თბილისი, 17 მაისი — Sputnik. თბილისის მერმა კახა კალაძემ ბიზნეს-სექტორს თხოვნით მიმართა, გამოიჩინოს მეტი აქტიურობა დედაქალაქში მიწისქვეშა პარკირების პროექტის განხორციელებაში.
„მიწისქვეშა პარკირებასთან დაკავშირებით სამ ლოკაციაზე ინტერესთა გამოხატვა გამოვაცხადეთ. ეს ადგილებია: გეგეშიძის ბაღი, რკინიგზის სადგური და მეტროს სადგურ „ვარკეთილის" მიმდებარე ტერიტორია. ამ კონკრეტულ ლოკაციებს სიმბოლურ ფასად — ერთ ლარად გადავცემთ. აღნიშნულ სამ ლოკაციაზე დაახლოებით 715 საპარკინგე ადგილის მოწყობის პროექტის განხორციელებაა შესაძლებელი. დარწმუნებული ვარ, ბიზნესი იაქტიურებს და აღნიშნული პროექტების ერთად განხორციელებას შევძლებთ", — განაცხადა კალაძემ.
კალაძემ, თბილისის მერად არჩევიდან მალევე, განაცხადა, რომ დედაქალაქის ხელისუფლება პარკირების ადგილების ნაკლებობის პრობლემის გადაჭრას აპირებს.
როდესაც დედაქალაქს დავით ნარმანია მართავდა, ქალაქის მთავრობამ მრავალდონიანი პარკირებისთვის ათი ადგილი შეარჩია: რკინიგზის ვაგზლის მიმდებარე ტერიტორიაზე, მეტროს სადგურებთან — „მარჯანიშვილი", „ისანი" და „ვარკეთილი", ფილარმონიასთან, პუშკინის სკვერთან, თბილისის მერიასთან, გულუას მოედანზე და გეგეშიძის ბაღთან.
