თბილისი, 12 მაისი –Sputnik. გერმანულ გამოცემა "Die Welt" – თან ინტერვიუში ბრიუსელში მყოფმა საქართველოს საგარეო საქმეთა მინისტრმა თამარ ბერუჩაშვილმა განაცხადა, რომ 2008 წელს რუსეთმა საქართველოში მოსინჯა რამდენად შორს შეიძლებოდა წასვლა.
„2008 წელს რუსეთმა შეძლო დაუსჯელი დარჩენილიყო საქართველოს ტერიტორიების ოკუპაციის შემდეგ. ევროკავშირი დაგვეხმარა სამშვიდობო მოლაპარაკებებში, მაგრამ რუსეთის ქმედებებს სანქციები არ მოჰყოლია. რამდენიმე თვეში ევროპა კვლავ დაუბრუნდა რუსეთთან ურთიერთობის ჩვეულ რეჟიმს. რუსეთმა საქართველოში მოსინჯა, რამდენად შორს შეიძლებოდა წასვლა, და როცა იგი არავინ შეაჩერა, სვლა განაგრძო“, − ავრცელებს სტატიიდან ამონარიდს საქართველოს საგარეო საქმეთა სამინისტროს პრესსამსახური.
საქართველოს მთავარი დიპლომატის თქმით, ევროპას რომ რუსეთის ქმედებაზე საქართველოში მკაცრი რეაქცია ჰქონოდა, უკრაინაში მოვლენები სხვაგვარად განვითარდებოდა.
საქართველომ აფხაზეთი და ცხინვალის რეგიონი ოკუპირებულ ტერიტორიებად ცნო 2008 წლის აგვისტოს ომის შემდეგ, როცა რუსეთმა ისინი დამოუკიდებელ სახელმწიფოებად აღიარა. მოსკოვის ქმედების საპასუხოდ, თბილისმა მასთან დიპლომატიური ურთიერთობები გაწყვიტა.
