ირინა კაჟილოტი

კეჟერა ფხალი ამერიკელების სუფრაზე და თბილისური ეზოს ნოსტალგია

805
(განახლებულია 23:39 29.06.2020)
უკვე მივეჩვიეთ იმ ფაქტს, რომ თბილისს მართლა აქვს მხოლოდ მისთვის დამახასიათებელი ხიბლი და ანდამატი, რომელსაც უცხოეთში წლობით ცხოვრებაც ვერ გადაფარავს და გავიწყებს. ამის დასტური ეს ისტორიაცაა.

წლების წინ თბილისიდან ამერიკაში საცხოვრებლად ქართველი ებრაელების ეს ოჯახიც გადავიდა. ბევრისგან განსხვავებით მათ დღემდე შეინარჩუნეს ქართული ტრადიციები და ურთიერთობები, ოჯახის დისახლისმა ირინა კაჟილოტმა კი ქართული სამზარეულოსადმი სიყვარული შორეულ ამერიკაში პროფესიად აქცია. მას შემდეგ, რაც კარგად აითვისა ნუტრიციოლოგია (მეცნიერება ჯანსაღი კვების, სწორი რაციონისა და ცხოვრების წესის შესახებ), ქართული სამზარეულოს განსაკუთრებულ გემოსა და ჩვენი ფხალეულის სასარგებლო თვისებებზე ყველას ესაუბრება. გარდა ამისა, კერძების დამზადებისა და სუფრის გაწყობის ესთეტიკურ მხარეზეც ზრუნავს.

ირინა კაჟილოტი
ირინა კაჟილოტი

- ქალბატონო ირინა, როგორია თქვენი ცხოვრების ისტორია, რომელიც საქართველოსთან გაკავშირებთ?

- დავიბადე თბილისში, ქართველ ებრაელთა ოჯახში. მეორე კლასამდე ბარათაშვილის აღმართზე ვიზრდებოდი ტრადიციულ, თბილისურ ეზოში, სადაც ყველა ეროვნების ადამიანი უდიდეს სიყვარულში და პატივისცემაში ვცხოვრობდით. ვართ ორი და და ერთი ძმა. დედა ზინა კოჟიაშვილი საოცრად თბილი და სტუმართმოყვარე ქალბატონი, არაჩვეულებრივი დიასახლისი იყო. ვფიქრობ, კულინარიისადმი ჩემი სიყვარული სწორედ მისი დამსახურებაა. მამა დავით (დოდიკ) მიხელაშვილი უაღრესად თავმდაბალი, ერუდირებული და საკმაოდ გავლენიანი პიროვნება იყო – მას საკავშირო მასშტაბით სამხედრო მაღაზიების ქსელების მომარაგება ევალებოდა. ჩემს მშობლებს ძალიან უყვარდათ მუსიკა და საერთოდ ხელოვნება. მამა იყო ცნობილი თამადა, რომლის უნიკალური ხმა და სადღეგრძელოები ყველა სუფრას ამშვენებდა. დავამთავრე 162-ე სკოლა, ჩავაბარე მაშინდელ „გეპეიში“ ქიმიურ ფაკულტეტზე, მაგრამ სწავლა მეორე კურსიდან მივატოვე, რადგან 1987 წელს მამამ მიიღო მისთვის რთული გადაწყვეტილება – ამერიკაში ემიგრაციის შესახებ…  

დედასთან ერთად
დედასთან ერთად

- ვიცი, რომ თქვენს ოჯახს ძალიან უყვარს საქართველო და ალბათ გაგიჭირდათ ქვეყნის დატოვება...

- მშობლები საქართველოს მოტრფიალე და მოსიყვარულე ადამიანები იყვნენ, ამიტომ მათთვის წარმოუდგენელი იყო სამშობლოს და წინაპრების საფლავების დატოვება და ცხოვრების თავიდან დაწყება უცხო კონტინენტზე, მაგრამ ეს გადაწყვეტილება მაინც მიიღეს. პირველებმა ამერიკაში წასვლა ადრეულ 80-იანებში ჩემმა უფროსმა დამ, მზიამ და მისმა მეუღლემ მერაბ კრიხელმა გადაწყვიტეს. ისინი დღეს ნიუ-იორკში წარმატებული ექიმები არიან. ჩემი მშობლებისთვის მნიშვნელოვანი იყო, რომ მათი შთამომავლობა – შვილები, შვილიშვილები და შვილთაშვილები ერთად ყოფილიყვნენ და ერთმანეთი არ დაეკარგათ. ნიუ-იორკის ერთ-ერთ უბანში, Forest Hill-ში დავსახლდით. იმ დროს თითქმის ყველა ქართველი ემიგრანტი ამ უბანში სახლდებოდა და თავის ამერიკულ ცხოვრებას აქ იწყებდა. ბედმა ჩემს მეორე ნახევართანაც ამ უბანში შემახვედრა. აქ ჩამოსვლისთანავე გავიცანი თბილისიდან ემიგრირებული ზურა კაჟილოტი და ოჯახის შექმნა ძალიან მალე გადავწყვიტეთ. ზურას მიღებული აქვს განათლება კლასიკური გიტარის განხრით და სიმღერებს სამ ენაზე წერს. მისი ახალი სიმღერის თემა მსოფლიო პანდემია და მისგან შექმნილი პრობლემებია. ჩვენ გვყავს ორი ქალიშვილი, გაბრიელა და სტეფანი. გაბრიელა ერთ-ერთი ცნობილი დიზაინერული ბრენდის Alice & Olivia-ს გენერალური დირექტორია, ხოლო ნაბოლარა, სტეფანი მუსიკალური სააგენტო MTheory-ს მარკეტინგის დეპარტამენტის წევრია.

- ქართულ ტრადიციებს თუ იცავთ ამერიკაში?

- ჩვენი ქვეყნისადმი უზომო სიყვარული და ნოსტალგია ყოველწლიურად უფრო და უფრო ძლიერდება ყველა ჩვენგანის გულში. ამიტომ ამერიკაში ჩვენმა ოჯახმა მაქსიმალურად შეინარჩუნა ქართული ტრადიციები, ეს იქნება სტუმარ-მასპინძლობა, ახლობლებთან ურთიერთობა, დღესასწაულების აღნიშვნა, სამზარეულო თუ ქართული ენის სწავლა მომავალი თაობისთვის. ჩვენს ოჯახში ყოველ სუფრაზე ტრადიციულად საქართველოს სადღეგრძელოც ისმება და ქართული ჰანგებიც ისმის. საახალწლო სუფრას კი გვიმშვენებს გოზინაყი, ჩურჩხელები, ხაჭაპური და ფხალეულობა. კულინარია ჩემი ბავშვობის განუყრელი ნაწილია, რომელიც დედასთან ასოცირდება.

ირინა კაჟილოტის კულინარიული ნახელავი
ირინა კაჟილოტის კულინარიული ნახელავი

- ამერიკაში კულინარიის სფეროში მოხვდით, როდის გაგიჩნდათ კულინარიული ხელოვნებისდამი ინტერესი?

- კულინარია ისეთივე ხელოვნებაა, როგორც სიმღერა და ხატვა. ეს არის ნიჭი, რომელიც შეიძლება თანდაყოლილიც იყოს და შეძენილიც. ეს არ არის მხოლოდ გემრიელი საკვები, ეს არის სწორი ხედვა, სწორად შერჩეული ინგრედიენტების ბალანსი. ვიზუალური მხარე და ფერების კომბინაცია არა მხოლოდ მრავალფეროვანი გემოსთვისაა, არამედ ადამიანის ჯანმრთელობისთვის, რასაც დღეს მსოფლიოში უდიდესი ყურადღება ექცევა. ნუტრიციოლოგია არის მეცნიერება ჯანსაღი კვების, სწორი რაციონისა და ცხოვრების წესის შესახებ.

ირინა კაჟილოტის კულინარიული ნახელავი
ირინა კაჟილოტის კულინარიული ნახელავი

- ამ მეცნიერებით როდის დაინტერესდით?

- ამ მეცნიერებით 90-იანებში სრულიად შემთხვევით დავინტერესდი, როდესაც მორიგი არასწორი დიეტის დროს საავადმყოფოში ნაღვლის ბუშტის მწვავე შეტევით მოვხვდი, რასაც შემდგომ ოპერაცია მოჰყვა. სულ მალე ჩემი მეგობარი, რომელიც ასეთივე დიეტას იცავდა, ანალოგიური სიმპტომებით მოხვდა ექიმთან. ამ ამბავმა ძალიან დამაფიქრა და დავიწყე გამოკვლევა. Dr. Andrew Weil-ის მიერ გამოქვეყნებულმა ნაშრომებმა სწორი კვების და ჰოლისტიკური მედიცინის ზეგავლენაზე სხვადასხვა დაავადებებზე იმდენად დამაინტერესა, რომ გადავწყვიტე ეს სფერო ძირფესვიანად შემესწავლა. დავამთავრე ინტეგრაციული ნუტრიციოლოგიის ინსტიტუტი, სადაც ისწავლებოდა ინდივიდუალური მიდგომა თითოეული ადამიანის მიმართ მათი ჯანმრთელობის, წარმოშობის, ცხოვრების წესის, გენეტიკის და სოციალური სტატუსისად გამომდინარე.

ირინა კაჟილოტის კულინარიული ნახელავი
ირინა კაჟილოტის კულინარიული ნახელავი

- ამერიკაში დიდ ყურადღებას აქცევენ ჯანსაღ კვებას, მაგრამ მიუხედავად ამისა, ამერიკელების უმრავლესობა მაინც რატომ უჩივის ჭარბ წონას?

- ჭარბი წონა 21-ე საუკუნის დაავადებათა შორის ყველაზე მეტად გავრცელებულია, ეს არის კაცობრიობის მიერ ხელოვნურად შექმნილი ეპიდემია. ამჟამად ამერიკის მოსახლეობის 1/3 ჭარბწონიანია. ეს იმის გამოა, რომ მოსახლეობის უმეტესობას არა აქვს საკმარისი ცოდნა, სურვილი, დრო და საშუალება, რომ მოამზადონ ჯანსაღი საკვები. ისინი ძირითადად სწრაფი კვების ობიექტებში იკვებებიან, რაც იწვევს ორგანიზმში ნივთიერებათა ცვლის დარღვევას, ანთებებს, წონის მატებას და უწყობს ხელს ქრონიკული დაავადებების ჩამოყალიბებას როგორც მოზრდილებში, ასევე ბავშვებში.

- თქვენი ამერიკული დილა როგორ, რა საკვებით იწყება?

- მე ყოველ დილას ვიწყებ კენკროვანი ხილით და სელის ზეთით, რომელიც ჰორმონების ერთ-ერთი დასაბალანსებელი საშუალებაა. ასევე ლიმნიანი ცხელი წყლით, რაც შეიცავს ბევრ სასარგებლო მინერალსა და ვიტამინ C-ს, აძლიერებს იმუნურ სისტემას, ეს ხელს უწყობს ორგანიზმის სწორად გამოღვიძებას, აწესრიგებს ნერვულ სისტემას და არეგულირებს არტერიულ წნევას. წყალი ხელს უწყობს ორგანიზმის გაწმენდას და მისგან ტოქსინებისა და შლაკების გამოდევნას. არაფრით არ შეიძლება ახალგაღვიძებულ ორგანიზმს მძიმე საკვები რომ მიეწოდოს. ყველას ვურჩევ, რომ გაიმზადონ საკვები, რომლის 50%-ს სხვადასხვა სახის ბოსტნეული შეადგენს. ხოლო საკვების მეორე 50% უნდა იყოს პროტეინის წყარო და კარბოჰიდრატები (ნახშირწყლები). თუ ადამიანს წონის დაკლება სურს, ცხიმი და კარბოჰიდრატი ერთმანეთს არ უნდა აურიოს.

- ქართული სამზარეულო რამდენად პოპულარულია ამერიკაში?

- ბოლო დროს ქართული სამზარეულო ძალიან პოპულარული გახდა შტატებში. ბევრი რესტორანი გაიხსნა და, თქვენ წარმოიდგინეთ, იქ შესვლაზე ამერიკელების რიგი დგას. რა თქმა უნდა, ხაჭაპური და ხინკალი აქ უკვე ყველამ იცის.

ირინა კაჟილოტის კულინარიული ნახელავი
ირინა კაჟილოტის კულინარიული ნახელავი

- ქართული კერძები გემრიელია, მაგრამ ძირითადად ცხიმიანია..

- ასეა, ამიტომ ვცდილობ, რომ ყველას გავაგებინო ქართული სამზარეულოს ჯანმრთელი კერძებიც, რომელსაც, მე, როგორც ნუტრიციოლოგი, ძალიან ვაფასებ. მხედველობაში მაქვს ჩვენი ფხალეული, რომელიც ჯანმრთელობისთვის სასწაულად სასარგებლოა. ვერ წარმოიდგენთ, რამდენ ამერიკელ კლიენტს ვასწავლე მათი მომზადება და ისინი სიამოვნებით აკეთებენ (ამაში შეგიძლიათ დარწმუნდეთ, თუ ჩემს ინსტაგრამს -@ikwellness-იხილავთ). ყოველმა ჩვენგანმა უნდა შევისწავლოთ საკუთარი თავი, დავაკვირდეთ, თუ რომელი პროდუქტი გვიხდება – ენერგიას რომელი გვმატებს, ან რომელი გვამძიმებს და გვთენთავს. თქვენს მკითხველს ვურჩევდი, რომ თავი მოარიდონ შაქარს, რადგან უმეტესობა დაავადებებისა სწორედ შაქრით საზრდოობს. გირჩევთ დღეში 3-4-ჯერ, მაგრამ პატარა ულუფებით იკვებოთ.

ქალიშვილის ქორწილში
ქალიშვილის ქორწილში

- პანდემიამ თქვენი გეგმებიც ხომ არ შეცვალა?

- ორი კვირის წინ ჩვენი უმცროსი გოგონა სტეფანი გაგვითხოვდა. 7 ივნისს გრანდიოზული ქორწილი გვქონდა დაგეგმილი, ველოდებოდით სტუმრებს მსოფლიოს სხვადასხვა ქვეყნებიდან, მათ შორის საქართველოდანაც. სამწუხაროდ, პანდემიის გამო 500-კაციანი ღონისძიების მაგივრად 30-კაციანი მყუდრო, მაგრამ საკმაოდ მხიარული ქორწილის ჩატარება მოგვიწია. მე ჩავიბარე სამზარეულო, დეკორი, მენიუს შედგენა და ორგანიზაციული საკითხები, ზურამ კი მუსიკალური გაფორმება, ეზოს მომზადება და კონფერანსიობა ითავა. მიუხედავად იმისა, რომ ჩემი ქალიშვილი ამერიკაშია დაბადებული და სიძე ამერიკელია, მათ გადაწყვიტეს, რომ პატარძლის შემოსვლა მომხდარიყო ქართულ სიმღერაზე “ვისია, ვისია ქალი ლამაზი”, ეს კი სტუმრებისთვის იმდენად მოულოდნელი სიურპრიზი აღმოჩნდა, რომ ნეფე-პატარძალს ყველა აცრემლებული შესცქეროდა. საქორწილო სუფრას ქართული კერძები, მინერალური წყალი და ჩვენებური ჭაჭა ამშვენებდა. ცეკვა-თამაში კი ქართულად, დილამდე გაგრძელდა...

- იქიდან გამომდინარე, რაც ახლა მომიყევით, ალბათ აღარ უნდა გისვამდეთ ამ კითხვას, მაგრამ მაინც, საქართველო რა არის თქვენთვის?

- საქართველო ჩემი სამშობლოა, ბედნიერი და უდარდელი ბავშვობა, ტკბილი მოგონებები, ჩემი ეზო, სადაც დილიდან საღამომდე მე და ჩემი უფროსი ძმა თამაზი ვთამაშობდით, ბავშვობის მეგობრებია, რომლებთანაც დღემდე მაქვს ურთიერთობა, მიუხედავად იმისა, რომ ერთმანეთი 30 წელზე მეტია არ გვინახავს. მენატრება გაზაფხულზე იების პირველი კონა, რომელსაც მოხუცი ბებოსგან ყოველ წელიწადს ყიდულობდა ჩემთვის სკოლიდან მომავალი თამაზი, მენატრება ჩემი ამბიციური როზა ბებია და მისი სიმღერები, რომლებსაც მამიკოსთან ერთად ორ ხმაში ასრულებდა, საოპერო და თეატრალური პრემიერები. კიდევ მენატრება ჩემი ძველი უბანი, ჭრელი აბანოების გოგირდის სუნი და ამწვანებული ზაფხული. ოცნებად მაქვს, რომ ახლო მომავალში ქართულ მიწაზე დავდგა ფეხი...

 

805
ქეთევან ქარჩავა

როგორ აქციო ჰობი შემოსავლის წყაროდ: ხავერდის დახვეწილი ჩანთები ქეთევან ქარჩავასგან

390
(განახლებულია 20:02 10.07.2020)
ბევრ ადამიანს აქვს ჰობი, რომელიც ხელსაქმეს უკავშირდება. ზოგს ქარგვა იზიდავს, ზოგს ქსოვა, ზოგს კერვა. ბევრი ახერხებს თავისი გატაცება შემოსავლის წყაროდ აქციოს.

ქეთევან ქარჩავა პროფესიით ისტორიკოსია, თუმცა პროფესიით არასოდეს უმუშავია. ყოველთვის სურდა საკუთარი საქმე ჰქონოდა. გზა, რომლიც ქალბატონმა ქეთევანმა დიასახლისობიდან დღემდე გაიარა, არ იყო მარტივი. დღეს უკვე საკუთარი ბიზნესი აქვს. ხავერდისგან ულამაზეს ჩანთებს ქმნის, რომელსაც თავისივე ხელით დიდი რუდუნებით ქარგავს.

ქეთევან ქარჩავა
photo: courtesy of Ketevan Karchava
ქეთევან ქარჩავა

- პროფესიით ისტორიკოსი ვარ, თუმცა ჩემი პროფესიით არასოდეს მიმუშავია, ვიყავი უბრალოდ დიასახლისი. ვერ ვიტყვი, რომ ამ გადაწყვეტილებით კმაყოფილი ვიყავი, რადგან მუდმივად ვცდილობდი შემევსო ის დანაკლისი, რასაც პროფესიულად ვერ რეალიზება იწვევდა. კითხვა მიყვარდა ბავშვობიდან და ბევრს ვკითხულობდი, ვეძებდი სხვადასხვა გატაცებებს, მებაღეობაც კი ვცადე სახლის პირობებში. კერვა, ხატვა, თექაზე მუშაობა, თუმცა ეს გატაცებები ხანგრძლივი არ აღმოჩნდა. მიუხედავად ამისა ყველა მათგანმა გარკვეული კვალი დატოვა ჩემი გემოვნებისა და თვითრწმენის ჩამოყალიბებაში.

შვილების გაზრდის მერე უფრო მწვავედ ვიგრძენი, რომ რაღაც მჭირდებოდა, რაც ჩემს, როგორც დიასახლისის ცხოვრებას უფრო საინტერესოს გახდიდა. ამავე დროს საკუთარ თავს დავუმტკიცებდი, რომ ნებისმიერ ასაკში შესაძლებელია შენი ცხოვრება გახადო უფრო საინტერესო და ნაყოფიერი.

ხელნაკეთი ჩანთები
photo: courtesy of Ketevan Karchava
ხელნაკეთი ჩანთები

- ვინ იყო ადამიანი, ვინც ამ პერიოდის განმავლობაში სტიმულს და მოტივაციას გაძლევდათ, გვერდით გედგათ და ყველაზე მეტად გამხნევებდათ?

- მთელი ამ თვითძიების პროცესს ჩემი მეუღლე, ძალიან წარმატებული იურისტი, ინტერესით, ცოტა იუმორით, მაგრამ საკმაოდ გაგებით ეკიდებოდა, რაც არ იყო მარტივი ამ გადმოსახედიდან. ჩემი ინტერესები და გატაცებები ელვის სისწრაფით იცვლებოდა, რაც საკმაო დისკომფორტს იწვევდა ოჯახში. ჩემი მეუღლეა ის ადამიანი, რომელიც დღემდე მხარს უჭერს ყველა ჩემს წამოწყებას და იდეას. ინსპირაციის წყარო კი ჩემი ქალიშვილია, რომელსაც ბავშობიდან დღემდე ნებით თუ ძალით ვარგებ ჩემ მიერ შექმნილ სამოსს თუ აქსესუარებს.

ხელნაკეთი ჩანთები
photo: courtesy of Ketevan Karchava
ხელნაკეთი ჩანთები

- როგორი იყო თქვენი პირველი ნაბიჯები ამ სფეროში?

- დაახლოებით 2015 წელს შევქმენი ონლაინ-გვერდი „ფეისბუქზე“. მაშინ ვმუშაობდი თექაზე, ფაქტიურად ამ დროიდან გარდაიქმნა ჰობი საქმიანობად. მიმიწვიეს რამდენიმე ჯგუფურ გამოფენაზე საქართველოში და საზღვარგარეთ, ინტერვიუ მთხოვა რამდენიმე ტელეარხმა, გაიყიდა ბევრი ნამუშევარი, შემომთავაზეს ტრადიციული რეწვის ასოციაციის წევრობა.  ამ ყველაფერმა დიდი გავლენა მოახდინა ჩემზე, როგორც თვითნასწავლ შემოქმედზე. ასევე მინდა ვთქვა, ყველაზე მასტიმულირებელი იყო ადამიანების აღტაცება ჩემი ნამუშევრებით. გარკვეული დროის მერე თექის ჩანთაზე ამოქარგვა დავიწყე, ქარგვამ ძალიან გამიტაცა. შემდეგ ქსოვილზე ვცადე და დღემდე მხოლოდ ქარგვით და კერვით ვარ დაკავებული. გასაკუთრებით ხავერდზე მომწონს ქარგვა, რადგან თვითონ ეს ქსოვილი განსაკუთრებულად ლამაზი და შესახებად სასიამოვნოა.

ხელნაკეთი ჩანთები
photo: courtesy of Ketevan Karchava
ხელნაკეთი ჩანთები

- ხავერდზე მუშაობა რთული არ არის?

- მასზე საკმაოდ რთულია მუშაობა და ესკიზის გადატანა, ამიტომ პირდაპირ ვქარგავ და არასოდეს ვიცი რა იქნება საბოლოო შედეგი, ასე უფრო საინტერესოა ჩემთვის. აქვე მინდა აღვნიშნო, ბებიას უყვარდა ქარგვა. მახსოვს, ბავშვობაში ძალიან ლამაზი საზეიმო კაბა მომიქარგა, მამიდაც ქარგავდა და კერავს დღემდე, მეც ალბათ მათგან გამომყვა ხელსაქმის სიყვარული.

ხელნაკეთი ჩანთა
photo: courtesy of Ketevan Karchava
ხელნაკეთი ჩანთა

- როგორ ფიქრობთ, რით არის თქვენი ჩანთები გამორჩეული, როგორ დაიპყარით ამდენი ქალბატონის გული?

- ჩემი ჩანთები ვინტაჟური სტილისაა. ასე მგონია, მე-19 საუკუნის ვიქტორიანული სული ცოცხლდება მათში. აქ ალბათ გავლენას ახდენს ჩემი სიყვარული ისტორიისადმი. ასევე მიყვარს ბუნება, ყვავილები, ყველაფერი, რაც ცოცხალია და სუნთქავს. ვფიქრობ, რაც იზიდავს ქალბატონებს ჩემ მიერ შექმნილ აქსესუარებში, არის ცოტაოდენი რომანტიზმი, ფერთა გამა, ყვავილების სილამაზე და, რა თქმა უნდა, ხარისხი.

ასევე მინდა ვთქვა, ყველა ნივთი იქმნება დიდი სიყვარულით და გულმოდგინებით, ყველა მათგანი გამორჩეულია ინდივიდუალიზმით, რადგან არ კეთდება შაბლონით. მე მათში ვქარგავ ჩემი სულის ნაწილს და ამიტომაც ვფიქრობ, რომ ყველა ჩემ მიერ შექმნილი აქსესუარი ჰყვება ამბავს. ხანდახან მიჭირს კიდევაც მათთან განშორება.

ხელნაკეთი ჩანთები
photo: courtesy of Ketevan Karchava
ხელნაკეთი ჩანთები

- ყველაზე დიდი მოთხოვნა როგორი სტილის ჩანთებზეა?

- ვერ გეტყვით, რადგან რასაც ვაკეთებ, თითქმის ყველაფერი იყიდება. ხანდახან რომელიღაც მოდელის გამეორებას მთხოვენ, თუმცა იდენტურის გაკეთება შეუძლებელია. ძირითადად მენდობიან და მაძლევენ შემოქმედებით თავისუფლებას. ასეთი დამკვეთების მიმართ საოცრად კეთილგანწყობილი ვხდები და ნამუშევარიც შესაბამისი გამოდის.

ხელნაკეთი ჩანთები
photo: courtesy of Ketevan Karchava
ხელნაკეთი ჩანთები

- ჩანთების გარდა სხვა აქსესუარებასაც ამზადებთ?

- დიახ, ჩანთების გარდა ამ ეტაპზე ვაკეთებ მოქარგულ გულსაკიდებს, საყელოებს, თმის რკალებს, ყაბალახებს და შარფებს.

- სამომავლოდ რა გეგმები გაქვთ?

- წინასწარ ამის პროგნოზირება რთულია, თუმცა მომხმარებელს ვპირდები საინტერესო და ხარისხიან ნამუშევრებს. ზოგადად, გადაწყვეტილებებს სწრაფად ვიღებ. ცვლილებები არ მაშინებს. ამ ეტაპზე ვმუშაობ ინტერნეტ–გაყიდვების გაზრდაზე და ამიტომაც ვგეგმავ სოციალურ ქსელებში მეტად გააქტიურებას. ასევე ჩემი სამომავლო გეგმაა უცხოეთის ბაზარზე ნამუშევრების გატანა.

390
შეყვარებულები

ქალი ქორწინებამდე პროვოკატორია, ქორწინების შემდეგ...

367
(განახლებულია 16:48 09.07.2020)
უცოლო მამაკაცმა ერთმნიშვნელოვნად უფრო მეტი იცის ქალების შესახებ, ვიდრე ცოლიანმა. სხვაგვარად ისიც უკვე ცოლიანი იქნებოდა...

აზრების ფოიერვერკი" წარმოგიდგენთ ჰენრი ლუის მენკენის მოსაზრებებს.

ჰენრი ლუის მენკენი (Henry Louis Mencken, 1880-1956) ამერიკელი ჟურნალისტი, ესეისტი, სატირიკოსი; როგორც ფრენსის სკოტ ფიცჯერალდმა აღნიშნა, „ადამიანი, რომელმაც ამერიკული ლიტერატურისთვის ყველაზე მეტი გააკეთა".

თუ ვინმეს მართლა უყვარდი და გიღალატა, იცოდე, იგი ამას უშენოდ ვერ შეძლებდა…>>

ჰენრი ლუის მენკენმა დაამთავრა ზოგადსაგანმანათლებლო სკოლა „ბალტიმორის პოლიტექნიკური ინსტიტუტი". ეწეოდა ჟურნალისტურ მოღვაწეობას, ხოლო ლიტერატურულ მოღვაწეობას – ძირითადად მეოცე საუკუნის პირველ ოცწლეულში. მისი მთავარი ნაშრომებია: „ჯორჯ ბერნარდ შოუ. პიესები", „წინასიტყვაობათა წიგნი", „ცრურწმენები", „შენიშვნები დემოკრატიის შესახებ".

მან თავი გამოიჩინა, როგორც ბრწყინვალე ჟურნალისტმა და დააარსა ჟურნალი „ამერიკენ მერკური". ის ცნობილია, როგორც „ბალტიმორელი ბრძენი“ (Sage of Baltimore), ასევე „ბალტიმორის ანტიქრისტე". ის მეოცე საუკუნის პირველი ნახევრის ერთ-ერთ ყველაზე გავლენიან მწერლად მიიჩნევა.

რაც არ უნდა ბედნიერი იყოს ქალი ქორწინებაში, მაინც ყოველთვის კმაყოფილებით ამჩნევს, რომ არიან ამ ქვეყნად მამაკაცები, რომლებიც ისურვებდნენ, რომ ის გათხოვილი არ ყოფილიყო...

უცოლო მამაკაცმა ერთმნიშვნელოვნად უფრო მეტი იცის ქალების შესახებ, ვიდრე ცოლიანმა. სხვაგვარად ისიც უკვე ცოლიანი იქნებოდა.

ძნელი დასაჯერებელია, რომ ადამიანი სიმართლეს გეუბნებათ, როცა იცით, რომ თქვენ მის ადგილზე მოიტყუებოდით.

სიყვარული – წამება, უსიყვარულობა – სიკვდილი>>

მამაკაცი ეძებს ისეთ ვინმეს, რომლის წინაშეც მას სიამაყე შეუძლია. ქალი ეძებს მხარს, რომელსაც მიეყრდნობა...

როცა ქალი ქმარს სიტყვაზე ენდობა, ის ეჭვის საბაბს იძლევა.

უსამართლობის გადატანა შედარებით ადვილია. რაც ნამდვილად გვაყენებს ტკივილს - ეს სამართლიანობაა.

სიყვარული - ეს წარმოსახვის გამარჯვებაა გონებაზე.

მამაკაცი თავისი ბუნებით პოლიგამიურია. ერთი ქალი მისით ყოველთვის მანიპულირებს, ხოლო მეორე – კისერზე აზის.

სიყვარულში ბედნიერების უდიდესი საიდუმლოა – გიხაროდეს, რომ მასზე სხვა დაქორწინდა.

იდეალისტი – ეს არის ადამიანი, რომელიც, როცა აღმოაჩენს, რომ ვარდს კომბოსტოზე უკეთესი არომატი აქვს, მიდის დასკვნამდე, რომ ვარდისგან უკეთესი სუპი გაკეთდება.

მამაკაცები ბევრად უკეთესად ცხოვრობენ, ვიდრე ქალები. პირველ რიგში, ისინი გვიან ირთავენ ცოლს; მეორეც – ადრე კვდებიან.

სიყვარული – არა რაოდენობა, არამედ ხარისხი, რომელიც არ იზომება>>

ერთადერთი ნამდვილად ბედნიერი ადამიანები – ეს გათხოვილი ქალები და უცოლო მამაკაცები არიან.

ქალებს არ უყვართ მორცხვი მამაკაცები. კატებს არ უყვართ ფრთხილი თაგვები.

ქალები და მამაკაცები ერთ საკითხში თანხმდებიან: ორივენი არ ენდობიან ქალებს.

წარსულის წინაშე თავი დახარე, მომავლის წინაშე – სახელოები აიკაპიწე.

საყვარელი – მსხვერპლი ნომერი ორი.

ფსიქოთერაპია – ესაა მეცნიერება, რომელიც ამბობს, რომ პაციენტი, დიდი ალბათობით, გამოჯანმრთელდება, მაგრამ სამუდამოდ დარჩება ჩამოყალიბებული იდიოტი.

ქველმოქმედება და პატრიოტიზმი – მთავარი თვისებებია ამერიკელისა, რომელსაც რამის გაყიდვა სურს.

პატარძალი საკურთხეველთან: „როგორც იქნა! როგორც იქნა!“. სიძე: „უკვე ძალიან გვიანია! ძალიან გვიანი!“

ქალი ქორწინებამდე – პროვოკატორია; ქორწინების შემდეგ – ჟანდარმი.

მთელი ფილოსოფია, არსებითად, მიდის იმ აზრამდე, რომ ერთი ფილოსოფოსი ცდილობს დაამტკიცოს, რომ ყველა დანარჩენი ფილოსოფოსი სახედარია. ის, ჩვეულებრივ, ამას ახერხებს, უფრო მეტიც, ის დამაჯერებლად ამტკიცებს, რომ თვითონაც სახედარია.

შენთან ერთად. შენ წინააღმდეგ. უშენოდ...>>

რა ცოტაა საჭირო იმისთვის, რომ ცხოვრება აუტანელი გახადო! კენჭი ფეხსაცმელში, ტარაკანი მაკარონში, ქალის სიცილი!

ქმრები არასდროს ხდებიან კარგი; ისინი, უბრალოდ, გამოცდილებას იძენენ.

ჯენტლმენი – ესაა ადამიანი, რომელიც სიმართლეს ასიდან სულ ცოტა ოცდაათ შემთხვევაში ლაპარაკობს.

ყოველ წესიერ ადამიანს რცხვენია იმ მთავრობისა, რომლის მმართველობის დროსაც ცხოვრობს.

უცოლო – ეს ისაა, რომელსაც უნდა ცოლის შერთვა და თან, ამავე დროს, უხარია, რომ უცოლოა.

დემოკრატია – თეორია, რომლის შესაბამისად ორი ქურდი მოიპარავს ნაკლებს, ვიდრე ერთი; სამი – ნაკლებს, ვიდრე ორი; ოთხი – სამზე ნაკლებს და ასე, უსასრულობამდე.

სინდისი შინაგანი ხმაა, რომელიც გვაფრთხილებს, რომ ვიღაც გვითვალთვალებს.

სიმართლე ისეთი რამაა, რომელსაც, ასე თუ ისე, ვინმეს დისკრედიტირება შეუძლია...

გაზეთი – საშუალება, რომ უვიცი ადამიანები მეტად უვიცნი გახდნენ, ხოლო შეშლილნი – უფრო შეშლილნი.

იმედი – შეუძლებლის პათოლოგიური რწმენაა.

რატომ თხოვდება ქალი მეორედ და რატომ ქორწინდება მეორედ მამაკაცი>>

ჯოჯოხეთი – ადგილი, სადაც ათ მცნებას კანონი დევნის.

მამაკაცი შეიძლება სულელი იყოს, მაგრამ ამის თაობაზე ეჭვი არ ეპარებოდეს – მაგრამ მხოლოდ იმ შემთხვევაში, თუ უცოლოა.

ქმარი – ესაა ადამიანი, რომელსაც სულ თვალი უნდა ადევნო; კისრის ზომა – 16, საყელოს – 15,5.

ეჭვიანობა – თვალსაზრისი, რომლის თანახმად, ცუდი გემოვნებით მხოლოდ თქვენ არ გამოირჩევით.

მსახიობი – ადამიანი, რომელსაც ხის ფეხი უფრო უშლის ხელს, ვიდრე ხის თავი.

დემოკრატია – ესაა მეცნიერება და ხელოვნება, მართო მაიმუნების გალიისგან შემდგარი ცირკი.

დემოკრატია – ეს მხოლოდ ოცნებაა: ის ზღაპრული არკადიის, სანტა კლაუსისა და სამოთხის გვერდით დგას.

უზენაესი – კომედიანტი, რომლის მაყურებელს სიცილისა ეშინია.

ძალაუფლება – ღმერთისგან, იერარქია – ძალაუფლებისგან.

პურიტანობა – შიში, რომ ვიღაც სადღაც შეიძლება ბედნიერი იყოს.

კანონიერი, ნაკურთხი მრუშობა და წუთებად აკინძული ცხოვრება>>

ცუდად იფიქრო მოყვასზე – ცოდვაა, მაგრამ არა მგონია, რომ შეცდომა იყოს.

უცოლოებს ხანდახან სინდისი ქენჯნის. ცოლიანებს ამისთვის ცოლები ჰყავთ. „მე ჩემი ქმრის სინდისი ვარ“.

367
თემები:
აზრების ფოიერვერკი: ცნობილი ადამიანების ბრძნული გამონათქვამები
პროკურატურის შენობა

მოკლული ფეხბურთელის ოჯახი ყველა დამნაშავის დასჯას ითხოვს

0
(განახლებულია 22:53 10.07.2020)
პროკურატურის ცნობით, 19 წლის ფეხბურთელის გარდაცვალების მიზეზი ასფიქსია გახდა - ახალგაზრდა წყალში დაიხრჩო

თბილისი, 10 ივლისი - Sputnik. გიორგი შაქარაშვილი მოკლეს, შემდეგ კი მდინარე არაგვში გადააგდეს - ეს ცალსახად დადასტურებულია ექსპერტიზის დასკვნით, განაცხადა დაღუპული ფეხბურთელის ბიძამ, მირიან ნიკოლაძემ პარასკევს გამართულ სპეციალურ ბრიფინგზე. 

19 წლის ფეხბურთელი გიორგი შაქარაშვილი 22 ივნისს, ოთხდღიანი ძებნის შემდეგ  მდინარე არაგვში გარდაცვლილი იპოვეს. იგი  მეგობრის წვეულების შემდეგ დაიკარგა, სადაც სტუმრებს შორის მასობრივი კონფლიქტი მოხდა. საქმემ   საზოგადოებაში თავიდანვე რეზონანსი გამოიწვია – მომხდარ ფაქტთან მაღალჩინოსნების მეგობრების შესაძლო კავშირის შესახებ გავრცელებული ხმების გამო.

 „საქართველოსპროკურატურამ უკვე გამოაქვეყნა ექსპერტიზის დასკვნა, ამ დასკვნას ოჯახი დიდიხანია ველოდით,  ეს იყო ერთ-ერთი გარდამტეხი ეტაპი გამოძიებაში. სწორედ ამ ექსპერტიზის დასკვნის საფუძველზე უნდა დაგვედასტურებინა ჩვენი პოზიცია, რამდენად რეალური იყო ოჯახის ვერსია გიორგის განზრახ მკვლელობასთან დაკავშირებით“, – განაცხადა მირიან ნიკოლაძემ.

მისი თქმით, გიორგის სიცოცხლეშივე მიაყენეს დაახლოებით 12 ფიზიკური დაზიანება, რაც ადასტურებს იმას, რომ მის მიმართ გამოიყენეს ფიზიკური ძალადობა, შემდეგ კი მდინარეში გადააგდეს. 

 „გამორიცხულია, რომ ეს დაზიანებები, რომელიც ექსპერტიზის დასკვნაშია აღნიშნული, მიადგეს ადამიანს თუნდაც იმ ფერდობზე დაგორებით, თუნდაც სირბილის, წაქცევის დროს, ეს არის წარმოუდგენელი. დაზიანებები მიყენებულია სახის არეში, ტანზე, ხელების მიდამოებში და ყველგან“, – განაცხადა მირიან ნიკოლაძემ. 

მისი თქმით, დღეიდან ოჯახს კატეგორიული პოზიცია ექნება - ყველა დამნაშავე უნდა მიეცეს სისხლის სამართლის პასუხისგებაში დამამძიმებელ გარემოებაში განზრახ მკვლელობისთვის.

 „პროკურატურის მიერ შემოთავაზებული კვალიფიკაცია, სისხლის სამართლის საქმის სწორი კვალიფიკაციაა.  თუმცა, ჩვენ ვითხოვთ კონკრეტული დამნაშავეების დასჯას  სისხლის სამართლის კოდექსის 109-ე მუხლით. შესაბამისად ველოდებით, როდის იქნება კონკრეტული ბრალდებები წარდგენილი გამოძიების ფარგლებში და როდის დაისჯებიან დამნაშავეები გიორგის განზრახ მკვლელობის გამო“, – განაცხადა ნიკოლაძემ.

საქართველოს პროკურატურამ 19 წლის ფეხბურთელის, გიორგი შაქარაშვილის გარდაცვალების საქმე გადააკვალიფიცირა – „დამამძიმებელ გარემოებებში ჯგუფურად განხორციელებული განზრახ მკვლელობა“.

საქმის დეტალები

პროკურატურის განცხადებით, 19 წლის ახალგაზრდის გარდაცვალების უშუალო მიზეზი გახდა ასფიქსია წყალში დახრჩობის შედეგად.

ამასთან, შაქარაშვილის სხეულზე ექსპერტიზის დროს აღმოჩნდა მრავლობითი ტრავმები, მიყენებული მკვრივი-ბლაგვი საგნის მოქმედებით, სიცოცხლისდროინდელი  დაზიანებები თავის არესა და სხეულზე. 

პროკურატურის განცხადებით, საქმეზე შინაგან საქმეთა სამინისტროში ინტენსიური გამოძიება გრძელდება. მიღებული ექსპერტიზის დასკვნიდან გამომდინარე, მაქსიმალურად სწრაფად და ეფექტიანად ჩასატარებელია მთელი რიგი საგამოძიებო და საპროცესო მოქმედებები, მათ შორის, შესაბამისი საექსპერტო კვლევით დასადგენია დასკვნაში აღნიშნულ დაზიანებათა წარმოშობის მექანიზმები და სხვა მნიშვნელოვანი გარემოებები. ამავდროულად, მისაღებია ბიოლოგიური, ქიმიური, ტრასოლოგიური, საინფორმაციო-ტექნოლოგიური და სხვა პირთა სასამართლო-სამედიცინო ექსპერტიზის დასკვნები.

უწყვეტ რეჟიმში მიმდინარეობს მოწმეთა გამოკითხვები და უკვე მოპოვებული ინფორმაციის ანალიზი.

საქმის სირთულიდან გამომდინარე, საქართველოს პროკურატურა კიდევ ერთხელ მოუწოდებს ყველას, თავი შეიკავონ გადაუმოწმებელი ინფორმაციის გავრცელებისგან.

გამოძიების ვერსიით, 18 ივნისს თბილისის ფეხბურთის კლუბ „საბურთალოს“ აკადემიის აღსაზრდელი 19 წლის გიორგი შაქარაშვილი მეგობართან ერთად იმყოფებოდა მცხეთაში, მეგობრის დაბადების დღის წვეულებაზე, სადაც მოხდა ჩხუბი. მოგვიანებით საქმის გარჩევა გაგრძელდა თბილისისკენ მომავალ ავტომაგისტრალზე, სადაც კონფლიქტის მონაწილეთა ერთმა ნაწილმა თბილისიდან „დამხმარე ძალა“ გამოიძახა. 

მოწმეთა მტკიცებით, გიორგიმ ჩხუბის ადგილი დატოვა და მდინარისკენ გაიქცა, რის შემდეგაც მისი კვალი იკარგება. რამდენიმე დღეში იგი გარდაცვლილი იპოვეს.

საქმეზე 17 პირი ძალადობისა და თავისუფლების მართლსაწინააღმდეგო აღკვეთის ბრალდებითაა დაკავებული. წინასასამართლო მოსმენა  31 ივლისს გაიმართება.

გამოძიება ფეხბურთელის გარდაცვალების საქმეზე მიმდინარეობდა სისხლის სამართლის კოდექსის სამი მუხლით: ჯგუფური ძალადობის ორგანიზება, ჯგუფურ ძალადობაში მონაწილეობა, თავისუფლების უკანონო აღკვეთა, ორი ან მეტი პირის მიმართ ჯგუფური ძალადობა. აღნიშნულ მუხლებს უკვე დაემატა 109-ე მუხლი - განზრახ ჯგუფური მკვლელობა დამამძიმებელ გარემოებაში.

0
თემები:
19 წლის გიორგი შაქარაშვილის მკვლელობის საქმე