თბილისი, 21 ოქტომბერი — Sputnik. საქართველოს მთელ ტერიტორიაზე თვითმმართველი ორგანოების არჩევნები ტარდება. ხმის მიცემა 3,436 საარჩევნო უბანზე 08:00 საათზე დაიწყო. ცენტრალური საარჩევნო კომისიის (ცესკო) ინფორმაციით, ამომრჩევლის საერთო რაოდენობა, რომელსაც ადგილობრივი თვითმმართველობის არჩევნებში მონაწილეობა შეუძლია, 3 440 123-ია.
საქართველოს ტერიტორიაზე 3, 644 საარჩევნო უბანია გახსნილი (მათ შორის, 10 გამონაკლის შემთხვევაში შექმნილი). ცენტრალურმა საარჩევნო კომისიამ (ცესკო) არჩევნებში მონაწილეობის მისაღებად 22 პოლიტიკური პარტია, 5 საარჩევნო ბლოკი და ასევე დამოუკიდებელი კანდიდატები დაარეგისტრირა.
საქართველოში არჩევნებში მონაწილეობის მისაღებად ცესკომ 64 ქალაქისა და რაიონის მერების პოსტზე მთლიანობაში 389 კანდიდატი დაარეგისტრირა.
64 საკრებულოში მაჟორიტარი დეპუტატებისთვის გამოყოფილ 1 088 ადგილზე პრეტენდენტი 4 727 კანდიდატია. დანარჩენ ადგილებს ის კანდიდატები დაიკავებენ, რომლებიც პარტიული სიით გავლენ.
რაც შეეხება მერის არჩევნებს, ყველაზე მაღალი კონკურენცია თბილისშია — 13 ადამიანი, ყველაზე დაბალი კი ადიგენსა და ონში — 2-2 ადამიანი.
არჩევნებში მონაწილეობის უფლება აქვს საქართველოს მოქალაქეს, რომელსაც არჩევნების დღემდე 18 წელი აქვს შესრულებული.
საქართველოში წინასაარჩევნო კამპანიისა და არჩევნების დაკვირვებისთვის საქართველოს ცენტრალურმა საარჩევნო კომისიამ 71 ადგილობრივი და 30 საერთაშორისო სადამკვირვებლო ორგანიზაცია დაარეგისტრირა. არჩევნებს ადგილობრივი ორგანიზაციებიდან დააკვირდება 20 ათასი დამკვირვებელი, საერთაშორისო ორგანიზაციებიდან კი 600 დამკვირვებელი.
ცესკომ ასევე დაარეგისტრირა 74 ადგილობრივი და საერთაშორისო საინფორმაციო საშუალება.