ბელა შენგელია მეგობრებთან ერთად

ემიგრანტი ქალის წერილები: ბებოს კუდრაჭები, სამწუხაროდ, მხოლოდ მონიტორიდან მიცნობენ

465
(განახლებულია 20:39 03.11.2020)
ემიგრანტი ქალები – ჩვენი დროის ჩვეულებრივი გმირები, საკუთარ მხრებზე რომ გადაიტანეს ქვეყნის ყველაზე რთული პერიოდი. ასეა დღესაც...

სამშობლოდან შორს მყოფები, უცხოეთში პიროვნულ რეალიზებას მაინც ახერხებენ. როგორც ჩანს, მათ ოპტიმიზმს და სიცოცხლის სიყვარულს ყოფითი პრობლემები ვერაფერს აკლებს. ვინ იცის, იქნებ, ჩვენი გადარჩენის საიდუმლოც ამაშია...

დღეს ბელა შენგელიას ნეაპოლიდან მოწერილ ღია გზავნილს და მისი ცხოვრების ამბავს გაგაცნობთ. ყოფილი მოჭადრაკე მსოფლიო ფან-კლუბის წევრია და ცხოვრებას, მიუხედავად რთული პოზიციისა, არაერთხელ გამოუცხადა შამათი...

ბელა შენგელია
ბელა შენგელია

საკუთარ გზავნილს ასე უწოდა: „ღია წერილი მათ, ვინც არ იცის და ვისაც არ სურს გაიგოს ვინ არის ემიგრანტი“.

დავბადებულვარ 1972 წლის 25 აგვისტოს, ჩხოროწყუს რაიონის სოფელ ხაბუმეში. მიყვარს ჩემი ჩხოროწყუ და ჩხოროწყუელები. ბავშვობა არაჩვეულებრივი მქონდა. გავიზარდე პედაგოგის ოჯახში, მამა იმდენად მკაცრი მასწავლებელი იყო, რომ სკოლაში ახლოს არ ვეკარებოდი, სახლში მოსული კი დიდხანს ვეხუტებოდი... დედა, პროფესიით აგრონომი, ოჯახში სითბოსა და სიყვარულის შემომტანი იყო. დღეს ორივე უსაშველოდ მენატრება და მათ საფლავებს შორიდან ვეფერები… სკოლაში წარჩინებული მოსწავლე ვიყავი. იქიდან მოყოლებული ჭადრაკი დღემდე მიყვარს. როგორც საქართველოში, ისე საზღვარგარეთ ბევრ ოლიმპიადაში მაქვს მონაწილეობა მიღებული. ჩემი სტუდენტობა არცთუ ისე სახარბიელო და დასამახსოვრებელი იყო. 90-იანი წლებში სირთულე ყველგან და ყველაფერში იყო.

ბელა შენგელია
ბელა შენგელია

მყავს მეუღლე, რომელიც 14 წელია მძიმე ავადმყოფია. შემიძლია ვთქვა, რომ მას სიცოცხლე ვაჩუქე, ამიტომ თავაწეული და ამაყი ვარ. დღეს სამი სიცოცხლე მაბარია, სამჯერ გამიღიმა ღმერთმა, რადგან ორი ვაჟკაცისა და ერთი ქალიშვილის დედა ვარ. ბებოს კუდრაჭები, სამწუხაროდ, მხოლოდ მონიტორიდან მიცნობენ, რადგან ემიგრანტი ვარ... ჩემს თაობას ბედნიერი ბავშვობა და მწარე მომავალი გვარგუნა ღმერთმა, სამწუხაროდ, ოჯახის გადასარჩენად და სიტუაციის მოსაგვარებლად სხვა ქვეყანაში წასვლა ვარჩიეთ, თუმცა სხვა გამოსავალი იყო?!.

გარშემო ყველა არაჩვეულებრივ მეგობრად მთვლის და მშვიდობის მტრედს მეძახის. მიყვარს კეთილი რჩევების მიცემა და, რაც მთავარია, მართლა კარგი მეგობარი ვარ. ვიცი, რომ ადამიანში მარტო ცუდი არ უნდა ეძებო, პირველ რიგში კარგია საპოვნელი. იქნებ, ცუდი თვისება მეც მაქვს… ჩემი აზრით, ცოტა ბუზღუნა ვარ, კიდევ მიყვარს ხმამაღალი და ომახიანი შეძახილები, რადგან ბუნებით ბობოქარი ვარ. მაქვს ჩემი სამყარო, სადაც ხანდახან საკუთარ ჭიას ვახარებ და ვწერ ხოლმე.

ბელა შენგელია
ბელა შენგელია

დღეს უცხოეთში ვაგრძელებ ცხოვრებას – ჩემი შვილებისთვის რათა კიდევ ერთხელ დავიწყო თავიდან და განვლო ის გზა, რომელიც, უფლის ნებით, ჩემი გასავლელია... არსად დავიკარგები, ვიცი, ძლიერი ვარ. მიყვარს ჩემი ბობოქარი და საინტერესო ცხოვრება, მიყვარს ჩემი ყველა ისტორია, თავისი შეცდომებით და წარმატებებით, ადამიანებით, რომლებიც ჩემს ცხოვრებაში იყვნენ და არიან – თითოეულმა ხომ წარუშლელი კვალი დატოვა იმ გზაზე, რომელსაც მივუყვები... ვიცი, რომ ემიგრანტები ბევრი ვართ, იმაზე მეტი, ვიდრე ვიყავით. ჩვენ ყველგან ვართ, სადაც ხელი მიგვიწვდებოდა და სადაც გულმა გაგვიწია... ეს ყ ო ფ ნ ა – ა რ ყ ო ფ ნ ი ს ფილოსოფიაა...

ვინ ვართ სამშობლოსთვის? – დაკარგული თაობა, უგზო-უკვლოდ გაბნეული ქართველები, პოტენციური დედები, ცოლები… უჩვენოდ იზრდებიან შვილები, ბერდებიან მეგობრები, იმ ქვეყნად მიდიან მშობლები, ახლობლები… მაგრამ მიუხედავად ყველაფრისა, მე მაინც მჯერა, რომ მოვა დღე და ისევ დავბრუნდებით, ტკივილებს წავშლით და ცხოვრებას ახალი იმედებით და იდეებით გავაგრძელებთ…

 

465
მეუღლესთან ერთად სინგაპურში

„ყველაფერი ძველ, ჩვეულ რიტმს დაუბრუნდა“ რას გვიყვება ჩინეთში მცხოვრები ქართველი

270
(განახლებულია 21:12 24.11.2020)
თავიდან მკითხველს შევახსენებ, რომ ამ წლის 27 იანვარს, როცა ჩინეთის ქალაქ შენჟენში მცხოვრები ქართველი თამარ კაჭკაჭიშვილი ჩავწერე, COVID-19-ის შესახებ მსოფლიოში ბევრმა არაფერი იცოდა...

იმ მასალის სათაურში მაშინ თამარის სიტყვები ავიტანე: „ჩინეთი ამ პატარა ვირუსს თავს არ დააჩაგვრინებს“. მას შემდეგ თითქმის მთელი წელი გავიდა და მსოფლიოში ბოლომდე ჯერაც ვერ გამოუკვლევიათ ამ ვერაგი ვირუსის წარმოშობა და ხასიათი. ამდენად, COVID-19 კაცობრიობის თავზე ისევ დამოკლეს მახვილად რჩება.

თუმცა იმავე ჩინეთში ამ მხრივ, სხვა ქვეყნებთან შედარებით, ყველაზე დამაიმედებელი სიტუაციაა. ჩვენს კომპეტენციაში არ შედის ამ თემის სამედიცინო ჭრილში გარკვევა, უბრალოდ, გადავწყვიტეთ ისევ თამარს დავუკავშირდეთ და ჩინეთში ახლა არსებული სიტუაციის შესახებ ისევ უშუალოდ მისგან გავიგოთ...

თამარ კაჭკაჭიშვილი
თამარ კაჭკაჭიშვილი

- თამარ, როგორც ჩანს, შენი სიტყვები გამართლდა: „ჩინეთი ამ პატარა ვირუსს თავს არ დააჩაგვრინებსო“...

- დიახ, მართლაც ასეა და ნეტავ საქართველოსაც მალე ეშველოს.

- მართლა მაინტერესებს, ჩინელებმა რის ხარჯზე მიაღწიეს ასეთ შედეგს, იქნებ ჩვენც გავითვალისწინოთ?

- დიახ, გეტყვით. ჩინელები ბუნებით წესრიგის მოყვარული და კანონმორჩილი ხალხია და ამის ხარჯზე დაავადებასთან ბრძოლაში წარმატების მიღწევა გაუადვილდათ. ისინი საპროტესტოდ ქუჩაში კი არ გამოდიან ხოლმე, ყველა საჭირო შეზღუდვას ემორჩილებიან. თავის მხრივ, მთავრობაც ყველა კეისს ბოლომდე მიჰყვება და ასე ერთად აღწევენ დადებით შედეგს.

თამარ კაჭკაჭიშვილი
თამარ კაჭკაჭიშვილი

- რამდენადაც ვიცი, ვაქცინა ჯერ არ არის გამოგონილი და ვინც დაავადებული იყო, რით მკურნალობდნენ?

- არაფერი განსაკუთრებული აქ არ ხდება, სიმპტომური მკურნალობა ისევეა, როგორც საქართველოში.

- ანუ ამ შემთხვევაში სავალალო შედეგი ჩვენ უპასუხისმგებლობაში უნდა ვეძიოთ?

- ქართველები ძნელად დასამორჩილებელი ხალხი ვართ. ზოგადად, გვინდა–არ გვინდა, ჩვენი მეამბოხე ბუნებიდან გამომდინარე, ყველაფერს ვაპროტესტებთ, რაც ქვეყნის განვითარებას აფერხებს. ამ კერძო შემთხვევაშიც ჩვენი დაუმორჩილებლობა ვირუსის გავრცელებას უწყობს ხელს.

მეუღლესთან ერთად
მეუღლესთან ერთად

- ჩინეთში შეზღუდვები უკვე მოიხსნა?

- კი, მოიხსნა, მაგრამ ყველა ახალ შემთხვევას ძალიან აკონტროლებენ და ძირამდე მიჰყვებიან. თქვენ წარმოიდგინეთ, რამდენიმე შემთხვევის გამო მილიონიან ქალაქებს კეტავენ.

- ანუ პირბადის ტარება აღარ არის სავალდებულო?

- არა, პირბადეც აღარ არის სავალდებულო, ჯერჯერობით ყველაფერი ძველ, ჩვეულ რიტმს დაუბრუნდა. მომავალში ვნახოთ რა იქნება.

მეუღლესთან ერთად
მეუღლესთან ერთად

- ანუ ამ ეტაპზე ფაქტობრივად აღარ არის დავირუსების შემთხვევა?

- ალბათ სადღაც არის, ოღონდ ერთეული შემთხვევები. რამდენადაც ვიცი, მგონი, შანხაიში იყო რამდენიმე ფაქტი, მაგრამ ისეთი არაფერი, რომ აფიშირებად ღირდეს.

- რამდენად მართალია, რომ ჩინეთში ტურისტული სეზონი გაიხსნა?

- არა, ტურისტული სეზონი არ გახსნილა, პირიქით, ქვეყანაში შემოსვლაზე შეზღუდვებია დაწესებული. მარტო საოჯახო ვიზა მოქმედებს და დიდ კომპანიებში ვინც არიან დასაქმებული, რიგი ქვეყნებიდან მხოლოდ მათ შეუძლიათ აქ სამუშაოდ შემოსვლა.

ოჯახთან ერთად
ოჯახთან ერთად

- ანუ საზღვრები არ გაუხსნიათ...

- არა, რეგულარული რეისები არ ხორციელდება, საზღვრები დაკეტილია. ბოლოს მინდა საქართველოს ვუსურვო, რომ მალე დააღწიოს თავი ვირუსს, რასაც, ვიმეორებ, ისევ რეგულაციების მკაცრად დაცვით თუ მიაღწევს. ღმერთი თქვენკენ!..

 

270
ქეთევან გარაყანიძე

კლასგარეშე საკითხავი მასწავლებლებისთვის: „როცა წლის მოგზაურობა დასრულდება“…

627
(განახლებულია 10:36 21.11.2020)
უკვე 19 წელია, რაც ყოველი გაკვეთილისთვის ისე ემზადება, როგორც ლიტერატურული სპექტაკლისთვის, ამიტომაც იქ ყოველთვის „ანშლაგია“...

საუბარია ბათუმის N3 საჯარო სკოლის წამყვან მასწავლებელზე - ქეთევან გარაყანიძეზე. ფილოლოგიის მეცნიერებათა დოქტორი, საბავშვო მწერალი და ბლოგერი ბავშვებს ქართულ ენა-ლიტერატურას განსაკუთრებული სიყვარულით ასწავლის. საშუალო განათლება ოზურგეთის რაიონის სოფელ ბახვის გაბრიელ ეპისკოპოსის სკოლაში მიიღო, შემდეგ ბათუმის შოთა რუსთაველის უნივერსიტეტი დაამთავრა.

„თქვენ შეგიძლიათ დაინახოთ არა ფიგურები, არამედ მკრთალი ხაზები, არა ფერები, არამედ-შავი და თეთრი მთელი თავისი ფილოსოფიით. თქვენ უნდა მოისმინოთ არა ის, რაც გესმით, არამედ ის, რაზეც არავინ საუბრობს!”- ასე მიმართავს ქეთი მასწავლებელი თავის მოსწავლეებს, რომლებმაც უკვე კარგად იციან, რომ ყველაზე მაგარი ქვეყანა სამოგზაუროდ ლიტერატურაა, თავისუფალი აზროვნება და განათლება კი უტყუარი კომპასი, რომ არასოდეს დაიკარგო...

ქეთევან გარაყანიძე
ქეთევან გარაყანიძე

- ქალბატონო ქეთევან, ამბობენ, ცუდია ის მასწავლებელი, რომელსაც თავისი ბავშვობა არ ახსოვსო...

- მე, როგორც ყველა, საკუთარი ბავშვობიდან მოვდივარ, მაგრამ სხვათაგან განსხვავებით მჭირდება, რომ ნათლად მახოვდეს წარსული, რათა პროფესიული შეცდომები არ დავუშვა. ბავშვობისდროინდელი ყველა ისტორია განსაკუთრებულია და ჩემთვის, როგორც საბავშვო მოთხრობების ავტორისთვის, მათ ემოციური დატვირთვა აქვს.

წიგნის კითხვა ბუნებაში
წიგნის კითხვა ბუნებაში

- როგორი იყო თქვენი სამყარო და რომელმა მასწავლებელმა დაგამახსოვრათ თავი?

- ბავშვობაში მთელი სამყარო ჩემი მასწავლებელი იყო, მერე სოფელი, სადაც გავიზარდე; ოჯახი, სადაც ბევრზე ბევრი წიგნი იყო და მუდამ მქონდა დიდი არჩევანი; მეზობლები, რომელთა შესახებაც მოთხრობებში ვყვები. რაც შეეხება, გამორჩეულ მასწავლებელს, ალბათ არავის გავანაწყენებ, თუ ამ ნომინაციაში ლიტერატურის მასწავლებლებს დავასახელებ: სკოლის პერიოდიდან ქალბატონ მზია ვაშალომიძეს, უნივერსიტეტიდან კი პროფესორებს: რამაზ ხალვაშს და თინა შიოშვილს. ყოველთვის ვიცოდი, რომ სხვა საქმეს ასეთი ენთუზიაზმით ვერასოდეს გავაკეთებდი. მგონია, რომ მასწავლებლად დავიბადე. ბავშვობაში მასწავლებლობანას გატაცებით ვთამაშობდი, არ მეზარებოდა ტექსტების ერთი ფურცლიდან მეორეზე გაუთავებლად გადაწერა. ეს ჩემი დიდი გამოცდილებაა, ტექსტებს ახლაც უდიდესი მოთმინებითა და გულმოდგინებით ვეძებ და ვარჩევ.

მოსწავლეებთან ერთად
მოსწავლეებთან ერთად

- ვიცი, რომ ხშირად ამოგზაურებთ მოსწავლეებს საოცარ „ქვეყანაში“, სახელად ლიტერატურა...

- ბავშვებთან მიმართვაში ახალი სასწავლო წლის დაწყების დღეს, სწორედ ეს ვახსენე... ჩვენ გვაქვს უფლება, ვთქვათ, რომ ბევრი საინტერესო რამ მოვიხილეთ ლიტერატურის წყალობით. ერთად ვიმოგზაურეთ აღმოსავლეთში თუ დასავლეთში, ჩრდილოეთში თუ სამხრეთში. გავიცანით ადამიანები ოცნებებით, იმედებითა და  პრობლემებით, სიხარულიანი და მწუხარებით სავსე დღეებით, მაგრამ მთავარი ის იყო, რომ ბავშვები მეუბნებოდნენ: მადლობა, მასწავლებელო, ეს რომ წაგვაკითხეთ! ჩვენ ახლაც მოვივლით აღმოსავლეთსა თუ დასავლეთს, ჩრდილოეთსა თუ სამხრეთს, მაგრამ როცა წლის მოგზაურობა დასრულდება, პერსონაჟების კი არა, ერთმანეთის დანახვა უნდა შევძლოთ...

მოსწავლეებთან ერთად
მოსწავლეებთან ერთად

- ბავშვებს თავისუფალ აზროვნებას აჩვევთ და საამისოდ „თავისუფალ გაკვეთილებს“ ატარებთ, თემებს როგორ არჩევთ?

- თავისუფალი გაკვეთილი პარასკევობით ტარდება წინასწარ განსაზღვრულ ნებისმიერ თემაზე. შეიძლება თქვას, რომ ბავშვებს მომავალი პროფესიის პოვნაში ვეხმარები. ასეთ გაკვეთილზე ხდება  მაგალითად, უცხო ტექსტების გააზრება ცნობილი ადამიანების პირადი წერილების კვალდაკვალ. გავეცანით: აბრაამ ლინკოლნის წერილს, რომელიც მან შვილის მასწავლებელს მიწერა, ჩარლი ჩაპლინის ქალიშვილის, ჯერალდინასადმი მიწერილ ბარათს და სხვ.. შემდეგ მათგან გამომდინარე, სხვადასხვა თემებზე ვსაუბრობთ. როცა ბავშვები გაეცნენ ფრანც კაფკას წერილს, რომელიც მან თავის საცოლეს, ფელიჩე ბაურს მიწერა, ვისაუბრეთ იმაზეც, თუ რა არის საჭირო ადამიანური ურთიერთობების გადასარჩენად. სხვათა შორის, ერთხელ ბავშვები ჟურნალისტებიც იყვნენ. როცა კარანტინი დაიწყო, გვქონდა ასეთი თემა: „რეპორტაჟი ფანჯრიდან“ საკმაოდ საინტერესო გამოვიდა. აქ გამოჩნდა დღევანდელი დღისადმი და ახლანდელი, უცნაური სამყაროს მიმართ მათი დამოკიდებულება. სხვადასხვა თემაზე შექმნილი ბავშვების ნახატები და ნაწერები წასაშლელად მენანება, ამიტომ ყველას ვინახავ. სოციალურ ქსელებში მათი ყველა წერილი, ნახატი თუ საინტერესო თემა გამოფენილი მაქვს, ბავშვები ასეთ ყურადღებას ძალიან აფასებენ...

სასკოლო თეატრის სცენაზე
სასკოლო თეატრის სცენაზე

- ვიცი, რომ გაკვეთილზე სხვადასხვა სახის სახალისო აქტივობებს ახორციელებთ...

- ბავშვებს რაც ახალისებს, ყველაფერი შემომაქვს ლიტერატურაში, კულინარიაც კი. გავიხსენებდი ასეთ აქტივობებს: მაგალითად, მეხუთე კლასელებისთვის -„გახდი მეთოჯინე და შექმენი საყვარელი ლიტერატურული პერსონაჟისგან სათამაშო”, ან „მე სამშობლოსთვის“, სადაც მოსწავლეებმა წერილები დაწერეს მომავლის ყუთისთვის და სხვა... სკოლაში თეატრალური დასი ჩამოვაყალიბე. შაბათობით ვმუშაობთ, რეპეტიციებს გავდივართ და ისინი ძალიან ბედნიერები არიან...

გაკვეთილზე
გაკვეთილზე

- როგორც ჩანს, თქვენი გაკვეთილები მართლა გამორჩეულია, არსებულ სასკოლო სისტემასა და პროგრამაში რას შეცვლიდით?

- ყველაფერს! ვამტკიცებ, დაუსრულებელი კამათი თემაზე, რომ ბავშვებს კითხვა არ აინტერესებთ, არასწორია. კარგი ლიტერატურა და მკაფიო მითითებები, მასწავლებელი, რომელსაც თავად უყვარს ლიტერატურა და არის ლიტერატურული პროცესის მონაწილე - აი, ეს სამი რამ ცვლის ბავშვების დამოკიდებულებას კითხვისა და განათლების პროცესის მიმართ.

- თავად ხართ ლიტერატურული პროცესის მონაწილე - წერთ საბავშვო მოთხრობებს და ლექსებს და თარგმნით კიდეც...

- ვერ ვიტყვი, რომ მთარგმნელი ვარ. უბრალოდ, ჩემი მეგობარი, ელეონორა ბარამიძე ცდილობს მაქციოს მთარგმნელად. ის მიგზავნის რუსული პოეზიის ნიმუშებს და მეც საკარანტინო მოცალეობისას სიხარულით ვასრულებ ამ „დავალებებს“. ნათარგმნი მაქვს თითო ან ორ ორი ლექსი ისეთი დიდი პოეტებისა, როგორებიც არიან: ევგენი ევტუშენკო, ბელა ახმადულინა, ანა ახმატოვა, ქრისტინა როსეტი... როგორ გამომდის, მკითხველმა განსაჯოს...

მოსწავლეებთან ერთად
მოსწავლეებთან ერთად

- განსჯისთვის რაიმე ნიმუშს ხომ ვერ შემოგვთავაზებთ?

- ცნობილი რეჟისორის, ელდარ რიაზანოვის ლექსის „У природы нет плохой погоды“ ჩემეული თარგმანს გაგაცნობთ:

ბუნებას არ სურს შენი დარდის წვიმებად ქცევა,

ყველა ამინდი მზიანიც და სეტყვა-ცვრიანიც

უფლის მადლია, სასიკეთო და საიმედო!

დაე, მიიღე ეს შემოდგომა,

როგორც წელი კიდევ ერთი შენი ცხოვრების,

არ გაქვს მიზეზი წყენისა და მოთქმა-გოდების.

კოლეგებთან ერთად
კოლეგებთან ერთად

- რისთვის შექმენით საკუთარი ბლოგი, რა არის თქვენი ძირითადი სათქმელი?

- თავიდან ბლოგი ბავშვების ნამუშევრების გამოსაქვეყნებლად შევქმენი. ყოველთვის, როცა რაღაც საინტერესოს წერდნენ ან გამოსახავდნენ, მეკითხებოდნენ: გამოვაქვეყნებ თუ არა მათ ჩემს ფეისბუქ-გვერდზე? ჰოდა, რახან ასე უხაროდათ, გადავწყვიტე, ამ საქმეს უფრო სერიოზულად მოვკიდებოდი. მერე ეს ბლოგი მრავალამბიანი გახდა და პირადი შემოქმედებითი ინფორმაციითაც დაიტვირთა.

სასკოლო სპექტაკლის შემდეგ
სასკოლო სპექტაკლის შემდეგ

- რა მოხდა „ერთხელ გაკვეთილზე“?..

- ერთხელ, ერთი სკოლის ერთ-ერთ კლასში მოსწავლეებმა ძალიან მაწყენინეს. თანაც, ისე, რომ გაკვეთილზე ავტირდი კიდეც. მეორე დღეს, როცა იმავე კლასში შევედი, დამხვდა: ყაყაჩოებით სავსე მაგიდა, ფერადი ბუშტებით სავსე იატაკი და საოცარი წერილი, რომელიც შენახული მაქვს, კიდევ, ბევრი ჩახუტება...

მოსწავლეებთან ერთად
მოსწავლეებთან ერთად

- ოდესმე გაგჩენიათ სურვილი, რომ ბავშვებთან ერთად გეთქვათ:„Oh, captain! My captain!“?..

- მე ვფიქრობ, რომ ეგ ფილმი - „მკვდარი პოეტების საზოგადოება“ ჩემზეა... თუმცა, მარტო მე არა, ბავშვებიც ასე ფიქრობენ...

 

 

627
რუსეთის პრეზიდენტი ვლადიმირ პუტინი და მისი თურქი კოლეგა რეჯეფ თაიიფ ერდოღანი

პუტინმა და ერდოღანმა სატელეფონო საუბრის დროს ყარაბაღში არსებული სიტუაცია განიხილეს

0
რუსეთის ლიდერმა ვლადიმირ პუტინმა ერდოღანს გააცნო ინფორმაცია რუსი სამშვიდობოების საქმიანობის შესახებ, რომლებიც ყარაბაღში ცეცხლის შეწყვეტის რეჟიმის შესრულების მხარდაჭერას ახორციელებენ

თბილისი, 25 ნოემბერი – Sputnik. რუსეთის პრეზიდენტმა ვლადიმირ პუტინმა და მისმა თურქმა კოლეგამ რეჯეფ თაიიფ ერდოღანმა მთიან ყარაბაღში ცეცხლის შეწყვეტის კონტროლის ცენტრი განიხილეს, იუწყება კრემლის პრესსამსახური.

სატელეფონო საუბარი თურქეთის ინიციატივით შედგა.

ორი ქვეყნის ლიდერებმა აღნიშნეს იმ გადაწყვეტილებების სრული და თანმიმდევრული შესრულების აუცილებლობა, რომლებიც „რეგიონში სტაბილურობისა და მშვიდობიანი ცხოვრების უზრუნველსაყოფად არის მიმართული“.

აღინიშნა, რომ პუტინმა ერდოღანს გააცნო ინფორმაცია რუსი სამშვიდობოების საქმიანობის შესახებ, რომლებიც ყარაბაღში ცეცხლის შეწყვეტის რეჟიმის შესრულების მხარდაჭერას ეფექტურად ახორციელებენ.

პრეზიდენტები შეთანხმდნენ, რომ მთიან ყარაბაღში პრიორიტეტულია ისეთი ჰუმანიტარული პრობლემები, როგორებიცაა დევნილების დაბრუნება, რელიგიური და კულტურული ობიექტების შენარჩუნება, ინფრასტრუქტურის აღდგენა.

აზერბაიჯანის, სომხეთისა და რუსეთის ლიდერებმა — ილჰამ ალიევმა, ნიკოლ ფაშინიანმა და ვლადიმირ პუტინმა 9 ნოემბერს ხელი მოაწერეს განცხადებას მთიან ყარაბაღში 10 ნოემბრიდან ცეცხლისა და საომარი მოქმედებების შეწყვეტის შესახებ. შეთანხმების მიხედვით, ამ დროისათვის ყარაბაღში რუსი სამშვიდობოები განლაგდნენ, აზერბაიჯანი და სომხეთი დაკავებულ პოზიციებზე რჩებიან და ამასთან მიმდინარეობს ტყვეთა გაცვლა. ნოემბერ–დეკემბერში სომხეთი აზერბაიჯანს მთიანი ყარაბაღის ტერიტორიების დიდ ნაწილს გადააბარებს.

მთიან ყარაბაღში რუსი ოფიცერი ნაღმზე აფეთქდა >>

ცეცხლის შეწყვეტისა და საომარი მოქმედებების შეწყვეტაზე კონტროლის მიზნით მთიანი ყარაბაღის ზონაში მიმდინარეობს რუსეთის ფედერაციის სამშვიდობო კონტინგენტის განთავსება – შეთანხმებულია 1960 სამხედრო მოსამსახურის, 90 ჯავშანტრანსპორტიორის, 380 ერთეული საავტომობილო და სხვა სპეცტექნიკის შეყვანა.

0
თემები:
ესკალაცია ყარაბაღში 2020