პატრიარქთან შეხვედრის დროს

ქართველები ათენში, ღირსეული ცხოვრების უფლება, ანუ „მამა, შეხედე, შენი საქართველო დავინახე“

1494
(განახლებულია 18:42 22.07.2020)
რუბრიკაში „ქართველები უცხოეთში“ დღეს საბერძნეთში, კერძოდ, ათენში მცხოვრებ ავთანდილ გიუნაშვილს გაგაცნობთ.

პროფესიით რელიგიათმცოდნე და ფსიქოლოგია. თეოლოგიის ფაკულტეტის სამაგისტრო პროგრამა თბილისის სასულიერო აკადემიაში დაამთავრა. საქართველოში საპატრიარქოს ახალგაზრდული ცენტრის და ორგანიზაცია „ახალგაზრდული ინიციატივის" სოციალური ზრუნვის პროგრამების კოორდინატორი იყო.

2010 წლიდან სწავლას ათენის იოანის კაპოდისტრიას სახელობის სახელმწიფო უნივერსიტეტში აგრძელებს. მოგვიანებით სტუდენტთა და ახალგაზრდობის ბერძნულ-ქართულ ასოციაციას აფუძნებს და ათენის ქართველ მიგრანტთა საინფორმაციო ცენტრს აარსებს. 2017 წლიდან დიასპორული მედია-მაუწყებლის Diaspora.ge-ს დამფუძნებელი გახდა. ამჟამად ათენში ქართული დიასპორის საზოგადოებრივი ცენტრის პროგრამების კოორდინატორია.

ავთანდილ გიუნაშვილი
ავთანდილ გიუნაშვილი

- ავთანდილ, თქვენ იმ თაობიდან ხართ, რომელსაც სკოლაში ათეისტური პროპაგანდა არ შეხებია, ყველაზე ნათელ მოგონებად რა გამოგყვათ ბავშვობიდან?

- ბავშვობა გავატარე მშობლიურ ქალაქ გორში, რომელიც, მიუხედავად იმისა, რომ ათეიზმის ყველაზე ძლევამოსილი დიქტატორის იოსებ სტალინის მშობლიურ ქალაქად ითვლება, ჩემთვის ცხოვრების ყველაზე დიდ ნათელთან – ქრისტესთან და მის ეკლესიასთან ზიარებასთან ასოცირდება. მიუხედავად დაშვებული შეცდომებისა, ეს ქალაქი დღემდე განსაზღვრავს ჩემს ცხოვრებისეულ ნაბიჯებს. ბავშვობის ყველაზე ნათელ მოგონებად ისევ რჩება ჩემი პირველი ნაბიჯები ეკლესიაში, სადაც ჯერ სტიქაროსნად, შემდეგ პარალელურად წიგნის მკითხველადაც ვმსახურობდი. ხშირად მახსენდება ჩემი მასწავლებლები, მოძღვრები და მღვდელმთავარი, მიტროპოლიტი ანდრია, რომლებმაც განაპირობეს ჩემი შემდგომი ნაბიჯები. სკოლის დასრულების შემდეგ სწავლა თბილისის სასულიერო სემინარიასა და აკადემიაში გავაგრძელე. უდიდესი ბედნიერება მერგო იქ მესწავლა იმ პერიოდში, როდესაც რექტორი თავად მისი უწმიდესობა და უნეტარესობა, სრულიად საქართველოს კათოლიკოს-პატრიარქი ილია მეორე ბრძანდებოდა.

შვილთან ერთად
შვილთან ერთად

- სწავლის დროს უწმიდესთან ურთიერთობის რომელ ამბავს გაიხსენებთ?

- იმ პერიოდში ალბათ ვერ ვიაზრებდით სტუდენტები და პირადად მე, თუ რამხელა მადლი და პატივი გვერგო, რომ თითქმის ყოველ დილით სასულიერო აკადემიის დარბაზში მისი უწმინდესობის გვერდით ვყოფილიყავით და დილის ლოცვა მოგვესმინა. შემდეგ სხვადასხვა თემებზე გვეფიქრა და გვესაუბრა. მახსოვს, როგორი სიბრძნით აძლევდა იგი სწორ მიმართულებას ჩვენს ნააზრევს. ის დრო დღემდე რჩება ჩემი ცხოვრების უმნიშვნელოვანეს პერიოდად. მინდა გითხრათ, რომ მის უწმიდესობასთან შეხვედრის პატივი ხშირად მქონდა და რთულია რომელიმე მათგანის დავიწყება, თუმცა შეიძლება გამოვყო ამბავი, რომელმაც ჩემი ცხოვრების ახალი ეტაპი შექმნა და განსაზღვრა. როცა 2008 წლის თებერვალში მედია-ჯგუფის ინტელექტუალური გადაცემა „ეტალონის“ გამარჯვებული გავხდი, რექტორის კაბინეტში როგორც წარმატებული სტუდენტი აღმოვჩნდი. მახსოვს, როგორ ვიდექი ჩემთვის ყველაზე დიდ, ცოცხალ ავტორიტეტთან, რომელიც მამობრივი და მზრუნველი თვალებით გახარებული მიყურებდა და ვგრძნობდი, რომ ამ სიხარულის მიზეზის შექმნაში წვლილი მიმიძღოდა.

ავთანდილ გიუნაშვილი
ავთანდილ გიუნაშვილი

- იმ შეხვედრაზე თქვენთვის ყველაზე მნიშვნელოვანი საკითხი გადაწყდა?

- დიახ, ეს შეხვედრა ჩემთვის უდიდესი სტიმულისა და თავდაჯერების მომცემი იყო. მაშინ უწმინდესმა დაწვრილებით გამომკითხა ჩემი გამარჯვების შესახებ და ბოლოს მკითხა – მისგან საჩუქრად წიგნი მერჩივნა თუ ხატი. ეს კითხვა იმდანად მოულოდნელი იყო ჩემთვის, რომ დღემდე არ მახსოვს, როგორ გავბედე და გავანდე ჩემი დიდი ხნის სურვილი უცხოეთში სწავლის გაგრძელების თაობაზე და კურთხევა ვთხოვე. მახსოვს, ამ პასუხმა უწმინდესი როგორ გაახარა და მისი სემინარიაში ჩაბარების ამბავი გაიხსენა. ჩემდეგ გულში ჩამიკრა, ხატების კუთხიდან ყოვლადწმიდა ღვთისმშობლის ხატი აიღო და მითხრა – ამ ხატის წინ მელოცა და ჩემი სურვილი შესრულდებოდა. მამა გიორგის კი რეკომენდაციის შედგენა დაავალა. 2010 წელს, როდესაც ბაკალავრიატი დავასრულე და აკადემიის სამაგისტრო პროგრამაზე გადავედი სასწავლებლად, მისი უწმიდესობის სარეკომენდაციო წერილის საფუძველზე საბერძნეთის საგარეო საქმეთა სამინისტრომ სტიპენდია დამინიშნა და სწავლის გასაგრძელებლად ელადის დედაქალაქში აღმოვჩნდი.

ავთანდილ გიუნაშვილი
ავთანდილ გიუნაშვილი

- როგორ დააარსეთ საბერძნეთში სტუდენტთა და ახალგაზრდობის ბერძნულ-ქართული ასოციაცია?

- საბერძნეთში საკმაოდ პატარა ასაკში, შეიძლება ითქვას, რომ სრულიად მარტო აღმოვჩნდი. თბილისში ვაქტიურობდი თავდაპირველად საპატრიარქოს ახალგაზრდულ ცენტრში, შემდეგ სტუდენტურ თვითმმართველობაში და, ბუნებრივია, დამებადა იდეა, რომ საბერძნეთშიც შევკრებილიყავით ქართველი სტუდენტები და ახალგაზრდები და ინოვაციური პროექტები ერთად განგვეხორციელებინა. ამ იდეით მალევე დავუკავშირდი ჩვენი ქვეყნის იმდროინდელ ელჩს საბერძნეთის რესპუბლიკაში, ბატონ ირაკლი თავართქილაძეს, რომელსაც ასევე თეოლოგიური განათლება აქვს მიღებული. მისი მხარდაჭერით შევკრიბე სტუდენტები და დავაარსე სტუდენტთა და ახალგაზრდობის ბერძნულ-ქართული ასოციაცია, რომელიც დღემდე არსებობს.

ავთანდილ გიუნაშვილი
ავთანდილ გიუნაშვილი

- ყველაზე საინტერესო აქტივობა რომელი გახსენდებათ?

- ეს ასოციაცია დღემდე აგრძელებს საქმიანობას. უკვე განხორციელებულიდან გამოვყოფდი 2011 წელს განხორციელებულ პროექტს, რომელიც მაკედონელთა დედაქალაქ თესალონიკში შედგა და ქართული დიასპორის და ერთობის ნამდვილი ზეიმი იყო. თესალონიკის ცენტრალურ მოედანზე ქართული ქორეოგრაფიის ნიმუშების წარმოჩენის შემდეგ უცხოელი და ბერძენი ახალგაზრდებით და სტუმრებით სავსე მოედანზე გამოვიტანეთ უზარმაზარი ხაჭაპური, რომელმაც საოცარი შთაბეჭდილება დატოვა მათზე და რომელიც ადგილობრივი ქართველი ბიზნესმენის ზოია სულხანიშვილის მხარდაჭერით გავაკეთეთ. ხაჭაპური სტუმრებთან ერთად დავჭერით. მახსოვს ამ ფაქტით ადგილობრივი ტელევიზიის ღონისძიებაზე დამსწრე ჟურნალისტებიც აღფრთოვანდნენ. მათ საქართველოზე მოამზადეს ძალიან კარგი სიუჟეტი, სადაც ჩვენს ქვეყანაზე ძალიან პოზიტიურად ისაუბრეს, რაც არცთუ ხშირია ბერძნულ მასმედიაში.

ავთანდილ გიუნაშვილი
ავთანდილ გიუნაშვილი

- რადგან აქტიური კავშირი გაქვთ ქართულ ემიგრაციასთან და დიასპორასთან, ალბათ შეგიძლიათ იმის თქმა, თუ რა პრობლემებს აწყდებიან ყველაზე ხშირად საბერძნეთში ჩასული ქართველები?

- შეიძლება სრული პასუხისმგებლობით ვთქვა, რომ ქართული დიასპორა და ემიგრანტები ჩემი ცხოვრების ბოლო ათეული წლის მთავარი გამოწვევაა. მიუხედავად იმისა, რომ წლების მანძილზე არაერთი პრობლემური საკითხი გადაწყდა. ეს საკმაოდ ვრცელი თემაა და დეტალურად შეუძლებელია ერთ პასუხში მისი ჩატევა. უამრავი ჩვენი თანამემამულე ემიგრანტი ელოდება ღირსეული ცხოვრების უფლებას, დასაქმებისთვის მხარდაჭერას და თავისუფალი გადაადგილებისთვის ელემენტარული დოკუმენტაციის მოწესრიგებას, რაც არცთუ ისე რთული და გადაუჭრელი საკითხია.

ღონისძიებაზე
ღონისძიებაზე

- თქვენთვის ღირებულ რომელ შეხვედრას გაიხსენებთ ელადაში?

- ყველაზე ღირებული და გამორჩეული ჩემთვის მომავალ მეუღლესთან სოფია სარიდთან შეხვედრა იყო. ამ ადამიანმა ჩემ მიმართ შეუფასებელი თანადგომა გამოიჩინა და, რაც მთავარია, ჩემთვის შეუფასებელი საგანძური, შვილები – ელისაბეტი და დანიელი მოავლინა ქვეყანაზე და ამისთვის ვმადლობ ღმერთს...

- როგორია შორიდან დარჩენილი სამშობლო, როგორ შეიგრძნობთ მას?

- რამდენიმე თვის წინ ჩემი შვილი ელისაბეტი მეუბნება: „მამა, შეხედე, შენი საქართველო დავინახე", და მობილურში საქართველოს დროშას მაჩვენებს. ეს სიტყვები ძალიან ჩამრჩა გულში. ბოლო დროს საქართველოს დანახვა შორიდან უკვე ძალიან მიჭირს, ფიქრის დროს უფრო მეტად ჩამესმის მისი ხმა და უწმინდესის სიტყვები, რომელიც იანვარში შეხვედრისას მითხრა: „მალე დაბრუნდით საქართველოში“… ძალიან მინდა, რომ სამშობლოში დაბრუნება მალე შევძლო.

ავთანდილ გიუნაშვილი
ავთანდილ გიუნაშვილი

- რა გზას გადის ადამიანი ტაძრამდე და საკუთარ თავში ღმერთის აღმოჩენამდე?

- ტაძარში ძალიან პატარა ასაკში აღმოვჩნდი და ეს ჩემი მასწავლებლების და დედის დამსახურება უფროა, ვიდრე ჩემი. ვიცით, რომ დედის ლოცვა უდიდესი ძალის მქონეა. ალბათ ამ ლოცვამ განაპირობა ის, რომ უკვე ტაძრის საკურთხევლიდან სტიქარით შემოსილს, საკუთარ თავში ღმერთის პოვნაზე მეტი მეფიქრა. არ ვიქნები გულწრფელი, თუ გეტყვით, რომ ეს ძიება წარმატებით დავასრულე... დარწმუნებული ვარ, რომ ღმერთის პოვნა ყოველდღიურად და ყველგან შეგვიძლია: ქუჩაში – გამოწვდილ ხელებში, ტრანსპორტში – ადგილის დათმობისას მადლიერ გამოხედვაში, მაღაზიაში გამოჩენილი თავაზიანობისას, თავად ტაძარში ქრისტიანის შესაფერისად მოქცევის დროს და ასე შემდგომ დაუსრულებლად…

1494
სალომე ხოტივარი

მხატვარ-ილუსტრატორის „ცენზორები“ და სამი სახლი, როგორც სიმბოლური კავშირი ბავშვობასთან

276
(განახლებულია 21:25 21.09.2020)
ნიჭიერი მხატვარ-ილუსტრატორის სალომე ხოტივარის დღევანდელი საქმიანობა დასტურია იმისა, რომ ნიჭი თუ გაქვს, ადრეულ წლებში მიღებული ნათელი შთაბეჭდილებები ერთ დღეს აუცილებლად იქცევა ხელოვნებად – პერსონაჟებად, რომელთაც ქვეყნად ყველაზე მკაცრი შემფასებელი – ბავშვები ჰყავს.

ილუსტრატორობაზე თავიდანვე ოცნებობდა. მისი პირველი სერიოზული შეკვეთა გამომცემლობა „ელფის“ 200 გვერდისგან შემდგარი „ქრესტომათია" იყო. წლების მანძილზე საბავშვო დიზაინერი იყო ჟურნალში „საბავშვო კარუსელი". არაერთი საინტერესო საბავშვო პერსონაჟი შექმნა და დახატა. სამომავლოდ ბევრი საინტერესო იდეა და პროექტი აქვს.

სალომე ხოტივარი
სალომე ხოტივარი

- სალომე, იყო საბავშვო ილუსტრატორი, ალბათ გაცილებით რთულია, რადგან ამისთვის მარტო ნიჭი არ არის საკმარისი, ასეა?

- დიახ, ასეა. პირველ რიგში, საბავშვო ილუსტრატორი ვერ გახდები, თუ არ გიყვარს ბავშვები, მათთან ურთიერთობა და თამაშიც კი. რაც მთავარია, გულწრფელად უნდა შეგეძლოს მათი მოსმენა, ბავშვების მსგავსად გაიგო და იაზროვნო, რომ სწორედ ისე აღიქვა სამყარო, როგორც ისინი აღიქვამენ.

სალომე ხოტივარის ილუსტრაცია
სალომე ხოტივარის ილუსტრაცია

- ანუ დღეს აკეთებთ საქმეს, რომელიც გიყვართ...

- დიახ, აკადემიაში ჩაბარებაც სწორედ ამიტომ მინდოდა, რომ დავუფლებოდი პროფესიას, რომელიც ბავშვობიდან მიზიდავდა, ანუ საბავშვო ილუსტრატორობას. ჩემი ამჟამინდელი ოცნების ასრულებაში დიდი როლი დედის გარდა ბებიამ და ბაბუამ ითამაშეს. ბებო, ლიანა ციცქიშვილი ხშირად მიყვებოდა მის მიერ გამოგონილ ზღაპრებს, რომლის სიუჟეტები არასოდეს მეორდებოდა. ჩემი ფანტაზია იმ ზღაპრებით დღემდე საზრდოობს...

სალომე ხოტივარის ილუსტრაცია
სალომე ხოტივარის ილუსტრაცია

- თქვენი საყვარელი ბავშვობისდროინდელი პერსონაჟი რომელი იყო?

- ეს იყო ასტრიდ ლინდგრენის პეპი გრძელი წინდა, სხვათა შორის, ბავშვობაში მეც წითური და ოდნავ ჭორფლიანი ვიყავი. კიდევ „დაჩის ზღაპრები“ და ძმები გრიმებიც ძალიან მიყვარდა. წიგნებში ილუსტრაციებს განსაკუთრებული ყურადღებით ვაკვირდებოდი. დედა თბილისში მუშაობდა. მისი გავლენაა, რომ წიგნები მიყვარდა, ჟურნალ „დილის“ თითქმის ყველა გამოშვება მქონდა. დედამ მიმიყვანა პირველად ზესტაფონში არსებულ გალერეაში, მას სხვა სახელი არ ჰქონდა, ყველა გალერეას ეძახდა. ჩემი პირველი პედაგოგი ქალბატონი ირინა ნებიერიძეა, რომელსაც დიდ პატივს ვცემ.

სალომე ხოტივარის ილუსტრაცია
სალომე ხოტივარის ილუსტრაცია

- პირველი სამუშაო გამოცდილება სად მიიღეთ?

- ბევრი წელი ვმუშაობდი გრაფიკულ დიზაინერად, მაგრამ ეს იძულებითი ნაბიჯი იყო. ერთ დღესაც, რვა წლის მუშაობის შემდეგ, სამუშაო ადგილი დავტოვე იმის გამო, რომ მეკეთებინა მხოლოდ და მხოლოდ ის, რაც ნამდვილად მიყვარს. საკმაოდ ბევრი წელი საბავშვო დიზაინერიც ვიყავი ჟურნალში “საბავშვო კარუსელი", რომელსაც გამომცემლობა „პალიტრა L“ უშვებს, თუმცა მივხდი, რომ ჩემი ნამდვილი სიყვარული მხოლოდ ილუსტრატორობაა.

სალომე ხოტივარის ილუსტრაცია
სალომე ხოტივარის ილუსტრაცია

- რომელია პირველი საბავშვო წიგნი თქვენი ილუსტრაციებით?

- ჩემი პირველი ილუსტრირებული წიგნი გამომცემლობა „ელფმა" გამოსცა, რედაქტორი თინა დიდებულიძე გახლდათ. ეს იყო პირველი გამომცემლობა, რომელმაც საკმაოდ დიდი წიგნი, 200 გვერდისგან შემდგარი “ქრესტომათია" ჩამაბარა. ჩემთვის ეს ძალიან საპასუხისმგებლო საქმე და ამ პროფესიაში გადადგმული დიდი ნაბიჯი იყო.

სალომე ხოტივარის ილუსტრაცია
სალომე ხოტივარის ილუსტრაცია

- ბავშვებზე თუ ტესტავთ თქვენს ნამუშევრებს?

- ბავშვების აზრი ჩემთვის ძალიან მნიშვნელოვანია და, შესაბამისად, ჩემი ნახატები მათი განხილვის გარეშე მთავარ დამკვეთამდე არასოდეს მიდის. ბავშვების შეფასება ჩემთვის მნიშვნელოვანია, ისიც, თუ რას ფიქრობენ ჩემზე. ერთხელ სხვისგან გავიგე, თუ რა აზრის არიან ჩემზე: „სალომე, დედაჩემის დაქალი, ძალიან მკაცრია, მაგრამ სამართლიანიო“. მართლაც ასეა: რამდენადაც კარგად ვარ ბავშვებთან, იმდენად არ მიყვარს ხოლმე, თუ რაიმე ზღვარს გადადიან. მე ექვსი ნათლული მყავს, ახლა მეშვიდეს ველოდები. სხვებსაც აღუნიშნავთ, რომ ბავშვებთან ურთიერთობა კარგად გამომდის. ჩემი ნათლულებიდან ბევრი გაიზარდა და დღეს თინეიჯერები არიან, პატარებს კი აინტერესებთ, რასაც ვაკეთებ.

სალომე ხოტივარის ილუსტრაცია
სალომე ხოტივარის ილუსტრაცია

- კონკრეტული ამბავი ხომ არ გახსენდებათ?

- მინდა ერთი გოგონა ვახსენო. წელს ზღვაზე ვიყავი მასთან ერთად და ამ გოგოს საქციელი და სიტყვები შოკში მაგდებდა. როდესაც ვმუშაობდი ჩეხოვის „კაშტანკაზე“, რომელიც „პალიტრა L“-ის გამომცემლობის შეკვეთაა, ის გოგონა სახლში მყავდა და, შეიძლება ითქვას, მისი „მითითებებით“ შევქმენი ეს გმირი, რომელიც გაახმოვანა კიდეც.

სალომე ხოტივარი
სალომე ხოტივარი

- ხშირად ილუსტრატორები ანიმაციაში გადადიან, თქვენ თუ გაგჩენიათ მსგავსი სურვილი?

- ჩემთვის როგორც ილუსტრირება, ასევე ანიმაციაზე მუშაობა ძალიან საინტერესოა. სულ ახლახან ჩავერთე ერთ-ერთ მნიშვნელოვან პროექტში, რომელზეც ღიად ჯერჯერობით ვერ ვისაუბრებ...

სალომე ხოტივარის ილუსტრაცია
სალომე ხოტივარის ილუსტრაცია

- როგორ ფიქრობთ, რა მოჰყვება ადამიანს ბავშვობიდან და თქვენ შემთხვევაში რა არის ასეთი?

- ჩემ შემთხვევაში ასეთი გულწრფელობა და ბუნების სიყვარულია, იმერეთის სიყვარული. ჩემი როგორც მხატვარ-ილუსტრატორის გამოძერწვა სწორედ იქ და მაშინ დაიწყო. ამის მიზეზი ბავშვობაა, სადაც ადამიანი იზრდება და საიდანაც სულიერ საზრდოს იღებს. მე უკვე 20 წელზე მეტია, რაც აღარ მყავს ბებო, რომელიც ახალგაზრდა გარდაიცვალა და უმისობას ძლივს მივეჩვიე. სიცოცხლეში სულ მთხოვდა ხოლმე, რომ მისთვის დიდი ნახატი დამეხატა. პანდემიის დროს იმერეთში ვიყავი ჩასული და გვიან, მაგრამ მაინც შევუსრულე ბებოს თხოვნა – დავხატე სამი პატარა სახლი, რაც სიმბოლურად ნიშნავს, რომ ჩვენ სამნი ვართ: მე, დედა და ბებო...

276
თამარ უთნელიშვილი

კლასგარეშე საკითხავი მასწავლებლებისთვის: „მოსწავლეებს რეპეტიტორი რომ არ დასჭირდეთ“

1243
(განახლებულია 16:13 18.09.2020)
„როცა ბავშვებს სკოლაში მიუხარიათ და სკოლის დატოვება ეძნელებათ“ – ასე დაახასიათა ზოგადად იდეალური სკოლა თამარ უთნელიშვილმა და სწორედ ეს გახდა თავის დროზე მისი მომავალი საქმიანობის ამოსავალი.

კერძო სკოლა „თამარიონი“ თანამოაზარეებთან ერთად ქალბატონმა თამარმა გორში 1995 წელს 18 მოსწავლით გახსნა. დღეს მისი ხელმძღვანელობით ეს სკოლა სწავლების მაღალი დონით და კვალიფიციური პედაგოგებით გამოირჩევა.

თამარ უთნელიშვილი გორის უნივერსიტეტში
თამარ უთნელიშვილი გორის უნივერსიტეტში

- ქალბატონო თამარ, ბუნებრივია, დავიწყებ კითხვით – თავის დროზე პროფესიული არჩევანი რა ნიშნით გააკეთეთ?

- ყოველთვის მომწონდა და მაინტერესებდა ნებისმიერი განვითარების პროცესი, იქნებოდა ეს ტექნიკა, მედიცინა, მეცნიერება თუ სხვა რამ. ამ ინტერესის სფეროს განეკუთვნებოდა ბავშვის, როგორც გონებრივი რესურსის განვითარების პროცესიც. ვეთანხმებოდი მოსაზრებას, რომ „ბავშვის გონება სუფთა დაფაა“ და ვიღაც ბედნიერს შეუძლია იგი ძალიან მნიშვნელოვანი ჩანაწერებით შეავსოს. საბოლოოდ, თუ ეს დაფა სრულყოფილი, მნიშვნელოვანი და სასარგებლო გამოვა, ეს იქნება სწორედ „იმ ბედნიერის“ დამსახურება, ვინც ეს შეძლო. წარმოგიდგენიათ, რამხელა სიკეთეა, რამხელა მადლია იმ „ბედნიერის“ როლში ყოფნა?! ჰოდა, დღემდე ვცდილობ, ეს როლი ღირსეულად შევასრულო...

- ვინ იყო მასწავლებელი, ვინც გორის მეცხრე საშუალო სკოლაში თქვენ პიროვნებად ჩამოყალიბებაზე გავლენა იქონია?

- მუშაობისას ყოველთვის ვცდილობ ისე მოვექცე ბავშვებს და ისეთი გარემო შევუქმნა, როგორიც მინდოდა თავად მქონოდა ბავშვობაში. მოგეხსენებათ, საბჭოთა სკოლაში თავისუფალ, შემოქმედებითად დატვირთულ გარემოზე ფიქრიც კი იკრძალებოდა. თუმცა იყო ნათელი წერტილები, რომლებსაც ნათელი მასწავლებლები ქმნიდნენ და ასეთები ძალიან ცოტანი იყვნენ... დღევანდელი გადმოსახედიდან, როცა მასწავლებლების და სწავლების სტანდარტებს ვაფასებ, მხოლოდ ერთი მასწავლებელი მახსენდება, რომელიც დღევანდელ სკოლასაც დაამშვენებდა თავისი მიდგომებით, დამოკიდებულებით, შემოქმედებითი აზროვნებით, სახალისო აქტივობებით, საქმისადმი ერთგული დამოკიდებულებით და სიყვარულით. ეს ჩემი რუსული ენის მასწავლებელი როზა სტეფანიანი იყო. ახლაც მიკვირს, ამას როგორ ახერხებდა, მას ხომ არანაირი თანამედროვე ძვირადღირებული ტრენინგი არ ჰქონდა გავლილი. ამიტომ ვამტკიცებ, რომ მასწავლებლობა ნიჭი და უნარია, რომელიც ან გაქვს, ან არ გაქვს!..

ღონისძიებაზე
ღონისძიებაზე

- გამომდინარე იქიდან, რომ ფიზიკა-მათემატიკური ფაკულტეტი აირჩიეთ, შემოქმედებითი ძიების მოყვარული ბუნება გაქვთ... 

- საერთოდ, იმდენი საგანი და თემა მაინტერესებდა, რომ გამიჭირდა პროფესიის არჩევა. წერა მიყვარდა ძალიან, ჟურნალისტობაც მომწონდა, ლიტერატურასა და პოეზიაზე დღესაც „ჭკუა მეკეტება“, მასწავლებლად კი, ასე მგონია, დავიბადე. მათემატიკაში მომწონდა გზების ძიება, „გემრიელ“ ამოცანაში „გემრიელ“ გზას რომ ვიპოვიდით გაკვეთილზე, ეს იყო ჩემთვის კმაყოფილების ზენიტი. კარგი კლასი მყავდა და სულ შემოქმედებით ძიებაში ვიყავით. ბოლოს ისე გამოვიდა, რომ ძალიან ბევრი ჩემი ახლობლის გასაკვირად ფიზიკა-მათემატიკის ძალიან საინტერესო გზაზე შევდექი.

თამარ უთნელიშვილი ოჯახთან ერთად
თამარ უთნელიშვილი ოჯახთან ერთად

- რა გამოცდილება შეიძინეთ პროფესიული განვითარების ეროვნულ ცენტრში?

- მასწავლებელთა პროფესიული განვითარების ცენტრში მუშაობამ დიდი გამოცდილება შემძინა. ეს იყო ის სიახლეები, რაც აპრობირებულია მსოფლიოში და ჩვენ ერთად ვეძებდით ჩვენზე მორგებულ მეთოდებს. ეს იყო განათლების კორიფეებთან ურთიერთობისა და გამოცდილების გაზიარების კარგი შესაძლებლობა. მაგრამ ჩემი ტრენერობის იდეალური გამოცდილება იყო ე.წ. G-Pried (საქართველოს დაწყებითი განათლების) პროექტი, რომელიც თავისი მაღალი ორგანიზებულობით, საინტერესო პროცესუალური მიდგომებითა და რესურსებით საუკეთესოა დღემდე არსებულ საგანმანათლებლო მოდულებს შორის.

კოლეგებთან ერთად
კოლეგებთან ერთად

- კერძო სკოლის დაარსების იდეა როდის გაგიჩნდათ?

- კერძო სკოლის დაარსების იდეა გამიჩნდა მას შემდეგ, რაც ამის შესაძლებლობა მომეცა. მანამდე იყო ოცნება ისეთი სკოლის არსებობის შესახებ, სადაც იქნებოდა კეთილგანწყობილი, უშუალო გარემო, კვალიფიციური, საქმეზე და ბავშვებზე შეყვარებული მასწავლებლები, ბავშვების აზროვნების და შემეცნების აბსოლუტური თავისუფლება, მხიარული და საინტერესო სასწავლო პროცესი, როცა ბავშვებს სკოლაში მიუხარიათ და მერე სკოლის დატოვება ეძნელებათ.

კოლეგებთან ერთად
კოლეგებთან ერთად

- ობიექტურად რომ ვიმსჯელოთ, რით გამოირჩევა თქვენი სკოლა?

- ჩვენი სკოლა სხვა სკოლებისგან იმით გამოირჩევა, რომ ზემოთ ჩამოთვლილ პირობებს არ ვღალატობთ. გაძლიერებული ქართული ენის, მათემატიკის და უცხო ენების პროგრამა გვაქვს, მოსწავლეთა მცირე რაოდენობა, მათ მზადყოფნაზე მორგებული პროგრამები და პროფესიონალი კადრები იმის საშუალებას იძლევა, რომ ჩვენს მოსწავლეებს რეპეტიტორი არ დასჭირდეთ. გორი პატარა ქალაქია და ადვილია, რომ ამა თუ იმ ადამიანზე წარმოდგენა შეიქმნა. მასწავლებლებიც ძალიან ფრთხილად შევარჩიეთ, აუცილებელ მოთხოვნებად დავაწესეთ საგნის ცოდნა, საქმის და ბავშვების სიყვარული, სიახლის მაძიებლობის და საქმისადმი შემოქმედებითი მიდგომის უნარი.

თამარ უთნელიშვილი გადაღების დროს
თამარ უთნელიშვილი გადაღების დროს

- თქვენი ცხოვრება მთლიანად ქალაქ გორთან არის დაკავშირებული, ვირტუალური მეგზურობა რომ გაუწიოთ მკითხველს, რომელ საინტერესო ფაქტებს ახსენებდით ამ ქალაქთან დაკავშირებით, გარდა იმისა, რაც მსოფლიოში უკვე იციან?

- გორი ჩემი სახლია, მის ქუჩებში სიარულისას მგონია, რომ ჩემ ეზოში დავდივარ. აქ ყველა ერთმანეთს იცნობს და ეფერება. ქალაქში ბევრი საინტერესო და ღირსშესანიშნავი ადგილი გვაქვს, მარტო უნიკალური ქვაში ნაშენი უფლისციხე და გორის ციხე რად ღირს, ან ჩვენი ეთნოგრაფიული მუზეუმი შესანიშნავი ექსპონატებით. თუნდაც არაჩვეულებრივი ატენის ხეობა, მისი სიონი, შესანიშნავი შემოქმედი ადამიანები, ქალთა და გოგონათა ცნობილი კაპელა, ცნობილი სპორტსმენები, გორის უძველესი დრამატული თეატრი, კერამიკის მუზეუმი. ეს ხომ იაკობ გოგებაშვილის, ოთარ ჩხეიძის, მერაბ მამარდაშვილის, ეკატერინე გაბაშვილის, კირიონ II-ის, ნიკო სამადაშვილის, ნიკო ლომოურის, ანტონ ფურცელაძის, ივანე მაჩაბლის, ნიკო კეცხოველის, სულხან ცინცაძის, ილიკო სუხიშვილის მშობელი მხარეა... მეტი რა ქნას ამ პატარა ქალაქმა?!.

 

1243
„ქართული ოცნების“ წინასაარჩევნო ბანერი

NDI საქართველოში არჩევნების დისტანციურ დაკვირვებას იწყებს

0
(განახლებულია 23:06 21.09.2020)
საქართველოში საარჩევნო პროცესების გაძლიერების ხელშეწყობის მიზნით NDI შეგროვებულ მონაცემებს შუალედურ და არჩევნების შემდგომ ანგარიშებში გამოიყენებს

თბილისი, 21 სექტემბერი – Sputnik. აშშ-ის ეროვნული დემოკრატიული ინსტიტუტი (NDI) საქართველოში საარჩევნო პროცესის გრძელვადიან დისტანციურ დაკვირვებას იწყებს, ნათქვამია ორგანიზაციის ვებგვერდზე.

საპარლამენტო არჩევნები საქართველოში 31 ოქტომბერს გაიმართება. არჩევნები შერეული სისტემით ჩატარდება - 120 დეპუტატს პარტიული სიებით აირჩევენ, 30-ს - ერთმანდატიან ოლქებში.

NDI-ის საქართველოს წარმომადგენლობის ინფორმაციით, აღნიშნული პროგრამა აგვისტოში გამოქვეყნებული წინასაარჩევნო ანგარიშის (Georgia Election Watch) დასკვნებსა და რეკომენდაციებს დაეყრდნობა და საჭიროების შემთხვევაში მეორე ტურების ჩათვლით გაგრძელდება.

ანალიტიკოსების გუნდი შვიდ გრძელვადიან დამკვირვებელსა და პროგრამის დირექტორს მოიცავს. ისინი არჩევნებთან დაკავშირებულ სხვადასხვა საკითხს შეისწავლიან, მათ შორისაა: საარჩევნო კამპანია, საარჩევნო ადმინისტრაცია, მედია და საინფორმაციო სივრცე, გენდერი და ჩართულობის საკითხები და კორონავირუსის გავლენა არჩევნებზე.

„თითოეულ ამ საკითხზე პროგრესისა და გამოწვევების შესაფასებლად, გრძელვადიანი დამკვირვებლები თბილისში მყოფ ასისტენტებთან და NDI-ს თანამშრომლებთან ერთად დისტანციურად იმუშავებენ და სხვადასხვა საინფორმაციო და ანალიზის ონლაინ პლატფორმებს გამოიყენებენ. NDI შეგროვებულ მონაცემებს შუალედურ და არჩევნების შემდგომ ანგარიშებში გამოიყენებს, რათა ხელი შეუწყოს საქართველოში საარჩევნო პროცესების გაძლიერებას“, - აღნიშნავენ ორგანიზაციაში.

არჩევნები და კორონავირუსი: საერთაშორისო დამკვირვებლებისთვის ჩარტერული რეისები დაინიშნება >>

ადრე ორგანიზაციაში აღნიშნეს, რომ გლობალური პანდემია კვლავ უკონტროლოა მრავალ ქვეყანაში, მათ შორის აშშ-ში. სწორედ არსებული საერთაშორისო ვითარებისა და რისკების გათვალისწინებით ორგანიზაციამ გადაწყვიტა, არ გამოგზავნოს თავისი დამკვირვებლები საქართველოში.

0
თემები:
საქართველოს საპარლამენტო არჩევნები 2020