თბილისი, 6 ივნისი — Sputnik. საქართველოს პრეზიდენტი ორშაბათს სამუშაო ვიზიტს იწყებს სტრასბურგში. გიორგი მარგველაშვილი შეხვდება ევროპის საბჭოს გენერალურ მდივანს ტორბიორნ იაგლანდს და ევროპის პარლამენტის პრეზიდენტს მარტინ შულცს, ევროპის სახალხო პარტიის და სოციალ–დემოკრატების ალიანსის ლიდერებს, იუწყება ტელეკომპანია "რუსთავი 2" პრეზიდენტის პრეს-სამსახურზე დაყრდნობით.
პრეზიდენტი ევროპის პარლამენტის საგარეო ურთიერთობათა კომიტეტის სხდომაზეც გამოვა სიტყვით, სადაც გიორგი მარგველაშვილი ვიზალიბერალიზაციის შესახებ ისაუბრებს. პრეზიდენტი საქართველო–ევროკავშირის ურთიერთობებზე გაამახვილებს ყურადღებას და ევროპარლამენტარების შეკითხვებს უპასუხებს.
მარგველაშვილი სტრასბურგიდან ბრიუსელში გაემგზავრება, სადაც 8-9 ივნისს დაგეგმილია შეხვედრები ნატოს გენერალურ მდივანთან იენს სტოლტენბერგთან, ევროკავშირის საბჭოს პრეზიდენტთან დონალდ ტუსკთან და ევროპული სამეზობლო პოლიტიკისა და გაფართოებაზე მოლაპარაკებების საკითხებში ევროკომისარ იოჰანეს ჰანთან.
