეო საქმეთა ყოფილმა მინისტრმა ირაკლი მენაღარიშვილმა.

გასულ კვირას ანკარაში რუსეთის, თურქეთისა და აზერბაიჯანის სარკინიგზო კომპანიების ხელმძღვანელების შეხვედრა გაიმართა. მხარეებმა ხელი მოაწერეს მემორანდუმს ბაქო-თბილისი-ყარსის პროექტის ფარგლებში სარკინიგზო გადაზიდვების განვითარების შესახებ. დოკუმენტი ითვალისწინებს თანამშრომლობას აღნიშნული მარშრუტით რეგულარული სარკინიგზო გადაზიდვების უზრუნველსაყოფად, ასევე, ეკონომიკურად დასაბუთებული ტარიფების დაწესებას და ახალი სატვირთო ბაზის მოზიდვას.

რა ინტერესი აქვს რუსეთს ბაქო-თბილისი-ყარსის სარკინიგზო ხაზთან დაკავშირებით>>>

„თუ მათ გადაწყვიტეს საქართველოს პოზიციის იგნორირებით რაიმე გააკეთონ, ეს აბსურდია, ამის შედეგი შეიძლება გახდეს მხოლოდ ერთი - პროექტი უბრალოდ არ იმუშავებს", - აღნიშნა მენაღარიშვილმა.

საგარეო საქმეთა ექს-მინისტრს მიაჩნია, რომ პროექტის ირგვლივ ყველა გეგმას აზერბაიჯანი და თურქეთი საქართველოსთან ერთად განიხილავს.

„დერეფანი, რომლის თაობაზეც საუბარი მიდიოდა, საქართველოს ტერიტორიაზე გადის და ეს ტვირთები აზერბაიჯანიდან თურქეთში მხოლოდ საქართველოს გავლით შეიძლება მოხდეს, ამის გათვალისწინებით დეტალები პროექტის ყველა მონაწილესთან უნდა შეთანხმდეს", - აღნიშნა მენაღარიშვილმა.

ამასთან, ის მიიჩნევს, რომ საქართველოს არ აქვს საფუძველი რუსული ტვირთების საქართველოს გავლით თურქეთში ტრანზიტის წინააღმდეგ წავიდეს.

„იმ შემთხვევაში, თუ გადაზიდვების ყველა პირობა იქნება დაცული, ჩვენ თურქეთში რუსული ტვირთების ტრანზიტის წინააღმდეგ არ უნდა წავიდეთ... საქართველოს ინტერესებშია, რომ მისი რკინიგზა მაქსიმალურად იყოს დატვირთული", - აღნიშნა მენაღარიშვილმა.

პროექტი ბაქო-თბილისი-ყარსი საქართველოსთვის სტრატეგიული მნიშვნელობისაა. პროექტის რეალიზაცია 2008 წელს დაიწყო. სარკინიგზო ხაზი აზერბაიჯანი-საქართველო-თურქეთის სახელმწიფოთაშორისი შეთანხმების საფუძველზე აშენდა.

სატვირთო მოძრაობის გახსნის ცერემონია 2017 წლის 30 ოქტომბერს გაიმართა.

სავარაუდო გამტარუნარიანობა - წელიწადში მილიონი მგზავრი და 6,5 მილიონი ტონა ტვირთია. მომავალში ამ სატრანსპორტო დერეფნის გამტარუნარიანობა შეიძლება გაიზარდოს სამ მილიონ მგზავრამდე და 20 მილიონ ტონა ტვირთამდე წელიწადში.

217
ზურაბ ჯაფარიძე

„მეხის გავარდნა მოწმენდილ ცაზე“ რა ხდება „გირჩში“

85
(განახლებულია 20:13 04.12.2020)
პარტიის წევრები, რომელთა შესახებაც ზურაბ ჯაფარიძემ დაწერა, სრულ გაუგებრობაში არიან და ვითარებაში გარკვევას ცდილობენ.

თბილისი, 4 დეკემბერი – Sputnik. ოპოზიციური პარტია „გირჩის“ წევრი იაგო ხვიჩია თანაპარტიელ ზურაბ ჯაფარიძესთან უთანხმოებას გამორიცხავს და მის მიერ გამოქვეყნებულ სტატუსს „მოწმენდილ ცაზე მეხის გავარდნას“ უწოდებს.

ყველაზე არაორდინარული პარტია „გირჩის“ ერთ-ერთმა დამაარსებელმა ზურაბ ჯაფარიძემ გუშინ პარტიის დახურულ ჯგუფში გამოაქვეყნა სტატუსი, რომელშიც პარტიაში განხეთქილებაზე განაცხადა. მან აღნიშნა, რომ უთანხმოება აქვს პარტიის წევრებთან სანდრო რაქვიაშვილთან, ვახტანგ მეგრელიშვილთან და იაგო ხვიჩიასთან, თუმცა კონკრეტული მიზეზების შესახებ ჯაფარიძეს საჯაროდ არაფერი უთქვამს.

„მეც ძალიან მინდა თქვენთან ერთად გავარკვიო. ნამდვილად არ ვიცი, მე, ვახო მეგრელიშვილისგან განსხვავებით, მასთან კონფლიქტი არ მქონია. გუშინწინ მეგობრები ვიყავით... ზურა ჯაფარიძეს რა დაემართა, მე არ ვიცი და, ზოგადად, მგონია, ჩემს მეგობარს დახმარება ესაჭიროება“, – აცხადებს იაგო ხვიჩია.

რა ხდება ჯაფარიძესთან დაკავშირებით, არ იციან არც რაქვიაშვილმა და მეგრელიშვილმა. სტატუსი მათთვისაც სიურპრიზი აღმოჩნდა. ჯერჯერობით ასევე უცნობია – ჯაფარიძე პარტიიდან წასვლას აპირებს თუ „გირჩიდან“ სხვების გარიცხვას.

ამასთან, რაქვიაშვილი არ გამორიცხავს, რომ ეს, შესაძლოა, ოპოზიციასთან მოლაპარაკებებს უკავშირდებოდეს. თუმცა, მისი თქმით, პარტიის ყველა წევრის პოზიცია ამ საკითხზე ერთიანი იყო.

განხეთქილებას „გირჩში“ ოპოზიციაშიც გამოეხმაურნენ. „ევროპული საქართველოს“ წევრის ირმა ნადირაშვილის თქმით, ვითარება კონკრეტულ ოპოზიციურ პარტიაში „შიდა სამზარეულოა“, თუმცა ამას საერთო სურათზე გავლენის მოხდენა შეუძლია.

„განხეთქილება ოპოზიციურ სპექტრში, ან თუნდაც რომელიმე კონკრეტული პარტიის ირგვლივ, ეს ამ პროცესებისთვის არაა სასარგებლო“, – განაცხადა ნადირაშვილმა და დასძინა, რომ ის წინასწარ მოლოდინებზე არ ისაუბრებს და პარტიის განცხადებას დაელოდება.

„გირჩი“ საქართველოს პოლიტიკურ არენაზე 2015 წელს გამოჩნდა. პარტია „ერთიანი ნაციონალური მოძრაობის“ სამმა ყოფილმა წარმომადგენელმა შექმნა. პარტია ლიბერალური მიმართულებისაა და არაორდინარული ინიციატივებით გამოირჩევა.

85
თემები:
საქართველოს პოლიტიკური ცხოვრება
მამუკა მდინარაძე

მდინარაძე: ჯანდაცვის სისტემასა და ექიმებზე ორკესტრირებული შეტევა სრულიად გაუმართლებელია

25
(განახლებულია 19:43 04.12.2020)
მმართველი პარტია მიიჩნევს, რომ პანდემიის პერიოდში ჯანდაცვის სისტემის დისკრედიტაცია მომაკვდინებელი ვირუსის მხარეს დგომაა.

თბილისი, 4 დეკემბერი – Sputnik. მმართველი პარტია პანდემიის დროს ჯანდაცვის მინისტრზე თავდასხმას საომარი სიტუაციის დროს თავდაცვის მინისტრზე თავდასხმას ადარებს და მძიმე ეპიდემიოლოგიურ სიტუაციაში ყველას ერთად დგომისკენ მოუწოდებს.

როგორც საპარლამენტო უმრავლესობის ლიდერმა მამუკა მდინარაძემ მმართველი პარტია „ქართული ოცნება - დემოკრატიული საქართველოს“ ცენტრალურ ოფისში გამართულ ბრიფინგზე განაცხადა, ჯანდაცვის მინისტრისა და მთლიანად სისტემის დისკრედიტაციის მცდელობა არა მხოლოდ არასწორია, არამედ მომაკვდინებელი ვირუსის მხარეს დგომაა.

მდინარაძის განცხადებით, დღეს მთელი მსოფლიო ებრძვის პანდემიას და საქართველოზე ბევრად მდიდარ და ძლიერ ქვეყნებს უჭირთ კორონავირუსის შედეგებთან გამკლავება. მას შექმნილ ვითარებაში გაუმართლებლად მიაჩნია ჯანდაცვის სიტემასა და ექიმებზე შეტევა.

„დღეს არა ერთმანეთთან ბრძოლის, არა ერთმანეთის შეცდომებსა თუ ხარვეზებზე ჩასაფრების, არამედ გაერთიანების და ერთად დგომის დროა. კრიტიკა ყოველთვის ბუნებრივი და მისაღებია, თუმცა ამ შემთხვევაში ჯანდაცვის სისტემაზე, მის პირველ პირზე თავდასხმა რიგ შემთხვევებში გამოგონილი ამბებით არის იგივე, რომ საომარი მდგომარეობის დროს თავდაცვის მინისტრს დაესხა თავს და მიზანმიმართული კამპანია გააჩაღო მის წინააღმდეგ“, – განაცხადა მდინარაძემ.

მომიტინგეების მოთხოვნებს თბილისში ახალი მოთხოვნა დაემატა>>

რამდენიმე დღის წინ ჯანდაცვის მინისტრმა ეკატერინე ტიკარაძემ განაცხადა, რომ მის ოჯახზე გარკვეული ჟურნალისტების მხრიდან ხორციელდება ძალადობა და მორალური ზეწოლა. ასევე ბოლო დღეებში სხვადასხვა მედიასაშუალებები და კორონავირუსით გარდაცვლილთა ახლობლები ხშირად ადანაშაულებენ ექიმებსა და ჯანდაცვის სამინისტროს გულგრილობასა და უყურადღებობაში. დღეს ცნობილი გახდა, რომ თბილისში პარლამენტის წინ მიმდინარე საპროტესტო აქციაზე სხვა მოთხოვნებს კიდევ ერთი ახალი მოთხოვნა დაემატა – გადადგეს ჯანდაცვის მინისტრი.

25
თემები:
საქართველოს პოლიტიკური ცხოვრება
ეკატერინე ტიკარაძე

ტიკარაძე: საქართველო ლეტალობის მხრივ დაბალ მაჩვენებელს ინარჩუნებს

0
საქართველოში დღეს შექმნილი რთული ეპიდვითარების გათვალისწინებით, ჯანდაცვის მინისტრის განცხადებით, ქვეყანა ინფექციის გავრცელების აღმავალ ფაზაშია

 

თბილისი, 4 დეკემბერი – Sputnik. სხვა ქვეყნებთან შედარებით საქართველო კორონავირუსით სიკვდილიანობის დაბალ მაჩვენებელს ინარჩუნებს, განაცხადა ჯანდაცვის მინისტრმა ეკატერინე ტიკარაძემ.

მისი თქმით, ამ ეტაპზე საქართველოში კორონავირუსის გავრცელების აღმავალი ფაზაა. თუმცა, მიუხედავად ამისა, სიკვდილიანობის პროცენტული მაჩვენებელი მაღალი არაა.

„ჩვენ ქვეყანაში ინფიცირების მაჩვენებლის ანალიზს ვაკეთებთ და  ვიცით, რომ საქართველო დღეს იმყოფება ინფექციის გავრცელების აქტიურ ფაზაში – ჩვენ საკმაოდ მაღალი გავრცელება გვაქვს. ლეტალობის მაჩვენებელი კი 0.9%–ია.  ეს რთული ასახსნელია მოსახლეობისთვის, როდესაც ჩვენ აბსოლუტურ რიცხვებში ყოველდღიურად ვაცხადებთ ლეტალობის 30-ზე მეტ შემთხვევას, თუმცა ამის ანალიზი მსოფლიო ჯანდაცვის ორგანიზაციიდან კეთდება“, – განაცხადა ტიკარაძემ. 

საქართველო ყოველდღიურად წარვადგენს  როგორც ინფიცირების კოეფიციენტს, ისე ლეტალობის მაჩვენებელს და საქართველო ამ მხრივ დღეს საკმაოდ დაბალ მაჩვენებელზე რჩება, დასძინა ტიკარაძემ.

ბოლო დღე–ღამეში საქართველოში კორონავირუსს 38 პაციენტი ემსხვერპლა – პანდემიის დაწყებიდან ჯამში 1.425 ადამიანია გარდაცვლილი.

საქართველოში კორონავირუსის მეორე ტალღ მძვინვარებს. ქვეყანაში პანდემიის დაწყებიდან 152 ათასზე მეტი ლაბორატორიულად დადასტურებული ინფიცირების შემთხვევა გამოვლინდა, 126 ათასზე მეტი გამოჯანმრთელდა, 1,4 ათასი გარდაიცვალა.

ქვეყანაში კორონავირუსის პირველი შემთხვევა 26 თებერვალს დადასტურდა.

0
თემები:
COVID-19 საქართველოში