მარიამ ხერხეულიძე

ინგლისში მცხოვრები ქართველი მომღერალი სცენური სახელით Maria Lidze და მისი ქველმოქმედება

1604
(განახლებულია 15:54 09.09.2020)
რუბრიკა „ქართველები უცხოეთში“ ამჯერად ინგლისში მცხოვრებ მომღერალსა და მსახიობს მარიამ ხერხეულიძეს გაგაცნობთ.

თავის დროზე უმაღლესი სასწავლებლის University of West London მუსიკალური ფაკულტეტი დაამთავრა, შემდეგ კი მაგისტრატურა ჯაზის განხრით. დღეს მარიამი 24 წლისაა, უკრავს ვიოლინოზე, აქტიურად წერს სიმღერებს და მონაწილეობას იღებს სხვადასხვა სარეკლამო კლიპებში.

მიუხედავად იმისა, რომ საფრანგეთში, ტულუზაში დაიბადა და ინგლისში გაიზარდა, ბრწყინვალედ საუბრობს და წერს ქართულად. ბავშვობაში მშობლებმა მცდელობა არ დააკლეს, რომ მარიამში ბევრი ქართული თვისება გაეღვივებინათ და ქართული კულტურის სიყვარული ჩაენერგათ. სიმღერა ბავშვობიდან უყვარს, მისი პირველი გამარჯვება დაკავშირებულია მუსიკალურ კონკურსთან „ანა-ბანა”, სადაც ოქროს მედალი დაიმსახურა.

ძალიან უყვარს საქართველო, სადაც თითქმის ყოველ წელს ჩამოდის. საქველმოქმედო კონცერტები უკვე ჩაატარა ბახმაროსა და ბათუმში. წელს დაგეგმილი ჰქონდა, რომ მამასთან ერთად საქართველოში ჩაატარებდა კონცერტს და შემოსავალს მიუსაფარ ბავშვთა სახლში გადარიცხავდა, მაგრამ პანდემიის გამო ჩანაფიქრი ვერ განახორციელა.

მარიამ ხერხეულიძე
მარიამ ხერხეულიძე

- მარიამ, რომელია პირველი ემოციური მოგონება, რაც საქართველოსთან გაკავშირებს?

- პირველი დიდი ემოცია, რაც საქართველოსთან მაკავშირებს, მუსიკალური კონკურსი „ანა-ბანა“ იყო. ამ კონკურსის მონაწილედ სრულიად შემთხვევით ამირჩიეს. მაშინ ლონდონში ჩამოსული იყო გადამღები ჯგუფი, რომელიც უცხოეთში მცხოვრებ ქართველ მომღერალ ბავშვებს ეძებდა. ისინი მოვიდნენ ქართულ სკოლაში, სადაც მე ვსწავლობდი და საკონკურსოდ შემარჩიეს. ჩემი მშობლების დიდი შრომის და ნებისყოფის შედეგია ის, რომ მე ვარ ის, ვინც ვარ, პიროვნება და მოქალაქე და ჩემი ნიჭის გამოვლენის მრავალმხრივი საშუალება მაქვს.

მამასთან ერთად
მამასთან ერთად

- ჯაზის სიყვარული რომელი მომღერლის მოსმენის შემდეგ გაგიჩნდა?  

- ბავშვობიდან მოვიხიბლე ჯაზის დედოფალ ელა ფიცჯერალდით, მისი პიროვნებით, რთული და მტკივნეული ბიოგრაფიით, მისი ნიჭით და ხმის ტემბრით. ჯაზი ჩემთვის ყველაფერია – შინაგანი განწყობა, პოეზია და წონასწორობა. როცა ჯაზს ვმღერი, თავისუფალი და ბედნიერი ვარ. რამდენად გამომდის ამ ემოციის გადმოცემა, ალბათ მსმენელის გადასაწყვეტია. პანდემიამდე ინგლისის ჯაზ-კლუბებში ვმღეროდი. იმედი მაქვს, რომ მუსიკალური ცხოვრება მალე აღდგება. ჩემი მსმენელები სხვადასხვა კატეგორიის ადამიანები არიან, ვისაც შეუძლია ჩემი ნამღერი აკადემიურად აღიქვას და ამისგან სიამოვნება მიიღოს.

- ინგლისში სცენური სახელით Maria Lidze გიცნობენ...

- ეს სასცენო სახელი ერთმა სასაცილო შემთხვევამ გადამაწყვეტინა: ერთ-ერთ კონცერტზე ჩემი გვარი რამდენჯერაც გამოაცხადეს, იმდენჯერ შეცდომით და წამყვანმა კინაღამ ენა მოიტეხა, ამიტომ მარტივად გადავწყვიტე და ასე დავირქვი.

მარიამ ხერხეულიძე
მარიამ ხერხეულიძე

- თქვენი ქართული წარმომავლობის შესახებ თუ იციან?

- დიახ, იქ ბევრმა იცის ჩემი ქართული წარმომავლობა, ვფიქრობ, ბევრი თვისება მაქვს ქართული. მინდა, რომ ბრიტანეთში ჩვენი ქვეყნის შესახებ ბევრმა გაიგოს. სულ ვცდილობ ყველგან, სადაც გამოვალ და აღმოვჩნდები, ჩემს ქვეყანაზე ვილაპარაკო და ქართველებზე და საქართველოზე კარგი შთაბეჭდილება დარჩეთ...

- ძირითადად ინგლისურ ენაზე მღერი, მაგრამ ქართული მუსიკაც გიყვარს...

- ვთვლი, რომ ქართველ მსმენელს ყველაზე დახვეწილი ყური აქვს და ჩემთვის დიდი პასუხისმგებლობა და პატივია მათ წინაშე გამოსვლა. ძალიან მიყვარს ქართველი კომპოზიტორები, გამორჩეულად კი გია ყანჩელი, თავისი სევდიანი და ძალიან ქართული მუსიკით. სულ ვცდილობ, რომ ჩემი ხელოვნებით რაიმეთი გამოვხატო სიყვარული საქართველოს მიმართ.

მარიამ ხერხეულიძე
მარიამ ხერხეულიძე

- საქართველოში ხშირად ატარებ საქველმოქმედო კონცერტებს...

- ინგლისში ბევრ სცენაზე, პრესტიჟულ და საქველმოქმედო საღამოებზე ვარ გამოსული, მათ შორის ბრიტანეთის პარლამენტშიც. ხშირად მიღებენ ხოლმე პრესტიჟულ რეკლამებში და ვიდეოკლიპებში, სადაც გადახდილი ჰონორარით ობოლ ქართველ ბავშვებს ვეხმარები. ვფიქრობ, საქართველოში არ უნდა იყვნენ მშიერი ბავშვები, ეს ამბავი ყველას უნდა აწუხებდეს. საერთოდ მსოფლიოში არავინ არ უნდა შიმშილობდეს. წელს დაგეგმილი გვქონდა საქველმოქმედო კორცერტები საქართველოს მაღალმთიან რაიონებში, მაგრამ პანდემიის გამო, სამწუხაროდ, გადაიდო. როცა ყველაფერი ძველებურად აღდგება, ჩემს სმენელს დიდ სიამოვნებას ვპირდები. მე და მამამ საქველმოქმედო კონცერტი ადრე ბახმაროსა და ბათუმში ჩავატარეთ.

- ვფიქრობ, გურიაში კონცერტი კურიოზის გარეშე ვერ ჩაივლიდა...

- ბახმაროში გამოსვლის დროს სცენაზე ორი ცოტა ნასვამი ბიჭი ამოვიდა და ჩვენთან ერთად სიმღერა მოისურვა. რამდენჯერაც სთხოვეს გაჩუმება და გაიყვანეს, იმდენჯერ უკან დაბრუნდნენ. მოკლედ, ბოლოს ერთად ვმღეროდით – ისინი ქართულ საქეიფო სიმღერებს, მე – ინგლისურს. ამან ყველა ძალიან გაამხიარულა და ხალხი ტაშს ორივეს გვიკრავდა – იმათაც და ჩვენც.

მარიამ ხერხეულიძე
მარიამ ხერხეულიძე

- რა ასოციაციები გიჩნდება ნისლიან ალბიონზე, როდესაც მზიან საქართველოზე ფიქრობ?

- საქართველო ჩემთვის ასოცირდება მუსიკასთან, ხელოვნებასთან, სამყაროს განსხვავებულ ხედვასთან, ადამიანებს შორის სრულიად სხვა დამოკიდებულებასთან, უზომო მეგობრობასთან, გულიან, ერთგულ და მებრძოლ ადამიანებთან. სურვილი მაქვს, რომ საქართველოში ოდესმე მოხუცებისთვის კვების უფასო პუნქტები გავხსნა და საქართველოს მთიანი რაიონების მცხოვრებლებს დავეხმარო. სამშობლო ჩემთვის მარტივად ასახსნელი სიტყვა არ არის. დიდი სურვილი მაქვს, რომ ჩემი სიყვარული ხშირად გამოვხატო ქართული პუბლიკის წინაშე და იმედია, მომავალში ამის შესაძლებლობა მომეცემა.

 

1604
თემები:
ქართველები უცხოეთში (80)
თამარ უთნელიშვილი

კლასგარეშე საკითხავი მასწავლებლებისთვის: „მოსწავლეებს რეპეტიტორი რომ არ დასჭირდეთ“

1089
(განახლებულია 16:13 18.09.2020)
„როცა ბავშვებს სკოლაში მიუხარიათ და სკოლის დატოვება ეძნელებათ“ – ასე დაახასიათა ზოგადად იდეალური სკოლა თამარ უთნელიშვილმა და სწორედ ეს გახდა თავის დროზე მისი მომავალი საქმიანობის ამოსავალი.

კერძო სკოლა „თამარიონი“ თანამოაზარეებთან ერთად ქალბატონმა თამარმა გორში 1995 წელს 18 მოსწავლით გახსნა. დღეს მისი ხელმძღვანელობით ეს სკოლა სწავლების მაღალი დონით და კვალიფიციური პედაგოგებით გამოირჩევა.

თამარ უთნელიშვილი გორის უნივერსიტეტში
თამარ უთნელიშვილი გორის უნივერსიტეტში

- ქალბატონო თამარ, ბუნებრივია, დავიწყებ კითხვით – თავის დროზე პროფესიული არჩევანი რა ნიშნით გააკეთეთ?

- ყოველთვის მომწონდა და მაინტერესებდა ნებისმიერი განვითარების პროცესი, იქნებოდა ეს ტექნიკა, მედიცინა, მეცნიერება თუ სხვა რამ. ამ ინტერესის სფეროს განეკუთვნებოდა ბავშვის, როგორც გონებრივი რესურსის განვითარების პროცესიც. ვეთანხმებოდი მოსაზრებას, რომ „ბავშვის გონება სუფთა დაფაა“ და ვიღაც ბედნიერს შეუძლია იგი ძალიან მნიშვნელოვანი ჩანაწერებით შეავსოს. საბოლოოდ, თუ ეს დაფა სრულყოფილი, მნიშვნელოვანი და სასარგებლო გამოვა, ეს იქნება სწორედ „იმ ბედნიერის“ დამსახურება, ვინც ეს შეძლო. წარმოგიდგენიათ, რამხელა სიკეთეა, რამხელა მადლია იმ „ბედნიერის“ როლში ყოფნა?! ჰოდა, დღემდე ვცდილობ, ეს როლი ღირსეულად შევასრულო...

- ვინ იყო მასწავლებელი, ვინც გორის მეცხრე საშუალო სკოლაში თქვენ პიროვნებად ჩამოყალიბებაზე გავლენა იქონია?

- მუშაობისას ყოველთვის ვცდილობ ისე მოვექცე ბავშვებს და ისეთი გარემო შევუქმნა, როგორიც მინდოდა თავად მქონოდა ბავშვობაში. მოგეხსენებათ, საბჭოთა სკოლაში თავისუფალ, შემოქმედებითად დატვირთულ გარემოზე ფიქრიც კი იკრძალებოდა. თუმცა იყო ნათელი წერტილები, რომლებსაც ნათელი მასწავლებლები ქმნიდნენ და ასეთები ძალიან ცოტანი იყვნენ... დღევანდელი გადმოსახედიდან, როცა მასწავლებლების და სწავლების სტანდარტებს ვაფასებ, მხოლოდ ერთი მასწავლებელი მახსენდება, რომელიც დღევანდელ სკოლასაც დაამშვენებდა თავისი მიდგომებით, დამოკიდებულებით, შემოქმედებითი აზროვნებით, სახალისო აქტივობებით, საქმისადმი ერთგული დამოკიდებულებით და სიყვარულით. ეს ჩემი რუსული ენის მასწავლებელი როზა სტეფანიანი იყო. ახლაც მიკვირს, ამას როგორ ახერხებდა, მას ხომ არანაირი თანამედროვე ძვირადღირებული ტრენინგი არ ჰქონდა გავლილი. ამიტომ ვამტკიცებ, რომ მასწავლებლობა ნიჭი და უნარია, რომელიც ან გაქვს, ან არ გაქვს!..

ღონისძიებაზე
ღონისძიებაზე

- გამომდინარე იქიდან, რომ ფიზიკა-მათემატიკური ფაკულტეტი აირჩიეთ, შემოქმედებითი ძიების მოყვარული ბუნება გაქვთ... 

- საერთოდ, იმდენი საგანი და თემა მაინტერესებდა, რომ გამიჭირდა პროფესიის არჩევა. წერა მიყვარდა ძალიან, ჟურნალისტობაც მომწონდა, ლიტერატურასა და პოეზიაზე დღესაც „ჭკუა მეკეტება“, მასწავლებლად კი, ასე მგონია, დავიბადე. მათემატიკაში მომწონდა გზების ძიება, „გემრიელ“ ამოცანაში „გემრიელ“ გზას რომ ვიპოვიდით გაკვეთილზე, ეს იყო ჩემთვის კმაყოფილების ზენიტი. კარგი კლასი მყავდა და სულ შემოქმედებით ძიებაში ვიყავით. ბოლოს ისე გამოვიდა, რომ ძალიან ბევრი ჩემი ახლობლის გასაკვირად ფიზიკა-მათემატიკის ძალიან საინტერესო გზაზე შევდექი.

თამარ უთნელიშვილი ოჯახთან ერთად
თამარ უთნელიშვილი ოჯახთან ერთად

- რა გამოცდილება შეიძინეთ პროფესიული განვითარების ეროვნულ ცენტრში?

- მასწავლებელთა პროფესიული განვითარების ცენტრში მუშაობამ დიდი გამოცდილება შემძინა. ეს იყო ის სიახლეები, რაც აპრობირებულია მსოფლიოში და ჩვენ ერთად ვეძებდით ჩვენზე მორგებულ მეთოდებს. ეს იყო განათლების კორიფეებთან ურთიერთობისა და გამოცდილების გაზიარების კარგი შესაძლებლობა. მაგრამ ჩემი ტრენერობის იდეალური გამოცდილება იყო ე.წ. G-Pried (საქართველოს დაწყებითი განათლების) პროექტი, რომელიც თავისი მაღალი ორგანიზებულობით, საინტერესო პროცესუალური მიდგომებითა და რესურსებით საუკეთესოა დღემდე არსებულ საგანმანათლებლო მოდულებს შორის.

კოლეგებთან ერთად
კოლეგებთან ერთად

- კერძო სკოლის დაარსების იდეა როდის გაგიჩნდათ?

- კერძო სკოლის დაარსების იდეა გამიჩნდა მას შემდეგ, რაც ამის შესაძლებლობა მომეცა. მანამდე იყო ოცნება ისეთი სკოლის არსებობის შესახებ, სადაც იქნებოდა კეთილგანწყობილი, უშუალო გარემო, კვალიფიციური, საქმეზე და ბავშვებზე შეყვარებული მასწავლებლები, ბავშვების აზროვნების და შემეცნების აბსოლუტური თავისუფლება, მხიარული და საინტერესო სასწავლო პროცესი, როცა ბავშვებს სკოლაში მიუხარიათ და მერე სკოლის დატოვება ეძნელებათ.

კოლეგებთან ერთად
კოლეგებთან ერთად

- ობიექტურად რომ ვიმსჯელოთ, რით გამოირჩევა თქვენი სკოლა?

- ჩვენი სკოლა სხვა სკოლებისგან იმით გამოირჩევა, რომ ზემოთ ჩამოთვლილ პირობებს არ ვღალატობთ. გაძლიერებული ქართული ენის, მათემატიკის და უცხო ენების პროგრამა გვაქვს, მოსწავლეთა მცირე რაოდენობა, მათ მზადყოფნაზე მორგებული პროგრამები და პროფესიონალი კადრები იმის საშუალებას იძლევა, რომ ჩვენს მოსწავლეებს რეპეტიტორი არ დასჭირდეთ. გორი პატარა ქალაქია და ადვილია, რომ ამა თუ იმ ადამიანზე წარმოდგენა შეიქმნა. მასწავლებლებიც ძალიან ფრთხილად შევარჩიეთ, აუცილებელ მოთხოვნებად დავაწესეთ საგნის ცოდნა, საქმის და ბავშვების სიყვარული, სიახლის მაძიებლობის და საქმისადმი შემოქმედებითი მიდგომის უნარი.

თამარ უთნელიშვილი გადაღების დროს
თამარ უთნელიშვილი გადაღების დროს

- თქვენი ცხოვრება მთლიანად ქალაქ გორთან არის დაკავშირებული, ვირტუალური მეგზურობა რომ გაუწიოთ მკითხველს, რომელ საინტერესო ფაქტებს ახსენებდით ამ ქალაქთან დაკავშირებით, გარდა იმისა, რაც მსოფლიოში უკვე იციან?

- გორი ჩემი სახლია, მის ქუჩებში სიარულისას მგონია, რომ ჩემ ეზოში დავდივარ. აქ ყველა ერთმანეთს იცნობს და ეფერება. ქალაქში ბევრი საინტერესო და ღირსშესანიშნავი ადგილი გვაქვს, მარტო უნიკალური ქვაში ნაშენი უფლისციხე და გორის ციხე რად ღირს, ან ჩვენი ეთნოგრაფიული მუზეუმი შესანიშნავი ექსპონატებით. თუნდაც არაჩვეულებრივი ატენის ხეობა, მისი სიონი, შესანიშნავი შემოქმედი ადამიანები, ქალთა და გოგონათა ცნობილი კაპელა, ცნობილი სპორტსმენები, გორის უძველესი დრამატული თეატრი, კერამიკის მუზეუმი. ეს ხომ იაკობ გოგებაშვილის, ოთარ ჩხეიძის, მერაბ მამარდაშვილის, ეკატერინე გაბაშვილის, კირიონ II-ის, ნიკო სამადაშვილის, ნიკო ლომოურის, ანტონ ფურცელაძის, ივანე მაჩაბლის, ნიკო კეცხოველის, სულხან ცინცაძის, ილიკო სუხიშვილის მშობელი მხარეა... მეტი რა ქნას ამ პატარა ქალაქმა?!.

 

1089
მერაბ მამარდაშვილი

მერაბ მამარდაშვილი 90: ტოტალური აზროვნების სიმარტივე

301
(განახლებულია 16:58 15.09.2020)
ადამიანი სპონტანურად უერთდება იმას, რაც მას ჰპირდება, რაღაცად გაგხდიო, ყოველგვარი მუშაობისა და მუყაითობის გარეშე. ამ ცდუნებამ კარგი ნაყოფი გამოიღო როგორც საბჭოთა კავშირში, ასევე სხვაგან...

დღეს უდიდეს ქართველ მოაზროვნეს, ფილოსოფოს მერაბ მამარდაშვილს 90 წელი შეუსრულდებოდა. გთავაზობთ დიდი მოაზროვნის გამონათქვამებს „Sputnik–საქართველოს“ სერიიდან „აზრების ფოიერვერკი".

მერაბ მამარდაშვილი — ქართველი ფილოსოფოსი, მეცნიერებათა დოქტორი, პროფესორი. მამარდაშვილის ფილოსოფიურმა და საგანმანათლებლო მოღვაწეობამ სსრკ-ში დამოუკიდებელი ფილოსოფიური აზრის ჩამოყალიბებაში უზარმაზარი როლი შეასრულა.

მერაბ მამარდაშვილი
მერაბ მამარდაშვილი

მამარდაშვილის ფილოსოფიის საყრდენს წარმოადგენდა ცნობიერების ფენომენი და მისი მნიშვნელობა ადამიანის ჩამოყალიბებაში. ის მიიჩნევდა, რომ ნამდვილი ფილოსოფია მიზნად ისახავს ცვალებად სამყაროში ადამიანის მიერ სტაბილურობის მოპოვებას.

მამარდაშვილი 1930 წელს დაიბადა გორში. მან 1954 წელს დაამთავრა მოსკოვის სახელმწიფო უნივერსიტეტის ფილოსოფიის ფაკულტეტი. 1968-1987 წლებში იყო სამეცნიერო ჟურნალი „ვოპროსი ფილოსოფიის" მთავარი რედაქტორის მოადგილე, მოსკოვის სახელმწიფო უნივერსიტეტის პროფესორი და რუსეთის მეცნიერებათა აკადემიის მოსკოვის ფილოსოფიის ინსტიტუტის უფროსი მეცნიერ-თანამშრომელი.

1987-1990 წლებში იყო საქართველოს მეცნიერებათა აკადემიის წერეთლის სახელობის ფილოსოფიის ინსტიტუტის ბუნებისმეტყველების ფილოსოფიის განყოფილების გამგე და თბილისის სახელმწიფო უნივერსიტეტის პროფესორი. სხვადასხვა დროს ლექციებს კითხულობდა გერმანიაში, საფრანგეთსა და სხვა ქვეყნებში.

1990 წლის 25 ნოემბერს 60 წლის ქართველი ფილოსოფოსი მოსკოვის აეროპორტში გულის შეტევით გარდაიცვალა. ის თბილისში გამოფრენას აპირებდა.

• თქვენ, ალბათ, ვერ წარმოიდგენთ, რა მიმზიდველი და დამარწმუნებელია ტოტალიტარული აზროვნების სიმარტივე. ის თხევადი საწამლავივითაა, რომელიც ბევრად უფრო ეფექტურად მოქმედებს, ვიდრე ცენზურა თუ ავტორების დევნა. ის შიგნიდან გღრღნის. ის შიგნიდან იჭრება ტვინში და ეს ძალზე მომხიბლავია. რეალურად გიზიდავს. საიდან მოდის ეს ხიბლი? იქიდან, რომ ასეთი აზროვნება ნებას იძლევა, თავი ჭკვიანი გეგონოს, დაიჯერო, რომ ყველაფერი გესმის, თავზე ყოველგვარი ძალდატანების გარეშე. ზოგადად ადამიანი ზარმაცია, ამიტომ ის სპონტანურად უერთდება იმას, რაც მას ჰპირდება, რაღაცად გაგხდიო, ყოველგვარი მუშაობისა და მუყაითობის გარეშე. ამ ცდუნებამ კარგი ნაყოფი გამოიღო როგორც საბჭოთა კავშირში, ასევე სხვაგანაც.

• ადამიანი იწყება ღირსებიდან და მას მხოლოდ საკუთარი ღირსების გავლით შეუძლია ჭეშმარიტად გააცნობიეროს თავი ამა თუ იმ ერის შვილად! ქართველობა არ არის ბიოლოგიური მოცემულობა – ეს არის ნება, იყო ქართველი, ნება კი რაინდული ღირსების ფენომენია და მე თუ არ მაქვს ის, რამდენიც არ უნდა ინებოს ერმა თუ ბერმა, მე ვერც კაცი ვიქნები და ვერც ქართველი!

ბატონობას მიჩვეული უბატონოდ ვეღარ გაძლებს...>>

• ადამიანი აღზრდის ობიექტი კი არ არის, არამედ ადამიანი არის განვითარების სუბიექტი.

• შეგიძლია ისე მოკვდე, რომ ვერასოდეს აღმოაჩინო, რა იყო შენი გრძნობა. ეს შენი გრძნობა იყო, შენი, მაგრამ ის ვერ იგრძენი; ფიქრი შენი იყო, მაგრამ შენ ის ვერ იფიქრე; გამოცდილება შენი იყო, მაგრამ ამ გამოცდილებიდან აზრი ვერ გამოიტანე. ასე და ამგვარად, გამოცდილება მეორდება, თითქოს შენი ცხოვრება მარადიულად ღეჭავს ერთსა და იმავე ნაჭერს ისე, რომ ვერც ერთხელ ვერ გადაყლაპა იგი…

• ყველაზე დიდი ტყუილი შეიძლება აღმოჩნდეს ზუსტად სიმართლე, ნათქვამი ისეთ სიტუაციაში, როცა მისი დაჯერება შეუძლებელია…

• ადამიანებს უნდა მიეცეთ საშუალება, თავად გაირბინონ აზრის დასაწყისსა და დასასრულს შორის არსებული შინაგანი სივრცე. გრძნობები უნდა დაკრისტალდეს ზოგადკაცობრიულობამდე. უნდა გარდავიქმნათ შიგნიდან და არა გარედან. არ შეიძლება ადამიანს გარედან მიენიჭოს ღირსების, სინდისისა და პატიოსნების გრძნობა.

სიბრძნე სამართლიანობის გარეშე და უდიდესი თავისუფლების შედეგი - ტირანია>>

• ყველაზე საშიში მტერი ჩვენ გარეთ კი არ არის, არამედ ჩვენშია ჩაბუდებული.

• ჩემთვის დამოუკიდებლობა პირველი და აბსოლუტური, სადღეისო მიზანია. ოღონდ იმიტომ კი არა, რომ უბრალოდ დამოუკიდებლები ვიყოთ, არამედ იმიტომ, რომ დავინახოთ ჩვენი თავი და შევქმნათ სიტუაცია, სადაც ჩვენი რეალური პრობლემები გამოჩნდება. ამ პრობლემის გადაწყვეტის პირობა კი შინაგანი გათავისუფლებაა. ე.ი. ჩვენ გვჭირდება გათავისუფლება არა მხოლოდ იმპერიისგან, არამედ ჩვენივე ცხოვრების გარკვეული შინაგანი პრინციპისგან.

• ჩვენ იმდენ ხანს ვთვლემდით, ისე გავიყინეთ, რომ დღეს ხელახლა უნდა ვისწავლოთ სიცოცხლის გარჩევა სიკვდილისგან, ოცნებისა – რეალობისგან. ქართველებმა უნდა იმუშაონ საკუთარ თავზე, განდევნონ უვიცობა და ისტორიული წყვდიადი მათ ზნეში, საქმიანობაში რომ დაგროვდა. საბჭოურად დაპატარავებულებმა დავკარგეთ პოლიტიკის შეგრძნების უნარი, აღარ ვიცით, როგორ ვიცხოვროთ რთულ საზოგადოებაში.

• ბევრჯერ ვყოფილვარ მოწმე, ძლიერნი ამა სოფლისანი სახელმწიფოს, ნაციისა და საზოგადოების სახელით როგორ თრგუნავენ აზროვნებას. სომხების, ოსებისა და აფხაზების ღირსების დაცვა – შენი, ქართველის ღირსების დაცვაა. მე მათთან ვცხოვრობდი და ვცხოვრობ, არავის აქვს უფლება ამით ჩემში ქართველობის გრადუსი გაზომოს.

„სიბრძნის სიმფონია" - ჰერმან ჰესე - სიბერე>>

• არ შეიძლება არსებობდეს ეროვნული იდეალი, თუ მასში ჩადებული არ არის ადამიანის თავისუფლება.

• ჩვენ გვჭირდება გათავისუფლება არა მხოლოდ იმპერიისგან, არამედ ჩვენივე ცხოვრების გარკვეული შინაგანი პრინციპებისგან.

• მტრის ხატი — ესაა დამანგრეველი ფსიქიკური ძალა, იმიტომ რომ მტერი კი არ იწვევს ეჭვს, ეჭვი შობს მტერს. ეჭვი ჯერ უსაგნოდ არსებობს. ეჭვი ჩემი უძლურებაა — მე მეშინია ყველაფრის, როცა უძლური ვარ. მტერი არის განსხეულება იმისა, რაც ჩემშივეა ფესვგადგმული, როგორც უძლურება.

• ფილოსოფია — ესაა განსჯა სიკვდილის შესახებ.

• სწორედ იმიტომ, რომ არ შეგვიძლია ვიყოთ ღმერთები, შეგვიძლია ვიყოთ ზნეობრივი, სწორედ იმიტომ, რომ არის დანაშაულის სისავსე, შეგვიძლია ვიყოთ პასუხისმგებლებიანი, ესე იგი, თავისუფალი.

ცივილიზაციის ჯებირები და ხელფეხშეკრული თავისუფლება...>>

• არჩევანის პრობლემას თავისუფლების პრობლემასთან არანაირი კავშირი არ აქვს. თავისუფლება — ეს ფენომენია, რომელსაც ადგილი აქვს იქ, სადაც არანაირი არჩევანი არაა. თავისუფლება არის რაღაც, რაც თავის თავშივე მოიცავს აუცილებლობას… რაღაც, რაც თავისი თავის აუცილებლობას წარმოადგენს, არის კიდეც თავისუფლება.

• ფილოსოფიაში თავისუფლებას შინაგანი აუცილებლობა ეწოდება. თავისი თავის აუცილებლობა.

301
სამაშველო ოპერაცია მდინარეზე

მყვინთავ მაშველებს ხელფასები გაუორმაგდათ

0
(განახლებულია 14:12 21.09.2020)
აღნიშნული სიახლეები მყვინთავ მაშველებს საგანგებო სიტუაციებზე მართვის სამსახურის უფროსმა თემურ მღებრიშვილმა გააცნო

თბილისი, 21  სექტემბერი – Sputnik. შინაგან საქმეთა სამინისტროს საგანგებო სიტუაციების მართვის სამსახურის მყვინთავ მაშველებს ხელფასები 100 პროცენტით გაეზარდათ, ნათქვამია უწყების მიერ გავრცელებულ განცხადებაში.

აღნიშნული სიახლე მყვინთავ მაშველებს საგანგებო სიტუაციების მართვის სამსახურის უფროსმა თემურ მღებრიშვილმა სახანძრო-სამაშველო ძალების უფროს დავით სუხიშვილთან და განსაკუთრებულ სიტუაციებზე სწრაფი რეაგირების სამმართველოს უფროს ავთო თუთისანთან ერთად გააცნო.

„განსაკუთრებულ სიტუაციებზე რეაგირების მთავარ სამმართველოში, შინაგან საქმეთა მინისტრ, ვახტანგ გომელაურის გადაწყვეტილებით შეიქმნა დასავლეთ და აღმოსავლეთ საქართველოს გაყოფილებები. მასში გაერთიანდებიან მყვინთავი მაშველები. დეცენტრალიზაცია ხელს შეუწყობს რეაგირების ეფექტურობის გაზრდას. ასევე, მყინთავ მაშველებს ხელფასი გაეზრათ 100 პროცენტით“, - ნათქვამია განცხადებაში.

როგორც საგანგებო სიტუაციების მართვის სამსახურის უფროსმა თემურ მღებრიშვილმა განაცხადა, ხელფასის გაზრდა მყვინთავთა რთული პროფესიის გათვალისწინებით მოხდა.

 მისი თქმით, საგანგებო სიტუაციების მართვის სამსახურში კიდევ გაგრძელდება რეფორმები, რომლებიც მაშველების სოციალური მდგომარეობის კიდევ უფრო გაუმჯობესებას ისახავს მიზნად.

შეხვედრას დისტანციურად დაესწრნენ დასავლეთ საქართველოს განყოფილების მყვინთავი მაშველები.

0