მარიამ კიბაბიძე

„ეს ყველაფერი წარმატებად ღირს“– დაფნის გვირგვინი, რომელსაც ქართველი გოგო იტალიაში დაიდგამს

656
(განახლებულია 16:32 06.11.2020)
რუბრიკაში „ქართველები უცხოეთში“ დღეს იტალიაში მცხოვრებ წარმატებულ სტუდენტს მარიამ კიბაბიძეს გაგაცნობთ.

მარიამი ახალი თაობის ქართველების იმ კატეგორიიდანაა, რომელიც უცხო ქვეყანაში სწავლის სირთულეს არ უშინდება, საკუთარი თავისგან მაქსიმალურს ითხოვს და აღწევს კიდეც.

საერთაშორისო ურთიერთობები ბავშვობიდან იზიდავს. იტალიის ქალაქ პიზის პრესტიჟული უნივერსიტეტის წარჩინებით დამთავრების შემდეგ, სექტემბერში ის ფლორენციის უნივერსიტეტის Universita degli studi di Firenze-ის საერთაშორისო ურთიერთობათა ფაკულტეტის ინგლისურენოვანი მაგისტრატურის მაგისტრანტი გახდა.

უნივერსიტეტის პარალელურად მის გეგმაში საერთაშორისო პროექტებში მონაწილეობა შედის, რათა დაგროვილი ცოდნა და გამოცდილება კარიერულ წინსვლაში დაეხმაროს.

როგორია წარმატებული ქართველის ცხოვრება იტალიაში, ამის თაობაზე თავად მოგვითხრობს.

მარიამ კიბაბიძე
მარიამ კიბაბიძე

- მარიამ, საუბარი დავიწყოთ იმით, თუ რას მიაღწიეთ საქართველოში და იტალია თუ შედიოდა თქვენს გეგმებში?

- საქართველოში რუსთავის N2 საჯარო სკოლა დავამთავრე. ვინაიდან იტალიაში სასწავლებლად წასვლა უკვე გადაწყვეტილი მქონდა, სკოლის ბოლო წელი მომზადებას დავუთმე. ვცდილობდი მაქსიმალურად შემესწავლა იტალიური ენა, მომეპოვებინა ინფორმაცია ლიდერ უნივერსიტეტებზე ჩემს სფეროში, სწავლის სტილსა და გამოცდებზე.

ჩემი პირველი მიზანი იყო ბაკალავრიატის წარმატებით დასრულება, რასაც თავდაუზოგავი შრომის შედეგად მივაღწიე.

მარიამ კიბაბიძე
მარიამ კიბაბიძე

- ოთხი წლის წინ თქვენ ჩააბარეთ პოლიტიკური მეცნიერებების ფაკულტეტზე საერთაშორისო ურთიერთობების განხრით, რატომ აირჩიეთ ეს პროფესია და კონკრეტულად ეს უნივერსიტეტი?

- დიპლომატიის სფერო და საერთაშორისო ურთიერთობები ბავშვობიდან განსაკუთრებულად მიზიდავდა და ფაკულტეტიც აქედან გამომდინარე სკოლის ადრეულ ასაკშივე მქონდა არჩეული. რაც შეეხება უნივერსიტეტს, არც ეს გადაწყვეტილება აღმოჩნდა რთული. პიზის უნივერსიტეტი ერთ-ერთი ყველაზე ძველი და პრესტიჟულია ევროპაში. ჩემთვის უდიდესი პატივი იყო მესწავლა იმ უნივერსიტეტის კედლებში, რომელშიც წლების წინ ჯოზუე კარდუჩი, გალილეო გალილეი და სხვა გამოჩენილი ადამიანები სწავლობდნენ.

მარიამ კიბაბიძე
მარიამ კიბაბიძე

- რითია პიზის უნივერსიტეტში სწავლა გამორჩეული და როგორია სტუდენტებსა და ლექტორებს შორის დამოკიდებულება?

- ერთ-ერთი პირველი, რამაც იტალიაში მომხიბლა, სწორედ სტუდენტებსა და ლექტორებს შორის დამოკიდებულებაა. ლექტორები მაქსიმალურად არიან ორიენტირებული იმაზე, რომ აქტიურად ჩაგვრთონ ლექციის მიმდინარეობის პროცესში. თითოეულ ჩვენგანს შეუძლია თავისუფლად გამოხატოს საკუთარი აზრი და კრიტიკა, ხშირად გვიწევს დებატები, რაც ლექციას ბევრად უფრო საინტერესოს ხდის. სემესტრის ბოლოს საშუალება გვეძლევა შევაფასოთ თითოეული საგანი, გამოყენებული მასალა, ლექტორის დამოკიდებულება, გამოცდის ფორმატი და, რაც ყველაზე მთავარია, შეგვიძლია მივაწოდოთ იდეა, თუ როგორ შეიძლება შეიცვალოს ის უკეთესობისკენ. ყოველივე ეს, ჩემი აზრით, ძალიან დადებითად აისახება სწავლის სისტემაზე და მის სისტემატიურ განვითარებაზე.

მარიამ კიბაბიძე
მარიამ კიბაბიძე

- ამ ეტაპზეც, რამდენად ვიცი, წარმატებას მიაღწიეთ...

- დიახ, უნივერსიტეტი ამ წლის ზაფხულში წარმატებით დავასრულე. ამ თვის დასასრულს მერგება პატივი, რომ იტალიური ტრადიციის მიხედვით დაფნის გვირგვინი დავიდგა. ძალიან ბედნიერი ვარ, რადგან უამრავი სირთულის მიუხედავად შევძელი, რომ ჩემი მიზანი შემესრულებინა. ყველაზე დიდი სირთულე თავიდან ენის ბარიერი იყო, შემდეგ კი ადაპტირება გახდა. უნივერსიტეტში სამეცადინოდ ზღვა მასალას გვაძლევენ. რთულია შენი ცხოვრების რეჟიმი სრულიად შეცვალო. ბევრი ღამის გათენება მომიხდა, რომ ყველაფერი მომესწრო, მაგრამ ეს ყველაფერი წარმატებად ნამდვილად ღირს.

მარიამ კიბაბიძე
მარიამ კიბაბიძე

- სექტემბრიდან თქვენ ფლორენციის უნივერსიტეტის საერთაშორისო ურთიერთობების ფაკულტეტის მაგისტრანტი გახდით...

- დიახ, სექტემბრიდან ფლორენციაში საერთაშორისო ურთიერთობების ფაკულტეტზე ჩავაბარე მაგისტრატურაში. ჯერ სულ რაღაც ორი თვეა, რაც აქ სწავლა დავიწყე და შეფასება ცოტა მიჭირს, მაგრამ მაინც ვფიქრობ, რომ პიზის უნივერსიტეტში ბაკალავრი მეტად რთული იყო, რადგან ეს მოხდა უცხო ენაზე და სრულიად უცხო გარემოში. ქართული და იტალიური განათლების სისტემა ერთმანეთისგან ძალიან განსხვავდება, ამიტომ თავდაპირველად ადაპტირება არცთუ ისე მარტივია. რაც შეეხება მაგისტრატურას, რა თქმა უნდა, ბევრად უფრო საინტერესოა. ამჯერად მხოლოდ ჩემ სფეროსთან მჭიდროდ დაკავშირებული საგნების სწავლა მიწევს. ყველაფერი ჩემგან დიდ ენერგიასა და შრომას მოითხოვს, მაგრამ სწავლის პროცესი ჩემთვის ძალიან სასიამოვნოა.

მარიამ კიბაბიძე
მარიამ კიბაბიძე

- კითხვა პროფესიიდან გამომდინარე: დღეს ძალიან დაძაბული საერთაშორისო ფონია, რას ფიქრობთ ამ თვალსაზრისით, საერთაშორისო ურთიერთობებში რამდენად აქტიურად უნდა ჩავრთოთ სახალხო დიპლომატია?

- ამ თემასთან დაკავშირებით შეგვიძლია უსასრულოდ ვისაუბროთ, ძალიან ფართო და საინტერესო საკითხია. სახალხო დიპლომატიას ერთ-ერთი ყველაზე მნიშვნელოვანი როლი უჭირავს საერთაშორისო კონფლიქტების მშვიდობიანად მოგვარებაში, რადგან ქვეყნების უპირველესი მიზანი კონფლიქტების არაძალადობრივი გადაწყვეტაა.

სახალხო დიპლომატია ხელს უწყობს ინფორმაციის გაცვლას დაპირისპირებულ მხარეებს შორის და მას შეუძლია აიძულოს ხელისუფლება, რომ კონფლიქტის გადაჭრის რეალური და ეფექტიანი გზები ეძებოს. სახალხო დიპლომატიის წარმატებისთვის აუცილებელია ახალგაზრდების ჩართულობა, რაზეც სახელმწიფომ უდიდესი ყურადღება უნდა გაამახვილოს.

მაგდა გოშნიაშვილი
მაგდა გოშნიაშვილის ქალიშვილი მარიამ კიბაბიძე

- ამჯერად ინგლისურ ენაზე ეუფლებით პროფესიას...

- დიახ, მაგისტრატურაზე სწავლა ინგლისურად გადავწყვიტე. მიუხედავად იმისა, რომ მას საკმაოდ კარგად ვფლობ, მსურს გავაუმჯობესო და ჩემს სფეროსთან დაკავშირებული სპეციფიკური ტერმინები უკეთ შევისწავლო. გარდა ამისა, შემდეგ წელს საშუალება მომეცემა ევროპის რომელიმე, ჩემ მიერ შერჩეულ ქვეყანაში საერთაშორისო ორგანიზაციაში გავიარო პრაქტიკა ინგლისურ ენაზე და უნივერსიტეტის წარმატებით დასრულებისას ორენოვანი, ინგლისურ-იტალიური დიპლომი გადმომეცემა.

- რამდენ ენაზე საუბრობთ?

- ამჟამად ვფლობ რუსულ, ინგლისურ და იტალიურ ენებს. ვსწავლობ ფრანგულს და სამომავლოდ ვაპირებ კიდევ სხვა უცხო ენების შესწავლას, ვინაიდან ენები ძალიან მიზიდავს და ვფიქრობ, რომ ჩემს სფეროში უცხო ენების ცოდნის გარეშე წარმატების მიღწევა შეუძლებელია.

- რითია თქვენთვის საინტერესო იტალიელებთან ურთიერთობა?

- ძალიან მიყვარს იტალია, იტალიელი ხალხი, კულტურა და ზოგადად ყველაფერი, რაც ამ ქვეყანასთან მაკავშირებს. სიმართლე გითხრათ, დიდ განსხვავებას ვერ ვპოულობ ჩვენსა და იტალიელებს შორის. ჩვენსავით მეგობრული, თბილი და სტუმართმოყვარენი არიან. უყვართ ხალხთან ურთერთობა, საუბრის დროს ხშირად იყენებენ ჟესტიკულაციას და განსაკუთრებული ემოციურობით გამოირჩევიან.

- ემოციაზე გამახსენდა, რომელია ფრაზა, რომელსაც ყველაზე ხშირად იყენებენ იტალიელები ჩვეულებრივ საუბარში?

- რაც შეეხება ანდაზებს და ბრძნულ გამონათქვამებს, ისინი ძალიან აქტუალურია, მათ შორის ახალგაზრდებშიც და აქაც ქართულთან ბევრ მსგავსებას ვხვდებით. მაგალითად, საერთაშორისო ფრაზა “ჯობს გვიან, ვიდრე არასდროს” - ალბათ ყველა ჩვენგანს ერთხელ მაინც გვითქვამს. აქ, იტალიაში ასე გამოითქმის Meglio tardi che mai და მას ძალიან ხშირად გაიგონებთ. წამით სამშობლოშიც კი იგრძნობთ თავს ასეთი ნაცნობი ფრაზის გაგონებისას...

- სამშობლო ახსენეთ, რა გენატრებათ, როგორია ქართველი სტუდენტის ნოსტალგია სამშობლოზე?

- პირველ რიგში, მენატრებიან ოჯახის წევრები, ბებია, რომელთან ერთადაც გავიზარდე, და, დისშვილი, რომელიც ჩვენი ოჯახის ახალი წევრია და რომელსაც, სამწუხაროდ, ჯერ მხოლოდ ვიდეოების საშუალებით ვიცნობ, რადგან პანდემიის გამო საქართველოში ჩამოსვლა ვერ მოვახერხე. შემდეგ, რა თქმა უნდა, მეგობრები და ასევე ქართული ტრადიციული კერძები. მიუხედავად იმისა, რომ აქაც ვახერხებ მათ მომზადებას, საქართველოში გაკეთებულს სულ სხვა, მშობლიური გემო აქვს...

 

656
თემები:
ქართველები უცხოეთში (88)
მეუღლესთან ერთად სინგაპურში

„ყველაფერი ძველ, ჩვეულ რიტმს დაუბრუნდა“ რას გვიყვება ჩინეთში მცხოვრები ქართველი

180
(განახლებულია 21:12 24.11.2020)
თავიდან მკითხველს შევახსენებ, რომ ამ წლის 27 იანვარს, როცა ჩინეთის ქალაქ შენჟენში მცხოვრები ქართველი თამარ კაჭკაჭიშვილი ჩავწერე, COVID-19-ის შესახებ მსოფლიოში ბევრმა არაფერი იცოდა...

იმ მასალის სათაურში მაშინ თამარის სიტყვები ავიტანე: „ჩინეთი ამ პატარა ვირუსს თავს არ დააჩაგვრინებს“. მას შემდეგ თითქმის მთელი წელი გავიდა და მსოფლიოში ბოლომდე ჯერაც ვერ გამოუკვლევიათ ამ ვერაგი ვირუსის წარმოშობა და ხასიათი. ამდენად, COVID-19 კაცობრიობის თავზე ისევ დამოკლეს მახვილად რჩება.

თუმცა იმავე ჩინეთში ამ მხრივ, სხვა ქვეყნებთან შედარებით, ყველაზე დამაიმედებელი სიტუაციაა. ჩვენს კომპეტენციაში არ შედის ამ თემის სამედიცინო ჭრილში გარკვევა, უბრალოდ, გადავწყვიტეთ ისევ თამარს დავუკავშირდეთ და ჩინეთში ახლა არსებული სიტუაციის შესახებ ისევ უშუალოდ მისგან გავიგოთ...

თამარ კაჭკაჭიშვილი
თამარ კაჭკაჭიშვილი

- თამარ, როგორც ჩანს, შენი სიტყვები გამართლდა: „ჩინეთი ამ პატარა ვირუსს თავს არ დააჩაგვრინებსო“...

- დიახ, მართლაც ასეა და ნეტავ საქართველოსაც მალე ეშველოს.

- მართლა მაინტერესებს, ჩინელებმა რის ხარჯზე მიაღწიეს ასეთ შედეგს, იქნებ ჩვენც გავითვალისწინოთ?

- დიახ, გეტყვით. ჩინელები ბუნებით წესრიგის მოყვარული და კანონმორჩილი ხალხია და ამის ხარჯზე დაავადებასთან ბრძოლაში წარმატების მიღწევა გაუადვილდათ. ისინი საპროტესტოდ ქუჩაში კი არ გამოდიან ხოლმე, ყველა საჭირო შეზღუდვას ემორჩილებიან. თავის მხრივ, მთავრობაც ყველა კეისს ბოლომდე მიჰყვება და ასე ერთად აღწევენ დადებით შედეგს.

თამარ კაჭკაჭიშვილი
თამარ კაჭკაჭიშვილი

- რამდენადაც ვიცი, ვაქცინა ჯერ არ არის გამოგონილი და ვინც დაავადებული იყო, რით მკურნალობდნენ?

- არაფერი განსაკუთრებული აქ არ ხდება, სიმპტომური მკურნალობა ისევეა, როგორც საქართველოში.

- ანუ ამ შემთხვევაში სავალალო შედეგი ჩვენ უპასუხისმგებლობაში უნდა ვეძიოთ?

- ქართველები ძნელად დასამორჩილებელი ხალხი ვართ. ზოგადად, გვინდა–არ გვინდა, ჩვენი მეამბოხე ბუნებიდან გამომდინარე, ყველაფერს ვაპროტესტებთ, რაც ქვეყნის განვითარებას აფერხებს. ამ კერძო შემთხვევაშიც ჩვენი დაუმორჩილებლობა ვირუსის გავრცელებას უწყობს ხელს.

მეუღლესთან ერთად
მეუღლესთან ერთად

- ჩინეთში შეზღუდვები უკვე მოიხსნა?

- კი, მოიხსნა, მაგრამ ყველა ახალ შემთხვევას ძალიან აკონტროლებენ და ძირამდე მიჰყვებიან. თქვენ წარმოიდგინეთ, რამდენიმე შემთხვევის გამო მილიონიან ქალაქებს კეტავენ.

- ანუ პირბადის ტარება აღარ არის სავალდებულო?

- არა, პირბადეც აღარ არის სავალდებულო, ჯერჯერობით ყველაფერი ძველ, ჩვეულ რიტმს დაუბრუნდა. მომავალში ვნახოთ რა იქნება.

მეუღლესთან ერთად
მეუღლესთან ერთად

- ანუ ამ ეტაპზე ფაქტობრივად აღარ არის დავირუსების შემთხვევა?

- ალბათ სადღაც არის, ოღონდ ერთეული შემთხვევები. რამდენადაც ვიცი, მგონი, შანხაიში იყო რამდენიმე ფაქტი, მაგრამ ისეთი არაფერი, რომ აფიშირებად ღირდეს.

- რამდენად მართალია, რომ ჩინეთში ტურისტული სეზონი გაიხსნა?

- არა, ტურისტული სეზონი არ გახსნილა, პირიქით, ქვეყანაში შემოსვლაზე შეზღუდვებია დაწესებული. მარტო საოჯახო ვიზა მოქმედებს და დიდ კომპანიებში ვინც არიან დასაქმებული, რიგი ქვეყნებიდან მხოლოდ მათ შეუძლიათ აქ სამუშაოდ შემოსვლა.

ოჯახთან ერთად
ოჯახთან ერთად

- ანუ საზღვრები არ გაუხსნიათ...

- არა, რეგულარული რეისები არ ხორციელდება, საზღვრები დაკეტილია. ბოლოს მინდა საქართველოს ვუსურვო, რომ მალე დააღწიოს თავი ვირუსს, რასაც, ვიმეორებ, ისევ რეგულაციების მკაცრად დაცვით თუ მიაღწევს. ღმერთი თქვენკენ!..

 

180
ქეთევან გარაყანიძე

კლასგარეშე საკითხავი მასწავლებლებისთვის: „როცა წლის მოგზაურობა დასრულდება“…

626
(განახლებულია 10:36 21.11.2020)
უკვე 19 წელია, რაც ყოველი გაკვეთილისთვის ისე ემზადება, როგორც ლიტერატურული სპექტაკლისთვის, ამიტომაც იქ ყოველთვის „ანშლაგია“...

საუბარია ბათუმის N3 საჯარო სკოლის წამყვან მასწავლებელზე - ქეთევან გარაყანიძეზე. ფილოლოგიის მეცნიერებათა დოქტორი, საბავშვო მწერალი და ბლოგერი ბავშვებს ქართულ ენა-ლიტერატურას განსაკუთრებული სიყვარულით ასწავლის. საშუალო განათლება ოზურგეთის რაიონის სოფელ ბახვის გაბრიელ ეპისკოპოსის სკოლაში მიიღო, შემდეგ ბათუმის შოთა რუსთაველის უნივერსიტეტი დაამთავრა.

„თქვენ შეგიძლიათ დაინახოთ არა ფიგურები, არამედ მკრთალი ხაზები, არა ფერები, არამედ-შავი და თეთრი მთელი თავისი ფილოსოფიით. თქვენ უნდა მოისმინოთ არა ის, რაც გესმით, არამედ ის, რაზეც არავინ საუბრობს!”- ასე მიმართავს ქეთი მასწავლებელი თავის მოსწავლეებს, რომლებმაც უკვე კარგად იციან, რომ ყველაზე მაგარი ქვეყანა სამოგზაუროდ ლიტერატურაა, თავისუფალი აზროვნება და განათლება კი უტყუარი კომპასი, რომ არასოდეს დაიკარგო...

ქეთევან გარაყანიძე
ქეთევან გარაყანიძე

- ქალბატონო ქეთევან, ამბობენ, ცუდია ის მასწავლებელი, რომელსაც თავისი ბავშვობა არ ახსოვსო...

- მე, როგორც ყველა, საკუთარი ბავშვობიდან მოვდივარ, მაგრამ სხვათაგან განსხვავებით მჭირდება, რომ ნათლად მახოვდეს წარსული, რათა პროფესიული შეცდომები არ დავუშვა. ბავშვობისდროინდელი ყველა ისტორია განსაკუთრებულია და ჩემთვის, როგორც საბავშვო მოთხრობების ავტორისთვის, მათ ემოციური დატვირთვა აქვს.

წიგნის კითხვა ბუნებაში
წიგნის კითხვა ბუნებაში

- როგორი იყო თქვენი სამყარო და რომელმა მასწავლებელმა დაგამახსოვრათ თავი?

- ბავშვობაში მთელი სამყარო ჩემი მასწავლებელი იყო, მერე სოფელი, სადაც გავიზარდე; ოჯახი, სადაც ბევრზე ბევრი წიგნი იყო და მუდამ მქონდა დიდი არჩევანი; მეზობლები, რომელთა შესახებაც მოთხრობებში ვყვები. რაც შეეხება, გამორჩეულ მასწავლებელს, ალბათ არავის გავანაწყენებ, თუ ამ ნომინაციაში ლიტერატურის მასწავლებლებს დავასახელებ: სკოლის პერიოდიდან ქალბატონ მზია ვაშალომიძეს, უნივერსიტეტიდან კი პროფესორებს: რამაზ ხალვაშს და თინა შიოშვილს. ყოველთვის ვიცოდი, რომ სხვა საქმეს ასეთი ენთუზიაზმით ვერასოდეს გავაკეთებდი. მგონია, რომ მასწავლებლად დავიბადე. ბავშვობაში მასწავლებლობანას გატაცებით ვთამაშობდი, არ მეზარებოდა ტექსტების ერთი ფურცლიდან მეორეზე გაუთავებლად გადაწერა. ეს ჩემი დიდი გამოცდილებაა, ტექსტებს ახლაც უდიდესი მოთმინებითა და გულმოდგინებით ვეძებ და ვარჩევ.

მოსწავლეებთან ერთად
მოსწავლეებთან ერთად

- ვიცი, რომ ხშირად ამოგზაურებთ მოსწავლეებს საოცარ „ქვეყანაში“, სახელად ლიტერატურა...

- ბავშვებთან მიმართვაში ახალი სასწავლო წლის დაწყების დღეს, სწორედ ეს ვახსენე... ჩვენ გვაქვს უფლება, ვთქვათ, რომ ბევრი საინტერესო რამ მოვიხილეთ ლიტერატურის წყალობით. ერთად ვიმოგზაურეთ აღმოსავლეთში თუ დასავლეთში, ჩრდილოეთში თუ სამხრეთში. გავიცანით ადამიანები ოცნებებით, იმედებითა და  პრობლემებით, სიხარულიანი და მწუხარებით სავსე დღეებით, მაგრამ მთავარი ის იყო, რომ ბავშვები მეუბნებოდნენ: მადლობა, მასწავლებელო, ეს რომ წაგვაკითხეთ! ჩვენ ახლაც მოვივლით აღმოსავლეთსა თუ დასავლეთს, ჩრდილოეთსა თუ სამხრეთს, მაგრამ როცა წლის მოგზაურობა დასრულდება, პერსონაჟების კი არა, ერთმანეთის დანახვა უნდა შევძლოთ...

მოსწავლეებთან ერთად
მოსწავლეებთან ერთად

- ბავშვებს თავისუფალ აზროვნებას აჩვევთ და საამისოდ „თავისუფალ გაკვეთილებს“ ატარებთ, თემებს როგორ არჩევთ?

- თავისუფალი გაკვეთილი პარასკევობით ტარდება წინასწარ განსაზღვრულ ნებისმიერ თემაზე. შეიძლება თქვას, რომ ბავშვებს მომავალი პროფესიის პოვნაში ვეხმარები. ასეთ გაკვეთილზე ხდება  მაგალითად, უცხო ტექსტების გააზრება ცნობილი ადამიანების პირადი წერილების კვალდაკვალ. გავეცანით: აბრაამ ლინკოლნის წერილს, რომელიც მან შვილის მასწავლებელს მიწერა, ჩარლი ჩაპლინის ქალიშვილის, ჯერალდინასადმი მიწერილ ბარათს და სხვ.. შემდეგ მათგან გამომდინარე, სხვადასხვა თემებზე ვსაუბრობთ. როცა ბავშვები გაეცნენ ფრანც კაფკას წერილს, რომელიც მან თავის საცოლეს, ფელიჩე ბაურს მიწერა, ვისაუბრეთ იმაზეც, თუ რა არის საჭირო ადამიანური ურთიერთობების გადასარჩენად. სხვათა შორის, ერთხელ ბავშვები ჟურნალისტებიც იყვნენ. როცა კარანტინი დაიწყო, გვქონდა ასეთი თემა: „რეპორტაჟი ფანჯრიდან“ საკმაოდ საინტერესო გამოვიდა. აქ გამოჩნდა დღევანდელი დღისადმი და ახლანდელი, უცნაური სამყაროს მიმართ მათი დამოკიდებულება. სხვადასხვა თემაზე შექმნილი ბავშვების ნახატები და ნაწერები წასაშლელად მენანება, ამიტომ ყველას ვინახავ. სოციალურ ქსელებში მათი ყველა წერილი, ნახატი თუ საინტერესო თემა გამოფენილი მაქვს, ბავშვები ასეთ ყურადღებას ძალიან აფასებენ...

სასკოლო თეატრის სცენაზე
სასკოლო თეატრის სცენაზე

- ვიცი, რომ გაკვეთილზე სხვადასხვა სახის სახალისო აქტივობებს ახორციელებთ...

- ბავშვებს რაც ახალისებს, ყველაფერი შემომაქვს ლიტერატურაში, კულინარიაც კი. გავიხსენებდი ასეთ აქტივობებს: მაგალითად, მეხუთე კლასელებისთვის -„გახდი მეთოჯინე და შექმენი საყვარელი ლიტერატურული პერსონაჟისგან სათამაშო”, ან „მე სამშობლოსთვის“, სადაც მოსწავლეებმა წერილები დაწერეს მომავლის ყუთისთვის და სხვა... სკოლაში თეატრალური დასი ჩამოვაყალიბე. შაბათობით ვმუშაობთ, რეპეტიციებს გავდივართ და ისინი ძალიან ბედნიერები არიან...

გაკვეთილზე
გაკვეთილზე

- როგორც ჩანს, თქვენი გაკვეთილები მართლა გამორჩეულია, არსებულ სასკოლო სისტემასა და პროგრამაში რას შეცვლიდით?

- ყველაფერს! ვამტკიცებ, დაუსრულებელი კამათი თემაზე, რომ ბავშვებს კითხვა არ აინტერესებთ, არასწორია. კარგი ლიტერატურა და მკაფიო მითითებები, მასწავლებელი, რომელსაც თავად უყვარს ლიტერატურა და არის ლიტერატურული პროცესის მონაწილე - აი, ეს სამი რამ ცვლის ბავშვების დამოკიდებულებას კითხვისა და განათლების პროცესის მიმართ.

- თავად ხართ ლიტერატურული პროცესის მონაწილე - წერთ საბავშვო მოთხრობებს და ლექსებს და თარგმნით კიდეც...

- ვერ ვიტყვი, რომ მთარგმნელი ვარ. უბრალოდ, ჩემი მეგობარი, ელეონორა ბარამიძე ცდილობს მაქციოს მთარგმნელად. ის მიგზავნის რუსული პოეზიის ნიმუშებს და მეც საკარანტინო მოცალეობისას სიხარულით ვასრულებ ამ „დავალებებს“. ნათარგმნი მაქვს თითო ან ორ ორი ლექსი ისეთი დიდი პოეტებისა, როგორებიც არიან: ევგენი ევტუშენკო, ბელა ახმადულინა, ანა ახმატოვა, ქრისტინა როსეტი... როგორ გამომდის, მკითხველმა განსაჯოს...

მოსწავლეებთან ერთად
მოსწავლეებთან ერთად

- განსჯისთვის რაიმე ნიმუშს ხომ ვერ შემოგვთავაზებთ?

- ცნობილი რეჟისორის, ელდარ რიაზანოვის ლექსის „У природы нет плохой погоды“ ჩემეული თარგმანს გაგაცნობთ:

ბუნებას არ სურს შენი დარდის წვიმებად ქცევა,

ყველა ამინდი მზიანიც და სეტყვა-ცვრიანიც

უფლის მადლია, სასიკეთო და საიმედო!

დაე, მიიღე ეს შემოდგომა,

როგორც წელი კიდევ ერთი შენი ცხოვრების,

არ გაქვს მიზეზი წყენისა და მოთქმა-გოდების.

კოლეგებთან ერთად
კოლეგებთან ერთად

- რისთვის შექმენით საკუთარი ბლოგი, რა არის თქვენი ძირითადი სათქმელი?

- თავიდან ბლოგი ბავშვების ნამუშევრების გამოსაქვეყნებლად შევქმენი. ყოველთვის, როცა რაღაც საინტერესოს წერდნენ ან გამოსახავდნენ, მეკითხებოდნენ: გამოვაქვეყნებ თუ არა მათ ჩემს ფეისბუქ-გვერდზე? ჰოდა, რახან ასე უხაროდათ, გადავწყვიტე, ამ საქმეს უფრო სერიოზულად მოვკიდებოდი. მერე ეს ბლოგი მრავალამბიანი გახდა და პირადი შემოქმედებითი ინფორმაციითაც დაიტვირთა.

სასკოლო სპექტაკლის შემდეგ
სასკოლო სპექტაკლის შემდეგ

- რა მოხდა „ერთხელ გაკვეთილზე“?..

- ერთხელ, ერთი სკოლის ერთ-ერთ კლასში მოსწავლეებმა ძალიან მაწყენინეს. თანაც, ისე, რომ გაკვეთილზე ავტირდი კიდეც. მეორე დღეს, როცა იმავე კლასში შევედი, დამხვდა: ყაყაჩოებით სავსე მაგიდა, ფერადი ბუშტებით სავსე იატაკი და საოცარი წერილი, რომელიც შენახული მაქვს, კიდევ, ბევრი ჩახუტება...

მოსწავლეებთან ერთად
მოსწავლეებთან ერთად

- ოდესმე გაგჩენიათ სურვილი, რომ ბავშვებთან ერთად გეთქვათ:„Oh, captain! My captain!“?..

- მე ვფიქრობ, რომ ეგ ფილმი - „მკვდარი პოეტების საზოგადოება“ ჩემზეა... თუმცა, მარტო მე არა, ბავშვებიც ასე ფიქრობენ...

 

 

626
ფემინისტების მარში საქართველოში

როგორია იყო ქალი საქართველოში: სახალხო დამცველმა ქვეყანაში ფემიციდის სტატისტიკა მოიყვანა

0
გენდერული თანასწორობა, გენდერულ ნიადაგზე ჩადენილი დანაშაულები, ქალთა უფლებების დაცვის მექანიზმები - ამ და სხვა საკითხებზე საქართველოს, არგენტინის და სერბეთის უფლებადამცველებმა ერთმანეთს გაეროს შუამდგომლობით გამოცდილება გაუზიარეს.

თბილისი, 23 ნოემბერი – Sputnik. 2020 წლის 9 თვის განმავლობაში (იანვარი-სექტემბერი)  საქართველოში გენდერული ნიშნით 19 ქალის მკვლელობა და 20 ქალის მკვლელობის მცდელობის ფაქტი მოხდა, ეს რიცხვები დასახელდა შემაჯამებელ ონლაინ-პრესკონფერენციაზე, რომელიც გენდერული ძალადობის წინააღმდეგ 16-დღიანი კამპანიის ფარგლებში სახალხო დამცველის ნინო ლომჯარიას მონაწილეობით გაიმართა.

არა ძალადობას – ზუგდიდში ქალთა დღეს ფემიციდის შემთხვევები გააპროტესტეს >>

ფემიციდის ან გენდერულად მოტივირებული მკვლელობების მონიტორინგს საქართველოს სახალხო დამცველის აპარატი 2016 წლიდან, გაეროს ქალთა ორგანიზაციის მხარდაჭერით ახორციელებს. მონიტორინგის მიზანი პრობლემის რეალური მასშტაბის, გამოყენებული დაცვისა თუ პრევენციული ღონისძიებების კუთხით არსებული ხარვეზების შეფასებაა.

კონფერენციის შეჯამებისას საქართველოს სახალხო დამცველმა ნინო ლომჯარიამ აღნიშნა, რომ ფემიციდის შემთხვევების მონაცემების შეგროვების გაუმჯობესების მიუხედავად, თემატურ კვლევებში სისტემური ხარვეზების აღმოსაფხვრელად, საქმეების შესწავლისას კომპლექსური მუშაობაა მნიშვნელოვანი.

„5 წლის განმავლობაში უკვე 5 სპეციალური ანგარიში მოვამზადეთ და არაერთი რეკომენდაცია გავეცით, რომელთა ნაწილი შესრულდა“, - აღნიშნა მისასალმებელ სიტყვაში საქართველოს სახალხო დამცველმა ნინო ლომჯარიამ.

მისი თქმით, სახალხო დამცველის მიერ ფემიციდის შემთხვევების მონიტორინგის შედეგად, კვლავაც იკვეთება მსხვერპლის მიმართ სტერეოტიპული დამოკიდებულების, საქმეთა სათანადო კვალიფიკაციისა და გენდერული ნიშნით მოტივირებული დანაშაულის სახელდების პრობლემები.

გაეროს სპეციალური მომხსენებელმა ქალთა მიმართ ძალადობის საკითხებში დუბრავკა სიმონოვიჩმა ფემიციდთან ბრძოლის საერთაშორისო მექანიზმები და სხვადასხვა ქვეყნის წარმატებული პრაქტიკები მიმოიხილა.

ამას გარდა, კონფერენციაზე სიტყვით გამოვიდნენ გაეროს მუდმივი კოორდინატორი საქართველოში საბინე მაჰლი, შვედეთის ელჩი საქართველოში ულრიკ თიდესტრომი და საქართველოს პრემიერ-მინისტრის მრჩეველი ადამიანის უფლებებისა და გენდერული თანასწორობის საკითხებში ლელა აქიაშვილი. ადგილობრივი და საერთაშორისო პრაქტიკის შესახებ ისაუბრეს ექსპერტებმა საქართველოდან, არგენტინიდან და სერბეთიდან.

გამომსვლელებმა ხაზი გაუსვეს ფემიციდის მონიტორინგის მექანიზმისა და პრევენციული ღონისძიებების განხორციელების მნიშვნელობას.

0
თემები:
ადამიანის უფლებები საქართველოში