აეროპორტი

საქართველოს რამდენი მოქალაქე გამოაძევეს სხვადასხვა ქვეყნებიდან?

155
2019 წლის დასაწყისიდან რუსეთიდან საქართველოს 30-ზე მეტი მოქალაქე გამოაძევეს.

თბილისი, 12 აპრილი — Sputnik. 2018 წლის იანვრიდან სხვადასხვა ქვეყნებიდან საქართველოს 5,6 ათასზე მეტი მოქალაქე გამოაძევეს, იუწყება შსს-ზე დაყრდნობით საზოგადოებრივი მაუწყებლის პირველი არხი.

2018 წელს სამშობლოში სხვადასხვა მიზეზით დაახლოებით 4,6 ათასი მოქალაქე დაბრუნდა, 2019 წლის პირველ სამ თვეში – 1 ათასზე მეტი ადამიანი. დეპორტაცია ყველაზე ხშირად განხორციელდა თურქეთიდან, ისრაელიდან და გერმანიიდან.

ქვეყნები 2018 წელი 2019 წლის დასაწყისი

თურქეთი

1788 293
ისრაელი 813 241
გერმანია 531 176
საფრანგეთი 273 57
რუსეთი 208 33

ყველაზე იშვიათად კი საქართველოს მოქალაქეების დეპორტაცია განხორციელდა ყირგიზეთიდან, უნგრეთიდან, სლოვაკეთიდან, კუბიდან და პორტუგალიიდან.

საქართველოს ხელისუფლებამ არაერთხელ მოუწოდა საკუთარ მოქალაქეებს, ბოროტად არ გამოიყენონ სხვა ქვეყნებთან დაწესებული უვიზო რეჟიმი და არ დაარღვიონ კანონი.

ევროკავშირის ქვეყნებთან საქართველოს მოქალაქეებისთვის უვიზო რეჟიმი 2017 წლის 28 მარტიდან ამოქმედდა. საუბარია შენგენის ზონის ქვეყნებში მოკლევადიან (180 დღის მანძილზე საერთო ჯამში 90 დღით), ტურისტულ, საქმიან და სტუმრის სტატუსით ვიზიტებზე. გრძელვადიანი, სამუშაო ან სასწავლო ვიზიტებისთვის საქართველოს მოქალაქეებს ვიზების მიღება სჭირდებათ.

მსოფლიოს სხვადასხვა ქვეყნიდან დეპორტირებული საქართველოს მოქალაქეების რიცხვი გაიზარდა>>>

უვიზო რეჟიმის უსიამოვნო შედეგი გახდა ის, რომ ევროკავშირის ქვეყნებში გაიზარდა საქართველოდან თავშესაფრის მაძიებელთა რაოდენობა. თავიანთი შეშფოთება ამასთან დაკავშირებით გამოხატეს გერმანიამ, საფრანგეთმა, შვედეთმა, ისლანდიამ.

საქართველოს ხელისუფლებამ, თავის მხრივ, უვიზო რეჟიმის მოთხოვნების დამრღვევების მიმართ კანონმდებლობა გაამკაცრა. ამიერიდან ადამიანის რეადმისიასთან დაკავშირებული ყველა ხარჯი თვითონ მას ეკისრება. ასევე გამკაცრდა გვარის გამოცვლის პროცედურები, რაც ხშირად სწორედ ამ პროცესთან იყო დაკავშირებული.

ბოლო პერიოდში ისრაელმა და ევროპის 12-მა ქვეყანამ საქართველო უსაფრთხო ქვეყნების სიაში უკვე შეიყვანა, რითიც ამ ქვეყნებს თავშესაფრის მთხოვნელთათვის უარის თქმა გაუმარტივდათ.

 

155