პრეზიდენტის სასახლე

პრეზიდენტის შეწყალების უფლება აბსოლუტური არ არის?

226
(განახლებულია 17:03 09.01.2018)
საქართველოში 2008 წელს პატიმართა შეწყალების გამო მიხეილ სააკაშვილისთვის გამოტანილი განაჩენის გამო დავა არ წყდება.

თბილისი, 9 იანვარი — Sputnik. პრეზიდენტს პატიმრების შეწყალების უფლება აქვს, მაგრამ როგორ გამოიყენებს ის ამ უფლებას, კონტროლს ექვემდებარება, განუცხადა საქართველოს იუსტიციის მინისტრმა თეა წულუკიანმა ჟურნალისტებს.

საქართველოს პრეზიდენტმა გიორგი მარგველაშვილმა უფრო ადრე თავისი წინამორბედის მიხეილ სააკაშვილის მიმართ გამოტანილ განაჩენთან დაკავშირებით უკმაყოფილება გამოთქვა. თბილისის სასამართლომ სააკაშვილი სამსახურებრივი უფლებამოსილების ბოროტად გამოყენებაში დამნაშავედ ცნო სანდრო გირგვლიანის მკვლელობისთვის გასამართლებულების შეწყალებასთან დაკავშირებით.

მარგველაშვილის განცხადებით, სააკაშვილის მიმართ გამოტანილი განაჩენი ეჭვს ბადებს შეწყალებაზე პრეზიდენტის საკონსტიტუციო უფლების შეზღუდვის მცდელობასთან დაკავშირებით. პროკურატურაში, თავის მხრივ, განმარტეს, რომ ბრალდებები სააკაშვილის წინააღმდეგ წამოაყენეს არა იმიტომ, რომ მან პატიმრები შეიწყალა, არამედ იმის გამო, რომ ის ბრალდებულებს მათ დაკავებამდე დაჰპირდა გათავისუფლებას.

"პრეზიდენტს აქვს ექსკლუზიური უფლება შეიწყალოს მსჯავრდებულები, მაგრამ რა მიზნით და როგორ გამოიყენებს მისთვის მინიჭებულ ამ უფლებას პრეზიდენტი, რა თქმა უნდა, ეს კონტროლს ექვემდებარება", — განაცხადა წულუკიანმა.

სასამართლომ მიიჩნია, რომ შეწყალება სახელმწიფო კომისიის გვერდის ავლით სააკაშვილის მხრიდან იყო უფლებამოსილების ბოროტად გამოყენება.

სასამართლოს მოტივირებული დასკვნის თანახმად, საქმის მასალები მოწმობს, რომ სააკაშვილმა გირგვლიანის საქმეზე მსჯავრდებულების შეწყალებით თავისი ადრე მიცემული პირობა შეასრულა და ამით დაირღვა დაზარალებულის ოჯახის წევრებისა და საქართველოს სახელმწიფოებრივი ინტერესები.

წულუკიანის განცხადებით, ის არ ეთანხმება მოსაზრებას იმის თაობაზე, რომ პრეზიდენტის უფლება შეწყალებასთან მიმართებით შეუზღუდავია და არანაირ კონტროლს არ უნდა დაექვემდებაროს საზოგადოებისა თუ მართლმსაჯულების მხრიდან.

"სააკაშვილის მიერ ამ კონკრეტულ საქმეზე შეწყალების უფლების გამოყენების კონტროლი უკვე განახორციელა ისეთმა მართლმსაჯულების ორგანომ, როგორიც არის სტრასბურგის სასამართლო. სტრასბურგის სასამართლომ გადაწყვეტილებაში თქვა, რომ სააკაშვილის მიერ შეწყალების უფლების გამოყენება ამ საქმეზე იყო საოცარი, თუ გნებავთ, შოკისმომგვრელი, რადგან როდესაც საქმე ეხება უდანაშაულო ადამიანის მკვლელობას, ამ საქმეზე იხდიან სასჯელს პატიმრები, იქ შეწყალების უფლება არ უნდა გამოყენებულიყო", — აღნიშნა წულუკიანმა.

იმის შესახებ, რომ არც ერთი საკონსტიტუციო უფლება არ არის აბსოლუტური, თუ საუბარია ღირსების დაცვაზე ან წამების აკრძალვაზე, მანამდე პარლამენტის იურიდიულ საკითხთა კომიტეტის თავმჯდომარემ ეკა ბესელიამ განაცხადა.

სტრასბურგის ადამიანის უფლებათა სასამართლომ გირგვლიანის ოჯახის სარჩელთან დაკავშირებით გადაწყვეტილება 2011 წლის აპრილში მიიღო. ვერდიქტი მოსარჩელის მოთხოვნებს ნაწილობრივ აკმაყოფილებდა. სასამართლომ საქართველოს ხელისუფლებას (სააკაშვილის მეთაურობით) გირგვლიანის ოჯახისთვის, მორალური ზარალის ანაზღაურების სახით, 50 ათასი ევროს გადახდა დაავალდებულა.

საქართველოს მთავარმა პროკურატურამ სააკაშვილს ბრალი რამდენიმე სისხლის სამართლის საქმეზე 2014 წელს დაუსწრებლად წარუდგინა. თავად ექს-პრეზიდენტმა სამშობლო 2013 წელს, ბოლო საპრეზიდენტო არჩევნების შემდეგ დატოვა.

226
თეგი:
მიხეილ სააკაშვილი, თეა წულუკიანი, გიორგი მარგველაშვილი
თემები:
საქართველოს პრეზიდენტი –2018 (163)
კალაუბანი

Freedom House–ის ანგარიში: საქართველო ნაწილობრივ თავისუფალ ქვეყნებს შორისაა

2
(განახლებულია 17:25 03.03.2021)
ანგარიში  მსოფლიოს 195 ქვეყანაში პოლიტიკური უფლებების და სამოქალაქო თავისუფლების მხრივ არსებულ ვითარებას ასახავს.

თბილისი, 3 მარტი - Sputnik. ამერიკული არასამთავრობო ორგანიზაცია Freedom House-ის მსოფლიოში თავისუფლების შესახებ 2021 წლის რეიტინგში საქართველო ერთი საფეხურით ჩამოქვეითდა, თუმცა, „ნაწილობრივ თავისუფალი“ ქვეყნის სტატუსი შეინარჩუნა.

ამჯერად საქართველომ 60 ქულა მიიღო სისტემით, რომელშიც 100 ქულა ყველაზე კარგი შედეგია – შედარებისთვის ქვეყანას 2017 და 2018 წლების ანგარიშში  64 ქულა ჰქონდა, 2019-ში 63 და 2020 წელს 61. 

Freedom House-ი ქვეყნის თავისუფლებას ორი კრიტერიუმით აფასებს, ესენია პოლიტიკური უფლებები და სამოქალაქო უფლებები. პოლიტიკურ უფლებებს 40 ქულა ეთმობა, სამოქალაქოს კი 60 – საქართველომ აღნიშნულ კრიტრიუმებში 23 და 37 ქულები მიიღო.
აღნიშნული კვლევა 195 ქვეყანას და 14 ტერიტორიულ წარმონაქმს, მათ შორის, საქართველოს ცენტრალური ხელისუფლების მიერ არაკონტროლირებად აფხაზეთისა და ცხინვალის რეგიონს მოიცავს.

ანგარიშის მიხედვით, საქართველო კონკურენტულ არჩევნებს ატარებს და მას დემოკრატიის ტრაექტორიის გაუმჯობესების ნიშნები განსაკუთრებით 2012-2013 წლებში ჰქონდა, რაც მთავრობის შეცვლას უკავშირდებოდა, თუმცა, ბოლო წლებია უკუსვლას განიცდის. ორგანიზაციის შეფასებით, ქვეყანაში პრობლემად რჩება კორუფციაც. 

Freedom House დამოუკიდებელი ორგანიზაციაა, რომელიც დემოკრატიისა და თავისუფლების გაფართოებაზე ზრუნავს მთელ მსოფლიოში. ორგანიზაცია აანალიზებს თავისუფლების პრობლემებს, გამოდის უფრო ფართო პოლიტიკური უფლებებისა და სამოქალაქო თავისუფლებების მხარდაჭერით და ხელს უწყობს დემოკრატიულ გარდაქმნებს.

Freedom House 1941 წელს დაარსდა.

2
ოპოზიციის აქცია

13 მარტის აქცია აღარ გაიმართება: ოპოზიციამ აქციების მოდიფიცირების გადაწყვეტილება მიიღო

13
(განახლებულია 17:01 03.03.2021)
ოპოზიცია უარს ამბობს ადმინისტრაციული შენობების პიკეტირებაზე, თუმცა საპროტესტო აქციების შეწყვეტას არ აპირებს

 

თბილისი, 3 მარტი – Sputnik. ოპოზიციური პარტია „ერთიანი ნაციონალური მოძრაობის“ ცენტრალურ ოფისში გამართულ შეხვედრაზე სხვადასხვა ოპოზიციური პარტიების ლიდერებმა საპროტესტო აქციების მოდიფიცირების გადაწყვეტილება მიიღეს.  

გავრცელებული ინფორმაციით,  ხვალ დაგეგმილი საპროტესტო აქცია, რომელზეც მთავრობის კანცელარიის პიკეტირება იგეგმებოდა, ავტომსვლელობით გაიმართება. აქცია რესპუბლიკის მოედნიდან 13:00 საათზე დაიწყება და რუსთავის ციხესთან დასრულდება, სადაც ოპოზიციის ერთ–ერთი ლიდერი ნიკა მელიაა მოთავსებული. 

„შეხვედრაზე გადაწყვეტილება მივიღეთ, რომ მოხდეს საპროტესტო აქციების ფორმატის შეცვლა, რათა ხელისუფლებამ საპროტესტო ღონისძიებები მოლაპარაკებების ჩაშლის მიზეზად არ გამოიყენოს. ევროპული საბჭოს პრეზიდენტმა შარლ მიშელმა მხარეებს, პრაქტიკულად, ორკვირიანი ვადა მისცა იმისთვის, რომ ამ პერიოდში მოხდეს შეთანხმება იმ საკითხებზე, რომელიც ჩარჩო-დოკუმენტშია შეტანილი. სწორედ ამიტომაც 13 მარტს (პარლამენტთან – რედ.) დაგეგმილი ფართომასშტაბიანი აქცია გადავდეთ 20 მარტისთვის, დანარჩენი აქციები კი მოდიფიცირდება“, - განაცხადა ბოკუჩავამ.

ბოკუჩავას განცხადებით, ქვეყანაში საპროტესტო აქციები იმ დრომდე გაგრძელდება, ვიდრე მათი მოთხოვნები არ დაკმაყოფილდება.

პოლიტიკური კრიზისი საქართველოში „ნაციონალური მოძრაობის“ თავმჯდომარის ნიკა მელიას დაპატიმრების შემდეგ გამწვავდა. ოპოზიცია ქუჩაში გამოვიდა, ის პოლიტპატიმრების გათავისუფლებასა და რიგგარეშე არჩევნების ჩატარებას მოითხოვს.

უფრო ადრე საქართველოს პრემიერ–მინისტრმა ირაკლი ღარიბაშვილმა განაცხადა, რომ ხელისუფლება რიგგარეშე საპარლამენტო არჩევნებს არ დათანხმდება. ნიკა მელიას გათავისუფლება კი დამოკიდებულია იმაზე, გადაიხდიან თუ არა მისი ოჯახის წევრები ან მომხრეები 40 ათასი ლარის ოდენობის გირაოს. როგორც პრემიერმა აღნიშნა, ხელისუფლება კანონის აღსრულებაში ვერ ჩაერევა.

ახლა მხარეებს პოლიტიკური კრიზისიდან გამოსასვლელად ორი კვირა აქვთ. როგორც ევროპული საბჭოს პრეზიდენტმა შარლ მიშელმა შეხვედრის შემდეგ განაცხადა, ორ კვირაში ბრიუსელში საქართველო–ევროკავშირის ასოციაცირების საკითხზე საბჭოს სხდომა გაიმართება და იქ ქვეყანაში მიმდინარე პოლიტიკურ ვითარებას განიხილავენ.

 

13
თემები:
 „ცხელი გაზაფხული“:  პოლიტიკური ვნებათაღელვა საქართველოში