სოფიო დემეტრაშვილი

28 წლის საუკეთესო ლექტორი, სიკეთის „ბაცილა“ და კომენდანტის საათის დროს აღებული საშვები

831
(განახლებულია 19:14 15.01.2021)
ადამიანის ნამდვილი ბუნება ალბათ ყველაზე კარგად ვლინდება რთულ სიტუაციებში, როცა სხვების დახმარების სურვილი შინაგან მოთხოვნილებად იქცევა ხოლმე.

ამ მხრივ პანდემიამ გარკვეული ლუსტრაცია მოახდინა. ბოლო დროს სხვების დახმარების მსურველი ბევრი გამოჩნდა, საბედნიეროდ, მათ შორის ახალგაზრდები მრავლად არიან.

დღეს გაგაცნობთ ერთ მათგანს – სოფიო დემეტრაშვილს, რომელიც ამ დღეებში თავის მეგობართან, იურისტ ოთარ ნარჩემაშვილთან ერთად, შეიძლება ითქვას, სიკეთის მარათონშია ჩართული. ყოველი აქტივობის შემდეგ ის თავს მოვალედ თვლის და სოციალურ ქსელებში დახარჯული თანხების თაობაზე ინფორმაციასაც აქვეყნებს.

სოფიო დემეტრაშვილი
სოფიო დემეტრაშვილი

სოფიო წარმატებული ახალგაზრდა კონსტიტუციონალისტია. მას სამართლის დოქტორის ხარისხი აქვს, არის საქართველოს ტექნიკური უნივერსიტეტის ასოცირებული პროფესორი და სულხან-საბა ორბელიანის სახელობის უნივერსიტეტის მოწვეული პროფესორი. ამასთან დავით ბატონიშვილის სამართლის ინსტიტუტის აღმასრულებელი დირექტორის მოადგილეც გახლავთ და მინიჭებული აქვს „საუკეთესო ლექტორის წოდება“.

პარალელურად მეცხრე წელია, რაც საჯარო მოხელეა, ბოლო ექვსი წელი სამგორის რაიონის გამგეობაში მუშაობს. და ამ ყველაფერს მან 28 წლის ასაკში მიაღწია.

სოფიო დემეტრაშვილი
სოფიო დემეტრაშვილი

- სოფიო, სიკეთე მართლაც გადამდებია და ამაში თქვენი მაგალითიც გვარწმუნებს...

- პანდემიამ თითოეული ჩვენგანის ცხოვრება ძალიან შეცვალა, ფაქტობრივად, დედამიწა გაჩერდა. ბევრმა ადამიანმა დაკარგა სამსახური, ოჯახები, რომლებიც საშუალო ფენას მიეკუთვნებოდნენ, სიღარიბის ზღვარზე იმყოფებიან. ამიტომ ვერ გავჩერდებოდით – მათ დასახმარებლად მე და ჩემი მეგობარი ოთარ ნარჩემაშვილი გავერთიანდით. დღეს ბევრია ისეთი, ვისაც ელემენტარული საკვებიც კი არ აქვს, ვინც უიმედოდაა დარჩენილი, ვისაც სცივა, შია და დახმარებას არავისგან ელოდება. თუმცა არც ისეთი ცოტანი არიან ისეთებიც, ვისაც თანაგრძნობის უნარი აქვს და სურვილი – სხვას დაეხმაროს. გვიხარია, რომ მათ რიცხვში ჩვენც ვართ.

სოფიო დემეტრაშვილი და ოთარ ნარჩემაშვილი საქველმოქმედო აქციის წინ
სოფიო დემეტრაშვილი და ოთარ ნარჩემაშვილი საქველმოქმედო აქციის წინ

- ვიცი, თავიდანვე შეთანხმდით, რომ ვისაც ეხმარებით, მათ ფოტოებს და დახმარების ამსახველ კადრებს არსად გამოაქვეყნებდით...

- დიახ, თავიდანვე შევთანხმდით, რომ იმ ადამიანებს, ვისაც ვეხმარებით, ჩვენი იქ მისვლის დროს ფოტოებს არ გადავუღებდით. ეს ჩვენი პრინციპული პოზიციაა. არ გვინდა „ერთჯერადი პიარი“ და თანაც ამით სხვისი ინტერესების შელახვა. ამას გარდა, ინფიცირების გავრცელების რისკიდან გამომდინარე, მიტანილ ნობათს ოჯახის კარებთან ვაწყობთ და ვცდილობთ მათთან მხოლოდ დისტანციური კონტაქტი დავამყაროთ. ამის შემდეგ ახალ მისამართზე მივდივართ, ოღონდ მანამდე ვისთანაც ვიყავით, მათთან ვრეკავთ და ვატყობინებთ, რომ პროდუქტები მივიტანეთ. როცა ვრწმუნდებით, რომ ჩვენი მიტანილი სახლში შეიტანეს, იქიდან მხოლოდ მაშინ მოვდივართ.

სოფიო დემეტრაშვილი საჯარო ლექციაზე
სოფიო დემეტრაშვილი საჯარო ლექციაზე

- რამდენ ადამიანს ეხმარებით და სხვებსაც თუ აქვთ საშუალება, რომ მათ დაეხმარონ?

- პირველ დღეებში დავეხმარეთ ათ ოჯახს, რომლებთანაც საკვები პროდუქტები მივიტანეთ. ახლა პროდუქტებზე ფასები მომატებულია, მაგრამ, საბედნიეროდ, დახმარების მსურველი ბევრი აღმოჩნდა და სწორედ მათი დახმარებით შევძელით იმ ოჯახების გახარება. ჩვენ ვსარგებლობთ პირადი ანგარიშით, რომელზეც მსურველები გარკვეულ თანხას რიცხავენ. (საქართველოს ბანკი GE43BG0000000161955116; თიბისი ბანკი GE75TB7861445061100016) იმედი გვაქვს, ამ  შემოწირულობით საახალწლოდ კიდევ ბევრს გავახარებთ.

სოფიო დემეტრაშვილი
სოფიო დემეტრაშვილი

- ამ ეტაპზე კომენდანტის საათი მოქმედებს და ამის გამო ალბათ დროში შეზღუდულები ხართ, რამდენად ასწრებთ ადგილებზე მისვლას?

- ყოველთვის ვცდილობთ, რომ დილით დაწყებული საქმე იმავე დღეს დავასრულოთ, რადგან ჩვენც ოჯახები გვყავს და სამსახური გვაქვს. ჩვენი დილა იწყება რომელიმე მარკეტთან დილის ათ საათზე, როცა ის იხსნება. შესაბამისად, დაახლოებით 11-12 საათისთვის ვხვდებით ერთმანეთს და პროდუქტების ყიდვას ვიწყებთ. ძირითადად გადაადგილება მაშინ გვიწევს, როცა კომენდანტის საათი მოქმედებს. თუმცა გამოსავალი მაინც ვიპოვეთ. პროდუქტის ყიდვის და გადანაწილების შემდეგ ვსხდებით მანქანაში და ჯერ ყველაზე შორს მცხოვრები ოჯახებისკენ მივდივართ. ამის შემდეგ უკვე გვიწევს „144“-თან დაკავშირება, რომ ჩვენზე ერთჯერადი საშვი დაუშვან. მგონი, უკვე ყველა ოპერატორი გვიცნობს. მადლობებს გვიხდიან და გვეუბნებიან, კარგ საქმეს აკეთებთო. მათი სიტყვები ჩვენთვის დამატებითი ბონუსი და სტიმულია.

სოფიო დემეტრაშვილის სერთიფიკატი
სოფიო დემეტრაშვილის სერთიფიკატი

- მკითხველს შევახსენებ, თქვენი მშობლები არიან ავთანდილ დემეტრაშვილი და მედეა დემეტრაშვილი, მაინტერესებს ამ სფეროს არჩევანი ოჯახიდან გამომდინარე გააკეთეთ?

- თქვენ წარმოიდგინეთ, ჩემი არჩევანი უჩვეულოდ გადაწყდა. ცხოვრების ყველა ეტაპზე ვეცადე მაქსიმალურად შორს ვყოფილიყავი მშობლების მფარველობისგან. ბაკალავრიატზე ჩავაბარე ტექნიკურ უნივერსიტეტში. იმ დროს შიდა გამოცდით წყდებოდა ის, თუ რომელ სფეროს აირჩევდი. ჩემი თავდაპირველი არჩევანი ჟურნალისტიკა იყო. დღემდე მახსოვს ბიბლიოთეკის თანამშრომელი ქალბატონის გაფართოებული თვალები, როდესაც უკან შევბრუნდი და ანკეტაში პროფესია შევცვალე.

სოფიო დემეტრაშვილი მშობლებთან ერთად
სოფიო დემეტრაშვილი მშობლებთან ერთად

- ანუ საბოლოოდ როგორ გადაწყდა საკითხი?

- საბოლოოდ ბაკალავრიატი კერძო სამართლის მიმართულებით დავამთავრე და, შეიძლება ითქვას, გავთავხედდი კიდეც, როდესაც იმავე წელს მაგისტრატურაზე ჩავაბარე. გამოცდაზე მივედი ახალშობილ შვილთან ერთად, რომელიც მაშინ თვის და 12 დღის იყო. გამოცდის შედეგებს გულისფანცქალით ველოდებოდი. შედეგად – ჩავაბარე ბიზნესის სამართალზე. იმ პერიოდში ისევ გავურბოდი მშობლების მფარველობას. მაგისტრატურის დასრულების შემდეგ ჩავაბარე დოქტორანტურაზე, რა დროსაც მხოლოდ საჯარო სამართლის მიმართულებით იყო მიღება.

სოფიო დემეტრაშვილი
სოფიო დემეტრაშვილი

- გამოდის, რომ გადამწყვეტი როლი გარემოებებმა ითამაშა?

- ფაქტობრივად ასე გამოვიდა, რაც „იბოდიალე“ სამართლის სხვადასხვა დარგში, საკმარისია და ახლა მამის გზას გაჰყევიო. მიუხედავად იმისა, რომ არაერთი ნაშრომის ავტორი ვიყავი, მაინც ვერიდებოდი საკონსტიტუციო სამართალს. ბოლოს, დავიცავი დისერტაცია და უკვე ერთი წელია ვატარებ სამართლის დოქტორის ხარისხს, რაც უზომოდ მეამაყება. ვერასოდეს დავივიწყებ მშობლების ამაყ და თვალცრემლიან თვალებს, როდესაც დისერტაციის დაცვას ესწრებოდნენ. მე და მამას შორის დღემდე ერთგვარი „ჩელენჯია“. სულ ვეკითები, შენ რომ იყავი 28 წლის რას აკეთებდი–მეთქი. და ასე გრძელდება ყოველ წელს. ჯერჯერობით პროფესიული თვალსაზრისით ვუსწრებ და მიხარია.

სოფიო დემეტრაშვილი პარლამენტში შეხვედრაზე
სოფიო დემეტრაშვილი პარლამენტში შეხვედრაზე

- საუკეთესო ლექტორის სერტიფიკატი როდის გადმოგცეს?

- საქართველოს ტექნიკური უნივერსიტეტის ასოცირებული პროფესორი ვარ, ასევე მიწვეული პროფესორი სულხან-საბა ორბელიანის სახელობის უნივერსიტეტში. ამის გარდა დავით ბატონიშვილის სამართლის ინსტიტუტის აღმასრულებელი დირექტორის მოადგილე ვარ. აგრეთვე, უკვე მეცხრე წელია, რაც საჯარო მოხელე ვარ - მერიის იურიდიული საქალაქო სამსახურით დავიწყე. ბოლო ექვსი წელია სამგორის რაიონის გამგეობაში ვარ. რაც შეეხება საუკეთესო ლექტორის სერტიფიკატს, „საუკეთესო ლექტორის წოდება“ ფაკულტეტზე ჩატარებული კენჭისყრის შედეგად მომენიჭა. ის დისერტაციის დაცვაზე ტექნიკური უნივერსიტეტის სამართლის ფაკულტეტის დეკანმა, ბატონმა ირაკლი გაბისონიამ გადმომცა.

- როგორ ფიქრობთ, რატომ არ ვართ კანონმორჩილი ერი?

- მთავარი პრობლემა განათლებისა და თავისუფლების ხარისხშია. ჩვენს სამშობლოში განათლების დონე, სამწუხაროდ, ძალიან დაბალია. ამასთან, არ გვყავს სათანადოდ ინფორმირებული საზოგადოება, რაც არსებით გავლენას ახდენს ქვეყნის დემოკრატიულობის ხარისხზეც. საქართველოს განათლების სისტემას საფუძვლიანი რეფორმა სჭირდება. გასათვალისწინებელია ისიც, რომ პოსტსაბჭოთა ქვეყანა ვართ, შესაბამისად, ე.წ. საბჭოური გავლენა ჯერ კიდევ სახეზეა.

- საბედნიეროდ, თქვენი თაობა ამ გავლენისგან თავისუფალია...

- დიახ, ასეა, ამას სხვადასხვა დროს ვავლენთ კიდეც ჩვენი პოზიციის გამოხატვით, რაც იმას ნიშნავს, რომ ქვეყნის ბედი ჩვენთვის სულერთი არ არის. ძალიან მიყვარს ჩემი სამშობლო, რომელსაც ახალ წელს მშვიდობასა და კეთილდღეობას ვუსურვებ. ბედნიერი ვარ, თუ ასეთ რთულ სიტუაციაში, რომლითაც ეპიდემიის გამო აღმოვჩნდით, სიკეთის ამ საერთო მარათონში მეგობრებთან ერთად მოკრძალებული წვლილი მეც შემაქვს...

 

831
ნინო რურუა

სამოთხე დედამიწაზე, ანუ რაში უნდა მივბაძოთ იტალიელებს, რომ უკეთ ვიცხოვროთ

3223
(განახლებულია 21:10 27.01.2021)
რუბრიკა „ქართველები უცხოეთში” იტალიაში მცხოვრებ ქართველ იურისტს ნინო რურუას და მის საქმიანობას გაგაცნობთ.

არაოფიციალური სტატისტიკით, იტალიის ქალაქ ბარში ყველაზე მეტი ქართველი ცხოვრობს, ამიტომ აქ წამოწყებულ ნებისმიერ ქართულ საქმიანობას განსაკუთრებული მნიშვნელობა ენიჭება. მათ შორის, ვინც იტალიაში თავის ქვეყანას ღირსეულად წარმოაჩენს, პროფესიით იურისტი ნინო რურუაც გახლავთ. იგი ქალაქ ბარის სასამართლოს ავტორიზებული კულტურათშორისი მედიატორი და იტალიის რესპუბლიკის მიერ აკრედიტებული ქართულენოვანი თარჯიმანია.

იტალიაში ასოციაცია „აისი“ (A.I.S. Assistenza per integrazione degli stranieri) ჩამოაყალიბა და ქართველი ბავშვებისთვის ბარის პირველი ქართული საკვირაო სკოლა „აისიც“ დააფუძნა. ამას გარდა 2017 წელს ბარის სერვისების სააგენტოში საემიგრაციო საკითხებითაა დაკავებული.

ნინო რურუა
ნინო რურუა

– ქალბატონო ნინო, თქვენ მაგალითზე რას გვეტყვით, როგორაა შესაძლებელი ქართული საქმის კეთება უცხოეთში?

– მიუხედავად ემიგრაციის რთული ცხოვრებისა, სურვილის შემთხვევაში ეს შესაძლებელია. მე იტალიაში 2012 წლიდან ვცხოვრობ, იტალიის მიერ აკრედიტებული ქართულენოვანი თარჯიმანი და ქალაქ ბარის სასამართლოს მიერ ავტორიზებული მედიატორი ვარ. იტალიაში დავაარსე ქართული ასოციაცია, რომლის საქმიანობაში ყველაზე დიდ მიღწევად ქართულენოვანი გაზეთის დაარსება მიმაჩნია. გაზეთი ამ ეტაპზე შეზღუდული ტირაჟით გამოდის, თუმცა სამომავლოდ მის უფრო ფართო მასშტაბით გამოცემას ვგეგმავთ. ასოციაცია აქ მყოფი ქართველების ნიჭის გამოსავლენად ხშირად მართავს კულტურულ-შემოქმედებით საღამოებს, პერიოდულად გამოსცემს საინფორმაციო ბროშურებს, აწყობს საინფორმაციო შეხვედრებს. 2018 წლის 10 თებერვალს ბარიში დავაარსე ქართული უფასო საკვირაო სკოლა „აისი“, რომელიც დაახლოებით 40 ბავშვს ითვლის.

საკვირაო სკოლაში
საკვირაო სკოლაში

ბავშვობის სამყარო - შტრიხები პორტრეტისთვის

ნინო რურუა: ერთ ჩვეულებრივ, ტრადიციულ თბილისურ ოჯახში დავიბადე. ოჯახში პირველი შვილიშვილი ვიყავი და, ცოტა არ იყოს, მათამამებდნენ. თუმცა ბავშვობიდან ყოველთვის ჩემი სამყარო მქონდა და რაღაცნაირი სიჯიუტით გამოვირჩეოდი. არასდროს მხიბლავდა ერთფეროვნება, ყოველთვის რაღაც ახლის ძიებაში ვიყავი. მიყვარდა კითხვა და დროის უდიდეს ნაწილს სახლში, წიგნებთან ვატარებდი. სკოლის დამთავრების შემდეგ ოჯახის სურვილი იყო, რომ ექიმი გავმხდარიყავი. თუმცა როცა მივხვდი, რომ ჩემგან ექიმი ვერ დადგებოდა, გადავწყვიტე პროფესია შემეცვალა და ბავშვობის ოცნება ამესრულებინა – იურისტი გავმხდარიყავი. 

ნინო რურუა
ნინო რურუა

– ნოსტალგიას საოცარი უნარი აქვს – ის შენში მანამდე უცნობ თვისებას ააქტიურებს ან მიმალულ ნიჭს აღვიძებს... 

– ასეთი რამ ჩემ ცხოვრებაშიც მოხდა. ყველა ემიგრანტი საქართველოს გულით ატარებს. ნოსტალგია გრძნობაა, რომელიც ყოველდღიურად გეძალება, მაგრამ სიტყვებით ვერ გადმოსცემ. რამდენიმეწლიანმა ემიგრაციამ უფრო ძლიერი გამხადა. სულ ვცდილობ, რომ შესაძლებლობის მაქსიმუმი გავაკეთო. ამ ქვეყნის მადლობელი ვარ, რადგან აქ საშუალება მომეცა, რომ საკუთარი ძალებისა და თუნდაც სურვილების რეალიზება მომეხდინა. რაც შეეხება ჩემში აღმოჩენილ მანამდე უცნობ თვისებას, რა გასაოცარიც არ უნდა იყოს, იტალიაში ხატვა დავიწყე და ამის მიზეზი და წინაპირობა სწორედ ნოსტალგია გახდა. ჩემდა გასაოცრად, ერთ მშვენიერ დღეს ხელში ფუნჯი ავიღე და ხატვა დავიწყე.

ნინო რურუა
ნინო რურუა

– იტალიელებს ორი სიტყვით როგორ აცნობთ საქართველოს?

– როდესაც ჩემი იტალიელი მეგობრები მეკითხებიან საქართველოზე, მარტივად ვპასუხობ: ეს არის სამოთხე დედამიწაზე. ჩემი დიდი სურვილია, რომ იქ დაბრუნება ყველამ შევძლოთ. თითოეული ჩვენგანი უცხოეთში თავისი ქვეყნის სახე და დესპანია. როგორც ჩვენ მოვიქცევით, ამის მიხედვით იმსჯელებენ მთლიანად ერზე და ქვეყანაზეც, ამიტომ ეს დიდი პასუხისმგებლობაა.

ოფიციალური შეხვედრის დროს
ოფიციალური შეხვედრის დროს

– ზოგჯერ ბედნიერება და კმაყოფილება ერევათ ერთმანეთში...

– იყო ბედნიერი არ ნიშნავს იმას, რომ შენ გარშემო ყველაფერი სრულყოფილია, ეს იმას ნიშნავს, რომ გადაწყვიტე თვალი აარიდო ყველაფერ იმას, რაც არასრულყოფილად გეჩვენება – მე ასე მესმის ბედნიერება...

ნინო რურუას შემოქმედება
ნინო რურუას შემოქმედება

– ქართველებს და იტალიელებს ხშირად გვადარებენ ერთმანეთს, თქვენი აზრით, რაში უნდა მივბაძოთ მათ?

– მსგავსება მართლაც დიდია, ქართველებს ტემპერამენტით განსაკუთრებით სამხრეთ იტალიელები ჰგვანან. თუმცა სხვაობაც მკვეთრია. აქ ძალიან დიდი ყურადღება ეთმობა სოფლის მეურნეობას. საკმაოდ კარგად აქვთ ეს სფერო მოწესრიგებული და უპირატესობა ქვეყნაში წარმოებულ პროდუქციას ენიჭება. რიგით იტალიელებს ურჩევნიათ, რომ ქვეყანაში წარმოებული პროდუქცია შეიძინონ და არა ექსპორტირებული. ეს მათი პრინციპული პოზიციაა. ასეთი დამოკიდებულება კი ადგილობრივი ბიზნესის განვითარებას უწყობს ხელს. აი, ასეთ პატრიოტიზმში თუ მივბაძავთ მათ, კარგი იქნება და ეს ჩვენ ეკონომიკაზეც დადებითად აისახება.

ნინო რურუას ნაქარგები
ნინო რურუას ნაქარგები

– თქვენთვის რა არის ცხოვრების ყველაზე დიდი გაკვეთილი?

– ცხოვრების ყველაზე დიდი გაკვეთილი ემიგრაციამ ჩამიტარა, აქ ბევრი რამ ვისწავლე: გიყვარდეს შენის საქმე, დაისახე მიზანი და იშრომე ამ მიზნის მისაღწევად. როდესაც სურვილი დიდია, დამერწმუნეთ, ყველაფერი გამოვა. უნდა გვახსოვდეს, სად არის ჩვენი ფესვები. მინდა, რომ ერთ მშვენიერ დღეს სამშობლოში ყველა დაბრუნდეს და იქ იყოს ბედნიერი...

 

3223
თემები:
ქართველები უცხოეთში
გიორგი მანდარია გამარჯვებულ მოსწავლეებთან ერთად

ლოგიკური აზროვნება გამარჯვებისთვის ქართველი მოზარდები მსოფლიოში უძლიერესთა შორის

967
(განახლებულია 22:44 26.01.2021)
დიდი ხანია მივეჩვიეთ იმ ფაქტს, რომ ქართველი მოზარდები ყველა სფეროში აღწევენ წარმატებას. ამჯერად ვისაუბრებთ ინფორმატიკის ოლიმპიადებზე, საიდანაც, არ ყოფილა შემთხვევა, რომ საქართველოდან წარგზავნილს მედალი არ ჩამოეტანოს.

საქართველოში ინფორმატიკის ეროვნული ოლიმპიადა, ისევე, როგორც მსოფლიო ოლიმპიადა, 1989 წლიდან იმართება. ოლიმპიადის ჩატარება განათლების სამინისტროს ინფორმატიკის მთავარმა ცენტრმა დაიწყო და ბატონი გიორგი მანდარია მასში პირველივე დღიდანაა ჩართული. ჩვენი ქვეყნის ეროვნულ ნაკრებს, რომელშიც ოთხი ძლიერი მოსწავლეა, ის 1990 წლიდან ხელმძღვანელობს. იმ წელს მეშვიდე გიმნაზიის მოსწავლემ გიორგი დათუაშვილმა, რომელიც საბჭოთა ნაკრებში მოხვდა, ინფორმატიკის მეორე მსოფლიო ოლიმპიადაზე ოქროს მედალი აიღო.

იქიდან მოყოლებული ჩვენი ყველა გამარჯვება ბატონი გიორგისა და მისი გუნდის სახელს უკავშირდება. ყოფილი ოლიმპიელები მიღებულ ცოდნასა და გამოცდილებას დიდ ცხოვრებაშიც იყენებენ. ამის დასტურია ის, რომ ბევრი მათგანი როგორც საქართველოში, ასევე უცხოეთში ცნობილ წამყვან კომპანიებში მუშაობს, ან თავად არიან კომპანიის მფლობელები.

გიორგი მანდარია
გიორგი მანდარია

- ბატონო გიორგი, როგორია ჩვენი ქვეყნის წარმატების სტატისტიკა?

- საქართველო, როგორც დამოუკიდებელი ქვეყანა, ინფორმატიკის მსოფლიო ოლიმპიადებში 1996 წლიდან მონაწილეობს. 2000 წელს პირველი მედალი მოვიპოვეთ და ამის შემდეგ მედლების გარეშე აღარ დავბრუნებულვართ. პირველი ოქროს მედალი საქართველოს ნაკრებს 2010 წელს ქუთაისის ფიზიკა-მათემატიკური 41-ე საჯარო სკოლის მოსწავლემ ცოტნე ტაბიძემ მოუტანა. მეორე ოქროს მედალი 2014 წელს თბილისელი მოსწავლის ნიკოლოზ სვანიძის სახელთანაა დაკავშირებული (კომაროვის ფიზიკა-მათემატიკური 199-ე საჯარო სკოლა, საინფორმაციო ტექნოლოგიების ცენტრი „მზიური“). ევროპის ოლიმპიადებში 2015 წლიდან ჩავერთეთ. ამ წლების მანძილზე არაერთი გამარჯვება გვაქვს მოპოვებული. საბოლოო ჯამში მსოფლიოს და ევროპის ოლიმპიადებზე აღებული გვაქვს 14 ოქროს, 12 ვერცხლისა და 50 ბრინჯაოს მედალი.

გიორგი მანდარია
გიორგი მანდარია

- ასე რომ, მედლის გარეშე ფაქტობრივად არც ერთი ოლიმპიადიდან არ დავბრუნებულვართ?

- დიახ, სწორედ ასეა. ქართველი მოსწავლეები 2017 წელს ცენტრალური ევროპის ქვეყნების ოლიმპიადისა და სრულიად ევროპის პირველი ახალგაზრდული ოლიმპიადის ჩემპიონები გახდნენ. 2018 წელს იაპონიის მსოფლიო ოლიმპიადაზე ორი ოქროს მედალი მოვიპოვეთ და საქართველო 87 მონაწილე ქვეყნიდან მსოფლიოს რვა უძლიერეს ქვეყანას შორის მოხვდა. 2019 წელს მსოფლიო ოლიმპიადაზე ერთი ოქროს და ორი ბრინჯაოს, სრულიად ევროპის მესამე ახალგაზრდულ ოლიმპიადზე კი ერთი ვერცხლის და სამი ბრინჯაოს მედალი დავიმსახურეთ. გასულ წელს რაც შეეხება, მსოფლიო ოლიმპიადაზე ორი ოქროსა და ორი ბრინჯაოს მედალი მოვიპოვეთ. ჩვენი ქვეყანა კი 87-დან ისევ მსოფლიოს რვა უძლიერეს ქვეყანას შორის მოხვდა.

გიორგი მანდარია
გიორგი მანდარია

- შარშან საქართველომ ონლაინ უმასპინძლა ევროპის ოლიმპიადას...

- დიახ, 2020 წელს საქართველომ ევროპის მეოთხე ახალგაზრდულ ოლიმპიადას ონლაინ რეჟიმში უმასპინძლა, რაც საკმაოდ რთული იყო. თუმცა იმას, რომ ოლიმპიადა მაღალ დონეზე ჩავატარეთ, საერთაშორისო კომიტეტის წევრების, მონაწილე ქვეყნების ხელმძღვანელების, თვით ოლიმპიადის პრეზიდენტის მიერ გამოგზავნილი სამადლობელი წერილები ადასტურებს. ფინანსური და ორგანიზაციული მხარდაჭერა საქართველოს განათლების, მეცნიერების, კულტურისა და სპორტის სამინისტრომ და შოთა რუსთაველის ეროვნულმა სამეცნიერო ფონდმა უზრუნველყვეს. ხოლო სამეცნიერო-თემატური უზრუნველყოფა, ჩვენთან ერთად, ყოფილი ოლიმპიელებით დაკომპლექტებულმა სამეცნიერო-ტექნიკურმა კომიტეტმა მოახდინა. ქართველი მოსწავლეები ამჯერადაც წარმატებით გამოვიდნენ. ოლიმპიადაზე ერთი ოქროს, ერთი ვერცხლისა და ორი ბრინჯაოს მედალი მოვიპოვეთ. მომავალ წელს, პანდემიის პრობლემის მოხსნის შემთხვევაში, ევროპის მეხუთე ახალგაზრდულ ოლიმპიადას ისევ საქართველო უმასპინძლებს.

გიორგი მანდარია ინფორმატიკის ოლიმპიადაზე მონაწილეებთან ერთად
გიორგი მანდარია ინფორმატიკის ოლიმპიადაზე მონაწილეებთან ერთად

- თუ შეიძლება, რომ მკითხველს გამორჩეული მოსწავლეები გავაცნოთ...

- მოგახსენებთ. 2018 წელს ჩვენი ორი ოქროსმედალოსნიდან (ორივე კომაროვი, სასწავლო ცენტრი „მზიური“) ნიკოლოზ ბირკაძე 340 მონაწილიდან მსოფლიოს უძლიერეს ოთხეულში შევიდა, ხოლო გიორგი კლდიაშვილი მსოფლიოს 16 უძლიერეს მოსწავლეს შორის მოხვდა. საქართველო 87 მონაწილე ქვეყნიდან რვა უძლიერეს ქვეყანას შორის დასახელდა. წლევანდელი ევროპის ახალგაზრდული ოლიმპიადის ოქროსმედალოსანი ლუკა მოსიაშვილი ევროპის უძლიერეს მოსწავლეთა ოთხეულში შევიდა. გარდა ამისა, გიორგი კლდიაშვილი (დემირელის სახელობის კერძო კოლეჯის ყოფილი მოსწავლე, სასწავლო ცენტრი „მზიური“) 2017 წელს ცენტრალური ევროპის ქვეყნების ოლიმპიადის ჩემპიონი გახდა. საქართველო კი მონაწილე ქვეყნების უძლიერეს სამეულში შევიდა. ნიკოლოზ ბირკაძემ საქართველოს ოლიმპიადების ისტორიაში თავისი ადგილი უკვე დაიმკვიდრა. ის პირველია, ვინც 15 წლის ასაკში მათემატიკისა და ინფორმატიკის მსოფლიო ოლიმპიადებზე ვერცხლის მედლები მოიპოვა. მანამდე გიორგი კლდიაშვილს ჰქონდა მეცხრე კლასში ორივე ოლიმპიადაზე ბრინჯაოს მედლები მოპოვებული. გარდა ამისა, ნიკოლოზი 2017 წელს ევროპის პირველი ახალგაზრდული ოლიმპიადის ჩემპიონი გახდა. საბოლოოდ კი ის ბოლო ოთხი წლის მანძილზე მოპოვებული სამი ოქროსა და ერთი ვერცხლის მედლით ინფორმატიკის მსოფლიო ოლიმპიადების ყველა დროის უძლიერეს ოცეულში შევიდა.

გიორგი მანდარია მოსწავლეებთან ერთად
გიორგი მანდარია მოსწავლეებთან ერთად

- ამ სფეროში ბევრი ინიციატივა თქვენ სახელთანაა დაკავშირებული, მათგან მნიშვნელოვანი გაგვაცანით...

- ჩემ თანამოაზრეებთან ერთად 2008 წელს დავაფუძნე „საინფორმაციო ტექნოლოგიების სწავლების და ინფორმატიკის ოლიმპიადების მხარდამჭერი ასოციაცია“, რომლის გამგეობის თავმჯომარეც გახლავართ. ეს ასოციაცია 2015 წლიდან  განათლების სამინისტროს მიერ გამოცხადებული კონკურსის საფუძველზე საქართველოს მოსწავლეთა ეროვნულ ოლიმპიადებს საკუთარი ხარჯებით ატარებს. 2017 წელს დავაფუძნე ინფორმატიკის ოლიმპიადა OLYINFO, რომელსაც წელიწადში ორჯერ, გაზაფხულსა და შემოდგომაზე ვატარებ. ის განკუთვნილია იმ მოსწავლეების გამოსავლენად, რომლებსაც არ აქვთ სპეციალური მომზადება, არ იციან დაპროგრამება და ალგორითმები, მაგრამ გამოირჩევიან ლოგიკური აზროვნებით, რაც ამ სფეროში უცილებელია. ასევე, 2015 წელს დავაფუძნე საქართველოს მოსწავლეთა ზამთრის ოლიმპიადა, რომელსაც ყოველი წლის თებერვლის ბოლოს შავი ზღვის საერთაშორისო უნივერსიტეტში ვატარებ უნივერსიტეტის ორგანიზაციული და ფინანსური მხარდაჭერით.

მოსწავლეებთან და კოლეგებთან ერთად
მოსწავლეებთან და კოლეგებთან ერთად

- რითია გამოწვეული ის, რომ ოლიმპიადებზე ძირითადად საქართველოს ორი ქალაქის მოსწავლეები გამოდიან?

- დიახ, გეოგრაფიული არეალი, რომელსაც ვწვდებით, საკმაოდ ვიწროა, პრაქტიკულად, მარტო თბილისითა და ქუთაისით შემოიფარგლება. ეს ძირითადად ამ საგნის კვალიფიციური პედაგოგების სიმწირითაა გამოწვეული და იმითაც აიხსენება, რომ დღეს ჩვენს სკოლებში ინფორმატიკა არ ისწავლება. არადა, ეს საჭირო საგანი ალგორითმული აზროვნების ჩამოყალიბებასა და დაპროგრამების ელემენტების სწავლებას ითვალისწინებს. მეორე მხრივ, საქართველოს რეგიონებში ნიჭიერი ბავშვების დიდი პოტენციალია, რომელთა საინფორმაციო ტექნოლოგიებთან ზიარება და ამ სფეროთი დაინტერესება ქვეყნისთვის მნიშვნელოვანი საქმეა. აქვე მინდა აღვნიშნო, რომ ამ პროცესში ძალიან დიდია კომაროვის სკოლის, ვეკუას სახელობის ფიზიკა-მათემატიკური, ქუთაისის ფიზიკა-მათემატიკური სკოლების, ასევე საინფორმაციო ტექნოლოგიების სასწავლო ცენტრ „მზიურის“ როლი, სადაც ბავშვები პატარა ასაკიდან იწყებენ მეცადინეობას და სკოლის დამთავრებამდე აგრძელებენ.

დაჯილდოების ცერემონია
დაჯილდოების ცერემონია

- ამ სკოლების გარდა ქართველი მოსწავლეების მომზადებაში ვინ იღებს მონაწილეობას და ვინ აფინანსებს ოლიმპიადებზე მათ გამგზავრებას?

- საქართველოს ეროვნული ნაკრების მომზადებას და მსოფლიო თუ სხვა საერთაშორისო ოლიმპიადებზე მოსწავლეების გამგზავრებას განათლების სამინისტრო აფინანსებს. რაც შეეხება მათ მომზადებას, არ შემიძლია არ ვახსენო რამდენიმე პედაგოგი, რომელთა უანგარო და მრავალწლიანი თავდადებული შრომის შედეგია სწორედ ის წარმატებები, რომლითაც ასე ვამაყობთ. ჩვენ ერთად შევძელით არცთუ ისე დიდი, მაგრამ საკმაოდ ეფექტური ინფრასტრუქტურის შექმნა.  შეიძლება ითქვას, რომ ჩვენი გუნდი ქვეყანას მაღალი დონის ცოდნით აღჭურვილ მომავალ თაობას უზრდის. მინდა ეს პედაგოგები ჩამოგითვალოთ: თბილისიდან – ზაზა გამეზარდაშვილი, გურამ ქოთოლაშვილი და პაატა ჯავახიშვილი, ქუთაისიდან – ვახტანგ შეკიშვილი და მალხაზ ჯინჯიხაძე. ასევე ის ყოფილი ოლიმპიელები, რომლებიც თავის ცოდნას უზიარებენ მომავალ თაობას. საბედნიეროდ, ისინი უკვე არცთუ ისე ცოტა არიან და მათი ჩამოთვლა შორს წაგვიყვანს. ბევრი წარმატებული ყოფილი ოლიმპიელი ფინანსურადაც გვეხმარება.

დაჯილდოების ცერემონია
დაჯილდოების ცერემონია

- სწორედ მათ შესახებ მინდა გკითხოთ, დღეს სად სწავლობენ ან რას საქმიანობენ წარმატებული ოლიმპიელები?

- ოლიმპიადებზე მიღებული ცოდნა-გამოცდილება დიდ ცხოვრებაშიც წარმატების საწინდარი ხდება ხოლმე, რაც განსაკუთრებით მახარებს. ჩვენი ოლიმპიელები დღეს მსოფლიოს წამყვან უნივერსიტეტებში სწავლობენ. ხოლო ვინც დაამთავრა სწავლა, როგორც საქართველოში, ასევე უცხოეთში ისეთ წამყვან კომპანიებში მუშაობენ, როგორიცაა Google, Facebook, Quora, Dropbox, Vmware და სხვ. ზოგიც საკუთარი კომპანიის მფლობელია. იმედია, თუ მომავალში ხელშეწყობა იქნება, საერთაშორისო ინტელექტუალურ ასპარეზზე საქართველო კიდევ არაერთხელ იტყვის თავის სიტყვას.

 

967
სალომე ჭაჭუა

„დავმუნჯდი...“ - სალომე ჭაჭუას ახალმა ვიდეომ სოცქსელების მომხმარებლები შოკში ჩააგდო

0
(განახლებულია 12:36 28.01.2021)
სალომე ჭაჭუას მორიგმა ცეცხლოვანმა ფოტოებმა სოციალური ქსელის მომხმარებლები აღაფრთოვანა. ნახეთ ფოტოები „ინსტაგრამიდან“

მოცეკვავე სალომე ჭაჭუამ სოციალურ ქსელში ახალი ვიდეო განათავსა, სადაც კამერის წინაშე ნახევრად შიშველი პოზირებს. ვიდეომ სალომეს „ფოლოუერებში“ აღფრთოვანება დაიმსახურა.

View this post on Instagram

A post shared by Salome (@salome_chachuaa)

„ვაიმე დედა“, „ეს რა იყო, გავგიჟდი“, „შავი პანტერა ხარ“, „დავმუნჯდი“, „ცეცხლი, ბომბა, მიწისძვრა, ცუნამი და საოცარი ქალი ხარ“, „ზესექსუალური“, - წერენ სალომეს გამომწერები კომენტარებს.

View this post on Instagram

A post shared by Salome (@salome_chachuaa)

ცნობილი ქართველი ქორეოგრაფი და პროექტ „ცეკვავენ ვარსკვლავების“ ერთ-ერთი თვალშისაცემი მოცეკვავე სალომე ჭაჭუა სკანდალებითაც გამოირჩევა. ცნობილ ტელესახეს ერთი ურთიერთობა არ ჰქონდა დასრულებული, როდესაც ჭორები გავრცელდა მისი და გიორგი ვარდოსანიძის სიყვარულზე. ეს ჭორები მათმა ქორწილმა ჩაანაცვლა, მოგვიანებით კი მორიგი ჭორები უკვე წყვილის დაშორებას მოჰყვა.

View this post on Instagram

A post shared by Salome (@salome_chachuaa)

მოგეხსენებათ, მანამდე სალომე სამეჯლისო ცეკვების სტუდია „თელას“ წამყვან მოცეკვავეზე გიგი გაჩეჩილაძეზე იყო შეყვარებული. მათი გზები „ცეკვავენ ვარსკვლავების“ დაწყებისას გაიყო. მსახიობ გიორგი ვარდოსანიძესთან დაშორების მერე ქორეოგრაფი პირად ცხოვრებაზე აღარ საუბრობს. ამიტომ უცნობია, თავისუფალია თუ არა ამჟამად მოცეკვავის გული.

0
თემები:
სელებრითების ცხოვრება